Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


26 սեպտեմբերի 2014թ. ք. Երևան

ԵԿԴ-0134/01/14

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`

մեղադրող,
Կենտրոն և Նորք-Մարաշ
վարչական շրջանների դատախազության
դատախազ Վ. Ասատրյանի,


դատարանում, դռնբաց դատական նիստում քննեց գործն ըստ մեղադրանքի
Ռոման Միքայելի Դանիլովի`
ծնված 1986թ. հունիսի 18-ին Բաքու քաղաքում, հայ, Հայաստանի Հանրապետության /այսուհետ ՀՀ/ քաղաքացի, ութամյա կրթությամբ, ամուրի, խնամքին ոչ ոք, վատառողջ` երկրորդ խմբի հաշմանդամ, չի աշխատել, նախկինում երկու անգամ դատված`
1. Երևան քաղաքի Ավան և Նոր Նորք համայնքների առաջին ատյանի դատարանի 2005թ. նոյեմբերի 07-ի դատավճռով, ՀՀ քրեական օրենսգրքի 38-175-րդ հոդվածի 2-րդ մասի 1-ին, 3-րդ, 4-րդ, 5-րդ կետերով, 177-րդ հոդվածի 2-րդ մասի 3-րդ, 4-րդ կետերով և 165-րդ հոդվածի 4-րդ մասով, նույն օրենսգրքի 66-րդ հոդվածի 4-րդ մասի կիրառմամբ դատապարտվել է ազատազրկման 12 /տասներկու/ տարի ժամկետով։ Պատժի սկիզբը հաշվվել է 2005թ. փետրվարի 09-ից։
2. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2013թ. փետրվարի 27-ի դատավճռով, ՀՀ քրեական օրենսգրքի 34-268-րդ հոդվածի 1-ին մասով դատապարտվել է ազատազրկման 6 /վեց/ ամիս ժամկետով։ Նույն օրենսգրքի 67-րդ հոդվածի կիրառմամբ նշանակված պատժին մասնակիորեն գումարվել է նախորդ` Երևան քաղաքի Ավան և Նոր Նորք համայնքների առաջին ատյանի դատարանի 2005թ. նոյեմբերի 7-ի դատավճռով նշանակված պատժի չկրած մասից 3 /երեք/ տարի 11 /տասնմեկ/ ամիս ժամկետով ազատազրկումը և վերջնական պատիժ է նշանակվել ազատազրկում 4 /չորս/ տարի 5 /հինգ/ ամիս ժամկետով, պատժի կրման սկիզբը հաշվելով 2013թ. փետրվարի 27-ից, պատիժը կրում է ՀՀ արդարադատության նախարարության /այսուհետ ԱՆ/ «Դատապարտյալների հիվանդանոց» քրեակատարողական հիմնարկում /այսուհետ ՔԿՀ/, ունի պատժի չկրած մաս` ազատազրկում 2 /երկու/ տարի 10 /տաս/ ամիս 1 /մեկ/ օր, սույն քրեական գործով խափանման միջոց չի ընտրվել, մեղադրվում է ՀՀ քրեական օրենսգրքի 34-268-րդ հոդվածի 1-ին մասով։

Գործի դատավարական նախապատմությունը

Թիվ 86151014 քրեական գործը ՀՀ ԱՆ «Դատապարտյալների հիվանդանոց» ՔԿՀ-ի հետաքննիչի կողմից հարուցվել է 2014թ. փետրվարի 20-ին, ՀՀ քրեական օրենսգրքի 266-րդ հոդվածի 2-րդ մասի 3-րդ կետով և նույն օրն ըստ քննչական ենթակայության ուղարկվել է ՀՀ ոստիկանության քննչական գլխավոր վարչության /այսուհետ ՔԳՎ/ Երևան քաղաքի քննչական վարչության Կենտրոնականի քննչական բաժին և ընդունվել է ավագ քննիչի վարույթ։
Այդ քրեական գործի նյութերով, ՀՀ քրեական օրենսգրքի 34-268-րդ հոդվածի 1-ին մասով, Ռոման Միքայելի Դանիլովի կողմից, զգալի չափի` 0,016 գրամ քաշով բուպրենորֆին տեսակի թմրամիջոց պարունակող թվով 2 «սուբոտեքս» տեսակի դեղահաբ ապօրինի ձեռք բերելու փորձ կատարելու դեպքի առթիվ, 2014թ. հուլիսի 30-ին, նույն քննչական բաժնում հարուցվել է թիվ 15125814 քրեական գործը, որն առանձնացվել է առանձին վարույթում։
Ամբաստանյալ Ռոման Միքայելի Դանիլովին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 34-268-րդ հոդվածի 1-ին մասով հետևյալ արարքի համար` «որ նա, «Դատապարտյալների հիվանդանոց» ՔԿՀ-ում պատիժ կրելու ընթացքում, 2014թ. փետրվարի 19-ին փորձել է ապօրինի ձեռք բերել զգալի չափի` 0,016 գրամ քաշով բուպրենորֆին տեսակի թմրամիջոց պարունակող թվով 2 «սուբոտեքս» տեսակի դեղահաբ, սակայն իր կամքից անկախ հանգամանքներով հանցագործությունն ավարտին չի կարողացել հասցնել, քանի որ նշված թմրամիջոցը նույն օրը` ժամը 16։00-ի սահմաններում «Դատապարտյալների հիվանդանոց» ՔԿՀ-ի հանձնուքների զննության սենյակում Շուշանիկ Ոսկանյանի կողմից բերված դատապարտյալ Ռ. Դանիլովի համար նախատեսված հանձնուքի զննության ժամանակ դրանում առկա պիստակների մեջ հայտնաբերվել է։
Այսինքն, Ռոման Միքայելի Դանիլովը կատարել է հանցավոր արարք, որը նախատեսված է ՀՀ քր. օր-ի 34-268 հոդ.-ի 1-ին մասով։»։
2014թ. օգոստոսի 11-ին Ռոման Դանիլովի վերաբերյալ վերոհիշյալ քրեական գործը մեղադրական եզրակացությամբ ուղարկվել է Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան /այսուհետ Դատարան/ և 2014թ. օգոստոսի 15-ի որոշմամբ ընդունվել է Դատարանի /դատավոր Ա. Վարդանյանի/ վարույթ։
2014թ. սեպտեմբերի 01-ին քրեական գործը վերամակագրվել է նույն դատարանի դատավոր Մ. Մարտիրոսյանին և 2014թ. սեպտեմբերի 03-ի որոշմամբ ընդունվել է վարույթ։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
ՀՀ ԱՆ «Դատապարտյալների հիվանդանոց» ՔԿՀ-ում պատիժ կրող դատապարտյալ, ամբաստանյալ Ռոման Միքայելի Դանիլովը, նախկինում դատապարտված լինելով թմրամիջոցների ապօրինի շրջանառության համար` փորձել է ապօրինի, իր օգտագործման համար ձեռք բերել զգալի չափի «բուպրենորֆին» տեսակի թմրամիջոց պարունակող դեղահաբեր։
Այդ նպատակով, թմրամիջոցը փոխանցելու վերաբերյալ նախապես պայմանավորվածություն ձեռք բերելով գործով ինքնությունը չպարզված անձի հետ` խնդրել է նախկինում իր հետ փաստական ամուսնական հարաբերությունների մեջ գտնված, գործով վկա Շուշանիկ Ոսկանյանին` իր համար հանձնուք ստանալ և բերել ՀՀ ԱՆ «Դատապարտյալների հիվանդանոց» ՔԿՀ` նրան հավաստիացնելով, որ դրանում որևէ արգելված իր չկա։ Շուշանիկ Ոսկանյանը համաձայնվել է։
2014թ. փետրվարի 19-ին, զգալի չափի թմրամիջոցն ապօրինի ձեռք բերելու նպատակով, ՀՀ ԱՆ «Դատապարտյալների հիվանդանոց» ՔԿՀ-ում պատիժ կրող դատապարտյալ, գործով ամբաստանյալ Ռոման Դանիլովը հեռախոսազանգերի միջոցով ուղղորդել է Շուշանիկ Ոսկանյանին, որպեսզի նա Երևան քաղաքի «Երկաթ գծի» կայարանում Ռազմիկ անունով ներկայացած վարորդից և Երևանի Ֆրունզեի անվան փողոցի հարակից տարածքում ինքնությունը չպարզված անձից վերցնի հանձնուքները։ Դրանցից վերջինում գտնվել է զգալի չափի` 0,016 գրամ ընդհանուր քաշով «բուպրենորֆին» տեսակի թմրամիջոց պարունակող, «սուբոտեքս» տեսակի երկու հատ դեղահաբեր։ Վկա Շուշանիկ Ոսկանյանն այդ հանձնուքները տեղափոխել է ՀՀ ԱՆ «Դատապարտյալների հիվանդանոց» ՔԿՀ` Ռոման Դանիլովին հանձնելու համար։ Վերջինս մտադրվել է ստանալ իր համար բերված հանձնուքներն ու դրանցից մեկում առկա նշված թմրամիջոցը։
Ռոման Դանիլովն իր կամքից անկախ հանգամանքներով հանցագործությունն ավարտին չի կարողացել հասցնել, քանի որ նշված թմրամիջոցը նույն օրը, ժամը 16։00-ի սահմաններում, ՀՀ ԱՆ «Դատապարտյալների հիվանդանոց» ՔԿՀ-ի հանձնուքների զննության սենյակում հայտնաբերվել է հանձնուքում առկա պիստակների մեջ։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Ռոման Դանիլովն առաջադրված մեղադրանքում իրեն լիովին մեղավոր է ճանաչել, վատառողջ է` 2-րդ խմբի հաշմանդամ, նախկինում երկու անգամ ազատազրկման է դատապարտվել դիտավորյալ հանցագործություններ կատարելու համար։
Քրեական գործի նախաքննության ընթացքում կատարվել է թմրամիջոցների դատաքրեագիտական փորձաքննություն (Հմ` 06141405, 20 փետրվարի 2014թ.)` «ՀՀ փորձագիտական կենտրոն» պետական ոչ առևտրային կազմակերպության կողմից, որի արժեքը կազմել է 33.600 /երեսուներեք հազար վեց հարյուր/ ՀՀ դրամ։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Ռոման Միքայելի Դանիլովն առաջադրված մեղադրանքում իրեն լիովին մեղավոր է ճանաչել և ցուցմունքներ է տվել այն մասին, որ փորձել է ապօրինի ձեռք բերել նշված թմրամիջոցը, դրանում միակ մեղավորն ինքն է։
Թմրամիջոցը փոխանցողն ինքը պետք է բերեր այն։ Քանի որ հանձնուքը տալիս ձգձգումներ են լինում, ուստի ասել է, որ հանձնուքը բերի Շուշանիկը, իսկ այդ անձը տեսակցության ժամանակ պետք է բերեր թմրամիջոցը։
/դատական նիստի արձանագրություն, գ.թ. 187/
Վկա Շուշանիկ Գրիգորի Ոսկանյանի ցուցմունքներով այն մասին, որ նախկինում փաստական ամուսնության մեջ է եղել ամբաստանյալ Ռոման Դանիլովի հետ, նրա հետ շարունակել է շփվել հեռախոսազանգերի միջոցով։ 2014թ. փետրվարի 17-ին Ռոման Դանիլովը զանգահարել է իրեն և խնդրել հաջորդ օրն իրեն հանձնուք փոխանցել։ Այնուհետև նա զանգահարել և հայտնել է, որ հանձնուքը փոխանցելու են 2014թ. փետրվարի 19-ին։ Այդ օրը Ռոման Դանիլովը զանգահարել և ուղղորդել է իրեն` հանձնուքները ձեռք բերելու գործում։ Հանձնուքներն իրեն անծանոթ անձանցից ստանալուց հետո, Ռոման Դանիլովի ուղղորդմամբ գնացել է ՀՀ ԱՆ «Դատապարտյալների հիվանդանոց» ՔԿՀ և այդ ամենը հանձնել է համապատասխան ստուգման սենյակ, որտեղ, զննության ընթացքում, հանձնուքում եղած պիստակների միջից հայտնաբերվել է թմրամիջոց։
Հանձնուքներից մեկի մեջ առկա թմրամիջոցի մասին ինքը չի իմացել։
/դատական նիստի արձանագրություն, գ.թ. 54-56, 85-86/
Դատաքրեագիտական փորձաքննության 2014թ. փետրվարի 20-ի Հմ` 06141405 եզրակացությամբ, որի համաձայն`
«ա/բ/ Փորձաքննությանը ներկայացված 2 հատ, 0,4-ական գրամ քաշով, գործարանային արտադրության, «B8» դաջվածքով, սպիտակ գույնի դեղահատերը իրենց բաղադրության մեջ պարունակում են ընդհանուր 0,016 գրամ քաշով «բուպրենորֆին» տեսակի թմրամիջոց։»։
/գ.թ. 41-44/
Հանձնուքի զննություն կատարելու մասին 2014թ. փետրվարի 19-ի արձանագրությամբ, որի համաձայն`
2014թ. փետրվարի 19-ին, ժամը 16։00-ի սահմաններում ՀՀ ԱՆ «Դատապարտյալների հիվանդանոց» ՔԿՀ-ի հանձնուքների զննության և ընդունման համար նախատեսված սենյակում զննության է ենթարկվել քաղաքացուհի Շուշանիկ Գրիգորի Ոսկանյանի կողմից ներկայացված դատապարտյալ Ռոման Միքայելի Դանիլովի համար նախատեսված հանձնուքը, որի ընթացքում հանձնուքում առկա պիստակի /ֆստղ/ հատիկների միջից հայտնաբերվել է թվով երկու հատ, թափանցիկ պոլիէթիլենային տոպրակի մեջ փաթեթավորված, «B8» դաջվածքով դեղահաբեր։ Հայտնաբերված դեղահաբերը կշռվել են էլեկտրոնային ոսկերչական կշեռքով, քաշը կազմել է ընդհանուր 0,81 գրամ։
/գ.թ. 3-6/
Հեռախոսազանգերի վերծանումները զննելու մասին 2014թ. հուլիսի 07-ի արձանագրությամբ, որի համաձայն`
Ռոման Դանիլովի 093-25-17-13, ինչպես նաև 094-34-30-60 հեռախոսահամարներից 2014թ. փետրվար ամսվա ընթացքում բազմաթիվ հեռախոսազանգեր են կատարվել Շուշանիկ Ոսկանյանի օգտագործած 098-09-25-27 հեռախոսահամարին, ինչպես նաև դեպքի օրը` 2014թ. փետրվարի 19-ին, Ռոման Դանիլովի նշված հեռախոսահամարներից զանգեր են կատարվել նաև Շուշանիկ Ոսկանյանի օգտագործած 095-161-169 հեռախոսահամարին։
Մասնավորապես` Ռոման Դանիլովի 094-34-30-60 հեռախոսահամարից ելքային զանգեր են տեղի ունեցել Շուշանիկ Ոսկանյանի 098-09-25-27 հեռախոսահամարին 25.01.2014թ. ժամը 15։18-ին, 02.02.2014թ. ժամը 21։43-ին, 22։19-ին, 22։32-ին, 04.02.2014թ. ժամը 23։09-ին, 11.02.2014թ. ժամը 19։32-ին, 14.02.2014թ. ժամը 12։35-ին, 15.02.2014թ. ժամը 15։56-ին, 17.02.2014թ. ժամը 21։43-ին` 11 րոպե 38 վայրկյան տևողությամբ, իսկ 19.02.2014թ. ժամը 14։23-ից մինչև ժամը 15։15-ն ընկած ժամանակահատվածում կատարվել են թվով 9 զանգեր։
Ռոման Դանիլովի 093-25-17-13 հեռախոսահամարից ելքային հեռախոսազանգեր են եղել Շուշանիկ Ոսկանյանի 098-09-25-27 հեռախոսահամարին 07.02.2014թ. ժամը 20։58-ին, 09.02.2014թ. ժամը 18։10-ին, 10.02.2014թ. ժամը 17։30-ին, 20։51-ին, 11.02.2014թ. ժամը 14։15-ին, 16։32-ին, 17։28-ին, 19։42-ին, 18.02.2014թ. ժամը 12։34-ին` 55 վայրկյան, 19.02.2014թ. ժամը 11։40-ին 32 րոպե տևողությամբ զանգ և երկու զանգեր ժամը 14։43-ին և 15։22-ին։
Ռոման Դանիլովի հեռախոսազանգերը սպասարկվել են Երևանի Արշակունյաց 2ա հասցեում տեղադրված ալեհավաքի կողմից։
Շուշանիկ Ոսկանյանի 098-09-25-27 հեռախոսահամարից Ռոման Դանիլովի 093-25-17-13 հեռախոսահամարին ելքային զանգ է գրանցվել 19.02.14թ. ժամը 14։43-ին, որը սպասարկվել է Երևանի Արշակունյաց պողոտայի թիվ 2ա հասցեում տեղակայված ալեհավաքի կողմից։
Ռոման Դանիլովի 091-99-10-69 հեռախոսահամարից ֆիքսվել է ելքային հեռախոսազանգ Շուշանիկ Ոսկանյանի 095-161-169 հեռախոսահամարին 19.02.14թ. ժամը 15։46-ին 27 վայրկյան և նույն օրը ժամը 15։52-ին` մուտքային զանգ 130 վայրկյան տևողությամբ։
Շուշանիկ Ոսկանյանի օգտագործած 098-09-25-27 հեռախոսահամարին մուտքային զանգ է ֆիքսվել 096-355-834 հեռախոսահամարից 18.02.2014թ. ժամը 11։36-ին 139 վայրկյան տևողությամբ։
/գ.թ. 174-175/
Որպես այլ փաստաթուղթ` ապացույց ճանաչված, «Ղ-Տելեկոմ» և «ԱրմենՏել» փակ բաժնետիրական ընկերություններից ,դատարանի որոշման հիման վրա ստացված քրեական գործի նյութերում առկա հեռախոսահամարների վերծանումները պարունակող թվով երկու լազերայաին սկավառակներով, որոնց զննությամբ հիմնավորվել է Ռոման Դանիլովի և Շուշանիկ Ոսկանյանի միջև դեպքի օրը տեղի ունեցած ակտիվ հեռախոսակապը։
/գ.թ. 94, 107, 177/
Իրեղեն ապացույց ճանաչված, Շուշանիկ Ոսկանյանի կողմից բերված, դատապարտյալ Ռոման Դանիլովի համար նախատեսված հանձնուքի զննությամբ հայտնաբերված, 0,016 գրամ քաշով «բուպրենորֆին» տեսակի թմրամիջոց պարունակող 2 դեղահաբերով։
/գ.թ. 140/


Դատարանի իրավական վերլուծությունները

Վերլուծելով ամբաստանյալ Ռոման Միքայելի Դանիլովին առաջադրված մեղադրանքը, նրա ցուցմունքները և գործով ձեռք բերված ապացույցները, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ` դատարանը գտնում է, որ ամբաստանյալ Ռոման Միքայելի Դանիլովի կողմից, նրա մեղավորությամբ, առանց իրացնելու նպատակի զգալի չափերով թմրամիջոց ապօրինի ձեռք բերելու փորձ կատարելն ապացուցված է, նրա այդ արարքը ճիշտ է որակված և համապատասխանում է ՀՀ քրեական օրենսգրքի 34-268-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Ռոման Դանիլովի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա վատառողջ է` 2-րդ խմբի հաշմանդամ, իրեն լիովին մեղավոր է ճանաչել, նախկինում երկու անգամ դատապարտվել է ազատազրկման` դիտավորյալ հանցագործություններ կատարելու համար։
Ամբաստանյալ Ռոման Միքայելի Դանիլովի նկատմամբ, նրա կատարած հանցագործության համար պատիժ նշանակելիս, որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցագործությունների վտանգավոր ռեցիդիվը։
Ամբաստանյալի պատասխանատվությունը և պատիժը մեղմացնող հանգամանքներ առկա չեն։
Ամբաստանյալ Ռոման Դանիլովն իր կատարած հանցագործության համար ենթակա է պատժի, քանի որ դրան խոչընդոտող հանգամանքներ առկա չեն։
Քննարկելով ամբաստանյալի նկատմամբ պատիժ նշանակելու հարցը` դատարանը գտնում է հետևյալը.
ՀՀ քրեական օրենսգրքի 22-րդ հոդվածի համաձայն`
«1. Հանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար։
2. Հանցագործությունների ռեցիդիվը վտանգավոր է համարվում՝
1) դիտավորությամբ հանցանք կատարելու դեպքում, եթե անձը նախկինում երկու անգամից ոչ պակաս ազատազրկման է դատապարտվել դիտավորյալ հանցագործության համար.
(…)»։
Նույն օրենսգրքի 65-րդ հոդվածի համաձայն`
«(…)
3. Հանցափորձի համար ազատազրկման ձևով պատժի ժամկետը չի կարող գերազանցել սույն օրենսգրքի Հատուկ մասի համապատասխան հոդվածով կամ հոդվածի մասով որոշակի ժամկետով ազատազրկման ձևով նախատեսված պատժի առավելագույն ժամկետի երեք քառորդը։
(…)
4.1 Սույն հոդվածի երկրորդ և երրորդ մասերով նախատեսված կանոնները չեն կիրառվում հանցագործությունների ռեցիդիվի, վտանգավոր և առանձնապես վտանգավոր ռեցիդիվի դեպքում պատիժ նշանակելիս։»։
Նույն օրենսգրքի 67-րդ հոդվածի համաձայն`
«1. Եթե դատավճիռ կայացնելուց հետո, բայց մինչև պատժի լրիվ կրելը դատապարտյալը նոր հանցանք է կատարել, ապա դատարանը նոր դատավճռով նշանակված պատժին լրիվ կամ մասնակիորեն գումարում է նախորդ դատավճռով նշանակված պատժի չկրած մասը։
(…)
4. Դատավճիռների համակցությամբ վերջնական պատիժը պետք է ավելի մեծ լինի ինչպես նոր հանցագործության համար նշանակված պատժից, այնպես էլ նախորդ դատավճռով նշանակված պատժի չկրած մասից։
(…)»։
Նույն օրենսգրքի 67.1 հոդվածի համաձայն`
«1. Հանցագործությունների ռեցիդիվի, վտանգավոր և առանձնապես վտանգավոր ռեցիդիվի դեպքում պատիժ նշանակելիս հաշվի են առնվում կատարված հանցագործությունների քանակը, բնույթը և ծանրությունը, այն հանգամանքները, որոնց հետևանքով նախկին պատիժը բավարար չի եղել մեղավորի ուղղման համար, ինչպես նաև նոր հանցագործության բնույթը, ծանրությունը և հետևանքները։
2. (…)
Հանցագործությունների վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երկու երրորդից։
(…)»։
Նույն օրենսգրքի 69-րդ հոդվածի համաձայն`
«1. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, կարգապահական գումարտակում պահելու, ազատազրկման ժամկետները հաշվարկվում են ամիսներով և տարիներով։ Հանրային աշխատանքների ժամկետը հաշվարկվում է ժամերով։ Կալանքի ժամկետը հաշվվում է օրերով և ամիսներով։
2. Սույն հոդվածի առաջին մասում նշված պատիժները փոխարինելիս կամ գումարելիս, ինչպես նաև պատիժը հաշվակցելիս ժամկետները կարող են հաշվարկվել օրերով։
3. Մինչև դատավճռի օրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման, կարգապահական գումարտակում պահելու ձևով նշանակված պատժին՝ մեկ օրը հաշվելով մեկ օրվա դիմաց, իսկ հանրային աշխատանքների դեպքում՝ մեկ օրը երեք ժամի դիմաց։
(…)»։
Նույն օրենսգրքի 76-րդ հոդվածի համաձայն`
(…)
6. Եթե պատժի չկրած մասի ընթացքում դատապարտյալը՝
(…)
3) կատարում է դիտավորյալ հանցանք, ապա դատարանը նրա նկատմամբ պատիժ է նշանակում սույն օրենսգրքի 67-րդ հոդվածով նախատեսված կանոններով։ (…)։»։
Ամբաստանյալ Ռոման Դանիլովն իրեն մեղսագրվող դիտավորյալ հանցագործությունը կատարել է` նախկինում երկու անգամ ազատազրկման դատապարտված լինելով դիտավորյալ հանցագործությունների համար, այսինքն` առկա է հանցագործությունների վտանգավոր ռեցիդիվ։
Հետևաբար, ՀՀ քրեական օրենսգրքի 34-268-րդ հոդվածի 1-ին մասով նախատեսված հանցագործության կատարման համար ամբաստանյալ Ռոման Դանիլովը ենթակա է պատժի ազատազրկման ձևով, որը չի կարող նվազ լինել ութ ամիս ժամկետով ազատազրկումից, քանի որ այդ հոդվածի սանկցիայով որպես առավելագույն պատիժ սահմանված է ազատազրկում մեկ տարի ժամկետով։
Հաշվի առնելով, որ ամբաստանյալ Ռոման Դանիլովի կողմից նոր հանցանք է կատարվել ԵԿԴ/0024/01/12 քրեական գործով Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2013թ. փետրվարի 27-ի դատավճիռը կայացնելուց հետո, բայց մինչև պատժի լրիվ կրելը` դատարանը գտնում է, որ ՀՀ քրեական օրենսգրքի 67-րդ հոդվածի 1-ին մասով սահմանված կարգով, նոր դատավճռով նշանակված պատժին մասնակիորեն գումարման է ենթակա նախորդ դատավճռով նշանակված պատժի չկրած մասից 2 /երկու/ տարի 3 /երեք/ ամիս ժամկետով ազատազրկումը։
Դատարանը գտնում է, որ իր նկատմամբ նշանակված պատիժն ամբաստանյալ Ռոման Դանիլովը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 2014թ. հունիսի 13-ի որոշմամբ իրեղեն ապացույց ճանաչված 0,016 գրամ քաշով բուպրենորֆին տեսակի թմրամիջոց պարունակող թվով 2 դեղահաբերը պետք է ոչնչացնել։
Քննարկելով խափանման միջոցների հարցը` դատարանը գտնում է հետևյալը`
Սույն քրեական գործով խափանման միջոց ամբաստանյալ Ռոման Դանիլովի նկատմամբ չի ընտրվել։ Հաշվի առնելով, որ այլ հանցագործություններ կատարած լինելու պատճառով նա շարունակում է ազատազրկման ձևով պատիժ կրել, ունի 2 /երկու/ տարի 10 /տաս/ ամիս 1 /մեկ/ օր ժամկետով պատժի չկրած մաս` դատարանը գտնում է, որ ամբաստանյալ Ռոման Դանիլովի կողմից քրեական պատասխանատվությունից և նշանակված պատիժը կրելուց խուսափելու հավանականությունը ցածր է, ուստի նրա նկատմամբ խափանման միջոց ընտրելու հիմքեր առկա չեն։
Քննարկելով դատական ծախսերի հարցը` դատարանը գտնում է, որ ամբաստանյալից հօգուտ ՀՀ պետական բյուջեի, որպես դատական ծախս բռնագանձման է ենթակա դատաքրեագիտական փորձաքննության կատարման արժեք հանդիսացող 33.600 /երեսուներեք հազար վեց հարյուր/ ՀՀ դրամ գումար։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-րդ, 365-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Ռոման Միքայելի Դանիլովին մեղավոր ճանաչել Հայաստանի Հանրապետության քրեական օրենսգրքի 34-268-րդ հոդվածի 1-ին մասով նախատեսված հանցանքում և դատապարտել ազատազրկման 9 /ինը/ ամիս ժամկետով։
ՀՀ քրեական օրենսգրքի 67-րդ հոդվածի 1-ին մասով սահմանված` պատիժների մասնակի գումարման սկզբունքի կիրառմամբ, նշանակված պատժին մասնակիորեն գումարել նախորդ` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2013թ. նոյեմբերի 07-ի դատավճռով նշանակված պատժի չկրած մասից` ազատազրկում 2 /երկու/ տարի 3 /երեք/ ամիս ժամկետով և ամբաստանյալ Ռոման Միքայելի Դանիլովի նկատմամբ պատիժ նշանակել ազատազրկում 3 /երեք/ տարի ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2014թ. սեպտեմբերի 26-ից։
Դատավճռի օրինական ուժի մեջ մտնելուց հետո, 2014թ. հունիսի 13-ի որոշմամբ իրեղեն ապացույց ճանաչված 0,016 գրամ քաշով բուպրենորֆին տեսակի թմրամիջոց պարունակող թվով 2 դեղահաբերը ոչնչացնել։
Ամբաստանյալ Ռոման Միքայելի Դանիլովից հօգուտ ՀՀ պետական բյուջեի բռնագանձել 33.600 /երեսուներեք հազար վեց հարյուր/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։

ԴԱՏԱՎՈՐ` Մ. ՄԱՐՏԻՐՈՍՅԱՆ