Գործ
ԵԿԴ/0090/01/14

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

,,12,, օգոստոսի 2014թ. ք.Երևան

ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը
/այսուհետև` դատարան/


Նախագահությամբ դատավոր Մ. ՄԱԿՅԱՆԻ


Քարտուղարությամբ՝ Թ. Խաչատրյանի

Մասնակցությամբ`


Մեղադրող Տ. Պողոսյանի

դռնբաց դատական նիստում, Երևան քաղաքում քննեց քրեական գործն ըստ մեղադրանքի`

Արթուր Արտակի Քրմոյանը` ծնված 01.12.1993թ.-ին Երևան
քաղաքում, ազգությամբ հայ, ՀՀ քաղաքացի, չդատված,
չամուսնացած, միջնակարգ կրթությամբ, չի աշխատում,
բնակվող է ք. Երևան Անդրանիկի փողոցի 31 շենքի թիվ 53
բնակարանում, մեղադրվում է ՀՀ Քրեական օրենսգրքի 268-րդ
հոդվածի 1-ին մասով։


1.Գործի դատավարական նախապատմությունը

Ըստ դատարան ստացված քրեական գործի նյութերի և մեղադրական եզրակացության՝

«Երևան քաղաքի Անդրանիկի փողոցի 31-րդ շենքի թիվ 53-րդ բնակարանի բնակիչ Արթուր Արտակի Քրմոյանը, 2013թ. աշնանը, Արմավիրի մարզում, ճամփեզրին կից դաշտից վայրի աճած կանեփի թուփը քաղելու, ապա չորացնելու և մանրացնելու միջոցով, առանց իրացնելու նպատակի՝ իր գործածման համար, ապօրինի պատրաստել և պահել է 0.8 գրամը գերազանցող քաշով մարիխուանա տեսակի թմրամիջոց, որի մի մասը ծխելու միջոցով օգտագործել է, իսկ զգալի չափի 0.8 գրամ հաստատուն քաշով մարիխուանա տեսակի թմրամիջոցը հետագա գործածման համար ապօրինի պահել է իր մոտ, որը 2014թ. փետրվարի 15-ին, ժամը 23.50-ի սահմաններում, հայտնաբերվել է վերջինիս մոտից ՀՀ ոստիկանության Կենտրոնականի բաժնում կատարված անձնական խուզարկության ժամանակ։

Դեպքի առթիվ 28.02.2014թ. ՀՀ ոստիկանության ՔԳՎ Երեան քաղաքի ՔՎ կեատրոնակականի քննչական բաժնում քրեական օրենսգրքի 268 հոդվածի 1-ին մասով հարուցվել Է թիվ 13124214 քրեական գործը։

Նախաքննությամբ հիմնավորված գործի փաստական հանգամանքները

Սույն գործով մեղադրյալ Երևան քաղաքի Անդրանիկի փողոցի 31 շենքի թիվ 53 բնակարանի բնակիչ Արթուր Արտակի Քրմոյանը 2013թ. աշնանը Արմավիրի մարզից Երևան քաղաք վերադառնալու ճամփեզրին կից գտնվող դաշտում նկատել է բնական պայմաններում աճող կանեփի թփեր։ Տեսնելով դաշտում աճող կանեփր, որոշել է քաղել մի ճյուղ, այն հետագայում չորացնելու և մանրացնելու միջոցով պատրաստել մարիխուանա տեսակի թմրամիջոց, իր անձնական օգտագործման համար։Վերադառնալով Երևան կանփի թմփերը չորացնելու և մանրացնելու միջոցով պատրաստել է մարիխուանա տեսակի թմրամիջոց և այն պահել է իրենց շենքի բակում առկա ավտոտնակների միջնամասում գտնվող տարածքում։ 2014թ. փետրվարի 15-ին ցերեկվա ժամերին բակում միայնակ օգտագործել է մարիխուանա տեսակի թմրամիջոց, որից հետո զանզվածը փաթեթավորել է սպիտակ թղթի մեջ և դրել է գրպանը։ Երեկոյան հանդիպել է իր ընկեր գործով վկա Լևոն Սուրենի Վարդանյանին, ում հետ գնացել է Երևան քաղաքի Սարյան փողոց, որտեղ վերջիններս հանդիպել են գործով վկա Նորայր Սայաթի Եգորյանին և երեքով պատահական տաքսի ավտոմեքենայով ուղևորվել են դեպի Երևաև քաղաքի Էրեբուևի վարչական շրջան։ Ճանապարհին «Փեթակ» առևտրի կենտրոնի մոտ տաքսի ավտոմեքենայի վարորդին խնդրել են կայանել ավտոմեքենան, որ Լ.Վարդանյանը լիցքավորի իր եղբոր բջջային հեռախոսը և այդ պահին իրենց մոտեցել են ոստիկանության աշխատակիցները և բերման ենթարկել ոստիկանության բաժին թմրամիջոց պահելու և օգտագործելու կասկածանքով, որտեղ էլ մեղադրյալ Ա.Քրմոյանի անձնական խուզարկության ժամանակ հայտնաբերվել է ապօրինի պահվող 0.8 գրամ հաստատուն քաշով մարիխուանա տեսակի թմրամիջոցը»։

Դեպքի առթիվ 28.02.2014թ. ՀՀ ոստիկանության ՔԳՎ Երեան քաղաքի ՔՎ կեատրոնակականի քննչական բաժնում քրեական օրենսգրքի 268 հոդվածի 1-ին մասով հարուցվել Է թիվ 13124214 քրեական գործը։

10.03.2013թ.-ին ՀՀ Ոստիկանության քննչական գլխավոր վարչության Կենտրոնականի քննչական բաժնի կողմից կայացվել է որոշում` Արթուր Քրմոյանին որպես մեղադրյալ ներգրավելու մասին և նրա մեղադրանք է առաջադրվել ՀՀ քրեական օրենսգրքի 268-րդ հոդվածի 1-ին մասով։

Քրեական գործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի գրասենյակ է ստացվել և մուտքագրվել 16.06.2014թ.-ին։

2.Ապացույցների հետազոտում և գնահատում

ՀՀ քրեական օրենսգրքի 268-րդ հոդվածի 1-ին մասով առաջադրված մեղադրանքում ամբաստանյալ Արթուր Քրմոյանն իրեն դատարանում մեղավոր է ճանաչել լիովին և ցուցմունք է տվել այն մասին, որ 2013թ. աշնանը գնացել է Արմավիրի մարզ՝ ընկերոջը Ֆրանսիայի հանրապետություն ճանապարհելու նպատակով։ Այնտեղից պատահական տաքսի ավտոմեքենայով Երևան քաղաք վերադառնալու ճանապարհին խնդրել է տաքսու վարորդին կայանել ավտոմեքենան՝ անձնական կարիքները հոգալու նպատակով։ Այդ ընթացքում դաշտում նկատել է կանեփի թփեր։ Տեսնելով դաշտում աճող կանեփը, քաղել է մի ճյուղ, այն հետագայում չորացնելու համար և մանրացնելու միջոցով իր անձնական օգտագործման համար պատրաստել է մարիխուանա տեսակի թմրամիջոց, որը պահել է իրենց բակում։ Չի հիշում, թե երբ, դրանից մեկ ամգամ միայնակ օգտագործել է, որի ընթացքում անցորդ է նկատել և այդ զանգվածը փաթեթավորել և դրել է գրպանը։ Դրանից հետո, իրեն բերման են ենթարկել ոստիկանության բաժին՝ թմրամիջոց պահելու և օգտագործելու կասկածանքով, որտեղ էլ իր անձնական խուզարկության ժամանակ ոստիկանության աշխատակիցների կողմից հայտնաբերվել է իր մոտ պահվող մարիխուանա տեսակի թմրամիջոցը։ Նշել է, որ այդ դեպքը եղել է առաջին անգամը և ինքը չի գիտակցել, որ այդ արարքը քրեորեն պատժելի է։ Զղջում է կատարածի համար և ընդունում իրեն առաջադրված մեղադրանքը։

/տես` դատական նիստի արձանագրությունը/

Բացի իր խոստովանական ցուցմունքներից, ամբաստանյալ Արթուր Քրմոյանին առաջադրված մեղադրանքը հիմնավորվել է նաև դատարանում հետազոտված ներքոհիշյալ ապացույցներով՝

ՀՀ քրեական դատավարության օրենսգրքի 342-րդ հոդվածի կարգով հրապարակված՝ վկա Լևոն Սուրենի Վարդանյանի նախաքննական ցուցմունքով այն մասին, որ 2014թ. երեկոյան ժամերին հանդիպել է իր ընկեր Արթուր Արտակի Քրմոյանի և Նորայր Սայաթի Եգորյանի հետ։ Վերջիններիս հետ պատահական տաքսի ավտոմեքենայով ուղևորվել են դեպքի Երևան քաղաքի Էրեբունի վարչական շրջան։ Ճանապարհին «փեթակ» առևտրի կենտրոնի մոտ տաքսի ավտոմեքենայի վարորդին խնդրել են կայանել ավտոմեքենան եղբոր բջջային հեռախոսահամարը լիցքավորելու նպատակով և այդ պահին իրենց են մոտեցել ոստիկանության աշխատակիցները ու բերման ենթարկել ոստիկանության Կենտրոնականի բաժին՝ թմրամիջոց պահելու և օգտագործելու կասկածանքով։ Արդեն ոստիկանության բաժնում տեղեկացել է, որ Ա.Քրմոյանի անձնական խուզարկության ժամանակ ոստիկանության աշխատակիցների կողմից հայտնաբերվել է վերջինիս մոտ ապօրինի պահվող մարիխուանա տեսակի թմրամիջոց։

/տես` գ.թ. 74-75, դատական նիստի արձանագրությունը/

ՀՀ քրեական դատավարության օրենսգրքի 342-րդ հոդվածի կարգով հրապարակված՝ վկա Նորայր Եգորյանի նախաքննական ցուցմունքով այն մասին, որ 2014թ. երեկոյան ժամերին հանդիպել է իր ընկեր Արթուր Արտակի Քրմոյանի և Լեոն Սուրենի Վարդանյանի հետ։ Վերջիններիս հետ պատահական տաքսի ավտոմեքենայով ուղևորվել են դեպքի Երևան քաղաքի Էրեբունի վարչական շրջան։ Ճանապարհին, «Փեթակ» առևտրի կենտրոնի մոտ տաքսի ավտոմեքենայի վարորդին Լ.Վարդանյանը խնդրել է կայանել ավտոմեքենան եղբոր բջջային հեոախոսահամարը լիցքավորելու նպատակով և այդ պահին իրենց են մոտեցել ոստիկանության աշխատակիցները և բերման ենթարկել ոստիկանության Կենտրոնականի բաժին՝ թմրամիջոց պահելու և օգտագործելու կասկածանքով։ Հետագայում տեղեկացել է, որ ոստիկանության բաժնում Ա.Քրմոյանի անձնական խուզարկության ժամանակ ոստիկանության աշխատակիցների կողմից հայտնաբերվել է վերջինիս մոտ ապօրինի պահվող մարիխուանա տեսակի թմրամիջոցը։

/տես` գ.թ. 90-91, դատական նիստի արձանագրությունը/

Դատարանում հրապարակված և հետազոտված՝

Դատաքիմիական փորձաքննության թիվ 42Ք-14 եզրակցությամբ, համաձայն որի՝ ներկայացված բուսական ծագմամբ 0.8 գրամ հաստատուն քաշով նյութը հանդիսանում է մարիխուանա տեսակի թմրամիջոց։

/տես` գ.թ. 18-20, դատական նիստի արձանագրությունը/

Դատատոկսիկոքիմիական փորձաքննության թիվ 14-0485 եզրակցությամբ, համաձայն որի՝ մեղադրյալ Արթուր Արտակի Քրմոյանից վերցրած մազի և մեզի փորձանմուշների մեջ հայտնաբերվել են կանաբինոիդների խմբին պատկանող թմրամիջոցի թմրակալոիդներ։

/տես` գ.թ. 49-52, դատական նիստի արձանագրությունը/

Մեղադրյալ Արթուր Արտակի Քրմոյանի անձնական խուզարկության արձանագրությամբ, համաձայն որի՝ մեղադրյալ Արթուր Արտակի Քրմոյանի մոտից հայտնաբերվել է սպիտակ գույնի թղթյա փաթեթ, որի մեջ առկա է դեղնականաչավուն զանգված։

/տես` գ.թ. 8, դատական նիստի արձանագրությունը/

Իրեղեն ապացույց ճանաչված, փորձաքննությունից հոտ առկա, 0.7 գրամ հաստատուն քաշով մարիխուանա տեսակի թմրամիջոցի առկայությամբ։

/տես` գ.թ. 132, դատական նիստի արձանագրությունը/

Դատարանում հրապարակվել և հետազոտվել է նաև Արթուր Քրմոյանի վերաբերյալ ՀՀ ոստիկանության ինֆորմացիոն կենտրոնի կողմից տրված պահանջագիրը, վերջինիս վերաբերյալ տրված բնութագիրը և ՀՀ ԱՆ «Նարկոլոգիական հանրապետական կենտրոն» ՓԲԸ-ի կողմից տրված գրությունը։

/տես` գ.թ. 73 և 136 քրեական գործի դատաքննական նյութերը և դատական նիստի արձանագրությունը/

3. Դատարանի իրավական վերլուծությունները

Դատարանը, ՀՀ քրեական դատավարության օրենսգքրի 127-րդ հոդվածի դրույթներին համապատասխան, հետազոտելով և գնահատելով գործով ձեռք բերված ապացույցներն իրենց համակցությամբ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, ապացուցված է համարում, որ ամբաստանյալ Արթուր Քրմոյանը կատարել է արարք` նախատեսված ՀՀ քրեական օրենսգրքի 268-րդ հոդվածի 1-ին մասով, ուստի գտնում է, որ Արթուր Քրմոյանը կատարած հանցավոր արարքի համար ենթակա է պատժի։

Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։

Որպես Արթուր Քրմոյանի անձը բնութագրող հանգամանք դատարանը հաշվի է առնում ՀՀ Երևան քաղաքի Մալաթիա-Սեբաստիա թաղամասի «Գավառ» համատիրության կառավարիչ Վ.Սահյանի կողմից տրված բնութագիրը, համաձայն որի` «Արթուր Արտակի Քրմոյանը բնակվում է Հ/Ա Ա-3թ. Անդրանիկի փող. թիվ 31 շենք 53 բնակարանում` մոր և երկու անչափահաս քույրիկների հետ։ Արթուրի խնամքին են գտնվում մայրն ու դպրոցական քույրերը։ Արթուրն իր ընտանիքին նվիրված, խելացի զուսպ, և համեստ երիտասարդ է, ով երբևէ աչքի չի ընկել արտառոց արարքներով, անկարգությամբ։ Նա գիշերուզօր աշխատում է` հոգալու իրենց ընտանիքի կարիքները, մանավանդ, որ բնակվում են վարձով։ Նյութական ծանր պայմանները, ծնողի առողջության խնդիրները, քույրերի դպրոցի և կենցաղային այլ հարցեր ծանրացած են տղայի ուսերին։ Արթուր Քրմոյանը ընկերասեր, խելացի և բարոյապես կայուն երիտասարդ է»։

/տես` քրեական գործի նյութերը և դատական նիստի արձանագրությունը/

Բացի այդ, որպես Արթուր Քրմոյանի անձը բնութագրող հանգամանք, դատարանը հաշվի է առնում նաև այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում դատապարտված չի եղել։

/տես` գ.թ. 73, դատական նիստի արձանագրությունը/

Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն` որպես ամբաստանյալ Արթուր Քրմոյանի պատասխանատվությունը և պատիժը մեղմացնող հանգամանք է դիտում նախաքննության և դատական քննության ընթացքում խոստովանական ցուցմունքներով հանդես գալը, կատարած հանցանքի համար անկեղծորեն զղջալը, նրա երիտասարդ տարիքը։

/տես` դատական նիստի արձանագրությունը/

Դատարանն անդրադառնալով ՀՀ քրեական օրենսգրքի 63-րդ հոդվածի համաձայն ամբաստանյալ Արթուր Քրմոյանի արարքում նրա պատասխանատվությունը և պատիժը ծանրացնող հանգամանքների առկայության հարցին, փաստում է, որ գործով այդպիսիք չկան։

/տես՝ քրեական գործի նյութերը և դատական նիստի արձանագրությունը/

Ելնելով գործի հանգամանքներից, ինչպես նաև հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի՝ «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի՝ «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և 61-րդ հոդվածը, ըստ որի՝ «Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Արթուր Քրմոյանի կողմից կատարված հանցավոր արարքի համար նրա նկատմամբ պետք է պատիժ նշանակվի կալանքի ձևով։

Միաժամանակ, հաշվի առնելով ամբաստանյալի արարքում պատասխանատվությունն ու պատիժը մեղմացնող հանգամանքների առկայությունն ու պատասխանատվությունն ու պատիժը ծանրացնող հանգամանքների բացակայությունը, ղեկավարվելով ՀՀ քրեական օրենսգրքի 70-րդ հոդվածով, դատարանը եկավ այն համոզման, որ ամբաստանյալի նկատմամբ նշանակվող պատիժը կարելի է պայմանականորեն չկիրառել և սահմանել փորձաշրջան, նկատի ունենալով, որ նրա ուղղվելը հնարավոր է նաև առանց այն փաստացի կրելու։

Դատարանը գտնում է, որ ամբաստանյալի նկատմամբ նշանակված պատիժը պայմանականորեն չպետք է կիրառել՝ նշանակված պատիժը նրա կողմից փաստացի կրելու անհրաժեշտության բացակայության հիմնավորմամբ, ինչը պատճառաբանվում է հետևյալով.

ՀՀ քրեական օրենսգրքի 70-րդ հոդվածի 1-ին մասի համաձայն՝ «եթե դատարանը կալանքի, ազատազրկման կամ կարգապահական գումարտակում պահելու ձևով պատիժ նշանակելով հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին»։

Քննվող քրեական գործով դատարանն ամբաստանյալի նկատմամբ պատիժը պայմանականորեն չի կիրառում, քանի որ առկա է դատարանի համոզվածությունն ու վստահությունը` սույն քրեական գործով առանց նշանակված պատիժը փաստացի կրելու ամբաստանյալ Արթուր Քրմոյանի ուղղվելու հնարավորության մասին։ Դատարանը նման հետևության հանգում է սույն քրեական գործով գոյություն ունեցող օբյեկտիվ տվյալների վերլուծության հիման վրա, որոնք բնութագրում են արարքը, դրա հասարակական վտանգավորության աստիճանն ու հատկապես արարքը կատարելու շարժառիթները, հանցավորի անձը, և վկայում են պատիժը պայմանականորեն չկիրառելու հիմքերի առկայության մասին։

Դատարանն արձանագրում է, որ նման պայմաններում չի իրագործվի, ավելին, կխաթարվի պատժի նշանակման օրենսդրական նպատակների առնվազն մեկ բաղադրիչի՝ սոցիալական արդարության վերականգման, էությունը, որը իր հերթին կբերի նաև արդարության և արդարադատության իմաստազրկմանը՝ նկատի ունենալով, որ արդարադատությունը ոչ միայն պետք է իրականացվի այլ այն պետք է իրականացվի և հանրության կողմից լինի տեսանելի և ընկալելի։

Այլ կերպ, դատարանն արձանագրելով, որ գործով ուսումնասիրված, առկա հիշյալ հանգամանքերը վկայում են պատիժը պայմանականորեն չկիրառելու բավարար հիմքերի առկայության մասին, փաստում է, որ ամբաստանյալի անձը դրականորեն բնութագրող տվյալների և պատասխանատվությունն ու պատիժը մեղմացնող մի շարք հանգամանքների կողքին ի սպառ բացակայում է ամբաստանյալի արարքում պատասխանատվությունն ու պատիժը ծանրացնող որևէ հանգամանք։ Բացի այդ, դատարանը հաշվի է առնում այն փաստը, որ ամբաստանյալը, հանդիսանալով ընտանիքի միակ տղամարդը և կերակրողը, հոգում է իր ընտանիքի առօրյա կարիքները և նրան հասարակությունից և ընտանքից մեկուսացնելու դեպքում ընտանիքի անդամները կարող են հայտնվել ծանր նյութական կացության մեջ։

Հաշվի առնելով ամբաստանյալի անձը բնութագրող վերը շարադրված տվյալները, պատասխանատվությունն ու պատիժը մեղմացնող հանգամանքները, և պատասխանատվությունն ու պատիժը ծանրացնող հանգամանքների բացակայությունը, դատարանը հանգում է այն հետևության, որ ամբաստանյալի ուղղվելը հնարավոր է առանց նշանակված պատիժը փաստացի կրելու, ուստի նրա նկատմամբ կալանքի ձևով նշանակվելիք պատիժը պայմանականորեն չպետք է կիրառել։

Այսպիսով, դատարանը գտնում է, որ ՀՀ քրեական օրենսգրքի 70-րդ հոդվածի հիման վրա ամբաստանյալ Արթուր Քրմոյանի նկատմամբ կալանքի ձևով պատիժ նշանակելու և այն պայմանականորեն չկիրառելու միջոցով հնարավոր է հասնել ՀՀ քրեական օրենսգրքի 48-րդ հոդվածով սահմանված պատժի նպատակներին՝ սոցիալական արդարության վերականգնմանը, պատժի ենթարկված անձանց ուղղմանը և նմանատիպ հանցագործությունների կանխմանը, քանի որ ամբաստանյալի՝ փորձաշրջանում, հետևապես և հսկողության մեջ գտնվելու հանգամանքը, կարող է զսպել նրա կողմից հետագայում հանցագործություններ կատարելու վտանգն այն հաշվառմամբ, որ նույնասեռ կամ այլ հանցանքեր կատարելու պարագայում իրական է օրենսդրական սպառնալիքը, որ փորձաշրջանի ընթացքում կատարված դիտավորյալ հանցագործության համար նշանակվելիք պատժին կգումարվի նաև այս դատավճռով նշանակված և փաստացի չկրած պատիժը կամ թեկուզև դրա մի մասը։

Դատարանն անդրադառնալով Արթուր Քրմոյանի նկատմամբ ընտրված խափանման միջոցի` չհեռանալու մասին ստորագրության հարցին, գտնում է, որ այն պետք թողնվի անփոփոխ, մինչև դատավճռի օրինական ուժի մեջ մտնելը։

Միաժամանակ, դատարանը գտնում է, որ Արթուր Քրմոյանից հօգուտ պետական բյուջեի պետք է բռնագանձել 28.854 ՀՀ դրամ՝ որպես դատական ծախսերի փոխհատուցում։

Դատարանը ղեկավարվելով ՀՀ քրեական դատավարության օրենսգրքի 119-րդ հոդվածով` գտնում է, որ գործով իրեղեն ապացույց ճանաչված` անցկացված փորձաքնությունից հետո առկա 0.7 գրամ քաշով մարիխուանա տեսակի թմրամիջոցը` պետք է ոչնչացնել։


4. Եզրափակիչ մաս

Ելնելով վերոգրյալից և ղեկավարվելով ՀՀ Քրեական դատավարաության օրենսգրքի 357-359, 360, 365, 369-373-րդ հոդվածներով, դատարանը

Վ Ճ Ռ Ե Ց

Արթուր Արտակի Քրմոյանին մեղավոր ճանաչել ՀՀ Քրեական օրենսգրքի 268-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել` կալանք` 2 /երկու/ ամիս ժամկետով։

ՀՀ Քրեական օրենսգրքի 70-րդ հոդվածի կարգով նշանակված պատիժը պայմանականորեն չկիրառել և սահմանել փորձաշրջան 1 /մեկ/ տարի ժամկետով` Արթուր Արտակի Քրմոյանի վարքագծի նկատմամբ հսկողությունը դնելով ՀՀ ԱՆ ՔԿՎ ԱՊԿ համապատասխան ստորաբաժանման վրա։

Արթուր Արտակի Քրմոյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ մինչև դատավճիռն օրինական ուժի մեջ մտնելը։

Քրեական գործով իրեղեն ապացույց ճանաչված, անցկացված փորձաքննությունից հետո առկա 0.7 գրամ քաշով մարիխուանա տեսակի թմրամիջոցը՝ ոչնչացնել։

Արթուր Արտակի Քրմոյանից հօգուտ պետական բյուջեի բռնագանձել 28.854 ՀՀ դրամ՝ որպես դատական ծախսեր։

Դատավճիռը կարող է բողոքարկվել ՀՀ Վերաքննիչ քրեական դատարան հրապարակվելու օրվանից հետո` մեկամսյա ժամկետում։



Դ Ա Տ Ա Վ Ո Ր Մ. Մ Ա Կ Յ Ա Ն