ԵԿԴ/0054/01/14
Ո Ր Ո Շ ՈՒ Մ
ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆԻՑ ՈՒ ՊԱՏԺԻՑ ԱԶԱՏԵԼՈՒ ԵՎ
ԲԺՇԿԱԿԱՆ ԲՆՈՒՅԹԻ ՀԱՐԿԱԴՐԱՆՔԻ ՄԻՋՈՑ ԿԻՐԱՌԵԼՈՒ ՄԱՍԻՆ

09 հուլիսի 2014թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը՝ նախագահությամբ` դատավոր Գ.Պողոսյանի, քարտուղարությամբ` Ա.Մարտիրոսյանի, մասնակցությամբ՝ դատախազ Գ.Մարգարյանի, տուժողի իրավահաջորդ Զ.Ավդոյանի, տուժողի իրավահաջորդի ներկայացուցիչ Մ.Գինոսյանի, անմեղսունակության վիճակում քրեական օրենքով չթույլատրված արարք կատարած Վ.Սի-աբանդովի, օրինական ներկայացուցիչ Վ.Սիաբանդովի, պաշտպան Ս.Գրիգորյանի, դատարանում՝ դռնբաց դատական նիստում, քննեց Վլադիմիր Թեմուրի Սիաբանդովին (ծնված 03.07.1987թ. ք.Երևանում, ազգությամբ եզդի, ՀՀ քաղաքացի, միջնակարգ կրթությամբ, չդատված, հաշվառված է` ք.Երևան, Նորքի 15-րդ փողոց, տուն հ. 22, կիրառվել է հոգեբուժական հիվանդանոցում տեղավորելու ձևով անվտանգության միջոց, մեղսագրվել է ՀՀ քրեական օրենսգրքի 34-104-րդ հոդվածի 1-ին մասով նախատեսված արարք), նկատմամբ բժշկական բնույթի հարկադրանքի միջոց կիրառելու վերաբերյալ գործը։

Գործի դատավարական նախապատմությունը.

ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնի ավագ քննիչ Գ.Բեգոյանը 04.03.2013թ. որոշմամբ ՀՀ քրեական օրենսգրքի 112-րդ հոդվածի 1-ին մասով հարուցել է թիվ 13124413 քրեական գործն ու այն ընդունել իր վարույթ։
04.03.2013թ. ձերբակալվել է Վ.Սիաբանդովը։
Քննիչի 06.03.2013թ. որոշմամբ Վ.Սիաբանդովը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 34-104-րդ հոդվածի 1-ին մասով։
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 06.03.2013թ. որոշմամբ Վ.Սիաբանդովի նկատմամբ` որպես խափանման միջոց, կիրառվել է կալանքը։
Քննիչի 30.04.2013թ. որոշմամբ Վ.Սիաբանդովի նկատմամբ՝ որպես անվտանգության միջոց, կիրառվել է հոգեբուժական հիվանդանոցում տեղավորելը, ինչը հաստատվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից։
Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Հ.Էյրամջյանի 02.05.2013թ. որոշմամբ Վ.Սիաբանդովի նկատմամբ ընտրված խափանման միջոց կալանավորումը վերացվել է։
ՀՀ ոստիկանության ՔԳՎ Երևան քաղաքի ՔՎ ԾՀՔ բաժնի քննիչ Ա.Մանուկյանը 01.06.2013թ. որոշմամբ թիվ 13124413 քրեական գործն ընդունել է իր վարույթ։
Երևան քաղաքի դատախազության դատախազ Գ.Բաղդասարյանը 08.01.2014թ. որոշ-մամբ թիվ 13124413 քրեական գործը վերադարձրել է քննիչին` լրացուցիչ քննություն կատարելու համար։
ՀՀ ոստիկանության ՔԳՎ Երևան քաղաքի ՔՎ ԾՀՔ բաժնի ավագ քննիչ Տ.Մուրադ-յանը 09.01.2014թ. որոշմամբ թիվ 13124413 քրեական գործն ընդունել է իր վարույթ։
ՀՀ քրեական օրենսգրքի 34-104-րդ հոդվածի 1-ին մասով նախատեսված հանցավոր արարքն անմեղսունակության վիճակում կատարած Վ.Սիաբանդովի նկատմամբ բժշկական բնույթի հարկադրական միջոցներ կիրառելու համար թիվ 13124413 քրեական գործը դատարան ուղարկելու մասին քննիչի 07.04.2014թ. որոշումը հաստատվել է դատախազի կողմից, ու 2014թ. ապրիլի 14-ին թիվ 13124413 գործն ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան` Վ.Սիաբանդովի նկատմամբ բժշկական բնույթի հարկադրական միջոցներ կիրառելու համար։
Երևան քաղաքի Կենտրոն և Նորք-Մարաշ վարչական շրջանների ընդհանուր իրավա-սության առաջին ատյանի դատարանի (դատավոր Գ.Պողոսյան) 2014թ. ապրիլի 16-ի որոշմամբ Վլադիմիր Սիաբանդովի վերաբերյալ բժշկական բնույթի հարկադրական միջոց կիրառելու մասին գործն ընդունվել է վարույթ, իսկ 2014թ. ապրիլի 29-ի որոշմամբ այն նշանակվել է դատաքննության։
07.04.2014թ. կայացված որոշմամբ նախաքննության մարմինը պարզված է համարել, որ. «Վլադիմիր Թեմուրի Սիաբանդովը 2013թ. մարտի 03-ին՝ ժամը 23.30-ից մինչև մարտի 4-ը` ժամը 00.15-ն ընկած ժամանակահատվածում Երևան քաղաքի Աբովյան փողոցի թիվ 41 հասցեում գործող «Ռիչի» բարի մուտքի մոտ վիճաբանել է Քյարամ Ալոյի Ավդոյանի հետ, որի ընթացքում ծագած անձնական անբարյացակամ փոխհարաբերությունների հողի վրա՝ վերջինիս ապօրինաբար կյանքից զրկելու դիտավորությամբ, իր մոտ գտնվող ծակող-կտրող առարկայով բազմաթիվ հարվածներ է հասցրել նրա մարմնի տարբեր մասերին, այդ թվում՝ նաև կրծքավանդակի ձախ մասին, սակայն իր կամքից անկախ հանգամանքներում հանցանքն ավարտին չի կարողացել հասցնել, քանի որ Ք.Ավդոյանը դիմել է փախուստի և մոտակայքում գտնվող «Թիվ 1 համալսարանական» հիվանդանոցում ստացել համապատասխան բուժօգնություն։
Նախաքննության ընթացքում պարզվել է, որ Վլադիմիր Սիաբանդովը 2005թ-ից հաշվառման մեջ է գտնվում ՀՀ ԱՆ «Հոգեբուժական բժշկական կենտրոն» ՓԲ Նորքի կլինիկայում` «Կրած գանգուղեղային տրավմայի մնացորդային երևույթներ աֆեկտիվ անկայունությամբ և գիտակցության նոպաներ ըստ անամնեզի» ախտորոշմամբ։
29.04.2013թ. Կենտրոնականի քննչական բաժին ստացվել է ստացիոնար դատահոգեբուժական փորձաքննության թիվ 31 եզրակացությունը՝ համաձայն որի Վլադիմիր Թեմուրի Սիաբանդովը տառապում է «Օրգանական զառանցական /շիզոֆրենանման/ խանգարում» հոգեկան հիվանդությամբ և իրեն մեղսագրվող արարքի նկատմամբ Վլադիմիր Սիաբանդովին հարկ է ճանաչել անմեղսունակ։ Իր ներկա հոգեկան վիճակով նա չի կարող մասնակցել դատաքննչական գործողություններին, սոցիալապես վտանգավոր է ինչպես իր, այնպես էլ շրջապատի համար, կարիք ունի հարկադիր բուժման հատուկ հսկողության հոգեբուժական բաժանմունքի պայմաններում։
07.05.2013թ. առողջական վիճակի վատացման պատճառով տուժող Քյարամ Ավդոյա-նը տեղափոխվել է «Արմենիա» բժշկական կենտրոն, որտեղ 12.05.2013թ. մահացել է»։
Նախաքննության մարմինը, հաշվի առնելով վերագրյալները, հանգել է եզրակացության, որ Վ.Սիաբանդովը բժշկական բնույթի հարկադրական միջոցների կիրառման կարիք ունի ու դատախազի կողմից հաստատված որոշում է կայացրել՝ թիվ 13124413 քրեական գործն ուղարկել Կենտրոն և Նորք-Մարաշ վարչական շրջանների ընդհանուր իրավասության դատարան՝ անմեղսունակության վիճակում քրեական օրեն¬քով ար¬գելված արարք կատարած Վլադիմիր Սիաբանդովի նկատմամբ բժշկական բնույթի հարկադրական միջոցներ կիրառելու համար։

Դատարանի կողմից հաստատված հանգամանքները.

Դատաքննությամբ հաստատվեց, որ անմեղսունակ Վլադիմիր Սիաբանդովը 2013թ. մարտի 3-ի ժամը 2330-ից մինչև մարտի 4-ի ժամը 0015-ն ընկած ժամանակահատվածում Երևան քաղաքի Աբովյան փողոցի թիվ 41 հասցեում գործող «Ռիչի» բարի մուտքի մոտ վի-ճաբանել է Քյարամ Ալոյի Ավդոյանի հետ և նրան ապօրինաբար կյանքից զրկելու դիտավորությամբ իր մոտ գտնվող ծակող-կտրող առարկայով բազմաթիվ հարվածներ է հասցրել նրա մարմնի տարբեր մասերին, այդ թվում՝ կրծքավանդակի ձախ մասին, սակայն իր կամքից անկախ հանգամանքներում հանցանքն ավարտին չի կարողացել հասցնել, քանի որ Ք.Ավդոյանը դիմել է փախուստի և մոտակայքում գտնվող «Թիվ 1 համալսարանական» հիվանդանոցում ստացել համապատասխան բուժօգնություն։
07.05.2013թ. առողջական վիճակի վատացման պատճառով տուժող Ք.Ավդոյանը տեղափոխվել է «Արմենիա» բժշկական կենտրոն, որտեղ 12.05.2013թ. մահացել է։
Դատաքննությամբ նաև հաստատվեց, որ Վլադիմիր Սիաբանդովը 2005թ-ից հաշ-վառման մեջ է գտնվում ՀՀ ԱՆ «Հոգեբուժական բժշկական կենտրոն» ՓԲ Նորքի կլինիկայում` «Կրած գանգուղեղային տրավմայի մնացորդային երևույթներ աֆեկտիվ անկայունությամբ և գիտակցության նոպաներ ըստ անամնեզի» ախտորոշմամբ, և դատահոգեբուժական փորձաքննությունների եզրակացությունների համաձայն՝ նա տառապել ու տառապում է «Օրգանական զառանցական /շիզոֆրենանման/ խանգարում» հոգեկան հիվանդությամբ և իրեն մեղսագրվող արարքի նկատմամբ անմեղսունակ է։

Ապացույցների հետազոտում և գնահատում.

Տուժող Քյարամ Ավդոյանի ցուցմունքի համաձայն՝ 2013թ. մարտի 3-ին՝ ժամը 22-ի սահմաններում, իրեն զանգահարել է իր քենու որդին` Վլադիմիր Սիաբանդովը, և առաջարկել է հանդիպել։ Վերջինիս հետ հանդիպել են ք.Երևանի Ավան թաղամասում, ապա իր տաքսի ավտոմեքենայով գնացել են ք.Երևանի Աբովյան փողոցում գործող «Ռիչի» բար։ Նշված բարում մեկական բաժակ կոնյակ են խմել, ապա Վլադիմիրը տհաճ խոսակցություն է վարել այն մասին, որ իր կինը հիվանդ է, կարճ կյանք ունի, իսկ եթե իրեն Հայաստանում մի բան պատահի, Գերմանիայում գտնվող իր 4 երեխայի խնամակալությունը կանցնի ծնողներին։ Բացի այդ, Վլադիմիրն ամուսնալուծության, ընտանեկան անհաջողությունների մեջ անհիմն մեղադրել է իրեն։
Վլադիմիրի վարած խոսակցությունն իրեն դուր չի եկել, ուստի 20 րոպե բարում մնալուց հետո միայնակ դուրս է եկել փողոց, ապա տուն ուղեկցելու նպատակով սպասել Վլադի-միրին։ Մի քանի րոպե անց բարից դուրս գալով` Վլադիմիրը մոտեցել է իրեն, ապա առանց որևէ բան ասելու, անսպասելի դանակով բազմաթիվ հարվածներ է հասցրել, հայհոյել է և բացականչել` մեռի։ Հարվածների հետևանքով ինքն ընկել է, իսկ Վլադիմիրը փորձել է դանակով սրտին հարվածել` ասելով. «խի՞ չես մեռնում, կարողա՞ երկաթից ես», սակայն ինքը ոտքով հետ է մղել նրան ու, մի կերպ տեղից բարձրանալով, վազքով հատել է փողոցը և փախել դեպի մոտակա հիվանդանոցը։
Տուժողի իրավահաջորդ՝ որպես վկա հարցաքննված, Զոյա Ավդոյանի ցուցմունքի համաձայն՝ 03.03.2013թ. ժամը 23-ի սահմաններում տեղեկանալով, որ իր եղբայր Քյարամ Ավդոյանը բուժօգնություն ստանալու համար տեղափոխվել է թիվ 1 հիվանդանոց, ամուսնու` Գյուրջիսի հետ գնացել են նշված հիվանդանոց, որտեղ տեղեկացել են, որ Քյարամը դանակի 13 հարված է ստացել։
Հիվանդանոցում եղբորը վիրահատել են, իսկ հետագայում եղբայրը պատմել է, որ 2013թ. մարտի 3-ին՝ երեկոյան, ք.Երևանի Աբովյան փողոցում իրեն դանակով հարվածներ է հասցրել քենու որդին` Վլադիմիր Սիաբանդովը, ով իր համոզմամբ չի տառապում հոգեկան հիվանդությամբ։
Վկա Գյուրջիս Քոչոյանի նույնաբովանդակ ցուցմունքի համաձայն՝ 03.03.2013թ. երեկոյան ինքը կնոջից` Զոյա Ավդոյանից, տեղեկացել է, որ նրա եղբայրը` Քյարամ Ավդոյանը, մարմնական վնասվածքներով տեղափոխվել է հիվանդանոց։ Անմիջապես կնոջ հետ գնացել են հիվանդանոց, որտեղ պարզել են, որ Քյարամին դանակահարել են։ Հիվանդանոցում Քյարամին վիրահատել են, որից հետո նա պատմել է, որ իրեն դանակահարել է Վլադիմիր Սիաբանդովը։
Տուժող Ք.Ավդոյանի մոր՝ վկա Գյոզալ Շավեշյանի ցուցմունքի համաձայն՝ 03.03.2013թ-ին, երբ ինքը գտնվել է եղբոր տանը, նրանց տուն է զանգահարել իր քրոջ թոռը՝ Ռոման Մամոյանը և, հարցնելով իր որդու՝ Քյարամի հեռախոսահամարը, խնդրել է, որ այդ մասին իրեն չասեն։ Տուն վերադառնալուց հետո զանգահարել է որդուն և ասել վերը նշվածի մասին, ինչին որդին պատասխանել է, որ իրեն փնտրել է Վ.Սիաբանդովը և ցանկանում է իր հետ հանդիպել։ Ուշ երեկոյան իր դուստրը տեղեկացրել է, որ Քյարամը գտնվում է հիվանդանոցում։ Հաջորդ առավոտյան գնացել է հիվանդանոց և տեղեկացել, որ որդուն վիրահատել են։ Հետագայում որդին պատմել է, որ սպանելու նպատակով իրեն դանակի 13 հարված է հասցրել Վլադիմիր Սիաբանդովը։
Վկա Մերի Մուսոյանի ցուցմունքի համաձայն՝ 03.03.2013թ-ին, երբ իրեն տեսակցելու համար իրենց տանն է գտնվել Գյոզալ Շավեշյանը, զանգահարել է Ռոման Մամոյանը և, հարցնելով Քյարամի բջջային հեռախոսահամարը, խնդրել է, որ Գյոզալը չիմանա այդ մասին։ Նրան Քյարամի հեռախոսահամարը չի տվել, իսկ հետագայում Գյոզալից տեղեկացել է, որ Վ.Սիաբանդովը 13 տեղից դանակահարել է Քյարամին։
Վկա Սևդին Մամոյանի ցուցմունքի համաձայն՝ ինքը տուժողի հարազատ Հասանից տեղեկացել է, որ իր ազգական Վ.Սիաբանդովը, ով տարօրինակություններ ուներ, դանակով հարվածել է Ք.Ավդոյանին, ով հետագայում մահացել է։
Մեղադրյալի օրինական ներկայացուցիչ՝ որպես վկա հարցաքննված Վոլոդյա Սիաբանդովի ցուցմունքի համաձայն՝ իր թոռ Վլադիմիր Սիաբանդովը, ով երեխա ժամանակ ընկել է և ուղեղի ցնցում ստացել, վերջին տարիներին ընտանիքի հետ բնակվել է Գերմանիայում, իսկ դեպքից առաջ վերադարձել է Հայաստան և բնակվել իր հետ։ Նա ագրեսիվ է եղել և տարօրինակ, իսկ երբ ոստիկանները տարել են նրան, բժիշկներից տեղեկացել է, որ նա դանակի 13 հարված է հասցրել Քյարամին։
Վկա՝ «Ռիչի» բարի բարմեն, Արսեն Մարտիրոսյանի ցուցմունքի համաձայն՝ 03.03.2013թ.՝ ժամը 2245-ի սահմաններում բար են այցելել 2 անծանոթ տղամարդ, որոնցից մեկը` շուրջ 40 տարեկան, մյուսը` 30-ից պակաս։ Վերջիններս կոնյակ, բնական հյութ և շոկոլադ են պատվիրել, ապա՝ շուրջ 20 րոպե բարում մնալուց հետո, դուրս են եկել։ Բարից դուրս գալու ընթացքում երիտասարդը պահանջել է հաշիվը, որը կազմել է 10.150 ՀՀ դրամ։ Նա, վճարելով 5.000 դրամ, հետաքրքրվել է, թե մնացածը կարող է, արդյոք, եվրոյով վճարել, սակայն մերժում ստանալով` թողել է իր «Նոկիա» տեսակի բջջային հեռախոսը և հեռացել։ Դրանից հետո մի քանի ժամ անց բար են ժամանել ոստիկանության աշխատակիցները և առգրավել անծանոթ հաճախորդի թողած բջջային հեռախոսը։
Վկա՝ «Ռիչի» բարի մատուցողուհի, Կարինե Այդինյանի ցուցմունքի համաձայն՝ 2013թ. մարտի 3-ին՝ ժամը 2245-ի սահմաններում, «Ռիչի» բար են այցելել 2 տղամարդ, որոնցից մեկը տարիքով է եղել, մյուսը` երիտասարդ։ Նրանք կոնյակ, բնական հյութ և «Ռաֆայելլո» են պատվիրել ու, շուրջ 20 րոպե բարում մնալուց հետո, հեռացել են։ Հետագայում բարմեն Արսենից տեղեկացել է, որ չկարողանալով հաշիվն ամբողջությամբ փակել, նրանք բջջային հեռախոս են թողել բարում։
«Անձին ճանաչման ներկայացնելու մասին» 24.03.2013թ. արձանագրության համաձայն՝ վկա Արսեն Մարտիրոսյանն իրեն ճանաչման ներկայացված անձանցից ճանաչել է Վլադիմիր Սիաբանդովին և հայտարարել, որ վերջինս 03.03.2013թ-ին տարիքով տղամարդու հետ «Ռիչի» բար այցելած և հաշիվը փակելիս «Նոկիա» տեսակի բջջային հեռախոսը բարում թողած անձն է։
Դատաբժշկական փորձաքննության 05.04.2013թ. թիվ 344/հ եզրակացության համաձայն՝ Քյարամ Ավդոյանի մոտ հայտնաբերվել են կրծքավանդակի ձախ կեսի շրջանի թվով երկու թափանցող, հեմոպնևմոթորաքսով զուգորդված ծակված-կտրված վերքեր, աջ գոտկային շրջանի թափանցող, լյարդի վնասումով և հեմոպնևմոպերիտոնեումով զուգորդված ծակված-կտրված վերք, ձախ ուսագոտու շրջանի հետին մակերեսի թվով երեք, կրծքավանդակի հետին մակերեսի շրջանի թվով երեք, կրծքավանդակի առաջային մակերեսի` թվով մեկ, դեմքի, աջ և ձախ ստորին վերջույթների շրջանների մեկական ծակված-կտրված մաշկի և ենթամաշկի վնասումով վերքեր, որոնք պատճառվել են սուր, ծակող-կտրող գործիքով /ներով/, և Ք. Ավդոյանի առողջությանը պատճառվել է ծանր վնաս` կյանքին վտանգ սպառնացող։
Դատաբժշկական փորձաքննության 18.03.2013թ. թիվ 598 եզրակացության համա-ձայն՝ Վլադիմիր Սիաբանդովի մոտ հայտնաբերվել է աջ ձեռքի 5-րդ մատի դիստալ ֆալանգի շրջանի քերծվածք, որը պատճառվել է սուր եզր ունեցող առարկայի անմիջական ներգործությամբ, որն առողջության թեթև վնասի հատկանիշներ չի պարունակում։
Դատաբժշկական փորձաքննության 24.06.2013թ. թիվ 464 եզրակացության համա-ձայն՝ Քյարամ Ավդոյանի մահը վրա է հասել 12.05.2013թ. ժամը 22-ի սահմաններում՝ օրգանիզմի ընդհանուր ինտոքսիկացիայից` երկկողմանի հետտրավմատիկ թարախաֆիբրինային թոքաբորբի և լյարդի ցիռոզի հետևանքով, որոնցով հանգուցյալը տառապել է կենդանության օրոք և այդպիսիք մահվան հետ գտնվում են անմիջական պատճառական կապի մեջ։ Կրծքավանդակի ձախ կեսի հետին մակերեսի թվով 2 ծակված-կտրված թափանցող վիրավորումները և առանձին-առանձին և միասին վերցրած առաջացրել են առողջությանը ծանր վնաս` կյանքին վտանգ սպառնացող, և մահվան պատճառի հետ գտնվում են ուղղակի անմիջական պատճառական կապի մեջ, իսկ աջ գոտկային շրջանի նախկին ծակված-կտրված թափանցող վերքը` լյարդի վիրավորումով, կյանքին վտանգ սպառնացող է, սակայն մահվան պատճառի հետ չի գտնվում պատճառական կապի մեջ։
Լրացուցիչ հանձնաժողովային դատաբժշկական փորձաքննության 25.09.2013թ. թիվ 127/հձ եզրակացության համաձայն՝ Քյարամ Ավդոյանի մահը վրա է հասել օրգանիզմի ընդհանուր ինտոքսիկացիայից` երկկողմանի հետտրավմատիկ թարախաֆիբրինային թոքաբորբից, լյարդի ցիռոզի ֆոնի պայմաններում։ Ք.Ավդոյանի մահվան պատճառ հանդիսացած ինտոքսիկացիան հիմնականում եղել է հետևանք 04.03.2013թ. ստացած կրծքավանդակի թափանցող վնասվածքից առաջացած քրոնիկ, ձգձգվող ընթացքով բորբոքային պրոցեսի, որը մահվանից առաջ բարդացել է սուր թոքաբորբով։ Ք.Ավդոյանի լյարդի ցիռոզի առաջացումը, զարգացումը կապված չէ 04.03.2013թ. դեպքի ժամանակ ստացված վնասվածքների հետ, այն առաջացել է ավելի վաղ և հնարավոր չէ ստույգ որոշել հիվանդության առաջացման վաղեմությունը։ Լյարդի ցիռոզի բացակայության դեպքում հետտրավմատիկ թոքաբորբը՝ որպես այդպիսին, կհանգեցներ Քյարամ Ավդոյանի մահվան, քանի որ լյարդի ցիռոզը, որպես այդպիսին լինելով օրգանիզմի ինտոքսիկացիայի աղբյուր, չի եղել խիստ արտահայտված։ 1-ին համալսարանական հիվանդանոցում /ԵՊԲՀ-ի «Հերացի» թիվ 1 հիվանդանոցային համալիրում/, «Նորք» ինֆեկցիոն հիվանդանոցում /«Նորք ինֆեկցիոն կլինիկական հանրապետական հիվանդանոց» ՓԲԸ-ում/ և «Արմենիա» ՀԲԿ-ում Քյարամ Ավդոյանի հետազոտությունները, ախտորոշումը, խորհրդատվությունները և ստացած բուժօգնությունը եղել են ժամանակին, ճիշտ և բավարար։ Ք.Ավդոյանը հիվանդանոց ընդունվելու պահին հետազոտվել է լիարժեք և բազմակողմանի։ Ք.Ավդոյանի ախտորոշումը կատարվել է ճիշտ։ Ք.Ավդոյանի ստացած նախնական բուժումը, վիրահատություն/ներ/ը և հետվիրահատական բուժումը եղել են ճիշտ, ամբողջական, ժամանակին և բավարար։ Ք.Ավդոյանը հիվանդանոցից դուրս է գրվել բավարար վիճակում։ Ք.Ավդոյանին բժշկական օգնություն ցուցաբերելիս և սպասարկում իրակա-նացնելիս բուժաշխատողների կողմից թերություններ կամ բացթողումներ թույլ չեն տրվել։
Դատակենսաբանական փորձաքննության 13.05.2013թ. թիվ 84 եզրակացության համաձայն՝ փորձաքննության ներկայացված տուժող Քյարամ Ավդոյանի հագուստների` լաթանման կտրված սվիտրի, անդրավարտիքի, կաշվե գոտու և նրա ճարմանդի, բաճկոնի, մեկ զույգ կիսագուլպաների, մեկ զույգ կաշվե կոշիկների, մեղադրյալ Վլադիմիր Սիաբանդովի տաք բաճկոնի աջ թևի բազկապատի և բամբակյա խծուծների (դեպքի վայրից վերցված արյունով) վրա տեղակայված կասկածելի հետքերում հաստատվել է արյան առկայություն, որը պատկանում է մարդու և ըստ արյան ABO իզոշճաբանական համակարգի` առաջացել է O խմբի արյուն ունեցող անձից, այդ թվում՝ նաև կարող էր առաջանալ տուժող Ք.Ավդոյանից։
Դատահետքաբանական փորձաքննության 20.06.2013թ. թիվ 1159 եզրակացության համաձայն՝ Վլադիմիր Սիաբանդովի բաճկոնի աջ կողային գրպանի հատվածի կտորի մի մասի շերտը վնասված-անջատված է, ինչը կարող էր առաջանալ տվյալ տեղամասը քաշել-ձգելու հետևանքով։ Ք.Ավդոյանի հագուստների վրա առկա վնասվածքները ծակած-կտրած են և կարող էին առաջանալ մեկ սայրանի ծակող-կտրող շեղբ ունեցող գործիքի, հնարավոր է դանակի շեղբի ներգործությունների արդյունքում։ Ք.Ավդոյանի հագուստների վրա առկա ծակած-կտրած վնասվածքները իրենց տեղակայմամբ և չափերով հիմնականում համընկնում են Ք.Ավդոյանի մարմնական վնասվածքների վերաբերյալ դատաբժշկական փորձաքննության թիվ 344/հ եզրակացության մեջ նշված ծակած-կտրած թափանցող վերքերի հետ։
«Իրեղեն ապացույց ճանաչելու մասին» 03.09.2013թ. որոշման համաձայն՝ Քյարամ Ավդոյանի հագուստները` լաթանման կտրված սվիտերը, անդրավարտիքը, կաշվե գոտին, բաճկոնը, մեկ զույգ կիսագուլպաները, մեկ զույգ կաշվե կոշիկները, Վլադիմիր Սիաբանդովի տաք բաճկոնը, 356796/02/160634/1 գործարանային համարով «Նոկիա» ֆիրմայի բջջային հեռախոսը՝ «ՎիվաՍելլ» ՓԲ ընկերության 077 89-02-32 հեռախոսահամարի քարտով, և դեպքի վայրից վերցված արյան հետքերով բամբակյա խծուծները ճանաչվել են իրեղեն ապացույց։
Երևանի թիվ 1 համալսարանական հիվանդանոցի` «Վթարների, վնասվածքների և այլ դեպքերի հաղորդման թիվ 1 մատյանի» զննության արձանագրության համաձայն` 40-րդ էջի 206 հերթական համարի դիմաց նշված է. «04.03., 12.15, Ավդոյան Քյարամ Ալոյի, 01.12.1970թ., ք.Երևան, Իսակովի 44/3 շ. բն. 12, 74-84-81, ինքն. ըստ հիվանդի` իրեն դանակահարել են Աբովյան փողոցում, կրծքավանդակի, որովայնի ծակած վերքեր»։
Որպես այլ փաստաթուղթ՝ ապացույց ճանաչված, «ՎիվաՍելլ» ՓԲ ընկերությունից ստացված հեռախոսազանգերի վերծանումների համաձայն` 03.03.2013թ-ին Վ.Սիաբանդովը 077-89-02-32 հեռախոսահամարից ժամը 17.49-ից մինչև 21.14-ն ընկած ժամանակահատվածում 5 հեռախոսազանգ է կատարել Ք.Ավդոյանի 098-93-61-85 հեռախոսահամարին, նույն օրը Ք.Ավդոյանը 098-93-61-85 հեռախոսահամարից ժամը 21.24-ից մինչև ժամը 22.04-ն ընկած ժամանակահատվածում 3 հեռախոսազանգ է կատարել Վ.Սիաբանդովի 077-89-02-32 հեռախոսահամարին։ Բացի այդ, 03.03.2013թ.՝ ժամը 2235-ին, Վ.Սիաբանդովը 077-89-02-32 հեռախոսահամարին հեռախոսազանգ է ընդունել Վոլոդյա Սիաբանդովի 094 37-15-30 հեռախոսահամարից, որը սպասարկվել է դեպքի վայրին հարակից, «Վիվա Սելլ» ՓԲ ընկերության կապի ծածկույթն ապահովող, Երևան քաղաքի Տերյան փողոցի թիվ 105ա հասցեում տեղակայված կայանի կողմից։
Որպես այլ փաստաթուղթ՝ ապացույց ճանաչված՝ «Ռիչի» բարից դեպքի վայրի զննության ընթացքում առգրավված, Վ.Սիաբանդովի և Ք.Ավդոյանի 03.03.2013թ. պատվերների հաշվի կտրոնի և ՀԴՄ կտրոնի համաձայն՝ նրանք պատվիրել են կոնյակ, հյութ և կոնֆետ։
Ստացիոնար դատահոգեբուժական փորձաքննության 29.04.2013թ. թիվ 31 եզրակացության համաձայն` Վլադիմիր Սիաբանդովը տառապում է «Օրգանական զառանցական /շիզոֆրենանման/ խանգարում» հոգեկան հիվանդությամբ և իրեն մեղսագրվող արարքի նկատմամբ նրան հարկ է ճանաչել անմեղսունակ։ Իր ներկա հոգեկան վիճակով նա չի կարող մասնակցել դատաքննչական գործողություններին, սոցիալապես վտանգավոր է ինչպես իր, այնպես էլ շրջապատի համար, կարիք ունի հարկադիր բուժման հատուկ հսկողության հոգեբուժական բաժանմունքի պայմաններում։
Կրկնակի ստացիոնար հանձնաժողովային դատահոգեբուժական փորձաքննության 19.09.2013թ. թիվ 74 եզրակացության համաձայն՝ Վլադիմիր Սիաբանդովը տառապում է «Օրգանական զառանցական /շիզոֆրենանման/ խանգարում» հոգեկան հիվանդությամբ և իրեն մեղսագրվող արարքի նկատմամբ նրան հարկ է ճանաչել անմեղսունակ։ Իր ներկա հոգեկան վիճակով նա չի կարող մասնակցել դատաքննչական գործողություններին, սոցիալապես վտանգավոր է ինչպես իր, այնպես էլ շրջապատի համար, կարիք ունի հարկադիր բուժման հատուկ հսկողության հոգեբուժական բաժանմունքի պայմաններում։
Կրկնակի ստացիոնար հանձնաժողովային դատահոգեբուժական փորձաքննության 26.03.2014թ. թիվ 27 եզրակացության համաձայն՝ Վլադիմիր Սիաբանդովը՝ ըստ բժշկական փաստաթղթերի, տառապել է. 03.10.2005-07.10.2005թթ. «Գլխուղեղի օրգանական ախտահանման մնացորդային երևույթներ փսիխոպաթոնման վարքագծով» հոգեկան հիվանդությամբ /ՀԲԿ ՓԲԸ Նուբարաշենի հոգեբուժական կլինիկա, թիվ 2816/31465 հ.պ./, 17.11.2005-23.11.2005թթ. «Կրած գլխուղեղի տրավմայի մնացորդային երևույթներ, աֆեկտիվ անկայունությամբ, գիտակցության կորստի նոպաներ, ըստ անամնեզի» հոգեկան հիվանդությամբ /ՀԲԿ ՓԲԸ Նորքի հոգեբուժական կլինիկա, թիվ 2182 հ.պ./ 10.11.2008թ. «ՀԲԿ» ՓԲԸ Նուբարաշենի հոգ. կլինիկայի թիվ 1068 ակտի համաձայն՝ Վ.Սիաբանդովի մոտ ախտորոշվել է «Օրգանական աֆեկտիվ խանգարում»։ 27.03.2013-18.04.2013թթ. «Օրգանական զառանցական /շիզոֆրենանման/ խանգարում» հոգեկան հիվանդությամբ /ՀԲԿ ՓԲԸ Նուբարաշենի հոգեբուժական կլինիկա, թիվ 782/50331 հ.պ./։ Ներկայումս տառապում է «Օրգանական զառանցական /շիզոֆրենանման/ խանգարում» հոգեկան հիվանդությամբ։ Հիմնվելով վերը նշված բուժ. փաստաթղթերի նկարագրությունների վրա կարելի է ենթադրել, որ նրա մոտ առկա հոգեկան հիվանդությունը դրսևորվել է սկզբում` վարքային, ապա աֆեկտիվ, այնուհետև՝ ցնորազառանցական խանգարումներով։ Հանցավոր արարքը կատարելու պահին` 04.03.2013թ-ին, Վ.Սիաբանդովը տառապել է «Օրգանական զառանցական /շիզոֆրենանման/ խանգարում» հոգեկան հիվանդությամբ, և գտնվել է զառանցական ապրումների ներքո, որը զրկել է իր գործողությունների համար հաշիվ տալու, դրանք ղեկավարելու ունակությունից, նա չէր կարող հասկանալ իր գործողությունների բնույթը, դրա արդյունքում հանրորեն վտանգավոր հետևանքների առաջացման հնարավորությունները և ղեկավարել դրանք։ Վ.Սիաբանդովը ներկա պահին տառապում է «Օրգանական զառանցական /շիզոֆրենանման/ խանգարում» հոգեկան հիվանդությամբ։ Իր ներկա հոգեկան վիճակով նա չի կարող մասնակցել դատաքննչական գործողություններին։ Իր ներկա հոգեկան վիճակով Վ.Սիաբանդովին խորհուրդ է տրվում հարկադիր բուժում՝ հատուկ հսկողության հոգեբուժական բաժանմունքի պայմաններում՝ փորձաքննությունն անմիջապես ավարտելուց հետո։ Սույն գործով նշանակված նախորդ դատահոգեբուժական փորձաքննությունների եզրակացությունները հիմնավոր են և հիմնված են օբյեկտիվ բուժփաստաթղթերի ուսումնասիրությունների վրա` /հ/պ 2816/31465 «ՀԲԿ» ՓԲԸ Նուբարաշենի հոգեբուժական կլինիկա, հ/պ 2182 «ՀԲԿ» ՓԲԸ Նորքի հոգեբուժական կլինիկա, թիվ 1068 ակտ «ՀԲԿ» ՓԲԸ Նուբարաշենի հոգեբուժական կլինիկա, հ/պ 782/50331 «ՀԲԿ» ՓԲԸ Նուբարաշենի հոգեբուժական կլինիկա, ակտ 1105/210 2-րդ բուժմիավորում, ակտի ելք 2/1503 «Սուրբ Գրիգոր Լուսավորիչ» ԲԿ։

Դատարանի վերլուծություն.

Դատարանը, վերլուծելով և համակցության մեջ գնահատելով դատաքննությամբ հետազոտված ապացույցները, լսելով Վ.Սիաբանդովի պաշտպանի, oրինական ներկայացուցչի, դատախազի, տուժողի իրավահաջորդի և նրա ներկայացուցչի կարծիքները, գտնում է, որ հանրության համար վտանգավոր՝ ՀՀ քրեական օրենսգրքի 34-104-րդ հոդվածի 1-ին մասով նախատեսված, վերը նշված արարքը կատարելու պահին Վ.Սիաբանդովը գտնվել է անմեղuունակության վիճակում և ՀՀ քրեական օրենսգրքի 25-րդ հոդվածի համաձայն՝ նա ենթակա չէ քրեական պատասխանատվության, ու նույն օրենսգրքի 97-րդ հոդվածի համաձայն՝ նրա նկատմամբ պետք է նշանակվի բժշկական բնույթի հարկադրանքի միջոց, նկատի ունենալով, որ ներկա հոգեկան վիճակով նա վտանգավոր է իր և այլ անձանց համար ու հիվանդանոցային բուժման և մշտական հսկողության կարիք ունի։
Վ.Սիաբանդովի նկատմամբ բժշկական բնույթի հարկադրանքի միջոց նշանակելիս դատարանը հաշվի է առնում նրա հոգեկան հիվանդությունը, նրա կատարած արարքի բնույթն ու հանրության համար վտանգավորության աստիճանը, և նկատի ունենալով ստացիոնար դատահոգեբուժական փորձաքննությունների եզրակացությունները, գտնում է, որ նա պետք է ազատվի ՀՀ քրեական օրենսգրքի 34-104-րդ հոդվածի 1-ին մասով նախատեսված պատասխանատվությունից ու պատժից, և նրա նկատմամբ պետք է նշանակվի հարկադիր բուժում` հոգեբուժական հիվանդանոցի հատուկ տիպի հոգեբուժական բաժանմունքում։
Քննության առնելով իրեղեն ապացույցների տնօրինման հարցը՝ դատարանը գտնում է, որ Ք.Ավդոյանի հագուստները՝ սվիտերը, անդրավարտիքը, կաշվե գոտին, բաճկոնը, մեկ զույգ կիսագուլպաները և մեկ զույգ կաշվե կոշիկները, պետք է հանձնվեն տուժողի իրավահաջորդ Զոյա Ավդոյանին, Վ.Սիաբանդովի տաք բաճկոնը, 356796/02/160634/1 գործարանային համարով «Նոկիա» տեսակի բջջային հեռախոսը՝ «ՎիվաՍելլ» ՓԲ ընկերության 077 89-02-32 հեռախոսահամարի քարտով, պետք է հանձնվեն նրա օրինական ներկայացուցիչ Վոլոդյա Սիաբանդովի, իսկ բամբակյա խծուծները պետք է ոչնչացվեն։
Դատարանը, անդրադառնալով տուժող կողմի այն պնդմանը, որ Վ.Սիաբանդովը չի տառապում հոգեկան հիվանդությամբ, գտնում է, որ նշվածը դատաքննությամբ չհիմնավորվեց, ու Վ.Սիաբանդովի հոգեկան հիվանդ և անմեղսունակ լինելու հանգամանքը հաստատվեց վերը նշված երեք դատահոգեբուժական փորձաքննությունների եզրակացություններով։
ՀՀ քրեական դատավարության օրենսգրքի 108-րդ հոդվածի 2-րդ կետի համաձայն՝ քրեական գործով վարույթում հոգեկան հիվանդության, ժամանակավոր հիվանդագին հոգե-կան խանգարման« այլ հիվանդագին վիճակի կամ տկարամտության հետևանքով մեղադրյալի ունակ չլինելը դեպքի պահին գիտակցելու իր գործողությունների (անգործության) բնույթը և նշանակությունը« դրանց վնասակարությունը կամ ղեկավարելու դրանք` կարող են հաստատվել միայն դատահոգեբուժական կամ դատահոգեբանական փորձագետի եզրակացությամբ։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 119-րդ ու 462-464-րդ հոդվածներով՝ դատարանը

Ո Ր Ո Շ Ե Ց

Վլադիմիր Թեմուրի Սիաբանդովին ազատել ՀՀ քրեական օրենսգրքի 34-104-րդ հոդվածի 1-ին մասով նախատեսված պատասխանատվությունից ու պատժից և նրա նկատմամբ նշանակել հարկադիր բուժում` հոգեբուժական հիվանդանոցի հատուկ տիպի հոգեբուժական բաժանմունքում։
Իրեղեն ապացույց ճանաչված՝ Ք.Ավդոյանի հագուստները՝ սվիտերը, անդրավարտիքը, կաշվե գոտին, բաճկոնը, մեկ զույգ կիսագուլպաները և մեկ զույգ կաշվե կոշիկները հանձնել տուժողի իրավահաջորդ Զոյա Ավդոյանին, Վ.Սիաբանդովի տաք բաճկոնը, 356796/02/ 160634/1 գործարանային համարով «Նոկիա» տեսակի բջջային հեռախոսը՝ «ՎիվաՍելլ» ՓԲ ընկերության 077 89-02-32 հեռախոսահամարի քարտով, հանձնել նրա օրինական ներկայացուցիչ Վոլոդյա Սիաբանդովին, իսկ բամբակյա խծուծները՝ ոչնչացնել։
Որոշումը կարող է բողոքարկվել ՀՀ քրեական վերաքննիչ դատարան` հրապարակվելու օրվանից հետո` մեկամսյա ժամկետում։

ԴԱՏԱՎՈՐ՝ Գ.ՊՈՂՈՍՅԱՆ