Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

05 մայիսի 2014թ. ք. Երևան

ԵԿԴ-0024/01/14


Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող
Կենտրոն և Նորք-Մարաշ
վարչական շրջանների դատախազության
դատախազ Ն. Միքայելյանի,

պաշտպան Լ. Ավետիսյանի,

տուժողներ Գ. Բարսեղյանի,
Գ. Ավդալյանի,
Ա. Ավետիսյանի,
Լ. Մարուքյան


դատարանում, դռնբաց դատական նիստում քննեց գործն ըստ մեղադրանքի
Թորգոմ Վարդանի Ասոյանի
/ծնված 13.09.1984թ. Երևան քաղաքում, հայ, ՀՀ քաղաքացի, միջնակարգ կրթությամբ, ամուսնացած, խնամքին մինչև տասնչորս տարեկան մեկ երեխա, չի աշխատում, նախկինում չդատված, հաշվառված է Երևանի Նալբանդյան փողոցի թիվ 50 շենքի թիվ 161 բնակարանում, փաստացի բնակվում է Երևանի Դրոյի թիվ 4 շենքի թիվ 59 բնակարանում, 2013թ. մարտի 20-ին ձերբակալվել է, Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 22.03.2013թ. որոշմամբ որպես խափանման միջոց է ընտրվել կալանավորումը։ Նույն դատարանի 15.07.2013թ. որոշմամբ կալանավորումը փոխարինվել է գրավով և 19.07.2013թ. ազատ է արձակվել` անազատության մեջ մնալով 3 /երեք/ ամիս 29 /քսանինը/ օր, մեղադրվում է չորս դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով/։


Գործի դատավարական նախապատմությունը

Թիվ 15123212 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2012թ. նոյեմբերի 20-ին, ՀՀ քրեական օրենսգրքի 178-րդ հոդվածի 1-ին մասով, Թոմ Ասոյանի կողմից խարդախությամբ Աննա Խաչատրյանի և Քրիստինե Հովհաննիսյանի գույքի զգալի չափերի հափշտակություն կատարելու փաստի առթիվ։
Քննիչի 2012թ. դեկտեմբերի 12-ի որոշմամբ Թորգոմ Վարդանի Ասոյանը բերման է ենթարկվել ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին։
Քննիչի 2012թ. դեկտեմբերի 17-ի որոշմամբ Թ. Ասոյանի նկատմամբ որպես խափանման միջոց ընտրվել է ստորագրություն չհեռանալու մասին։
Քննիչի 2012թ. դեկտեմբերի 20-ի որոշմամբ Թ. Ասոյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով։
Թիվ 11106013 քրեական գործը ՀՀ ոստիկանության ՔԳՎ Երևան քաղաքի քննչական վարչության Շենգավիթի քննչական բաժնում հարուցվել է 2013թ. փետրվարի 01-ին, ՀՀ քրեական օրենսգրքի 178-րդ հոդվածի 2-րդ մասի 2-րդ կետով, Թորգոմ Ասոյանի կողմից խարդախությամբ` վստահությունը չարաշահելու եղանակով, խաբեությամբ Լիլիթ Լևոնի Խաչատրյանի գույքի խոշոր չափի հափշտակություն կատարելու դեպքի առթիվ։
Քննիչի 2013թ. մարտի 18-ի որոշմամբ Թ. Ասոյանին առաջադրված մեղադրանքը փոփոխվել և նրան նոր մեղադրանք է առաջադրվել կրկին ՀՀ քրեական օրենսգրքի 178-րդ հոդվածի 1-ին մասով, նրա նկատմամբ ընտրված խափանման միջոց չհեռանալու մասին ստորագրությունը թողնվել է անփոփոխ։ Նույն օրը հայտարարվել է մեղադրյալ Թորգոմ Ասոյանի հետախուզումը։
Քննիչի 2013թ. մարտի 20-ի որոշմամբ մեղադրյալ Թ. Ասոյանի գտնվելու վայրը հայտնի չլինելու պատճառաբանությամբ քրեական գործի վարույթը կասեցվել է` մինչև նրա հայտնաբերվելը։ Նույն օրը Թ. Ասոյանը հայտնաբերվել և ներկայացվել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին։
Քրեական գործի վարույթը 2013թ. մարտի 20-ին վերսկսվել է և մեղադրյալ Թ. Ասոյանը նույն օրը ձերբակալվել է։
Թիվ 13133213 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. մարտի 20-ին, ՀՀ քրեական օրենսգրքի 178-րդ հոդվածի 2-րդ մասի 2-րդ կետով, Թորգոմ Ասոյանի կողմից խարդախությամբ` վստահությունը չարաշահելու եղանակով, խաբեությամբ Գայանե Ավդալյանի, Գարիկ Բարսեղյանի, Ավետիս Ավետիսյանի գույքի խոշոր չափերի, Ռիտա Նիկոյանի, Գայանե Գրքիկյանի գույքի զգալի չափի հափշտակություններ կատարելու դեպքերի առթիվ։
Քննիչի 2013թ. մարտի 21-ի որոշմամբ թիվ 13133213 քրեական գործը միացվել է թիվ 15123212 քրեական գործին և նախաքննությունը շարունակվել է թիվ 15123212 քրեական գործով։
Քննիչի 2013թ. մարտի 22-ի որոշմամբ Թ. Ասոյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Դատարանի 22.03.2013թ. որոշմամբ մեղադրյալ Թ. Ասոյանի նկատմամբ որպես խափանման միջոց ընտրվել է կալանավորում` կալանավորման սկիզբը հաշվելով 2013թ. մարտի 20-ից։
2013թ. մարտի 26-ի որոշմամբ թիվ 11106013 քրեական գործը ՀՀ ոստիկանության ՔԳՎ Երևան քաղաքի քննչական վարչության Շենգավիթի քննչական բաժնից ուղարկվել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին, 2013թ. մարտի 29-ի որոշմամբ թիվ 11106013 քրեական գործն ընդունվել է քննիչի վարույթ և միացվել է թիվ 15123212 քրեական գործին։
Դատարանի 2013թ. հուլիսի 15-ի որոշմամբ մեղադրյալ Թ. Ասոյանի նկատմամբ ընտրված խափանման միջոց կալանավորումը փոխարինվել է գրավով։
Քննիչի 2013թ. հուլիսի 19-ի որոշմամբ մեղադրյալ Թ. Ասոյանն ազատվել է կալանքից։
Թիվ 13809813 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. սեպտեմբերի 30-ին, ՀՀ քրեական օրենսգրքի 178-րդ հոդվածի 1-ին մասով, Թորգոմ Ասոյանի կողմից խարդախությամբ` վստահությունը չարաշահելու եղանակով, խաբեությամբ Նվարդ Շեկոյանի գույքի զգալի չափի հափշտակություն կատարելու դեպքի առթիվ և նույն օրը միացվել է թիվ 15123212 քրեական գործին։
Քննիչի 2014թ. փետրվարի 14-ի որոշումներով Թորգոմ Վարդանի Ասոյանի կողմից տուժողներ Աննա Խաչատրյանի, Քրիստինե Հովհաննիսյանի, Բիաննա Շահնազարյանի, Գայանե Գրքիկյանի, Ռիտա Նիկոյանի, Լիլիթ Խաչատրյանի, Ռիտա Խաչատրյանի, Գայանե Եղիազարյանի, Հրանուշ Պողոսյանի, Նվարդ Շեկոյանի, Ռուզաննա Բոյաջյանի, Վիկտորյա Բոյաջյանի նկատմամբ խաբեության և վստահությունը չարաշահելու եղանակով նրանց գույքի հափշտակությունները կատարելու դրվագներով թիվ 15123212 քրեական գործի մասը կարճվել է` վերջիններիս կողմից մեղադրյալի հետ հաշտվելու հիմքով։ Թորգոմ Վարդանի Ասոյանի կողմից տուժող Հասմիկ Ղազանչյանի նկատմամբ խաբեության և վստահությունը չարաշահելու եղանակով նրա գույքի հափշտակությունը կատարելու դրվագով թիվ 15123212 քրեական գործի մասը կարճվել է` հանցակազմի բացակայության հիմքով։
Քննիչի 2014թ. փետրվարի 17-ի որոշմամբ Թորգոմ Ասոյանին առաջադրված մեղադրանքը փոփոխվել և լրացվել է, նրան մեղադրանք է առաջադրվել չորս դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով և մեկ դրվագով` ՀՀ քրեական օրենսգրքի 178-րդ հոդվածի 1-ին մասով։
Քննիչի 2014թ. փետրվարի 24-ի որոշմամբ, թիվ 15123212 քրեական գործով ՀՀ քրեական օրենսգրքի 325-րդ հոդվածի 1-ին մասով Կարեն Յուրիկի Ավագյանի նկատմամբ քրեական հետապնդում չի իրականացվել` համաներման ակտի ընդունման հիմքով։
Ամբաստանյալ Թորգոմ Վարդանի Ասոյանին նախաքննության մարմնի կողմից մեղադրանք է առաջադրվել չորս դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով, մեկ դրվագով` 178-րդ հոդվածի 1-ին մասով հետևյալ արարքների համար. «որ նա խարդախությամբ խոշոր չափերի հափշտակություն կատարելու միասնական դիտավորությամբ՝ իր հանցավոր մտադրությունն իրականացնելու համար որպես խաբեության եղանակ օգտագործելով հոր վատառողջ լինելու պատրվակը, Գայանե Գրիգորի Ավդալյանին խնդրել է նրա անվամբ ապառիկ վճարման կարգով ձեռք բերել բջջային հեռախոսներ և համակարգիչ՝ դրանք վաճառել և վաճառքից գոյացած գումարով հոր առողջական ծախսերը հոգալ՝ միաժամանակ վերջինիս սուտ խոստումներ տալով՝ պարտաճանաչ կատարել կնքված ապառիկ պայմանագրերի ամսեկան վճարումները։ Իր հանցավոր մտադրությունն իրականացնելով՝ 2012թ. հոկտեմբերի 18-ին Երևան քաղաքի Գ. Նժդեհի հրապարակում գործող «Արմենտել» ՓԲ ընկերության գրասենյակից իր համար, բայց Գ. Ավդալյանի անվամբ ապառիկ վճարման կարգով համապատասխան պայմանագիր կնքելով և կատարելով 86.088 ՀՀ դրամ գումարի չափով կանխավճար, խաբեությամբ վերջինիս անվամբ ձեռք է բերել 430.440 ՀՀ դրամ արժողության «Սամսունգ Տ9300» մոդելի բջջային հեռախոս։ Հաջորդ օրը՝ 2012թ. հոկտեմբերի 19-ին, դարձյալ նույն պատրվակով ու եղանակով Երևան քաղաքի Տերյան-Կորյուն փողոցների խաչմերուկում գործող «Օրանժ-Արմենիա» ՓԲ ընկերության գրասենյակից ապառիկ վճարման կարգով համապատասխան պայմանագիր կնքելով՝ նրա անվամբ ձեռք է բերել 60.000 ՀՀ դրամ արժողությամբ «Սամսունգ» մոդելի բջջային հեռախոս, իսկ 30.12.2012թ. Երևան քաղաքի Սայաթ-Նովա փողոցում գործող «Դի-Ջի Քոմպ» խանութ-սրահից ապառիկ վճարման կարգով համապատասխան պայմանագիր կնքելով՝ ձեռք է բերել 260.000 ՀՀ դրամ արժողության համակարգիչ և չկատարելով պայմանագրային վճարումները՝ հափշտակել է ապառիկ կարգով գնված բջջային հեռախոսների և համակարգչի վաճառքից ստացված խոշոր չափերի՝ ընդհանուր 664.352 ՀՀ դրամ գումարը։
Այսինքն, Թ. Ասոյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Բացի այդ, Թորգոմ Վարդանի Ասոյանը, խարդախությամբ խոշոր չափերի հափշտակություն կատարելու միասնական դիտավորությամբ՝ իր հանցավոր մտադրությունն իրականացնելու համար որպես խաբեության եղանակ օգտագործելով հոր վատառողջ լինելու պատրվակը, Գարիկ Վրեժի Բարսեղյանին խնդրել է նրա անվամբ ապառիկ վճարման կարգով ձեռք բերել բջջային հեռախոսներ և համակարգիչ՝ դրանք վաճառել և վաճառքից գոյացած գումարով հոր առողջական ծախսերը հոգալ՝ միաժամանակ վերջինիս սուտ խոստումներ տալով՝ պարտաճանաչ կատարել կնքված ապառիկ պայմանագրերի ամսեկան վճարումները։ Իր հանցավոր մտադրությունն իրականացնելով՝ 2012թ. հոկտեմբերի 05-ին Երևան քաղաքի Տերյան-Կորյուն փողոցների խաչմերուկում գործող «Օրանժ-Արմենիա» ՓԲ ընկերության գրասենյակից իր համար, բայց Գ. Բարսեղյանի անվամբ ապառիկ վճարման կարգով համապատասխան պայմանագիր կնքելով՝ նրա անվամբ ձեռք է բերել 60.000 ՀՀ դրամ արժողությամբ «Սամսունգ» մոդելի բջջային հեռախոս։ Այնուհետև, 2012թ. նոյեմբերի 03-ին, դարձյալ նույն պատրվակով ու եղանակով «Արմենտել» ՓԲ ընկերության գրասենյակից իր համար, բայց Գ. Բարսեղյանի անվամբ ապառիկ վճարման կարգով համապատասխան պայմանագիր կնքելով և կատարելով 70.800 ՀՀ դրամ գումարի չափով կանխավճար՝ ձեռք է բերել 354.000 ՀՀ դրամ արժողության «Նոկիա Լումիա» մոդելի բջջային հեռախոս, իսկ 25.12.2012թ. Երևան քաղաքի Սայաթ-Նովա փողոցում գործող «Դի-Ջի Քոմպ» խանութ-սրահից ապառիկ վճարման կարգով համապատասխան պայմանագիր կնքելով՝ ձեռք է բերել 260.000 ՀՀ դրամ արժողության համակարգիչ և չկատարելով պայմանագրային վճարումները՝ հափշտակել է ապառիկ կարգով գնված բջջային հեռախոսների և համակարգչի վաճառքից ստացված խոշոր չափերի՝ ընդհանուր 603.200 ՀՀ դրամ գումարը։
Այսինքն, Թ. Ասոյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Բացի այդ, Թորգոմ Վարդանի Ասոյանը, խարդախությամբ խոշոր չափերի հափշտակություն կատարելու միասնական դիտավորությամբ՝ իր հանցավոր մտադրությունն իրականացնելու համար որպես խաբեության եղանակ օգտագործելով հոր վատառողջ լինելու պատրվակը, Ավետիս Համլետի Ավետիսյանին խնդրել է նրա անվամբ ապառիկ վճարման կարգով ձեռք բերել բջջային հեռախոսներ և համակարգիչ՝ դրանք վաճառել և վաճառքից գոյացած գումարով հոր առողջական ծախսերը հոգալ՝ միաժամանակ վերջինիս սուտ խոստումներ տալով՝ պարտաճանաչ կատարել կնքված ապառիկ պայմանագրերի ամսեկան վճարումները։ Իր հանցավոր մտադրությունն իրականացնելով՝ 2012թ. նոյեմբերի 05-ին «Արմենտել» ՓԲ ընկերության գրասենյակից իր համար, բայց Ա. Ավետիսյանի անվամբ ապառիկ վճարման կարգով համապատասխան պայմանագիր կնքելով և կատարելով 72.600 ՀՀ դրամ գումարի չափով կանխավճար՝ ձեռք է բերել 363.000 ՀՀ դրամ արժողության «Սամսունգ GT-S9100» մոդելի բջջային հեռախոս, իսկ 28.12.2012թ. Երևան քաղաքի Սայաթ-Նովա փողոցում գործող «Դի-Ջի Քոմպ» խանութ-սրահից վարկային, կոշտ գրավի և բանկային հաշվի բացման պայմանագրի հիման վրա նրա անվամբ ձեռք է բերել 260.000 ՀՀ դրամ արժողության համակարգիչ և չկատարելով պայմանագրային վճարումները՝ հափշտակել է ապառիկ կարգով գնված բջջային հեռախոսի և համակարգչի վաճառքից ստացված խոշոր չափերի՝ ընդհանուր 550.400 ՀՀ դրամ գումարը։
Այսինքն, Թ. Ասոյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Դրանից բացի, Թորգոմ Վարդանի Ասոյանը, խարդախությամբ զգալի չափերի հափշտակություն կատարելու միասնական դիտավորությամբ՝ իր հանցավոր մտադրությունն իրականացնելու համար որպես պատրվակ օգտագործելով Վրեժ Վաչագանի Ավետիսյանին բջջային հեռախոսահամար վաճառելու հանգամանքը՝ վերջինիս սուտ խոստումներ է տվել պարտաճանաչ կատարելու կնքված ապառիկ պայմանագրերի ամսեկան վճարումները և 2012թ. նոյեմբերի 12-ին կատարելով 71.000 ՀՀ դրամի կանխավճար՝ նրա անվամբ «Արմենտել» ՓԲ ընկերության գրասենյակից ձեռք է բերել 354.000 ՀՀ դրամ արժողության «Նոկիա Լումիա 900» մոդելի բջջային հեռախոս։ Հաջորդ օրը՝ 2012թ. նոյեմբերի 13-ին, դարձյալ նույն պատրվակով և եղանակով «Օրանժ-Արմենիա» ՓԲ ընկերության գրասենյակից, իր համար, բայց նրա անվամբ ձեռք է բերել 60.000 ՀՀ դրամ արժողության «Սամսունգ» մոդելի բջջային հեռախոս և չկատարելով պայմանագրային վճարումները՝ հափշտակել է ապառիկ կարգով գնված բջջային հեռախոսների վաճառքից ստացված զգալի չափերի հասնող՝ ընդհանուր 343.000 ՀՀ դրամ գումարները։
Այսինքն, Թ. Ասոյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 1-ին մասով։
Բացի այդ, Թորգոմ Վարդանի Ասոյանը, խարդախությամբ խոշոր չափերի հափշտակություն կատարելու միասնական դիտավորությամբ՝ իր հանցավոր մտադրությունն իրականացնելու համար որպես խաբեության եղանակ օգտագործելով տուգանք վճարելու պատրվակը և միաժամանակ հաջորդ օրը վերադարձնելու սուտ խոստումներ տալով՝ 2013թ. փետրվարի 25-ին Լուսինե Հայկի Մարուքյանից վերցրել է վերջինիս պատկանող 250.000 ՀՀ դրամ արժողությամբ ադամանդե քարերով ոսկյա մատանին և 100.000 ՀՀ դրամ արժողությամբ 7 գրամ քաշով ոսկյա շղթան, սակայն չի վերադարձրել նշված զարդերը և խաբեությամբ հափշտակել է դրանք։ Իսկ 26.02.2013թ-ին աշխատանքի տեղավորելու պատրվակով, Լ. Մարուքյանին մոլորության մեջ գցելով՝ համապատասխան փաստաթղթեր ստորագրել տալու եղանակով, Աբովյան քաղաքում գործող համակարգիչների խանութ-սրահից վերջինիս անձնագրով վարկային, կոշտ գրավի և բանկային հաշվի բացման պայմանագիր կնքելով և կատարելով 38.000 ՀՀ դրամ գումարի չափով կանխավճար՝ նրա անվամբ ձեռք է բերել 250.000 ՀՀ դրամ արժողությամբ «նոթբուք» տեսակի համակարգիչ և չկատարելով պայմանագրային վճարումները՝ հափշտակել է ապառիկ կարգով գնված համակարգչի վաճառքից ստացված 212.000 ՀՀ դրամ գումարը՝ Լ. Մարուքյանին պատճառելով խոշոր չափերի՝ ընդհանուր 562.000 ՀՀ դրամի գույքային վնաս։
Այսինքն, Թ. Ասոյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Այսպիսով, Թորգոմ Վարդանի Ասոյանը կատարել է հանցավոր արարքներ, որոնք նախատեսված են ՀՀ քրեական օրենսգրքի 178-րդ հոդվածի 2-րդ մասի 2-րդ կետով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով, ՀՀ քրեական օրենսգրքի 178-րդ հոդվածի 1-ին մասով և ՀՀ քրեական օրենսգրքի 178-րդ հոդվածի 2-րդ մասի 2-րդ կետով։»։
2014թ. փետրվարի 28-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։
Դատարանի 2014թ. մայիսի 05-ի որոշմամբ, ԵԿԴ/0024/01/14 (15123212) քրեական գործով ըստ մեղադրանքի Թորգոմ Վարդանի Ասոյանի` չորս դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով, մեկ դրվագով` ՀՀ քրեական օրենսգրքի 178-րդ հոդվածի 1-ին մասով, ամբաստանյալ Թորգոմ Վարդանի Ասոյանի կողմից, խարդախությամբ տուժող Վրեժ Ավետիսյանից զգալի չափով գումար հափշտակելու մեկ դրվագով, ՀՀ քրեական օրենսգրքի 178-րդ հոդվածի 1-ին մասով քրեական գործի վարույթը կարճվել է և ամբաստանյալ Թ. Ասոյանի նկատմամբ քրեական հետապնդումը դադարեցվել է` ամբաստանյալի հետ տուժող Վրեժ Ավետիսյանի հաշտվելու պատճառաբանությամբ։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Թորգոմ Վարդանի Ասոյանը 2012թ. ընթացքում վարձակալական հիմունքներով վարել է տաքսի ավտոմեքենա և զբաղվել է ուղևորափոխադրմամբ։ Այդ աշխատանքի ընթացքում նա ծանոթացել և մտերմացել է տուժողների հետ, ձեռք է բերել փոխադարձ վստահություն, վերցրել է նրանց բջջային հեռախոսահամարները և կապ է պահպանել։ Հոր` վատառողջ լինելու, տուգանք վճարելու անհրաժեշտության, աշխատանքի տեղավորելու պատրվակներով, տալով սուտ խոստումներ և չարաշահելով տուժողների վստահությունը` Թ. Ասոյանը տուժողների անունից և նրանց անձնագրերով տարբեր ընկերությունների հետ կնքված ապառիկ վճարման պայմանագրերի հիման վրա ձեռք է բերել բջջային հեռախոսներ և համակարգիչներ։ Նա տուժողներին հավաստիացրել է, իբրև թե ինքը հետագայում պարտաճանաչ կերպով կկատարի վճարումները և նրանք ընկերությունների հետ որևէ գումարային խնդիրներ չեն ունենա։ Այդ եղանակով, 2012-2013թթ. ընթացքում Թ. Ասոյանը տուժողների անվամբ ձեռք բերելով բջջային հեռախոսներ և համակարգիչներ` չի կատարել տուժողների անվամբ ձևակերպված պայմանագրային պարտավորությունները, վաճառել է այդ ապրանքները և հափշտակել դրանց վաճառքից ստացված խոշոր չափերի գումարները հետևյալ հանգամանքներում.
Առաջին դրվագ
2012թ. հոկտեմբերի 18-ին, Թորգոմ Ասոյանի խնդրանքով, նրա վատառողջ հոր բուժման ծախսերի ապահովմանն օգնելու պատրվակով, տուժող Գայանե Ավդալյանը գնացել է Երևան քաղաքի Գ. Նժդեհի հրապարակում գործող «Արմենտել» ՓԲ ընկերության գրասենյակ, իր անվամբ կնքել է թիվ 117106325 պայմանագիր, որով ձեռք է բերել 430.440 ՀՀ դրամ արժողությամբ Սամսունգ Ս9300 (Samsung S9300) մոդելի բջջային հեռախոս և տրամադրել Թ. Ասոյանին։ Վերջինս կատարել է 86.088 ՀՀ դրամ գումարի չափով կանխավճար, խոստացել է վճարել նաև մնացած գումարը և խաբեությամբ ձեռք է բերել նշված հեռախոսը։ Հաջորդ օրը՝ 2012թ. հոկտեմբերի 19-ին, նույն նպատակով Թ. Ասոյանը և Գ. Ավդալյանը գնացել են Երևան քաղաքի Տերյան և Կորյուն փողոցների խաչմերուկում գործող «Օրանժ-Արմենիա» ՓԲ ընկերության գրասենյակ, որտեղ Գ. Ավդալյանն իր անվամբ կնքել է թիվ 2206826 ապրանքի ապառիկ վաճառքի պայմանագիր, ձեռք է բերել 60.000 ՀՀ դրամ արժողությամբ Սամսունգ (Samsung) մոդելի բջջային հեռախոս և այն տրամադրել Թ. Ասոյանին։
Բացի այդ, 2012թ. դեկտեմբերի 30-ին, նույն նպատակով Թ. Ասոյանը և Գ. Ավդալյանը գնացել են Երևան քաղաքի Սայաթ-Նովա փողոցում գործող «Դի-Ջի Քոմպ» համակարգչային խանութ-սրահ։ Գ. Ավդալյանը նույն օրը «ՎՏԲ Հայաստան բանկ» ՓԲԸ-ի հետ կնքել է թիվ RL 83654 վարկային, կոշտ գրավի և բանկային հաշվի բացման պայմանագիր և ձեռք է բերել մեկ հատ 260.000 ՀՀ դրամ արժողությամբ Դուալ Քօր (Dual Core) մակնիշի համակարգիչ, որը տրամադրել է Թ. Ասոյանին։ Վերջինս ապառիկ վաճառված ապրանքների պայմանագրային պարտավորությունները դրանցով նախատեսված ժամկետներում չի կատարել, վաճառել է նշված ապրանքները և խարդախությամբ` չարաշահելով տուժող Գ. Ավդալյանի վստահությունը, խաբեությամբ հափշտակել է ապառիկ կարգով գնված բջջային հեռախոսների և համակարգչի վաճառքից ստացված, խոշոր չափի` 664.352 ՀՀ դրամ ընդհանուր գումարը։
Ամբաստանյալ Թ. Ասոյանի հոր կողմից, 2013թ. սեպտեմբերին վերականգնվել է Գ. Ավդալյանին պատճառված վնասը և ամբողջությամբ կատարվել են վերջինիս անվամբ կնքված վերոհիշյալ պայմանագրերով նախատեսված պայմանագրային պարտավորությունները։
Երկրորդ դրվագ
2012թ. հոկտեմբերի 05-ին, Թորգոմ Վարդանի Ասոյանի խնդրանքով, նրա վատառողջ հոր բուժման ծախսերի ապահովմանն օգնելու պատրվակով, տուժող Գարիկ Վրեժի Բարսեղյանը գնացել է Երևան քաղաքի Տերյան-Կորյուն փողոցների խաչմերուկում գործող «Օրանժ-Արմենիա» ՓԲ ընկերության գրասենյակ, որտեղ ներկայացրել է իր անձնագիրը, կնքել է թիվ 2191323 բաժանորդային պայմանագիրը, ձեռք է բերել 60.000 ՀՀ դրամ արժողությամբ Սամսունգ Ց3782 (Samsung C3782) մոդելի բջջային հեռախոս և այն տրամադրել Թ. Ասոյանին։
2012թ. նոյեմբերի 03-ին, նույն նպատակով Գարիկ Բարսեղյանը գնացել է «Արմենտել» ՓԲ ընկերության գրասենյակ, որտեղ իր անվամբ կնքել է թիվ 117141045 Nokia Lumia 900 բջջային հեռախոսի առուվաճառքի պայմանագիր և դրանով ձեռք բերված, 354.000 ՀՀ դրամ արժողությամբ Նոկիա Լումիա 900 (Nokia Lumia 900) մոդելի բջջային հեռախոսը տրամադրել է Թ. Ասոյանին։ Պայմանագիրը կնքելիս Թ. Ասոյանը կատարել է 70.800 ՀՀ դրամ գումարի չափով կանխավճար, խոստացել է վճարել նաև մնացած գումարը և խաբեությամբ ձեռք է բերել նշված համակարգիչը։
2012թ. դեկտեմբերի 25-ին, նույն նպատակով Թ. Ասոյանը և Գ. Բարսեղյանը միասին գնացել են Երևան քաղաքի Սայաթ-Նովա փողոցում գործող «Դի-Ջի Քոմպ» խանութ-սրահ` համակարգիչ ձեռք բերելու համար։ Նույն օրը Գարիկ Բարսեղյանի և «ՎՏԲ-Հայաստան բանկ» ՓԲ ընկերության միջև կնքվել է թիվ RL80761 վարկային, կոշտ գրավի և բանկային հաշվի բացման պայմանագիր (Ապառիկի պայմանագիր), որով Գ. Բարսեղյանն իր անվամբ ձեռք է բերել 260.000 ՀՀ դրամ արժողությամբ մեկ հատ Dual Core (Դուալ Քօր) մակնիշի համակարգիչ և տրամադրել է Թ. Ասոյանին։ Վերջինս ապառիկ վաճառված ապրանքների պայմանագրային պարտավորությունները դրանցով նախատեսված ժամկետներում չի կատարել, վաճառել է նշված ապրանքները և խարդախությամբ` չարաշահելով տուժող Գ. Բարսեղյանի վստահությունը, խաբեությամբ հափշտակել է Գ. Բարսեղյանի անվամբ ապառիկ կարգով գնված բջջային հեռախոսների և համակարգչի վաճառքից ստացված, խոշոր չափի` 603.200 ՀՀ դրամ ընդհանուր գումարը։
Ամբաստանյալ Թ. Ասոյանի կողմից, 2013թ. մարտին, վերականգնվել է Գ. Բարսեղյանին պատճառված վնասը և ամբողջությամբ կատարվել են վերջինիս անվամբ կնքված վերոհիշյալ պայմանագրերով նախատեսված պայմանագրային պարտավորությունները։
Երրորդ դրվագ
2012թ. նոյեմբերի 05-ին, Թորգոմ Վարդանի Ասոյանի խնդրանքով, նրա վատառողջ հոր բուժման ծախսերի ապահովմանն օգնելու պատրվակով, «Արմենտել» ՓԲ ընկերության գրասենյակում տուժող Ա. Ավետիսյանի անվամբ կնքել է թիվ 117142655 բջջային հեռախոսի առուվաճառքի պայմանագիրը և դրանով ձեռք բերված, 363.000 ՀՀ դրամ արժողությամբ Սամսունգ ՋՏ-Ս9100 (Samsung GT-S9100) մոդելի բջջային հեռախոսը տրամադրվել է Թ. Ասոյանին։ Վերջինս պայմանագիր կնքելիս կատարել է 72.600 ՀՀ դրամ գումարի չափով կանխավճար և խոստացել է վճարել նաև մնացած գումարը։
Նույն նպատակով, 2012թ. դեկտեմբերի 28-ին, Երևան քաղաքի Սայաթ-Նովա փողոցում գործող «Դի-Ջի Քոմպ» խանութ-սրահից, թիվ RL82899 վարկային, կոշտ գրավի և բանկային հաշվի բացման պայմանագրի հիման վրա Ա. Ավետիսյանն իր անվամբ ձեռք է բերել 260.000 ՀՀ դրամ արժողությամբ մեկ հատ Դուալ Քօր (Dual Core) մակնիշի համակարգիչ և տրամադրել Թ. Ասոյանին։ Վերջինս ապառիկ վաճառված ապրանքի և վարկային պայմանագրերի պարտավորությունները դրանցով նախատեսված ժամկետներում չի կատարել, վաճառել է նշված ապրանքները և խարդախությամբ` չարաշահելով տուժող Ա. Ավետիսյանի վստահությունը, խաբեությամբ հափշտակել է վերջինիս անվամբ ապառիկ կարգով գնված բջջային հեռախոսի և համակարգչի վաճառքից ստացված, խոշոր չափի` 550.400 ՀՀ դրամ ընդհանուր գումարը։
Ամբաստանյալ Թ. Ասոյանի կողմից, 2013թ. մարտին, վերականգնվել է Ա. Ավետիսյանին պատճառված վնասը և ամբողջությամբ կատարվել են վերջինիս անվամբ կնքված վերոհիշյալ պայմանագրերով նախատեսված պայմանագրային պարտավորությունները։
Չորրորդ դրվագ
Թորգոմ Վարդանի Ասոյանը, որպես խաբեության եղանակ օգտագործելով տուգանք վճարելու անհրաժեշտության պատրվակը, 2013թ. փետրվարի 25-ին Լուսինե Հայկի Մարուքյանից վերցրել է վերջինիս պատկանող, 250.000 ՀՀ դրամ արժողությամբ ադամանդե քարերով ոսկյա մատանին և 100.000 ՀՀ դրամ արժողությամբ 7 գրամ քաշով ոսկյա շղթան` հաջորդ օրը վերադարձնելու պայմանով։ Նշված զարդերը Թ. Ասոյանը չի վերադարձրել և խաբեությամբ հափշտակել է դրանք։
Բացի այդ, 2013թ-ի փետրվարի 26-ին, Լ. Մարուքյանին գցելով մոլորության մեջ և իբրև թե նրան աշխատանքի տեղավորելու համար փաստաթղթեր ստորագրել տալու եղանակով ձեռք է բերել հետևյալ գույքը. Լ. Մարուքյանն Աբովյան քաղաքում գործող համակարգիչների խանութ-սրահում իր անձնագրով կնքել է թիվ RL99685 վարկային, կոշտ գրավի և բանկային հաշվի բացման պայմանագիր (Ապառիկի պայմանագիր), որի համաձայն Լ. Մարուքյանին տրամադրվել է վարկ` 250.000 ՀՀ դրամ արժողությամբ մեկ հատ Նոութբուք (HP G6 AMD-A6) մակնիշի համակարգիչ ձեռք բերելու նպատակով։ Թ. Ասոյանը պայմանագիրը կնքելիս կատարել է 38.000 ՀՀ դրամ գումարի չափով կանխավճար, խոստացել է վճարել նաև մնացած գումարը և խաբեությամբ ձեռք է բերել նշված համակարգիչը։ Թ. Ասոյանը պայմանագրով նախատեսված պարտավորությունները սահմանված ժամկետում չի կատարել, վաճառել է նշված համակարգիչը և դրա վաճառքից ստացված 212.000 ՀՀ դրամ գումարը խարդախությամբ հափշտակել է` Լ. Մարուքյանին պատճառելով խոշոր չափի` 562.100 ՀՀ դրամ ընդհանուր գումարի վնաս։
Լ. Մարուքյանը նախաքննության ընթացքում նշել է, որ հափշտակության հետևանքով իրեն պատճառվել է 600.000 ՀՀ դրամ ընդհանուր գումարի չափով գույքային վնաս։
Ըստ դատարան ներկայացված, տուժող Լուսինե Հայկի Մարուքյանի քույր Արմինե Հայկի Մարուքյանի 30.04.2014թ. դիմումի և 05.05.2014թ. հայտարարության` ամբաստանյալ Թ. Ասոյանի կողմից ամբողջությամբ վերականգնվել է Լ. Մարուքյանին պատճառված վնասը, կատարվել է վերջինիս անվամբ կնքված վերոհիշյալ պայմանագրով նախատեսված պարտավորությունները։
Տուժողներ Գ. Բարսեղյանին, Գ. Ավդալյանին, Ա. Ավետիսյանին պատճառված վնասներն ամբողջությամբ, կամովին հատուցվել են, տուժող Լ. Մարուքյանի կողմից որևէ գույքային պահանջ չի ներկայացվել։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Թորգոմ Ասոյանը խնամքին ունի մինչև տասնչորս տարեկան մեկ երեխա (Ռուզաննա Թորգոմի Ասոյան, ծնված` 2007թ. դեկտեմբերի 12-ին), նրա խնամքին է գտնվում նաև կենսաթոշակառու, ֆիզիկապես վատառողջ, երրորդ խմբի հաշմանդամ հայրը` Վարդան Ասոյանը, տուժողներ Գ. Ավդալյանին, Գ. Բարսեղյանին, Ա. Ավետիսյանին պատճառված գույքային վնասն ամբողջությամբ, կամովին հատուցել է։
Գործով քաղաքացիական հայց չի հարուցվել, որևէ գույքային պահանջ չի ներկայացվել։

Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Գարիկ Վրեժի Բարսեղյանի ցուցմունքով այն մասին, որ 2012թ. սեպտեմբեր ամսին Երևան քաղաքի «Այրարատ» կինոթատրոնի մոտակայքում նստել է պատահական տաքսի ավտոմեքենա և ուղևորվել է Էջմիածին քաղաք։ Ճանապարհին ծանոթացել է տաքսու վարորդ Թորգոմ Ասոյանի հետ, փոխանակել են հեռախոսահամարները և պայմանավորվել են նույն տաքսի ավտոմեքենայով վերադառնալ Երևան քաղաք։ Դրանից հետո Թ. Ասոյանը հաճախակի զանգահարել է իրեն, հանդիպել են, շփվել և ընկերություն արել։ 2012թ. հոկտեմբերին, Թ. Ասոյանն իրեն հայտնել է, որ հայրը վատառողջ է և նրա սրտի ստենդավորման համար գումար է անհրաժեշտ։ Նա խնդրել է որևէ ընկերության հետ իր անվամբ և անձնագրով կնքել պայմանագիր, ապառիկ կարգով ձեռք բերել բջջային հեռախոս, որի վաճառքից գոյացած գումարով կհոգա հոր բուժման ծախսերը։ Նա հավաստիացրել է, որ կարճ ժամանակահատվածում կմարի իր անվամբ ապառիկ կարգով ձեռք բերված բջջային հեռախոսի արժեքի վճարումները։ Ինքը վստահել է Թ. Ասոյանին և համաձայնվել է խնդրանքը կատարել։ 2012թ. հոկտեմբերի 05-ին Թ. Ասոյանի հետ միասին գնացել են Երևան քաղաքի Տերյան և Կորյուն փողոցների խաչմերուկում գործող «Օրանժ-Արմենիա» ՓԲ ընկերության գրասենյակ, որտեղ ներկայացրել է իր անձնագիրը և կնքել է թիվ 2191323 պայմանագիրը։ Երկու տարի մարման ժամկետով ձեռք է բերել 60.000 ՀՀ դրամ արժողությամբ Սամսունգ Ց3782 (Samsung C3782) մոդելի բջջային հեռախոս, որը տրամադրել է Թ. Ասոյանին։ Մոտ մեկ ամիս հետո, երբ հերթական անգամ հանդիպել է Թ. Ասոյանին, վերջինս իրեն հայտնել է, թե ձեռք բերված բջջային հեռախոսի վաճառքից գոյացած գումարը չի բավականացրել, նույն պատրվակով խնդրել է մեկ այլ գրասենյակից ևս ձեռք բերել բջջային հեռախոս։ Նա կրկին վստահեցրել է, որ վճարումները պարտաճանաչ կկատարի։ Ինքը չի մերժել խնդրանքը և 2012թ. նոյեմբերի 03-ին, Երևան քաղաքի Նոր Նորքի 5-րդ զանգվածում գործող «Արմենտել» ՓԲ ընկերության գրասենյակում իր անվամբ կնքել է թիվ 117141045 պայմանագիրը, նույն եղանակով ձեռք է բերել 354.000 ՀՀ դրամ արժողությամբ Նոկիա Լումիա 900 (Nokia Lumia 900) մոդելի բջջային հեռախոս և տրամադրել է Թ. Ասոյանին։ 2012թ. դեկտեմբերի վերջերին Թ. Ասոյանը պատճառաբանել է, իբրև թե անհրաժեշտություն է առաջացել հորը երկրորդ անգամ վիրահատելու և իրեն խնդրել է նույն եղանակով ձեռք բերել Նոութբուք տեսակի համակարգիչ։ Այդ անգամ նույնպես չի մերժել նրան։ 2012թ. դեկտեմբերի 25-ին գնացել են Երևան քաղաքի Սայաթ-Նովա փողոցում գործող «Դի-Ջի Քոմպ» համակարգչային խանութ-սրահ, որտեղ «ՎՏԲ Հայաստան բանկ» ՓԲԸ-ի հետ կնքել է վարկային, կոշտ գրավի և բանկային հաշվի բացման թիվ RL80761 պայմանագիրը, որով ձեռք է բերել մեկ հատ 260.000 ՀՀ դրամ արժողությամբ Դուալ Քօր (Dual Core) մակնիշի համակարգիչ և այն տրամադրել Թ. Ասոյանին։ Վերջինս խոստացել է պարտաճանաչ կատարել ապառիկ կարգով ձեռք բերված համակարգչի և բջջային հեռախոսների արժեքի վճարումները։ Երբ այդ վճարումները կատարելու վերաբերյալ ստացել է ծանուցումներ` հասկացել է, որ Թ. Ասոյանը որևէ վճարում չի կատարել։ Նրանից պահանջել է վճարել գումարները, սակայն վերջինս կրկին որևէ վճարում չի կատարել։ Երբ իր մայր Գայանե Ավդալյանին հայտնել է այդ մասին` տեղեկացել է, որ նրա անվամբ էլ է Թ. Ասոյանը ձեռք բերել բջջային հեռախոսներ և համակարգիչ։ Ինքը հասկացել է, որ Թ. Ասոյանն իր վստահությունը չարաշահելու եղանակով, իր անվամբ ձեռք է բերել բջջային հեռախոսներ և համակարգիչ, որոնք վաճառել և դրանց վաճառքից ստացված գումարները խաբեությամբ հափշտակել է, ուստի դիմել է ոստիկանություն։
Իր կողմից դեպքի առթիվ իրավապահ մարմիններին հաղորդում տալուց հետո, 2013թ. մարտ ամսին ամբաստանյալ Թ. Ասոյանի կողմից վերականգնվել է իրեն պատճառված վնասը` ամբողջությամբ կատարվել են իր անվամբ կնքված վերոհիշյալ պայմանագրերի պարտավորությունները։ Ինքը ամբաստանյալի նկատմամբ որևէ պահանջ չունի և չի ցանկանում, որ նա քրեական պատասխանատվության ենթարկվի։
/դատական նիստի արձանագրություն, հատոր 1, գ.թ. 216-219, հատոր 3, գ.թ. 210-211/
Տուժող Գայանե Գրիգորի Ավդալյանի ցուցմունքով այն մասին, որ 2012թ. հոկտեմբեր ամսին իր որդի Գարիկ Բարսեղյանի հետ միասին իրենց բնակարան է այցելել Թորգոմ Ասոյանը։ Որդին նրան ներկայացրել է որպես իր ընկեր և հայտնել է, որ նրա հայրն առողջական խնդիրներ ունի։ Խոսակցության ընթացքում Թ. Ասոյանն իրեն հայտնել է, որ շտապ գումար է անհրաժեշտ և առաջարկել է որևէ ընկերությունից իր անվամբ ապառիկ կարգով ձեռք բերել բջջային հեռախոս, որը կվաճառի և վաճառքից ստացված գումարով կհոգա հոր բուժման ծախսերը։ Թ. Ասոյանը հավաստիացրել է, որ կարճ ժամանակահատվածում կմարի իր անվամբ ապառիկ կարգով ձեռք բերված բջջային հեռախոսի արժեքի վճարումները։ Ինքը Թ. Ասոյանին ընդունել է որպես որդու ընկեր, հավատացել, վստահել և համաձայնվել է իր անվամբ ապառիկ կարգով ձեռք բերել բջջային հեռախոս ու տրամադրել նրան։ 2012թ. հոկտեմբերի 18-ին գնացել է Երևան քաղաքի Գ. Նժդեհի հրապարակում գործող «Արմենտել» ՓԲ ընկերության գրասենյակ, իր անվամբ կնքել է թիվ 117106325 պայմանագիրը և ձեռք է բերել 430.440 ՀՀ դրամ արժողությամբ Սամսունգ Ս9300 (Samsung S9300) մոդելի բջջային հեռախոս, որը տրամադրել է Թ. Ասոյանին։ Վերջինս պարտավորվել է պարտաճանաչ կերպով կատարել պայմանագրով նախատեսված վճարումները։ Հաջորդ օրը Թ. Ասոյանը զանգահարել է իրեն, հայտնել է, որ ձեռք բերված բջջային հեռախոսի վաճառքից ստացված գումարը չի բավականացրել և խնդրել է մեկ այլ գրասենյակից ևս ձեռք բերել բջջային հեռախոս։ Թ. Ասոյանը դարձյալ հավաստիացրել է, որ պարտաճանաչ կերպով կկատարի վճարումները։ Ինքը հավատացել է նրան և չի մերժել խնդրանքը։ 2012թ. հոկտեմբերի 19-ին միասին գնացել են Երևան քաղաքի Տերյան և Կորյուն փողոցների խաչմերուկում գործող «Օրանժ-Արմենիա» ՓԲ ընկերության գրասենյակ, իր անվամբ կնքել է ապրանքի ապառիկ վաճառքի թիվ 2206826 պայմանագիրը, որով ձեռք է բերել 60.000 ՀՀ դրամ արժողությամբ Սամսունգ (Samsung) մոդելի բջջային հեռախոս և տրամադրել Թ. Ասոյանին։ Այնուհետև, 2012թ. դեկտեմբերի 29-ին Թ. Ասոյանը զանգահարել է իրեն, խնդրել է իր անձնագրով վերցնել նաև մեկ հատ համակարգիչ։ Հավաստիացրել է, որ դրա վաճառքից գոյացած գումարներով կմարի նաև բջջային հեռախոսի արժեքի վճարումները, իսկ համակարգչի արժեքի վճարումները մաս-մաս կմարի։ Ինքը հավատացել և վստահել է Թ. Ասոյանին և միասին գնացել են Երևան քաղաքի Սայաթ-Նովա փողոցում գործող «Դի-Ջի Քոմպ» համակարգչային խանութ-սրահ։ 2012թ. դեկտեմբերի 30-ին «ՎՏԲ Հայաստան բանկ» ՓԲԸ-ի հետ կնքել է թիվ RL 83654 վարկային, կոշտ գրավի և բանկային հաշվի բացման պայմանագիր և ձեռք է բերել մեկ հատ 260.000 ՀՀ դրամ արժողությամբ Դուալ Քօր (Dual Core) մակնիշի համակարգիչ, որը տրամադրել է Թ. Ասոյանին։ Ինքը հույս է ունեցել, որ Թ. Ասոյանը կկատարի իր խոստացած, ապառիկ կարգով ձեռք բերված համակարգչի և բջջային հեռախոսների արժեքի վճարումները։ Երբ այդ վճարումները կատարելու վերաբերյալ ստացել է ծանուցումներ` հասկացել է, որ Թ. Ասոյանը որևէ վճարում չի կատարել։ Նրանից պահանջել է գումարները վճարել և նա հավաստիացրել է, որ բոլոր վճարումները կկատարի։ Ինքը որդու` Գ. Բարսեղյանի հետ խոսել է այդ հարցերի շուրջ և նրանից տեղեկացել է, որ Թ. Ասոյանը նրա անվամբ ևս ձեռք է բերել երկու բջջային հեռախոսներ, մեկ համակարգիչ և խոստացել է կատարել դրանց վճարումները։ Թ. Ասոյանը խոստացված վճարումները չի կատարել։ Ինքը հասկացել է, որ Թ. Ասոյանն իր վստահությունը չարաշահելու եղանակով, իր անվամբ ձեռք է բերել բջջային հեռախոսներ և համակարգիչ, որոնք վաճառել և դրանց վաճառքից ստացված գումարները խաբեությամբ հափշտակել է, ուստի դիմել է ոստիկանություն։
Իր կողմից դեպքի առթիվ իրավապահ մարմիններին հաղորդում տալուց հետո, 2013թ. մարտին ամբաստանյալ Թ. Ասոյանի կողմից վերականգնվել է իրեն պատճառված վնասը` ամբողջությամբ կատարվել են իր անվամբ կնքված վերոհիշյալ պայմանագրերի պարտավորությունները։ Ինքն ամբաստանյալի նկատմամբ որևէ պահանջ չունի և չի ցանկանում, որ նա քրեական պատասխանատվության ենթարկվի։
/դատական նիստի արձանագրություն, հատոր 1, գ.թ. 204-207, հատոր 3, գ.թ. 126-127, 224-225/
Տուժող Ավետիս Համլետի Ավետիսյանի ցուցմունքով այն մասին, որ 2012թ. հոկտեմբերին ծանոթացել է Թորգոմ Ասոյանի հետ։ Վերջինս իրեն հայտնել է, որ հայրը վատառողջ է և նրա սրտի վիրահատության համար գումար է անհրաժեշտ։ Նա խնդրել է որևէ ընկերության հետ իր անվամբ և անձնագրով կնքել պայմանագիր, ապառիկ կարգով ձեռք բերել բջջային հեռախոս, որի վաճառքից ստացած գումարով կհոգա հոր բուժման ծախսերը և խոստացել է կարճ ժամանակահատվածում մարել այդ հեռախոսի արժեքի վճարումները։ Սկզբից մերժել է Թ. Ասոյանի խնդրանքը։ Հետագայում, նրա բազմաթիվ խնդրանքներից հետո, հավատացել և համաձայնվել է կատարել նրա խնդրանքը։ Պայմանավորվածության համաձայն, 2012թ. նոյեմբերի 05-ին, Թ. Ասոյանի առաջարկով գնացել է Երևան քաղաքի Նոր Նորքի 5-րդ զանգվածում գործող «Արմենտել» ՓԲ ընկերության գրասենյակ և կնքել է ապրանքի ապառիկ վաճառքի թիվ 117142655 պայմանագիրը, իր անվամբ ձեռք է բերել 363.000 ՀՀ դրամ արժողությամբ Սամսունգ ՋՏ-Ս9300 (Samsung GT-S9100) մոդելի բջջային հեռախոս, որը տրամադրել է Թ. Ասոյանին։ Վերջինս պարտավորվել է կարճ ժամանակահատվածում մարել պայմանագրով նախատեսված վճարումները։ Այնուհետև, 2012թ. դեկտեմբեր ամսին, երբ հերթական անգամ հանդիպել է Թ. Ասոյանին, վերջինս պատճառաբանել է, որ ձեռք բերված բջջային հեռախոսի վաճառքից ստացված գումարը չի բավականացրել, խնդրել է իր անվամբ ապառիկ վճարման կարգով նաև մեկ հատ Նոութբուք տեսակի համակարգիչ ձեռք բերել և խոստացել է պարտաճանաչ կատարել նաև համակարգչի արժեքի վճարումները։ Ինքը հավատացել և վստահել է Թ. Ասոյանին և այդ անգամ ևս չի մերժել նրան։ 2012թ. դեկտեմբերի 28-ին միասին գնացել են Երևան քաղաքի Սայաթ-Նովա փողոցում գործող «ԴԻ-Ջի Քոմպ» համակարգչային խանութ-սրահ, որտեղ «ՎՏԲ Հայաստան բանկ» ՓԲ ընկերության հետ կնքել է վարկային, կոշտ գրավի և բանկային հաշվի բացման թիվ RL82899 պայմանագիրը, ձեռք է բերել մեկ հատ 260.000 ՀՀ դրամ արժողությամբ Դուալ Քօր (Dual Core) մակնիշի համակարգիչ, որը տրամադրել է Թ. Ասոյանին։ Երբ այդ վճարումները կատարելու վերաբերյալ ստացել է ծանուցումներ` հասկացել է, որ Թ. Ասոյանը որևէ վճարում չի կատարել։ Նրանից պահանջել է գումարները վճարել և նա հավաստիացրել է, որ բոլոր վճարումները կկատարի։ Հեռուստատեսությամբ տեսել է, որ Թ. Ասոյանը խարդախությամբ մի շարք քաղաքացիներից հափշտակություններ կատարելու համար բռնվել է` հասկացել է, որ Թ. Ասոյանն իր վստահությունը չարաշահելու եղանակով, իր անվամբ ձեռք է բերել բջջային հեռախոսներ և համակարգիչ, որոնք վաճառել և դրանց վաճառքից ստացված գումարները խաբեությամբ հափշտակել է, ուստի դիմել է ոստիկանություն։
Իր կողմից դեպքի առթիվ իրավապահ մարմիններին հաղորդում տալուց հետո, ամբաստանյալ Թ. Ասոյանի կողմից վերականգնվել է իրեն պատճառված վնասը` ամբողջությամբ կատարվել են իր անվամբ կնքված վերոհիշյալ պայմանագրերի պարտավորությունները։ Ինքն ամբաստանյալի նկատմամբ որևէ պահանջ չունի և չի ցանկանում, որ նա քրեական պատասխանատվության ենթարկվի։
/դատական նիստի արձանագրություն, հատոր 1, գ.թ. 216-219, հատոր 3, գ.թ. 210-211, հատոր 4, գ.թ. 27/
Տուժող Լուսինե Հայկի Մարուքյանի նախաքննական ցուցմունքով այն մասին, որ 2013թ. փետրվարի 25-ին Երևան քաղաքի Դավիթաշեն վարչական տարածքից տաքսի ավտոմքենայով ուղևորվել է Կենտրոն վարչական տարածք։ Այդ ընթացքում ծանոթացել է վարորդի՝ Թորգոմ Ասոյանի հետ։ Վերջինիս հետ ճանապարհին խոսել են, որի ընթացքում նա հայտնել է, թե հավանում է իրեն և առաջարկել, որպեսզի իրեն հետ ուղեկցի տուն։ Ինքը հավատացել է նրան և տվել է իր բջջային հեռախոսահամարը։ Երևան քաղաքի Արշակունյաց փողոցում իր գործերն ավարտելուց հետո Թ. Ասոյանը զանգահարել և մոտեցել է իրեն։ Երևան քաղաքում ավտոմեքենայով շրջելով շփվել են միմյանց հետ և զրուցել, որի ընթացքում Թ. Ասոյանն իրեն հայտնել է, որ գտնվում է նյութական ծանր վիճակում։ Պատճառաբանել է, իբրև թե 40.000 ՀՀ դրամ գումարի չափով տուգանք պետք է վճարի և գրավադրելու համար խնդրել է իր ձեռքի ադամանդե քարերով մատանին։ Հավաստիացրել է, որ այն կվերադարձնի հաջորդ օրը։ Ինքը հավատացել է նրան և տվել մատանին։ Այնուհետև, գնացել են Շենգավիթ վարչական տարածք, վերցրել են իր մայր Հայկանուշ Մարուքյանին և ուղևորվել տուն։ Ճանապարհին Թ. Ասոյանը մորը հայտնել է, որ իրեն հավանում է և առաջիկա օրերին այցելելու է իր ձեռքը խնդրելու։ Երբ հասել են իրենց շենքի բակ` մայրը իջել է ավտոմեքենայից, իսկ Թ. Ասոյանն իրեն հայտնել է, որ գումարը չի բավականացնի և հարցրել է, թե հնարավոր է, որ ինքն այլ ոսկյա իրեր ունենա։ Խնդրել է այն նույնպես տրամադրել մինչ հաջորդ օրը։ Ինքը վստահել է Թ. Ասոյանին՝ հայտնել է, որ ոսկյա շղթա ունի և նրա խնդրանքով բարձրացել է իրենց բնակարան, վերցրել 7 գրամ քաշով ոսկյա շղթան և վերադառնալով` փոխանցել է նրան։ Ինքն այդ պահին տան անդամներից ոչ ոքի չի հայտնել այդ մասին։ Հաջորդ օրը Թ. Ասոյանը եկել է իրենց շենքի բակ, հանդիպել իրեն, սակայն ոսկեղենը չի վերադարձրել և խոստացել է դրանք վերադարձնել առաջիկայում։ Նույն օրը` 2013թ. փետրվարի 26-ին, Թ. Ասոյանն իրեն առաջարկել է աշխատանքի տեղավորել։ Այդ նպատակով գնացել են Աբովյան քաղաք։ Այնտեղ գործող տեխնիկայի խանութներից մեկում ստորագրել է ինչ-որ փաստաթղթեր` առանց դրանք ուսումնասիրելու։ Հաջորդ օրը ինքը զանգահարել է Թ. Ասոյանին և պահանջել է վերադարձնել ոսկեղենը։ Վերջինս պատճառաբանել է, որ հայրը ծանր հիվանդ է և պետք է հիվանդանոց տեղափոխեն, չի կարող ոսկեղենը վերադարձնել։ Հետո պատճառաբանել է, իբրև թե ավտովթարի է ենթարկվել։ Դրանից հետո Թ. Ասոյանը չի պատասխանել իր հեռախոսազանգերին և անհետացել է։ 2013թ. մարտին, երբ ծանուցում է ստացել «ՎՏԲ Հայաստան բանկ» ՓԲ ընկերությունից վարկային պարտավորությունները չկատարելու վերաբերյալ, անակնկալի է եկել։ Ծնողների հետ գնացել է նշված բանկ՝ տեղեկացել է, որ իր անվամբ ձեռք է բերվել 250.000 ՀՀ դրամ արժողությամբ Նոութբուք (HP G6 AMD-A6) մակնիշի համակարգիչ։ Ուսումնասիրելով «ՎՏԲ Հայաստան բանկ» ՓԲ ընկերության հետ 2013թ. փետրվարի 26-ին կնքված թիվ RL99685 պայմանագիրը` hասկացել է, որ Թորգոմ Ասոյանն իր վստահությունը չարաշահելու եղանակով, աշխատանքի տեղավորելու պատրվակով իր անվամբ ձեռք է բերել համակարգիչ, որը վաճառել և դրա վաճառքից ստացված գումարը խաբեությամբ հափշտակել է, ուստի դիմել է ոստիկանություն։
Հափշտակության հետևանքով իրեն պատճառվել է 600.000 ՀՀ դրամ ընդհանուր գումարի գույքային վնաս։
/հատոր 3, գ.թ. 20-22/
Որպես վկա հարցաքննված, տուժող Լուսինե Հայկի Մարուքյանի քույր Արմինե Հայկի Մարուքյանի ցուցմունքով այն մասին, որ Լ. Մարուքյանը շուրջ երեք ամիս է բացակայում է Հայաստանի Հանրապետությունից և գտնվում է Ռուսաստանի Դաշնության Ալթայի երկրամասում բնակվող իր հայր Հայկ Մարուքյանի մոտ` անորոշ ժամանակով։ Ամբաստանյալ Թորգոմ Ասոյանի կողմից իր քույր Լ. Մարուքյանին նյութական վնաս պատճառելու վերաբերյալ հաղորդումը նախաքննության մարմնին ներկայացրել է իր հայր Հայկ Մարուքյանը։ Վերջինս իրեն տվել է համապատասխան լիազորագիր` Հայաստանի Հանրապետության տարածքում գործող տարբեր կազմակերպություններում իր անունից հանդես գալու համար։ Բացի այդ, հեռախոսային խոսակցությունների ընթացքում իր քույրը և հայրն իրեն լիազորել են մասնակցել նաև Թ. Ասոյանի վերաբերյալ դատարանում քննվող քրեական գործի քննությանը և հայտնել, որ Թ. Ասոյանի կողմից ամբողջությամբ վերականգնվել է իր քույր Լ. Մարուքյանին պատճառված նյութական վնասը և նրա նկատմամբ որևէ պահանջ չունեն։ Խնդրում է Թ. Ասոյանին քրեական պատասխանատվության չենթարկել։
/դատական նիստի արձանագրություն/
Նախաքննության ընթացքում ամբաստանյալ Թորգոմ Վարդանի Ասոյանն առաջադրված մեղադրանքում իրեն մեղավոր չի ճանաչել՝ պատճառաբանելով, թե մեղադրանքի ծավալում ընդգրկված անձանցից որևէ մեկին չի խաբել, մինչև ապրանքների վերցնելը խաբելու մտադրություն և նպատակ չի ունեցել, սակայն զղջում է իր կատարած արարքների համար։ Այնուհետև նա հրաժարվել է ցուցմունքներ տալ։
/հատոր 1, գ.թ. 245, հատոր 3, գ.թ. 110, հատոր 4, գ.թ. 119-120, 142/
Ամբաստանյալ Թորգոմ Ասոյանի` դատարանում տված ցուցմունքով այն մասին, որ առաջադրված մեղադրանքն ընդունում է` բացառությամբ տուժող Լ. Մարուքյանի դրվագից։ Իր հայրը վատառողջ է եղել։ Նրա սրտի ստենդավորման համար գումարներ են անհրաժեշտ եղել։ Գումարները վերցնելու ժամանակ գտնվել է ծանր նյութական վիճակում, որի պատճառով էլ դիմել է նման քայլի, սակայն մտադրություն է ունեցել հետագայում գումարները վերադարձնել տուժողներին։ Ինքը Լ. Մարուքյանին չի ճանաչել, նրան տեսել է ընդամենը մեկ անգամ և նրանից ոսկեղեն չի վերցրել։ Վերջինս զրպարտում է իրեն։ Լ. Մարուքյանի անվամբ պայմանագիր չի կնքվել։ Նրա անվամբ տեխնիկա ձեռք չի բերվել։ Իր կողմից վերցված գումարները չեն բավարարել ապրանքի ապառիկ վաճառքի պայմանագրերով նախատեսված վճարումները կատարելու համար, քանի որ 400.000 ՀՀ դրամ արժողությամբ ապրանքը վաճառել է 200.000 ՀՀ դրամ գումարով։ Իր կողմից վճարումներն ուշացնելու հետևանքով տուժողները հաղորդում են ներկայացրել։ Պարզապես օրերի և ժամերի խնդիր է եղել։ Իր կողմից տուժողներին պատճառված վնասներն ամբողջությամբ հատուցվել են։ Անկեղծորեն զղջում է կատարած արարքների համար։
/դատական նիստի արձանագրություն/
Որպես այլ փաստաթուղթ` ապացույց ճանաչված, 2012թ. հոկտեմբերի 05-ին Գարիկ Բարսեղյանի և «Օրանժ-Արմենիա» ՓԲ ընկերության միջև կնքված թիվ 2191323 բաժանորդային պայմանագրով, որի համաձայն` Գարիկ Բարսեղյանը ձեռք է բերել 60.000 ՀՀ դրամ արժողությամբ Սամսունգ Ց3782 (Samsung C3782) մոդելի բջջային հեռախոս։
/հատոր 3, գ.թ. 212-220, հատոր 4, գ.թ. 143-145/
Որպես այլ փաստաթուղթ` ապացույց ճանաչված, 2012թ. նոյեմբերի 03-ին Գարիկ Բարսեղյանի և «Արմենտել» ՓԲ ընկերության միջև կնքված թիվ 117141045 Նոկիա Լումիա 900 բջջային հեռախոսի առուվաճառքի պայմանագրով, որի համաձայն` Գարիկ Բարսեղյանը ձեռք է բերել 354.000 ՀՀ դրամ արժողությամբ Նոկիա Լումիա 900 (Nokia Lumia 900) մոդելի բջջային հեռախոս։
/հատոր 3, գ.թ. 37-42, հատոր 4, գ.թ. 143-145/
Որպես այլ փաստաթուղթ` ապացույց ճանաչված, 2012թ. դեկտեմբերի 25-ին Գարիկ Բարսեղյանի և «ՎՏԲ-Հայաստան բանկ» ՓԲ ընկերության ներկայացուցչի միջև կնքված թիվ RL80761 վարկային, կոշտ գրավի և բանկային հաշվի բացման պայմանագրով (Ապառիկի պայմանագիր), որի համաձայն` Գ. Բարսեղյանին տրամադրվել է վարկ` 260.000 ՀՀ դրամ արժողությամբ մեկ հատ Դուալ Քօր (Dual Core) մակնիշի համակարգիչ ձեռք բերելու նպատակով։
/հատոր 4, գ.թ. 52-65, 143-145/
Որպես այլ փաստաթուղթ` ապացույց ճանաչված, 2012թ. հոկտեմբերի 18-ին Գայանե Ավդալյանի և «Արմենտել» ՓԲ ընկերության միջև կնքված թիվ 117106325 բջջային հեռախոսի առուվաճառքի պայմանագրով, որի համաձայն` Գայանե Ավդալյանը ձեռք է բերել 354.000 ՀՀ դրամ արժողությամբ Սամսունգ Ս9300 (Samsung S9300) մոդելի բջջային հեռախոս։
/հատոր 3, գ.թ. 52-54, հատոր 4, գ.թ. 143-145/
Որպես այլ փաստաթուղթ` ապացույց ճանաչված, 2012թ. հոկտեմբերի 19-ին Գայանե Ավդալյանի և «Օրանժ-Արմենիա» ՓԲ ընկերության միջև կնքված թիվ 2206826 բաժանորդային պայմանագրով, որի համաձայն` Գայանե Ավդալյանը ձեռք է բերել 60.000 ՀՀ դրամ արժողությամբ Սամսունգ Ց3782 (Samsung C3782) մոդելի բջջային հեռախոս։
/հատոր 3, գ.թ. 128-135, հատոր 4, գ.թ. 143-145/
Որպես այլ փաստաթուղթ` ապացույց ճանաչված, 2012թ. դեկտեմբերի 30-ին Գայանե Ավդալյանի և «ՎՏԲ-Հայաստան բանկ» ՓԲ ընկերության ներկայացուցչի միջև կնքված թիվ RL83654 վարկային, կոշտ գրավի և բանկային հաշվի բացման պայմանագրով (Ապառիկի պայմանագիր), որի համաձայն` Գ. Ավդալյանին տրամադրվել է վարկ` 260.000 ՀՀ դրամ արժողությամբ մեկ հատ Դուալ Քօր (Dual Core) մակնիշի համակարգիչ ձեռք բերելու նպատակով։
/հատոր 4, գ.թ. 35-48, 143-145/
Որպես այլ փաստաթուղթ` ապացույց ճանաչված, 2012թ. նոյեմբերի 05-ին Ավետիս Ավետիսյանի և «Արմենտել» ՓԲ ընկերության միջև կնքված թիվ 117142655 բջջային հեռախոսի առուվաճառքի պայմանագրով, որի համաձայն` Ավետիս Ավետիսյանը ձեռք է բերել 363.000 ՀՀ դրամ արժողությամբ Սամսունգ ՋՏ-Ս9100 (Samsung GT-S9100) մոդելի բջջային հեռախոս։
/հատոր 3, գ.թ. 60-66, հատոր 4, գ.թ. 143-145/
Որպես այլ փաստաթուղթ` ապացույց ճանաչված, 2012թ. դեկտեմբերի 28-ին Ավետիս Ավետիսյանի և «ՎՏԲ-Հայաստան բանկ» ՓԲ ընկերության ներկայացուցչի միջև կնքված թիվ RL82899 վարկային, կոշտ գրավի և բանկային հաշվի բացման պայմանագրով (Ապառիկի պայմանագիր), որի համաձայն` Ա. Ավետիսյանին տրամադրվել է վարկ` 260.000 ՀՀ դրամ արժողությամբ մեկ հատ Դուալ Քօր (Dual Core) մակնիշի համակարգիչ ձեռք բերելու նպատակով։
/հատոր 3, գ.թ. 79-85, հատոր 4, գ.թ. 143-145/
Որպես այլ փաստաթուղթ` ապացույց ճանաչված, 2013թ. փետրվարի 26-ին Լուսինե Մարուքյանի և «ՎՏԲ-Հայաստան բանկ» ՓԲ ընկերության ներկայացուցչի միջև կնքված թիվ RL99685 վարկային, կոշտ գրավի և բանկային հաշվի բացման պայմանագրով (Ապառիկի պայմանագիր), որի համաձայն` Լ. Մարուքյանին տրամադրվել է վարկ` 250.000 ՀՀ դրամ արժողությամբ մեկ հատ Նոութբուք (HP G6 AMD-A6) մակնիշի համակարգիչ ձեռք բերելու նպատակով։
/հատոր 3, գ.թ. 24-28, հատոր 4, գ.թ. 143-145/


Դատարանի իրավական վերլուծությունները

Վերլուծելով ամբաստանյալ Թորգոմ Վարդանի Ասոյանի դատաքննական ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Թորգոմ Վարդանի Ասոյանի դատաքննական ցուցմունքները` տուժող Լ. Մարուքյանից խարդախությամբ ոսկեղեն չվերցնելու և նրա անվամբ պայմանագիր կնքված չլինելու մասին, իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են արդեն իսկ նշված ապացույցներով։
Վերլուծելով ամբաստանյալ Թորգոմ Վարդանի Ասոյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Թորգոմ Վարդանի Ասոյանի կողմից, նրա մեղավորությամբ, նրան ՀՀ քրեական օրենսգրքի 178-րդ հոդվածի 2-րդ մասի 2-րդ կետով առաջադրված մեղադրանքի չորս դրվագներից յուրաքանչյուրով, խոշոր չափերով խարդախություն կատարելն ապացուցված է, նրա արարքներից յուրաքանչյուրը ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Թորգոմ Վարդանի Ասոյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, նրա խնամքին է գտնվում նաև կենսաթոշակառու, ֆիզիկապես վատառողջ, երրորդ խմբի հաշմանդամ հայրը` Վարդան Ասոյանը։
Դրվագներից յուրաքանչյուրով, որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում նրա խնամքին մինչև տասնչորս տարեկան մեկ երեխայի (Ռուզաննա Թորգոմի Ասոյան` ծնված 2007թ. դեկտեմբերի 12-ին) առկայությունը։
Առաջին, երկրորդ և երրորդ դրվագներով նախատեսված յուրաքանչյուր հանցագործության համար պատիժ նշանակելիս` որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում նաև հանցագործությամբ տուժողներին պատճառված գույքային վնասն ամբողջությամբ, կամովին հատուցելը։
Դրվագներից յուրաքանչյուրով, ամբաստանյալի պատասխանատվությունը և պատիժը ծանրացնող հանգամանքներ առկա չեն։
Ամբաստանյալ Թորգոմ Վարդանի Ասոյանի նկատմամբ պատիժ նշանակելու հարցը քննարկելիս` դատարանը գտնում է հետևյալը.
ՀՀ քրեական օրենսգրքի 10-րդ հոդվածի համաձայն` «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար»։
ՀՀ քրեական օրենսգրքի 48-րդ հոդվածի 2-րդ մասի համաձայն՝ «Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները»։
ՀՀ քրեական օրենսգրքի 61-րդ հոդվածի համաձայն` «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները։
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում պատասխանատվությունը և պատիժը մեղմացնող կամ ծանրացնող հանգամանքներով։
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները»։
ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները, հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե'ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը)։
ՀՀ քրեական օրենսգրքի 178-րդ հոդվածի 2-րդ մասի սանկցիան անյլընտրանքային է` պատիժ է նախատեսում ինչպես տուգանքի, այնպես էլ ազատազրկման ձևով։
Այլընտրանքային սանկցիաների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ. Մադաթյանի գործով որոշման մեջ, որտեղ իրավական դիրքորոշում է հայտնել այն մասին, որ. «(…) այլընտրանքային սանկցիաների միջև ընտրություն կատարելիս պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա։
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ։
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը։ (…)» (տե’ս Գարուշ Նորիկի Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշումը)։
Հաշվի առնելով ամբաստանյալ Թորգոմ Ասոյանի կատարած յուրաքանչյուր հանցագործության բնույթը և հանրության համար վտանգավորության աստիճանը, դրանց կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, խախտված հասարակական հարաբերության սոցիալական նշանակությունը և այդ ոլորտում պետության քրեական քաղաքականության ուղղվածությունը, դրանք համադրելով ամբաստանյալի անձը բնութագրող և պատասխանատվությունն ու պատիժը մեղմացնող հանգամանքների հետ՝ դատարանը գտնում է, որ Թորգոմ Վարդանի Ասոյանն իր կատարած` չորս դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված յուրաքանչյուր հանցագործության համար ենթակա է պատժի այդ հանցագործությունների համար նախատեսված պատիժներից առավել մեղմ պատժի` տուգանքի ձևով, որի միջոցով հնարավոր կլինի ապահովել ՀՀ քրեական օրենսգրքի 48-րդ հոդվածով նախատեսված պատժի նպատակները։
ՀՀ քրեական օրենսգրքի 66-րդ հոդվածի համաձայն`
1. Հանցանքների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով։
(…)
3. Եթե հանցանքների համակցությունն ընդգրկում է միայն միջին ծանրության կամ միջին ծանրության և ոչ մեծ ծանրության հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով։ Ընդ որում, ազատազրկման ձևով վերջնական պատիժը չի կարող գերազանցել տասը տարին։
(…։)»։
Հետևաբար, ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, չորրորդ դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով նշանակված պատժին մասնակիորեն գումարման են ենթակա մնացած երեք դրվագներից յուրաքանչյուրի համար նշանակված պատժից` տուգանք 400.000 /չորս հարյուր հազար/-ական ՀՀ դրամ գումարի չափով։
Քննարկելով նշանակված պատիժն ամբաստանյալ Թորգոմ Ասոյանի կողմից կրելու հարցը` դատարանը գտնում է հետևյալը.
«Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ԱԺ 2013թ. հոկտեմբերի 03-ի որոշման 1-ին կետի 2-րդ ենթակետի համաձայն` որոշվել է.
«1. Պատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի`
(…)
այն անձանց, որոնց նկատմամբ նշանակվել է ազատությունից զրկելու հետ չկապված պատիժ.»։
Հետևաբար, սույն դատավճռով Թորգոմ Ասոյանի նկատմամբ ենթակա է կիրառման «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013թ. հոկտեմբերի 03-ի որոշումը և ազատությունից զրկելու հետ չկապված պատիժ նշանակելու դեպքում նա ենթակա է պատժից ազատման։
Քննարկելով խափանման միջոցի հարցը` դատարանը գտնում է, որ ամբաստանյալ Թորգոմ Վարդանի Ասոյանի նկատմամբ ընտրված խափանման միջոց գրավը պետք է վերացնել և գրավի գումար հանդիսացող 1.000.000 /մեկ միլիոն/ ՀՀ դրամ գումարը` մուծված 19.07.2013թ. Վարդան Ասոյանի կողմից Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 900013298014 հաշվին, պետք է հետ վերադարձնել նրան։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-365-րդ, 367-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Թորգոմ Վարդանի Ասոյանին մեղավոր ճանաչել չորս դրվագով` Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցանքներում և դատապարտել.
- առաջին դրվագով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով` տուգանքի, նվազագույն աշխատավարձի հինգհարյուրապատիկի` 500.000 /հինգ հարյուր հազար/ ՀՀ դրամ գումարի չափով,
- երկրորդ դրվագով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով` տուգանքի, նվազագույն աշխատավարձի վեցհարյուրապատիկի` 600.000 /վեց հարյուր հազար/ ՀՀ դրամ գումարի չափով,
- երրորդ դրվագով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով` տուգանքի, նվազագույն աշխատավարձի յոթհարյուրապատիկի` 700.000 /յոթ հարյուր հազար/ ՀՀ դրամ գումարի չափով,
- չորրորդ դրվագով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով` տուգանքի, նվազագույն աշխատավարձի ութհարյուրապատիկի` 800.000 /ութ հարյուր հազար/ ՀՀ դրամ գումարի չափով,
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Թորգոմ Վարդանի Ասոյանի նկատմամբ պատիժ նշանակել տուգանք` նվազագույն աշխատավարձի երկուհազարապատիկի` 2.000.000 /երկու միլիոն/ ՀՀ դրամ գումարի չափով։
Համաներման ակտի` «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013թ. հոկտեմբերի 03-ի որոշման 1-ին կետի 2-րդ ենթակետի կիրառմամբ ամբաստանյալ Թորգոմ Ասոյանին ազատել նշանակված պատիժը կրելուց։
Խափանման միջոց գրավը վերացնել և գրավի գումար հանդիսացող 1.000.000 /մեկ միլիոն/ ՀՀ դրամը, մուծված 19.07.2013թ. Վարդան Ասոյանի կողմից` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 900013298014 հաշվին, հետ վերադարձնել նրան։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ