Գործ
ԵԿԴ/0006/01/14

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

,,04,, մարտի 2014թ. ք.Երևան

ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը
/այսուհետև` դատարան/

Նախագահությամբ դատավոր Մ. ՄԱԿՅԱՆԻ

Քարտուղարությամբ՝ Կ. Կարապետյանի

Մասնակցությամբ`

Մեղադրող Ա. Գևորգյանի

Պաշտպան Վ. Ենգիբարյանի

դռնբաց դատական նիստում, Երևան քաղաքում քննեց քրեական գործն ըստ մեղադրանքի`

Գրիգոր Վազգենի Թրվանդյանի` ծնված 07.07.1992թ.-ին ազգությամբ
հայ, ՀՀ քաղաքացի, միջնակարգ կրթությամբ, նախկինում չդատված,
չամուսնացած, չի աշխատում, հաշվառված է ք.Երևան, Նոր-Նորք,
Մոլդովական փող., 12/1 շենք, բնակարան 522, մեղադրվում է ՀՀ
Քրեական օրենսգրքի 178-րդ հոդվածի 2-րդ մասի 2-րդ կետով։


1.Գործի դատավարական նախապատմությունը

Ըստ դատարան ստացված քրեական գործի նյութերի՝

«Երևան քաղաքի բնակիչ Արմեն Լևանի Աշխատոյանից 2013թ. մայիսի 15-ին խարդախությամբ խոշոր չափերի գույքի հափշտակություն կատարելու դեպքի առթիվ ՀՀ քրեական օրենսգրքի 178-րդ հոդվածի 2-րդ մասի 2-րդ կետով հարուցված թիվ 13830113 քրեական գործի նախաքննությամբ հիմնավորվել է հետևյալը.

Երևան քաղաքի Ավան 6-րդ փողոցի թիվ 13ա տան բնակիչ, գործով մեղադրյալ Գրիգոր Վազգենի Թրվանդյանը մոր՝ Սոնա Սարգսյանի և անչափահաս եղբայրների՝ Մհեր և Լևոն Թրվանդյանների հետ, բնակվել է նշված հասցեում գտնվող հայրական տանը։ Գ.Թրվանդյանի հայրը հանդիսացել է «ՀՀ ինքնապաշտպանական մարտերի մասնակից» մահացել է 2010թ.-ին, ինչից հետո ընտանիքի կարիքները միայնակ հոգացել է Գ.Թրվանդյանը։ Սոնա Սարգսյանը, հանդիսանալով առաջին կարգի ցմահ հաշմանդամ՝ տառապել է հեպատիտ «Ց» հիվանդությամբ, շուրջ երկու տարի ստացիոնար բուժօգնություն է ստացել տարբեր բժշկական կենտրոններում, այդ թվում և Ֆանարջյանի անվան ուռուցքաբանության ազգային կենտրոնում։ Ս.Սարգսյանի բուժօգնության համար անհրաժեշտ դեղամիջոցները ձեռք է բերել Գ.Թրվանդյանը, ով չունենալով մշտական աշխատանք և զբաղմունք, հայտնվել է ծանր ֆինանսական դրության մեջ, ապա նպատակադրվել է մոր բուժման համար անհրաժեշտ դրամական միջոցներ ձեռք բերելու համար խաբեության եղանակով ուրիշի գույքի հափշտակություն կատարել։
2013թ. մայիս մասին Գ.Թրվանդյանը գտնվելով իր հարևան Արսեն Խանամիրյանին պատկանող՝ Ավան թաղամասում գտնվող «Ֆուտբոլ» տաքսի ծառայության գրասենյակում, խոսակցության ընթացքում վերջինիցս տեղեկացել է, որ տաքսի ավտոմեքենաների ուղերթը հսկելու և գտնվելու վայրի վերաբերյալ կողմնորոշումներ ստանալու համար Ա.Խանամիրյանը ցանկանում է ավտոմեքենաների սրահում տեղադրել տեղորոշման համակարգ, սակայն կանխիկ գումար չունի։ Գ.Թրվանդյանը նախապես ունենալով խոշոր չափերի ուրիշի գույքի հափշտակության դիտավորություն, նույն պահին որոշել է Ա.Խանամիրյանի ցանկությունը որպես պատրվակ օգտագործել իր հանցավոր մտադրությունն իրականացնելու համար, այն է Ա.Խանամիրյանի կողմից տեղորոշման համակարգ գնելու ցանկությունն օգտագործելով որպես խաբեության եղանակ, Ա.Խանամիրյանին սուտ խոստումներ է տվել, որ ապառիկ տարբերակով ինքը կարող է գնել նշված համակարգը՝ միայն հարկավոր է անձնավորություն, ում անվամբ պետք է ձևակերպել ապառիկ պայմանագիրը։ Ա.Խանամիրյանը հանաձայնել է և Գ.Թրվանդյանին է տվել իր և կնոջ՝ Արաքսյա Ալավերդյանի անձնագրերը՝ ստուգելու համար ապառիկի պայմանագիրն իրենց անձնագրերով հնարավոր է ձևակերպել, թե ոչ։ Որոշ ժամանակ անց, Գ.Թրվանդյանը վերադարձրել անձնագրերը և հայտնել, որ ապառիկ պայմանագիրը ձևակերպելու համար անհրաժեշտ է «մաքուր» վարկային պատմություն ունեցող անձնավորություն և հուշել՝ դիմել հարևանությամբ բնակվող Արմեն Աշխատոյանին՝ պատճառաբանելով, որ նա ոստիկանության աշխատակից է և մաքուր վարկային պատմություն կունենա։
2013թ. մայիսի 10-ին Ա.Խանամիրյանը և Գ.Թրվանդյանը գնացել են Ա.Աշխատոյանի տուն, որտեղ Ա.Խանամիրյանն Ա.Աշխատոյանին խնդրել է օգնել իրեն այդ հարցում։ Ա.Աշխատոյանը հանաձայնել է և մայիսի 15-ին Գ.Թրվանդյանի ուղեկցությամբ գնացել են Երևան քաղաքի Սայաթ-Նովա փողոցի թիվ 20/2 հասցեում գործող՝ «Գիլաս» սահմանափակ պատասխանատվությամբ ընկերությանը պատկանող «Լափ-Թոփ» համակարգչային խանութ, որտեղ Գ.Թրվանդյանը, չարաշահելով Ա.Աշխատոյանի վստահությունը, ի սկզբանե մտադիր չլինելով կատարել իր խոստումները, իրականացրել է հանցավոր մտադրությունը և քաջատեղյակ լինելով, որ Ա.Աշխատոյանն անտեղյակ է նշված տեխնիկայից, խանութում խեղաթյուրելով իրականությունը, վերջինիս «Apple» մակնիշի պլանշետը ներկայացրել է որպես տեղորոշման համակարգ։ Ա.Աշխատոյանը, վստահելով Գ.Թրվանդյանի խոսքերին, «ՎՏԲ-Հայաստան Բանկ» ՓԲԸ-ի և «Գիլաս» ՍՊԸ-ի միջև կնքված համագործակցության վերաբերյալ պայմանագրի հիման վրա կնքել է վարկային, կոշտ գրավի և բանկային հաշվի բացման թիվ RL. 132697 պայմանագիրը, ձեռք բերել ընդհանուրը՝ 530.000 ՀՀ դրամ արժողության «Apple» մակնիշի պլանշետ և այն Ա.Խանամիրյանին հանձնելու համար Գ.Թրվանդյանի պահանջով տվել է նրան, իսկ վերջինս էլ հիշյալ պլանշետը խարդախության եղանակով հափշտակելով, այն հետագայում իրացրել է գործով չպարզված անձ՝ ոմն Նարեկին, և վաճառքից գոյացած գումարներով լուծել իր ֆինանսական խնդիրները։

Փաստի առթիվ ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի կողմից 31.10.2013թ.-ին հարուցվել է քրեական գործ։

26.12.2013թ. ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի կողմից կայացվել է որոշում` Գրիգոր Վազգենի Թրվանդյանին որպես մեղադրյալ ներգրավելու մասին և նրա նկատմամբ մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով։

Քրեական գործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի գրասենյակ է ստացվել և մուտքագրվել 10.01.2014թ.-ին։

2.Ապացույցների հետազոտում և գնահատում

Դատաքննությամբ, առաջադրված մեղադրանքում ամբաստանյալ Գրիգոր Վազգենի Թրվանդյանն իրեն մեղավոր է ճանաչել և ցուցմունք է տվել այն մասին, որ 2013թ. մայիս ամսին՝ կոնկրետ օրը չի հջշում, հանդիպել է Արսենին, ով հայտնել է, որ իր տաքսի ավտոմեքենայի համար նավիգացիոն համակարգ է հարկավոր և խնդրել է իրեն օգնել ապառիկ տարբերակով ինչ-որ խանութից այդ տեխնիկան ձեռք բերելու հարցում։ Արսենն իրեն նաև ծանոթացրել է Արմեն անունով մի տղայի հետ և իրեն խնդրել է Արմենի հետ այցելել խանութ ու վերջինիս անվամբ ձեռք բերել նավիգանցիոն համակարգը։ Քանի որ այդ ժամանակ ինքն ունեցել է ֆինանսական խնդիրներ՝ կապված մոր համար դեղորայք գնելու և նրա հիվանդությունը բուժելու հետ, որոշել է վերցնել Արմենի անվամբ ինչ-որ տեխնիկա, վաճառել այն և հոգալ իր խնդիրները։ Այդ նպատակով այցելելով Սայաթ-Նովա փողոցի վրա գտնվող խանութ, ապառիկ կարգով գնել են «այ փադ» համակարգիչը և հետագայում այն վաճառելով այլ անձի՝ հոգացել է մոր բուժման ծախսերը։
Ի պատասխան դատարանում իրեն տրված հարցերին, ամբաստանյալը հայտնել է, որ նշված ժամանակահատվածում իր ընտանեական հոգսերը եղել են բավականին ծանր, մայրը եղել է մահացու հիվանդ, խնամքին են գտնվել նաև անչափահաս եղբայրները, ինչից դրդված էլ գնացել է այդ քայլին, որի համար խորապես զղջում է։ Միաժամանակ, նշել է, որ ապրանքը վերցնելուց հետո, այն վաճառել է, իսկ դրա մասին Արսենին տեղյակ չի պահել։
Ամբաստանյալ Գրիգոր Վազգենի Թրվանդյանն իր ճառով դատարանին հայտնել է, որ իրեն առաջադրված մեղադրանքում մեղավոր է ճանաչում և զղջում է կատարածի համար։

/տես` դատական նիստի արձանագրությունը/

Դատարանն արձանագրում է, որ բացի իր խոստովանական ցուցմունքից, ամբաստանյալ Գրիգոր Վազգենի Թրվանդյանին առաջադրված մեղադրանքը հիմնավորվել է նաև դատարանում հետազոտված և ստորև ներկայացվող ապացույցներով.

տուժող Արմեն Աշխատոյանի դատաքննական ցուցմունքով այն մասին, որ Գրիգոր Թրվանդյանը հանդիսացել է իր հարևանը, որի հետ շփումներ չի ունեցել։ Ճանաչել է նաև Արսեն Խանամիրյանին, ով նույպես բնակվել է իր հարևանությամբ և նրա հետ գտնվել է նորմալ փոխհարաբերությունների մեջ։ Արսեն Խանամիրյանը շահագործել է «Ֆուտբոլ» անվանումով տաքսի ծառայություն։
2013թ. մայիսի 11-ին, աշխատանքից վերադառնալուց, իրեն է հանդիպել Արսենը և ասել, որ նրա տաքսի ծառայության վարորդները խաբում են իրեն և ինքը չի կարողանում հետևել նրանց, այդ պատճառով գտնում է, որ պետք է մեքենաների վրա նավիգացիոն համակարգ տեղադրել՝ վարորդների տեղաշարժը հսկելու համար։ Պատճառաբանելով, որ կանխիկ գումար չունի, իսկ իր անվամբ գործող վարկեր կան, խնդրել է, իր անվամբ խանութից, ապառիկ տարբերակով վերցնի նավիգացիոն համակարգ։ Քանի որ իրենք հարևաններ են եղել և գտնվել են մտերիմ հարաբերությունների մեջ, ինքը ոչինչ չկասկածելով, որոշել է օգնել Արսենին, սակայն նրան հայտնել է, որ տեխնիկայից ընդհանրապես չի հասկանում և տեղյակ չէ, թե որն է նավիգացիան։ Սրսենն ասել է, որ իրենց ընդհանուր հարևան Գրիգորը դրանից լավատեղյակ է և գիտի խանութ, որտեղ այն վաճառում են ցածր տոկոսադրույքով, ուստի խնդրել է Գրիգորին իր հետ գնալ նշված խանութը՝ տեղորոշման համակարգը ապառիկ կարգով ձևակերպելու և ձեռք բերելու համար։ Պայմանագրի կնքման համար աշխատանքի վայրից վերցրել է տեղեկանք։
15.05.2013թ., իրենց շենքի բակում հանդիպել է Արսենի և Գրիգորի հետ։ Արսենն իրեն Գրիգորի ներկայությամբ հայտնել է, որ որ զբաղված է և խնդրել է Գրիգորի հետ միասին գնան և խանութից ձեռք բերեն հիշյալ համալարգը։ Դրանից հետո, Գրիգորի ուղեկցույթամբ գնացել է համակարգիչների խանութ, որտեղ Գրիգորը, ինչպես հետագայում է իմացել, ցույց է տվել «Այ փադ» և հայտնել, որ դա է նավիգացիոն համակարգը և պետք է գնեն հենց դա։ Տեխնիկան վերցրելուց հետո, դուրս են եկել խանութից, որտեղ «Այ փադը» Գրիգորի պահանջով տվել է նրան, որպեսզի այն փոխանցի Արսենին, իսկ պայմանագիրը մնացել է իր մոտ։ Նույն օրը երեկոյան գնացել է «Ֆուտբոլ» տաքսի ծառայության կարգավարական կետ, որտեղ հանդիպել է Արսենին և նրան ասել, որ գործը ստացվել է և նավիգացիոն համակարգը վերցրել է խանութից։ Այդ ժամանակ Արսենը սեղանի դարակից հանել է պայմանագիրը և ասել, որ շնորհակալ է, միաժամանակ ավելացնելով, որ Գրիգորը դեռ համակարգը չի բերել և չի տվել իրեն։ Հետագայում գնացել է «ՎՏԲ Հայաստան բանկ» ՓԲԸ-ի մասնաճյուղ և այնտեղ տեղեկացել, որ վերցված տեխնիկայի դիմաց ոչ մի վճարում չի կատարվել։
Ի պատասխան դատարանում իրեն տրված հարցերին, տուժողը պատասխանել է, որ բանկում տեղեկացել է նաև, որ իր վերցրած տեխնիկան իրականում նավիգացիոն համակարգ չէ, այլ «Այփադ» տեսակի համակարգիչ։ Անմիջապես հանդիպել է Արսենին և տեղեկացել է, որ Գրիգորը խաբել է իրենց և նավիգացիոն համակարգի փոխարեն վերցրել է «Այփադ», բացի այդ, նա չի կարողանում գտնել Գրիգորին։ Դրանից հետո գնացել և հաղորդում է տվել ոստիկանության Կենտրոնական բաժնում։ Նշել է, որ տեղեկություն ունի, որ Գրիգորն այդ «Այփադը» վաճառել է 280.000 ՀՀ դրամով, որից 260.000 ՀՀ դրամը տվել է Արսենին, իսկ 20.000 ՀՀ դրամը պահել է իր մոտ։
Դատարանում հայտնելով, որ Գրիգորը հատուցել է իրեն պատճառած վնասի իր մասը, տուժողը նշել է, ոչ ամբաստանյալ Գրիգոր Թրվերդյանի նկատմամբ բողոք կամ պահանջ չունի, ավելին, հայտնել է, որ եթե ի սկզբանե իմանար, որ նա գումարը հափշտակել է մոր բուժման ծախսերը հոգալու համար, ապա ընդհանրապես ոստիկանությանը չէր դիմի։
Դատարանից խնդրել է ամբաստանյալի նկատմամբ վերաբերվել հնարավորինս մեղմ։

/տես` դատական նիստի արձանագրությունը/

Վկա Սոնա Սարգսյանի դատաքննական ցուցմունքով այն մասին, որ հանդիսանում է ամբաստանյալ Գրիգոր Թրվերդյանի մայրը։ Բնակվում է հայրական տանը ծնողների, երկու անչափահաս երեխաների և Գրիգորի հետ միասին։ Դեպքի մանրամասներից տեյակ չէ, սակայն գիտի, որ Գրիգորն Արմենից խնդրել է խանութից ինչ-որ ապրանք վերցնել և այն վերցնելուց հետո վաճառել է։ Նշել է, որ հանդիսանում է առաջին կարգի հաշմանդամ և ունի չարորակ ուռուցք, հեպատիտ «Ց», տառապում է նաև այլ հիվանդություններով։ Հայտնելով, որ իրենց բազմանդամ ընտանջքի կերակրողն ու միակ խնամակալն ավագ որդին է, ով այդ պատճառով ազատվել է նաև բանակում ծառայությունից, կատարելով տարբեր շինարարական աշխատանքներ, խնամում է իրեն և հոգում անչափահաս եղբայրների և տան կենցաղային խնդիրները, իր համար գնում անհրաժեշտ դեղորայքը։ Ամուսինը ՀՀ ինքնապաշտպանական մարտերի մասնակից է եղել, վիրավորվել է և ստացած հիվանդություններից հետագայում մահացել։ Նշել է, որ Գրիգորը այդ ապրանքի գումարով ևս իր համար գնել է դեղորայք։

/տես` դատական նիստի արձանագրությունը/

ՀՀ քրեական դատավարության օրենսգրքի 342-րդ հոդվածի կարգով հրապարակված վկա Արսեն Համլետի Խանամիրյանի ցուցմունքով այն մասին, որ 2013թ. ապրիլ անսին հիմնել է «Ֆուտբոլ» տաքսի ծառայությունը։
2013թ. մայիս ամսին, կոնկրետ օրը չի հիշում, տաքսի ծառայության գրասենյակում, խոսակցության ժամանակ հայտնել է, որ տաքսի ավտոմեքենաների գտնվելու վայրը և ուղերթը վերահսկելու համար ցանկանում Է ավտոմեքենաների վրա տեղադրել տեղորոշման նավիգացիոն համակարգ, սակայն կանխիկ գումար չունի։ Այդ ժամանակ խոսակցությանը միջամտել Է ներկա գտնվողներից իր հարևան Գրիգոր Թրվանդյանը, ում հետ գտնվել Է նորմալ հարաբերությունների մեջ, և հայտնել, որ ապառիկ տարբերակով նա կարող Է գնել այդ համակարգը։ Գրիգորի պահանջով նրան Է տվել իր և կնոջ՝ Արաքսյայի անձնագրերը՝ ստուգելու համար իրենց անվամբ ապառիկ պայմանագրի ձևակերպման հնարավորությունը։ Գրիգորը հետ Է վերադարձրել անձնագրերը և ասել, որ հարկավոր Է մաքուր վարկային պատմություն ունեցող անձնավորություն և հուշել իրեն՝ դիմելու իրենց թաղի բնակիչ Արմեն Աշխատոյանին, ով այդ խոսակցությունից քիչ առաջ գտնվել Էր դիսպետչերանոցում։ Գրիգորի մի քանի անգամ պնդումներից հետո ինքը համաձայնվել Է և գործարքը կատարելու համար դիմել Է Արմեն Աշխատոյանին։ Արմենը համաձայնվել Է։ Դրանից հետո, նույն՝ մայիս ամսին, Արմենը և Գրիգորը գնացել են Գրիգորի ասած տեխնիկայի խանութ, իսկ ինքը չի կարողացել նրանց հետ գնալ, քանի որ անձնական գործերով դուրս Է եկել քաղաքից։ Նույն օրը՝ երեկոյան, երբ վերադարձել Է տուն, կինը՝ Արաքսյան, իրեն Է տվել փաստաթղթեր և հայտնել, որ դրանք նրան Է տվել Արմենը՝ ասելով, որ նավիգացիոն համակարգի վարկի թղթերն են։ Նույն օրը հանդիպել Է նաև Արմեն Աշխատոյանի հետ, ում հայտնել Է, որ Գրիգորը դեռ իրեն չի տվել համակարգը։ Դրանից հետո սկսել Է փնտրել Գրիգորին, սակայն չի գտել նրան։ Զանգահարել Է նրա հեռախոսահամարին, որը միշտ անհասանելի Է եղել։ Այդ մասին հայտնել Է նաև Արմենին։ Մոտ երկու ամիս անց, Արմենի ուղեկցությամբ գնացել են Սայաթ-Նովա փողոցում գտնվող «Լափ Թոփ» խանութ, որտեղ տեղեկացել Է, որ Գրիգորը խանութից ձեռք Է բերել ոչ թե նավիգացիոն համակարգ, այլ «Այփադ» պլանշետ, որոնց տարբերությունն Արմենը չի հասկացել։ Այդ ամենից հետո, հասկանալով, թե ինչ Է կատարվել դիմել են ոստիկանություն և Արմենը կատարվածի մասին տվել Է հաղորդում։

/տես` գ.թ. 54-56, 58-59, դատական նիստի արձանագրությունը/

ՀՀ քրեական դատավարության օրենսգրքի 342-րդ հոդվածի կարգով հրապարակված վկա Արաքսյա Ալավերդյանի ցուցմունքով այն մասին, որ հանդիսանում Է Արսեն Խանամիրյանի կինը։ Ամուսինը 2013թ. մարտ ամսին բացել Է տաքսի ծառայություն և դիսպետչերանոցը գտնվել Է իրենց բակում։ Ճանաչում Է իրենց բակի բնակիչ Գրիգոր Թրվանդյանին։ Ամուսինը մայիս ամսին որոշել Է տաքսի ավտոմեքենաների վրա նավիգացիոն համակարգ տեղադրել՝ մեքենաների գտնվելու վայրը և ուղերթը իմանալու և վերահսկելու համար։ Այդ մասին տեղեկացել Է Գիրգորը և Արսենին ասել, որ ծանոթ ունի, կարող Է ապառիկ վերցնել նավիգացիոն համակարգ և օգնել այդ հարցում։ Արսենը համաձայնվել Է և Գրիգորին Է տվել իրենց անձնագրերը, սակայն Գրիգորը հետ Է վերադարձրել անձնագրերը և ասել, որ իրենց անվամբ գործարքը չի լինում ձևակերպել։ Մայիսի 15-ին, երբ գտնվել Է դիսպետչերանոցում, այնտեղ Է եկել իրենց հարևան Արմեն Աշխատոյանը և Արսենին հանձնելու համար տվել փաստաթղթեր, միաժամանակ ավելացրել, որ նավիգացիոն համակարգը Գրիգորի մոտ Է։ Նույն օրը երեկոյան դիսպետչերանոց Է եկել Արսենը։ Արսենին Է տվել Արմենի կողմից թողած փաստաթղթերը և ասել, որ դրանք նավիգացիոն համակարգի ապառիկի թղթերն են։ Հաջորդ օրվանից սկսած Արսենը փնտրել Գրիգորին, զանգել Է Գրիգորին, սակայն նա անհասանելի Է եղել և Արսենը չի կարողացել նրան գտնել։ Արսենը նաև այդ մասին հայտնել Է Արմեն Աշխատոյանին և նրանք երկուսով փնտրել են Գրիգորին։ Օգոստոս ամսին տեղեկացել Է, որ Արսենը կատարվածի մասին հաղորդում տալու համար Արմենին ուղեկցել է ոստիկանություն։

/տես` գ.թ. 68-71, դատական նիստի արձանագրությունը/

Բացի վերոգրյալներից, ամբաստանյալ Գրիգոր Վազգենի Թրվանդյանի կողմից կատարած հանցանքը հիմնավորվել են նաև քրեական գործով ձեռք բերված և դատաքննությամբ հետազոտված հետևյալ ապացուցների համակցությամբ.


Տուժող Արմեն Աշխատոյանի կողմից ներկայացրած և որպես այլ փաստաթղթի կարգով ապացույց ճանաչված 15.05.2013թ. «ՎՏԲ-Հայաստան Բանկ» ՓԲԸ-ի և վերջինիս միջև կնքված վարկային և կոշտ գրավի, բանկային հաշվի բացման թիվ թիվ 132697 պայմանագրով, պայմանագրին կից վարկի մարման ժամանակացույցով, բանկից ստացված ծանուցմամբ և մեղադրյալ Գրիգոր Թրվանդյանի կողմից ներկայացրած 29.11.2013թ. դրությամբ Ա.Աշխատոյանի անվամբ «ՎՏԲ-Հայաստան Բանկ» ՓԲԸ-ում վճարված թիվ 131129018490042 վճարման բանկային անդորրագրով։

/տես` գ.թ. 45-48, 53, դատական նիստի արձանագրությունը/

Դատարանում հետազոտվել են նաև ամբաստանյալ Գրիգոր Թրվանդյանի վերաբերյալ ինֆորմացիոն կենտրոնի կողմից տրված պահանջագիրը, նրա վերաբերյալ բնութագիրը և տեղականքները, ամբաստանյալի հոր` Վազգեն Թրվանդյանի վերաբերյալ փաստթղթերը, մոր` Սոնա Սարգսյանի վերաբերյալ բժշկական փաստաթղթերը։

/տես` գ.թ. 91-92, 104-126, դատական նիստի արձանագրությունը/



3. Դատարանի իրավական վերլուծությունները

Այսպիսով, դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ, ապացուցված է համարում այն, որ ամբաստանյալին Գրիգոր Թրվանդյանը կատարել է իրեն մեղսագրված հանցագործությունը, որի համար ենթակա է պատժի։

Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։

Որպես Գրիգոր Թրվանդյանի անձը բնութագրող հանգամանք դատարանը հաշվի է առնում Երևան քաղաքի Ավան վարչական շրջանի «մասնավոր տնտեսություն» հախագահ` Ա.Սիմոնյանի կողմից տրված բնութագիրը, համաձայն որի` «Գրիգոր Վազգենի Թրվանդյանը` ծնված 07.07.1992թ. բնակվում է Երևանի Ավան 6 փողոցի 13ա տանը։ Դրսևորում է կանոնավոր վարք։ Նշեմ նաև, որ նրա հայրը մահացած է, իսկ նրա խնամքի տակ են գտնվում հիվանդ մայրը /1-ին կարգի հիվնադություն/ և երկու անչափահաս եղբայրները, որոնք սովորում են հ. 87 դպրոցի 5 և 6-րդ դասարաններում»։

/տես` գ.թ. 92, քրեական գործի նյութերը և դատական նիստի արձանագրությունը/


Բացի այդ, որպես Գրիգոր Թրվանդյանի անձը բնութագրող հանգամանք, դատարանը հաշվի է առնում նաև այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում դատապարտված կամ որևէ այլ կերպ արատավորված չի եղել։

/տես` գ.թ. 17, քրեական գործի նյութերը, դատական նիստի արձանագրությունը/

Դատարանը, ՀՀ քրեական օրենսգրքի 62-րդ հոդվածի 1-ին մասի 5-րդ կետի համաձայն որպես ամբաստանյալ Գրիգոր Թրվանդյանի արարքում նրա պատասխանատվությունը և պատիժը մեղմացնող հանգամանք է դիտում հանցանքը կյանքի ծանր հանգամանքների զուգորդման հետևանքով կատարելը, այն, որ նա չունենալով շտապ կարգով գումար հայթհայթելու այլ ելք, խարդախությամբ ուրիշի գումարը հափշտակել է մոր՝ Սոնա Սարգսյանի բուժման ծախսերը հոգալու անհրաժեշտությունից ելնելով։

Նույն հոդվածի 62-րդ հոդվածի 1-ին մասի 10-րդ կետի համաձայն, դատարանը որպես ամբաստանյալ Գրիգոր Թրվանդյանի պատասխանատվությունը և պատիժը մեղմացնող հանգամանք է դիտում նաև հանցագործությամբ պատճառված գույքային վնասը կամովին հատուցելը։

Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն որպես ամբաստանյալ Գրիգոր Թրվանդյանի պատասխանատվությունը և պատիժը մեղմացնող հանգամանք է դիտում նաև կատարած հանցանքի համար անկեղծորեն զղջալը, այն, որ նրա խնամքին են գտնվում հիվանդ մայրը, երկու անչափահաս եղբայրները, հայրը հանդիսացել է մարտական գործողությունների մասնակից, մահացել է պատերազմից հետո առաջացած հիվանդություններից, ինչպես նաև այն, որ ամբաստանյալը հանդիսանում է ընտանիքի միակ կերակրողը։

Դատարանը գտնում է, որ ՀՀ քրեական օրենսգրքի 63-րդ հոդվածի համաձայն ամբաստանյալ Գրիգոր Թրվանդյանի արարքում նրա պատասխանատվությունը և պատիժը ծանրացնող հանգամանքներ չկան։

/տես` գ.թ. 104-126, քրեական գործի նյութերը, դատական նիստի արձանագրությունը/

Ելնելով գործի հանգամանքներից, ինչպես նաև հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի՝ «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի՝ «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և ՀՀ քրեական օրենսգրքի 61-րդ հոդվածի 2-րդ մասը` համաձայն որի՝ «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Գրիգոր Թրվանդյանի կողմից կատարված արարքի համար նրա նկատմամբ պետք է նշանակվի պատիժ՝ տուգանքի ձևով։

Անդրադառնալով նշանակված պատիժն ամբաստանյալ Գրիգոր Թրվանդյանի կողմից կրելու հարցին, դատարանը գտնում է, որ նշանակված պատիժը նա չպետք է կրի, քանի որ նրա նկատմամբ կիրառելի է 03.10.2013 թվականին ՀՀ Ազգային Ժողովի կողմից ընդունված «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 1-ին կետի 2-րդ ենթակետը, համաձայն որի` պետք է

«1/. պատժից ազատել` բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի՝

2/ «այն անձանց, որոնց նկատմամբ նշանակվել է ազատությունից զրկելու հետ չկապված պատիժ»։

Դատարանն արձանագրում է, որ սույն գործով բացակայում են նշված համաներման ակտի 8-րդ կետի 4-6-րդ ենթակետերով և 9-րդ կետով նախատեսված սահմանափակումները, իսկ ամբաստանյալը մեղսագրված հանցանքը կատարել է մինչև 2013թ սեպտեմբերի 01-ը։

Նման պայմաններում դատարանն անդրադառնալով Գրիգոր Թրվանդյանի նկատմամբ ընտրված խափանման միջոցի` չհեռանալու մասին ստորագրության հարցին, գտնում է, որ այն պետք է վերացվի։

Դատարանը, ղեկավարվելով ՀՀ քրեական դատավարության օրենսգրքի 119-րդ հոդվածով գտնում է, որ գործով իրեղեն ապացույց հանդիսացող` վարկային և վճարման փաստաթղթերը` պետք է պահվի սույն քրեական գործի հետ միասին։

4. Եզրափակիչ մաս
Ելնելով վերոգրյալից և ղեկավարվելով ՀՀ Քրեական դատավարաության օրենսգրքի 357-359, 360, 365, 369-373-րդ հոդվածներով, դատարանը

Վ Ճ Ռ Ե Ց

Գրիգոր Վազգենի Թրվանդյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցագործության կատարման մեջ և նրա նկատմամբ պատիժ նշանակել տուգանք` ՀՀ-ում սահմանված նվազագույն աշխատավարձի հինգհարյուրատիկի` 500.000 /հինգ հարյուր հազար/ ՀՀ դրամի չափով։
Կիրառել ՀՀ Ազգային ժողովի կողմից 03.10.2013թ.-ին ընդունված «ՀՀ Անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 1-ին կետի 2-րդ ենթակետը և Գրիգոր Վազգենի Թրվանդյանի ազատել նշանակված պատժից։
Գրիգոր Վազգենի Թրվանդյանի նկատմամբ ընտրված խափանման միջոցը՝ չհեռանալու մասին ստորագրությունը, վերացնել։
Քրեական գործով այլ փաստաթղթի կարգով ապացույց ճանաչված` վարկային և վճարման փաստաթղթերը՝ պահել քրեական գործի հետ միասին։
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման օրվանից հետո մեկամսյա ժամկետում։

Դ Ա Տ Ա Վ Ո Ր Մ. Մ Ա Կ Յ Ա Ն