Ո Ր Ո Շ ՈՒ Մ
Քրեական գործի վարույթը կարճելու և քրեական հետապնդումը դադարեցնելու մասին

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրողներ,
Երևանի Կենտրոն և Նորք-Մարաշ
վարչական շրջանների դատախազության
դատախազներ Վ. Պողոսյանի,
Ա. Հովհաննիսյանի,

տուժող Ս. Հովհաննիսյանի,


2014թ. սեպտեմբերի 05-ին, դատարանում, դռնբաց դատական նիստում քննելով քրեական գործն ըստ մեղադրանքի
Հակոբ Լևոնի Գարսոյանի`
ծնված 1963թ. հոկտեմբերի 03-ին Երևանում, հայ, Հայաստանի Հանրապետության քաղաքացի, ութամյա կրթությամբ, ամուրի, չի աշխատում, դատվածություն չունեցող, հաշվառման վայր չունի, բնակվում է Երևանի Վարդաշեն 6-րդ փողոցի թիվ 68ա շենքի թիվ 413 բնակարանում, կալանքի տակ չէ, մեղադրվում է ՀՀ քրեական օրենսգրքի 113-րդ հոդվածի 1-ին մասով,


Պ Ա Ր Զ Ե Ց

Նախաքննության մարմինը Հակոբ Լևոնի Գարսոյանին մեղադրանք է առաջադրել հետևյալ արարքի համար, որ նա` «2013թ. սեպտեմբերի 29-ին առավոտյան Երևան քաղաքի, Մաշտոցի պողոտայում գտնվող գետնանցման կացարանում վիճաբանել է Սուսաննա Վաղարշակի Հովհաննիսյանի հետ, բռնություն գործադրելով քաշքշել, հարվածել է վերջինիս դեմքին, որի ընթացքում Սուսաննա Հովհաննիսյանը ստացել է առողջության միջին ծանրության վնաս` քթի, աջ ակնակապճի շրջանների փափուկ հյուսվածքների սալջարդների, քթոսկրի, ձախ այտոսկրի կոտրվածքների ձևով, առողջության տևական քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը 21 օրից ավելի։
Այսինքն Հակոբ Լևոնի Գարսոյանը կատարել է արարք նախատեսված ՀՀ քրեական օրենսգրքի 113-րդ հոդվածի 1-ին մասով։»։
Քրեական գործի դատական քննության ընթացքում, 2014թ. սեպտեմբերի 05-ի դատական նիստում տուժող Ս. Հովհաննիսյանը դատարանին հայտնեց, որ ամբաստանյալ Հ. Գարսոյանի հետ հաշտվել է, նրանից որևէ պարտք ու պահանջ չունի և խնդրում է կարճել քրեական գործի վարույթը։
Նույն օրը դատարան է ստացվել տուժող Սուսաննա Հովհաննիսյանի նույն օրվա դիմումն այն մասին, որ տուժող Ս. Հովհաննիսյանն ամբաստանյալ Հ. Գարսոյանի հետ հաշտվել է, նրանից որևէ պարտք ու պահանջ չունի և խնդրում է կարճել քրեական գործի վարույթը։
Ամբաստանյալ Հակոբ Գարսոյանը հայտարարեց, որ տուժող Ս. Հովհաննիսյանի հետ հաշտվել են։
ՀՀ քրեական օրենսգրքի 18-րդ հոդվածի համաձայն`
«1. Հանցագործություն է համարվում մեղավորությամբ կատարված՝ հանրության համար վտանգավոր այն արարքը, որը նախատեսված է սույն օրենսգրքով։
(…)»։
ՀՀ քրեական օրենսգրքի 113-րդ հոդվածի համաձայն`
«1. Դիտավորությամբ մեկ ուրիշին մարմնական վնասվածք կամ առողջությանը որևէ այլ վնաս պատճառելը, որը վտանգավոր չէ կյանքի համար և չի առաջացրել սույն օրենսգրքի 112-րդ հոդվածով նախատեսված հետևանքներ, բայց առաջացրել է առողջության տևական քայքայում կամ ընդհանուր աշխատունակության մեկ երրորդից պակաս զգալի կայուն կորուստ՝
պատժվում է կալանքով՝ մեկից երեք ամիս ժամկետով, կամ ազատազրկմամբ՝ առավելագույնը երեք տարի ժամկետով։»։
ՀՀ քրեական դատավարության օրենսգրքի 35-րդ հոդվածի համաձայն`
«1. Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե`
(…)
5) սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ.
(…)»։
ՀՀ քրեական դատավարության օրենսգրքի 183-րդ հոդվածի համաձայն`
«1. Հայաստանի Հանրապետության քրեական օրենսգրքի 113-րդ հոդվածի 1-ին մասով, (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի` խորհրդակցական սենյակ հեռանալը։
(…)»։
Սույն քրեական գործի դատական քննության ժամանակ, մինչև դատավճիռ կայացնելու համար դատարանի կողմից խորհրդակցական սենյակ հեռանալը տուժող Ս. Հովհաննիսյանը և ամբաստանյալ Հ. Գարսոյանը դատարանին հատնեցին, որ հաշտվել են և տուժողը խնդրեց կարճել գործի վարույթը։
Հաշվի առնելով, որ տուժողը հաշտվել է ամբաստանյալի հետ, որպիսի հանգամանքը սույն քրեական գործով, ՀՀ քրեական դատավարության օրենսգրքով սահմանված կարգով քրեական հետապնդումը դադարեցնելու և քրեական գործի վարույթը կարճելու հիմք է` դատարանը գտնում է, որ քրեական գործի վարույթը ենթակա է կարճման և ամբաստանյալ Հակոբ Գարսոյանի նկատմամբ ՀՀ քրեական օրենսգրքի 113-րդ հոդվածի 1-ին մասով քրեական հետապնդումը ենթակա է դադարեցման` ամբաստանյալի հետ տուժողի հաշտվելու պատճառաբանությամբ։
Ամբաստանյալ Հակոբ Գարսոյանի նկատմամբ ընտրված խափանման միջոց չհեռանալու մասին ստորագրությունը ենթակա է վերացման։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 35-րդ, 183-րդ, 313-րդ հոդվածներով` դատարանը

Ո Ր Ո Շ Ե Ց


ԵԿԴ-0002/01/14 (13819613) քրեական գործով ըստ մեղադրանքի Հակոբ Լևոնի Գարսոյանի` ՀՀ քրեական օրենսգրքի 113-րդ հոդվածի 1-ին մասով, քրեական գործի վարույթը կարճել և Հակոբ Լևոնի Գարսոյանի նկատմամբ քրեական հետապնդումը դադարեցնել` ամբաստանյալի հետ տուժողի հաշտվելու պատճառաբանությամբ։
Հակոբ Լևոնի Գարսոյանի նկատմամբ ընտրված խափանման միջոց չհեռանալու մասին ստորագրությունը` վերացնել։
Սույն որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։

ԴԱՏԱՎՈՐ՝ Մ. ՄԱՐՏԻՐՈՍՅԱՆ