Գործ
ԵԿԴ/0267/01/13

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

,,26,, ապրիլի 2014թ. ք.Երևան

ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը
/այսուհետև` դատարան/

Նախագահությամբ դատավոր Մ. ՄԱԿՅԱՆԻ

Քարտուղարությամբ՝ Կ. Կարապետյանի
Ժ. Մինասյանի
Մասնակցությամբ`

Մեղադրող Ն. Միքայելյանի

դռնբաց դատական նիստում, Երևան քաղաքում քննեց քրեական գործն ըստ մեղադրանքի`

Վաչե Արմենի Ալեքսանյանի` ծնված 28.10.1987թ.-ին ազգությամբ
հայ, ՀՀ քաղաքացի, բարձրագույն կրթությամբ, նախկինում չդատված,
չամուսնացած, չի աշխատում, հաշվառված է ք.Գորիս, Բակունցի
4-րդ շենք, բնակարան 2, մեղադրվում է ՀՀ Քրեական օրենսգրքի 177-րդ
հոդվածի 1-ին մասով։

1.Գործի դատավարական նախապատմությունը

Ըստ դատարան ստացված քրեական գործի նյութերի՝

«2013թ. հուլիսի 31-ին Գևորգ Կամոյի Հայրապետյանը ՀՀ ոստիկանության Կենտրոնականի բաժնում հաղորդում է տվել այն մասին, որ նույն օրը ժամը 03.40-ի սահմաններում անհայտ անձը Երևան քաղաքի Բաղրամյան պողոտայի թիվ 1/1 հասցեում գործող «Գուդ Վին» բուքմեյքերական գրասենյակից գաղտնի հափշտակել է իրեն պատկանող՝ 150.000 ՀՀ դրամ արժողության «LG GT -540» մոդելի բջջային հեռախոսը։
Դեպքի առթիվ ՀՀ ոստիկանության Կենտրոնականի բաժնում նախապատրաստված նյութերի հիման վրա Կենտրոնականի քննչական բաժնում ՀՀ քրեական օրենսգրքի 177-րդ հոդվածի 1-ին մասով հատկանիշներով հարուցվել է թիվ 15139613 քրեական գործը։

Նախաքննությամբ հիմնավորված գործի փաստական հանգամանքները.

Երևան քաղաքի Դավիթաշեն 4-րդ թաղի 36-րդ շենքի 1-ին բնակարանի բնակիչ, սույն գործով մեղադրյալ Վաչե Արմենի Ալեքսանյանը, 2013թ. հուլիսի 31-ին, ժամը 03.30-ի սահմաններում Երևան քաղաքի Կենտրոն վարչական շրջանի տարածքում շրջելու ընթացքում այցելել է Բաղրամյան պողոտայի թիվ 1/1 հասցեում գործող «Գուդ Վին» բուքմեյքերական գրասենյակ և նկատելով, որ խաղադրույք կատարելու տաղավարի դիմացի բազմոցին դրված է «LG GT -540» մոդելի բջջային հեռախոսը, իսկ տաղավարի մոտ ոչ ոք չկա՝ նպատակադրվել է հափշտակել այն։
Մեղադրյալ Վ.Ալեքսանյանը հանցավոր մտադրությունն իրականացնելու նպատակով, աննկատ մոտեցել է նշված բազմոցին, ապա գաղտնի հափշտակել է Գ.Հայրապետյանին պատկանող զգալի չափի՝ 150.000 ՀՀ դրամ արժողության, «LG GT 540» մոդելի բջջային հեռախոսը, որից հետո հեռացել է»։

Փաստի առթիվ ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի կողմից 05.08.2013թ.-ին հարուցվել է քրեական գործ։

13.12.2013թ. ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի կողմից կայացվել է որոշում` Վաչե Արմենի Ալեքսանյանին որպես մեղադրյալ ներգրավելու մասին և նրա նկատմամբ մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով։

Քրեական գործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի գրասենյակ է ստացվել և մուտքագրվել 28.12.2013թ.-ին։

04.04.2014թ.-ին՝ քրեական գործի դատական քննության ընթացքում, Կենտրոն և Նորք-Մարաշ վարչական շրջանների դատախազության դատախազ Ն.Միքայելյանի կողմից որոշում է կայացվել Վաչե Ալեքսանյանի նկատմամբ առաջադրված մեղադրանքի ծավալը փոփոխելու մասին և նրա նկատմամբ մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով` Երևան քաղաքի Բաղրամյան պողոտայի 1/1 հասցեում գործոց «Գուդ Վին» բուքմեյքերական գրասենյակից զգալի չափի` 30.000 ՀՀ դրամ արժողությամբ, «LG GT -540» մոդելի բջջային հեռախոսը գաղտնի հափշտակելու համար։

2.Ապացույցների հետազոտում և գնահատում

Դատաքննությամբ, առաջադրված մեղադրանքում ամբաստանյալ Վաչե Ալեքսանյանն իրեն մեղավոր է ճանաչել լիովին և ցուցմունք է տվել այն մասին, որ 2013թ. հուլիսի 31-ի գիշերը գտնվել է Երևան քաղաքի Բաղրամյան պողոտայի թիվ 1/1 հասցեում գործող «Գուդ Վին» բուքմեյքերական գրասենյակում, որտեղ բազմոցին նկատելով «LG» մոդելի բջջային հեռախոսը՝ որոշել է գողանալ այն։ Մոտեցել է բազմոցին, վերցրել բջջային հեռախոսը և հեռացել։ Հեռախոսը գողանալուց և հիշյալ բջջային հեռախոսը շահագործելուց հետո ի հայտ են եկել անսարքություններ, որից հետո վերանորոգման համար հեռախոսը հանձնել է «Ռոսիա» տոնավաճառում գործող բջջային հեռախոսների վերանորոգման տաղավարի աշխատակցին, սակայն հետագայում բջջային հեռախոսի հետևից չի գնացել։ Ամբաստանյալը հայտնել է, որ այդ հեռախոսի իրական շուկայական արժեքը կազմում է մոտ 30.000 ՀՀ դրամ, իսկ նախկինում իրեն առաջադրված մեղադրանքում նշված 150.000 ՀՀ դրամն իրականությանը չի համապատասխանում, քանի որ հնարավոր չէ, որ հեռախոսն այդ արժեքն ունենար։
Ամբաստանյալ Վաչե Ալեքսանյանը հայտնել է, որ իրեն առաջադրված մեղադրանքում մեղավոր է ճանաչում և զղջում է կատարածի համար։

/տես` դատական նիստի արձանագրությունը/

Դատարանն արձանագրում է, որ բացի իր խոստովանական ցուցմունքից, ամբաստանյալ Վաչե Ալեքսանյանին առաջադրված մեղադրանքը հիմնավորվել է նաև դատարանում հետազոտված և ստորև ներկայացվող ապացույցներով.

ՀՀ քրեական դատավարության օրենսգրքի 342-րդ հոդվածի կարգով հրապարակված՝ տուժող Գևորգ Հայրապետյանի ցուցմունքով այն մասին, որ 2013թ. հուլիսի 30-ին, ժամը 23։00-ից գտնվել է Երևան քաղաքի Բաղրամյան պողոտայի թիվ 1/1 հասցեում գործող «Գուդ Վին» բուքմեյքերական գրասենյակում, որտեղ խաղադրույքներ է կատարել։ Հուլիսի 31-ին՝ ժամը 03.25-ին ծխախոտ գնելու նպատակով դուրս է եկել գրասենյակից և գնացել մոտակա խանութ։ Գրասենյակ վերադառնալով հայտնաբերել է, որ տաղավարի վրայից բացակայում է իրեն պատկանող՝ 150.000 ՀՀ դրամ արժողության «LG GT -540» մոդելի բջջային հեռախոսը։
Հասկանալով, որ այն գողացել են, դիմել է ոստիկանություն և կատարվածի մասին հաղորդում է տվել։
Քննության ընթացքում տեղեկացել է, որ բջջային հեռախոսը հափշտակել է իրեն անծանոթ Վաչե Ալեքսանյանը։
Դատարան ուղարկված դիմումով տուժողը հայտնել է, որ ամբաստանյալի կողմից իրեն պատճառված վնասը վերականգնված չէ, խնդրել է գործի քննությունն անցկացնել իր բացակայությամբ և ամբաստանյալի նկատմամբ նշանակել «իրական» պատիժ։

/տես` գ.թ. 43-44 և 120, դատական նիստի արձանագրությունը/

ՀՀ քրեական դատավարության օրենսգրքի 342-րդ հոդվածի կարգով հրապարակված՝ վկա Միքայել Կամոյի Խոսրովյանի ցուցմունքով այն մասին, որ 2009թ. սկսած Երևան քաղաքի Մ.Խորենացու 31/1 հասցեում իր ընկեր Կարեն Գալստյանի հետ զբաղվում են բջջային հեռախոսների առքուվաճառքով և վերանորոգմամբ։
2013թ. օգոստոս ամսվա սկզբին տաղավար է այցելել անծանոթ մի անձնավորություն, վերանորոգման համար տվել է «LG GT -540» մոդելի բջջային հեռախոս։ Նշված բջջային հեռախոսը վերանորոգել է, սակայն պատվիրատուն շուրջ մեկ ամիս հեռախոսի հետևից չի եկել ուստի հեռախոսը տվել է իր գործընկեր Կամո Գալստյանին։

/տես` գ.թ. 85-86, դատական նիստի արձանագրությունը/

ՀՀ քրեական դատավարության օրենսգրքի 342-րդ հոդվածի կարգով հրապարակված՝ վկա Կարեն Գալստյանի ցուցմունքով այն մասին, որ 2013թ. օգոստոս ամսվա սկզբին Մ.Խոսրովյանը հայտնել է, որ մի երիտասարդ վերանորոգման համար «LG GT -540» մոդելի բջջային հեռախոս է հանձնել, սակայն երկար ժամանակ դրա հետևից չի եկել։ Նշված բջջային հեռախոսը Կ.Գալստյանը տվել է իրեն, դրա մեջ տեղադրել է իր 055-63-28-29 համարի հեռախոսաքարտը և շահագործել։
2013թ. նոյեմբերի 26-ին հրավիրվելով ՀՀ ոստիկանության Կենտրոնականի բաժին տեղեկացել է, որ իր կողմից շահագործվող բջջային հեռախոսը գողացված է եղել։ Հիշյալ բջջային հեռախոսն առգրավվել է։

/տես` գ.թ. 76-77, դատական նիստի արձանագրությունը/

Բացի վերոգրյալներից, ամբաստանյալ Վաչե Ալեքսանյանի կողմից կատարած հանցանքը հիմնավորվել են նաև քրեական գործով ձեռք բերված և դատաքննությամբ հետազոտված հետևյալ ապացույցների համակցությամբ.

ապրանքագիտական փորձաքննության թիվ N952-ԱՊ եզրակացությամբ` համաձայն որի` «փորձաքննությանը տրամադրված «LG» տեսակի, «GT540» մոդելի բջջային հեռախոսի միջին շուկայական արժեքը, 2013 թվականի հուլիսի 31-ի դրությամբ, առկա ապրանքային վիճակի հաշվառմամբ, գնահատվում է 30.000 ՀՀ դրամ։

/տես` գ.թ. 102, դատական նիստի արձանագրությունը/

Ապացույց ճանաչված՝ այլ ապացույց հանդիսացող Գ.Հայրապետյանից հափշտակված 352166044488586 գործարանային համարի «LG GT -540» մոդելի բջջային հեռախոսի ապարատից կատարված հեռախոսազանգերի վերծանումներով, որոնց զննությամբ պարզվել է, որ հափշտակության դեպքից անմիջապես հետո հիշյալ բջջային ապարատը շահագործվել է մեղադրյալ Վ.Ալեքսանյանի 099-66-05-16 համարի հեռախոսաքարտով, իսկ 2013թ. սեպտեմբերի 02-ից՝ վկա Կ.Գալստյանին պատկանող 055-63-28-29 համարի հեռախոսաքարտով։

/տես` գ.թ. 56-60 և 63, դատական նիստի արձանագրությունը/

Վկա Կարեն Գալստյանից առգրավված և իրեղեն ապացույց ճանաչված 352166044488586 գործարանային համարի «LG GT-540» մոդելի բջջային հեռախոսով։

/տես` գ.թ. 103, դատական նիստի արձանագրությունը/

Դատարանում հետազոտվել են նաև ամբաստանյալ Վաչե Ալեքսանյանի վերաբերյալ ինֆորմացիոն կենտրոնի կողմից տրված պահանջագիրը։

/տես` գ.թ. 117, դատական նիստի արձանագրությունը/

3. Դատարանի իրավական վերլուծությունները

Այսպիսով, դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով վերը շարադրված ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ, ապացուցված է համարում այն, որ ամբաստանյալին Վաչե Ալեքսանյանը կատարել է իրեն մեղսագրված հանցագործությունը, որի համար ենթակա է պատժի։

Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։

Որպես Վաչե Ալեքսանյանի անձը բնութագրող հանգամանք, դատարանը հաշվի է առնում նաև այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում դատապարտված կամ որևէ այլ կերպ արատավորված չի եղել։

/տես` գ.թ. 117, քրեական գործի նյութերը, դատական նիստի արձանագրությունը/


Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն որպես ամբաստանյալ Վաչե Ալեքսանյանի պատասխանատվությունը և պատիժը մեղմացնող հանգամանք է դիտում նաև կատարած հանցանքի համար անկեղծորեն զղջալը։

Դատարանը գտնում է, որ ՀՀ քրեական օրենսգրքի 63-րդ հոդվածի համաձայն ամբաստանյալ Վաչե Ալեքսանյանի արարքում նրա պատասխանատվությունը և պատիժը ծանրացնող հանգամանքներ չկան։

/տես` քրեական գործի նյութերը, դատական նիստի արձանագրությունը/

Ելնելով գործի հանգամանքներից, ինչպես նաև հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի՝ «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի՝ «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և ՀՀ քրեական օրենսգրքի 61-րդ հոդվածի 2-րդ մասը` համաձայն որի՝ «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Վաչե Ալեքսանյանի կողմից կատարված արարքի համար նրա նկատմամբ պետք է նշանակվի պատիժ՝ տուգանքի ձևով, որը նա պետք է կրի։

Նշված եզրահանգմանը գալիս դատարանն արձանագրում է հետևյալը՝

ՀՀ քրեական օրենսգրքի 177-րդ հոդվածի 1-ին մասը նախատեսում է պատիժ՝ տուգանք` նվազագույն աշխատավարձի երկուհարյուրապատիկից չորսհայրուրապատիկի չափով, կամ կալանք` մեկից երկու ամիս ժամանակով, կամ ազատազրկում` առավելագույնը երկու տարի ժամկետով։
Այլընտրանքային սանկցիաների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ. Մադաթյանի գործով որոշման մեջ, որտեղ իրավական դիրքորոշում է հայտնել այն մասին, որ. «(…) այլընտրանքային սանկցիաների միջև ընտրություն կատարելիս պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա։
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ։
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը։ (…)» (տե’ս Գարուշ Նորիկի Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշումը)։
Հաշվի առնելով ամբաստանյալ Վաչե Ալեքսանյանի կատարած հանցագործության բնույթը և հանրության համար վտանգավորության աստիճանը, դրա կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, խախտված հասարակական հարաբերության սոցիալական նշանակությունը և այդ ոլորտում պետության քրեական քաղաքականության ուղղվածությունը, դրանք համադրելով նրա պատասխանատվությունն ու պատիժը մեղմացնող հանգամանքների հետ՝ դատարանը գտնում է, որ Վաչե Ալեքսանյանին իր կատարած` ՀՀ քրեական օրենսգրքի 177-րդ հոդվածի 1-ին մասով նախատեսված հանցագործության համար ենթակա է պատժի այդ հանցագործության համար նախատեսված պատիժներից առավել մեղմ պատժի` տուգանքի ձևով, քանի որ դատարանում ի հայտ չի եկել որևէ հիմք այն մասին, որ պատժի նվազ խիստ տեսակը տվյալ դեպքում չի կարող ապահովել պատժի նպատակները։

Նման պայմաններում դատարանն անդրադառնալով Վաչե Ալեքսանյանի նկատմամբ ընտրված խափանման միջոցի` չհեռանալու մասին ստորագրության հարցին, գտնում է, որ այն պետք է թողնել անփոփոխ, մինչև դատավճիռն օրինական ուժի մեջ մտնելը։

Դատարանը, ղեկավարվելով ՀՀ քրեական դատավարության օրենսգրքի 119-րդ հոդվածով գտնում է, որ գործով իրեղեն ապացույց ճանաչված` «LG GT-540» մոդելի բջջային հեռախոսը` պետք է վերադարձնել տուժող Գևորգ Կամոյի Հայրապետյանին։

4. Եզրափակիչ մաս
Ելնելով վերոգրյալից և ղեկավարվելով ՀՀ Քրեական դատավարաության օրենսգրքի 357-359, 360, 365, 369-373-րդ հոդվածներով, դատարանը

Վ Ճ Ռ Ե Ց

Վաչե Արմենի Ալեքսանյանին մեղավոր ճանաչել ՀՀ Քրեական օրենսգրքի 177-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք` ՀՀ-ում սահմանված նվազագույն աշխատավարձի հարյուրապատիկի` 100.000 /մեկ հարյուր հազար/ ՀՀ դրամի չափով։
Վաչե Արմենի Ալեքսանյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ մինչև դատավճիռն օրինական ուժի մեջ մտնելը։
Քրեական գործով իրեղեն ապացույց ճանաչված «LG GT-540» մոդելի բջջային հեռախոսը վերադարձնել տուժող Գևորգ Կամոյի Հայրապետյանին։
Դատավճիռը կարող է բողոքարկվել ՀՀ Վերաքննիչ քրեական դատարան հրապարակվելու օրվանից հետո` մեկամսյա ժամկետում։



Դ Ա Տ Ա Վ Ո Ր Մ. Մ Ա Կ Յ Ա Ն