Գործ
ԵԿԴ/0264/01/13

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀՀ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը /այսուհետև` դատարան/

Նախագահությամբ դատավոր Մ. Մակյանի
Քարտուղարությամբ Կ. Կարապետյանի

Մասնակցությամբ՝
Մեղադրող Բ.Պետրոսյանի
Հանրային պաշտպան Կ.Հակոբյանի
2014թ. հունվարի 23-ին, դռնբաց դատական նիստում, Երևան քաղաքում, դատաքննության արագացված կարգի կիրառմամբ քննեց քրեական գործն ըստ մեղադրանքի`

Վիգեն Գրիգորի Չիլինգարյանի ` ծնված 29.09.1984թ.
Երևան քաղաքում, ազգությամբ հայ, ՀՀ քաղաքացի,
բարձրագույն կրթությամբ, ամուսնացած,
չդատված, չի աշխատում, խնամքին մեկ երեխա, բնակվում է
ք. Երևան, Տիգրան Մեծի փողոց, 27/2-րդ շենքի, 42-րդ բն.
մեղադրվում է ՀՀ քրեական օրենսգրքի 178-րդ հոդվածի
2-րդ մասի 1-ին և 2-րդ կետերով։

1.Գործի դատավարական նախապատմությունը
Քրեական գործով մեղադրյալ, Վիգեն Գրիգորիի Չիլինգարյանը 2010 թվականի մարտի վերջերին Արմեն Տեր-Մինասյանին տեղեկություններ է տրամադրել այն մասին, որ ԱԱԾ նախկին աշխատակից Ռոբերտ Լաիշյանն իրականացնում է ապօրինի հեռախոսակապ ու այդ նպատակով ձեռք է բերել բջջային հեռախոսների «Իզի» տեսակի քարտեր։ Վիգեն Չիլինգարյանը և Արմեն Տեր-Մինասյանը հանդիպելով Ռոբերտ Լաիշյանին, նրա օգտին ակնհայտ ապօրինի անգործության` վերջինիս կողմից ապօրինի հեռախոսակապ իրականացնելու մասին տեղեկություններին ու այդ հանգամանքը հիմնավորող` Վահագն Ներկարարյանի դիմումին օրենքով սահմանված կարգով ընթացք չտալու, Ռոբերտ Լաիշյանին պատասխանատվության ենթարկելու հիմք հանդիսացող տեղեկություններն իրավապահ մարմիններն չտրամադրելու համար, նրանից պահանջել են նախ 5.000 ԱՄՆ դոլար, իսկ սակարկելուց հետո` 3.000 ԱՄՆ դոլար կաշառք։ Ռոբերտ Լայիշյանի համաձայնությունը ստանալուց հետո, Վիգեն Չիլինգարյանը, օժանդակելով Արմեն Տեր-Մինասյանին` առանձնապես խոշոր չափերի կաշառք ստանալուն, Ռոբերտ Լաիշյանից կաշառքի գումարը փոխանցելու մասին տեղեկություններ է տրամադրել ու հայտնել Արմեն Տեր-Մինասյանին, ով էլ 2010 թվականի ապրիլի 6-ին ժամը 17-ի սահմաններում, Երևանի Նալբանդյան և Խանջյան փողոցների խաչմերուկի մոտակայքում, հանդիպել է Ռոբերտ Լաիշյանին և ՀՀ ԱԱԾ վարչական շենքի թիվ 2-րդ մուտքի մոտ Ռոբերտ Լաիշյանից անձամբ ստացել է առանձնապես խոշոր չափերի` 1.206.030 դրամին համարժեք 3.000 ԱՄՆ դոլար կաշառքը։
Փաստի առթիվ ՀՀ հատուկ քննչական ծառայության հատկապես կարևոր գործերի քննիչ Ա.Գրիգորյանի կողմից 2010 թվականի ապրիլի 7-ին հարուցվել է քրեական գործ։
2010 թվականի ապրիլի 12-ին Վիգեն Չիլինգարյանի նկատմամբ ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով որպես մեղադրյալ ներգրավելու մասին որոշում է կայացվել, նույն օրը հայտարարվել է հետախուզում և Երևան քաղաքի Կենտրոն և Նորք-Մարաշ վարչական շրջաններին ընդհանուր իրավասության դատարանի որոշմամբ նրա նկատմամբ որպես խափանման միջոց է ընտրվել կալանավորումը։
2010 թավականի մայիսի 12-ին ՀՀ հատուկ քննչական ծառայությունում որոշում է կայացվել թիվ 62202910 քրեական գործից մաս անջատելու, որին շնորհվել է թիվ 62204110 համարը։ 2010 թվականի մայիսի 17-ին ՀՀ հատուկ քննչական ծառայությունում որոշում է կայացվել թիվ 62204110 քրեական գործը ըստ քննչական ենթակայության ուղարկելու մասին և 2010 թվականի մայիսի 20-ին ՀՀ գլխավոր դատախազության միջոցով թիվ 62204110 քրեական գործը ուղարկվել է ՀՀ ոստիկանության ՔԳՎ ՀԿԳ քննության վարչություն` նախաքննությունը շարունակելու համար։
2010 թվականի հունիսի 7-ին թիվ 62204110 քրեական գործով վարույթը կասեցվել է մինչև մեղադրյալ Վիգեն Չիլինգարյանի հայտնաբերվելը։
2010 թվականի մայիսի 19-ին Արմեն Տեր-Մինասյանի վերաբերյալ թիվ 62202910 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջաննելի ընդհանուր իրավասության առաջին ատյանի դատարան։ Դատարանում դատավարության ընթացքում անդրադառնալով վերջինիս վերագրվող արարքի իրավաբանական որակմանը դատարանը գտել է, որ այն ՀՀ քրեական օրենսգրքի 311-րդ հոդվածի 4-րդ մասի 2-րդ կետից պետք է վերաորակել ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով։
2013 թվականի մայիսի 13-ին Երևան քաղաքի Կենտրոն և Նորք-Մարաշ վարչական շրջաննելի ընդհանուր իրավասության առաջին ատյանի դատարանը` Արման Տեր-Մինասյանին մեղավոր է ճանաչել ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով և պատիժ նշանակել ազատազրկում 4/չորս/ տարի ժամկետով։ Դատավճիռը մտել է օրինական ուժի մեջ։
Նման պայմաններում 2013 թվականի դեկտեմբերի 9-ին որոշում է կայացվել Վիգեն Չիլինգարյանին ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով առաջադրված մեղադրանքը փոփոխելու և ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով որպես մեղադրյալ ներգրավելու մասին։
2013 թվականի դեկտեմբերի 11-ին մեղադրյալ Վիգեն Չիլինգարյանն ինքնակամ ներկայացել է քրեական վարույթն իրականացնող մարմին, նույն օրը մեղադրյալի նկատմամբ ընտրված խափանման միջոց կալանավորումը վերացվել է և նրա նկատմամբ նոր խափանման միջոց է ընտրվել չհեռանալու մասին ստորագրությունը։
Քրեական գործը ՀՀ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի գրասենյակ է ստացվել և մուտքագրվել 28.12.2013թ.-ին։
2.Արագացված դատական քննություն
Մինչև դատաքննությունը սկսելն ամբաստանյալ Վիգեն Չիլինգարյանը միջնորդել է դատաքննությունն անցկացնել արագացված կարգով և հայտարարել, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված կարգով դատաքննություն անցկացնելու հետևանքները, առաջադրված մեղադրանքն իրեն պարզ են, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում լիովին։
Դատախազ Բ.Պետրոսյանը, գործով մեղադրական եզրակացությունը հաստատելիս, արագացված կարգով դատական քննություն անցկացնելու դեմ չի առարկել։
Դատարանը, համոզվելով, որ առկա են ՀՀ քրեական դատավարության օրենսգրքի 375.1 և 375.2 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին։
Դատարանը, հիմք ընդունելով մեղադրանքի հիմքում դրված ապացույցները` մեղադրյալի, գործով վկաների ցուցմունքները, սույն գործով որպես այլ փաստաթղթի կարգով ապացույց ճանաչված փաստաթղթերը. Արմեն Տեր-Մինասյանի «ՄՏՍ» տեսակի և «Սամսունգ» տեսակի բջջային հեռախոսներում առկա տեղեկատվությունը, Արմեն Տեր-Մինասյանի բջջային 099-20-77-77, 098-20-77-77, 055-20-77-77 և աշխատասենյակի 55-08-66, Վիգեն Չիլինգարյանի բջջային 099-16-51-59 և 091-40-04-09 և Ռոբերտ Լաիշյանի բջջային 091-40-92-82 հեռախոսահամարների մուտքային և ելքային զանգերի վերծանումները, գաղտնատեսաձայնագրություններով լազերային սկավառակները, Վահագն Ներկարարյանի և մյուսների դիմումները, հեռախոսահամարների ձեռք բերման պայմանագրերը, ապօրինի հեռախոսակապ իրականացնող հեռախոսահամարների ցուցակները, տեսագրությունները, Նունե Մելքոնյանի կողմից ներկայացված և որպես իրեղեն ապացույց ճանաչված հագուստները, բաճկոնը և վերնաշապիկը, գտավ, որ ամբաստանյալ Վիգեն Չիլինգարյանը կատարել է ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով նախատեսված հանցավոր արարքը։
3. Դատարանի իրավական վերլուծությունները
Դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ, ապացուցված է համարում ամբաստանյալ Վիգեն Չիլինգարյանին մեղսագրված հանցագործության կատարումն ամբողջությամբ, որի համար վերջինս ենթակա է պատժի։
Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։
Որպես Վիգեն Չիլինգարյանի անձը բնութագրող դրական հանգամանք, դատարանը հաշվի է առնում «Տիգրան Մեծ» համատիրության նախագահ/կառավարիչ Նվարդ Հովակիմյանի կողմից տրված դրական բնութագիրը։
/ տես` Հատոր 2-րդ. գ.թ. 268, դատական նիստի արձանագրությունը/
Որպես Վիգեն Չիլինգարյանի անձը բնութագրող դրական հանգամանք, դատարանը հաշվի է առնում նաև այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում դատապարտված կամ որևէ այլ կերպ արատավորված չի եղել։
Դատարանն ամբաստանյալ Վիգեն Չիլինգարյանի արարքում ՀՀ քրեական օրենսգրքի 62-րդ հոդվածի 1-ին մասի 4-րդ և 9-րդ ենթակետերի համաձայն որպես նրա պատասխանատվությունը և պատիժը մեղմացնող հանգամանք է դիտում պատիժ նշանակելու պահին հանցավորի խնամքի տակ մինչև տասնչորս տարեկան մեկ երեխայի առկայությունը` Գրիգոր Վիգենի Չիլինգարյան` ծնված 30.09.2010թ-ին` հիմք երեխայի ծննդյան վկայականը, ինչպես նաև հանցագործությունը կատարելուց հետո մեղայականով ներկայանալը։
/ տես` Հատոր 2-րդ. գ.թ. 252, դատական նիստի արձանագրությունը/
Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն, որպես ամբաստանյալ Վիգեն Չիլինգարյանի արարքում նրա պատասխանատվությունն ու պատիժը մեղմացնող հանգամանք է դիտում նաև 2-րդ խմբի հաշմանդամ հայր ունենալու փաստը. Գրիգոր Աղասու Չիլինգարյան` ծնված 04.03.1946թ-ին, հիմք՝ թիվ 751651 բժշկասոցիալական տեղեկանքը, ինչպես նաև այն որ կինը՝ Տաթևիկ Ղուկասյանը, գտնվում է հղիության վիճակում` հիմք «Էրեբունի գիտա-բժշկական կենտրոն»-ի կողմից տրված տեղեկանքը։
/տես` Հատոր 1-ին, գ.թ.66Հատոր 2-րդ, գ.թ. 193-196, դատական նիստի արձանագրությունը/
Բացի այդ, դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն ամբաստանյալ Վիգեն Չիլինգարյանի պատասխանատվությունը և պատիժը մեղմացնող հանգամանք է դիտում կատարած հանցանքի համար անկեղծորեն զղջալը։
/տես` դատական նիստի արձանագրությունը/
Դատարանը գտնում է, որ ՀՀ քրեական օրենսգրքի 63-րդ հոդվածի համաձայն ամբաստանյալ Վիգեն Չիլինգարյանի արարքում նրա պատասխանատվությունը և պատիժը ծանրացնող հանգամանքներ չկան։
/տես` դատական նիստի արձանագրությունը/
Ելնելով գործի հանգամանքներից, ինչպես նաև հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի՝ «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի՝ «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և ՀՀ քրեական օրենսգրքի 61-րդ հոդվածի 2-րդ մասը` համաձայն որի՝ «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Վիգեն Չիլինգարյանի կողմից կատարված արարքի համար նրա նկատմամբ պետք է նշանակվի պատիժ՝ ազատազրկման ձևով։

Անդրադառնալով նշանակված պատիժն ամբաստանյալ Վիգեն Չիլինգարյանի կողմից կրելու հարցին, դատարանը գտնում է, որ մեղսագրված հանցանքի համար նախատեսված հոդվածի սանկցիայի սահմաններում համապատասխան պատժատեսակի և պատժաչափի՝ մինչև երեք տարի ժամկետով ազատազրկման ձևով պատիժ նշանակելու դեպքում նրա նկատմամբ կիրառելի է 03.10.2013 թվականին ՀՀ Ազգային Ժողովի կողմից ընդունված «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 1-ին կետի 3-րդ ենթակետը, համաձայն որի` պետք է
«1/ պատժից ազատել` բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի՝
3/ «այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ»։
Դատարանն արձանագրում է, որ սույն գործով բացակայում են համաներման ակտի 8-րդ կետի 4-6-րդ ենթակետերով և 9-րդ կետով նախատեսված սահմանափակումները, իսկ ամբաստանյալը մեղսագրված հանցանքը կատարել է մինչև 2013թ.-ի սեպտեմբերի 1-ը։
Դատարանն անդրադառնալով Վիգեն Չիլինգարյանի նկատմամբ ընտրված խափանման միջոցի` չհեռանալու մասին ստորագրության հարցին, գտնում է, որ ամբաստանյալին պատժից ազատելու պայմաններում այն պետք է վերացվի։

4. Եզրափակիչ մաս

Վերոգրյալի հիման վրա և ղեկավարվելով ՀՀ Քր. դատ. օր-ի 357-360, 365, 369-373 375.1-375.4-րդ հոդվածներով, դատարանը

Վ Ճ Ռ Ե Ց

Վիգեն Գրիգորիի Չիլինգարյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով նախատեսված հանցագործության կատարման մեջ և նրա նկատմամբ պատիժ նշանակել` ազատազրկում 3 /երեք/ տարի ժամկետով։
Կիրառել ՀՀ Ազգային ժողովի կողմից 03.10.2013թ.-ին ընդունված «ՀՀ Անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 1-ին կետի 3-րդ ենթակետը և Վիգեն Գրիգորիի Չիլինգարյանին ազատել նշանակված պատժից։
Վիգեն Գրիգորիի Չիլինգարյանի նկատմամբ ընտրված խափանման միջոցը՝ չհեռանալու մասին ստորագրությունը, վերացնել։
Քրեական գործում առկա՝ 12.05.2010 թվականի որոշմամբ այլ փաստաթղթի կարգով ապացույց ճանաչված տեղեկատվությունը և փաստաթղթերը՝ պահել քրեական գործի հետ միասին։
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման օրվանից հետո մեկամսյա ժամկետում, բացառությամբ ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքի։


Դ Ա Տ Ա Վ Ո Ր Մ. Մ Ա Կ Յ Ա Ն