Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

09 ապրիլի 2014թ. ք. Երևան

ԵԿԴ-0254/01/13

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան

մասնակցությամբ`
մեղադրող`
Հայաստանի Հանրապետության /այսուհետ ՀՀ/
գլխավոր դատախազության
ՀՀ ազգային անվտանգության
մարմիններում քննվող և
կիբերհանցագործությունների գործերով
վարչության պետի տեղակալ Ա. Փանոսյանի,


պաշտպաններ Ա. Ղարիբյանի,
Ա. Փարսադանյանի,


տուժողներ Ա. Քալաշյանի,
Սատիշ Կումար,
Դավինդեր Կումար
Կուլվիր Սինգհ,
Ռամանդիփ Կումար,
Լախվինդեր Կումար
Ջասվինդեր Սինգհ,
Կուրդիփ Սինգհ,
Կարկի Նիշան,
Կարկի Սուդհիր,


դատարանում, դռնբաց դատական նիստում քննեց գործն ըստ մեղադրանքի Հայկ Սուրիկի Վարդանյանի`
/ծնված` 1968 թվականի հուլիսի 25-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, ֆիզիկապես վատառողջ` երկրորդ խմբի հաշմանդամ, նախկինում 5 անգամ դատված`
1. ՀՀ Գերագույն դատարանի 1996թ. դեկտեմբերի 9-դատավճռով, ՀՀ նախկին քրեական օրենսգրքի 183-րդ հոդվածի 1-ին մասով և 182-րդ հոդվածի 1-ին մասով դատապարտվել է ազատազրկման 1 տարի 6 ամիս ժամանակով, պատժի կրումից ազատվել է 04.04.1997թ.-ին, դատվածությունը մարված,
2. Աջափնյակ և Դավթաշեն համայնքների առաջին ատյանի դատարանի 12.01.2001թ. դատավճռով, ՀՀ նախորդ քրեական օրենսգրքի 89-րդ հոդված 1-ին մասով դատապարտվել է ազատազրկման 1 տարի ժամանակով, պատժի կրումից պայմանական վաղաժամկետ ազատվել է 07.02.2001թ.ին, դատվածությունը մարված,
3. Աջափնյակ և Դավթաշեն համայնքների 1-ին ատյանի դատարանի 06.07.2005թ. դատավճռով ՀՀ քրեական օրենսգրքի 178-րդ հոդվածի 3-րդ մասի 1-ին կետով, 38-325-րդ հոդվածի 1-ին մասով, նույն օրենսգրքի 66-րդ հոդվածի կիրառմամբ դատապարտվել է ազատազրկման 5 տարի ժամկետով, պատժի կրումից պայմանական վաղաժամկետ ազատվել է 15.06.2006թ.ին,
4. Երևանի Մալաթիա-Սեբաստիա համայնքների առաջին ատյանի դատարանի 02.03.2009թ. դատավճռով, ՀՀ քրեական օրենսգրքի 38-309-րդ հոդվածի 1-ին մասով, 38-329-րդ հոդվածի 1-ին մասով, նույն օրենսգրքի 66-րդ, 67-րդ հոդվածների կիրառմամբ դատապարտվել է ազատազրկման 5 /հինգ/ տարի 6/վեց/ ամիս ժամկետով, Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի 08.07.2010թ. որոշմամբ ազատվել է պատժի կրումից` հիվանդության պատճառով,
5. Երևանի Մալաթիա-Սեբաստիա համայնքների առաջին ատյանի դատարանի 12.10.2011թ. դատավճռով, ՀՀ քրեական օրենսգրքի 259-րդ հոդվածով, դատապարտվել է ազատազրկման 1 /մեկ/ տարի 6/վեց/ ամիս ժամկետով, որը կրել է ամբողջությամբ և ազատվել է 23.11.2012թ., վերջին երեք դատվածությունները մարված չեն, հաշվառման հասցե չունի, փաստացի բնակվել է Երևանի Ջամբուլի փողոցի թիվ 39 տանը, ձերբկալվել է 20.06.2013թ.-ին և այդ օրվանից գտնվում է կալանքի տակ,

մեղադրվում է ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով և 178-րդ հոդվածի 3-րդ մասի 1-ին կետով։

Գործի դատավարական նախապատմությունը

Թիվ 58206413 քրեական գործը ՀՀ կառավարությանն առընթեր ազգային անվտանգության ծառայության (այսուհետ ԿԱ ԱԱԾ) քննչական ծառայությունում հարուցվել է 2013թ. հունիսի 20-ին, ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով, կաշառք ստանալու պատրվակով խաբության եղանակով ուրիշի գույքի խոշոր չափերով հափշտակության դեպքի առթիվ։
Քննիչի 2013թ.-ի նոյեմբերի 20-ի որոշմամբ, կաշառք ստանալու պատրվակով, խաբեության եղանակով ուրիշի գույքի խոշոր չափերով հափշտակություն և նույն եղանակով ուրիշի գույքի առանձնապես խոշոր չափերով հափշտակություն կատարելու համար Հայկ Սուրիկի Վարդանյանին առաջադրված մեղադրանքը փոփոխվել և լրացվել է, նրան նոր մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով, ՀՀ քրեական օրենսգրքի 178-րդ հոդվածի 3-րդ մասի 1-ին կետով։
Քննիչի 2013թ. դեկտեմբերի 17-ի որոշմամբ Ռավի Դուտտի կողմից խարդախությամբ` խաբեության եղանակով առանձնապես խոշոր չափերով ուրիշի գույքի` 3.264.000 ՀՀ դրամին համարժեք 6.000 եվրո և 2.720.000 ՀՀ դրամին համարժեք 5.000 եվրո գումարների հափշտակություն կատարելու դեպքի առթիվ թիվ 58206413 քրեական գործի նյութերով հարուցվել է նոր քրեական գործ` ՀՀ քրեական օրենսգրքի 178-րդ հոդվածի 3-րդ մասի 1-ին կետով և այն առանձնացվել է առանձին վարույթում` թիվ 58214813 հերթական համարով։
Նախաքննության մարմինը Հայկ Սուրիկի Վարդանյանին մեղադրանք է առաջադրել ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով և 178-րդ հոդվածի 3-րդ մասի 1-ին կետով հետևյալ արարքների համար` «որ նա խարդախության եղանակով հափշտակություն կատարելու դիտավորությամբ Արիստակես Էդուարդի Քալաշյանին վստահեցրել է, որ ՀՀ ԱԱԾ համակարգում աշխատող իր ծանոթ բարձրաստիճան պաշտոնյաներին կաշառք տալու միջոցով նրան աշխատանքի կտեղավորի ՀՀ ԱԱԾ սահմանապահ զորքերի «Զվարթնոց» հսկիչ-անցագրային կետում։ Մինչդեռ իրականում մտադրություն չունենալով կատարել խոստացածը, նշված պատրվակով Արիստակես Քալաշյանից պահանջել և 2013թ-ի հունիսի 20-ին ստացել է 1.231.230 ՀՀ դրամին համարժեք 3.000 ԱՄՆ դոլար գումար։
Բացի այդ, 2013 թվականի հունիսի սկզբին, Հայկ Վարդանյանը Գագիկ Աբրահամյանին խոստացել է 27.000 եվրո գումարի դիմաց կազմակերպել Հնդկաստանի քաղաքացիներ Ջասվինդեր Սինգհի, Ռամանդիփ Կումարի, Դավինդեր Կումարի, Կուլդիփ Սինգհի, Սատիշ Կումարի, Լախվինդեր Կումարի, Կուլվիր Սինգհի, Նեպալի քաղաքացիներ Կարկի Նիշանի և Կարկի Սուդհիրի կողմից շենգենյան երկրների մուտքի արտոնագրեր ստանալը և դրանցով ՀՀ-ից Եվրոպա մեկնումը` իրականում նպատակ հետապնդելով հափշտակել նշված գումարը։
Իր հանցավոր նպատակին հասնելու համար, Գագիկ Աբրահամյանի և նշված անձանց մոտ Եվրոպա մեկնելու գործընթացի վերաբերյալ պատրանք ստեղծելու, նրանց վստահություն ներշնչելու, դրա արդյունքում 27.000 եվրո գումարին տիրանալու նպատակով, քննությամբ չպարզված հանգամանքներում 2013 թվականի հունիսի 4-ից մինչև 14-ն ընկած ժամանակահատվածում ձեռք է բերել Ջասվինդեր Սինգհի անվամբ 000226226, Ռամանդիփ Կումարի անվամբ 000226200, Դավինդեր Կումարի անվամբ 000226203, Կուլդիփ Սինգհի անվամբ 000226266, Սատիշի Կումարի անվամբ 000226201, Լախվինդեր Կումարի անվամբ 000226265, Կուլվիր Սինգհի անվամբ 000226226, Կարկի Նիշանի անվամբ 000226222, Կարկի Սուդհիրի անվամբ 000226220 համարների Լատվիայի մուտքի կեղծ արտոնագրերը, որոնք 2013 թվականի հունիսի 14-ին ներկայացրել է Դավինդեր Կումարին, հաջորդ օրը` 2013 թվականի հունիսի 15-ին Գագիկ Աբրահամյանից ստացել և հափշտակել է Նեպալի և Հնդկաստանի նշված ինը քաղաքացիներին պատկանող 14.864.040 ՀՀ դրամին համարժեք 27.000 եվրո գումարը, այսինքն հանցագործությունում, նախատեսված ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով և 178-րդ հոդվածի 3-րդ մասի 1-ին կետով։»։
2014թ. դեկտեմբերի 23-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Հայկ Սուրիկի Վարդանյանը 2013 թվականի հունիսի սկզբին, 27.000 եվրո գումարի դիմաց, Գագիկ Աբրահամյանին խոստացել է կազմակերպել Հնդկաստանի քաղաքացիներ Ջասվինդեր Սինգհի, Ռամանդիփ Կումարի, Դավինդեր Կումարի, Կուլդիփ Սինգհի, Սատիշ Կումարի, Լախվինդեր Կումարի, Կուլվիր Սինգհի, Նեպալի քաղաքացիներ Կարկի Նիշանի և Կարկի Սուդհիրի կողմից շենգենյան երկրների մուտքի արտոնագրերի ստանալը և դրանցով ՀՀ-ից Եվրոպա մեկնելը` իրականում նպատակ հետապնդելով հափշտակել նշված գումարը։
Նշված անձանց մոտ Եվրոպա մեկնելու գործընթացի վերաբերյալ պատրանք ստեղծելու, նրանց վստահություն ներշնչելու, դրա արդյունքում 27.000 եվրո գումարին տիրանալու նպատակով, քննությամբ չպարզված հանգամանքներում, 2013 թվականի հունիսի 4-ից մինչև 14-ն ընկած ժամանակահատվածում Հայկ Վարդանյանը ձեռք է բերել Լատվիայի մուտքի` Ջասվինդեր Սինգհի անվամբ 000226226, Ռամանդիփ Կումարի անվամբ 000226200, Դավինդեր Կումարի անվամբ 000226203, Կուլդիփ Սինգհի անվամբ 000226266, Սատիշի Կումարի անվամբ 000226201, Լախվինդեր Կումարի անվամբ 000226265, Կուլվիր Սինգհի անվամբ 000226226, Կարկի Նիշանի անվամբ 000226222, Կարկի Սուդհիրի անվամբ 000226220 համարների կեղծ արտոնագրերը, որոնք 2013 թվականի հունիսի 14-ին ներկայացրել է Դավինդեր Կումարին։ 2013 թվականի հունիսի 15-ին ամբաստանյալ Հայկ Վարդանյանը Գագիկ Աբրահամյանից ստացել և հափշտակել է Նեպալի և Հնդկաստանի նշված ինը քաղաքացիներին պատկանող, 14.864.040 ՀՀ դրամին համարժեք 27.000 եվրո գումարը։
Բացի այդ, Հայկ Վարդանյանը խարդախության եղանակով հափշտակություն կատարելու դիտավորությամբ Արիստակես Էդուարդի Քալաշյանին վստահեցրել է, որ ՀՀ ԱԱԾ համակարգում աշխատող իր ծանոթ բարձրաստիճան պաշտոնյաներին կաշառք տալու միջոցով նրան աշխատանքի կտեղավորի ՀՀ ԱԱԾ սահմանապահ զորքերի «Զվարթնոց» հսկիչ-անցագրային կետում։ Այդ պատրվակով նա Արիստակես Քալաշյանից պահանջել և 2013թ-ի հունիսի 20-ին ստացել է 1.231.230 ՀՀ դրամին համարժեք 3.000 ԱՄՆ դոլար գումար, որից անմիջապես հետո բռնվել է ՀՀ ԿԱ ԱԱԾ-ի աշխատակիցների կողմից։
Քրեական գործի նախաքննության ընթացքում, «Փորձաքննությունների ազգային բյուրո» պետական ոչ առևտրային կազմակերպությունում կատարվել է փաստաթղթաբանական և նյութագիտական համալիր փորձաքննություն, որի արժեքը կազմել է 192.360 /հարյուր իննսուներկու հազար երեք հարյուր վաթսուն/ ՀՀ դրամ գումար և փաստաթղթաբանական փորձաքննություն, որի արժեքը կազմել է 274.800/երկու հարյուր յոթանասունչորս հազար ութ հարյուր/ ՀՀ դրամ գումար։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Հայկ Վարդանյանը նախկինում դատված է եղել, վատառողջ է` տառապում է «Աջ աչք-տեսողությանսրություն` 0,2 չի կորեկցվում։ Խրոնիկական հետին ուվիետ։ Ձախ աչք-տեսողության սրություն` լուսազգացողությունը ոչ ճիշտ պրոյեկցիայով։ Խրոնիկական ուվեիտ, ցանցենու տոտալ, տրակցիոն շերտազատում, հետին ափսեանման կատարակտա։ Միզաքարային հիվանդություն, երիկամի քարեր, ավազ։ Սիմպտոմատիկ հիպերտոնիա» ախտորոշմամբ հիվանդությամբ, երկրորդ խմբի հաշմանդամ է։ Ամբաստանյալ Հայկ Վարդանյանի կատարած հանցագործություններից յուրաքանչյուրի համար պատիժ նշանակելիս` առկա է հանցագործությունների վտանգավոր ռեցիդիվ։

Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Հայկ Սուրիկի Վարդանյանի նախաքննական ցուցմունքներով այն մասին, որ առաջադրված մեղադրանքում իրեն մեղավոր է ճանաչում մասնակիորեն. ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով առաջադրված մեղադրանքում իրեն մեղավոր է ճանաչում, իսկ ՀՀ քրեական օրենսգրքի 178-րդ հոդվածի 3-րդ մասի 1-ին կետով առաջադրված մեղադրանքում իրեն մեղավոր չի ճանաչում։ Հնդկաստանի քաղաքացիների հետ հանդիպումներ չի ունեցել, նրանց հետ ոչ մի խոսակցություն չի վարել։ Նրանց կապը եղել է Արայիկի հետ։ Ի սկզբանե Արսենի ներկայությամբ ինքն Արայիկին ասել է, որ յուրաքանչյուր Հնդկաստանի քաղաքացու Եվրոպա ուղարկելու օրինական ամբողջ գործընթացը կարժենա վեց հազար եվրո, ինչի մեջ ներառվել է Փարիզ քաղաքի որևէ հյուրանոցում յոթից տասը օրվա բնակվելու վճարը, բժշկական ապահովագրության վճարը, Երևան-Փարիզ-Երևան երկկողմանի չվերթների տոմսերի վճարը, վիզայի ձեռք բերման համար նախատեսված օրինական վճարը և իր մատուցած ծառայության միջնորդավճարը։ Դրանից մի քանի օր հետո Արայիկն իրեն ասել է, որ մեկնողները վեց հազար եվրո գումարին համաձայն չեն։ Այդ խոսակցությանը ներկա է գտնվել նաև Արսենը։ Արայիկը նաև ասել է, որ մեկնողների համար պետք չէ արտերկրում հյուրանոցի և բժշկական ապահովագրության համար վճարել, անհրաժեշտ է միայն նրանց ուղարկել Ֆրանսիա։ Այնուհետև, մի երկու օր հետո, ինքը հանդիպել է Արայիկին ու Արսենին և տեղեկացրել է, որ յուրաքանչյուր մեկնողի համար երեք հազար եվրո գումար իրեն վճարելու դեպքում կարող է Հնդկաստանի քաղաքացիներին մեկ շաբաթից տաս օրվա ընթացքում ուղարկել Փարիզ։ Իր առաջարկին Արայիկը համաձայնվել է և իրեն է փոխանցել Հնդկաստանի և Նեպալի քաղաքացիների ինը հատ անձնագրերը, ինչպես նաև` երկուական լուսանկարներ։ Անձնագրերի հետ միասին տվյալ պահին Արայիկն իրեն գումար չի տվել։ Հետագայում Արայիկն իրեն է տվել տասնյոթ հազար եվրո գումար, իսկ տասը հազարը պահել է մոտը, որ իրեն տա օդանավակայանում, սակայն ինքը բռնվել է և այդ գումարը չի ստացել։ Ինքը ձեռք է բերել կեղծ վիզաներ, որպեսզի կարողանա Երևան-Փարիզ ինքնաթիռի չվերթի տոմսեր գնի, քանի որ տոմս վաճառողները հարցնում են շենգենյան երկրների մուտքի արտոնագրի առկայության մասին։ Ինքը չի պատրաստվել կեղծ վիզաներով այդ անձանց Եվրոպա ուղարկել, քանի որ տոմսերը գնելուց հետո ինքը պետք է կեղծ վիզաները անձնագրերից պոկեր և Երևան-Փարիզ-Դելի ինքնաթիռի տոմսերով տվյալ անձանց ուղարկեր Ֆրանսիա։ Մեկնելու օրն ինքը Հնդկաստանի և Նեպալի քաղաքացիներին պետք է բացատրեր, որ Փարիզ հասնելուն պես հանձնվեն Ֆրանսիայի միգրացիոն ծառայությանը որպես փախստականներ /ազուլ/։ Եթե մեկնողներն այդ պայմանին չհամաձայնվեին, ապա ինքը վերադարձնելու էր անձնագրերը և վերցրած գումարը։ Արայիկի հետ ինքը պայմանավորվել է, որ մեկնողների անձնագրերը վերադարձնի միայն մեկնման օրը օդանավակայանում` ուղևորների հաշվառման ժամանակ։ Ինքը խարդախության նպատակ չի ունեցել, Արայիկի և Արսենի հետ ունեցած նախնական պայմանավորվածության ոչ մի պայման չի խախտել, իրենց պայմանավորվածության երրորդ կամ չորրորդ օրը մեկ այլ գործով ձերբակալվել է, որն ընդհանրապես կապ չի ունեցել Հնդկաստանի և Նեպալի քաղաքացիներին Եվրոպա ուղարկելու գործընթացի հետ։ Բացի այդ, հաճախակի հեռախոսային խոսակցություններ ու հանդիպումներ է ունեցել Արայիկի և Արսենի հետ, նրանց խաբելու նպատակ չի ունեցել, եթե ինքը խաբելու նպատակ ունենար, ապա Հնդկաստանի և Նեպալի քաղաքացիների անձնագրերը իր մոտ չէր պահի։ Արայիկից ստացած գումարներից բաժին է հասել Արայիկին և Արսենին։ Հնդկաստանի և Նեպալի քաղաքացիների հետ ինքն անձամբ չի առնչվել, նրանցից գումարներ չի պահանջել և չի վերցրել, նրանց ընդհանրապես չի խաբել։ Չի եղել դեպք, որ ինչ-որ մեկին մեկնման կոնկրետ օր ասի և մեկնումը հետաձգի։ Ինքը պարզապես ասել է, որ մեկ օր առաջ կտեղեկացնի, որպեսզի մեկնողները պատրաստվեն։ Եթե 20.06.2013թ. ինքը չբռնվեր, ապա այդ անձանց կուղարկեր Եվրոպա իր նշած եղանակով։ Հնդկաստանի քաղաքացիներից մեկին անձնագրերը ցույց տալուց հետո Արայիկը նրան անգլերեն լեզվով բացատրել է, որ մեկնման վերաբերյալ ոչ ոքի նրանք չասեն, իր ասած տասը օրվա ընթացքում մեկնելու են։ Դրանից մեկ-երկու օր հետո, Արայիկի խնդրանքով, նրան պատկանող բջջային հեռախոսով հեռախոսազրույց է ունեցել Արամի հետ։ Արամն իրեն հարցրել է, թե Հնդկաստանի և Նեպալի քաղաքացիները երբ պետք է մեկնեն։ Ինքը պատասխանել է, որ Արայիկի հետ իրենք ինչ որ պայմանավորվել են, ինքը դրա տերն է, ոչ մի բան չի խաբել։ Իրենց միջև խարդախություն չի եղել։ Իր բռնվելուց մեկ օր առաջ ինքն Արտյոմ անունով իր ծանոթներից մեկին խնդրել է վերջինիս միջոցով Երևան-Փարիզ-Դելի չվերթի ինքնաթիռի տոմսեր ձեռք բերել, սակայն բռնվել է և այդ պատճառով չի հասցրել տոմսերը ձեռք բերել։ Արսենն ու Գագիկը ցանկացել են, որ Հնդկաստանի և Նեպալի քաղաքացիները շտապ մեկնեն Եվրոպա և երկուսն էլ օգուտ են ունեցել նրանց մեկնումից։
20.06.2013թ-ին գումար բերելու վերաբերյալ ինքը Արիստակես Քալաշյանի հետ չի պայմանավորվել, այդ ամենը նրան սովորեցրել են «Քանաքեռի» զորամասի զինծառայող ոմն Գագոն և ևս մի անձնավորություն, որն իրենց ընտանիքի հետ թշնամանք ունի։
Այն հարցին, թե ինչ նպատակով է կեղծ վիզաներ ցույց տվել Հնդկաստանի քաղաքացի Դավինդեր Կումարին` եթե որոշել էր ինքնաթիռի տոմսեր ձեռք բերելուց հետո դրանք պոկել անձնագրերից, Հայկ Վարդանյանը պատասխանել է, որ պարզապես Դավինդերն է ցանկացել տեսնել վիզաները։
2013թ-ի հունիսի 22-ին ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով և 34-325-րդ հոդվածի 1-ին մասով առաջադրված մեղադրանքում Հայկ Վարդանյանն իրեն լիովին մեղավոր ճանաչելով` պնդել է կասկածյալի կարգավիճակում տված ցուցմունքներն այն մասին, որ Արիստակես Էդուարդի Քալաշյանին ճանաչել է և նրան դիմել է Արսեն անունով։ Նրա հետ ծանոթացել է իր ծանոթներից մեկի միջնորդությամբ։ Մեկ-մեկուկես ամիս առաջ իրենք հանդիպել են։ Հանդիպման ժամանակ նա իրեն հայտնել է, որ ցանկանում է աշխատանքի ընդունվել ՀՀ ԱԱԾ Սահմանապահ զորքերի «Զվարթնոց» օդանավակայանի հսկիչ անցագրային կետում և իրեն հարցրել է, թե արդյոք ինքը կարող է նրան օգնել։ Ինքը պատասխանել է, որ այդ հարցը կարող է կարգավորել 3.000 ԱՄՆ դոլարի դիմաց։ Արսենին ասել է, որ ինքը նախկինում աշխատել է ազգային անվտանգության ծառայությունում և այդ համակարգում շատ ծանոթներ ունի, հեշտությամբ կարող է նրա հարցը լուծել նշված գումարով։ Իրականում ինքը 3.000 ԱՄՆ դոլարի չափով պարտք է ունեցել և պարտքը փակելու համար որոշել է Արսենից այդ գումարը վերցնել` իր անձնական կարիքները հոգալու համար։ Ինքը չի պատրաստվել որևէ գործողություն անել նրան աշխատանքի տեղավորման ուղղությամբ։ Պարզապես, օգտվելով Արսենի միամտությունից` որոշել է այդ գումարը նրանից վերցնել և ծախսել։ Ինքը Ազգային անվտանգության ծառայության ոչ մի աշխատակցի չի պատրաստվել դիմել Արսենի հարցով։ Բացի այդ, մտածել է, որ մի որոշ ժամանակ անց, երբ իր ձեռքին գումար կլինի` Արսենի գումարը կվերադարձնի և կասի իբրև թե գործը չի ստացվել։ Արսենի հետ հանդիպման ժամանակ, երբ Արսենին ասել է, որ նրան աշխատանքի տեղավորելու հարցը 3000 ԱՄՆ դոլարով կարող է լուծել` Արսենը տվյալ պահին իրեն պատասխան չի տվել և ասել է, որ կմտածի ու կասի։ Դրանից հետո Արսենն իր հետ կապնվել է հունիս 20-ին և պետք է գումարը տար իրեն։ Արսենի հետ ինքը հանդիպել է Մարգարյանի անվան հիվանդանոցի շենքին կից տարածքում և նրան ասել է, որ գումարը դնի իր ավտոմեքենայի մեջ, որն այդ պահին կայանված է եղել այդ հատվածում` Արամի փողոցի վրա։ Արսենը գումարը դրել է իր ավտոմեքենայի մեջ և իրեն հրաժեշտ տալուց հետո գնացել է։ Ավտոմեքենա նստելու պահին Ազգային անվտանգության ծառայության աշխատակիցներն իրեն բռնել են։ ՀՀ ԱԱԾ Սահմանապահ զորքերի աշխատակիցներից ոչ ոքի ինքը չի ճանաչում։
Դատարանում ամբաստանյալ Հայկ Վարդանյանը ցուցմունք տվեց այն մասին, որ 2013թ. մարտ ամսին ծանոթացել է «Քանաքեռ» զորամասի զինծառայող Գագիկ Աբրահամյանի հետ, հետո խուսափել է հանդիպել նրան։ Մեկ ամիս անց նա անընդհատ զանգել, խնդրել է աշխատանքի հարցով օգնել իր մտերիմին։ Այնուհետև եկել է Քալաշյանը, խոսել, համարյա հիպնոսացրել է իրեն։ Ինքը պարզաբանել է աշխատանքի ընդունման պայմանները։ Ինքն ընդունում է, որ գումար է վերցրել, բայց գումար չի պահանջել։ Քալաշյանը գումարը բերել է իր հայեցողությամբ։ Գագիկ Աբրահամյանը Քանաքեռի զորամասի աշխատող է, ԱԱԾ-ի գործակալ։ Նա Ստյոպայի գործակալն է, որի որդին է հայտարարությունը վերցրել։ Սա Ստյոպայի հետ իրենց թշնամության արդյունքն է։ Ինքն Արայիկի հետ ծանոթացել է Արսենի միջոցով։ Արայիկը ասել է` հնդիկներ կան, որոնց Եվրոպա ուղարկելը չի ստացվում։ Ինքն էլ ասել է` օրինական ճանապարհով ուղարկելը «Էս գինն» Է։ Վիզաները կեղծվել են` տոմս գնելու համար։ Ինքը վիզաները անձամբ չի կեղծել, դրանք կեղծել է տվել։ Իրեն Արայիկը տվել է 6000 եվրո, որից 1800 եվրոն Արսենը վերցրել է։ Հետո Արայիկը բերել է 21.000 եվրո, Արսենը ուզել է ևս 2000 եվրո, որը ինքը տվել է նրան։ Գագիկն իրենից ուզել է 10.000 եվրո, ինքն էլ տվել է, քանի որ նա «չիպս»-ի արտադրամասի հետ կապված խնդիրներ ուներ։ Ինքը հետո իմացել է, որ Արսենը Արայիկից, այսինքն` Գագիկից նույնպես գումար է ստացել։ Ինքը Հնդկաստանի և Նեպալի քաղաքացիների հետ անձամբ չի առնչվել, նրանցից գումարներ չի պահանջել և չի վերցրել, նրանց հետ որևէ պայմանավորվածություն չի ունեցել։ Մի հնդիկ քաղաքացի եկել, նայել է վիզաները և գնացել է։ Չի ցանկանում ասել, թե ինչպես էր նրանց Եվրոպա ուղարկելու, սակայն Գարիկը, Արամը և Ռավի Դուտտը լավ գիտեին, որ օրինական կարգով նրանց չէր ուղարկելու, նրանք դեսպանատուն չէին մտնելու։ Արամը և մյուսները չեզոք չեն եղել և նրանք գումարի համար են արել ամեն ինչ։ Մյուսների հետ կապ չի ունեցել։ Գագիկն է իրեն առաջարկել, որ վիզաները ցույց տա հնդիկներին։ Արսենի շահույթը 3800 եվրո է եղել, որը տվել է։ Գագիկի շահույթը կազմել է 600 եվրո, որը տվել է։ Գագիկ Աբրահամյանը նախաքննության ընթացքում տվել է սուտ ցուցմունքներ։ Նա տեղյակ է եղել, որ անօրինական ճանապարհով են մեկնելու։ Նա գումարներ է տվել նաև Արսենին։ Ինքը նույնպես Արսենին գումար է տվել։ Առերեսման ժամանակ Գագիկն ընդունել է, որ 10 օրվա ընթացքում պիտի գնային։ Գագիկը մինչև առերեսումը խնդրել է իր դեմ ցուցմունք չտալ, ինքն էլ ասել է, որ չի իմացել, որ վիզաները կեղծ են։
/դատական նիստի արձանագրություն, հատոր 1, գ.թ. 51, 77-79, 293-295, հատոր 2, գ.թ. 34, հատոր 3, գ.թ. 145, 248, հատոր 4, գ.թ. 5, 67, 124-126, 165, 178-183 /
Տուժող Արիստակես Էդուարդի Քալաշյանի ցուցմունքներով այն մասին, որ աշխատել է որպես տաքսու վարորդ։ 2013 թվականի ապրիլին ցանկացել է աշխատանքի ընդունվել ՀՀ ԱԱԾ մարմիններում կամ էլ ՀՀ ոստիկանությունում։ Այդ կապակցությամբ խոսել է իր մի շարք ծանոթների հետ։ Իր ծանոթներից Գևորգն իրեն ասել է, որ ԱԱԾ-ում աշխատելու հնարավորություն կա, քանի որ նրա ծանոթ Հայկը կարող է օգնել այդ հարցում։ Դրանից հետո իրեն զանգահարել է Հայկ անունով մի տղամարդ։ 2013 թվականի հունիսին հանդիպել են Հայկի հետ վերջինիս ասած վայրում և նրա ավտոմեքենայի մեջ զրուցել են։ Հայկն առաջարկել է տարբերակներ և նշել, որ 10.000 ԱՄՆ դոլարի դիմաց աշխատանքի կարող է տեղավորել «Գոգավանում» որպես օպերատիվ գծով պետի տեղակալ, ինչի համար անհրաժեշտ է բարձրագույն կրթության դիպլոմ, իսկ 3.000 ԱՄՆ դոլարի դիմաց կարող է «Զվարթնոց» օդանավակայանում տեղավորել աշխատանքի որպես սահմանապահ։ Ինքը Հայկին հայտնել է, որ ցանկանում է «Զվարթնոց» օդանավակայանում անցնել աշխատանքի որպես սահմանապահ, քանի որ բարձրագույն կրթության դիպլոմ չունի։ Վստահելով Հայկի տված խոստումներին` համաձայնվել է 3.000 ԱՄՆ դոլար գումարի դիմաց ՀՀ ԱԱԾ սահմանապահ զորքերի «Զվարթնոց» օդանավակայանի սահմանային անցակետում աշխատանքի ընդունվելու տարբերակին։ Քանի որ ինքը ցանկություն է ունեցել աշխատանքի ընդունվել ՀՀ ԱԱԾ մարմիններում առանց որևէ մեկի գումար տալու` մտածել է, որ ԱԱԾ մարմիններում նման երևույթ դժվար թե լինի։ Այդ պատճառով նշվածի վերաբերյալ դիմել է ազգային անվտանգության ծառայությանը և ներկայացրել հաղորդում` Հայկ Վարդանյանի անօրինական գործողությունների վերաբերյալ։ Այնուհետև ԱԱԾ աշխատակիցներն իրեն հայտնել են, որ պետք է համապատասխան օպերատիվ-հետախուզական միջոցառումներ անցկացնեն Հայկ Վարդանյանի անօրինական գործողությունը կասեցնելու նպատակով։ 2014 թվականի հունիսի 20-ին ԱԱԾ աշխատակցներն իրեն տվել են 3.000 ԱՄն դոլար, որից հետո ինքը հեռախոսազանգով Հայկի հետ պայմանավորվել և նույն օրը, ժամը 10։00-ի սահմաններում, Երևան քաղաքի Մաշտոցի պուրակում հանդիպել է նրա հետ, տեղեկացրել է, որ նրա ասած գումարն ինքը բերել է։ Հայկն իրեն ասել է, որ ինքը գումարը դնի մոտակայքում կայանված նրա ավտոմեքենայի մեջ։ Ինքը գումարը դրել է ավտոմեքենայի «բարդաչոկում» և ավտոմեքենայից դուրս է եկել։ Հայկն ասել է, որ ինքը պատրաստի իր անձնագիրը, զինգրքույկը, դպրոցի և ուսումնարանի ատեստատները և զանգահարի նրան` գործին ընթացք տալու համար։ Հայկը նաև իրեն ասել է, որ ինքը կարող է չանհանգստանալ, գործը մեկ-երկու ամսից կլինի։ Այնուհետև Հայկի հետ պայմանավորվել է փաստաթղթերը փոխանցելու նպատակով կրկին հանդիպել և հեռացել է նրա մոտից։ Աշխատանքի ընդունվելու հարցով Հայկ Վարդանյանին դիմելու վերաբերյալ Գևորգից բացի այլ անձի հետ ինքը չի զրուցել։ Քանաքեռի զորամասի զինծառայող Գագո անունով անձի ինքը չի ճանաչում, վերջինիս կամ մեկ այլ անձի կողմից իրեն Հայկի վերաբերյալ ոչինչ չի ասվել, նման անձինք իրեն Հայկի մոտ չեն ուղարկել։
/դատական նիստի արձանագրություն, հատոր 1, գ.թ. 72-74, հատոր 4, գ.թ. 197/
Տուժող Սատիշ Բավայի Կումարի նախաքննական ցուցմունքներով այն մասին, որ Հայաստան է ժամանել 2013թ-ի հունվարի 26-ին։ Փետրվարին ինքն ու իր հայրենակից Ռամանդիփ Կումարը Երևան քաղաքում ծանոթացել են ազգությամբ հնդիկ Ռավի Դուտտի հետ։ Վերջինս իրենց առաջարկել է յուրաքանչյուրի կողմից 8.500 եվրո գումար վճարելու դեպքում կազմակերպել օրինական վիզաներով նրանց մեկնումը Եվրոպա։ Իրենք որոշել են գնալ Եվրոպա և փորձել այնտեղ աշխատանք գտնել, ինչի վերաբերյալ զանգահարել և համաձայնեցրել են իրենց ծնողների հետ, քանի որ նրանք պետք է վճարեին։ Պայմանավորվածության համաձայն, իրենց ծնողները ընդհանուր առմամբ 17.000 եվրո գումար են Հնդկաստանում տվել Ռավի Դուտտի ասած մարդուն, որն էլ այդ գումարները, փետրվարի 25-ի դրությամբ, ուղարկել է Հայաստան` Ռավի Դուտտին։ Փետրվար ամսին իրենց անձնագրերն իրենք տվել ենք Ռավի Դուտտին։ Մայիս ամսին Ռավի Դուտտն իրենց տեղեկացրել է, որ սպասում է Հնդկաստանից մի խումբ անձանց Հայաստան ժամանելուն, որպեսզի նրանց հետ իրենց ուղարկի Եվրոպա։ Մայիս-հունիս ամիսներին Հնդկաստանից Հայաստան են ժամանել Կուլվիրը, Կուլդիփը, Լախվինդերը, Ջասվինդերը և Դավինդերը, որոնց հետ իրենք ծանոթացել են Հայաստանում։ Բացի իրենցից` Ռավի Դուտտը խոստացել է Եվրոպա ուղարկել նաև Նեպալի չորս քաղաքացիների, որոնցից նույնպես գումարներ է վերցրել։ Հունիսի սկզբին Ռավի Դուտտը մեկնել է քաղաք Դուբայ, իսկ նախքան մեկնելն իրեն ծանոթացրել է Արամ անունով մի հայ տղայի հետ և իր ներկայությամբ փոխանցել իրենց անձնագրերը` ասելով, որ Արամն է Հայաստանում զբաղվելու իրենց համար վիզաներ ստանալու և իրենց Եվրոպա ուղարկելու հարցերով։ Հունիսի 13-ին Ռավի Դուտտը Դուբայից զանգահարել է իրեն և տեղեկացրել, որ վիզաները պատրաստ են։ Հունիսի 14-ին Դավինդեր Կումարը ոմն Գագոյի հետ գնացել, Հայկ անունով մի տղամարդու մոտ տեսել է իրենց վիզաները և լուսանկարել դրանք։ Ռավի Դուտտը հունիսի 15-ին զանգահարել է իրեն և ասել, որ հունիսի 17-ին պատրաստ լինեն մեկնելու օդանավակայանից։ Հունիսի 17-ին Ռավի Դուտտը կրկին զանգահարել է իրեն և ասել, որ որոշակի խնդիրների պատճառով իրենց մեկնումը հետաձգվել է։ Մի քանի օր հետո Ռավին նորից զանգահարել է և ասել, որ այն մարդիկ, ովքեր իրենց Եվրոպա մեկնելու հարցերով են զբաղվել, ոստիկանության աշխատակիցների կողմից բռնվել են և իրենց անձնագրերը հայտնվել են ոստիկանությունում։ Նույն բանն իրենց տեղեկացրել են Արամն ու Ռավիի կինը` Գրետան, ասելով, որ պարզվել է` վիզաները կեղծ են եղել, ինչի մասին իրենք չեն իմացել։
/հատոր 1 գ.թ. 188-190, հատոր 2, գ.թ. 6-10/
Տուժող Դավինդեր Ամրիկի Կումարի նախաքննական ցուցմունքներով այն մասին, որ ինքն ու Հնդկաստանի մյուս վեց քաղաքացիները Հայաստան են ժամանել` Եվրոպա մեկնելու նպատակով։ Հնդկաստանում 2013 թվականի ապրիլ կամ մայիս ամսին ծանոթացել է Կումալ Դինի հետ, ով իրեն հայտնել է, որ Հայաստանում գտնվող նրա ծանոթ Ռավի Դուտտը կարող է 700.000 հնդկական ռուպիի դիմաց իրեն Հայաստանից ուղարկել Եվրոպա։ Պայմանավորվածություն ձեռք բերելով այդ անձի հետ` նախապես Հնդկաստանում նրան է տվել 200.000 ռուպի և նրա կողմից գնված տոմսերով 2013թ-ի մայիսի 31-ին ժամանել է Հայաստան։ Այնուհետև, իր ծնողները Հնդկաստանից Ռավիի կամ նրա կնոջ անվամբ բանկային փոխանցումով Հայաստան են ուղարկել մնացած 500.000 հնդկական ռուպպին։ Հայաստան գալուց հետո Ռավին անմիջապես իրենից վերցրել է իր անձնագիրը։ Նա Եվրոպա ուղարկելու խոստում է տվել Հնդկաստանի ևս վեց և Նեպալի 2 քաղաքացիների, ինչի համար նրանցից նույնպես գումարներ է ստացել։ Իր անձնագիրը վերցնելուց մի քանի օր հետո Ռավին մեկնել է ք. Դուբայ, իսկ նախորդ օրը Ռավին իրենց բոլորի անձնագրերը Սատիշի ներկայությամբ տվել է Արամին և ասել, որ Արամն է զբաղվելու վիզաների հարցով։ Ռավիի մենելուց մի որոշ ժամանակ հետո Արամը Սատիշին ասել է, որ վիզաները պատրաստ են։ Հունիսի 14-ին Արամի և Գագո անունով մի տղայի միջոցով ինքը գնացել, Հայկ անունով մի մարդու մոտ տեսել և բջջային հեռախոսի ֆոտոխցիկով լուսանկարել է իրենց անվամբ պատրաստված ինը հատ վիզաները` անձնագրերում փակցված։ Այնուհետև, Արամը Ռավիի կնոջ միջոցով կապնվել է իրեց հետ և տեղեկացրել, որ իրենց մեկնումը պլանավորվել է հունիսի 17-ին Զվարթնոց օդանավակայանից։ Նույն բանը Ռավի Դուտտն է Դուբայից զանգահարել և իրենց ասել, սակայն այդպես էլ իրենց մեկնումը չի հաջողվել, քանի որ հետագայում պարզվել է, որ վիզաները կեղծ են։ Իրենցից ոչ ոք չի իմացել, որ վիզաները պետք է կեղծվեին։
/հատոր 1, գ.թ. 154-158, 260-262/
Տուժող Կուլվիր Մակհանի Սինգհի նախաքննական ցուցմունքներով այն մասին, որ 2013 թվականի ապրիլին Հնդկաստանում ծանոթացել է Կումալ Դինի հետ։ Վերջինս իրեն խոստացել է 700.000 հնդկական ռուպիի դիմաց իրեն ուղարկել Հայաստան, որտեղից նրա ծանոթների միջոցով իր համար ձեռք բերելով օրինական վիզա` ուղարկել Եվրոպա։ Հնդկաստանում Կումալ Դինին նախապես վճարելով 200.000 հնդկական ռուպի` 2013 թվականի հունիսի 3-ին ժամանել է Հայաստան, որտեղ իրեն դիմավորել է ազգությամբ հնդիկ Ռավի Դուտտը։ Հայաստանում են գտնվել նաև Հնդկաստանի քաղաքացիներ Ջասվինդեր Սինգհը, Կուլդիփ Սինգհը, Լախվինդեր Կումարը և Դավինդեր Կումարը, որոնք նույպես պետք է մեկնեին Եվրոպա։ Ծանոթացել է նաև Հնդկաստանի ևս երկու քաղաքացիների` Ռամանդիփի և Սատիշի հետ, որոնցից տեղեկացել է, որ նրանք նույնպե սպասում են Եվրոպա մեկնելուն։ Ռավի Դուտտն իրենց ասել է, որ վիզաներն օրինական են լինելու և իրենք օրինական ճանապարհով մեկնելու են Ֆրանսիա։ Նա իրենցից վերցրել է իրենց անձնագրերը և լուսանկարները։ Իր` Հայաստան ժամանելուց մոտ 10-12 օր հետո, Սատիշն ու Դավինդերը Արամ անունով անձնավորության հետ գնացել են ինչ-որ տեղ և հեռախոսի տեսախցիկով լուսանկարել իրենց բոլորի անձնագրերում եղած վիզաները։ Դա արվել է այն բանի համար, որ իրենք համոզվեն, որ վիզաներն արդեն պատրաստ են։ Վիզաները պատրաստ լինելուց հետո, ինքը զանգահարել է Հնդկաստանում բնակվող իր մորը և վերջինս մնացած 500.000 հնդկական ռուպին տվել է Ռավիի քրոջը, ով բնակվում է Դելի քաղաքում, սակայն, այդպես էլ իրենց մեկնումը չի հաջողվել։
/հատոր 1, գ.թ. 179-181, 287-288/
Տուժող Լախվինդեր Հեմ Ռաջի Կումարի նախաքննական ցուցմունքներով այն մասին, որ ցանկացել է մեկնել Եվրոպա`այնտեղ բնակություն հաստատելու համար։ Հնդկաստանում ծանոթացել է Կումալ Դինի հետ։ Վերջինս իրեն ասել է, որ Հայաստանում բնակվող ազգությամբ հնդիկ Ռավի Դուտտը 700.000 հնդկական ռուպիի դիմաց կարող է կազմակերպել Հայաստանից Եվրոպա իր մեկնումը։ 200.000 հնդկական ռուպի Հնդկաստանում նախապես տալով Կումալ Դինին, 2013 թվականի հունիսի 29-ին վերջինիս կողմից գնված ինքնաթիռի տոմսով ժամանել է Հայաստան։ Այնուհետև տեղեկացել է, որ Հայաստանում են գտնվում նաև Նեպալի երկու քաղաքացիներ, ում Ռավի Դուտտը նույնպես խոստացել է իր և Հնդկաստանի ևս վեց քաղաքացիների հետ միասին ուղարկել Եվրոպա, որոնցից նույնպես գումարներ է վերցրել։ Հայաստան ժամանելուց անմիջապես հետո Ռավի Դուտտը վերցրել է իրենց անձնագրերը։ Հունիսի սկզբներին Ռավին մեկնել է քաղաք Դուբայ, իսկ նախքան մեկնելը անձնագրերը փոխանցել է Արամ անունով անձի և իրենց ասել է, որ նա է զբաղվելու վիզաների ձեռք բերման հարցերով։ Ռավիի մեկնելուց մի քանի օր հետո նա իրենց հայտնել է, որ վիզաները պատրաստ են։ Դավինդերը գնացել և անձամբ տեսել է իրենց անվամբ վիզաները։ Այնուհետև Ռավի Դուտտն իրենցից պահանջել է տալ մնացած գումարները, և իր մայրը մնացած 500.000 հնդկական ռուպին փոխանցել է Ռավիի` Դելի քաղաքում բնակվող քրոջը։ Ռավին իրենց ասել է, որ պատրաստ լինեն հունիսի 17-ին «Զվարթնոց» օդանավակայանից Ֆրանսիա մենելու համար։ Դրանից հետո Ռավին իրենց ասել է, որ ինչ-որ խնդիրների պատճառով մեկնումը հետաձգվել է։ Իրենց մեկնումն այդպես էլ չի ստացվել, քանի որ հետագայում պարզվել է, որ վիզաները կեղծ են եղել։ Կեղծիքի մասին իմացել են միայն այն ժամանակ, երբ անձնագրերը հայտնաբերվել են իրավապահների կողմից։ Իրենք չեն իմացել կեղծիքի մասին և չեն ցանկացել անօրինական ճանապարհով մեկնել Ֆրանսիա։ Դավինդերից լսել է, որ իրենց վիզաների հարցերով զբաղվել են նաև Գագո և Հայկ անուններով անձինք։
/հատոր 1, գ.թ. 263-267/
Տուժող Ջասվինդեր Մանջիթի Սինգհի նախաքննական ցուցմունքներով այն մասին, որ ցանկացել է մենել Ֆրանսիա։ 2013 թվականի մայիս ամսին Հնդկաստանում ծանոթացել է Կումալ Դինի հետ։ Վերջինս առաջարկել է կազմակերպել իր` Ֆրանսիա մեկնումը Հայաստանով, ինչի դիմաց պահանջել է 700.000 ռուպպի գումար` բացատրելով, որ Հայաստանում իր համար պետք է ձեռք բերվի օրինական վիզա։ Հնդկաստանում Կումալ Դինին նախապես տալով 200.000 հնդկական ռուպի, վերջինիս կողմից գնված ինքնաթիռի տոմսով 2013 թվականի մայիսի 29-ին օդանավով ժամանել է Հայաստան, որտեղ իրեն դիմավորել է ազգությամբ հնդիկ Ռավի Դուտտը։ Հայաստանում են գտնվել Հնդկաստանի ևս վեց քաղաքացիներ, որոնց Ռավի Դուտտը նույնպես պետք է ուղարկեր Եվրոպա։ Ռավի Դուտտն իրենց ասել է, որ վիզաներն օրինական են լինելու։ Նա իրենցից վերցրել է անձնագրերն ու լուսանկարներ։ Հայաստան ժամանելուց մոտ 15 օր հետո, Սատիշն ու Դավինդերը Արամ անունով անձնավորության հետ գնացել են ինչ-որ տեղ և հեռախոսի ֆոտոխցիկով լուսանկարել են իրենց բոլորի անձնագրերում եղած վիզաները, որպեսզի իրենք համոզվեն, որ վիզաները պատրաստ են։ Վիզաները պատրաստ լինելուց հետո ինքը զանգահարել է Հնդկաստանում բնակվող իր հորեղբորը և վերջինս մնացած 500.000 հնդկական ռուպին Հնդկաստանում փոխանցել է Ռավի Դուտտի քրոջը։ Հետագայում իրենք տեղեկացել են, որ իրենց անձնագրերում փակցված վիզաները կեղծ են։ Թե կոնկրետ ովքեր են կեղծել իրենց վիզաներն` ինքը չգիտի։ Ինքը չի իմացել, որ իր մեկնումը պետք է կազմակերպվեր կեղծ վիզայով։ Այլապես չէր համաձայնվի գալ Հայաստան ու չէր վճարի նման գումար։
/հատոր 1, գ.թ. 239-243, 289-290/
Տուժող Ռամանդիփ Տարսեմի Կումարի նախաքննական ցուցմունքներով այն մասին, որ Հայաստան է եկել 2013թ-ի հունվարի 16-ին։ Ֆրանսիա մեկնելու նպատակով իր անձնագիրը 2013թ-ի հունիս ամսին Երևանում տվել է Հնդկաստանի քաղաքացի Դավինդեր Կումարին` Ֆրանսիա մեկնելու նպատակով վիզա ձեռք բերելու համար։ Վերջինս իր հետ միասին պետք է մեկներ ֆրանսիա։ Իրենց հետ Ֆրանսիա պետք է մեկնեին Հնդկաստանի ևս 5 քաղաքացիներ և Նեպալի 2 քաղաքացիներ։ Ինքը մեկնելու համար վճարել է 3.000 եվրո գումար, սակայն մեկնումը չի հաջողվել, քանի որ վիզաները կեղծ են եղել։ Ինքը չի իմացել, որ վիզան կեղծ պետք է լիներ, ցանկացել է մեկնել Եվրոպա օրինական ճանապարհով։
/հատոր 1, գ.թ. 182-187/
Տուժող Կուլդիփ Ռաշպալի Սինգհի նախաքննական ցուցմունքներով այն մասին, որ որոշել է մեկնել Ֆրանսիա, որպեսզի այնտեղ աշխատանք գտնի և մշտական բնակություն հաստատի։ Հնդկաստանում Կումալ Դինն իրեն ասել է, որ իրեն կարող է Ֆրանսիա ուղարկել Հայաստանով` նշելով, որ նախ իրեն կուղարկի Հայաստան, որտեղ կլուծի Ֆրանսիայի մուտքի արտոնագիր ձեռք բերելու հարցը, իսկ այնուհետև կուղարկի Ֆրանսիա։ Ինքը համաձայնվել է Կումալ Դինի առաջարկին։ Իրեն Եվրոպա ուղարկելու գործընթացի համար Կումալ Դինին վճարելու հարցով նրա հետ խոսել է իր տատիկ Կլաշ Կորը։ Հնդկաստանում Կումալ Դինն իրեն ասել է, որ Հայաստանում իրեն կտան օրինական վիզա, որով ինքը Հայաստանից կմեկնի Ֆրանսիա։ Եթե ինքը իմանար, որ Հայաստանից պետք է Ֆրանսիա մեկնի կեղծ վիզայով, ապա չէր համաձայնվի Կումալ Դինի առաջարկին։ Վերջինիս իր տատիկը Հնդկաստանում վճարել է 200.000 հնդկական ռուպպի, իսկ հետագայում` ևս 3.000 եվրո, որը Կումալ Դինն ուղարկել է Հայաստան` Ռավի Դուտտին։ Բացի այդ 1.000 ԱՄՆ դոլար գումար ինքը իր հետ Հնդկաստանից բերել է Հայաստան, որից 900 ԱՄՆ դոլարը իր անձնագրի հետ փոխանցել է Ռավի Դուտտին, քանի որ Կումալ Դինն իրեն ասել է, որ Ռավի Դուտտն է Հայաստանում լուծելու բոլոր հարցերը։ Հայաստանում գտնվելու ժամանակ Դավինդեր Կումարը, որը նույնպես Հայաստանից պետք է մեկներ Ֆրանսիա, հանդիպել է ինչ-որ մարդկանց հետ և հեռախոսի տեսախցիկով լուսանկարել է իրենց վիզաները։
/հատոր 1, գ.թ. 244-248, 268-269/
Տուժող Նիշան Ման Բահադուրի Կարկիի նախաքննական ցուցմունքներով այն մասին, որ իր հայրենակիցներ Կարկի Սուդհիրի, Լաքշման Նիրոլայի և Արջուն Ռեգմիի հետ չորս ամիս սովորել է Երևանի պետական ճարտարագիտական համալսարանումի զրոյական կուրսում։ 2012թ-ի դեկտեմբեր ամսին ազգությամբ հնդիկ Ռավի Դուտտը Երևան քաղաքում առաջարկել է ուսումը շարունակելու համար իրենց ուղարկել Եվրոպա, ինչի համար յուրաքանչյուրից պահանջել է 5.000-ական եվրո գումար։ Իմ ծնողների հետ հեռախոսով խոսելուց հետո համաձայնվել է Ռավիի առաջարկին, ինչի համար իր ծնողներից գումար է ստացել և 2012թ-ի դեկտեմբերին 3.000 եվրո գումար է փոխանցել Ռավիի բանկային հաշվին, իսկ հետագայում Ռավիին է տվել մնացած 2.000 եվրո գումարը։ Կարկիի Սուդհիրը, Լաքշման Նիրոլան և Արջուն Ռեգմին նույնպես գումարներ են տվել Ռավի Դուտտին։ Իրենց տված գումարների դիմաց Ռավի Դուտտը խոստացել է կազմակերպել օրինական վիզաներ ձեռք բերում և իրենց մեկնումը Եվրոպա։ Հայաստանում են գտնվել Դավինդեր Կումարը և Հնդկաստանի ևս վեց քաղաքացիներ, որոնք, ըստ Ռավիի խոսքերի, իրենց հետ պետք է մեկնեին Եվրոպա։ Ռավիի կնոջից` Գրետայից տեղեկացել է, որ իր և Կարկի Սուդհիրի անձնագրերում կեղծ վիզաներ են դրվել այն անձանց կողմից, ում Ռավին տվել է անձնագրերը` օրինական վիզաներ ձևակերպելու համար։ Իրենք կեղծ վիզաների մասին չեն իմացել։ Ռավին իրենց ասել է, որ ձեռք կբերի օրինական վիզաներ։ Առ այսօր Ռավի Դուտտի վերցրած գումարները իրենց ետ չեն վերադարձվել։
/հատոր 2, գ.թ. 42-46/
Տուժող Սուդհիր Նարայան Բահադուր Կարկիի նախաքննական ցուցմունքներով այն մասին, որ 2012թ-ի հոկտեմբերի 7-ին Կարկի Նիշանի հետ եկել է Հայաստան՝ Երևանի պետական ճարտարագիտական համալսարանում սովորելու նպատակով։ Երևանի պետական ճարտարագիտական համալսարանում սովորել են շուրջ չորս ամիս՝ 2012թ-ի հոկտեմբերի 15-ից մինչև 2013թ֊ի հունվարի վերջերը։ Իր և Կարկի Նիշանի հետ նույն ԲՈԻՀ-ում սովորել են նաև իրենց հայրենակիցներ Լաքսման Նիրոլան և Արջուն Ռեգմին։ Երևան քաղաքում ազգությամբ հնդիկ Ռավի Դուտտը 2012թ-ի դեկտեմբեր ամսին իրենց առաջարկել է ուսումը արտերկրում շարունակելու համար օրինական վիզաներով իրենց ուղարկել Եվրոպա, ինչի դիմաց յուրաքանչյուրից պահանջել է 5.000 եվրո գումար։ Ինքը համաձայնվել է և Երևան քաղաքում երկու մասով` մինչև 2013 թվականի փետրվար ամիսը Ռավի Դուտտին է տվել ընդհանուր 5.000 եվրո գումար։ Նեպալի մյուս 3 քաղաքացիները նույնպես համաձայնվել են Ռավիի առաջարկին և նրան նույնպես գումարներ են տվել։ Վերջինս իրենց ասել է, որ իրենց համար ձեռք կբերվեն օրինական վիզաներ։ Հետագայում Ռավիի կինը` Գրետան, իրեն և Կարկի Նիշանին ասել է, թե մարդիկ, ում հետ Ռավի Դուտտը համագործակցել է, խաբել են վերջինիս, քանի որ իրենց անձնագրերում կեղծ վիզաներ են դրվել և իրենց անձնագրերը հայտնվել են իրավապահ մարմնի աշխատակիցների մոտ։ Տեղյակ է, որ Հայաստանում են գտնվում Հնդկաստանի յոթ քաղաքացիներ, ովքեր, ըստ Ռավիի խոսքերի, իրենց հետ պետք է մեկնեին Եվրոպա, սակայն նրանք նույնպես հայտնվել են իրենց վիճակում, քանի որ նրանց անձնագրերում նույնպես դրվել են կեղծ վիզաներ։ Իրենք կեղծ վիզաների մասին չեն իմացել։ Ռավի Դուտտն իրենց ասել է, որ իրենց համար ձեռք կբերի օրինական վիզաներ, և իրենք օրինական կարգով կմեկնեն Եվրոպա։
/հատոր 2, գ.թ. 103-107/
Վկա Արամ Աշոտի Գեղամյանի ցուցմունքներով այն մասին, որ իր ծանոթ, Հնդկաստանի քաղաքացի Ռավի Դուտտը 2013 թվականի հունիսի սկզբին, Դուբայ մեկնելուց առաջ իրեն խնդրել է, որ օգնի Հնդկաստանի և Նեպալի որոշ քաղաքացիների, որպեսզի տուրիստական ինչ-որ կազմակերպությունների միջոցով մեկնեն Եվրոպա, մասնավորապես` Ֆրանսիա։ Ինքը կապնվել է իր ծանոթ Գագիկ Աբրահամյանի հետ, նրանից հետաքրքրվել, թե արդյոք նա կարող է օգնել Հնդկաստանի քաղաքացիներին Եվրոպա ուղարկելու հարցում, քանի որ իմացել է, որ նրա կինը Երևանում ունի ուսումնական կենտրոն, որը համագործակցում է արտերկրի մի շարք բուհերի հետ։ Մտածել է, որ հնարավոր կլինի այդ կենտրոնի միջոցով օրինական կարգով նշված անձանց ուղարկել Եվրոպա։ Գագիկն իրեն պատասխանել է, որ ուսումնական կենտրոնը նման հարցերով չի զբաղվում, սակայն խոստացել է, որ կհետաքրքրվի իր ծանոթներից և կասի, թե ինչ է հնարավոր անել։ Ապա Գագիկն իրեն ասել է, որ մարդիկ կան, որ կարող են Հնդկաստանի և Նեպալի քաղաքացիներին օգնել օրինական կարգով մեկնել Եվրոպա և յուրաքանչյուր մեկնողից պահանջվում է 7.000 եվրո գումար։ Այդ մասին ինքը հայտնել է Ռավիին, ով գումարի չափի հետ չի համաձայնվել և ասել է, որ այն շատ թանկ է, յուրաքանչյուր մեկնողի համար կարող է վճարել առավելագույնը 3.000 եվրո գումար։ Այդ մասին ինքն ասել է Գագիկին` միաժամանակ հայտնելով, որ մեկնողների համար արտերկրում հյուրանոց վարձել պետք չէ, անհրաժեշտ է միայն նրանց ուղարկել Եվրոպա։ Գագիկը խոսել և պայմանավորվել է այն անձանց հետ, ովքեր պետք է կազմակերպեին Հնդկաստանի և Նեպալի քաղաքացիների մեկնումը Եվրոպա, որից հետո, իրեն տեղեկացրել է, որ 3.000 եվրոյով հնարավոր է կազմակերպել մեկնման գործընթացը։ Պայմանավորվել են, որ ինքը մեկնողների անձնագրերն ու լուսանկարները փոխանցի Գագիկին, իսկ վիզաները պատրաստ լինելուց հետո` տա գումարները։ Դուբայ մեկնելուց առաջ Ռավին Հնդկաստանի և Նեպալի 9 քաղաքացիների անձնագրերը տվել է իրեն, որոնք էլ հունիս ամսվա սկզբին ինքը փոխանցել է Գագիկին։ Հունիսի կեսերին Գագիկն իրեն տեղեկացրել է, որ վիզաները պատրաստ են և Դավինդեր Կումարը անձամբ տեսել է դրանք։ Վիզաները տեսնելուց հետո, նույն օրը Գագիկն իրեն ասել է, որ գումարն անհրաժեշտ է վճարել։ Ինքը զանգել և Ռավիի հետ պայմանավորվել է գումարը վճարելու մասին, որից հետո ինքը գնացել է Երևան քաղաքի Սարյան փողոցի վրա գտնվող Ռավիի բնակարան, որտեղ նրա կնոջից` Գրետայից վերցրել և Գագիկին է տվել ինը անձնագրերը և 27.000 եվրո գումարին համարժեք ԱՄՆ դոլար, որը հետագայում Արամը պետք է փոխանակեր եվրոյի։ Վերջինս իրեն ասել է, որ ինքը մեկնողներին տեղեկացնի, որպեսզի նրանք պատրաստվեն հունիսի 17-ին «Զվարթնոց» օդանավակայանից Մոսկվայով Ֆրանսիա մեկնել։ Հունիսի 17-ին նրանք չեն մեկնել, քանի որ Գագիկն ասել է, որ որոշակի խնդիրների պատճառով մեկնումը հետաձգվել է մինչև հունիսի 24-ը։ Այնուհետև, Հայկ Վարդանյանի ձերբակալումից հետո, Գագիկից ինքը տեղեկացել է, որ Հնդկաստանի և Նեպալի քաղաքացիներին Եվրոպա պետք է ուղարկեր Հայկ Վարդանյանը։ Վիզաների կեղծ լինելու մասին տեղեկացել է առաջին անգամ հարցաքննության ներկայանալու օրը։ Ռավին իրեն խնդրել է օրինական ճանապարհով ձեռք բերել վիզաներ և կազմակերպել նշված անձանց մեկնումը Եվրոպա։ Նույն խնդրանքով ինքը դիմել է Գագիկին և վերջինս ասել է, որ գործընթացն օրինական է։ Հետագայում Գագիկն իրեն ասել է, որ նա նույնպես տեղյակ չի եղել կեղծիքի մասին։
/դատական նիստի արձանագրություն, հատոր 1, գ.թ. 87-89, հատոր 2, գ.թ. 207-208, 237-240/
Վկա Կարեն Շահենի Խուրշուդյանի ցուցմունքներով այն մասին, որ 2013թ. հունիս ամսվա սկզբին իրեն զանգահարել է իր ծանոթ Արայիկը, ում իրական անունը Գագիկ է և ասել, որ ինչ-որ անձինք կան, որոնք ցանկանում են մեկնել Եվրոպա։ Իրեն հարցրել է` արդյոք ինքը ծանոթ մարդ ունի տուրիզմի ոլորտում, որպեսզի այդ հարցով օգնի։ Խոստացել է ճշտել։ Խոսել է իր ընկերոջ` նույն թաղամասի բնակիչ Արսեն Մուրադյանի հետ, քանի որ իմացել է, որ վերջինս տուրիզմի ոլորտում ծանոթ ունի։ Արսենն իրեն պատասխանել է, որ ծանոթ մարդ ունի, ով զբաղվում է տուրիստական ծառայությունների մատուցման հետ կապված հարցերով։ Ինքը Արսենին փոխանցել է Արայիկի բջջային հեռախոսահամարները, խնդրել է, որ նա անձամբ կապնվի Արայիկի հետ և խնդիրը միասին քննարկեն։ Դրանից հետո նրանցից տեղեկացել է, որ վերջիններս հանդիպել են։ Այդ հանդիպմանը ներկա է եղել նաև ոմն Հայկը և խոստացել են Արայիկին օգնել` նրա ասած անձանց Եվրոպա ուղարկելու հարցում։ Կարծում է, որ Հայկն է եղել այն անձնավորությունը, ով զբաղվել է տուրիզմով և պետք է կազմակերպեր Արայիկի ասած անձանց մենումը Եվրոպա։ Ինքը չի իմացել, որ Հայկը մեկնողների համար պետք է ձեռք բերեր կեղծ վիզաներ և նրանք անօրինական ճանապարհով պետք է մեկնեին Եվրոպա։ Հակառակ դեպքում չէր միջնորդի, որ Արսենն ու Հայկը զբաղվեին այդ հարցով։ Գագիկին ծանոթացրել է Արսեն Մուրադյանի հետ, որպեսզի վերջինիս ծանոթ Հայկը կազմակերպի Գագիկի ասած օտարերկրացիների մեկնումը Եվրոպա։ Ինքը շահադիտական նպատակ չի ունեցել, Գագիկից կամ Արսենից գումար չի վերցրել։ Հայկին ընդհանրապես չի տեսել և նրա հետ չի առնչվել։
/դատական նիստի արձանագրություն, հատոր 1, գ.թ. 207-209, հատոր 2, գ.թ. 225-226/
Վկա Գրետա Աշոտի Գուրջինյանի ցուցմունքներով այն մասին, որ իր ամուսին Ռավի Դուտտը ցանկացել է օգնել Հնդկաստանի և Նեպալի քաղաքացիներին, որպեսզի նրանք օրինական կարգով Հայաստանից մեկնեն Եվրոպա։ Այդ կապակցությամբ Ռավին պայմանավորվածություն է ձեռք բերել Երևան քաղաքի բնակիչ Արամի հետ այն մասին, որ վերջինս զբաղվի Հնդկաստանի և Նեպալի նշված քաղաքացիներին Եվրոպա ուղարկելու հարցով, ինչի համար Արամին գումար է տվել։ Հետագայում պարզվել է, որ նշված անձանց համար պատրաստվել են կեղծ վիզաներ։ Այդ մասին ինքն ու Ռավին չեն իմացել։ Կեղծիքի մասին առաջին անգամ տեղեկացել է Արամից, ով իրեն ասել է, որ խաբվել է և չի իմացել կեղծիքի մասին։ Արամից նաև տեղեկացել է, որ վիզաների հարցով զբաղվել է ոմն Հայկը, ով ձերբակալվել է, և նրա տնից հայտնաբերվել են անձնագրերը կեղծ վիզաներով, ինչպես նաև որոշակի գումար։ Որքան հիշում է` Արամին տվել է շուրջ 35.000 ԱՄՆ դոլար գումար, որը պետք է փոխանակվեր եվրոյի։
/դատական նիստի արձանագրություն, հատոր 2, գ.թ. 25-26, հատոր 3, գ.թ. 232, հատոր 4, գ.թ. 6/
Վկա Կարեն Սարգսի Դավթյանի նախաքննական ցուցմունքներով այն մասին, որ աշխատել է ՀՀ ԿԱ ազգային անվտանգության ծառայության սահմանապահ զորքերի սահմանային վերահսկողության սահմանապահ ջոկատում և զբաղեցրել է օպերատիվ աշխատանքների գծով ավագ սպայի պաշտոնը։ Հայկ Սուրիկի Վարդանյանին ճանաչել է շուրջ երկու տարի։ Նրա հետ ծանոթացել է վերջինիս տղայի միջոցով, ում մոտ ինքը բազմիցս վերանորոգել է ավտոմեքենան։ Հայկ Վարդանյանից տեղեկացել է, որ վերջինս հանդիսացել է ԱԱԾ աշխատակից։ Շփումների ընթացքում Հայկ վարդանյանը պատմել է, որ տիրապետում է օպերատիվ նշանակություն ունեցող տեղեկությունների, մասավորապես գիտի տարբեր տուրիստական գործակալությունների աշխատակիցների, ովքեր զբաղվում են կեղծ փաստաթղթերի, այդ թվում նաև` շենգենյան երկրների մուտքի կեղծ արտոնագրերի պատրաստմամբ։ Նա խոստացել է ներկայացնել նման տիպի տեղեկություններ, ինչի դիմաց խնդրել է նրան որևէ տեղ աշխատանքի տեղավորել։ Շփումների ընթացքում Հայկ Վարդանյանն իրեն հայտնել է նրան հասած որոշ տեղեկություններ, որոնք ստուգելուց հետո համապատասխան կարգով զեկուցվել են սահմանապահ զորքերի ղեկավարությանը։ 2013 թվականի հունիսի 20-ին իր ավտոմեքենան վերանորոգման է հանձնել և իր անձնական իրերը տեղափոխել է Հայկ Վարդանյանի ավտոմեքենա, որից հետո վերջինիս հետ ուղևորվել ՀՀ ԱԱԾ բուժվարչություն` իր հոր համար համապատասխան ուղեգիր վերցնելու նպատակով։ Այնուհետև գնացել են Մարգարյանի անվան թիվ 2 հիվանդանոց, որտեղ նախորդ օրվանից ստացիոնար բուժվել է իր հայրը։ Ինքը գնացել է հորը բուժող բժիշկներին տեսնելու, իսկ Հայկը սպասել է բակում, որպեսզի իրեն աշխատանքի տանի։ Այնուհետև իր դստեր հետ դեղատուն գնալիս տեսել է, որ ԱԱԾ աշխատակիցները ավտոմեքենայի մոտ բռնել են Հայկ Վարդանյանին։ Այն մասին, որ Հայկ Վարդանյանը Արիստակես Քալաշյանից պահանջել է 3.000 ԱՄՆ դոլար գումար` վերջինիս ՀՀ ԱԱԾ սահմանապահ զորքերի «Զվարթնոց» սահմանային վերահսկողության բաժնում որպես սահմանապահ աշխատանքի տեղավորելու համար, ինքը չի իմացել, Հայկ Վարդանյանը նման թեմա իր հետ չի քննարկել։ Իր կամ իր կոլեգաների միջոցով Հայկ Վարդանյանը չէր կարող որևէ մեկի աշխատանքի տեղավորել ՀՀ ԱԱԾ սահմանապահ զորքերում։ Իր հոր մոտ գնալուց ինքը տեղյակ չի եղել, որ հենց այդ ժամանակ Հայկ Վարդանյանը պետք է ինչ-որ մեկի հանդիպեր։ Հայկ Վարդանյանն ուղղակի օգտվել է այն հանգամանքից, որ իրեն տեղափոխել է հիվանդանոց։ Կարծում է, որ Հայկ Վարդանյանը չի էլ ցանկացել Արիստակես Քալաշյանին աշխատանքի ընդունել տալ։
/հատոր 2, գ.թ. 174-176, 197-201/
Վկա Գագիկ Ռոբերտի Աբրահամյանի նախաքննական ցուցմունքներով այն մասին, որ ինքը հանդիսանում է շինարարական ոլորտում ծառայություններ մատուցող «Քոնս մաստեր գրուպ» ընկերության տնօրենը։ Շրջապատում իրեն անվանում են նաև Արո կամ Արայիկ։ 2013 թվականի հունիս ամսվա սկզբին իր գործընկերներից Արամը դիմել է իրեն` Հնդկաստանի որոշ քաղաքացիների համար շենգենյան երկրների մուտքի վիզաներ ստանալու և իր կնոջը պատկանող «Մաստեր պլյուս» անվամբ ուսումնական կենտրոնի միջոցով Եվրոպա ուղարկելու համար։ Ինքը Արամին մերժել է` ասելով, որ այդպես հնարավոր չէ։ Արամին այդ հարցով օգնելու համար ինքը կապնվել է ՀՀ-ում Ղազախստանի դեսպանատանը որպես վարորդ աշխատող իր ծանոթ Կարեն Խուրշուդյանի հետ։ Վերջինս իրեն խոստացել է այդ հարցով հետաքրքրվել։ Այնուհետև, Կարենն իրեն տեղեկացրել է, որ Արսեն անունով մեկն իրեն կզանգի նշված հարցով։ Դրանից հետո Արսենը զանգահարել է իրեն և իրենք հանդիպել են։ Հանդիպմանը Արսենի հետ եկել է նաև Հայկը։ Հայտնել են, որ զբաղվում են նման հարցերով, հնարավորություն ունեն քաղաքացիների համար շենգենյան երկրների մուտքի վիզաներ ձեռք բերել և ուղարկել Եվրոպա։ Ինքը ներկայացրել է, որ Հնդկաստանի որոշ քաղաքացիների անհրաժեշտ է Հայաստանից ուղարկել Եվրոպա և հարցրել է, թե այդ գործընթացը կազմակերպելու դեպքում որքան պետք է վճարել դրա դիմաց։ Հայկ Վարդանյանը պատասխանել է, որ ինքը կարող է Հնդկաստանի քաղաքացիների համար վիզաներ ձեռք բերել, գնել ինքնաթիռի տոմսերը, ինչպես նաև պատվիրել հյուրանոց արտերկրում, ինչի դիմաց յուրաքանչյուր մեկնողի համար պահանջել է 7.000 եվրո գումար։ Վիզաներ ստանալու վերաբերյալ Հայկի հետ ինքը որևէ զրույց չի ունեցել և չի էլ հետաքրքրվել, թե նա ինչ կարգով և որ դեսպանատան միջոցով պետք է ստանար վիզաները, քանի որ իր մեջ անգամ կասկած չի առաջացել, որ վիզաները կարող էին կեղծ լինել։ Հայկի ասած 7.000 եվրոյի վերաբերյալ ինքը տեղեկացրել է Արամին, ով ասել է, որ այդ գինը թանկ է։ Վերջինս իրեն նաև ասել է, որ Հնդկաստանի քաղաքացիների համար արտերկրում հյուրանոց պատվիրել պետք չէ, անհրաժեշտ է միայն նրանց ուղարկել Եվրոպա։ Այդ մասին ինքը հայտնել է Հայկին։ Որոշ ժամանակ անց, Հայկի հետ իրենք վերջնական պայմանավորվել են, որ միայն Եվրոպա ուղարկելու համար` առանց հյուրանոցի պատվիրման, մեկ մեկնողից կպահանջվի 3.000 եվրո գումար։ Դրանից հետո Արամից ստացել է Հնդկաստանի 7 և Նեպալի 2 քաղաքացիների անձնագրերը և փոխանցել է դրանք Հայկին։ Մոտ տասը օր հետո Արսենից ու Հայկից տեղեկացել է, որ վիզաները պատրաստ են։ Հայկն ասել է, որ կարող է մեկնողներից մեկին վիզաները ցույց տալ։ Ինքը Հնդկաստանի քաղաքացի Դավինդերին ուղեկցել է Հայկի մոտ և վերջինս միայն Դավինդերին տարել և ցույց է տվել վիզաները։ Արդեն դրանից հետո Հայկն իրեն հայտնել է, որ վիզաները ցույց է տվել Դավինդերին, ամեն ինչ նորմալ է, ասել է, որ գումարը փոխանցեն նրան։ Դա եղել է հունիսի 14-ին։ Հաջորդ օրը` հունիսի 15-ին Արամից ինքը ստացել է 27.000 եվրո գումար, որը նույն օրը Հրազդանի կիրճում Արսենի ներկայությամբ տվել է Հայկին։ Այնուհետև, Հայկը նախ նշել է, որ հունիսի 17-ին կկազմակերպի Հնդկաստանի և Նեպալի քաղաքացիների մեկնումը։ Այնուհետև խոստացել է կազմակերպել մեկ շաբաթվա ընթացքում` ասելով, որ նախապես, մեկնումից մեկ օր առաջ կտեղեկացնի։ Ինքը սպասել է Հայկի զանգին, սակայն նրան բռնել են։ Ինքը տեղեկացված չի եղել, թե Հայկն ինչպես է պատրաստվել օտարերկրյա նշված քաղաքացիներին Եվրոպա ուղարկել։ Պարզապես սպասել է Հայկի կամ Արսենի զանգին, որպեսզի նրանք իրեն ասեին մեկնման օրը, ինքն էլ տեղեկացներ Արամին։ Հայկ Վարդանյանն իրեն երբևէ վիզաների կեղծ լինելու վերաբերյալ որևէ բան չի ասել և այդ մասին որևէ խոսակցություն չի ունեցել։ Հայկը պարզապես իրեն ասել է, որ գումարի դիմաց ձեռք կբերի վիզաներ և կկազմակերպի նշված անձաց մեկնումը։ Ինքը վստահ է եղել, որ խոսքը օրինական վիզաների մասին է եղել։
/հատոր 1, գ.թ. 91-94, 128, հատոր 2, գ.թ. 1-12, 28-30, հատոր 4, գ.թ. 26/
Վկա Արսեն Խաչիկի Մուրադյանի նախաքննական ցուցմունքներով այն մասին, որ Հայկ Վարդանյանի հետ ինքը ծանոթացել է մոտ մեկ ամիս աոաջ իր բարեկամ Շահեն Հովհաննիսյանի միջոցով, քանի որ վերջինս տվյալ ժամանակ տղային Եվրոպա ուղարկելու հարցով դիմել է Հայկ Վարդանյանին։ Տեղեկանալով, որ Հայկ Վարդանյանը զբաղվում է նման հարցերով` հանդիպել է նրա հետ և հարցրել, թե արդյոք նա կարող է իրեն օգնել ԱՄՆ մեկնելու հարցում։ Հայկը պատասխանել է, որ 5.000 ԱՄՆ դոլարի դիմաց կկազմակերպի ամբողջ գործընթացը` իր փոխարեն կլրացնի անհրաժեշտ փաստաթղթերը, կկատարի անհրաժեշտ վճարումներ, իր անձնագրում դնել կտա ԱՄՆ մեկնելու համար մուլտիվիզա, ձեռք կբերի ԱՄՆ ինքնաթիռի տոմս և կճանապարհի։ Հայկի պահանջով ինքը նրան է փոխանցել ՀՀ քաղաքացու իր անձնագիրը և երկու հատ լուսանկար։ Իր ծանոթներից Կարեն Խուրշուդյանը տեղյակ լինելով, որ ինքը ԱՄՆ մեկնելու հարցով դիմել է Հայկին` իրեն ասել է Հնդկաստանի քաղաքացիների Եվրոպա մեկնելու ցանկության վերաբերյալ։ Հարցրել է, թե արդյոք Հայկը կարող է դա կազմակերպել։ Ինքը այդ մասին ասել է Հայկին և վերջինս վստահեցրել է, որ ունի այդ հնարավորությունը։ Այնուհետև ինքն այդ մասին ասել է Կարենին, իսկ վերջինս իրեն է տվել Գագիկ Աբրահամյանի հեռախոսահամարը, որպեսզի ինքը կապնվի նրա հետ։ Զանգահարել է Գագիկին և երեքով` ինքը, Հայկը և Գագիկը հանդիպել են։ Հայկը ասել է, որ կարող է կազմակերպել Եվրոպա մեկնելու ամբողջ գործընթացը, ինչի մեջ մտել են վիզաները, տոմսերը, հյուրանոցը և այլն։ Ամբողջ գործընթացի դիմաց, մեկնող մեկ հոգու համար Հայկը պահանջել է 6 կամ 7 հազար եվրո գումար, իսկ մեկնողները ինը հոգի են եղել։ Հաջորդ օրը Գագիկը պատասխանել է, որ գումարի չափը մեկնողներին հարմար չէ։ Գագիկը նաև ասել է, որ պետք չէ արտերկրում հյուրանոց պատվիրել և դիմավորել մեկնողներին, անհրաժեշտ է պարզապես նրանց ուղարկել Եվրոպա։ Այնուհետև Հայկը գինն իջեցրել է մինչև 3.000 եվրո և մեկնողները համաձայնվել են։ Դրանից հետո Գագիկը Հայկին է փոխանցել Հնդկաստանի և Նեպալի ինը քաղաքացիների անձնագրերը։ Հայկը Գագիկին ասել է, որ մեկնողները գումարները կարող են տալ միայն վիզաները պատրաստ լինելուց հետո։ Մոտավորապես մեկ շաբաթ անց վիզաները պատրաստ են եղել։ Գագիկից ինքը տեղեկացել է, որ մեկնողներից մեկին Հայկը ցույց է տվել վիզաները։ Դրա հաջորդ օրը, Հրազդանի կիրճում իր ներկայությամբ Գագիկը Հայկին է փոխանցել մեկնողների տված 27.000 եվրո գումարը։ Այդ գումարից Հայկը իրեն է տվել 1.800 եվրո, որն ինքը Հայկից չի պահանջել, այլ նա ինքնակամ է իրեն տվել` ասելով, որ դա իր լավության դիմաց է, քանի որ ինքը նրա համար հաճախորդ է գտել։ Այդ պահին ինքը դեռ չի իմացել, որ Հայկը պատրաստվել է Հնդկաստանի և Նեպալի քաղաքացիներին Եվրոպա ուղարկել կեղծ վիզաներով։ Հակառակ դեպքում ինքը գումարը նրանից չէր վերցնի և ընդհանրապես չէր խառնվի այդ գործին։ Վիզաների կեղծ լինելու մասին իմացել է Հայկ Վարդանյանին ձերբակալելուց հետո, երբ այդ մասին հայտնել են լուրերով։ Ինքը կարծել է, որ Հայկ Վարդանյանը Հայաստանում գործող եվրոպական դեսպանատների միջոցով պետք է կազմակերպի Հնդկաստանի և Նեպալի քաղքացիների համար վիզաների ձեռք բերումը։ Եթե ինքը իմանար կեղծիքի մասին, ապա իր ԱՄՆ մեկնելու հարցով Հայկին չէր դիմի և նրան չէր տա իր անձնագիրը` ԱՄՆ վիզա ստանալու համար։ Գագիկի բոլոր պայմանավորվածությունները եղել են Հայկի հետ։ Եվրոպա մեկնելու վերաբերյալ բոլոր պայմանները Գագիկին ասել է Հայկը։ Վերջին պայմանավորվածությունը նրանց միջև եղել է այն, որ Գագիկը Հայկին յուրաքանչյուր մեկնողի համար պետք է տար 3.000 եվրո գումար, իսկ Հայկն այդ անձանց համար պետք է ձեռք բերեր վիզաներ, տոմսեր և ուղարկեր Ֆրանսիա։ Կեղծ վիզաների մասին ընդհանրապես խոսք չի եղել։ Երբ իր` ԱՄՆ մեկնելու հարցով դիմել է Հայկին, վերջինս վստահեցրել է, որ գործընթացն օրինական է, այդ իսկ պատճառով ինքը վստահ է եղել, որ իր և մյուսների համար պետք է օրինական վիզաներ ձեռք բերվեին դեսպանատների միջոցով։
/հատոր 1, գ.թ. 83-85, հատոր 2, 31-33, հատոր 4, գ.թ. 110, 223/
Վկա Լիանա Ջանիբեկի Աչիկյանի նախաքննական ցուցմունքներով այն մասին, որ հանդիսանում է «Մաստեր Լիմա» ՍՊ ընկերության հիմնադիրը և գործադիր տնօրենը։ Այդ ընկերությանն է պատկանում «Մաստեր պլյուս» ուսումնական կենտրոնը, որը գտնվում է Երևանի Մաշտոցի 42 հասցեում։ Ուսումնական կենտրոնը համագործակցում է աշխարհի տարբեր ուսումնական հաստատությունների հետ։ Իրենց ուսումնական կենտրոնի միջոցով ՀՀ քաղաքացիները ընդունվում են արտերկրում գտնվող բուհեր, սակայն նրանց արտերկիր մեկնման համար վիզաների ձեռք բերման հարցերով կենտրոնը չի զբաղվում։ Իրենց բնակարանում խուզարկություն կատարելուց հետո, իր ամուսնուց` Գագիկ Աբրահամյանից տեղեկացել է, որ Արամի խնդրանքով Գագիկը մարդ է փնտրել, որպեսզի օգնի Արամին որոշ օտարերկրացիների Եվրոպա մեկնելու հարցում։ Գագիկը ծանոթացել է Հայկ անունով մի տղամարդու հետ, ով խոստացել է կազմակերպել տվյալ քաղաքացիների մեկնումը Եվրոպա և իր ամուսնուց վերցրել է Արամի կողմից փոխանցված գումարն ու անձնագրերը։ Հետագայում պարզվել է, որ այդ քաղաքացիների համար պատրաստվել են կեղծ վիզաներ, որի մասին Գագիկը չի իմացել։
/հատոր 4, գ.թ. 17-20/
Փաստաթղթաբանական և նյութագիտական համալիր փորձաքննության 2013 թվականի հուլիսի 03-ի թիվ 13-1981 եզրակացությամբ, համաձայն որի` «1.2. Փորձաքննությանը ներկայացված «Օբյեկտ 5» ծրարում առկա 30 հատ ԱՄՆ 100 դոլար անվանական արժեքով AB 42740397Q, KK 30182435A, KK 13256937A, KK 30182437A, KK 30182434A, HB 56688092K, HB 56688319K, KB 36477127L, KF 05107725D, FL 72764524C, KB 55222440D, AB 88283111A, HB 56688100K, HB 74274261948L, KB 38560070F, HA 67039515A, KK 30182438A, KL 95794597A, HG 13399357A, HF 9135950413, KB 66956759D, FH 53475994A, HB 86000871F, AB 49891673H, AG 82649219B, HL 12311772E, HB 59995051Q, HB 59456328L, KH 43069382A և KB 07843406 I սերիա-համարների թղթադրամների դիմերեսի և դարձերեսի ամբողջ մակերեսին առկա են ինտենսիվ կարմրագույն լյումինիսցենցիա, նույն թղթադրամների դիմերեսների միջնահատվածներից դեպի աջ, առկա են բաց դեղնականաչագույն լումինիսցենցիայով, հայերեն տառերով ձեռագիր կատարված« «ԿԱՇԱՌՔ» գրառումները։
«Օբյեկտ 1,2,3,4 ծրարներում առկա բամբակյա խծուծների, «Օբյեկտ 5» ծրարում առկա 30հատ ԱՄՆ 100 դոլար անվանական արժեքով AB 42740397Q, KK 30182435A, KK 13256937A, KK 30182437A, KK 30182434A, HB 56688092K, HB 56688319K, KB 36477127L, KF 05107725D, FL 72764524C, KB 55222440D, AB 88283111A, HB 56688100K, HB 74274261948L, KB 38560070F, HA 67039515A, KK 30182438A, KL 95794597A, HG 13399357A, HF 9135950413, KB 66956759D, FH 53475994A, HB 86000871F, AB 49891673H, AG 82649219B, HL 12311772E, HB 59995051Q, HB 59456328L, KH 43069382A և KB 07843406 I սերիա-համարների թղթադրամների դիմերեսների, դարձերեսների և «Օբյեկտ 6» ծրարում առկա սպիտակագորշագույն բամբակյա խծուծի վրա առկա նյութը իրենցից ներկայացնում են լյումինաֆորային փոշի և միմյանց հետ ունեն ընդհանուր սեռային պատկանելիություն։
«Օբյեկտ 5» ծրարում առկա 30 հատ ԱՄՆ դոլարանոց անվանական արժեքով AB 42740397Q, KK 30182435A, KK 13256937A, KK 30182437A, KK 30182434A, HB 56688092K, HB 56688319K, KB 36477127L, KF 05107725D, FL 72764524C, KB 55222440D, AB 88283111A, HB 56688100K, HB 74274261948L, KB 38560070F, HA 67039515A, KK 30182438A, KL 95794597A, HG 13399357A, HF 9135950413, KB 66956759D, FH 53475994A, HB 86000871F, AB 49891673H, AG 82649219B, HL 12311772E, HB 59995051Q, HB 59456328L, KH 43069382A և KB 07843406 I սերիա-համարների թղթադրամների դիմերեսների միջնահատվածներից աջ առկա են բնական լույսի տակ անտեսանելի, ուլտրամանուշակագույն ճառագայթների տակ բաց դեղնականաչագույն լյումինեսցենտող «ԿԱՇԱՌՔ» գրառումները, որոնք կատարված են հատուկ քիմիական մատիտով, «ԿԱՇԱՌՔ» գրառումների ներկանյութերը և փորձաքննությանը որպես համեմատական նմուշ ներկայացված «Օբյեկտ 6» ծրարում առկա քիմիական մատիտի ներկանյութը ունեն ընդհանուր սեռային պատկանելիություն։»։
/հատոր 1, գ.թ. 218-222/
Փաստաթղթաբանական փորձաքննության 2013 թվականի օգոստոսի 23-ի թիվ 13-2489 եզրակացությամբ, համաձայն որի` «1.2. Փորձաքննությանը ներկայացված «Վարդանյան Ռուզաննա Նորիկի» «AN 0423375» սերիա-համարի, «RAMANDEEP KUMAR» անվամբ լրացված« «G 5543967» սերիա֊-համարի, «KULVIR SINGH» անվամբ լրացված «J 1851703» սերիա֊-համարի, «KULDEEP SINGH» անվամբ լրացված «K 2417412» սերիա-֊համարի, «SATISH» անվամբ լրացված «H 6163224» սերիա-֊համարի, «KARKI NISHAN» անվամբ լրացված «05897868» սերիա֊-համարի, «LAKHWINDER KUMAR» անվամբ լրացված «J 9575339» սերիա֊համարի, «KARKI SUDHIR» անվամբ լրացված «05760164» սերիա-֊համարի, «JASWINDER SINGH» անվամբ լրացված «J 5930256» սերիա-֊համարի, «DAVIN-DER KUMAR» անվամբ լրացված «J 6799099» սերիա-֊համարի անձնագրերի տարբեր էջերում առկա համապատասխանաբար «000226252», «000226200», «000226262», «000226266», «000226201», «000226222», «000226265», «000226220», «000226226» և «000226203» սերիա֊-համարների շենգենյան երկրներ մուտք գործելու արտոնագրերը կատարված են լազերային գունավոր տպագրման եղանակով (համակարգչային գունավոր լազերային տպիչ, քսերոպատճենահանման սարք) և չեն համապատասխանում շենգենյան երկրներ մուտք գործելու ստանդարտ թողարկման արտոնագրերի կատարման եղանակներին և պաշտպանական հատկանիշներին։
Փորձաքննությանը ներկայացված «Վարդանյան Ռուզաննա Նորիկի» «AN 0423375» սերիա-համարի, «RAMANDEEP KUMAR» անվամբ լրացված« «G 5543967» սերիա֊-համարի, «KULVIR SINGH» անվամբ լրացված «J 1851703» սերիա֊-համարի, «KULDEEP SINGH» անվամբ լրացված «K 2417412» սերիա֊համարի, «SATISH» անվամբ լրացված «H 6163224» սերիա֊համարի, «KARKI NISHAN» անվամբ լրացված «05897868» սերիա֊համարի, «LAKHWINDER KUMAR» անվամբ լրացված «J 9575339» սերիա֊համարի, «KARKI SUDHIR» անվամբ լրացված «05760164» սերիա-֊համարի, «JASWINDER SINGH» անվամբ լրացված «J 5930256» սերիա֊համարի, «DAVIN-DER KUMAR» անվամբ լրացված «J 6799099» սերիա-֊համարի անձնագրերի տարբեր էջերում առկա համապատասխանաբար «000226252», «000226200», «000226262», «000226266», «000226201», «000226222», «000226265», «000226220», «000226226» և «000226203» սերիա֊-համարների շենգենյան երկրներ մուտք գործելու արտոնագրերը կատարված են ինքնասոսնձվող թղթերի վրա և հնարավոր է առանց վնասելու առանձնացնել անձնագրերի համապատասխան էջերից։»։
/հատոր 2, գ.թ. 202-206/
Իրեղեն ապացույց ճանաչված` Հայկ Վարդանյանի կողմից 2013 թվականի հունիսի 20-ին Արիստակես Քալաշյանից ստացած AB 42740397Q, KK 30182435A, KK 13256937A, KK 30182437A, KK 30182434A, HB 56688092K, HB 56688319K, KB 36477127L, KF 05107725D, FL 72764524C, KB 55222440D, AB 88283111A, HB 56688100K, HB 74274261948L, KB 38560070F, HA 67039515A, KK 30182438A, KL 95794597A, HG 13399357A, HF 9135950413, KB 66956759D, FH 53475994A, HB 86000871F, AB 49891673H, AG 82649219B, HL 12311772E, HB 59995051Q, HB 59456328L, KH 43069382A և KB 07843406 I սերիա-համարների 100 ԱՄՆ դոլար արժողությամբ հատուկ քիմիական նյութով մշակված ընդհանուր 30 հատ թղթադրամներով։
/հատոր 1, գ.թ. 223/
Իրեղեն ապացույց ճանաչված` Ջասվինդեր Սինգհի անվամբ 000226226, Ռամանդիփ Կումարի անվամբ 000226200, Դավինդեր Կումարի անվամբ 000226203, Կուլդիփ Սինգհի անվամբ 000226266, Սատիշի Կումարի անվամբ 000226201, Լախվինդեր Կումարի անվամբ 000226265, Կուլվիր Սինգհի անվամբ 000226226, Կարկի Նիշանի անվամբ 000226222, Կարկի Սուդհիրի անվամբ 000226220 համարների Լատվիայի մուտքի կեղծ արտոնագրերով։
/հատոր 3, գ.թ. 168-170/
Իրեղեն ապացույց ճանաչված` Հայկ Վարդանյանի կողմից քննությանը ներկայացված 2.750 և նրա տնից ներկայացված 9.950 եվրո գումարներով, որոնք, ըստ քննությամբ ձեռք բերված տվյալների, կազմում են Հայկ Վարդանյանի կողմից հափշտակված 27.000 եվրո գումարի մասը։
/հատոր 1, գ.թ. 48, 67-68/
Իրեղեն ապացույց ճանաչված` Հայկ Վարդանյանի կողմից Արիստակես Քալաշյանից ստացած թղթադրամների, նրա ավտոմեքենայում գումարի հետ գտնված` լազերային սկավառակի, նոթատետրի և ապահովագրության վկայագրի վրայից վերցված քիմիական նյութերի պարունակությամբ բամբակյա խծուծներով, որոնք թղթադրամների մշակման համար օգտագործված քիմիական նյութի նմուշների հետ, ըստ փորձագետի կողմից տրված եզրակացության` ունեն ընդհանուր սեռային պատկանելիություն։
/հատոր 1, գ.թ. 223/
Որպես այլ փաստաթուղթ` ապացույց ճանաչված, Արիստակես Էդուարդի Քալաշյանի 05.06.2013թ. հաղորդումով, համաձայն որի` 2013 թվականի ապրիլ ամսին ցանկացել է աշխատանքի ընդունվել ՀՀ Ազգային անվտանգության ծառայության կամ ՀՀ ոստիկանության համակարգերում։ Այդ կապակցությամբ 2013թ-ի մայիսի վերջին Հայկ Սուրիկի Վարդանյանն իրեն հայտնել է, որ նախկինում աշխատել է ՀՀ ԱԱԾ համակարգում, ունի ղեկավար պաշտոններ զբաղեցնող ընկերներ և առաջարկել է կաշառք տալու միջոցով աջակցել, որ ինքն աշխատանքի ընդունվի ՀՀ ԱԱԾ սահմանապահ զորքերում։ Մասնավորապես առաջարկել է 3000 ԱՄՆ դոլար տալու դեպքում աշխատանքի տեղավորել «Զվարթնոց» օդանավակայանում կամ «Բավրայի» սահմանային անցակետում, իսկ 10.000 ԱՄՆ դոլար տալու դեպքում` կազմակերպել աշխատանքի ընդունվելը «Գոգավանի» սահմանային անցակետում որպես օպերատիվ գծով պետի տեղակալ։ Ելնելով Հայկի խոսքերից` ինքը ստիպված համաձայնվել է սահմանապահ զորքերի «Զվարթնոց» անցակետում աշխատանքի ընդունվելու տարբերակին, սակայն վերջնական պատասխան չի տվել։ 2013թ-ի հունիսի 2-ին ինքը Հայկին պատասխանել է, որ նախընտրում է «Զվարթնոց» օդանավակայանում որպես սահմանապահ աշխատանքի ընդունվելու տարբերակը և նրանից որոշակի ժամանակ է խնդրել` 3.000 ԱՄՆ դոլարը գտնելու համար։ Ելնելով Հայկի այն խոսքերից, որ ՀՀ ԱԱԾ-ում հնարավոր չէ առանց կաշառքի գումարի ընդունվել աշխատանքի` որոշել է այդ կապակցությամբ դիմել ՀՀ ազգային անվտանգության ծառայությանը և հայտնել Հայկի հակաօրինական գործունեության մասին։
/ հատոր 1, գ.թ. 3-4/
Որպես այլ փաստաթուղթ` ապացույց ճանաչված, 3.000 ԱՄՆ դոլար թղթադրամները քիմիական մշակման ենթարկելու մասին 19.06.2013թ. արձանագրությամբ, համաձայն որի` կաշառք տալու նմանակման օպերատիվ-հետախուզական միջոցառում անցկացնելու համար քիմիական մշակման են ենթարկվել ՀՀ ԱԱԾ ֆինանսաբյուջետային վարչությունից ստացված` AB 42740397Q, KK 30182435A, KK 13256937A, KK 30182437A, KK 30182434A, HB 56688092K, HB 56688319K, KB 36477127L, KF 05107725D, FL 72764524C, KB 55222440D, AB 88283111A, HB 56688100K, HB 74274261948L, KB 38560070F, HA 67039515A, KK 30182438A, KL 95794597A, HG 13399357A, HF 9135950413, KB 66956759D, FH 53475994A, HB 86000871F, AB 49891673H, AG 82649219B, HL 12311772E, HB 59995051Q, HB 59456328L, KH 43069382A և KB 07843406 I համարների 100 ԱՄՆ դոլար արժողությամբ 30 հատ թղթադրամները։
/հատոր 1, գ.թ. 23-24/
Որպես այլ փաստաթուղթ` ապացույց ճանաչված, 3.000 ԱՄՆ դոլարը Ա. Քալաշյանին հանձնելու մասին 20.06.2013թ. արձանագրությամբ, համաձայն որի` հատուկ քիմիական մշակման ենթարկված AB 42740397Q, KK 30182435A, KK 13256937A, KK 30182437A, KK 30182434A, HB 56688092K, HB 56688319K, KB 36477127L, KF 05107725D, FL 72764524C, KB 55222440D, AB 88283111A, HB 56688100K, HB 74274261948L, KB 38560070F, HA 67039515A, KK 30182438A, KL 95794597A, HG 13399357A, HF 9135950413, KB 66956759D, FH 53475994A, HB 86000871F, AB 49891673H, AG 82649219B, HL 12311772E, HB 59995051Q, HB 59456328L, KH 43069382A և KB 07843406I համարների 100 ԱՄՆ դոլար արժողությամբ 30 թղթադրամները հանձնվել են Արիստակես Քալաշյանին` կաշառք տալու համար։
/հատոր 1, գ.թ 25-26/
Որպես այլ փաստաթուղթ` ապացույց ճանաչված, «կաշառք տալու նմանակման» օպերատիվ-հետախուզական միջոցառում իրականացնելու վերաբերյալ 20.06.2013թ. արձանագրությամբ, համաձայն որի` Հայկ Վարդանյանի կողմից Արիստակես Քալաշյանից 3.000 ԱՄՆ դոլարը ստանալուց հետո, նշված գումարը ՀՀ ԱԱԾ աշխատակիցների կողմից հայտնաբերվել է Հայկ Վարդանյանի կողմից օգտագործված ավտոմեքենայում, ինչը համապատասխան կարգով ֆիքսվել է Հայկ Վարդանյանի և հրավիրված ընթերակաների ներկայությամբ։ Միջոցառման ընթացքում կատարվել է տեսաձայնագրություն։
/հատոր 1, գ.թ. 30-34/
Որպես այլ փաստաթուղթ` ապացույց ճանաչված, ՀՀ ԱԱԾ սահմանապահ զորքերի հրամանատարի 14.11.2013թ. Ելից թիվ 5/3-518 1 գրությամբ, համաձայն որի «Զվարթնոց» օդանավակայանով դեպի եվրոպական երկրներ մեկնող անձանց փաստաթղթերում սահմանային վերահսկողության ժամանակ կեղծիքների հատկանիշներ հայտնաբերելու դեպքում փաստաթղթերն ուղարկվում են հատուկ ստուգման՝ անձնագրերի ստուգման հատուկ տեխնիկական միջոցների կիրառմամբ։ Շենգենյան համագործակցության երկրների թիվ 000226226, 000226200, 000226203, 000226266, 000226201, 000226265, 000226226, 000226222, 000226220 վիզաները հանդիսանում են ամբողջովին կեղծված` կեղծված են ինքնասոսնձվող պիտակները և նրանց վրա առկա բոլոր պաշտպանիչ միջոցները, ուստի սահմանային վերահսկողության ժամանակ, առանց տեխնիկական միջոցների կիրառմամբ, սահմանապահների կողմից վերոնշյալ վիզաները կհայտնաբերվեին։
/հատոր 4, գ.թ. 32/
Որպես այլ փաստաթուղթ` ապացույց ճանաչված, արտաքին և ներքին դիտման օպերատիվ-հետախուզական միջոցառումներ անցկացնելու մասին 2013 թվականի հունիսի 07-ին կազմված արձանագրությամբ, համաձայն որի` Երևան քաղաքի Զաքյան փողոցի հարակից այգում գտնվող սրճարանում իրականացվել է արտաքին ու ներքին դիտման օպերատիվ-հետախուզական միջոցառումներ, որոնց ընթացքում ձայնագրվել է Արիստակես Քալաշյանի և Հայկ Վարդանյանի զրույցը, որը զետեղվել է լազերային մեկ սկավառակի վրա և կաշառք տալու նմանակման օպերատիվ-հետախուզական միջոցառման արդյունքները ամրագրելու համար կատարված տեսանկարահանումների և ձայնագրությունների վերաբերյալ 2013թ. հունիսի 20-ին կազմված արձանագրությամբ, համաձայն որի` Հայկ Վարդանյանի նկատմամբ իրականացվել է կաշառք տալու նմանակում օպերատիվ-հետախուզական միջոցառում, որի արդյունքները հավաստվել են տեսանկարահանմամբ և ձայնագրմամբ և զետեղվել են երկու սկավառակների վրա։
/հատոր 1, գ.թ. 21, 27/
Ապացույց ճանաչված` Հայկ Վարդանյանի 093-50-51-04 բջջային հեռախոսահամարից կայացած և դատարանի որոշման հիման վրա գաղտնալսված խոսակցությունները, 2013 թվականի հունիսի 07-ին և 20-ին Հայկ Վարդանյանի և Արիստակես Քալաշյանի հանդիպումների վերաբերյալ օպերատիվ-հետախուզական միջոցառումների արդյունքում ստացված զրույցի ձայնագրությունները և տեսաձայնագրությունները զննելու մասին 03.12.2013թ. արձանագրությամբ, համաձայն որոնց` Հայկ Վարդանյանը 093-50-51-04 բջջային հեռախոսահամարով հեռախոսային խոսակցություններ է ունեցել մի շարք անձանց հետ, այդ թվում` հեռախոսային խոսակցություններ է ունեցել 094-01-99-09 համարով, թիվ 58206413 քրեական գործով, Արիստակես /Արսեն/ Քալաշյանի, 093-21-14-00 համարով` վկա Արսեն Մուրադյանի հետ, 094-77-77-90 համարով` վկա Գագիկ Աբրահամյանի հետ, այն մասին, որ Հայկ Վարդանյանը Գագիկ Աբրահամյանին խոստացել է, որ աշխատանքի կտեղավորի ՀՀ ԱԱԾ սահմանապահ զորքերի «Զվարթնոց» սահմանային անցակետում, որի համար նրանից պահանջել է 3.000 ԱՄՆ դոլար գումար, իսկ 20.06.2013թ. հանդիպման ժամանակ, Հայկ Վարդանյանը Արիստակես Քալաշյանից ստացել է գումարը, որը վերջինս Հայկ Վարդանյանի պահանջով դրել է նրա ավտոմեքենայի մեջ։ Նույն հարցի վերաբերյալ Հայկ Վարդանյանը հեռախոսային խոսակցություններ է ունեցել Արիստակես Քալաշյանի հետ։ Բացի այդ, Հայկ Վարդանյանը հեռախոսային խոսակցություններ է ունեցել գործով վկաներ Գագիկ Աբրահամյանի և Արսեն Մուրադյանի հետ` Հնդկաստանի և Նեպալի քաղաքացիների համար շենգենյան երկրների մուտքի արտոնագրեր ձեռք բերելու, այդ քաղաքացիներին ՀՀ-ից Եվրոպա ուղարկելու և այդ պատրվակով Հայկ Վարդանյանի կողմից Գագիկ Աբրահամյանից 27.000 եվրո գումար ստանալու վերաբերյալ։
/հատոր 4, գ.թ. 128-162/
Ապացույց ճանաչված` բջջային հեռախոսի հիշողության պարունակությունը զննելու մասին 22.08.2013թ. արձանագրությամբ, համաձայն որի` Դավինդեր Կումարի կողմից քննությանը ներկայացված «Black Berry» բջջային հեռախոսի և դրանում եղած` «ARITEL» 00919501795086 հեռախոսահամարով արտասահմանյան օպերատրի բջջային հեռախոսաքարտի հիշողությունների պարունակությունը վերագրված է DVD-R տեսակի 4,7 GB, 2 hr չափի հիշողությամբ 1 հատ լազերային սկավառակի վրա, որի վրա նշված է «8/1900 առ 01,07,13» ձեռագիր գրառումը։ Բջջային հեռախոսի և հեռախոսաքարտի հիշողության «pictures» անվամբ թղթապանակում առկա են 28 հատ լուսանկարներ, որոնցից 9 հատում պատկերված են շենգենյան երկրների մուտքի վիզաներ հետևյալ տվյալներով` Ջասվինդեր Սինգհի անվամբ 000226226 համարի, Ռամանդիփ Կումարի անվամբ 000226200 համարի, Դավինդեր Կումարի անվամբ 000226203 համարի, Կուլդիփ Սինգհի անվամբ 000226266 համարի, Սատիշի Կումարի անվամբ 000226201 համարի, Լախվինդեր Կումարի անվամբ 000226265 համարի, Կուլվիր Սինգհի անվամբ 000226226 համարի, Կարկի Նիշանի անվամբ 000226222 համարի, Կարկի Սուդհիրի անվամբ 000226220 համարի։ Վիզաների պատկերներով նշված ինը հատ լուսանկարները տպվել են Ա-4 չափի թղթի վրա ոչ գունավոր տպիչ սարքի միջոցով և կցվել են նշված արձանագրությանը։
/հատոր 2, գ.թ 109-119/
Ապացույց ճանաչված` Հնդկաստանի քաղաքացիներ Ջասվինդեր Սինգհի, Ռամանդիփ Կումարի, Դավինդեր Կումարի, Կուլդիփ Սինգհի, Սատիշ Կումարի, Լախվինդեր Կումարի, Կուլվիր Սինգհի, Նեպալի քաղաքացիներ Կարկի Նիշանի, Կարկի Սուդհիրի և ՀՀ քաղաքացի Ռուզաննա Վարդանյանի անձնագրերը զննելու մասին 06.09.2013թ. արձանագրությամբ, համաձայն որի նշված անձնագրերում փակցված են եղել Լատվիայի մուտքի կեղծ արտոնագրեր։
/հատոր 3, գ.թ. 165-170/
Ապացույց ճանաչված` հեռախոսային խոսակցությունների վերահսկման օպերատիվ-հետախուզական միջոցառման արդյունքում ստացված, Հայկ Վարդանյանի 093-50-51-04 հեռախոսահամարով կայացած խոսակցությունների ձայնագրառումները պարունակող 1 հատ լազերային սկավառակով։
/հատոր 4, գ.թ. 127/

Դատարանի իրավական վերլուծությունները
Վերլուծելով ամբաստանյալ Հայկ Վարդանյանի ցուցմունքները, համադրելով դրանք քրեական գործի դատական քննությամբ ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Հայկ Վարդանյանի նախաքննական և դատաքննական ցուցմունքներն իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են վերոհիշյալ ապացույցներով։
Ամբաստանյալ Հայկ Սուրիկի Վարդանյանի կողմից, նրա մեղավորությամբ, խոշոր չափերով, կաշառք ստանալու պատրվակով խարդախություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով նախատեսված հանցագործության հատկանիշներին։
Ապացուցված է նաև ամբաստանյալ Հայկ Սուրիկի Վարդանյանի կողմից, նրա մեղավորությամբ, առանձնապես խոշոր չափերով խարդախություն կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Հայկ Սուրիկի Վարդանյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված է եղել, վատառողջ է` տառապում է «Աջ աչք-տեսողությանսրություն` 0,2 չի կորեկցվում։ Խրոնիկական հետին ուվիետ։ Ձախ աչք-տեսողության սրություն` լուսազգացողությունը ոչ ճիշտ պրոյեկցիայով։ Խրոնիկական ուվեիտ, ցանցենու տոտալ, տրակցիոն շերտազատում, հետին ափսեանման կատարակտա։ Միզաքարային հիվանդություն, երիկամի քարեր, ավազ։ Սիմպտոմատիկ հիպերտոնիա» ախտորոշմամբ հիվանդությամբ, երկրորդ խմբի հաշմանդամ է։ Ամբաստանյալի պատասխանատվությունը և պատիժը մեղմացնող հանգամանքներ առկա չեն, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցագործությունների վտանգավոր ռեցիդիվը։
Քննարկելով ամբաստանյալի նկատմամբ պատիժ նշանակելու հարցը` դատարանը գտնում է հետևյալը.
ՀՀ քրեական օրենսգրքի 22-րդ հոդվածի համաձայն`
«1. Հանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար։
2. Հանցագործությունների ռեցիդիվը վտանգավոր է համարվում՝
1) դիտավորությամբ հանցանք կատարելու դեպքում, եթե անձը նախկինում երկու անգամից ոչ պակաս ազատազրկման է դատապարտվել դիտավորյալ հանցագործության համար.
2) ծանր հանցանք կատարելու դեպքում, եթե անձը նախկինում ազատազրկման է դատապարտվել ծանր կամ առանձնապես ծանր հանցագործության համար։
3. Հանցագործությունների ռեցիդիվն առանձնապես վտանգավոր է համարվում անձի կողմից՝
1) դիտավորությամբ այնպիսի հանցանք կատարելու դեպքում, որի համար նա դատապարտվում է ազատազրկման, եթե անձը նախկինում երեք անգամից ոչ պակաս ցանկացած հաջորդականությամբ ազատազրկման է դատապարտվել միջին ծանրության դիտավորյալ հանցագործության, ծանր կամ առանձնապես ծանր հանցագործության համար.
2) այնպիսի ծանր հանցանք կատարելու դեպքում, որի համար նա դատապարտվում է ազատազրկման, եթե անձը նախկինում երկու անգամ ազատազրկման է դատապարտվել ծանր կամ առանձնապես ծանր հանցագործության համար.
3) առանձնապես ծանր հանցանք կատարելու դեպքում, եթե անձը նախկինում դատապարտվել է ծանր կամ առանձնապես ծանր հանցագործության համար։
4. Այն հանցանքների համար դատվածությունը, որը հանվել կամ մարվել է օրենքով սահմանված կարգով, ինչպես նաև այն հանցանքները, որոնք կատարվել են մինչև անձի տասնութ տարին լրանալը, ռեցիդիվը գնահատելիս հաշվի չեն առնվում։»։
Նույն օրենսգրքի 67.1 հոդվածի համաձայն`
«1. Հանցագործությունների ռեցիդիվի, վտանգավոր և առանձնապես վտանգավոր ռեցիդիվի դեպքում պատիժ նշանակելիս հաշվի են առնվում կատարված հանցագործությունների քանակը, բնույթը և ծանրությունը, այն հանգամանքները, որոնց հետևանքով նախկին պատիժը բավարար չի եղել մեղավորի ուղղման համար, ինչպես նաև նոր հանցագործության բնույթը, ծանրությունը և հետևանքները։
2. Հանցագործությունների ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի կեսից։
Հանցագործությունների վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երկու երրորդից։
Հանցագործությունների առանձնապես վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երեք քառորդից։»։
Նույն օրենսգրքի 69-րդ հոդվածի համաձայն`
«1. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, կարգապահական գումարտակում պահելու, ազատազրկման ժամկետները հաշվարկվում են ամիսներով և տարիներով։ Հանրային աշխատանքների ժամկետը հաշվարկվում է ժամերով։ Կալանքի ժամկետը հաշվվում է օրերով և ամիսներով։
2. Սույն հոդվածի առաջին մասում նշված պատիժները փոխարինելիս կամ գումարելիս, ինչպես նաև պատիժը հաշվակցելիս ժամկետները կարող են հաշվարկվել օրերով։
3. Մինչև դատավճռի օրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման, կարգապահական գումարտակում պահելու ձևով նշանակված պատժին՝ մեկ օրը հաշվելով մեկ օրվա դիմաց, իսկ հանրային աշխատանքների դեպքում՝ մեկ օրը երեք ժամի դիմաց։ (…)»։
Ամբաստանյալ Հայկ Վարդանյանն իրեն մեղսագրվող յուրաքանչյուր դիտավորյալ հանցագործությունը կատարել է` նախկինում երեք անգամ դատապարտված լինելով միջին ծանրության դիտավորյալ հանցագործությունների և ծանր հանցագործության համար, իսկ առանձնապես ծանր հանցագործության համար չի դատապարտվել, այսինքն առկա է հանցագործությունների վտանգավոր ռեցիդիվ։
Հետևաբար, Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով նախատեսված հանցագործության կատարման համար ամբաստանյալ Հայկ Սուրիկի Վարդանյանը ենթակա է պատժի ազատազրկման ձևով, որը չի կարող նվազ լինել երեք տարի չորս ամիս ժամկետով ազատազրկումից, քանի որ այդ հոդվածի սանկցիայով որպես առավելագույն պատիժ սահմանված է ազատազրկում հինգ տարի ժամկետով։ Հայաստանի Հանրապետության քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության կատարման համար ամբաստանյալ Հայկ Վարդանյանը ենթակա է պատժի ազատազրկման ձևով, որը չի կարող նվազ լինել հինգ տարի չորս ամիս ժամկետով ազատազրկումից, քանի որ այդ հոդվածի սանկցիայով որպես առավելագույն պատիժ սահմանված է ազատազրկում ութ տարի ժամկետով։
Դատարանը գտնում է, որ իր նկատմամբ նշանակված պատիժն ամբաստանյալ Հայկ Վարդանյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով ամբաստանյալ Հայկ Վարդանյանի գույքի և նրա կողմից ներկայացված 190.000 ՀՀ դրամ գումարի վրա նախաքննության մարմնի 20.11.2013թ. և 16.12.2013թ. որոշումներով դրված կալանքի հարցը` դատարանը գտնում է, որ այն պետք է թողնել անփոփոխ` մինչև Հայկ Վարդանյանի գույքային պարտավորությունների մասով դատավճռի կատարումը։
Քննարկելով Ալվարդ Գրիգորի Սաղաթելյանի անվամբ, 47 av 007 պետհամարանիշով, WFOCXXGAECXE34234 նույնացման համարով ավտոմեքենայի վրա նախաքննության մարմնի 28.11.2013թ. որոշմամբ դրված կալանքի հարցը` դատարանը գտնում է, որ այն պետք է վերացնել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 16.12.2013թ. որոշմամբ իրեղեն ապացույցներ ճանաչված, ՀՀ Ազգային անվտանգության ծառայության ֆինանսական վարչությունից ստացված երեսուն հատ 100 դոլարանոց թղթադրամները պետք է վերադարձնել ՀՀ Ազգային անվտանգության ծառայության ֆինանսական վարչությանը, Հայկ Վարդանյանի կողմից քննությանը ներկայացված 2.750 և նրա տնից ներկայացված 9.950 եվրո գումարները պետք է վերադարձնել վարույթն իրականացնող մարմնին` քրեական գործից անջատված մասով տնօրինելու համար, իսկ 190.000 ՀՀ դրամ գումարը պետք է ուղղել դատական ծախսերի փոխհատուցմանը։ Հայկ Վարդանյանի կողմից Արիստակես Քալաշյանից ստացված թղթադրամների, նրա ավտոմեքենայում գումարի հետ գտնված` լազերային սկավառակի, նոթատետրի և ապահովագրության վկայագրի վրայից վերցված քիմիական նյութերի պարունակությամբ բամբակյա խծուծները պետք է ոչնչացնել, Ջասվինդեր Սինգհի անվամբ 00022622, Ռամանդիփ Կումարի անվամբ 00022620, Դավինդեր Կումարի անվամբ 000226203, Կուլդիփ Սինգհի անվամբ 000226266, Սատիշի Կումարի անվամբ 000226201, Լախվինդեր Կումարի անվամբ 000226265, Կուլվիր Սինգհի անվամբ 000226226, Կարկի Նիշանի անվամբ 000226222, Կարկի Սուդհիրի անվամբ 000226220 համարների Լատվիայի մուտքի կեղծ արտոնագրերը պետք է պահել քրեական գործի հետ միասին։
Քննարկելով խափանման միջոցի հարցը` դատարանը գտնում է, որ ամբաստանյալ Հայկ Սուրիկի Վարդանյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է, որ ամբաստանյալ Հայկ Վարդանյանից հօգուտ ՀՀ պետական բյուջեի, որպես դատական ծախսեր բռնագանձման է ենթակա նյութագիտական, փաստաթղթաբանական և նյութագիտական համալիր փորձաքննությունների կատարման արժեք հանդիսացող 467.160 /չորս հարյուր վաթսունյոթ հազար մեկ հարյուր վաթսուն/ ՀՀ դրամ գումարը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-րդ, 365-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Հայկ Սուրիկի Վարդանյանին մեղավոր ճանաչել Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով, 178-րդ հոդվածի 3-րդ մասի 1-ին կետով նախատեսված հանցանքներում և դատապարտել.
ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով` ազատազրկման 4 /չորս/ տարի ժամկետով։
ՀՀ քրեական օրենսգրքի 178-րդ հոդվածի 3-րդ մասի 1-ին կետով` ազատազրկման 5/հինգ/ տարի 6/վեց/ ամիս ժամկետով` առանց գույքի բռնագրավման։
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Հայկ Սուրիկի Վարդանյանի նկատմամբ պատիժ նշանակել ազատազրկում 6 /վեց/ տարի ժամկետով` առանց գույքի բռնագրավման։
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 20.06.2013թ.-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Հայկ Վարդանյանի գույքի և նրա կողմից ներկայացված 190.000 ՀՀ դրամ գումարի վրա նախաքննության մարմնի 20.11.2013թ. և 16.12.2013թ. որոշումներով դրված կալանքը թողնել անփոփոխ` մինչև նրա գույքային պարտավորությունների մասով դատավճռի կատարումը։
Ալվարդ Գրիգորի Սաղաթելյանի անվամբ հաշվառված 47 av 007 պետհամարանիշի, WFOCXXGAECXE34234 նույնացման համարով ավտոմեքենայի վրա նախաքննության մարմնի 28.11.2013թ. որոշմամբ դրված կալանքը վերացնել։
Դատավճռի օրինական ուժի մեջ մտնելուց հետո, իրեղեն ապացույցներ ճանաչված`
ՀՀ Ազգային անվտանգության ծառայության ֆինանսական վարչությունից ստացված 30/երեսուն/ հատ 100/հարյուր/ ԱՄՆ դոլարանոց թղթադրամները վերադարձնել ՀՀ Ազգային անվտանգության ծառայության ֆինանսական վարչություն,
Լատվիայի մուտքի կեղծ արտոնագրերը պահել քրեական գործի հետ միասին,
Հայկ Վարդանյանի կողմից Արիստակես Քալաշյանից ստացված թղթադրամների, նրա ավտոմեքենայում գումարի հետ գտնված` լազերային սկավառակի, նոթատետրի և ապահովագրության վկայագրի վրայից վերցված քիմիական նյութերի պարունակությամբ բամբակյա խծուծները ոչնչացնել,
Հայկ Վարդանյանի կողմից քննությանը ներկայացված 2.750/երկու հազար յոթ հարյուր հիսուն/ և նրա տնից ներկայացված 9.950/ինը հազար ինը հարյուր հիսուն/ եվրո գումարները թողնել քրեական գործից անջատված մասով վարույթն իրականացնող մարմնի տնօրինմանը, իսկ 190.000/մեկ հարյուր իննսուն հազար/ ՀՀ դրամ գումարն ուղղել դատական ծախսերի փոխհատուցմանը։
Ամբաստանյալ Հայկ Սուրիկի Վարդանյանինից հօգուտ ՀՀ պետական բյուջեի բռնագանձել 467.160 /չորս հարյուր վաթսունյոթ հազար մեկ հարյուր վաթսուն/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ