Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

21 հունվարի 2014թ. ք. Երևան

ԵԿԴ-0251/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Երևանի Կենտրոն և Նորք-Մարաշ վարչական
շրջանների դատախազության
դատախազ Մ. Գեղամյանի,

տուժող Հ. Հարությունյանի,



դատարանում, դռնբաց դատական նիստում քննեց գործն ըստ մեղադրանքի
Բագրատ Վիլսոնի Վարդանյանի`
ծնված 1976թ. մարտի 26-ին Գյումրի քաղաքում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուրի, խնամքին ոչ ոք, դատվածություն չունեցող, չի աշխատում, հաշվառված է ք. Գյումրի, Ֆուրմանովի փողոցի թիվ 96 տանը, փաստացի բնակվում է ք. Երևան, Մոլդովական փողոցի թիվ 7ա շենքի թիվ 60 բնակարանում, կալանքի տակ չէ, մեղադրվում է ՀՀ քրեական օրենսգրքի 177-րդ հոդվածի 2-րդ մասի 2-րդ կետով և 322-րդ հոդվածի 1-ին մասով,



Գործի դատավարական նախապատմությունը

Թիվ 13128012 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2012թ. հունիսի 06-ին, ՀՀ քրեական օրենսգրքի 322-րդ հոդվածի 1-ին մասով, Բագրատ Վիլսոնի Վարդանյանի կողմից Հայկանուշ Հարությունյանին պատկանող գույքին ինքնիրավչությամբ տիրանալու դեպքի առթիվ։
Քննիչի 2013թ. հուլիսի 30-ի որոշմամբ հայտարարվել է մեղադրյալ Բագրատ Վարդանյանի հետախուզումը։
2012թ. օգոստոսի 06-ին որոշում է կայացվել թիվ 13128012 քրեական գործի վարույթը կասեցնելու մասին` մեղադրյալ Բ. Վարդանյանի գտնվելու վայրը պարզված չլինելու պատճառաբանությամբ։
19.11.2013թ.-ին Բ. Վարդանյանն ինքնակամ ներկայացել է ՀՀ ոստիկանության Երևան քաղաքի վարչության Մալաթիայի բաժին։
Քննիչի 2013թ. նոյեմբերի 20-ի որոշմամբ թիվ 13128012 քրեական գործի վարույթը վերսկսվել է։
Ամբաստանյալ Բագրատ Վիլսոնի Վարդանյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ կետով և 322-րդ հոդվածի 1-ին մասով` հետևյալ արարքների համար. «որ նա 2011թ. սեպտեմբեր ամսին պայմանավորվածություն է ձեռք բերել Հայկանուշ Հարությունյանի հետ 370.000 ՀՀ դրամի դիմաց իրականացնել վերջինիս Երևան քաղաքի Սայաթ-Նովա 40/1 շենքի 64/3 բնակարանում վերանորոգման աշխատանքներ, ապա 2011թ. նոյեմբեր և դեկտեմբեր ամիսների ընթացքում նշված բնակարանում կատարել է ընդհանուր 162.124 ՀՀ դրամի աշխատանքներ, որի դիմաց ստացել է 40.000 ՀՀ դրամ աշխատավարձ` պահանջելով վճարել մնացած գումարը ևս, ինչը սակայն Հ. Հարությունյանը ֆինանսական խնդիրների պատճառով չի կարողացել կատարել։ Բ. Վարդանյանը, իրականացնելով իր ենթադրյալ իրավունքները, 2012թ. փետրվար մարտ ամսիների ընթացքում իր աշխատավարձի փոխարեն ինքնակամ վերցրել է նշված բնակարանում գտնվող Հ. Հարությունյանին պատկանող ընդհանուր 1.092.523 ՀՀ դրամ արժողության կենցաղային տարբեր տեսակի իրեր, որից 122.124 ՀՀ դրամը որպես իր աշխատանքի վարձատրություն, իսկ մնացած 970.399 ՀՀ դրամ արժողության գույքը գաղտնի հափշտակել է։»։
2013թ. դեկտեմբերի 20-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Բագրատ Վիլսոնի Վարդանյանը չունենալով մշտական աշխատանք` պատվերով կատարել է շինարարական աշխատանքներ։
2011թ. սեպտեմբերին, ամբաստանյալ Բ. Վարդանյանը տեղեկանալով, որ ամուսիններ Հայկանուշ Տիգրանի Հարությունյանը և Հայկ Կարենի Ծատուրյանը ցանկանում են իրենց պատկանող, Երևան քաղաքի Սայաթ-Նովա փողոցի թիվ 40/1 շենքի թիվ թիվ 64/3 բնակարանում վերանորոգման աշխատանքներ կատարել` համաձայնվել է 370.000 ՀՀ դրամ գումարի դիմաց կատարել այդ աշխատանքները։ Փոխադարձ համաձայնություն ձեռք բերելուց հետո, 2011թ. նոյեմբերին, Հ. Հարությունյանը և Հ. Ծատուրյանը բնակարանի բանալին հանձնել են Բ. Վարդանյանին և վերջինս սկսել է վերանորոգման աշխատանքներ կատարել։
Մինչև 2011թ.-ի նոյեմբերն ամբաստանյալ Բ. Վարդանյանը կատարել է 162.124 ՀՀ դրամ ընդհանուր գումարի չափով վերանորոգման աշխատանքներ, որի ընթացքում տուժող Հ. Հարությունյանը նրան տվել է 40.000 ՀՀ դրամ գումարի չափով աշխատավարձ։ Այնուհետև, ֆինանսական խնդիրների պատճառով տուժող Հ. Հարությունյանն ամբաստանյալ Բ. Վարդանյանին այլևս չի վճարել, իսկ Բ.Վարդանյանը վերանորոգման աշխատանքները չի շարունակել։
2012թ. փետրվար-մարտ ամիսների ընթացքում, ամբաստանյալ Բագրատ Վարդանյանը չկարողանալով ստանալ կատարած աշխատանքի վարձատրությունը` որոշել է տուժող Հ. Հարությունյանի բնակարանից, առանց նրա համաձայնության վերցնել և վաճառել բնակարանի ջեռուցման կաթսան։ Ամբաստանյալ Բ. Վարդանյանը գնացել է Երևան քաղաքի Վարդանանց փողոցում գործող «Գնունի» շինանյութի տոնավաճառ, որտեղ հանդիպել է անծանոթ գնորդի և շուկայականից ցածր գնով առաջարկել է գնել ջեռուցման կաթսա։ Փոխադարձ համաձայնության գալով` նրանք գնացել են տուժող Հ. Հարությունյանի բնակարան, որտեղ ամբաստանյալ Բ.Վարդանյանը տուժող Հ. Հարությունյանին պատկանող, 1.092.523 ՀՀ դրամ ընդհանուր արժողության հիդրոմերսող լոգախցիկը, «Բերետա» տեսակի ջեռուցման կաթսան` իր օդատար խողովակով, երեսունհինգ հատ ջեռուցման մարտկոցները, երկու ծորակները, զուգարանակոնքը, լվացարանը, 25 քմ լամինատը, երկու հատ «Լատեքս» տեսակի ներկը, էլեկտրական ապահովիչներն ու լոգարանի չորանոցը 780.000 ՀՀ դրամ գումարով վաճառել է անծանոթ գնորդին։ Այդ եղանակով, ամբաստանյալ Բագրատ Վարդանյանն ինքնակամ իրականացրել է իր ենթադրյալ` վերանորոգման աշխատանքի դիմաց 122.124 ՀՀ դրամ գումարն այդ ճանապարհով ստանալու իրավունքը, իսկ մնացած, խոշոր չափի` 970.399 ՀՀ դրամ արժողությամբ գույքը գաղտնի հափշտակել է։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Բագրատ Վարդանյանը մեղայականով ներկայացել է նախաքննության մարմնին, իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողի հետ հաշտվել են և հանցագործությամբ տուժողին պատճառված գույքային վնասը կամովին հատուցել է։
Քրեական գործի նախաքննության ընթացքում, «Հայաստանի Հանրապետության փորձագիտական կենտրոն» պետական ոչ առևտրային կազմակերպությունում կատարվել է դատաշինարարատեխնիկական փորձաքննություն, որի արժեքը կազմել է 27.600 /քսանյոթ հազար վեց հարյուր/ ՀՀ դրամ գումար։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Բագրատ Վիլսոնի Վարդանյանի ինքնախոստովանական ցուցմունքներով այն մասին, որ 2011թ. սեպտեմբերին, Հայկանուշ Հարությունյանի և նրա ամուսին Հայկ Ծատուրյանի հետ պայմանավորվել է 370.000 ՀՀ դրամ գումարի դիմաց նրանց` Երևանի Սայաթ-Նովա փողոցի թիվ 40/1 շենքի թիվ 64/3 բնակարանում վերանորոգման աշխատանքներ կատարելու համար։
2011թ. նոյեմբեր և դեկտեմբեր ամիսների ընթացքում, պայմանավորվածության համաձայն նշված բնակարանում սկսել է շինարարական աշխատանքներ կատարել։ Կատարած աշխատանքների համար սկզբնական փուլում Հայկանուշը տվել է 40.000 ՀՀ դրամ գումարի չափով աշխատավարձ, որից հետո պահանջել է դադարեցնել աշխատանքները` հայտնելով, որ ֆինանսական խնդիրներ ունի։
Դրանից հետո սկսել է պարբերաբար պահանջել մնացած գումարը, սակայն Հայկանուշը յուրաքանչյուր անգամ պատճառաբանել է, որ մոտ ժամանակներս կշարունակեն շինարարական աշխատանքները և մնացած գումարը կվճարի։
Նշված բնակարանի մուտքի դռան բանալին եղել է իր մոտ։ 2012թ. փետրվար-մարտ ամսիների ընթացքում գտնվել է ֆինանսական ծանր վիճակում, որի պատճառով որոշել է իրեն պարտք մնացած գումարի դիմաց վաճառել այդ բնակարանի ջեռուցման կաթսան։ Շինանյութի տոնավաճառում հանդիպելով անծանոթ գնորդի` առաջարկել է նշված կաթսան գնել շուկայականից ավելի ցածր գնով։ Համաձայնության գալով` միասին գնացել են նշված բնակարան, որտեղ որոշել և առաջարկել է այդ անձին վաճառել նաև Հ. Հարությունյանին պատկանող մնացած գույքը։ Գնորդի հետ համաձայնություն է ձեռք բերել և նրան վաճառել է լոգախցիկը, ջեռուցման կաթսան, ջեռուցման մարտկոցները, ծորակները, զուգարանակոնքը, լվացարանը, լամինատը, «Լատեքս» տեսակի ներկը, էլեկտրական ապահովիչները, լոգարանի չորանոցը, որոնց դիմաց ստացել է 780.000 ՀՀ դրամ ընդհանուր գումար։ Հետագայում մեկնել է Ռուսաստանի Դաշնություն, որտեղից վերադարձել է 2013թ. նոյեմբերի 19-ին։ Տուժողին պատճառված գույքային վնասն ամբողջությամբ վերականգնել է։
/դատական նիստի արձանագրություն, գ.թ. 141-143, 148-150, 151-153, 161-163/
Տուժող Հայկանուշ Տիգրանի Հարությունյանի ցուցմունքներով այն մասին, որ իրենց` Երևան քաղաքի Սայաթ-Նովա փողոցի թիվ 40/1 շենքի թիվ 64/3 բնակարանը վերանորոգելու նպատակով, 2011թ. սեպտեմբերին պայմանավորվածություն է ձեռք բերել Բագրատ Վիլսոնի Վարդանյանի հետ, որը պարտավորվել է 370.000 ՀՀ դրամով իրականացնել պատվիրված աշխատանքը։ Աշխատանքները սկսվելուց հետո Բագրատին վճարել է 40.000 ՀՀ դրամ գումար, սակայն ֆինանսական խնդիրների պատճառով վերանորոգման աշխատանքներն անավարտ են մնացել։ Բ.Վարդանյանը պարբերաբար իրենից և ամուսնուց պահանջել է կատարված աշխատանքի համար վճարել պայմանավորված գումարը, սակայն գումար չունենալու պատճառով չեն կարողացել վճարել նրան։ Բնակարանի բանալին ի սկզբանե գտնվել է Բագրատի մոտ։
2012թ. մարտի 07-ին գնացել է բնակարան և հայտնաբերել, որ այնտեղից բացակայում են 1.092.523 ՀՀ դրամ ընդհանուր արժողության հիդրոմերսող լոգախցիկը, «Բերետա» տեսակի ջեռուցման կաթսան` իր օդատար խողովակով, 35 հատ ջեռուցման մարտկոցները, 2 հատ ծորակները, զուգարանակոնքը, լվացարանը, 25 քմ լամինատը, 2 հատ «Լատեքս» տեսակի ներկը, էլեկտրական ապահովիչները և լոգարանի չորանոցը։ Բ.Վարդանյանն իրեն հայտնել է, որ այդ իրերը վերցրել է պարտքի դիմաց։ Դրանից հետո դիմել են ՀՀ ոստիկանության Կենտրոնականի բաժին և կատարվածի կապակցությամբ հաղորդում տվել։ Քննության ընթացքում Բագրատն ամբողջությամբ փոխհատուցել է իրեն պատճառված գույքային վնասը, որի պատճառով հաշտվել է նրա հետ։
/դատական նիստի արձանագրություն, գ.թ. 66-68, 86-87, 151-153, 157/
Վկա Հայկ Կարենի Ծատուրյանի նախաքննական ցուցմունքներով այն մասին, որ իրենց` Երևան քաղաքի Սայաթ-Նովա փողոցի թիվ 40/1 շենքի թիվ 64/3 բնակարանը վերանորոգելու նպատակով, 2011թ. սեպտեմբերին պայմանավորվածություն են ձեռք բերել Բագրատ Վիլսոնի Վարդանյանի հետ, որը պարտավորվել է 370.000 ՀՀ դրամ գումարով իրականացնել պատվիրված աշխատանքը։ Աշխատանքները սկսվելուց հետո իր կին Հայկանուշ Հարությունյանը Բագրատին վճարել է 40.000 ՀՀ դրամ գումար։ Ֆինանսական խնդիրների պատճառով վերանորոգման աշխատանքներն անավարտ են մնացել։ Բ.Վարդանյանը պարբերաբար իրենից և կնոջից պահանջել է վճարել գումարը, սակայն գումար չունենալու պատճառով չեն կարողացել վճարել նրան։ Բնակարանի բանալին ի սկզբանե գտնվել է Բագրատի մոտ։
2012թ. մարտի 07-ին գնացել է բնակարան և հայտնաբերել, որ այնտեղից բացակայում են 1.092.523 ՀՀ դրամ ընդհանուր արժողության հիդրոմերսող լոգախցիկը, «Բերետա» տեսակի ջեռուցման կաթսան` իր օդատար խողովակով, 35 հատ ջեռուցման մարտկոցները, 2 հատ ծորակները, զուգարանակոնքը, լվացարանը, 25 քմ լամինատը, 2 հատ «Լատեքս» տեսակի ներկը, էլեկտրական ապահովիչները և լոգարանի չորանոցը։ Բ.Վարդանյանն իրեն հայտնել է, որ այդ իրերը վերցրել է պարտքի դիմաց։ Դրանից հետո դիմել են ՀՀ ոստիկանության Կենտրոնականի բաժին և կատարվածի կապակցությամբ հաղորդում են տվել։ Քննության ընթացքում Բագրատն ամբողջությամբ փոխհատուցել է պատճառված գույքային վնասը։
/գ.թ. 71-73, 148-150/
Դատաշինարարատեխնիկական փորձաքննության 2012թ. մայիսի 14-ի թիվ 09601207 եզրակացությամբ, որի համաձայն`
«1. Երևան քաղաքի Սայաթ-Նովա թիվ 40-1 շենքի թիվ 64/3 հասցեում գտնվող բնակարանի վերանորոգման շինարարական ծավալը 2011թ. նոյեմբեր ամսից մինչև դեկտեմբեր ամիսը հետևյալն են`
Հ/Հ Աշխատանքների անվանումը Չափման միավորը Քանակը
1 2 3 4
1 Ներքին պատերի և առաստաղի մածիկապատում մ3 91,6
2 Հատակի ցեմենտավազյա հարթեցնող շերտի իրականացում մ2 3,4
3 Պատերի սվաղ ցեմենտավազյա շաղախով մ2 20,2
4 Հատակի իրականացում արհեստական սալիկներից (տՐպրր չՐՈվՌՑ) մ2 28,2
5 Պատերի իրականացում կերամիկական սալիկներից մ2 3,9
6 Գիպսաստվարաթղթե պատերի և առաստաղի իրականացում մ2 6,8
7 Շինարարական հրապարակի մաքրում շինարարական աղբից տ 0,06
8 Շինարարական աղբի տեղափոխում տ 0,06

2. Երևան քաղաքի Սայաթ-Նովա թիվ 40-1 շենքի թիվ 64/3 հասցեում գտնվող բնակարանի վերանորոգման շինարարական աշխատանքների վարձատրության արժեքը 2011թ. նոյեմբեր ամսից մինչև դեկտեմբեր ամիսը շուկայում գործող գների միջին արժեքներից ելնելով, կարող է կազմել` 162.124 (հարյուր վաթսուներկու հազար հարյուր քսանչորս) դրամ։»։
/գ.թ. 52-57/



Դատարանի իրավական վերլուծությունները.


Վերլուծելով ամբաստանյալ Բագրատ Վիլսոնի Վարդանյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Բագրատ Վիլսոնի Վարդանյանի կողմից, նրա մեղավորությամբ, խոշոր չափերով գողություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 177-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Բագրատ Վիլսոնի Վարդանյանի կողմից, նրա մեղավորությամբ ինքնիրավչություն կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 322-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Բագրատ Վիլսոնի Վարդանյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողի հետ հաշտվել են։
Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում մեղայականով ներկայանալը և հանցագործությամբ տուժողին պատճառված գույքային վնասը կամովին հատուցելը։
Ամբաստանյալի պատասխանատվությունը և պատիժը ծանրացնող հանգամանքներ առկա չեն։
Ամբաստանյալ Բագրատ Վիլսոնի Վարդանյանն իր կատարած` Հայաստանի Հանրապետության քրեական օրենսգրքի ՀՀ քրեական օրենսգրքի 177-րդ հոդվածի 2-րդ մասի 2-րդ կետով և 322-րդ հոդվածի 1-ին մասով նախատեսված յուրաքանչյուր հանցագործության համար ենթակա է պատժի տուգանքի ձևով։
Քննարկելով նշանակված պատիժն ամբաստանյալ Բագրատ Վարդանյանի կողմից կրելու հարցը` դատարանը գտնում է հետևյալը.
«Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ԱԺ 2013թ. հոկտեմբերի 03-ի որոշման 1-ին կետի 2-րդ ենթակետի համաձայն` որոշվել է.
«1. Պատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի`
(…)
այն անձանց, որոնց նկատմամբ նշանակվել է ազատությունից զրկելու հետ չկապված պատիժ.»։
Համաձայն դատարանին ներկայացված փաստաթղթերի` ամբաստանյալ Բ. Վարդանյանը նախկինում դատապարտվել է երկու անգամ`
1. Շենգավիթի ժողդատարանի 20.04.1999թ. դատավճռով, ՀՀ նախորդ քրեական օրենսգրքի 109-րդ հոդվածի 1-ին մասով դատապարտվել է մեկ տարի ժամկետով ուղղիչ աշխատանքների,
2. Շենգավիթի ժողդատարանի 13.04.2001թ. դատավճռով, ՀՀ նախորդ քրեական օրենսգրքի 222-րդ հոդվածի 3-րդ մասով, նույն օրենսգրքի 37-րդ, 38-րդ և 39-րդ հոդվածների կիրառմամբ դատապարտվել է ազատազրկման երեք տարի երկու օր ժամկետով։
Ամբաստանյալ Բ. Վարդանյանի նկատմամբ, վերջին տաս տարվա ընթացքում, ՀՀ Նախագահի ներում շնորհելու մասին հրամանագրի կամ համաներման ակտի կիրառման վերաբերյալ տեղեկություններ քրեական գործում առկա չեն, ի պատասխան դատարանի հարցման` այդպիսի տեղեկություններ չեն հայտնաբերվել և դատարանին չեն տրամադրվել։
Այսպիսով, ամբաստանյալ Բագրատ Վարդանյանի նկատմամբ համաներման կիրառման համար, վերոհիշյալ որոշման 9-րդ կետով սահմանված որևէ սահմանափակում առկա չէ։
Հետևաբար, սույն դատավճռով Բագրատ Վարդանյանի նկատմամբ ենթակա է կիրառման «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013թ. հոկտեմբերի 03-ի որոշումը և ազատությունից զրկելու հետ չկապված պատիժ նշանակելու դեպքում նա ենթակա է պատժից ազատման։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով գույքի վրա դրված կալանքի հարցը` դատարանը գտնում է, որ ամբաստանյալ Բագրատ Վիլսոնի Վարդանյանի գույքի վրա նախաքննության մարմնի 03.08.2012թ. որոշումներով դրված կալանքը պետք է թողնել անփոփոխ` մինչև դատավճռի կատարումը։
Քննարկելով խափանման միջոցի հարցը` դատարանը գտնում է, որ ամբաստանյալ Բագրատ Վարդանյանի նկատմամբ որպես խափանման միջոց չհեռանալու մասին ստորագրությունը ենթակա է վերացման։
Քննարկելով դատական ծախսերի հարցը` դատարանը գտնում է, որ ամբաստանյալ Բագրատ Վիլսոնի Վարդանյանից հօգուտ ՀՀ պետական բյուջեի բռնագանձման է ենթակա դատաշինարարատեխնիկական փորձաքննության կատարման արժեք հանդիսացող 27.600 /քսանյոթ հազար վեց հարյուր/ ՀՀ դրամ գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 168-169-րդ, 357-360-րդ, 364-365-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Բագրատ Վիլսոնի Վարդանյանին մեղավոր ճանաչել Հայաստանի Հանրապետության քրեական օրենսգրքի 177-րդ հոդվածի 2-րդ մասի 2-րդ կետով, 322-րդ հոդվածի 1-ին մասով նախատեսված հանցանքներում և դատապարտել. ՀՀ քրեական օրենսգրքի 177-րդ հոդվածի 2-րդ մասի 2-րդ կետով` տուգանքի նվազագույն աշխատավարձի ութհարյուրապատիկի` 800.000 /ութ հարյուր հազար/ ՀՀ դրամ գումարի չափով, 322-րդ հոդվածի 1-ին մասով` տուգանքի նվազագույն աշխատավարձի չորսհարյուրապատիկի` 400.000 /չորս հարյուր հազար/ ՀՀ դրամ գումարի չափով։
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Բագրատ Վիլսոնի Վարդանյանի նկատմամբ պատիժ նշանակել տուգանք նվազագույն աշխատավարձի հազարապատիկի` 1.000.000 /մեկ միլիոն/ ՀՀ դրամ գումարի չափով։
Համաներման ակտի` «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013թ. հոկտեմբերի 03-ի որոշման 1-ին կետի 2-րդ ենթակետի կիրառմամբ ամբաստանյալ Բագրատ Վիլսոնի Վարդանյանին ազատել նշանակված պատիժը կրելուց։
Խափանման միջոց չհեռանալու մասին ստորագրությունը վերացնել։
Ամբաստանյալ Բագրատ Վարդանյանի գույքի վրա նախաքննության մարմնի 03.08.2012թ. որոշումներով դրված կալանքը թողնել անփոփոխ` մինչև դատավճռի կատարումը։
Ամբաստանյալ Բագրատ Վիլսոնի Վարդանյանից հօգուտ ՀՀ պետական բյուջեի բռնագանձել 27.600 /քսանյոթ հազար վեց հարյուր/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ