Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

11 ապրիլի 2014թ. ք. Երևան

ԵԿԴ-0248/01/13

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան

մասնակցությամբ`
մեղադրող
Ա. Գևորգյանի,

պաշտպան Կ. Խաչատրյանի,

տուժողներ Ս. Մանուկյան,
Թ. Նազարյանի,
Հ. Հարոյանի,

տուժող և քաղաքացիական
հայցվոր Ն. Սիսակյանի,


դատարանում, դռնբաց դատական նիստում քննեց գործն ըստ մեղադրանքի Ռադիկ Եղիշի Ենգիբարյանի
/ծնված 01.05.1961թ. ԼՂՀ Մարտակերտի շրջանի Հաթերք գյուղում, հայ, ՀՀ քաղաքացի, միջնակարգ կրթությամբ, չի աշխատում, ամուսնացած, խնամքին մինչև տասնչորս տարեկան մեկ երեխա, դատվածություն չունի, (ՀՀ Շիրակի մարզի ընդհանուր իրավասության առաջին ատյանի դատարանի 2011թ. հունվարի 19-ի դատավճռով, ՀՀ քրեական օրենսգրքի 215-րդ հոդվածի 1-ին մասով, 188-րդ հոդվածի 3-րդ մասի 1-ին կետով դատապարտվել է ազատազրկման 3 /երեք/ տարի ժամկետով և ՀՀ Ազգային ժողովի «Համաներում հայտարարելու մասին» 2006թ. հուլիսի 07-ի որոշման 1-ին մասի 1-ին կետի կիրառմամբ ազատվել է պատժի կրումից), հաշվառված է և բնակվել է Երևանի Նոր Նորքի 9-րդ զանգվածի թիվ 24 շենքի թիվ 101 բնակարանում, կալանքի տակ է 2013թ. մարտի 02-ից,

մեղադրվում է երկու դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով և երկու դրվագով` ՀՀ քրեական օրենսգրքի 178-րդ հոդվածի 3-րդ մասի 1-ին կետով։


Գործի դատավարական նախապատմությունը

2012թ. հունիսի 20-ին, ՀՀ Շիրակի մարզի քննչական բաժնում, Հայկ Խաչիկի Հակոբյանի գրավոր հաղորդման հիման վրա, ՀՀ քրեական օրենսգրքի 178-րդ հոդվածի 3-րդ մասի 1-ին կետով հարուցվել է թիվ 18117312 քրեական գործը և ընդունվել է քննիչի վարույթ։
2012թ. սեպտեմբերի 06-ին, Երևան քաղաքի Կենտրոն և Նորք-Մարաշ վարչական շրջանների դատախազությունում, ՀՀ քրեական օրենսգրքի 178-րդ հոդվածի 3-րդ մասի 1-ին կետով հարուցվել է թիվ 13200712 քրեական գործը` Ռադիկ Եղիշի Ենգիբարյանի կողմից Նունե Սարգսի Սիսակյանից խարդախությամբ առանձնապես խոշոր չափերի գումար հափշտակելու դեպքի առթիվ։
2012թ. սեպտեմբերի 07-ին նշված քրեական գործն ընդունվել է ՀՀ ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժնի քննիչի վարույթ։
2012թ. դեկտեմբերի 11-ին թիվ 18117312 քրեական գործը ՀՀ Շիրակի մարզի քննչական բաժնից ուղարկվել է ՀՀ ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժին և այն նույն օրն ընդունվել է ավագ քննիչի վարույթ։
2013թ. հունվարի 17-ին թիվ 13200712 քրեական գործի նյութերով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով հարուցվել է թիվ 13104113 քրեական գործը և առանձնացվել առանձին վարույթ։
2013թ. փետրվարի 28-ին քննիչը որոշում է կայացրել Ռադիկ Եղիշի Ենգիբարյանին որպես մեղադրյալ ներգրավելու մասին և նրան մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով։ Նույն օրը նրա նկատմամբ հայտարարվել է հետախուզում և նրա նկատմամբ որպես խափանման միջոց է ընտրվել կալանավորումը։
2013թ. մարտի 02-ին Ռադիկ Եղիշի Ենգիբարյանն ինքնակամ ներկայացել է ՀՀ ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժին։ Նույն օրը Ռ. Ենգիբարյանի նկատմամբ ընտրված խափանման միջոց կալանավորման հարցը վերստին քննության է առնվել, նրա նկատմամբ ընտրված որպես խափանման միջոց թողնվել է կալանավորումը` կալանավորման ժամկետի սկիզբը հաշվելով 2013թ. մարտի 02-ից։
2013թ. մարտի 15-ին քննիչը որոշում է կայացրել թիվ 13104113 քրեական գործը թիվ 13200712 քրեական գործին միացնելու և մեկ վարույթում նախաքննության կատարումը շարունակելու մասին։
2013թ. մարտի 18-ին քննիչը որոշում է կայացրել թիվ 13200712 քրեական գործով Ռադիկ Եղիշի Ենգիբարյանին առաջադրված մեղադրանքի ծավալը փոփոխելու և լրացնելու մասին` նրան նոր մեղադրանք առաջադրելով ՀՀ քրեական օրենսգրքի 178-րդ հոդվածի 3-րդ մասի 1-ին կետով և 178-րդ հոդվածի 2-րդ մասի 2-րդ կետով։
2013թ. մարտի 26-ին ՀՀ ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժնում, Ռադիկ Եղիշի Ենգիբարյանի կողմից խարդախությամբ առանձնապես խոշոր չափերի գումար հափշտակելու դեպքի առթիվ, ՀՀ քրեական օրենսգրքի 178-րդ հոդվածի 3-րդ մասի 1-ին կետով հարուցվել է թիվ 13135313 քրեական գործը և ընդունվել ՀՀ ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժնի ՀԿԳ ավագ քննիչի վարույթ։ Նույն օրը ՀԿԳ ավագ քննիչի վարույթ է ընդունվել թիվ 13200712 քրեական գործը։
2013թ. ապրիլի 22-ին քննիչը որոշում է կայացրել նշված քրեական գործերը միացնելու և նախաքննությունը թիվ 13200712 քրեական գործի վարույթում շարունակելու մասին։
2013թ. օգոստոսի 15-ին քննիչը որոշում է կայացրել թիվ 18117312 քրեական գործը թիվ 13200712 քրեական գործին միացնելու և նախաքննությունը թիվ 13200712 քրեական գործի վարույթում շարունակելու մասին։
2013թ. դեկտեմբերի 06-ին քննիչը որոշում է կայացրել` Յու. Լազյանից պարտքով գումար վերցնելու դրվագով Ռադիկ Եղիշի Ենգիբարյանի նկատմամբ քրեական հետապնդում չիրականացնել հանցակազմի բացակայության հիմքով։
2013թ. դեկտեմբերի 09-ին քննիչը որոշում է կայացրել թիվ 18117312 քրեական գործը թիվ 13200712 քրեական գործից անջատելու և նախաքննությունը թիվ 18117312 քրեական գործի շրջանակներում շարունակելու մասին։
Նախաքննության մարմինը Ռադիկ Եղիշի Ենգիբարյանին մեղադրանք է առաջադրել երկու դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ կետով և երկու դրվագով` ՀՀ քրեական օրենսգրքի 178-րդ հոդվածի 3-րդ մասի 1-ին կետով, հետևյալ արարքների համար` «որ նա 2011թ. ընթացքում խաբեության և վստահությունը չարաշահելու եղանակով կատարել է խոշոր և առանձնապես խոշոր չափերի գույքի հափշտակություններ։ Այսպես՝
Ռադիկ Եղիշի Ենգիբարյանը, չարաշահելով Սմբատ Արևշատի Մանուկյանի վստահությունը, վերջինիս որդուն՝ Տարոն Սմբատի Մանուկյանին, ՀՀ վերաքննիչ քրեական դատարանի միջոցով մինչև 2011թ. հոկտեմբերի վերջը պատժի կրումից ազատելու պատրվակով, միասնական հանցավոր մտադրությամբ միավորված, 2011թ. օգոստոս ամսին մեկ շաբաթ տարբերությամբ, Արարատի մարզի Այգավան համայնքի Դրոյի փողոցի 3 հասցեում գտնվող Սմբատ Մանուկյանին պատկանող տանը վերջինից ստացել է համապատասխանաբար 5.000 ԱՄՆ դոլար և 1.500 ԱՄՆ դոլար կանխիկ գումար, սակայն չկատարելով խոստումը, խաբեությամբ հափշտակել է Ս. Մանուկյանին պատկանող խոշոր չափի՝ 2.362.620 ՀՀ դրամին համարժեք 6.500 ԱՄՆ դոլար գումարը։
Այսինքն, Ռ. Ենգիբարյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Բացի այդ, Ռադիկ Եղիշի Ենգիբարյանը, չարաշահելով Թամարա Հայրապետի Նազարյանի վստահությունը, վերջինիս որդուն՝ Հակոբ Ռաֆիկի Նազարյանին, ՀՀ Վճռաբեկ դատարանի միջոցով մինչև 2011թ. հոկտեմբերի 14-ը պատժի կրումից ազատելու պատրվակով, միասնական հանցավոր մտադրությամբ միավորված 2011թ. օգոստոսի 16-ին Արարատի մարզի Այգավան համայնքի Դրոյի փողոցի 3 հասցեում գտնվող Սմբատ Մանուկյանի տանը Թամարա Նազարյանից ստացել է 16.000 ԱՄՆ դոլար կանխիկ գումար, 2011թ. հոկտեմբերի 11-ին Երևան քաղաքում ստացել է ևս 1.000 ԱՄՆ դոլար կանխիկ գումար, սակայն չկատարելով խոստումը, խաբեությամբ հափշտակել է վերջինիս պատկանող առանձնապես խոշոր չափի՝ 6.258.650 ՀՀ դրամին համարժեք 17.000 ԱՄՆ դոլար գումարը։
Այսինքն, Ռ. Ենգիբարյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 3-րդ մասի 1-ին կետով։
Բացի այդ, 2011թ. սեպտեմբեր ամսին Ռադիկ Եղիշի Ենգիբարյանն իր ծանոթ՝ Երևան քաղաքի Արշակունյաց պողոտայում գործող «Խանում Մկրտչյան» փաստաբանական գրասենյակի տնօրեն Խանում Մկրտչյանին այցելելու ընթացքում` գրասենյակի ընդունարանում ծանոթացել է իրավաբանական օգնություն ստանալու համար դիմած Նունե Սիսակյանի հետ, ապա վերջինիս ու անծանոթ մի կնոջ հետ տեղի ունեցած խոսակցությունից տեղեկացել, որ Ն. Սիսակյանի որդին՝ Արթուր Յարմալոյանը ՀՀ քրեական օրենսգրքի 175-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 2-րդ կետով, 268-րդ հոդվածի 2-րդ մասի 2-րդ կետով և 323-րդ հոդվածով նախատեսված հանցագործություններ կատարելու համար ՀՀ Լոռու մարզի ընդհանուր իրավասության դատարանի 2011թ. փետրվարի 22-ի դատավճռով դատապարտվել է 9 տարի ազատազրկման և պատիժը կրել ՀՀ արդարադատության նախարարության «Արթիկ» քրեակատարողական հիմնարկում, և Ն. Սիսակյանն Ա. Յարմալոյանի` պատժի կրումից ազատելու հնարավոր իրավական ճանապարհ է փնտրում։ Ռ. Ենգիբարյանը նպատակադրվել է հիշյալ պատրվակն օգտագործելու միջոցով Ն. Սիսակյանից գումարներ հափշտակել, ապա հանցավոր մտադրությունն իրագործելու նպատակով վերջինիս հայտնել է, թե իբր կարող է լուծել Ա. Յարմալոյանի պատժի կրումից ազատելու հարցը, ինչի համար պահանջել է 26.000 ԱՄՆ դոլար գումար։ Ն. Սիսակյանը համաձայնել է, որից հետո Ռ. Ենգիբարյանը 2011թ. սեպտեմբերի 20-ից մինչև 2011թ. սեպտեմբերի 30-ն ընկած ժամանակահատվածում, չարաշահելով Ն. Սիսակյանի վստահությունը, վերջինիս որդի Ա. Յարմալոյանին պատժի կրումից ազատելու պատրվակով, միասնական հանցավոր մտադրությամբ միավորված` շարունակաբար Երևան քաղաքի Արշակունյաց և Կոմիտասի պողոտաներում Ն. Սիսակյանից մաս-մաս ստացել և խարդախությամբ հափշտակել է վերջինիս պատկանող առանձնապես խոշոր չափի` 9.736.220 ՀՀ դրամին համարժեք 26.000 ԱՄՆ դոլար գումարը։
Այսինքն, Ռ. Ենգիբարյանը կատարել է հանցավոր արարք, որը նախատեսված է ՀՀ քրեական օրենսգրքի 178-րդ հոդվածի 3-րդ մասի 1-ին կետով։
Բացի այդ, 2011թ. դեկտեմբերի վերջերին Ռադիկ Եղիշի Ենգիբարյանը, գտնվելով իր ծանոթ Վիկտորիա Կիրակոսյանին պատկանող` Երևան քաղաքի Գ. Նժդեհ փողոցի թիվ 8 շենքի թիվ 29 հասցեում գործող «Լոու պրոտեկտ» ՍՊԸ-ի գրասենյակում հանդիպել է թմրամիջոցների ապօրինի շրջանառության մեջ մեղադրվող Ռուստամ Ալեքսանյանին անհրաժեշտ իրավաբանական օգնություն ցուցաբերելու համար դիմած Հարություն Հարոյանին։ Վ. Կիրակոսյանը վերջինիս հայտնել է, որ ցուցաբերվող իրավաբանական ծառայությունները ցանկալի արդյունք չեն տա, ապա` Ռ. Ենգիբարյանը միջամտելով խոսակցությանը հայտնել է, թե իբր իր ունեցած ազդեցիկ ծանոթների միջոցով կարող է օժանդակել և ինչ-որ կերպ բարելավել Ռ. Ալեքսանյանի վիճակը։ Հ. Հարոյանը Ռ. Ենգիբարյանին խնդրել է միջամտել գործի քննությանը, ապա վերջինս չարաշահելով Հ.Հարոյանի վստահությունը, իր ազդեցիկ ծանոթների հետ հանդիպում և հյուրասիրություն կազմակերպելու և այդ ընթացքում Ռ. Ալեքսանյանի վերաբերյալ քննվող քրեական գործի քննությանը միջամտելու հարցը կարգավորելու պատրվակով, խաբեությամբ նույն օրը Վ. Կիրակոսյանի գրասենյակում Հ. Հարոյանից ստացել և խարդախությամբ հափշտակել է վերջինիս պատկանող խոշոր չափի` 1.533.160 դրամին համարժեք 4.000 ԱՄՆ դոլար գումարը։
Այսինքն, Ռ. Ենգիբարյանը կատարել է հանցավոր արարք, որը նախատեսված է ՀՀ քրեակաան օրենսգրքի 178-րդ հոդվածի 2-րդ մասի 2-րդ կետով։
Այսպիսով, Ռադիկ Եղիշի Ենգիբարյանը կատարել է հանցավոր արարքներ, որոնք նախատեսված են ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 178-րդ հոդվածի 3-րդ մասի 1-ին կետով, 178-րդ հոդվածի 3-րդ մասի 1-ին կետով և 178-րդ հոդվածի 2-րդ մասի 2-րդ կետով։»։
2014թ. դեկտեմբերի 20-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Ռադիկ Եղիշի Ենգիբարյանն իր վաղեմի ծանոթ, տուժող Սմբատ Արևշատի Մանուկյանից տեղեկացել է, որ նրա որդի Տարոն Սմբատի Մանուկյանը Գեղարքունիքի մարզի ընդհանուր իրավասության առաջին ատյանի դատարանի 2011թ. մայիսի 18-ի դատավճռով դատապարտվել է 4 տարի ժամկետով ազատազրկման, պատիժը կրում է ՀՀ արդարադատության նախարարության «Սևան» քրեակատարողական հիմնարկում, իսկ Սմբատ Մանուկյանը ցանկանում է օրինական ճանապարհով ազատել Տարոն Մանուկյանին պատժի մնացած մասի կրումից։ Ցանկանալով այդ պատրվակն օգտագործելու միջոցով Սմբատ Մանուկյանից գումար հափշտակել` Ռ. Ենգիբարյանը նրան հայտնել է` իբրև թե կարող է լուծել Տարոն Մանուկյանին պատժի մնացած մասի կրումից ազատելու հարցը և դրա համար պահանջել է 6.500 ԱՄՆ դոլար գումար։ Սմբատ Մանուկյանը համաձայնվել է։ 2011թ. օգոստոսին Արարատի Մարզի Այգավան համայնքի Դրոյի փողոցի թիվ 3 հասցեում գտնվող Սմբատ Մանուկյանի տանը, չարաշահելով վերջինիս վստահությունը, նրա որդի Տարոն Մանուկյանին մինչև 2011թ. հոկտեմբերի վերջը պատժի մնացած մասի կրումից ազատելու պատրվակով, Սմբատ Մանուկյանի կին, վկա Սուսաննա Մանուկյանի ներկայությամբ, Ռադիկ Ենգիբարյանը Սմբատ Մանուկյանից երկու դրվագով ստացել և խարդախությամբ հափշտակել է Սմբատ Մանուկյանին պատկանող խոշոր չափի՝ 2.362.620 ՀՀ դրամին համարժեք 6.500 ԱՄՆ դոլար ընդհանուր գումար։
Բացի այդ ամբաստանյալ Ռադիկ Եղիշի Ենգիբարյանը տուժող Սմբատ Մանուկյանից տեղեկացել է, որ վերջինիս բարեկամ, տուժող Թամարա Հայրապետի Նազարյանի որդի Հակոբ Ռաֆիկի Նազարյանը դատապարտվել է ազատազրկման 4 տարի ժամկետով և պատիժը կրում է ՀՀ արդարադատության նախարարության «Էրեբունի» քրեակատարողական հիմնարկում, իսկ Թամարա Նազարյանը որդուն պատժի մնացած մասի կրումից ազատելու հնարավոր ճանապարհ է փնտրում։ Ցանկանալով Թամարա Նազարյանից գումար հափշտակել` Ռադիկ Ենգիբարյանը նրան հայտնել է իբրև թե կարող է լուծել Հակոբ Նազարյանին պատժի մնացած մասի կրումից ազատելու հարցը և դրա համար պահանջել է 17.000 ԱՄՆ դոլար գումար։ Թամարա Նազարյանը համաձայնվել է։ 2011թ. օգոստոսի 16-ին, Արարատի մարզի Այգավան համայնքի Դրոյի փողոցի թիվ 3 հասցեում գտնվող Սմբատ Մանուկյանի տանը, չարաշահելով Թամարա Նազարյանի վստահությունը, վերջինիս որդի Հակոբ Նազարյանին մինչև 2011թ. հոկտեմբերի վերջը պատժի մնացած մասի կրումից ազատելու պատրվակով, Սմբատ և Սուսաննա Մանուկյանների, ինչպես նաև Թամարա Նազարյանի ամուսին Ռաֆիկ Նազարյանի ներկայությամբ, ամբաստանյալ Ռ. Ենգիբարյանը տուժող Թամարա Նազարյանից ստացել է 16.000 ԱՄՆ դոլար կանխիկ գումար։ 2011թ. հոկտեմբերի 11-ին, Ռ. Նազարյանի ներկայութամբ, Երևան քաղաքում Ռ. Ենգիբարյանը Թ. Նազարյանից ստացել է մնացած 1.000 ԱՄՆ դոլար կանխիկ գումարը և խարդախությամբ հափշտակել Թամարա Նազարյանին պատկանող առանձնապես խոշոր չափի` 6.258.650 ՀՀ դրամին համարժեք 17.000 ԱՄՆ դոլար ընդհանուր գումարը։
Բացի այդ, 2011թ. սեպտեմբերին Ռադիկ Եղիշի Ենգիբարյանն իր ծանոթ՝ Երևան քաղաքի Արշակունյաց պողոտայում գործող «Խանում Մկրտչյան» փաստաբանական գրասենյակի տնօրեն, վկա Խանում Սերյոժայի Մկրտչյանին այցելելու ընթացքում, գրասենյակի ընդունարանում ծանոթացել է իրավաբանական օգնություն ստանալու համար դիմած Նունե Սարգսի Սիսակյանի հետ և տեղեկացել, որ Ն. Սիսակյանի որդի Արթուր Յարմալոյանը ազատազրկում տեսակի պատիժ է կրում, իսկ Ն. Սիսակյանը ցանկանում է Ա. Յարմալոյանին ազատել պատժի մնացած մասի կրումից։ Ռ. Ենգիբարյանը ցանկանալով այդ պատրվակն օգտագործելու միջոցով Ն. Սիսակյանից գումարներ հափշտակել` նրան հայտնել է, իբրև թե կարող է լուծել Ա. Յարմալոյանին պատժի մնացած մասի կրումից ազատելու հարցը, ինչի համար պահանջել է 26.000 ԱՄՆ դոլար գումար։ Ն. Սիսակյանը համաձայնվել է, որից հետո Ռ. Ենգիբարյանը 2011թ. սեպտեմբերի 20-ից մինչև 2011թ. սեպտեմբերի 30-ն ընկած ժամանակահատվածում, չարաշահելով Ն. Սիսակյանի վստահությունը, վերջինիս որդի Ա. Յարմալոյանին պատժի կրումից ազատելու պատրվակով, Երևան քաղաքի Արշակունյաց և Կոմիտասի պողոտաներում Ն. Սիսակյանից մաս-մաս ստացել և խարդախությամբ հափշտակել է վերջինիս պատկանող առանձնապես խոշոր չափի` 9.736.220 ՀՀ դրամին համարժեք 26.000 ԱՄՆ դոլար ընդհանուր գումարը։
Այնուհետև, 2011թ. դեկտեմբերի վերջերին Ռադիկ Եղիշի Ենգիբարյանը գտնվելով իր ծանոթ` վկա Վիկտորիա Հայկի Կիրակոսյանին պատկանող, Երևան քաղաքի Գ. Նժդեհի փողոցի թիվ 8 շենքի թիվ 29 հասցեում գործող «Լոու պրոտեկտ» ՍՊԸ-ի գրասենյակում` հանդիպել է թմրամիջոցների ապօրինի շրջանառության մեջ մեղադրվող Ռուստամ Ալեքսանյանին անհրաժեշտ իրավաբանական օգնություն ցուցաբերելու համար դիմած, տուժող Հարություն Աղաբեկի Հարոյանին։ Հ. Հարոյանը Ռ. Ենգիբարյանին խնդրել է միջամտել գործի քննությանը։ Չարաշահելով Հ. Հարոյանի վստահությունը, իր ազդեցիկ ծանոթների հետ հանդիպում և հյուրասիրություն կազմակերպելու և այդ ընթացքում Ռ. Ալեքսանյանի վերաբերյալ քննվող քրեական գործի քննությանը միջամտելու հարցը կարգավորելու պատրվակով, խաբեությամբ, նույն օրը, Վիկտորիա Կիրակոսյանի գրասենյակում, նրա և նրա որդի Արմեն Էդուարդի Ասատրյանի ներկայությամբ, Ռադիկ Ենգիբարյանը Հարություն Հարոյանից ստացել և խարդախությամբ հափշտակել է վերջինիս պատկանող խոշոր չափի` 1.533.160 դրամին համարժեք 4.000 ԱՄՆ դոլար գումարը։
Ամբաստանյալ Ռադիկ Ենգիբարյանի կողմից, տուժողներին պատճառված գույքային վնասից հարթվել են` տուժող Ս. Մանուկյանի 2.362.620 ՀՀ դրամին համարժեք 6.500 ԱՄՆ դոլար գումարն ամբողջությամբ, տուժող Թ. Նազարյանի 6.258.650.ՀՀ դրամին համարժեք 17.000 ԱՄՆ դոլարից` 4.500 ԱՄՆ դոլար գումարը, տուժող Ն. Սիսակյանի 26.000 ԱՄՆ դոլարից` 4.000 ԱՄՆ դոլար գումարը։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Ռադիկ Ենգիբարյանը խնամքին ունի մինչև տասնչորս տարեկան մեկ երեխա (Արմեն Ռադիկի Ենգիբարյան, ծնված` 2000թ. հունվարի 05-ին), ինքնակամ ներկայացել է քննությանը, տուժողներին պատճառված գույքային վնասը մասնակիորեն, կամովին հատուցել է։
Տուժող Նունե Սարգսի Սիսակյանի կողմից քաղաքացիական հայց է ներկայացվել ամբաստանյալ Ռադիկ Եղիշի Ենգիբարյանի դեմ, որի համաձայն` տուժողը պահանջել է ամբաստանյալ Ռադիկ Ենգիբարյանից հօգուտ իրեն բռնագանձել 22.000 (քսաներկու հազար) ԱՄՆ դոլար գումար` որպես հանցագործության հետևանքով պատճառված վնասի հատուցում։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Թամարա Հայրապետի Նազարյանի ցուցմունքներով այն մասին, որ իր որդի Հակոբ Նազարյանը 2011թ. մայիսի 17-ին դատապարտվել է ազատազրկման չորս տարի ժամանակով, պատիժը կրել է «Էրեբունի» ՔԿՀ-ում, իսկ 2013թ. փետրվարի 08-ին պայմանական վաղաժամկետ ազատվել է պատժի կրումից։ Մինչ որդու ազատվելը` իր բարեկամ Սմբատ և Սուսաննա Մանուկյանները իրենց տուն են եկել Ռադիկ Ենգիբարյանի հետ։ Երբ ծանոթացել են` նա ասել, որ նրանց որդու ազատման հարցը կարող է լուծել, կարող է նաև իր որդու ազատման հարցը լուծել։ 2011թ. օգոստոսի 16-ին ՀՀ Արարատի մարզի Այգավան գյուղում գտնվող, իր բարեկամներ Սմբատ և Սուսաննա Մանուկյանների տանը, Ռադիկ Ենգիբարյանին առձեռն տվել է 16.000 ԱՄՆ դոլար կանխիկ գումար` իր որդի Հակոբ Ռաֆիկի Նազարյանին ՀՀ Վճռաբեկ դատարանի միջոցով պատժի կրումից ազատելու համար։ Գումարը Ռադիկ Ենգիբարյանին տվել է իր ամուսին Ռաֆիկ Նազարյանի և Սմբատ ու Սուսաննա Մանուկյանների ներկայությամբ։ Գումարը տալու ժամանակ Ռադիկ Ենգիբարյանը խոստացել է իրեն` Հակոբ Նազարյանին պատժի կրումից ազատել մինչև 2011թ. հոկտեմբերի վերջը։ Նշված 16.000 ԱՄՆ դոլար գումարը Ռադիկ Ենգիբարյանին պարտքով չի տվել, այլ տվել է Հակոբ Նազարյանին պատժի կրումից ազատելու հարցը կարգավորելու համար։ Այնուհետև 2011թ. սեպտեմբերի վերջին, Գեղարքունիքի մարզի Ձորագյուղ համայնքում գտնվող իրենց տանը, մինչև 2011թ. հոկտեմբերի 14-ը Հակոբ Նազարյանին պատժի կրումից ազատելու համար Ռադիկ Ենգիբարյանը իրենից պահանջել է ևս 4.000 ԱՄՆ դոլար գումար։ Ինքը և ամուսինը նրան հայտնել են, որ չեն կարող նորից այդքան գումար հայթհայթել։ Ռադիկ Ենգիբարյանը պահանջել է թեկուզ 1.000 ԱՄՆ դոլար գումար վճարել` Հակոբ Նազարյանին մինչև 2011թ. հոկտեմբերի 14-ը պատժի կրումից ազատելու համար։ Ինքը և ամուսինը` Ռաֆիկ Նազարյանը, 2011թ. հոկտեմբերի 7-ին Կոտայքի մարզի Առինջ գյուղի մոտակայքում հանդիպել են Ռադիկ Ենգիբարյանին և ինքը նրան առձեռն տվել է ևս 1.000 ԱՄՆ դոլար գումար։ Դրանից հետո Ռադիկ Ենգիբարյանը խոստումը չի կատարել, չի ազատել Հակոբ Նազարյանին պատժի կրումից, տարբեր պատճառաբանություններով խուսափել է իր և ամուսնու հետ հանդիպելուց։ Երևան քաղաքի Նոր-Նորքի 9-րդ զանգվածում, Վիլնյուսի փողոցի վրա գտնվող բարձրահարկ շենքերից մեկի նախավերջին մուտքի 6-րդ հարկում գտնվող բնակարանում հանդիպել է Ռ. Ենգիբարյանի կնոջը` Ալլային, հայտնել, որ Ռ. Ենգիբարյանն իրենից 17.000 ԱՄՆ դոլար գումար է վերցրել, պահանջել է վերադարձնել նշված գումարը։ Ռադիկ Ենգիբարյանը իրենից խաբեությամբ վերցրած 17.000 ԱՄՆ դոլար ընդհանուր գումարից, կնոջ միջոցով, 2012թ. փետրվարի 11-ին իրեն վերադարձրել է 4.000 ԱՄՆ դոլար գումար։ Բացի այդ, ինչ-որ տղամարդու միջոցով իր դուստր Անուշ Նազարյանին է փոխանցել ևս 500 ԱՄՆ դոլար գումար, իսկ 12.500 ԱՄՆ դոլար գումարը մինչ օրս մնացել է Ռադիկ Ենգիբարյանի մոտ, որը վերջինս հափշտակել է։ Սմբատ և Սուսաննա Մանուկյաններից տեղեկացել է, որ նրանք իրենց որդի Տարոն Մանուկյանին պատժի կրումից մինչև 2012թ. փետրվարի 7-ն ազատելու համար գումար են տվել Ռադիկ Ենգիբարյանին, սակայն վերջինս խոստումը չի կատարել և Տարոն Մանուկյանն ազատ չի արձակվել։ Սմբատ և Սուսաննա Մանուկյանների կողմից Ռադիկ Ենգիբարյանին տված գումարի չափի մասին իրեն ոչինչ հայտնի չէ։
/դատական նիստի արձանագրություն, հատոր 2, գ.թ. 177-182, 218-220/
Տուժող Նունե Սարգսի Սիսակյանի ցուցմունքներով այն մասին, որ իր որդի Արթուր Յարմալոյանը 2011թ. փետրվարի 22-ին Լոռու մարզի ընդհանուր իրավասության առաջին ատյանի դատարանի դատավճռով դատապարտվել է ինը տարի ժամկետով ազատազրկման։ Դատավարության ընթացքում որդու շահերը պաշտպանել է իր ծանոթ, փաստաբան Խանում Մկրտչյանը։ Դրանից հետո շարունակել է կապ պահել Խանումի հետ և տեղեկանալով, որ ՀՀ Նախագահի ներման միջոցով հնարավոր է որդուն ազատել` որոշել է ներման խնդրագիր գրել Նախագահին։ Երևան քաղաքի Արշակունյաց փողոցում գտնվող, Խանումի գրասենյակում հանդիպել է Ռադիկ Ենգիբարյանին հետևյալ հանգամանքներում` 2011թ. սեպտեմբերին գրասենյակում Խանումին սպասելու ընթացքում իր խնդիրների մասին պատմել է մինչ այդ իրեն անծանոթ մի կնոջ։ Ռադիկը մոտենալով իրենց և միջամտելով զրույցին` հայտնել է, որ փաստաբաններն իրեն չեն կարող օգնել և օգնություն է առաջարկել՝ ասելով, որ լավ իրավաբաններ ունի և նրանց միջոցով կարող է իր որդուն երկու ամսվա ընթացքում ազատել պատժի կրումից։ Ինքը խոստացել է Ռադիկին այդ խոսակցության մասին ոչ ոքի չհայտնել։ Նա անընդհատ կրկնել է` «ազատվելու է միայն մեկը, շուտ որոշիր։»։ Եկել է կնոջ հետ, ով հավաստիացրել է, որ ամուսինը այդպիսի շատ հարցեր է լուծել։ Մի քանի օր անց Մամուլի շենքի մոտ հանդիպել է Ռադիկին և նրանից տեղեկացել է, որ պատժի կրումից որդուն ազատելը հնարավոր է` 26.000 ԱՄՆ դոլար գումարի դիմաց։ Գումարի շուրջ համաձայնության գալով՝ 2011թ. սեպտեմբերի 20-ին Երևան քաղաքի Արշակունյաց պողոտայի վրա գտնվող Մամուլի շենքի դիմաց Ռադիկին հանձնել է 13.000 ԱՄՆ դոլար գումար։ Դրանից մի քանի օր անց Կոմիտասի պողոտայի վրա գտնվող «Էյչ-Էս-Բի-Սի բանկ»-ի մոտ նրան տվել է 2.000 ԱՄՆ դոլար գումար, որի ժամանակ ներկա է գտնվել Ռադիկի կինը, ով ներկայացել է Ալլա անունով։ Մի քանի օր անց Մամուլի շենքի մոտ Ռադիկին է տվել ևս 11.000 ԱՄՆ դոլար գումար։ Որդուն երկու ամսվա ընթացքում պատժի կրումից ազատելու համար, Ռ. Ենգիբարյանի պահանջով նրան տվել է ընդհանուր առմամբ 26.000 ԱՄՆ դոլար գումար։ Դրանից հետո անցել է բավականին երկար ժամանակ և երբ ստացել է ՀՀ Նախագահին գրված ներման խնդրագրի մերժումը` հասկացել է, որ այդ ողջ ընթացքում Ռադիկը խաբել է իրեն և տիրացել գումարին։ Հասկանալով, որ Ռադիկը խաբել է իրեն` կատարվածի մասին պատմել է Խանում Մկրտչյանին, ով Ռադիկից պահանջել է իրեն վերադարձնել գումարը։ Ռ. Ենգիբարյանը խոստացել է, որ որդին դուրս կգա 2011թ. դեկտեմբերի 31-ին։ Որդին դուրս չի եկել։ Ռ. Ենգիբարյանն անընդհատ նշել է, իբրև թե որդու թղթերը Նախագահի սեղանին են, ստորագրելու է ուրբաթ օրերին։ Երբ եկել է մերժման թուղթը` Ռադիկն ասել է, որ էլի հարցը կլուծի։ Հետ է ուզել իր գումարը և չորս անգամ Երևանում նրան սպասել է մինչև գիշերվա 12-ը։ Մի օր էլ Խանումի գրասենյակում սպասել է, երբ Ռադիկն ասել է, որ «պրեզիդենտի» մոտ է, դուրս կգա և կբերի գումարը, բայց հերթական անգամ խաբել է։ Կինը ասել է, որ գումարը տարբեր անձանց մոտ է, կհավաքեն, կվերադարձնեն։ Ինքը գումարը տվել է 13.000-2.000-11.000 հաջորդականությամբ։ Հետագայում իրեն հետ են վերադարձրել` Ռադիկը 3.000, կինը` 1.000, այսինքն ընդամենը 4.000 ԱՄՆ դոլար գումար։ 2011թ. հոկտեմբերին, 26.000 ԱՄՆ դոլարը տալուց հետո Ռ. Ենգիբարյանը զանգել և ասել է, որ «գեներալի աղջկա» հարսանիք է գնալու և խնդրել է պարտքով իրեն տալ 1.000 ԱՄՆ դոլար` նվերի փող, բայց ինքը գումար չի ճարել։
/դատական նիստի արձանագրություն, հատոր 1, գ.թ. 98-99, 101-102, 107, 148-151, 159-161, 162/
Տուժող Հարություն Աղաբեկի Հարոյանի ցուցմունքներով այն մասին, որ 2011թ. դեկտեմբերին իր վաղեմի ծանոթ Վիկտորիա Կիրակոսյանի՝ Երևան քաղաքի Գ. Նժդեհի հրապարակում գտնվող փաստաբանական գրասենյակում հանդիպելով Վիկտորիա Կիրակոսյանին, վերջինիս որդի Արմեն Ասատրյանին և մինչ այդ իրեն անծանոթ Ռադիկ Ենգիբարյանին, նրանց պատմել է, որ իր որդու ընկեր Ռուստամ Ալեքսանյանը, թմրամիջոցների հետ կապված ինչ-որ գործով գտնվում է կալանքի տակ և ցանկություն է հայտնել ինչ-որ կերպ օգնել նրան։ Վիկտորիան իրեն պատասխանել է, որ ոչնչով չի կարող օգնել։ Այդ ժամանակ իր և Վիկտորիայի խոսակցությանը միջամտել է Ռադիկը՝ ասելով, որ ինքը մեծ շրջապատ և ազդեցիկ ընկերներ ունի, իր կապերով կարող է օգնել իր որդու ընկերոջը։ Ռադիկն այդ հարցը լուծելու համար իրենից պահանջել է 5.000 ԱՄՆ դոլար գումար՝ ծանոթներին պատիվ տալու և նվերներ գնելու նպատակով։ Ինքն ասել է, որ ունի ընդամենը 4.000 ԱՄՆ դոլար և Ռադիկը համաձայնվել է։ Հավատալով Ռ. Ենգիբարյանին՝ նշված հանդիպումից մի քանի ժամ անց, նույն գրասենյակում Վիկտորիայի և Արմենի ներկայությամբ Ռադիկ Ենգիբարյանին տվել է 4.000 ԱՄՆ դոլար գումար, որը վերցնելուց հետո Ռ. Ենգիբարյանը խոստացել է մոտ օրերի ընթացքում պատասխան տալ, սակայն իր խոստումը չի կատարել։ 2012թ. հունվարին, ամանորի տոներից հետո ինքը զանգահարել է Վիկտորիային, խնդրել է նրան կապվել Ռադիկի հետ և հետ պահանջել գումարը։ Ռադիկը խոստացել է Վիկտորիային` մոտ օրերին գումարը վերադարձնել, սակայն չի վերադարձրել։
/դատական նիստի արձանագրություն, հատոր 1, գ.թ. 110-112, հատոր 2, գ.թ. 59-61, 92-93/
Տուժող Սմբատ Արևշատի Մանուկյանի նախաքննական ցուցմունքներով այն մասին, որ իր որդի Տարոն Մանուկյանը, գողություն կատարելու համար 2011թ. մայիսի 18-ին դատապարտվել է 4 տարի ժամկետով ազատազրկման։ Այդ ընթացքում Ռադիկ Ենգիբարյանը, որի սանիկն իր բարեկամն է եղել, իրենից տեղեկացել է որդու դատապարտված լինելու մասին և առաջարկել է ՀՀ Վերաքննիչ քրեական դատարանի միջոցով որդուն ազատել պատժի կրումից։ Դրանից հետո, 2011թ. օգոստոսի առաջին կեսին, Արարատի մարզի Այգավան գյուղի Դրոյի փողոցի թիվ 3 հասցեում գտնվող իր տանը, կնոջ` Սուսաննա Մանուկյանի ներկայությամբ Ռադիկ Ենգիբարյանին կանխիկ տվել է 5.000 ԱՄՆ դոլար գումար, իսկ դրանից մոտ մեկ շաբաթ անց` ևս 1.500 ԱՄՆ դոլար գումար, քանի որ Ռ. Ենգիբարյանը Տ. Մանուկյանին պատժի կրումից ազատելու համար պահանջել է 6.500 ԱՄՆ դոլար գումար։ Գումարը վերցնելուց հետո Ռ. Ենգիբարյանը խոստացել է Տ. Մանուկյանին պատժի կրումից ազատել մինչև 2011թ. հոկտեմբերի վերջը, սակայն խոստումը չի կատարել և հափշտակել է նշված գումարը։ Այնուհետև Ռ. Ենգիբարյանը իրենից վերցրած 6.500 ԱՄՆ դոլար գումարից, մինչև 2012թ. օգոստոս ամիսը վերադարձրել է 6.300 ԱՄՆ դոլարը, իսկ 200 ԱՄՆ դոլարը խոստացել է վերադարձնել մինչև 2013թ. փետրվար ամիսը։ Ինքը նշված 6.500 ԱՄՆ դոլար գումարը պարտքով չի տվել Ռ. Ենգիբարյանին։ Այդ գումարը տվել է նրան` իր որդի Տարոն Մանուկյանին ՀՀ վերաքննիչ քրեական դատարանի միջոցով պատժի կրումից ազատելու համար։
Իրենց բարեկամներ Ռաֆիկ և Թամարա Նազարյանների որդի Հակոբ Նազարյանի` ազատազրկման դատապարտված լինելու մասին Ռադիկ Ենգիբարյանը տեղեկացել է իրենից։ Համոզված լինելով, որ Ռադիկը օգնելու է իր որդուն պատժի կրումից ազատվելու հարցում` Ռադիկի գոյության մասին հայտնել է Ռաֆիկ և Թամարա Նազարյաններին, որից հետո 2011թ. օգոստոսի 16-ին, պայմանավորվածության համաձայն Թամարա և Ռաֆիկ Նազարյանները Արարատի մարզի Այգավան գյուղում գտնվող իր տանը հանդիպել են Ռադիկ Ենգիբարյանի հետ։ Այդտեղ Թ. Նազարյանն իր ներկայությամբ Ռ. Ենգիբարյանին տվել է 16.000 ԱՄՆ դոլար կանխիկ գումար` Հակոբ Նազարյանին դատարանի միջոցով պատժի կրումից ազատելու համար։ Հետագայում Թ. Նազարյանից տեղեկացել է, որ 16.000 ԱՄՆ դոլարը վերցնելուց հետո Ռ. Ենգիբարյանը մեկ-երկու ամիս անց Թ. Նազարյանից վերցրել է ևս 1.000 ԱՄՆ դոլար գումար` խոստանալով Հակոբ Նազարյանին պատժի կրումից ազատելու հարցը արագացնել և նրան ազատել ոչ թե մինչև 2011թ. հոկտեմբերի վերջը, այլ` մինչև 2011թ. հոկտեմբերի 14-ը, սակայն Ռ. Ենգիբարյանը խոստումը չի կատարել։ Թ. Նազարյանից տեղեկացել է, որ բազմաթիվ անախորժ խոսակցություններից և ձգձգումներից հետո 17 000 ԱՄՆ դոլար գումարից Ռ. Ենգիբարյանը Թ. Նազարյանին վերադարձրել է 4 500 ԱՄՆ դոլար գումար, իսկ 12 500 ԱՄՆ դոլարը մնացել է Ռ. Ենգիբարյանի մոտ։
/հատոր 2, գ.թ. 252-255/
Վկա Սուսաննա Ժորայի Մանուկյանի ցուցմունքով այն մասին, որ իր որդի Տարոն Մանուկյանը գողություն կատարելու համար 2011թ. մայիսի 18-ին դատապարտվել է 4 տարի ժամկետով ազատազրկման։ Այդ ընթացքում, իրենց ծանոթ Ռադիկ Ենգիբարյանը իր ամուսին Սմբատ Մանուկյանից տեղեկացել է որդու` դատապարտված լինելու մասին և առաջարկել է ՀՀ վերաքննիչ քրեական դատարանի միջոցով որդուն ազատել պատժի կրումից։ 2011թ. օգոստոսի առաջին կեսին ամուսինը Արարատի մարզի Այգավան գյուղի Դրոյի փողոցի թիվ 3 հասցեում գտնվող իրենց տանը իր ներկայությամբ Ռադիկ Ենգիբարյանին վերջինիս պահանջով կանխիկ տվել է 5.000 ԱՄՆ դոլար գումար, իսկ դրանից մոտ մեկ շաբաթ անց` ևս 1.500 ԱՄՆ դոլար գումար, իրենց որդի Տ. Մանուկյանին պատժի կրումից մինչև 2011թ. հոկտեմբերի վերջը ազատելու համար, սակայն Ռ. Ենգիբարյանը խոստումը չի կատարել և հափշտակել է նշված 6.500 ԱՄՆ դոլար գումարը։ Այնուհետև Ռ. Ենգիբարյանը ամուսնուց վերցրած 6.500 ԱՄՆ դոլար գումարից մինչև 2012թ. օգոստոս ամիսը վերադարձրել է 6.300 ԱՄՆ դոլարը, իսկ հետագայում` նաև մնացած 200 ԱՄՆ դոլարը։
Իրենց բարեկամներ Ռաֆիկ և Թամարա Նազարյանների որդի Հակոբ Նազարյանի` ազատազրկման դատապարտված լինելու մասին Ռադիկ Ենգիբարյանը տեղեկացել է իր ամուսին Սմբատ Մանուկյանից։ Վերջինս համոզված լինելով, որ Ռադիկն օգնելու է իրենց որդուն պատժի կրումից ազատվելու հարցում` Ռադիկի գոյության մասին հայտնել է Ռաֆիկ և Թամարա Նազարյաններին, որից հետո, 2011թ. օգոստոսի կեսերին, պայմանավորվածության համաձայն Թամարա և Ռաֆիկ Նազարյանները Արարատի մարզի Այգավան գյուղում գտնվող իրենց տանը հանդիպել են Ռադիկ Ենգիբարյանի հետ, որտեղ Թ. Նազարյանն իր և ամուսնու ներկայությամբ, նաև Ռաֆիկ Նազարյանի ներկայությամբ Ռ. Ենգիբարյանին տվել է 16.000 ԱՄՆ դոլար կանխիկ գումար` Հակոբ Նազարյանին դատարանի միջոցով պատժի կրումից ազատելու համար։ Հետագայում Թ. Նազարյանից տեղեկացել է, որ 16.000 ԱՄՆ դոլարը վերցնելուց հետո Ռ. Ենգիբարյանը մեկ-երկու ամիս անց Թ. Նազարյանից վերցրել է ևս 1.000 ԱՄՆ դոլար գումար` խոստանալով Հակոբ Նազարյանին պատժի կրումից ազատելու հարցը արագացնել և նրան ազատել ոչ թե մինչև 2011թ. հոկտեմբերի վերջը, այլ մինչև 2011թ. հոկտեմբերի 14-ը, սակայն Ռ. Ենգիբարյանը խոստումը չի կատարել։ Թ. Նազարյանից խաբեությամբ վերցրած 17.000 ԱՄՆ դոլար գումարից Ռ. Ենգիբարյանը Թ. Նազարյանին վերադարձրել է 4.500 ԱՄՆ դոլար գումար, իսկ 12.500 ԱՄՆ դոլարը մնացել է Ռ. Ենգիբարյանի մոտ։
/դատական նիստի արձանագրություն, հատոր 2, գ.թ. 240-243, 247-249/
Վկա Անուշ Ռաֆիկի Նազարյանի ցուցմունքով այն մասին, որ իր եղբայր Հակոբ Նազարյանը, 2011թ. մայիսին դատապարտվել է ազատազրկման, պատիժը կրել է «Էրեբունի» քրեակատարողական հիմնարկում, իսկ 2013թ. փետրվարի 8-ին պայմանական վաղաժամկետ ազատվել է պատժի կրումից։ Մինչ ազատվելը, Հակոբ Նազարյանին ՀՀ Վճռաբեկ դատարանի միջոցով պատժի կրումից ազատելու պատրվակով, 2011թ. օգոստոսի 16-ին, Արարատի մարզի Այգավան գյուղում գտնվող իրենց բարեկամներ Սմբատ և Սուսաննա Մանուկյանների տանը, վերջիններիս և իր հայր Ռաֆիկ Նազարյանի ներկայությամբ, Ռադիկ Ենգիբարյանը իր մայր Թամարա Նազարյանից ստացել է 16.000 ԱՄՆ դոլար կանխիկ գումար` խոստանալով իր եղբայր Հակոբ Նազարյանին պատժի կրումից ազատել մինչև 2011թ. հոկտեմբերի վերջը։ 2011թ. սեպտեմբերի վերջերին Ռադիկ Ենգիբարյանը Գեղարքունիքի մարզի Ձորագյուղ համայնքում գտնվող իր հայրական տանը հանդիպելով Թամարա և Ռաֆիկ Նազարյաններին` պահանջել է ևս 4.000 ԱՄՆ դոլար գումար` Հակոբ Նազարյանին պատժի կրումից ազատելու հարցը մեկ շաբաթվա ընթացքում կարգավորելու համար։ Մայրը հայտնել է նրան, որ ի վիճակի չէ ևս 4.000 ԱՄՆ դոլար գումար վճարելու, որից հետո նույն հարցը կարգավորելու համար Ռ. Ենգիբարյանը պահանջել է թեկուզ ավելացնելու 1.000 ԱՄՆ դոլար գումար։ Մայրը և հայրը ճարահատյալ ձեռք են բերել նշված 1.000 ԱՄՆ դոլար գումարը։ 2011թ. հոկտեմբերի 7-ին, պայմանավորվածության համաձայն, հանդիպել են Ռադիկ Ենգիբարյանին Երևան քաղաքի Ավան համայնքում գտնվող «Հյուսիսային» ավտոկայանում, որտեղ մայրը Ռ. Ենգիբարյանին է տվել նշված 1.000 ԱՄՆ դոլար գումարը` Հակոբ Նազարյանին պատժի կրումից ազատելու հարցը մինչև 2011թ. հոկտեմբերի 14-ը լուծելու համար, սակայն Ռ. Ենգիբարյանը չի կատարել խոստումը։ Մայրը Ռադիկ Ենգիբարյանի պահանջով ընդհանուր առմամբ նրան տվել է 17.000 ԱՄՆ դոլար կանխիկ գումար։ 2012թ. փետրվարի 11-ին Ռ. Ենգիբարյանը նշված գումարից վերադարձրել է 4.000 ԱՄՆ դոլար գումար, իսկ 2012թ. դեկտեմբերի 30-ին ոմն Վիգենի միջոցով իրեն է փոխանցել ևս 500 ԱՄՆ դոլար կանխիկ գումար։ Մնացած 12.500 ԱՄՆ դոլար գումարը Ռադիկ Ենգիբարյանը խաբեությամբ հափշտակել է։ Իր հայր Ռաֆիկ Նազարյանի` ավտովթարի ենթարկվելուց հետո, 2012թ. նոյեմբերին Թամարա Նազարյանի հետ գնացել է Երևան քաղաքի Նոր-Նորքի 9-րդ զանգվածում գտնվող Ռադիկ Ենգիբարյանի բնակարան, որտեղ հանդիպել է նրա կին Ալլայի հետ։ Նշված բնակարանում իր ներկայությամբ մայրը Ալլայից պահանջել է վերարադարձնել 13.000 ԱՄՆ դոլար գումարը` նշելով, որ Ռադիկ Ենգիբարյանը պահանջել և ստացել է 17.000 ԱՄՆ դոլար գումար` Հակոբ Նազարյանին պատժի կրումից ազատելու համար։
/դատական նիստի արձանագրություն, հատոր 2, գ.թ. 211-213/
Վկա Խանում Սերյոժայի Մկրտչյանի ցուցմունքներով այն մասին, որ «Խանում Մկրտչյան» փաստաբանական գրասենյակում զբաղվում է փաստաբանական գործունեությամբ։ Շուրջ երեք տարի առաջ ծանոթացել է Նունե Սիսակյանի հետ, պաշտպանել նրա որդի Արթուր Յարմալոյանի շահերը։ Վերջինս 2011թ. փետրվարին, Լոռու մարզի ընդհանուր իրավասության առաջին ատյանի դատարանի դատավճռով դատապարտվել է 9 տարի ժամկետով ազատազրկման։ Դրանից հետո շարունակել է հանդիպել Նունե Սիսակյանի հետ։ Նա փորձել է որդուն ազատել կալանքից, որի համար նրան ՀՀ Նախագահին ուղղված դիմումի ձև է տվել։ Արթուր Յարմալոյանը գրել է համապատասխան դիմումը և քրեակատարողական հիմնարկի միջոցով ուղարկել է համապատասխան վարչություն, սակայն դիմումը մերժվել է։
Շուրջ 2 տարի ճանաչել է Ռադիկ Ենգիբարյանին` փաստաբան Սիրունյան Ալիկի միջոցով։ Վերջինս խնդրել է մասնակցել նրա վերաբերյալ էքստրադիցիայի գործին։ Նրա հետ ծանոթացել է այդ առթիվ և առնչվել է այդ գործով։ Նա պարբերաբար այցելել է իր գրասենյակ։ 2011թ. վերջերին Նունե Սիսակյանից տեղեկացել է, որ նա 2011թ. սեպտեմբերին իր գրասենյակում ծանոթացել է Ռադիկ Ենգիբարյանի հետ։ Վերջինս առաջարկել և խոստացել է Նունե Սիսակյանին` նրա որդուն ազատել պատժի կրումից, որի դիմաց Ն. Սիսակյանից պահանջել և ստացել է 26.000 ԱՄՆ դոլար գումար, սակայն այդ ուղղությամբ ոչ մի քայլ չի ձեռնարկել։ Նունե Սիսակյանից տեղեկանալով այդ մասին` Ռադիկ Ենգիբարյանից պահանջել է վերադարձնել Ն. Սիսակյանի գումարը։ Ռ. Ենգիբարյանը հայտնել է, որ գումարները բաժանել է տարբեր տեղեր և խոստացել է վերադարձնել այն, սակայն չի վերադարձրել։ Երբ ինքը զանգել և նրա կնոջից պահանջել է գումարը` վերջինս հայտնել է, որ նա այդ գումարը բաժանել է տարբեր մարդկանց։
Հայտնել է նաև, որ Ռադիկ Ենգիբարյանի դեմ գործ չէին հարուցում, անընդհատ ձգձգում էին, իսկ քրեական գործ հարուցելուց հետո` նա խնդրել է, որ առերեսումների չգնան, այլապես չի վերադարձնի նաև իր ամուսնու քրոջ ամուսին Յուրայի 5.000 ԱՄՆ դոլար գումարը։
Ռադիկ Ենգիբարյանը լավ տեղեկացված է եղել ներման հրամանագրերի փուլերի մասին։ Նա վկա Յու. Լազյանից էլ է գումար կորզել` ՊՆ-ից գումար ստանալու համար։ Ռ. Ենգիբարյանն անընդհատ ասել է, որ Սիլիկյան թաղամասում հող է ուզում գնել, տուն է առնում։
/դատական նիստի արձանագրություն, հատոր 1, գ.թ. 124-125, հատոր 2, գ.թ. 25-26/
Վկա Կարո Ալբերտի Մարգարյանի ցուցմունքով այն մասին, որ իր կին Խանում Մկրտչյանի փաստաբանական գրասենյակում շուրջ երկու տարի առաջ ծանոթացել է Ռադիկ Ենգիբարյանի հետ և նրա հետ գտնվել է նորմալ հարաբերություների մեջ։ Ռադիկ Ենգիբարյանը 26.000 ԱՄՆ դոլար գումար է վերցրել Նունե Սիսակյանից՝ վերջինիս որդուն կալանավայրից ազատելու պատրվակով, սակայն խոստումը չի կատարել և գումարն էլ չի վերադարձրել։ Նունե Սիսակյանին ճանաչել է կնոջ՝ Խանում Մկրտչյանի միջոցով, քանի որ Նունե Սիսակյանի որդու փաստաբանը հանդիսացել է Խանում Մկրտչյանը։
/դատական նիստի արձանագրություն, հատոր 1, գ.թ. 105-106, հատոր 2, գ.թ. 28-29/
Վկա Յուրի Նիկոլայի Լազյանի ցուցմունքով այն մասին, որ կնոջ եղբոր՝ Կարո Մարգարյանի խնդրանքով 2011թ. հոկտեմբերի 31-ին Երևան քաղաքի Արշակունյաց պողոտայում գտնվող «SX գարաժ» ավտոսերվիսի մոտակայքում Ռադիկ Ենգիբարյանին պարտքով տվել է 5.000 ԱՄՆ դոլար գումար՝ չորս ամիս հետո վերադարձնելու պայմանով։ Հայտնել է նաև, որ փաստաբան Խանում Մկրտչյանից տեղեկացել է, որ Ռադիկ Ենգիբարյանը Նունե անունով իրեն անծանոթ մի կնոջից գումար է վերցրել` վերջինիս որդուն կալանավայրից ազատելու պատրվակով, սակայն ոչ խոստումն է կատարել, ոչ էլ գումարն է վերադարձրել։
/դատական նիստի արձանագրություն, հատոր 1, գ.թ. 103-104/
Վկա Վիկտորիա Հայկի Կիրակոսյանի ցուցմունքով այն մասին, որ հանդիսանում է «Լոու պրոտեկտ» ՍՊԸ-ի տնօրենը և զբաղվում է փաստաբանական գործունեությամբ։ Բավականին երկար ժամանակ ճանաչել է Հարություն Հարոյանին, ում հետ գտնվել է ջերմ, ընկերական հարաբերությունների մեջ։ 2011թ. նոյեմբերին ծանոթացել է իր համակուրսեցի Լիլիայի ազգական Ռադիկ Ենգիբարյանի հետ։ 2011թ. դեկտեմբերին Ռադիկը եկել է իր գրասենյակ ինչ-որ գործով իրավաբանական խորհրդատվություն ստանալու համար։ Նույն օրը քիչ անց գրասենյակ է եկել նաև Հարություն Հարոյանը և զրույցի ընթացքում հայտնել, որ ծանոթներից մեկը թմրամիջոցների հետ կապված ինչ-որ գործով գտնվում է կալանքի տակ և իրենից հետաքրքրվել է, թե հնարավոր է արդյոք վերջինիս ինչ-որ կերպ օգնել։ Ինքը նրան հայտնել է, որ չի կարող օգնել, սակայն այդ պահին խոսակցությանը միջամտել է Ռադիկը՝ ասելով, որ կարող է Հարությունին օգնել այդ հարցում և դրա համար հարկավոր կլինի 4.000 ԱՄՆ դոլար գումար։ Հարությունը համաձայնվել է և նույն օրը գրասենյակում իր և որդու՝ Արմեն Ասատրյանի ներկայությամբ Ռադիկին տվել է 4.000 ԱՄՆ դոլար գումար, իսկ Ռադիկը խոստացել է խոսել ծանոթների հետ և մոտ օրերի ընթացքում պատասխան տալ, սակայն խոստումը չի կատարել։ Արդեն 2012թ. սկզբներին իրեն է զանգահարել Հարությունը և հայտնել, որ գործն անել այլևս պետք չէ և խնդրել է զանգահարել ու Ռադիկից հետ պահանջել տրված գումարը։ Ռադիկին զանգահարելուց հետո վերջինս խոստացել է մոտ օրերի ընթացքում վերադարձնել գումարը, սակայն չի վերադարձրել։
/դատական նիստի արձանագրություն, հատոր 1, գ.թ. 115-116, հատոր 2, գ.թ. 98-99/
Վկա Արմեն Էդուարդի Ասատրյանի ցուցմունքով այն մասին, որ աշխատում է որպես փաստաբան` իր մայր Վիկտորիա Կիրակոսյանի հետ միասին։ Բավականին երկար ժամանակ ճանաչել է Հարություն Հարոյանին, ով իրենց ընտանիքի հետ գտնվել է ջերմ հարաբերությունների մեջ։ 2011թ. նոյեմբերին Երևան քաղաքի Գ. Նժդեհի 8 շենքի 29 բնակարանում գտնվող իրենց գրասենյակում ծանոթացել է իր մոր ընկերուհու ազգական Ռադիկ Ենգիբարյանի հետ, ով գրասենյակ է եկել իրավաբանական խորհրդատվություն ստանալու համար։ Նրա հետ զրույցի ընթացքում գրասենյակ է եկել Հարություն Հարոյանը և հայտնել, որ ծանոթներից մեկը թմրամիջոցների հետ կապված ինչ-որ գործով գտնվում է կալանքի տակ և իրենցից հետաքրքրվել է, թե հնարավոր է արդյոք վերջինիս ինչ-որ կերպ օգնել։ Մայրը նրան հայնել է, որ իրենք չեն կարող օգնել, սակայն այդ պահին խոակցությանը միջամտել է Ռադիկը` ասելով, որ մեծ շրջապատ և ազդեցիկ ընկերներ ունի ու կարող է Հարությունին օգնել այդ հարցում։ Միաժամանակ հայտնել է, որ այդ հարցը կարգավորելու համար հարկավոր կլինի 4.000 ԱՄՆ դոլար գումար։ Հարությունը համաձայնվել է և նույն օրը իրենց գրասենյակում իր և մոր ներկայությամբ Ռադիկին տվել է 4.000 ԱՄՆ դոլար գումար։ Ռադիկը խոստացել է խոսել ծանոթների հետ և մոտ օրերի ընթացքում պատասխանել, թե ինչ տարբերակով է օգնելու Հարությունին, սակայն խոստումը չի կատարել։ Արդեն 2012թ. սկզբին մորից տեղեկացել է, որ Հարությունը չի զբաղվելու այդ գործով և վերջինս իր մորից խնդրել է Ռադիկից հետ վերցնել տված գումարը։ Մայրը զանգահարել է Ռադիկին և հաղորդել Հարությունի խնդրանքը։ Ռադիկը խոստացել է մոտ օրերի ընթացքում վերադարձնել գումարը, սակայն չի վերադարձրել։
/դատական նիստի արձանագրություն, հատոր 2, գ.թ. 62-64, 90-91/
Վկա Ալվարդ Արմայիսի Բեգլարյանի ցուցմունքներով այն մասին, որ 2012թ. դեկտեմբերից 7-8 ամիս առաջ իրենց բնակարանի քաղաքային՝ 010- 66-12-02 համարին հեռախոսազանգ է ստացվել։ Միացել է ինքնապատասխանիչը։ Զանգահարող կինը ներկայացել է Նունե անունով և հեռախոսային հաղորդագրություն թողել` հարցնելով, թե Ռադիկը երբ է վերադարձնելու 26.000 ԱՄՆ դոլար գումարը։ Այնուհետև տեղեկացել է Ռադիկ Ենգիբարյանից, որ նա ճանաչում է Նունեին և նրանից պարտքով գումար է վերցրել։ Դրանից հետո Նունեն կրկին զանգահարել է, հեռախոսազրույց է ունեցել իր հետ և հարցրել, թե երբ է իր ամուսինը վերադարձնելու գումարները։
2012թ. փետրվարի սկզբին իր բնակարան են եկել մինչ այդ իրեն անծանոթ Թամարա և Ռաֆիկ Նազարյանները և հայտնել, որ իր ամուսին Ռադիկ Ենգիբարյանը նրանց 17.000 ԱՄՆ դոլար գումար է պարտք և միաժամանակ հարցրել են, թե որտեղ է գտնվում Ռադիկ Ենգիբարյանը։ Ինքը խոստացել է նրանց այցի և 17.000 ԱՄՆ դոլար գումարը հետ պահանջելու մասին տեղեկացնել ամուսնուն։ Հեռախոսազրույց ունենալով Վրաստանի Հանրապետությունում գտնվող Ռ. Ենգիբարյանի հետ` հայտնել է նրան այդ 17.000 ԱՄՆ դոլարը հետ պահանջելու մասին։ Դրանից երկու-երեք օր անց Ռադիկը ծանոթներից մեկի միջոցով իրեն է ուղարկել 4.000 ԱՄՆ դոլար գումար, որն ինքը 2012թ. փետրվարի 11-ին առձեռն տվել է Թամարա Նազարյանին։ Նշված 4.000 ԱՄՆ դոլարը վերցնելուց հետո Թամարան կրկին պնդել է, որ գումարն ամբողջությամբ կազմում է 17.000 ԱՄՆ դոլար և պահանջել է մնացած գումարը։ Ռադիկից տեղեկացել է նաև, որ 2012թ. դեկտեմբերին վերջինս ինչ-որ մեկի միջոցով Թամարա Նազարյանին է փոխանցել ևս 500 ԱՄՆ դոլար գումար։ Թ. Նազարյանն իրեն չի ասել, թե ինչի համար է նշված 17.000 ԱՄՆ դոլար գումարը տվել Ռադիկ Ենգիբարյանին։ Պարզապես հայտնել է, որ Ռադիկը 17.000 ԱՄՆ դոլար գումար է պարտք եղել։ Իրեն հայտնի չի եղել, որ Ռ. Ենգիբարյանը չարաշահելով Թ. Նազարյանի վստահությունը` վերջինիս որդի Հակոբ Նազարյանին ՀՀ վճռաբեկ դատարանի միջոցով պատժի կրումից ազատելու պատրվակով նրանից խաբեությամբ ստացել է 17.000 ԱՄՆ դոլար գումար և հափշտակել այն։ Ռադիկը շատ պարտքեր ունի, բայց թե ում է նա պարտք, ինչի համար է վերցրել այդ գումարները և ինչի վրա է ծախսել` իրեն հայտնի չէ։
/դատական նիստի արձանագրություն, հատոր 1, գ.թ. 136-137, հատոր 2, գ.թ. 197-199/
Որպես այլ փաստաթուղթ` ապացույց ճանաչված, 2011թ. սեպտեմբերի 20-ի ամսաթվով կազմված և Ռադիկ Եղիշի Ենգիբարյանի ստորագրությամբ հաստատված պարտավորագրով, համաձայն որի` Ռադիկ Ենգիբարյանը Նունե Սիսակյանից վերցրել է 13.000 և 11.000 ԱՄՆ դոլար ընդհանուր գումար և պարտավորվել է այն վերադարձնել երեք ամսվա ընթացքում։
/հատոր 1, գ.թ. 80, հատոր 3, գ.թ. 121-122/
«Ղ-Տելեկոմ» ՓԲ ընկերությունից ստացված 098-29-25-79 բջջային հեռախոսահամարից 2011թ. օգոստոսի 10-ից մինչև 2011թ. հոկտեմբերի 10-ն ընկած ժամանակահատվածում կատարված մուտքային և ելքային հեռախոսազանգերի վերծանումները զննելու մասին արձանագրությամբ, համաձայն որի` 098-29-25-79 համարից 2011թ. օգոստոս, սեպտեմբեր, հոկտեմբեր ամիսներին պարբերաբար, տարբեր հաճախականությամբ հեռախոսազանգեր են կատարվել Ռաֆիկ Նազարյանի կողմից փաստացի օգտագործվող 098- 29-25-79 բջջային համարին։
/հատոր 2, գ.թ. 268-269/
«Օրանժ Արմենիա» ՓԲ ընկերությունից ստացված 055-34-56-28 և 055-88-88-97 բջջային հեռախոսահամարից 2011թ. սեպտեմբերի 1-ից մինչև 2011թ. սեպտեմբերի 30-ն ընկած ժամանակահատվածում կատարված մուտքային և ելքային հեռախոսազանգերի վերծանումները զննելու մասին արձանագրությամբ, համաձայն որի` Նունե Սիսակյանի կողմից փաստացի օգտագործված 055-34-56-28 համարից 2011թ. սեպտեմբերին պարբերաբար, տարբեր հաճախականությամբ հեռախոսազանգեր են կատարվել Ռադիկ Ենգիբարյանի կողմից փաստացի օգտագործված 055-88-88-97 հեռախոսահամարին, բացի այդ, 055-88-88-97 համարից հեռախոսազանգեր են կատարվել Նունե Սիսակյանի կողմից փաստացի օգտագործված 055-34-56-28 համարին։
/հատոր 3, գ.թ. 123-124/
Ամբաստանյալ Ռադիկ Եղիշի Ենգիբարյանը դատարանում ցուցմունք տվեց այն մասին, որ առաջադրված մեղադրանքում իրեն մեղավոր չի ճանաչում։ Նա հայտնեց, որ Սմբատ Մանուկյանի միջոցով ծանոթացել է Թամարա Նազարյանի ամուսին Ռաֆիկ Նազարյանի հետ, նրանից պարտքով խնդրել է 4.500 ԱՄՆ դոլար գումար` վեց ամիս հետո վերադարձնելու պայմանով, որը նրա ամուսին Ռաֆիկ Նազարյանը տվել է։ Նշված 4.500 ԱՄՆ դոլարը հետագայում, ուշացումով վերադարձրել է Ռաֆիկ Նազարյանին։ Ինքը Ռաֆիկ և Թամարա Նազարյաններից չի պահանջել 17.000 ԱՄՆ դոլար գումար` նրանց որդուն պատժի կրումից ազատելու համար։ Այդ 12.500 ԱՄՆ դոլարը նրանք պահանջում են որպես տոկոսներ` իրենց գումարն ուշացնելու համար։
2011թ. օգոստոսին Սմբատ Մանուկյանից պարտքով վերցրել է 6.500 ԱՄՆ դոլար գումար, որն ամբողջությամբ վերադարձրել է։ Սմբատ Մանուկյանի որդի Տարոն Մանուկյանին պատժի կրումից ազատելու վերաբերյալ Սմբատ Մանուկյանին որևէ խոստում չի տվել։
2011թ. սեպտեմբեր կամ հոկտեմբեր ամիսներին իր ծանոթ, փաստաբան Խանում Մկրտչյանի միջոցով ծանոթացել է Նունե Սիսակյանի հետ, որը Խանում Մկրտչյանի միջնորդությամբ պարտքով իրեն տվել է 26.000 ԱՄՆ դոլար գումար` Խանումի և նրա ամուսնու ներկայությամբ։ Այդ մասին կազմվել է ստացական։ Ինքը Նունե Սիսակյանին չի խոստացել գումարի դիմաց նրա որդուն ազատել կալանավայրից։ 26.000 ԱՄՆ դոլար գումարը Ն. Սիսակյանից վերցրել է պարտքով։ Այդ գումարից 4.000 ԱՄՆ դոլարն արդեն տվել է Խանումին։ Բացի այդ մարել է Խանումի այլ գումարային պարտավորությունները, որոնց ընդհանուր գումարը կազմում է 8.300 ԱՄՆ դոլար։ Այդ գումարը նա պետք է վերադարձնի, որպեսզի կարողանա տալ Ն. Սիսակյանին։
Հարություն Հարոյանին չի ճանաչում, նրանից գումար չի վերցրել և նրան ոչինչ չի խոստացել։ Նրա մասով զրույցը եղել է Վիկտորիայի հետ։ Այդ գումարներից իրեն որևէ գումար չի հասել։ Իր ստացած գումարները ծախսել է ընտանիքի և բիզնեսի վրա, սակայն բիզնեսում անհաջողություն է ունեցել, որի պատճառով չի կարողացել գումարները վերադարձնել։ Եթե խարդախ լիներ, ապա գումարները չէր վերադարձնի և Հայաստան չէր գա։
/դատական նիստի արձանագրություն/

Դատարանի իրավական վերլուծությունները

Վերլուծելով ամբաստանյալ Ռադիկ Եղիշի Ենգիբարյանի ցուցմունքները, համադրելով դրանք քրեական գործի դատական քննությամբ ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Ռադիկ Եղիշի Ենգիբարյանի նախաքննական և դատաքննական ցուցմունքներն իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են վերոհիշյալ ապացույցներով։
Ամբաստանյալ Ռադիկ Եղիշի Ենգիբարյանի կողմից, երկու դրվագով, նրա մեղավորությամբ, խոշոր չափերով խարդախություն կատարելն ապացուցված է, նրա արարքները ճիշտ են որակված և համապատասխանում են ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Ռադիկ Եղիշի Ենգիբարանի կողմից, երկու դրվագով, նրա մեղավորությամբ, առանձնապես խոշոր չափերով խարդախություն կատարելը, նրա այդ արարքները նույնպես ճիշտ են որակված և համապատասխանում են ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Ռադիկ Եղիշի Ենգիբարանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, նաև այն, որ ինքնակամ ներկայացել է վարույթն իրականացնող մարմնին, տուժողներին պատճառված վնասի մի մասը կամովին հատուցել է, խնամքին ունի մինչև տասնչորս տարեկան մեկ երեխա։
Դրվագներից յուրաքանչյուրով, որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում պատիժ նշանակելու պահին նրա խնամքին մինչև տասնչորս տարեկան մեկ երեխայի (Արմեն Ռադիկի Ենգիբարյանը` ծնված 2000թ. հունվարի 05-ին) առկայությունը և հանցագործությամբ տուժողներին պատճառված գույքային վնասը մասնակիորեն կամովին հատուցելը։ Նրա պատասխանատվությունը և պատիժը ծանրացնող հանգամանքներ առկա չեն։
Ամբաստանյալ Ռադիկ Եղիշի Ենգիբարյանն իր կատարած` երկու դրվագով` Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով նախատեսված յուրաքանչյուր հանցագործության համար ենթակա է պատժի տուգանքի ձևով, իսկ երկու դրվագով` ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված յուրաքանչյուր հանցագործության համար ենթակա է պատժի ազատազրկման ձևով` գույքի մասնակի բռնագրավմամբ։
Դատարանը գտնում է, որ իր նկատմամբ նշանակված պատիժն ամբաստանյալ Ռադիկ Ենգիբարյանը պետք է կրի, քանի որ դրան խոչընդոտող հանգամանքներ առկա չեն։
Քննարկելով տուժող և քաղաքացիական հայցվոր Նունե Սարգսի Սիսակյանի հայցը` դատարանը գտնում է, որ այն հիմնավոր է և ենթակա է բավարարման, ամբաստանյալ և քաղաքացիական պատասխանող Ռադիկ Եղիշի Ենգիբարյանից հօգուտ տուժող և քաղաքացիական հայցվոր Նունե Սիսակյանի պետք է բռնագանձել 22.000 /քսաներկու հազար/ ԱՄՆ դոլարին համարժեք ՀՀ դրամ գումար` որպես հանցագործությամբ պատճառված վնասի հատուցում։
Գործով այլ քաղաքացիական հայց չի հարուցվել, գույքային վնասի հատուցման այլ պահանջ չի ներկայացվել։
Քննարկելով ամբաստանյալի գույքի վրա դրված կալանքի հարցը` դատարանը գտնում է, որ ամբաստանյալ Ռադիկ Եղիշի Ենգիբարյանի գույքի վրա նախաքննության մարմնի 2013թ. մայիսի 30-ի որոշմամբ դրված կալանքը պետք է թողնել անփոփոխ` մինչև նրա գույքային պարտավորությունների մասով դատավճռի կատարումը։
Քննարկելով խափանման միջոցի հարցը` դատարանը գտնում է, որ ամբաստանյալ Ռադիկ Եղիշի Ենգիբարյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-րդ, 365-րդ, 367-րդ, 369-373-րդ հոդվածներով, դատարանը`

Վ Ճ Ռ Ե Ց


Ամբաստանյալ Ռադիկ Եղիշի Ենգիբարյանին մեղավոր ճանաչել երկու դրվագով` Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով, երկու դրվագով` ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցանքներում և դատապարտել.
- առաջին դրվագով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով` տուգանքի, նվազագույն աշխատավարձի յոթհարյուրապատիկի` 700.000 /յոթ հարյուր հազար/ ՀՀ դրամ գումարի չափով,
- երկրորդ դրվագով, ՀՀ քրեական օրենսգրքի 178-րդ հոդվածի 3-րդ մասի 1-ին կետով` ազատազրկման 4 /չորս/ տարի ժամկետով, գույքի կեսի բռնագրավմամբ, սակայն ոչ ավելի 6.000.000 /վեց միլիոն/ ՀՀ դրամ գումարից,
- երրորդ դրվագով, ՀՀ քրեական օրենսգրքի 178-րդ հոդվածի 3-րդ մասի 1-ին կետով` ազատազրկման 5 /հինգ/ տարի ժամկետով` գույքի կեսի բռնագրավմամբ, սակայն ոչ ավելի 9.000.000 /ինը միլիոն/ ՀՀ դրամ գումարից։
- չորրորդ դրվագով, ՀՀ քրեական օրենսգրքի 178-րդ հոդվածի 2-րդ մասի 2-րդ կետով` տուգանքի, նվազագույն աշխատավարձի հազարապատիկի` 1.000.000 /մեկ միլիոն/ ՀՀ դրամ գումարի չափով,

ՀՀ քրեական օրենսգրքի 66-րդ հոդվածով սահմանված` պատիժների լրիվ և մասնակի գումարման սկզբունքների կիրառմամբ, ամբաստանյալ Ռադիկ Եղիշի Ենգիբարյանի նկատմամբ պատիժ նշանակել ազատազրկում 5 /հինգ/ տարի 6 /վեց/ ամիս ժամկետով և տուգանք` նվազագույն աշխատավարձի հազարյոթհարյուրապատիկի` 1.700.000 /մեկ միլիոն յոթ հարյուր հազար/ ՀՀ դրամ գումարի չափով, ամբողջ գույքի բռնագրավմամբ, սակայն ոչ ավելի 15.000.000 /տասնհինգ միլիոն/ ՀՀ դրամ գումարից։
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2013թ. մարտի 02-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Տուժող և քաղաքացիական հայցվոր Նունե Սարգսի Սիսակյանի հայցը բավարարել. ամբաստանյալ, քաղաքացիական պատասխանող Ռադիկ Եղիշի Ենգիբարյանից հօգուտ տուժող և քաղաքացիական հայցվոր Նունե Սիսակյանի բռնագանձել 22.000 /քսաներկու հազար/ ԱՄՆ դոլարին համարժեք ՀՀ դրամ գումար` որպես հանցագործության հետևանքով պատճառված վնասի հատուցում։
Ամբաստանյալ Ռադիկ Եղիշի Ենգիբարյանի գույքի վրա նախաքննության մարմնի 2013թ. մայիսի 30-ի որոշմամբ դրված կալանքը թողնել անփոփոխ` մինչև նրա գույքային պարտավորությունների մասով դատավճռի կատարումը։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ