Գործ
ԵԿԴ/0243/01/13

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը /այսուհետև` դատարան/
Նախագահությամբ դատավոր Մ. Մակյանի
Քարտուղարությամբ Կ. Կարապետյանի

Մասնակցությամբ՝
Մեղադրող Ա. Բեգինյանի
Հանրային պաշտպան Գ. Մալխասյանի
Տուժող Դ. Ալանակյանի
2014թ. մարտի 20-ին, դռնբաց դատական նիստում, Երևան քաղաքում, դատաքննության արագացված կարգի կիրառմամբ քննեց քրեական գործն ըստ մեղադրանքի`
Արտեմ Արամայիսի Սայադյանի ` ծնված 01.06.1972թ.-ին Երևան քաղաքում, ազգությամբ հայ, ՀՀ քաղաքացի,
միջնակարգ կրթությամբ, չի աշխատում, նախկինում դատված`

1. 01.06.2006թ.-ին՝ ք. Մոսկվայի Նիկուլինսկի շրջանային դատարանի կողմից Ռուսաստանի Դաշնության քրեական օրենսգրքի 30-րդ հոդվածի 3-րդ մասով, 158-րդ հոդվածի 2-րդ մասի Ա և Բ կետերով՝ ազատազրկաման 1 /մեկ/ տարի ժամկետով,
2. 28.03.2007թ.-ին՝ Մոսկովյան շրջանի ՍԵրգիև - Պոսադի շրջանային դատարանի կողմից՝ Ռուսաստանի Դաշնության քրեական օրենսգրքի 161-րդ հոդվածի 2-րդ մասի Ա, Վ և Գ կետերով՝ ազատազրկման 3 /երեք/ տարի /վեց/ ամիս ժամկետով,
3. 12.07.2012թ.-ին՝ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից՝ ՀՀ քրեական օրենսգրքի 177-րդ հոդվածի 2-րդ մասի 1-ին, 2-րդ և 3-րդ կետերով՝ ազատազրկման 2 /երկու/ տարի 6 /վեց/ ամիս ժամկետով։ 05.12.2012թ.-ին ազատվել է պատժից պայմանական վաղաժամկետ, սույն գործով հանցանքը կատարելու պահին ունեցել է 11 /տասնմեկ/ ամիս 8 /ութ/ օր պատժի չկրած մաս, հաշվառված ևբնակվում է ք. Երևան, Արտաշիսյան փողոց, 46 շենք, բնակարան 45, ներկայումս գտնվում է ՀՀ ԱՆ «Նուբարաշեն» ՔԿՀ-ում, մեղադրվում է ՀՀ քրեական օրենսգրքի 34-177-րդ հոդվածի 3-րդ մասի 1.1 կետով։

1.Գործի դատավարական նախապատմությունը
Ըստ Երևան քաղաքի Կենտրոն և Նորք-Մարաշ վարչական շրջանների դատախազության կողմից դատարան ուղարկված քրեական գործի նյութերի՝
«Քրեական գործով մեղադրյալ, Արտեմ Արամայիսի Սայադյանը, չունենալով մշտական աշխատանք և չկարողանալով լուծել իր ֆինանսական խնդիրները, գողություն կատարելու նպատակով 2013 թվականի հոկտեմբերի 21-ի առավոտյան, վերցնելով իրեն պատկանող կարգավորող գործիքը` /ռազվոդնոյ/, պտուտակահանը, ունելին /պինցետ/ և խառատված` սրածայր ամրակցվող պտուտակով գործիքը, դուրս է եկել տնից և գնացել է Երևան քաղաքի Կոնդ թաղամաս։ Հասնելով Դեմիրճյան փողոցի մոտ` իջել է երթուղային տաքսուց և նույն փողոցում գտնվող բնակելի շենքերի բակերով ոտքով քայլել է դեպի Կոնդ թաղամաս։ Ժամը 13։00-ի սահմաններում մեղադրյալ Արտեմ Արամայիսի Սայադյանը մուտք է գործել Դեմիրճյան 31-րդ շենքի 2-րդ մուտք և վերելակով բարձրացել է 10-րդ հարկ, որտեղ, ուսումնասիրելով թիվ 58 բնակարանի մուտքի դուռը և հասկանալով, որ դռան փականը իր մոտ եղած գործիքներով կարող է բացել, բաճկոնի ծոցագրպանից հանել է գործիքները, դրանց միջոցով կոտրել է բնակարանի մուտքի դռան փականները, ապօրինի մոտք է գործել բնակարան, որտեղից հյուրասենյակում դրված համակարգչային սեղանի աջակողմյան դարակից գաղտնի հափշտակել է զգալի չափերի` 325.000 ՀՀ դրամ։ Այնուհետև, նույն համակարգչային սեղանի վերնամասում առկա փայտե հարթակի վրա դրված, մետաղադրամների համար նախատեսված ապակե տարայից գաղտնի հափշտակել է զգալի չափերի` ընդհանուրը 14.897 ՀՀ դրամ 68 լումա գումար` մետաղադրամներով։ Ցանկանալով դուրս գալ բնակարանից` մուտքում` բնակարանի մուտքի դռան դիմաց, նկատել է ոստիկանների։ Փախնելու նպատակով մեղադրյալ Ա. Սայադյանը խոհանոցի պատուհանից դուրս է եկել և շենքի պատով դեպի ցած իջնելով, մտել 9-րդ հարկում գտնվող բնակարան, որտեղ էլ քիչ անց հայտնաբերվել է ոստիկանների կողմից։ Նույն օրը ՀՀ ոստիկանության Կենտրոնականի բաժնում ենթարկվել է անձնական խուզարկության, որի ընթացքում նրա մոտ հայտնարերվել է գողացված 325.000 ՀՀ դրամ գումարը, իսկ ընդհանուրը 14.897 ՀՀ դրամ 68 լումա մետաղադրամները, որի մեջ եղել են 1,50 եվրո, 10,30 վրացական լարի, 1,50 ուկրաինական գրիվնա, 1 Արաբական Միացյալ Էմիրությունների դիրհամ, 4,43 անգլիական ֆունտ մետաղադրամներ, ինչպես նաև հանցագործության գործիք հանդիսացող՝ կարգավորող գործիքը /ռազվոդնոյ/, պտուտակահանը, ունելին /պինցետ/ և խառատված` սրածայր ամրակցվող պտուտակով գործիքը հայտնաբերվել է քննչական փորձարարության ժամանակ` վերջինիս կողմից մատնանշված վայրից։
Փաստի առթիվ ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնի քննիչ Հ.Մուշեղյանի կողմից 2013 թվականի հոկտեմբերի 21-ին հարուցվել է քրեական գործ։
2013 թվականի հոկտեմբերի 23-ին որոշում է կայացվել Արտեմ Արամայիսի Սայադյանին ՀՀ քրեական օրենսգրքի 34-177-րդ հոդվածի 3-րդ մասի 1.1 կետով որպես մեղադրյալ ներգրավելու մասին։
Քրեական գործը ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի գրասենյակ է ստացվել և մուտքագրվել 16.12.2013թ.-ին։
2.Արագացված դատական քննություն
Մինչև դատաքննությունն սկսելն ամբաստանյալ Արտեմ Արամայիսի Սայադյանը միջնորդել է դատաքննությունն անցկացնել արագացված կարգով և հայտարարել, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված կարգով դատաքննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում լիովին։
Տուժող Դ.Ալանակյանը արագացված կարգով դատական քննություն անցկացնելու դեմ չի առարկել, հայտնելով, որ ամբաստանյալի նկատմամբ բողոք կամ քաղաքացիական հայցի պահանջ չունի։
Մեղադրող Ա. Բեգինյանը, գործով մեղադրական եզրակացությունը հաստատելիս արագացված կարգով դատական քննություն անցկացնելու դեմ առարկել է, սակայն դատարանում փոխել է իր դիրքորոշումը` հայտնելով, որ չի առարկում արագացված կարգով դատական քննություն անցկացնելու դեմ։
Դատարանը համոզվելով, որ առկա են ՀՀ քրեական դատավարության օրենսգրքի 375.1 և 375.2 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին։
Դատարանը, հիմք ընդունելով մեղադրանքի հիմքում դրված ապացույցները` մեղադրյալի, տուժողի և վկաների ցուցմունքները, դեպքի վայրի զննության, անձին ոստիկանության բաժին բերման ենթարկելու արձանագրությունները, Արտեմ Արամայիսի Սայադյանի անձնական խուզարկությամբ հայտնաբերված և իրեղեն ապացույց ճանաչված 325.000 ՀՀ դրամը, քննչական փորձարարության արձանագրությունը, դատահետքաբանական փորձաքննության թիվ 248 եզրակացությունը, իրեղեն ապացույց ճանաչված՝ Արտեմ Արամայիսի Սայադյանի մատնանշմամբ հայտնաբերված թղթադրամները, մետաղադրամները և հանցագործության գործիք հանդիսացող մեկ կարգավորող գործիք /ռազվոդնոյ/, մեկ պտուտակահանը, մեկ ունելին /պինցետ/ և մեկ խառատված` սրածայր ամրակցվող պտուտակով գործիքը գտավ, որ ամբաստանյալ Արտեմ Արամայիսի Սայադյանը կատարել է ՀՀ քրեական օրենսգրքի 34-177-րդ հոդվածի 3-րդ մասի 1.1 կետով նախատեսված հանցավոր արարքը։
3. Դատարանի իրավական վերլուծությունները
Դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ, ապացուցված է համարում ամբաստանյալ Արտեմ Արամայիսի Սայադյանին մեղսագրված հանցագործության կատարումը և գտնում, որ կատարած արարքի համար վերջինս ենթակա է պատժի։
Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։
Որպես Արտեմ Արամայիսի Սայադյանի անձը բնութագրող դրական հանգամանք, դատարանը հաշվի է առնում նրա բնակության վայրից ստացված բնութագիրը` համաձայն որի՝ «քաղաքացի Արտեմ Արամայիսի Սայադյանը բնակվում է Արտաշիսյան 46 շենք, բնակարան 45-ում։ Արտեմ Սայադյանը ամուսնալուծված է, ունի եկու երեխա, որից մեկը անչափահաս է և գտնվում են իր խնամքի տակ, նաև իր խնամքի տակ են թոշակառու ծնողները. մայրը 2-րդ կարգի հաշմանդամ է։ Արտեմ Սայադյանը ընտանիքին նվիրված հայր է, աչքի է ընկնում իր աշխատասիրությամբ, հոգատարությամբ, անսահման բարությամբ։ Ընկերասեր է, ուշադիր է շրջապատող մարդկանց նկատմամբ։ Հարևանների հանդեպ մշտապես ցուցաբերել է բարիացկամ վերաբերմունք և առհասարակ դրսևորել է դրական և զուսպ վարքագիծ»։
/ տես` գ.թ. 136, դատական նիստի արձանագրությունը/

Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն` որպես ամբաստանյալ Արտեմ Արամայիսի Սայադյանի պատասխանատվությունը և պատիժը մեղմացնող հանգամանք է դիտում խոստովանական ցուցմունքներով հանդես գալը, ինչպես նաև՝ կատարած հանցանքի համար անկեղծորեն զղջալը, այն, որ խնամքին է գտնվում աղջիկը, թոշակառու ծնողները, որոնից մայրը՝ 2-րդ կարգի հաշմանդամ է։
/տես` դատական նիստի արձանագրությունը/
Դատարանը գտնում է, որ ՀՀ քրեական օրենսգրքի 22-րդ և 63-րդ հոդվածների համաձայն՝ ամբաստանյալ Արտեմ Արամայիսի Սայադյանի արարքում նրա պատասխանատվությունը և պատիժը ծանրացնող հանգամանք է համարվում հանցանքը կատարելու առանձնապես վտանգավոր ռեցիդիվը՝ այն որ ամբաստանյալը ՀՀ ոստիկանության ինֆորմացիոն կենտրոի տվյալներով անցնում է որպես նախկինում երեք անգամ դատապարված անձ։
/ տես` սույն դատավճռի ներածական մասում առկա ամբաստանյալի անձնական տվյալները, գ.թ. 59-60, դատական նիստի արձանագրությունը/
Ելնելով գործի հանգամանքներից, ինչպես նաև հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի` «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի` «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և 61-րդ հոդվածը, ըստ որի` «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Արտեմ Արամայիսի Սայադյանի կողմից կատարված հանցավոր արարքի համար նրա նկատմամբ պետք է նշանակվի պատիժ՝ ազատազրկամ ձևով՝ առանց գույքի բռնագրավման՝ որպիսի պատիժը նա պետք է կրի։

Նկատի ունենալով, որ 12.07.2012թ.-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով Արտեմ Արամայիսի Սայադյանը դատապարտված է եղել ազատազրկման 2 /երկու/ տարի 6 /վեց/ ամիս ժամկետով, իսկ սույն մեղսագրված հանցանքը կատարելիս ունեցել է պատժի չկրած մաս` 11 /տասնմեկ / ամիս 8 /ութ/ օր ժամկետով, ուստի դատարանը գտնում է, որ այս դեպքում կիրառելի է ՀՀ քրեական օրենսգրքի 67-րդ հոդվածի 1-ին մասը, համաձայն որի՝ «Եթե դատավճիռ կայացնելուց հետո, բայց մինչև պատժի լրիվ կրելը դատապարտյալը նոր հանցանք է կատարել, ապա դատարանը նոր դատավճռով նշանակված պատժին լրիվ կամ մաuնակիորեն գումարում է նախորդ դատավճռով նշանակված պատժի չկրած մաuը»։ Դատարանը գտնում է, որ Արտեմ Արամայիսի Սայադյանի վերաբերյալ ՀՀ քրեական օրենսգրքի 34-177-րդ հոդվածի 3-րդ մասի 1.1 կետով նշանակվելիք պատժին պետք է մասնակիորեն գումարել ՀՀ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 12.07.2012թ.-ի դատավճռով նշանակված պատժի չկրած մասը՝ մասնակի։
Անդրադառնալով նշանակվելիք պատիժի հաշվարկման և դա ամբաստանյալ Արտեմ Արամայիսի Սայադյանի կողմից կրելու հարցին դատարանն արձանագրում է հետևյալը.

ՀՀ քրեական օրենսգրքի 34-177-րդ հոդվածի 3-րդ մասի 1.1 կետով, որով մեղադրանք է առաջադրվել ամբաստանյալ Արտեմ Արամայիսի Սայադյանին որպես պատիժ է նախատեսված նաև ազատազրկումը։ Վերջինի ժամկետն է 4-8 տարին։
Ինչպես նշվեց վերևում, ամբաստանյալ Արտեմ Արամայիսի Սայադյանի արարքում որպես նրա պատասխանատվությունն ու պատիժը ծանրացնող հանգամանք է հանցանքը կատարելու առանձնապես վտանգավոր ռեցիդիվը և վերջինիս նկատմամբ պատիժ նշանակելիս դատարանը պետք է ղեկավարվի ՀՀ քրեական օրենսգրքի 67.1 հոդվածով, համաձայն որի`
«Հանցագործությունների առանձնապես վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երեք քառորդից»։
Նկատի ունենալով, որ ամբաստանյալ Արտեմ Արամայիսի Սայադյանի արարքում որպես ծանրացուցիչ հանգամանք առկա է հանցանքների կատարման առանձնապես վտանգավոր ռեցիդիվը, ուստի ՀՀ քրեական օրենսգրքի 67.1 հոդվածի կիրառմամբ դատարանը նրա նկատմամբ պետք է պատիժ նշանակի ոչ պակաս քան 6 տարի ժամկետով ազատազրկումը։
Միաժամանակ, հիմք ընդունելով այն հանգամանքը, որ դատարանը սույն գործը քննել է դատաքննության արագացված կարգի կիրառմամբ, ուստի ՀՀ քրեական դատավարության օրենսգրքի 375.3 հոդվածի 6-րդ մասի համաձայն ամբաստանյալի նկատմամբ նշանակվող պատիժը չի կարող լինել ավելին, քան հոդվածի սանկցիայով նախատեսված առավելագույն պատժի 2/3-ը։ Այլ կերպ, դատաքննության արագացված կարգի կիրառման պայմաններում ամբաստանյալ Արտեմ Արամայիսի Սայադյանի նկատմամբ նշանակվելիք առավելագույն պատժի չափը 5 տարի 4 ամիս ժամկետով ազատազրկումն է։

Այսինքն, ՀՀ քրեական օրենսգրքի 67.1 հոդվածի 2-րդ մասի և ՀՀ քրեական դատավարության օրենսգրքի 375.3 հոդվածի 6-րդ մասի հակասության պայմաններում, դատարանը գտնում է, որ կիրառելի է «Իրավական ակտերի մասին» ՀՀ օրենքի 24 հոդվածի 3-րդ մասով սահմանված կարգավորումն այն մասին, որ՝

«Միևնույն մարմնի նոր ընդունած իրավական ակտը չպետք է հակասի նախկինում ընդունված և ուժի մեջ մտած հավասար իրավաբանական ուժ ունեցող իրավական ակտերին։ Միևնույն մարմնի ընդունած հավասար իրավաբանական ուժ ունեցող իրավական ակտերի միջև հակասությունների դեպքում գործում են ավելի վաղ ուժի մեջ մտած իրավական ակտի նորմերը»։

Նույն հոդվածի 7-րդ կետի համաձայն՝

«Հավասար իրավաբանական ուժ ունեցող նորմատիվ իրավական ակտերի կամ նույն իրավական ակտի տարբեր մասերի միջև հակասության դեպքում պետական և տեղական ինքնակառավարման մարմինները ֆիզիկական ու իրավաբանական անձանց հետ հարաբերություններում պետք է կիրառեն ֆիզիկական և իրավաբանական անձանց համար նախընտրելի նորմատիվ իրավական ակտը կամ դրա մասը»։

Դատարանը փաստելով, որ դատավարական օրենքի նշված նորմն ընդունվել է նույն մարմնի կողմից ավելի վաղ և ուժի մեջ է մտել ավելի վաղ քան նյութական օրենքի նորմը, ինչպես նաև արձանագրելով, որ ՀՀ քրեական դատավարության օրենսգրքի 375.3 հոդվածի 6-րդ մասը ՀՀ քրեական օրենսգրքի 67.1 հոդվածի 2-րդ մասի համեմատ տվյալ դեպքում անձի համար ավելի նախընտրելի է, ուստի պատիժ նշանակելիս և այն հաշվարկելիս պետք է կիրառի ՀՀ քրեական դատավարության օրենսգրքի 375.3 հոդվածով նախատեսված, անձի համար առավել բարենպաստ համապատասխան իրավանորմը, որի պայմաններում ամբաստանյալ Արտեմ Արամայիսի Սայադյանի նկատմամբ նշանակվող պատիժը պետք է լինի ազատազրկումը 5 տարի 4 ամիս ժամկետով։

Դատարանն, անդրադառնալով Արտեմ Արամայիսի Սայադյանի նկատմամբ ընտրված խափանման միջոցի` կալանավորման, հարցին, գտնում է, որ այն պետք է թողնել անփոփոխ մինչև դատավճռի օրինական ուժի մեջ մտնելը։

Միաժամանակ, լուծելով իրեղեն ապացույցների տնօրինման հարցը և ղեկավարվելով ՀՀ քրեական դատավարության օրենսգրքի 119-րդ հոդվածով` դատարանը գտնում է, որ գործով իրեղեն ապացույց հանդիսացող` 14.897 ՀՀ դրամ և 68 լումա մետաղադրամները և 325.000 ՀՀ դրամ թղթադրամները պետք է վերադարձնել տուժող Դ. Ալանակյանին, իսկ իրեղեն ապացույցը՝ կարգավորվող գործիքը, պտուտակահանը, ունելին և խառատված` սրածայր ամրակցվող պտուտակով գործիքը ՝ պետք է ոչնչացնել։
4. Եզրափակիչ մաս

Վերոգրյալի հիման վրա և ղեկավարվելով ՀՀ Քրեական դատավարության օրենսգրքի 357-360, 365, 369-373 375.1-375.4-րդ հոդվածներով, դատարանը

Վ Ճ Ռ Ե Ց

Արտեմ Արամայիսի Սայադյանին մեղավոր ճանաչել ՀՀ Քրեական օրենսգրքի 34-177-րդ հոդվածի 3-րդ մասի 1.1 կետով նախատեսված հանցագործության կատարման մեջ և նրա նկատմամբ պատիժ նշանակել ազատազրկում՝ 5 /հինգ/ տարի 4 /չորս/ ամիս ժամկետով՝ առանց գույքի բռնագրավման։
ՀՀ քրեական օրենսգրքի 67-րդ հոդվածի կարգով, դատավճիռների համակցությամբ, նշանակված պատժին մասնակիորեն գումարել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 12.07.2012թ.-ի դատավճռով նշանակված պատժի չկրած մասից` 11 /տասնմեկ/ ամիս 8 /ութ/ օրից` 2 /երկու/ ամիսը և վերջնական պատիժ նշանակել ազատազրկում` 5 /հինգ/ տարի 6 /վեց/ ամիս ժամկետով՝ առանց գույքի բռնագրավման։
Արտեմ Արամայիսի Սայադյանի նկատմամբ նշանակված պատժի կրման սկիզբը հաշվել 2013թ. հոկտեմբերի 21-ից։
Գործով իրեղեն ապացույցներ ճանաչված՝ 14.897 ՀՀ դրամ և 68 լումա մետաղադրամները և 325.000 ՀՀ դրամ թղթադրամները՝ վերադարձնել տուժող Դ.Ալանակյանին, իսկ կարգավորող գործիքը, պտուտակահանը, ունելին և խառատված՝ սրածայր ամրակցվող պտուտակով գործիքը, ոչնչացնել։
Դատավճիռը կարող է բողոքարկվել ՀՀ Վերաքննիչ քրեական դատարան հրապարակվելու օրվանից հետո` մեկամսյա ժամկետում, բացառությամբ ՀՀ քրեական դատավարության օրենսգրքի 395-րդ հոդվածի 1-ին կետով սահմանված հիմքի։



Դ Ա Տ Ա Վ Ո Ր Մ. Մ Ա Կ Յ Ա Ն