Գործ
ԵԿԴ/0237/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը
/այսուհետև` դատարան/
Նախագահությամբ դատավոր Մ. Մակյանի
Քարտուղարությամբ Կ. Կարապետյանի

Մասնակցությամբ՝
Մեղադրող Ա. Մանուկյանի
Հանրային պաշտպան Մ. Ալավերդյանի
2014թ. ապրիլի 4-ին, դռնբաց դատական նիստում, Երևան քաղաքում, դատաքննության արագացված կարգի կիրառմամբ քննեց քրեական գործն ըստ մեղադրանքի`


Գոռ Աֆթանդիլի Հայրապետյանը ` ծնված 03.06.1979թ.-ին Կոտայքի մարզի Չարենցավան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում,
դատվածություն չունեցող, հաշվառված և բնակվում է
ք. Չարենցավանում, 3-րդ թաղամաս, 14 շենք, բնակարան
28, մեղադրվում է ՀՀ քրեական օրենսգրքի 235-րդ
հոդվածի 4-րդ մասով։


1.Գործի դատավարական նախապատմությունը
Քրեական գործով մեղադրյալ, Գոռ Աֆթանդիլի Հայրապետյանը ծնվել և մշտապես բնակվել է Կոտայքի մարզի Չարենցավան քաղաքում։ Չունենալով մշտական աշխատանք, հաճախակի այցելել է քաղաք Երևան` աշխատանք գտնելու ակնկալիքով, սակայն չի կարողացել մշտական աշխատանք գտնել, իսկ երբեմն կատարել է ժամավճարով վարձատրվող աշխատանքներ։
2013թ.-ի նոյեմբերի 14-ին, հերթական անգամ որոշել է գնալ Երևան և տանից իր հետ վերցրել է իր հանգուցյալ պապիկի ծալովի դանակը, որն օգտագործվել է տանը` կենցաղային նպատակներով։ Դանակը, դնելով բաճկոնի աջ գրպանում, Չարենցավան քաղաքից երթուղային տաքսիով ժամանել է Երևան և ժամը 13։55-ի սահմաններում երթուղային տաքսուց իջնելով Երևան քաղաքի Տերյան և Իսահակյան փողոցների խաչմերուկում, սկսել է զբոսնել։ Նույն ժամանակահատվածում, Երևան քաղաքի Տերյան և Իսահակյան փողոցների խաչմերուկում ծառայություն են իրականացրել ՊՊԾ գնդի 3-րդ հատուկ գումարտակի աշխատակիցները, ովքեր նկատելով, որ այդ տարածքում զբոսնող Գոռ Հայրապետյանի բաճկոնի աջ գրպանը փոքր-ինչ դուրս ցցած է, մոտեցել են նրան և խնդրել ներկայացնել գրպանի պարունակությունը։ Ոստիկանության ծառայողների խնդրանքով Գոռ Հայրապետյանն իր բաճկոնի աջ գրպանից հանել և ոստիկաններին է ցուցադրել ծալովի դանակը, որը վերցրել էր Չարենցավան քաղաքի իրենց տանից։ Դանակը ցուցադրելուց հետո, ոստիկանության ծառայողները պարեկային ավտոմեքենա են կանչել և Գոռ Հայրապետյանին ապօրինի կերպով սառը զենք կրելու կասկածանքով բերման են ենթարկել ոստիկանության Երևան քաղաքի վարչության Կենտրոնական բաժին։
Փաստի առթիվ ՀՀ ոստկանության ՔԳՎ Երևան քաղաքի ՔՎ Կենտրոնականի քննչական բաժնի քննիչ Ս.Ռ.Նավասարդյանի կողմից 2013 թվականի նոյեմբերի 25-ին հարուցվել է քրեական գործ։
2013 թվականի դեկտեմբերի 6-ին որոշում է կայացվել Գոռ Աֆթանդիլի Հայրապետյանին ՀՀ քրեական օրենսգրքի 235-րդ հոդվածի 4-րդ մասով որպես մեղադրյալ ներգրավելու մասին։
Քրեական գործը ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի գրասենյակ է ստացվել և մուտքագրվել 12.12.2013թ.-ին։
2.Արագացված դատական քննություն
Մինչև դատաքննությունը սկսելն ամբաստանյալ Գոռ Աֆթանդիլի Հայրապետյանը միջնորդել է դատաքննությունն անցկացնել արագացված կարգով և հայտարարել, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված կարգով դատաքննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում լիովին։
Դատախազ Գ.Մարգարյանը, գործով մեղադրական եզրակացությունը հաստատելիս, արագացված կարգով դատական քննություն անցկացնելու դեմ չի առարկել։
Դատարանը համոզվելով, որ առկա են ՀՀ քրեական դատավարության օրենսգրքի 375.1 և 375.2 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին։
Դատարանը, հիմք ընդունելով մեղադրանքի հիմքում դրված ապացույցները` մեղադրյալի, գործով վկաների ցուցմունքները, դատաքրեագիտական փորձաքննության թիվ 2621 եզրակացությունը, այլ փաստաթղթի կարգով ապացույց ճանաչված զեկուցագիրը, իրեղեն ապացույց ճանաչված՝ Գոռ Աֆթանդիլի Հայրապետյանի մոտից հայտնաբերված, քաղաքացիական շեղբավոր, ընդհանուր նշանակության որսորդական ծալովի, սառը զենք հանդիսացող դանակը, գտավ, որ ամբաստանյալ Գոռ Աֆթանդիլի Հայրապետյանը կատարել է ՀՀ քրեական օրենսգրքի 235-րդ հոդվածի 4-րդ մասով նախատեսված հանցավոր արարքը։
3. Դատարանի իրավական վերլուծությունները
Դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ, ապացուցված է համարում ամբաստանյալ Գոռ Աֆթանդիլի Հայրապետյանին մեղսագրված հանցագործության կատարումը և գտնում, որ կատարած արարքի համար վերջինս ենթակա է պատժի։
Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։
Որպես Գոռ Աֆթանդիլի Հայրապետյանի անձը բնութագրող դրական հանգամանք, դատարանը հաշվի է առնում Չարենցավան քաղաքի «ՆԱՐԵ-99» համատիրության կողմից տրված բնութագիրը, ըստ որի` «Գոռ Աֆթանդիլի Հայրապետյանը բնակվում է ՀՀ Կոտայքի մարզի ք. Չարենցավանի 3-րդ թ. 14շ. թիվ 28 բնակարանում։ Նրա կողմից հակահասարակական արարքներ չեն նկատվել և «ՆԱՐԵ-99» համատիրությանն ուղված` հարևանների կողմից որևէ գանգատ կամ ահազանգ չի արձանագրվել»։
/ տես` դատական նիստի արձանագրությունը/
Որպես Գոռ Աֆթանդիլի Հայրապետյանի անձը բնութագրող հանգամանք, դատարանը հաշվի է առնում այն, որ նա ՀՀ Ոստիկանության ինֆորմացիոն կենտրոնի հաշվառումներով անցնում է որպես դատվածություն չունեցող անձ, ինչպես նաև այն, որ նա 2013թ.-ի դեկտեմբերի 12-ից ունի գործազուրկի կարգավիճակ։
Դատարանը, ՀՀ քրեական օրենսգրքի 62-րդ հոդվածի 1-ին մասի 4-րդ կետի համաձայն որպես ամբաստանյալ Գոռ Աֆթանդիլի Հայրապետյանի պատասխանատվությունը և պատիժը մեղմացնող հանգամանք է դիտում, պատիժ նշանակելու պահին նրա խնամքին մինչև 14 տարեկան երեք երեխաների առկայությունը՝ Աֆթանդիլ Գոռի Հայրապետյան՝ ծնված 2010 թվականաին, Ջեմմա Գոռի Հայրապետյան՝ ծնված 2012 թվականին և Հուսիկ Գոռի Վարդանյան /Հայրապետյան/՝ ծնված 2014 թվականին։
/ տես` գ.թ. 29, դատական նիստի արձանագրությունը և դատարան ներկայացված փաստաթղթերը/
Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն որպես ամբաստանյալ Գոռ Աֆթանդիլի Հայրապետյանի պատասխանատվությունը և պատիժը մեղմացնող հանգամանք է դիտում նաև նախաքննության ընթացքում խոստովանական ցուցմունքներով հանդես գալը։
/տես` դատական նիստի արձանագրությունը/
Դատարանը գտնում է, որ ՀՀ քրեական օրենսգրքի 63-րդ հոդվածի համաձայն՝ ամբաստանյալ Գոռ Աֆթանդիլի Հայրապետյանի արարքում նրա պատասխանատվությունը և պատիժը ծանրացնող հանգամանքներ չկան։
/տես` դատական նիստի արձանագրությունը/
Ելնելով գործի հանգամանքներից, ինչպես նաև հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի՝ «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի՝ «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և ՀՀ քրեական օրենսգրքի 61-րդ հոդվածի 2-րդ մասը` համաձայն որի՝ «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Գոռ Աֆթանդիլի Հայրապետյանի կողմից կատարված արարքի համար նրա նկատմամբ պետք է նշանակվի պատիժ՝ տուգանքի ձևով, որը նա պետք է կրի։

Դատարանն, անդրադառնալով Գոռ Աֆթանդիլի Հայրապետյանի նկատմամբ ընտրված խափանման միջոցի` չհեռանալու մասին ստորագրության, հարցին, գտնում է, որ այն պետք է թողնել անփոփոխ մինչև դատավճռի օրինական ուժի մեջ մտնելը, իսկ լուծելով իրեղեն ապացույցների տնօրինման հարցը և ղեկավարվելով ՀՀ քրեական դատավարության օրենսգրքի 119-րդ հոդվածով` դատարանը գտնում է, որ այլ փաստաթղթի կարգով ապացույց ճանաչված զեկուցագիրը և բերման ենթարկելու վերաբերյալ արձանագրությունը պետք է պահել քրեական գործի հետ միասին, իսկ իրեղեն ապացույցը՝ քաղաքացիական շեղբավոր, ընդհանուր նշանակության որսորդական ծալովի, սառը զենք հանդիսացող դանակը պետք է ոչնչացնել։

4. Եզրափակիչ մաս

Վերոգրյալի հիման վրա և ղեկավարվելով ՀՀ Քրեական դատավարության օրենսգրքի 357-360, 365, 369-373 375.1-375.4-րդ հոդվածներով, դատարանը

Վ Ճ Ռ Ե Ց

Գոռ Ավթանդիլի Հայրապետյանին մեղավոր ճանաչել ՀՀ Քրեական օրենսգրքի 235-րդ հոդվածի 4-րդ մասով նախատեսված հանցագործության կատարման մեջ և նրա նկատմամբ պատիժ նշանակել տուգանք` ՀՀ-ում սահմանված նվազագույն աշխատավարձի երկուհարյուրհիսնապատիկի` 250.000 /երկու հարյուր հիսուն հազար/ ՀՀ դրամի չափով։
Գոռ Ավթանդիլի Հայրապետյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ մինչև դատավճիռն օրինական ուժի մեջ մտնելը։
Քրեական գործով այլ փաստաթղթի կարգով ապացույց ճանաչված զեկուցագիրը և բերման ենթարկելու վերաբերյալ արձանագրությունը՝ պահել քրեական գործի հետ միասին, իսկ իրեղեն ապացույց ճանաչված՝ քաղաքացիական շեղբավոր, ընդհանուր նշանակության որսորդական ծալովի, սառը զենք հանդիսացող դանակը՝ ոչնչացնել։
Դատավճիռը կարող է բողոքարկվել ՀՀ Վերաքննիչ քրեական դատարան հրապարակվելու օրվանից հետո` մեկամսյա ժամկետում` բացառությամբ ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքի։


Դ Ա Տ Ա Վ Ո Ր Մ. Մ Ա Կ Յ Ա Ն