Գործ
ԵԿԴ/0228/01/13

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԿԵՆՏՈՐՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀՀ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը /այսուհետև` դատարան/

Նախագահությամբ դատավոր Մ. Մակյանի

Քարտուղարությամբ Կ. Կարապետյանի

Մասնակցությամբ՝
Մեղադրող Ա.Գևորգյանի
Հանրային պաշտպան Ա.Ջուվանովայի


2014թ. հունվարի 23-ին, դռնբաց դատական նիստում, Երևան քաղաքում, դատաքննության արագացված կարգի կիրառմամբ քննեց քրեական գործն ըստ մեղադրանքի`

Մանվել Սամվելի Հարությունյանի` ծնված 05.02.1990թ.
Երևան քաղաքում, ազգությամբ հայ, ՀՀ քաղաքացի,
միջնակարգ կրթությամբ, չամուսնացած,
չդատված աշխատում է Կենտրոն վարչական շրջանում
որպես էլեկտրոմեխանիկ, բնակվում է
ք. Երևան, Տիգրան Մեծի պողոտա 53-րդ շենքի, 41-րդ բն.
ներկայումս ՀՀ ԱՆ «Նուբարաշեն»
ՔԿՀ-ի կալանավոր, մեղադրվում է ՀՀ քրեական
օրենսգրքի 258-րդ հոդվածի 3-րդ մասի 1-ին կետով։

1.Գործի դատավարական նախապատմությունը
Քրեական գործով մեղադրյալ, Մանվել Սամվելի Հարությունյանը 2012 թվականի օգոստոսի 24-ին, ժամը 23։00-ի սահմաններում եղբոր` Հրանտ Հարությունյանի և ընկերներ` Խոսրով Ասատրյանի և Սևակ Գևորգյանի, հետ գտնվելով Երևան քաղաքի «Օղակաձև» զբոսայգու 6-րդ հատվածում գործող «Արբատ» սրճարանում, ալկոհոլ օգտագործած վիճակում վիճաբանել է նույն սրճարանում գտնվող Կարեն և Արման Մարգարյանների և Հովհաննես Ղազարյանի հետ, որի ընթացքում խմբի կազմում կոպիտ կերպով խախտելով հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք դրսևորելով, աղմկել է և հայհոյել, բռնություն գործադրել` ձեռքերով ծեծի է ենթարկել վերջիններիս, իր այդ դիտավորյալ գործողություններով շուրջ 10 րոպե տևողությամբ խաթարել է սրճարանի բնականոն գործունեությունը, խանգարել գիշերային անդորրն ու ներկաների հանգիստը, որին միջամտել են ՀՀ ոստիկանության ՊՊԾ գնդի ծառայողները և վիճաբանության մասնակիցներին բերման են ենթարկել ոստկանության Կենտրոնականի բաժին։
Փաստի առթիվ ՀՀ Ոստիկանության Կենտրոնականի քննչական բաժանմունքի կողմից 04.10.2012թ.-ին հարուցվել է քրեական գործ։
18.03.2013թ. ՀՀ Ոստիկանության Կենտրոնականի քննչական բաժանմունքի կողմից կայացվել է որոշում` Մանվել Սամվելի Հարությունյանին որպես մեղադրյալ ներգրավելու մասին և նրա նկատմամբ մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով։
18.03.2013թ. ՀՀ Ոստիկանության Կենտրոնականի քննչական բաժնի ավագ քննիչ Է.Պետրոսյանի կողմից թիվ 15111212 քրեական գործով մեղադրյալ Մանվել Սամվելի Հարությունյանի նկատմամբ հայտարարվել է հետախուզում։
18.03.2013թ. ՀՀ Ոստիկանության Կենտրոնականի քննչական բաժնի ավագ քննիչ Է.Պետրոսյանի կողմից թիվ 15111212 քրեական գործով միջնորդություն է ներկայացվել Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան` մեղադրյալ Մանվել Սանվելի Հարությունյանի նկատմամբ որպես խափանման միջոց երկու ամսով կալանավորում կիրառելու մասին և նույն օրը դատարանի կողմից բավարարվել է քննիչի միջնորդությունը` մեղադրյալ Մանվել Սանվելի Հարությունյանի նկատմամբ որպես խափանման միջոց երկու ամսով կիրառվել է կալանավորումը։
08.04.2013թ. ՀՀ Ոստիկանության Կենտրոնականի քննչական բաժնի ավագ քննիչ Է.Պետրոսյանի կողմից որոշում է կայացվել քրեական գործի մասը անջատելու, իսկ 16.04.2013թ.-ին՝ քրեական գործով վարույթը կասեցնելու մասին։
Հիշյալ հանցավոր արարքը կատարելուց հետո Մանվել Հարությունյանը թիվ 15111212 քրեական գործի նախաքննության ընթացքում թաքնվել է քննությունից, ըստ որի՝ որոշում է կայացվել ՀՀ քրեական օրենսգրքի 258-րդ հոդվածի 3-րդ մասի 1-ին կետով նրան որպես մեղադրյալ ներգրավելու մասին, նրա նկատմամբ հայտարարվել է հետախուզում, խափանման միջոց է ընտրվել կալանավորումը և որոշում է կայացվել նրա մասով թիվ 15111212 քրեական գործից մաս անջատելու և թիվ 15111212/1 քրեական գործի համարը շնորհելու մասին, իսկ թիվ 15111212 քրեական գործը մեղադրական եզրակացությամբ, ըստ մեղադրանքի՝ Ս.Գևորգյանի, Խ.Ասատրյանի, Հ.Հարությունյանի, Ա.Մարգարյանի, Հ.Ղազարյանի և Կ.Մարգարյանի` ՀՀ քրեական օրենսգրքի 258-րդ հոդվածի 3-րդ մասի 1-ին կետով, ուղարկվել է դատարան։
2013 թվականի նոյեմբերի 17-ին Մանվել Սանվելի Հարությունյանը հայտնաբերվել է։
2013 թվականի նոյեմբերի 18-ին ՀՀ Ոստիկանության Կենտրոնականի քննչական բաժնի ավագ քննիչ Է.Պետրոսյանի կողմից որոշում է կայացվել թիվ 15111212/1 քրեական գործով վարույթը վերսկսելու մասին։
2013 թվականի նոյեմբերի 20-ին Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի կողմից բավարարվել է քննիչի միջնորդությունը և մեղադրյալ Մանվել Սանվելի Հարությունյանի նկատմամբ երկու ամիս ժամկետով որպես խափանման միջոց ընտրված կալանավորումը վեչահաստատվել է։
Քրեական գործը ՀՀ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի գրասենյակ է ստացվել և մուտքագրվել 27.11.2013թ.-ին։
2.Արագացված դատական քննություն
Մինչև դատաքննությունը սկսելն ամբաստանյալ Մանվել Սամվելի Հարությունյանը միջնորդել է դատաքննությունն անցկացնել արագացված կարգով և հայտարարել, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված կարգով դատաքննություն անցկացնելու հետևանքները, առաջադրված մեղադրանքն իրեն պարզ են, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում լիովին։
Դատախազ Ա.Գևորգյանը, գործով մեղադրական եզրակացությունը հաստատելիս, արագացված կարգով դատական քննություն անցկացնելու դեմ չի առարկել։
Դատարանը, համոզվելով, որ առկա են ՀՀ քրեական դատավարության օրենսգրքի 375.1 և 375.2 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` մեղադրյալի, գործով վկաների ցուցմունքները, դատաբժշկական փորձաքննության թիվ 2604 եզրակացությունը, գտավ, որ ամբաստանյալ Մանվել Սամվելի Հարությունյանը կատարել է ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցավոր արարքը։
3. Դատարանի իրավական վերլուծությունները
Դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ, ապացուցված է համարում ամբաստանյալ Մանվել Սամվելի Հարությունյանին մեղսագրված հանցագործության կատարումն ամբողջությամբ, որի համար վերջինս ենթակա է պատժի։
Պատիժ նշանակելիս դատարանը հաշվի է առնում ինչպես ամբաստանյալի կողմից կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները։
Որպես Մանվել Սամվելի Հարությունյանի անձը բնութագրող հանգամանք դատարանը հաշվի է առնում լիազոր ներկայացուցիչ Ե.Խաչատրյանի կողմից տրված բնութագիրը, համաձայն որի` «Մանվել Սամվելի Հարությունյանը բնակվում է ծնողների, քրոջ և եղբոր հետ։ Ունի 3-րդ կարգի հաշմանդամ հայր։ Դպրոցն ավարտելուց հետո ծառայել է հայոց բանակում։ Ծառայությունն ավարտելուց հետո աշխատել է, հոգալով ընտանիքի ծախսերը։ Վայելում է հարևանների հարգանքը»։
/տես` քրեական գործի նյութերը և դատական նիստի արձանագրությունը/
Որպես Մանվել Սամվելի Հարությունյանի անձը բնութագրող դրական հանգամանք, դատարանը հաշվի է առնում նաև թիվ 49971 զորամասի շտաբի պետ փոխգնդապետ Կ.Իշխանյանի կողմից տրված բնութագրի համաձայն որի՝ «ավագ սերժանտ Մանվել Հարությունյանը՝ ծնված 05.02.1990թ. Երևան քաղաքում, ազգությամ հայ, կրթությունը ութամյա, նախկինում չդատված։ Պարտադիր ժամկետային ծառայության է զորակոչվել 08.05.2008թ. Էրեբունու ՏԶԿ-ի կողմից։ Ավագ սերժանտ Մանվել Հարությունյանը 4 ՀԳՄ 11 ՀՎ-ում ծառայության է անցել 2008 թվականի նոյեմբեր ամսից։ Ծառայության ընթացքում ավագ սերժանտ Մանվել Հարությունյանն իրեն դրսևորել է որպես բանիմաց զինծառայող, աչքի է ընկել բարձր կազմակերպչական ունակություններով։ Հրամանատարների կողմից տրված հրամաններն ու առաջադրանքները կատարել է ժամանակին։ Բնավորությամբ ինքնավստահ է, համարձակ և վճռական, ընկերասեր է և վայելում է հրամանատարների ու համածառայակիցների հարգանքը։ Ֆիզիկապես զարգացած է լավ, մտավոր զարգացած է լավ և ունի շարքային կեցվածք։ Գիտի պահել պետական և ռազմական գաղտնիքը»։
Որպես Մանվել Սամվելի Հարությունյանի անձը բնութագրող դրական հանգամանք, դատարանը հաշվի է առնում նաև «Տեխանվտանգության ազգային կենտրոն» ՊՈԿԱ-ի կողմից տրված վկայականը, համաձան որի՝ Մանվել Հարությունյանը որակավորման հանձնաժողովի որոշմամբ որակավորվել է որպես վերելակների էլեկտրոմեխանիկ։
/տես` քրեական գործի նյութերը և դատական նիստի արձանագրությունը/
Բացի այդ, որպես Մանվել Սամվելի Հարությունյանի անձը բնութագրող հանգամանք, դատարանը հաշվի է առնում նաև այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում դատապարտված կամ որևէ այլ կերպ արատավորված չի եղել։
/տես` գ.թ. 116-117, դատական նիստի արձանագրությունը/
Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն որպես ամբաստանյալ Մանվել Հարությունյանի պատասխանատվությունը և պատիժը մեղմացնող հանգամանք է դիտում կատարած հանցանքի համար անկեղծորեն զղջալը։
Դատարանը գտնում է, որ ՀՀ քրեական օրենսգրքի 63-րդ հոդվածի համաձայն ամբաստանյալ Մանվել Հարությունյանի արարքում նրա պատասխանատվությունը և պատիժը ծանրացնող հանգամանքներ չկան։
/տես` քրեական գործի նյութերը, դատական նիստի արձանագրությունը/
Ելնելով գործի հանգամանքներից, հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի՝ «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի՝ «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և ՀՀ քրեական օրենսգրքի 61-րդ հոդվածի 2-րդ մասը` համաձայն որի՝ «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալ Մանվել Սամվելի Հարությունյանի կողմից կատարած արարքի համար, նրա նկատմամբ պետք է նշանակվի պատիժ` ազատազրկման ձևով։
Անդրադառնալով նշանակված պատիժն ամբաստանյալի կողմից կրելու հարցին, դատարանը գտնում է, որ համապատասխան պատժաչափի նշանակման դեպքում, վերջինս այն չպետք է կրի, քանի որ այդ դեպքում նրա նկատմամբ կիրառելի է 03.10.2013 թվականին ՀՀ Ազգային Ժողովի կողմից ընդունված՝ «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 1-ին կետի 3-րդ ենթակետը, համաձայն որի` պետք է
«1/ պատժից ազատել` բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի՝
3/ այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ»։
Ըստ քրեական գործի նութերի՝ Մանվել Սամվելի Հարությունյանը հանցագործությունը կատարել է 2012 թվականի օգոստոսի 24-ին։ 2013 թվկանի մարտի 18-ին ՀՀ Ոստիկանության Կենտրոնականի քննչական բաժնի ավագ քննիչ Է.Պետրոսյանի կողմից թիվ 15111212 քրեական գործով մեղադրյալ Մանվել Հարությունյանի նկատմամբ հայտարարվել է հետախուզում։ 2013 թվականի նոյեմբերի 17-ին հետախուզման մեջ գտնվող Մանվել Հարությունյանը ոստիկանության Նոյեմբերյանի բաժնի Բագրատաշենի բաժանմունքի կողմից բերման է ենթարկվել ոստիկանության Բագրատաշենի բաժանմունք։
Դատարանում ամբաստանյալի կողմից տրված պարզաբաննումներով հիմնավորվեց, որ հանցագործությունը կատարելուց հետո, նա, սոցալական ծանր վիճակից դրդված մեկնել է արտագնա աշխատանքներ կատարելու, որպեսզի օգնի իր ընտանիքին, սակայն իմանալով, որ իր եղբայրը նույն քրեական գործով գտնվում է կալանքի տակ, իսկ ընտանիքը՝ սոցիալապես ծայր աստիճան վատ վիճակում, որոշել է ինքնակամ ներկայանալ նախաքննական մարմին։
Համաձայն 03.10.2013 թվականին ՀՀ Ազգային Ժողովի կողմից ընդունված «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 9-րդ կետի 4-րդ ենթակետի` համաներումը ենթակա չէ կիրառման՝
«… մինչև սույն որոշումն ընդունելը հետախուզման մեջ գտնվող անձանց նկատմամբ, բացառությամբ այն անձանց, որոնք մինչև 2013 թվականի դեկտեմբերի 31-ը ներառյալ կամովին կներկայանան Հայաստանի Հանրապետության իրավապահ մարմիններ, իսկ եթե գործը դատարանի վարույթում է` դատարան»։
Համաներման հիշյալ դրույթից հետևում է, որ այն ունի խրախուսող բնույթ և ներման հատուկ է ռեժիմ է սահմանում այն անձանց նկատմամբ, ովքեր՝ «… մինչև 2013 թվականի դեկտեմբերի 31-ը ներառյալ կամովին կներկայանան Հայաստանի Հանրապետության իրավապահ մարմիններ, իսկ եթե գործը դատարանի վարույթում է` դատարան»։
Այլ կերպ, ցանկացած ոք, ով գտնվում է հետախուզման մեջ և մինչև խրախուսման ժամկետի ավարտը կներկայանա կամ կհայտնաբերվի նրան որոնող մարմինների կողմից կարող է օգտվել մինչև այդ ժամկետի ավարտը կամովին ներկայացող անձի առավելություններից և արտոնությունից, քանի որ ողջամտորեն իրավունք ուներ և կարող էր նպատակ հետապնդել՝ վարույթն իրականացնող մարմին կամ դատարան ներկայանալ տվյալ ժամկետի ավարտի հենց վերջում՝ մինչ 2014 թվականի հունվարի 14-ը։
Դատարանն անրադառնալով վերը նշված հանգամանքին, արձանագրում է, որ ամբաստանյալը տեղեկանալով, որ իր եղբայրը նույն դեպքով հանցանք կատարելու համար գտնվում է կալանքի տակ, սեփական նախաձեռնությամբ որոշել է կամովին ներկայանալ նախաքննական մարմին։ Դատարանը փաստում է, որ ամբաստանյալը հայտնաբերվել է ՀՀ մուտք գործելիս՝ Բագրատաշենի մաքսատան ՍԶ ՀԱԿ-ի տարածքում և նա որևէ՝ այդ թվում թաքնված վայրից, որևէ իրավասու մարմին բերման չի ենթարկել, այդ ուղղությամբ իրավասու որևէ մարմին նրան հայտնաբերելու պահին առանձնակի ջանքեր չի գործադրել, այդ ուղղությամբ ռեսուրսներ չեն ծախսել։
Հակառակ տվյալներ գործի դատական քննությամբ ձեռք չբերվեցին։
Այլ կերպ, գործով հիմնավորվեց, որ Մանվել Հարությունյանը Հայաստանի Հանրապետություն է վերադարձել իր կամքով՝ կամովին, և այլ տարբերակ քան հայտնաբերվել և բերման ենթարկվել հենց այդտեղից՝ Բագրատաշենի մաքսային կետից՝ ըստ էության չի եղել։
Այսպիսով, արձանագրելով, որ սույն գործով բացակայում են համաներման ակտի 8-րդ կետի 4-6-րդ ենթակետերով և 9-րդ կետով նախատեսված սահմանափակումները, իսկ ամբաստանյալը մեղսագրված հանցանքը կատարել է մինչև 2013թ սեպտեմբերի 1-ը՝ 2012 թվկանի օգոստոսի 24-ին, դատարանը փաստում է, որ ամբաստանյալի նկատմամբ կիրառելի է 03.10.2013 թվականին ՀՀ Ազգային Ժողովի կողմից ընդունված «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» որոշման դրույթները և ինչպես նշվեց վերևում համապատասխան պատժատեսակի և պատժաչափի նշանակման դեպքում ամբաստանյալի նկատմամբ կիրառելի է վերը նշված համաներման ակտը՝ ամբաստանյալին պատժից ազատելու առումով։
Դատարանն անդրադառնալով Մանվել Սամվելի Հարությունյանի նկատմամբ ընտրված խափանման միջոցի` կալանավորման, հարցին գտնում է, որ նրան պատժից ազատելու դեպքում այն պետք է վերացվի և նա պետք է անհապաղ ազատ արձակվի կալանքից դատական նիստի դահլիճում։ Միաժամանակ, նրա հետագա պատշաճ վարքագիծն ապահովելու նպատակով ամբաստանյալի նկատմամբ մինչև դատավճիռն օրինական ուժի մեջ մտնելը որպես խափանման միջոց պետք է ընտրվի չհեռանալու մասին ստորագրությունը։
4. Եզրափակիչ մաս

Վերոգրյալի հիման վրա և ղեկավարվելով ՀՀ Քր. դատ. օր-ի 357-360, 365, 369-373 375.1-375.4-րդ հոդվածներով, դատարանը

Վ Ճ Ռ Ե Ց

Մանվել Սամվելի Հարությունյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության կատարման մեջ և նրա նկատմամբ պատիժ նշանակել ազատազրկում՝ 2 /երկու/ տարի 6 /վեց/ ամիս ժամկետով։
Կիրառել ՀՀ Ազգային ժողովի կողմից 03.10.2013թ.-ին ընդունված՝ «ՀՀ Անկախության հռչակման 22-րդ տարեդարձի կապակցությամբ համաներում հայտարարելու մասին» որոշման 1-ին կետի 3-րդ ենթակետը և Մանվել Սամվելի Հարությունյանին ազատել նշանակված պատժից։
Մանվել Սամվելի Հարությունյանի նկատմամբ ընտրված խափանման միջոցը՝ կալանավորումը, վերացնել և նրան անհապաղ ազատ արձակել դատական նիստի դահլիճում։
Մանվել Սամվելի Հարությունյանի նկատմամբ մինչև դատավճիռն օրինական ուժի մեջ մտնելը որպես խափանման միջոց ընտրել չհեռանալու մասին ստորագրությունը։
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման օրվանից հետո մեկամսյա ժամկետում, բացառությամբ ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքի։


Դ Ա Տ Ա Վ Ո Ր Մ. Մ Ա Կ Յ Ա Ն