Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

27 նոյեմբերի 2013թ. ք. Երևան

ԵԿԴ-0218/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Երևան քաղաքի դատախազության
դատախազ Գ. Սարգսյանի,



դատարանում, դռնբաց դատական նիստում քննեց գործն ըստ մեղադրանքի
Քաջիկ Զավենի Արզումանյանի`
ծնված 1995թ. հունվարի 10-ին Տավուշի մարզի Տավուշ գյուղում, հայ, Հայաստանի Հանրապետության /այսուհետ ՀՀ/ քաղաքացի, սովորում է ՀՀ կրթության և գիտության նախարարության Խ. Աբովյանի անվան հայկական պետական մանկավարժական համալսարանի կենսաբանության, քիմիայի և աշխարհագրության ֆակուլտետի 2-րդ կուրսում, ամուրի, խնամքին ոչ ոք, նախկինում չդատված, բնութագրվում է դրական, վատառողջ է, հաշվառված է Տավուշի մարզի Տավուշ գյուղի 1-ին փողոցի թիվ 84 տանը, փաստացի բնակվում է Երևանի Լյուքսեմբուրգի փողոցի թիվ 4 շենքի թիվ 39 բնակարանում, կալանքի տակ չէ, մեղադրվում է ՀՀ քրեական օրենսգրքի 235-րդ հոդվածի 4-րդ մասով։






Գործի դատավարական նախապատմությունը

Թիվ 59104313 քրեական գործը ՀՀ ոստիկանության ՔԳՎ Երևան քաղաքի քննչական վարչության ծանր հանցագործությունների քննության բաժնում հարուցվել է 2013թ. հոկտեմբերի 28-ին, ՀՀ քրեական օրենսգրքի 235-րդ հոդվածի 4-րդ մասով, Քաջիկ Զավենի Արզումանյանի կողմից ապօրինի կերպով սառը զենք կրելու դեպքի առթիվ։
Ամբաստանյալ Քաջիկ Զավենի Արզումանյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով` հետևյալ արարքի համար. «որ նա ձեռք է բերել և 2013թ. հոկտեմբերի 17-ին ձեռքի պայուսակում ապօրինի կերպով կրել է արհեստագործական եղանակով պատրաստված, հարվածող-փշրող սառը զենքերի շարքին դասվող կռփազենք, որը նույն օրը ժամը 1330-ին վերջինիս մոտ հայտնաբերվել է Երևանի մետրոպիլիտենի «Զորավար Անդրանիկ» կայարանում ՀՀ ոստիկանության մետրոպոլիտենի պահպանության բաժնի աշխատակիցների կողմից կատարված անձնական խուզարկության ժամանակ։»։
2013թ. նոյեմբերի 06-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Քաջիկ Զավենի Արզումանյանը, չպարզված ժամանակ և հանգամանքներում ձեռք է բերել արհեստագործական եղանակով պատրաստված, հարվածող-փշրող սառը զենքերի շարքին դասվող կռփազենք, որն ապօրինի կերպով կրելով` տեղավորել է ձեռքի պայուսակում և 2013թ. հոկտեմբերի 17-ի առավոտյան, նշված կռփազենքը պայուսակում կրելով` գնացել է Հայաստանի պետական մանկավարժական համալսարան։
Նույն օրը, ժամը 13։30-ին, ամբաստանյալ Քաջիկ Արզումանյանը, Երևան քաղաքի մետրոպիլիտենի «Զորավար Անդրանիկ» կայարանում, ՀՀ ոստիկանության մետրոպոլիտենի պահպանության բաժնի աշխատակիցների կողմից ենթարկվել է անձնական խուզարկության, որի ընթացքում նրա կողմից ապօրինի կերպով կրվող, սառը զենք հանդիսացող կռփազենքը հայտնաբերվել է։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Քաջիկ Արզումանյանը նախկինում դատված չի եղել, բնութագրվում է դրական, վատառողջ է` տառապում է «աջ երիկամի ռոտացիոն հիպոպլազիա» հիվանդությամբ, իրեն լիովին մեղավոր է ճանաչել և տվել է ինքնախոստովանական ցուցմունքներ։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Քաջիկ Զավենի Արզումանյանի ինքնախոստովանական ցուցմունքներով այն մասին, որ 2010-2011թթ. ընթացքում, Երևանում, շուկայից գնել է կռփազենք, որն ինքնապաշտպանության նպատակով պահել է իր ձեռքի պայուսակում և հետագայում մոռացել է դրա մասին։
2013թ. հոկտեմբերի 17-ի առավոտյան գնացել է Հայաստանի պետական մանկավարժական համալսարան, որտեղ սովորում է և իր հետ վերցրել է ձեռքի պայուսակը, որում եղել է կռփազենքը։ Դասերի ավարտից հետո, տուն վերադառնալու նպատակով գնացել է Երևանի մետրոպոիտենի «Զորավար Անդրանիկ» կայարան։ Այնտեղ իրեն են մոտեցել ոստիկաններ, որոնք իրեն հրավիրել են աշխատասենյակ և ենթարկել են անձնական խուզարկության։ Իր ձեռքի պայուսակի միջից ոստիկանները հայտնաբերել են վերոհիշյալ կռփազենքը։ Կատարածի համար անկեղծորեն զղջում է և խնդրում է մեղմ պատժել։
/դատական նիստի արձանագրություն, գ.թ. 24-25, 46-47/
Վկա Ժիրայր Կարապետի Խաչատրյանի ցուցմունքներով այն մասին, որ 2013թ. հոկտեմբերի 17-ին, ժամը 13։00-ի սահմաններում, Երևանի մետրոպոլիտենի «Զորավար Անդրանիկ» կայարանում իրեն են մոտեցել ոստիկանության աշխատակիցներ և հրավիրել են աշխատասենյակ, որտեղ որպես ընթերակա մասնակցել է իրեն անծանոթ Քաջիկ Արզումանյանի անձնական խուզարկությանը։ Խուզարկության ընթացքում Քաջիկ Արզումանյանի ձեռքի պայուսակից հայտնաբերվել է սև կռփազենք։ Հայտնաբերվածի կապակցությամբ Ք. Արզումանյանը հայտարարել է, որ այն պատկանում է իրեն և նախատեսված է ինքնապաշտպանության համար։ Հայտնաբերված կռփազենքը փաթեթավորվել և կնիքվել է, իսկ խուզարկության ընթացքի և արդյունքների վերաբերյալ կազմվել է արձանագրություն, որը ստորագրվել է մասնակիցների կողմից։
/դատական նիստի արձանագրություն, գ.թ. 34-35/
Վկա Սերյոժա Միքայելի Ծատուրյանի ցուցմունքներով այն մասին, որ 2013թ. հոկտեմբերի 17-ին, ժամը 13։00-ի սահմաններում, Երևանի մետրոպոլիտենի «Զորավար Անդրանիկ» կայարանում իրեն են մոտեցել ոստիկանության աշխատակիցներ և հրավիրել են աշխատասենյակ, որտեղ որպես ընթերակա մասնակցել է իրեն անծանոթ Քաջիկ Արզումանյանի անձնական խուզարկությանը։ Խուզարկության ընթացքում Քաջիկ Արզումանյանի ձեռքի պայուսակից հայտնաբերվել է սև կռփազենք, որը փաթեթավորվել և կնիքվել է։
/դատական նիստի արձանագրություն, գ.թ. 38-39/
Դատատեխնիկական փորձաքննության 2013թ. հոկտեմբերի 23-ի թիվ 2376 եզրակացությամբ, որի համաձայն` «Փորձաքննության ներկայացված սև գույնի մետաղյա առարկան պատրաստված է արհեստագործական եղանակով կռփազենքերի նմանողությամբ, դասվում է հարվածող-փշրող սառը զենքերի շարքին։»։
/գ.թ. 12-13/
Որպես այլ փաստաթուղթ` ապացույց ճանաչված, անձին բերման ենթարկելու մասին 2013թ. հոկտեմբերի 17-ի արձանագրությամբ, որի համաձայն` 2013թ. հոկտեմբերի 17-ին, ժամը 13։30-ին, Քաջիկ Զավենի Արզումանյանը, սառը զենք կրելու կասկածանքով, Երևանի մետրոպոլիտենի «Զորավար Անդրանիկ» կայարանի նախասրահից բերման է ենթարկվել ՀՀ ոստիկանության մետրոպոլիտենի պահպանության բաժնի սենյակ։
/գ.թ. 3, 51-52/
Որպես այլ փաստաթուղթ` ապացույց ճանաչված, անձին խուզարկության ենթարկելու մասին 2013թ. հոկտեմբերի 17-ի արձանագրությամբ, որի համաձայն` Քաջիկ Արզումանյանի անձնական խուզարկությամբ, նրա ձեռքին եղած մոխրագույն կաշվե պայուսակից հայտնաբերվել է սև, չորս մատերի տեղերով մետաղյա կռփազենք, որի հետին մասում փաթաթված է եղել կպչուն ժապավեն։ Ըստ Ք. Արզումանյանի հայտարարության` հայտնաբերված կռփազենքը պատկանում է իրեն, այն պահել է ինքնապաշտպանության համար։
/գ.թ. 4, 51-52/
Իրեղեն ապացույց ճանաչված, սառը զենք հանդիսացող կռփազենքով։
/գ.թ. 37/




Դատարանի իրավական վերլուծությունները.

Վերլուծելով ամբաստանյալ Քաջիկ Զավենի Արզումանյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Քաջիկ Զավենի Արզումանյանի կողմից, նրա մեղավորությամբ, ապօրինի կերպով սառը զենք կրելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Քաջիկ Զավենի Արզումանյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, վատառողջ է` տառապում է «աջ երիկամի ռոտացիոն հիպոպլազիա» հիվանդությամբ, իրեն լիովին մեղավոր է ճանաչել և տվել է ինքնախոստովանական ցուցմունքներ։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ առկա չեն։
Ամբաստանյալ Քաջիկ Զավենի Արզումանյանն իր կատարած` Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցագործության համար ենթակա է պատժի տուգանքի ձևով։
Դատարանը գտնում է, որ իր նկատմամբ նշանակված պատիժն ամբաստանյալ Քաջիկ Արզումանյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցի հարցը` դատարանը գտնում է, որ դատավճռի օրինական ուժի մեջ մտնելուց հետո, 29.10.2013թ. որոշմամբ իրեղեն ապացույց ճանաչված կռփազենքը պետք է ոչնչացնել։
Քննարկելով խափանման միջոցի հարցը` դատարանը գտնում է, որ ամբաստանյալ Քաջիկ Արզումանյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-365-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Քաջիկ Զավենի Արզումանյանին մեղավոր ճանաչել Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցանքում և դատապարտել տուգանքի նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 29.10.2013թ. որոշմամբ իրեղեն ապացույց ճանաչված կռփազենքը ոչնչացնել։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ