Գործ հ.
ԵԿԴ/0207/01/13

Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ ՈՒ Ն
Վ Ե Ր Ա Ք Ն Ն Ի Չ Ք Ր Ե Ա Կ Ա Ն Դ Ա Տ Ա Ր Ա Ն

Ո Ր Ո Շ Ո Ւ Մ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«08» հուլիսի 2014թ. ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ` Ա.ԽԱՉԱՏՐՅԱՆԻ
ԴԱՏԱՎՈՐՆԵՐ` Ա. ԴԱՆԻԵԼՅԱՆԻ
Ե.ԴԱՐԲԻՆՅԱՆԻ

ՔԱՐՏՈՒՂԱՐՈՒԹՅԱՄԲ` Մ. ՄԱՀՏԵՍՅԱՆԻ

ՄԱՍՆԱԿՑՈՒԹՅԱՄԲ՝
ՊԱՇՏՊԱՆ` Ռ.ԲԱԼԱԲԱՆՅԱՆԻ
ՄԵՂԱԴՐՈՂ` Տ.ՊՈՂՈՍՅԱՆԻ
ՏՈՒԺՈՂԻ ՆԵՐԿԱՅԱՑՈՒՑԻՉ` Շ.ՓԻՐՈՒԶՅԱՆԻ

Դռնբաց դատական նիստում ամբաստանյալ Հրաչյա Սարգսյանի շահերի պաշտպան Ռ.Բալաբանյանի վերաքննիչ բողոքի հիման վրա քննության առնելով քրեական գործն ըստ մեղադրանքի` Հրաչյա Օգսենի Սարգսյանի` ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով 2 (երկու) դրվագներով,

Պ Ա Ր Զ Ե Ց

1.Գործի դատավարական նախապատմությունը.
ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնում 14.11.2012 թվականին ՀՀ քրեական օրենգրքի 34-178-րդ հոդվածի 3-րդ մասի 1-ին կետի և 325-րդ հոդվածի 1-ին մասի հատկանիշներով հարուցվել է թիվ 15121912 քրեական գործը:
14.11.2012 թվականին Հրաչյա Սարգսյանը ձերբակալվել է:
16.11.2012 թվականին Հրաչյա Սարգսյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 16.11.2012 թվականի որոշմամբ Հրաչյա Սարգսյանի նկատմամբ որպես խափանման միջոց է կիրառվել կալանավորում 2/երկու/ ամիս ժամկետով` կալանավորման սկիզբը հաշվելով 14.11.2012 թվականից:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի համապատասխան որոշումներով Հրաչյա Սարգսյանին կալանքի տակ պահելու ժամկետը երկարացվել է:
23.08.2013 թվականի որոշմամբ Հրաչյա Սարգսյանին նախկինում առաջադրված մեղադրանքը փոփոխվել, լրացվել է, և նրան նոր մեղադրանք է առաջադրվել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով, 325-րդ հոդվածի 1-ին մասով, 325-րդ հոդվածի 1-ին մասով:
28.10.2013 թվականին թիվ 15121912 քրեական գործը հաստատված մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան 2014 թվականի ապրիլի 18-ի դատավճռով` ամբաստանյալ Հրաչյա Օգսենի Սարգսյանը մեղավոր է ճանաչվել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով 2 (երկու) դրվագներով և դատապարտվել.
ՀՀ քրեական օրենսգրքի 34-178-րդ հոդվածի 3-րդ մասի 1-ին կետով ազատազրկման` 5 (հինգ) տարի ժամկետով` առանց գույքի բռնագրավման,
ՀՀ քրեական օրենսգրքի 325-րդ հոդվածի 1-ին մասով, 2 (երկու) դրվագներից յուրաքանչյուրով` ազատազրկման` 6 (վեց) ամիս ժամկետով։
Կիրառվել է ՀՀ քրեական օրենսգրքի 66-րդ հոդվածը, նշանակված պատիժները լրիվ գումարելով` Հրաչյա Օգսենի Սարգսյանի նկատմամբ վերջնական պատիժ է նշանակվել ազատազրկում` 6 (վեց) տարի ժամկետով` առանց գույքի բռնագրավման։
Հրաչյա Սարգսյանի պատժի կրման սկիզբը հաշվվել է 2012 թվականի նոյեմբերի 13-ից, նրա նկատմամբ որպես խափանման միջոց ընտրված կալանավորումը թողնվել է անփոփոխ` մինչև դատավճռի օրինական ուժի մեջ մտնելը։
Վճռվել է` իրեղեն ապացույց ճանաչված և գործին կցված փաստաթղթերը` «Արցախբանկ» ՓԲ ընկերության անունից կազմված 2012 թվականի սեպտեմբերի 11-ի գրությունը, «Պիրամիդա» ՍՊ ընկերության մասնակիցների արտահերթ ժողովի 02 արձանագրության քաղվածքը, նույն ընկերության ժողովի 2012 թվականի օգոստոսի 31-ի արձանագրությունը, 2012 թվականի հոկտեմբերի 30-ի երաշխավորության երկու պայմանագրերը, պահել քրեական գործի հետ` այն պահելու ողջ ժամանակահատվածում։
Հրաչյա Օգսենի Սարգսյանի անվամբ հաշվառված շարժական և անշարժ գույքերի, այդ թվում` համատեղ սեփականության իրավունքով նրան պատկանող` Երևան քաղաքի Շինարարների փողոցի 35-րդ շենքի 37-րդ բնակարանի նկատմամբ նախաքննական մարմնի 2013 թվականի հունվարի 14-ի որոշմամբ կիրառված արգելանքը վերացվել է` կիրառման հիմքերը վերանալու պատճառաբանությամբ։
Դատարանի` վերը նշված դատավճռի դեմ ամբաստանյալ Հրաչյա Սարգսյանի շահերի պաշտպան Ռ.Բալաբանյանը բերել է վերաքննիչ բողոք, որով խնդրել է այն բեկանել, ամբաստանյալ Հրաչյա Սարգսյանին ճանաչել անպարտ և դատարանով արդարացված:
Վերաքննիչ բողոքի առթիվ գրավոր պատասխան չի բերվել:
Վերաքննիչ դատարանի 2014 թվականի մայիսի 29-ի որոշմամբ պաշտպանի վերաքննիչ բողոքն ընդունվել է վարույթ և գործը նշանակվել է քննության ՀՀ վճռաբեկ դատարանում գործերի քննության համար սահմանված կանոններով:

2.Գործի փաստական հանգամանքները.
Դատաքննությամբ հետազոտված ապացույցների գնահատման արդյունքներով դատարանը հաստատված է համարել այն, որ Հրաչյա Սարգսյանը օգտագործման նպատակով կեղծել է իրավունք վերապահող պաշտոնական փաստաթուղթ և օգտագործել ակնհայտ կեղծ այդ փաստաթուղթը, բացի այդ, խաբեությամբ առանձնապես խոշոր չափի գույք հափշտակելու դիտավորությամբ կեղծել է իրավունք վերապահող պաշտոնական փաստաթղթեր և օգտագործել դրանք, սակայն իր կամքից անկախ հանգամանքներով հանցավոր դիտավորությունն ավարտին չի հասցրել, որպիսի գործողություններն արտահայտվել են հետևյալում.
Այսպես, Հրաչյա Սարգսյանը, հանդիսանալով «Ս.Տ.Շ.-Պիրամիդա» (այսուհետ նաև՝ «Պիրամիդա») ՍՊ ընկերության տնօրենը, «Արցախբանկ» ՓԲ ընկերության «Կենտրոնական» մասնաճյուղից 15.000.000 ՀՀ դրամ գումարի չափով վարկ ստանալու նպատակով կեղծել և պատրաստել է իրավունք վերապահող պաշտոնական կեղծ փաստաթուղթ` 2011թ. հունվարի 19-ին իբրև թե կայացած «Պիրամիդա» ՍՊ ընկերության մասնակիցների արտահերթ ընդհանուր ժողովի թիվ 02-րդ արձանագրության քաղվածքը, ստորագրել ընկերության հիմնադիրներ Քրիստիան Զադիկյանի և Մուշեղ Օհանյանի անունից, ապա այլ փաստաթղթերի կազմում այն ներկայացրել նույն բանկի մասնաճյուղ։ Վերոնշյալ կեղծ փաստաթղթի հիման վրա 2011թ. հունվարի 31-ին Հրաչյա Սարգսյանի և «Արցախբանկ» ՓԲ ընկերության միջև կնքվել է վարկային պայմանագիր, որով որպես վարկային պարտավորությունը կատարելու երաշխավոր է հանդես եկել իրավաբանական անձ հանդիսացող «Պիրամիդա» ՍՊ ընկերությունը։ Հր.Սարգսյանը, իրականում առանց «Պիրամիդա» ՍՊ ընկերության հիմնադիրներ Քրիստիան Զադիկյանի և Մուշեղ Օհանյանի համաձայնության, առավել ևս՝ երաշխավորության, ստանալով վերոնշյալ վարկը, վարկային պայմանագրով ստանձնած իր պարտավորությունները պատշաճ կարգով չի կատարել, որի հետևանքով Երևան քաղաքի Աջափնյակ և Դավիթաշեն վարչական շրջանների ընդհանուր իրավասության դատարանի կողմից 2013թ. հունիսի 7-ին կայացված որոշման հիման վրա արգելանք է կիրառվել ոչ միայն որպես երաշխիք Հր.Սարգսյանի առաջարկած նրա անձնական գույքի` Երևան քաղաքի Շինարարների 35-րդ շենքի թիվ 37 հասցեում գտնվող 53.9 քմ ընդհանուր մակերեսով բնակարանի, այլև անհիմն կերպով որպես երաշխավոր:
Բացի այդ, Հրաչյա Սարգսյանը, խաբեությամբ, ինչպես նաև «Պիրամիդա» ՍՊ ընկերության բաժնետերեր (հիմնադիրներ) Քրիստիան Զադիկյանի և Մուշեղ Օհանյանի վստահությունը չարաշահելով, առանց վերջիններիս գիտության «ՎՏԲ-Հայաստան Բանկ» (այսուհետ նաև՝ Բանկ) ՓԲ ընկերությունում գրավադրել է իր ղեկավարած ընկերությանը պատկանող, այլ բանկից վերցված վարկի շրջանակներում գրավադրված Երևանի Սայաթ-Նովա 20/2 և Մետաղագործների փողոցի 28-րդ շենքի 2-րդ հասցեներում գտնվող անշարժ գույքը` առանձնապես խոշոր չափի նոր վարկ ստանալու և այն խարդախությամբ հափշտակելու դիտավորությամբ, սակայն հանցավոր նպատակին չի հասել իր կամքից անկախ հանգամանքներով։
Իր հանցավոր բազմաքայլ ծրագիրն իրագործելու նպատակով Հր.Սարգսյանը 2012թ. օգոստոսի սկզբին հանդիպել է վաղեմի ծանոթ Հայկ Սերոբյանին, տեղեկացրել, թե իբր պաշտպանության նախարար Սեյրան Օհանյանի գիտությամբ «Պիրամիդա» համալիրը պետք է գրավադնի բանկում 1.500.000-ից 1.800.000 ԱՄՆ դոլար գումարի չափով, հնարավորինս ցածր տոկոսադրույքով վարկ ստանալու նպատակով, օրեր անց Հր.Սերոբյանի միջոցով Երևան քաղաքի Նալբանդյան փողոցում տեղակայված «ՎՏԲ-Հայաստան Բանկ» ՓԲ ընկերության (այսուհետև նաև՝ Բանկ) գրասենյակի մոտակայքում ծանոթացել է վերջինիս ընկեր, նույն Բանկի փոքր բիզնեսի վարչության կառավարող տնօրեն Ռաֆայել Օհանջանյանի հետ, նրա հետ քննարկել անշարժ գույքի գրավադրմամբ վարկ ստանալու հարցը։
Զրույցի ընթացքում Հր.Սարգսյան Ռ.Օհանջանյանին խաբել է՝ նշելով, թե իբր վարկ վերցնելը պայմանավորված է ընկերության բաժնետեր Քրիստիան Զադիկյանի կողմից բաժնեմասը մյուս բաժնետեր Մուշեղ Օհանյանին վաճառելու անհրաժեշտությամբ՝ վստահեցնելով, թե իբր ամեն ինչ կատարվում է վերոնշյալ բաժնետերերի գիտությամբ ու համաձայնությամբ։
Վերոնշյալ գործարքը Բանկի տեսանկյունով դիտարկվել է որպես շահավետ, որի կապակցությամբ 2012թ. սեպտեմբերի 3-ին Ռ.Օհանջանյանի առաջարկությամբ, նրա, Հ.Սերոբյանի և Հր.Սարգսյանի մասնակցությամբ Երևան քաղաքի Նալբանդյան փողոցում տեղակայված «ՎՏԲ- Հայաստան Բանկ» ՓԲ ընկերության մոտակայքում գործող սրճարանում կայացել է հերթական հանդիպումը, որտեղ Հր.Սարգսյանը, որպես «Պիրամիդա» ՍՊ ընկերության տնօրեն, ստորագրել և Ռ.Օհանջանյանին է հանձնել վարկ ստանալու վերաբերյալ դիմումը։ Օրեր անց, Հր.Սարգսյանը, օգտվելով «Պիրամիդա» ՍՊ ընկերության տնօրեն հանդիսանալու և այդ կապակցությամբ ձեռքի տակ հիմնադիր և այլ փաստաթղթերի կամ դրանց լուսապատճենների առկայությունից, Բանկի աշխատակիցների պահանջով Երևան քաղաքի Նալբանդյան փողոցում տեղակայված «ՎՏԲ- Հայաստան Բանկ» ՓԲ ընկերություն է ներկայացրել ընկերության հիմնադիր և դրա բաժնետերերի վերաբերյալ անհրաժեշտ փաստաթղթերը, այդ թվում` ներկայացրել և օգտագործել է նախապես պատրաստած իրավունք վերապահող պաշտոնական կեղծ փաստաթուղթ` 2012թ. օգոստոսի 31-ով թվագրված «Պիրամիդա» ՍՊ ընկերության ժողովի արձանագրությունը, ըստ որի` իբր այդ օրը տեղի ունեցած «Պիրամիդա» ՍՊ ընկերության հերթական նիստին հիմնադիրներ Ք.Զադիկյանն ու Մ.Օհանյանը քննարկել և որոշել են ֆինանսավորման նպատակով դիմել «ՎՏԲ-Հայաստան Բանկ» ՓԲ ընկերություն, ստանալ 1.800.000 ԱՄՆ դոլար գումարի չափով վարկ և դրա դիմաց, որպես գրավի առարկա, առաջարկել Երևան քաղաքի Սայաթ-Նովա 20/2 և Մետաղագործների 28-րդ շենք 2 հասցեներում գտնվող անշարժ գույքերը։
Գիտակցելով այն, որ Բանկի աշխատակիցները ՀՀ կառավարությանն առընթեր անշարժ գույքի կադաստրի պետական կոմիտեի աշխատակազմ կատարվող հարցմամբ ստուգելու են որպես գրավ առաջարկվող «Պիրամիդա» ՍՊ ընկերության վերոնշյալ անշարժ գույքերի նկատմամբ սահմանափակումների առկայության կամ բացակայության հանգամանքը, որի կապակցությամբ բացահայտվելու է Երևան քաղաքի Սայաթ-Նովա 20/2 և Մետաղագործների 28-րդ շենքի 2 հասցեներում գտնվող անշարժ գույքն արդեն իսկ մեկ այլ, դեռևս ամբողջությամբ չմարված 900.000 ԱՄՆ դոլար վարկի շրջանակներում «Արցախբանկ» ՓԲ ընկերությունում գրավադրված լինելու փաստը, հետևաբար` նաև առանց բաժնետերերի գիտության վարկ ստանալու իր մտադրությունը` իր հանցավոր դիտավորությունը շարունակելու և ավարտին հասցնելու, նախապես մշակած գործողությունների ծրագրի շրջանակներում Հր.Սարգսյանը օգտագործման նպատակով կեղծել և պատրաստել է իրավունք վերապահող պաշտոնական մեկ այլ փաստաթուղթ` 2012թ. սեպտեմբերի 11-ով թվագրված «Արցախբանկ» ՓԲ ընկերության անունից կազմված գրությունը, որի համաձայն` կադաստրային ստորաբաժանմանը «Արցախբանկ» ՓԲ ընկերությունը տեղեկացրել է, թե իբր «Պիրամիդա» ՍՊ ընկերությանը սեփականության իրավունքով պատկանող Երևանի Սայաթ-Նովա 20/2 հասցեում գտնվող անշարժ գույքը որևէ պարտավորությունով այլևս ծանրաբեռնված չէ, քանի որ բանկի նկատմամբ այդ պարտավորություններն իբրև թե կատարվել են։
Վերոնշյալ ակնհայտ կեղծ փաստաթուղթը Հր.Սարգսյանը, որպես «Պիրամիդա» ՍՊ ընկերության տնօրեն, օգտագործել և ներկայացրել է ՀՀ կառավարությանն առընթեր անշարժ գույքի կադաստրի պետական կոմիտեի աշխատակազմի «Կենտրոն» սպասարկման գրասենյակ։ Դրա հետևանքով վերոնշյալ գրասենյակը, «ՎՏԲ-Հայաստան Բանկ» ՓԲ ընկերության հարցմանն ի պատասխան, Բանկին տվել է տեղեկանք՝ այն մասին, որ «Պիրամիդա» ՍՊ ընկերությանը պատկանող, Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող 115.5 քմ ընդհանուր մակերեսով բնակելի բնակարանը, 513.1 քմ ընդհանուր մակերեսով հասարակական տարածքը և 293.0 քմ ընդհանուր մակերեսով հողամասը սահմանափակումներից ազատ են, այսինքն՝ վարկ տրամադրելու նպատակով Բանկի կողմից դրանք որպես գրավ ընդունելու խոչընդոտներ չկան։
2012թ. հոկտեմբերի վերջերին Ռ.Օհանջանյանը և Բանկի փոքր բիզնեսի վարչության պետ Մեսրոպ Առաքելյանը Հր.Սարգսյանի հետ ունեցած հանդիպումների ժամանակ վերջինիս ներկայացրել են նոր պահանջ՝ հայտնելով, որ վարկ տրամադրելու համար Բանկը նախապես երաշխավորության պայմանագրեր պետք է կնքի Ք.Զադիկյանի բաժնեմասը գնելու ցանկություն հայտնած Մուշեղ Օհանյանի, ինչպես նաև վերջինիս որդի, ՀՀ կառավարության անդամ Սեյրան Օհանյանի հետ, և որ այդ պայմանագրերը վերջիններս կարող են ստորագրել նաև Բանկի մասնաճյուղերի տարածից դուրս, սակայն պարտադիր Բանկի աշխատակցի ներկայությամբ։ Հր.Սարգսյանը Ս.Օհանյանի աշխատանքային ծանրաբեռնվածության պատրվակով խնդրել և խաբեությամբ ստացել է երաշխավորության պայմանագրի նախագիծը (չստորագրված օրինակը)՝ պատճառաբանելով, թե իբր այն պետք է ուղարկի Ս.Օհանյանին` ծանոթանալու, ապա Բանկի աշխատակիցների ներկայությամբ ստորագրելու համար, իրականում հետապնդել է բաժնեմաս ձեռք բերելուց և վարկ ստանալուց առհասարակ անտեղյակ Ս.Օհանյանի ստորագրությունը կեղծելու և իրավունք վերապահող պաշտոնական այդ կեղծ փաստաթղթերը Օհանյաններից ծածուկ եղանակով Բանկին ներկայացնելու նպատակ։
Գիտակցելով, որ վերոնշյալ երաշխավորության պայմանագրերը նույնիսկ անձամբ չի կարող ներկայացնել Սեյրան և Մուշեղ Օհանյանների ծանոթացմանն ու ստորագրությանը՝ Հր.Սարգսյանը դիմել է հերթական խաբեությանը, մասնավորապես՝ տեղեկացված լինելով, որ ՀՀ պաշտպանության նախարարության վարչական շենքում է աշխատում Հր.Սերոբյանի ընկերը՝ ՀՀ ԶՈՒ և ԱԿՀ վարչության կապի պլանավորման և կազմակերպման բաժնի կապի կազմակերպման բաժանմունքի սպա Գևորգ Հարությունյանը՝ Հր.Սարգսյանը Ս.Օհանյանի անվամբ կազմված երաշխավորության պայմանագրում նախապես կեղծելով պաշտպանության նախարար Ս.Օհանյանի ստորագրությունը, այդ փաստը թաքցրել է ինչպես Հր.Սերոբյանից, այնպես էլ Գ.Հարությունյանից` վերջիններիս միջոցով 2012թ. նոյեմբերի 6-ին այդ պայմանագիրը հանձնել է նախարար Ս.Օհանյանի մոտ ընդունելության արժանանալու նպատակով նախարարության վարչական շենքի անցակետ ժամանած Բանկի աշխատակիցներ Մ.Առաքելյանին ու «ՎՏԲ-Հայաստան Բանկ» ՓԲ ընկերության վարկային գործարքների ձևակերպման վարչության մանրածախ բիզնեսի վարկային գործարքների ձևակերպման բաժնի մասնագետ Աշոտ Ֆերոյանին։ Վերջիններս վերոնշյալ պայմանագիրը ՀՀ պաշտպանության նախարարության վարչական շենքից դուրս եկած և իրենց մոտեցած սպա Գ.Հարությունյանից ստանալու փաստով, ինչպես նաև նախարար Ս.Օհանյանի ընդունելությանն արժանանալու անհնարինության վերաբերյալ նրա հավաստիացումների ազդեցությամբ հայտնվել են բարեխիղճ մոլորության մեջ՝ Բանկի ղեկավարության հետ այդ հարցն համաձայնեցրել և ընդունել են վերոնշյալ կեղծ պայմանագիրն որպես նախարար Ս.Օհանյանի ստորագրությամբ հաստատված պատշաճ փաստաթուղթ, որը Բանկը ևս հաշվի է առել հետագայում վարկը հաստատելու որոշում ընդունելիս։
Բացի այդ, Հր.Սարգսյանը, գիտակցելով, որ Բանկի աշխատակիցները, ինչպես նաև Հր.Սերոբյանը նախկինում առիթ չեն ունեցել հանդիպել Մուշեղ Օհանյանին, դեմքով նրան չեն ճանաչում, վերջինիս արտաքնապես նման անձնավորության նախապես գտնելով, 2012թ. նոյեմբերի 6-ին` երեկոյան, զանգահարել է Հր.Սերոբյանին, հայտնել, թե իբր հաջորդ օրը՝ առավոտյան, Մ.Օհանյանը ժամանելու է «Պիրամիդա» համալիր՝ նրա անվամբ կազմված երաշխավորության պայմանագրին ծանոթանալու ու ստորագրելու նպատակով, ուստի խնդրել է Ռ.Օհանջանյանին տեղեկացնել Մ.Օհանյանի ժամանման մասին։ Հաջորդ օրը՝ 2012թ նոյեմբերի 7-ին, Հր.Սարգսյանը «Պիրամիդա» համալիրի սրճարան է հրավիրել արտաքնապես Մ.Օհանյանին նման տարեց տղամարդուն՝ նպատակ ունենալով Բանկի աշխատակիցներին խաբել և նրան ներկայացնել որպես Մ.Օհանյանի։ Իր հերթին Հր.Սերոբյանը հանդիպել է Ռ.Օհանջանյանին ու «ՎՏԲ-Հայաստան Բանկ» ՓԲ ընկերության վարկային գործարքների ձևակերպման վարչության մանրածախ բիզնեսի վարկային գործարքների ձևակերպման բաժնի ավագ մասնագետ Գարիկ Նազարյանին, նրանց ուղեկցել «Պիրամիդա» համալիրի սրճարան։ Հր.Սարգսյանը համալիր ժամանած Ռ.Օհանջանյանին ու Գ.Նազարյանին դիմավորել է, ապա մատնացույց անելով քիչ հեռվում նստած տղամարդուն` հայտնել է, թե իբր վերջինս հանդիսանում է Մ.Օհանյանը, նրան Բանկի աշխատակիցների ներկայությամբ դիմել «Շեֆ ջան» դիմելաձևով։ Օգտվելով Գ.Նազարյանի անուշադրության հանգամանքից, բոլորից աննկատ՝ Հր.Սարգսյանը Մ.Օհանյանի փոխարեն ստորագրել է նաև վերջինիս անվամբ կազմված երաշխավորության պայմանագրում՝ այդ կերպ կեղծելով նաև Մ.Օհանյանի անվամբ կազմված երաշխավորության պայմանագիրը և այն ևս ներկայացնելով Բանկի աշխատակիցներին։
Ռ.Օհանջանյանի և Մ.Առաքելյանի հետ կայացած հանդիպումների ընթացքում Հր.Սարգսյանը տեղեկացել է, որ վարկը հաստատվելու դեպքում դրա գումարը փոխանցվելու է «ՎՏԲ-Հայաստան Բանկ» ՓԲ ընկերության «Մյասնիկյան» մասնաճյուղում բացված «Պիրամիդա» ՍՊ ընկերության հաշվեհամարին, ապա` բաժնեմասը վաճառող Քրիստիան Զադիկյանի անվամբ բացված մեկ այլ հաշվեհամարի, ավելին, որպես ընկերության տնօրեն, նա չի կարողանալու տնօրինել «Մյասնիկյան» մասնաճյուղում բացված «Պիրամիդա» ՍՊ ընկերության հաշվեհամարին փոխանցվելիք վարկի գումարը և որ այն պարտադիր կարգով պետք փոխանցվի Ք.Զադիկյանի հաշվեհամարին, փոխանցված այդ գումարը կարող է տնօրինել միայն Ք.Զադիկյանն անձամբ կամ վերջինիս լիազորած անձը։
Մշտապես Ֆրանսիայի Հանրապետությունում բնակվող Քրիստիան Զադիկյանից նման լիազորագիր ձեռք բերելու և այդ լիազորագրի օգտագործմամբ իր հանցավոր դիտավորությունը բարեհաջող ավարտին հասցնելու նպատակով Հր.Սարգսյանը 2012թ. հոկտեմբերի վերջերին զանգահարել է նրան, խաբեությամբ և Ք.Զադիկյանի վստահությունը չարաշահելով` թաքցրել է դեռևս 2011թ. հունվարի 31-ին «Արցախբանկ» ՓԲ ընկերության «Կենտրոնական» մասնաճյուղում կնքված վարկային պայմանագրի շրջանակներում Երևան քաղաքի Շինարարների 35 շենքի թիվ 37 հասցեում գտնվող իր բնակարանը գրավադրված լինելու փաստը, հայտնել, թե իբր սահմանափակումներից ազատ այդ բնակարանի գրավադրմամբ բանկից ստանալու է վարկ, որով ցանկանում է մաս-մաս մարել նրա հանդեպ իր ղեկավարած ընկերության ունեցած և տարիների ընթացքում կուտակված շուրջ 80.000 ԱՄՆ դոլար պարտքը, Ք.Զադիկյանի անունով ձեռք բերել «Ինֆինիտի» քարտ, պատճառաբանել, թե իբր դա իրականացնելու համար անհրաժեշտ է նրա անունից տրված լիազորագիր՝ «ՎՏԲ-Հայաստան Բանկ» ՓԲ ընկերությունում նոր հաշվեհամար բացելու, մաս-մաս գումարներ փոխանցելու, ազատորեն և ողջ ծավալով հաշվեհամարին փոխանցվող գումարները տնօրինելու նպատակով, ավելին` ուղարկել լիազորագրի նախագծի տեքստը։
Ք.Զադիկյանը, վստահելով Հր.Սարգսյանին, համաձայնել և վերջինիս ուղարկած լիազորագրի նախագծով 2012թ. նոյեմբերի 2-ին նրան տվել է վերոնշյալ բովանդակությամբ լիազորագիր, այդ թվում՝ իր անվամբ «ՎՏԲ-Հայաստան Բանկ» ՓԲ ընկերությունում բացված 16104000133105 հաշվեհամարից գումարներ կանխիկացնելու լիազորությամբ, որը նախապես հաստատել է Ֆրանսիայում Հայաստանի Հանրապետության դեսպանատան հյուպատոսական ծառայությունում, ապա առձեռն ուղարկել Հր.Սարգսյանին։
Վերոնշյալ հանգամանքներում կազմված փաստաթղթերի քննարկման արդյունքներում 2012թ. նոյեմբերի 8-ին Բանկի և «Պիրամիդա» ՍՊ ընկերության տնօրեն Հր.Սարգսյանի միջև, իրականում առանց «Պիրամիդա» ՍՊ ընկերության բաժնետերերի գիտության, կնքվել են գլխավոր վարկային թիվ Ե44Ի337, անշարժ գույքի հիփոթեքի թիվ Ե44Ի337ա պայմանագրերը, դրանց բաղկացուցիչ մաս կազմող այլ պայմանագրեր, Բանկը հաստատել է 1.100.000 ԱՄՆ դոլար գումարի չափով վարկ, որի դիմաց գրավադրվել է սեփականության իրավունքով պատկանող Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող 115.5 քմ ընդհանուր մակերեսով բնակարանը, 513.1 քմ ընդհանուր մակերեսով հասարակական տարածքը և 293.0 քմ ընդհանուր մակերեսով հողամասը։
Բանկում սահմանված ընթացակարգով 1.100.000 ԱՄՆ դոլար վարկի գումարը փոխանցվել է «ՎՏԲ-Հայաստան Բանկ» ՓԲ ընկերության «Մյասնիկյան» մասնաճյուղում բացված «Պիրամիդա» ՍՊ ընկերության հաշվեհամարին, ապա` Երևան քաղաքի Բաղրամյան 2/86 հասցեում տեղակայված «Փրայմ» մասնաճյուղ (այսուհետ՝ նաև Մասնաճյուղ)՝ Քրիստիան Զադիկյանի հաշվեհամարին։ Գրեթե անմիջապես՝ 2012թ. նոյեմբերի 9-ին, Հր.Սարգսյանը զանգահարել է Մասնաճյուղի կառավարիչ Սուրեն Զոհրաբյանին, վկայակոչելով Ք.Զադիկյանի կողմից իրեն տրամադրված 2012թ. նոյեմբերի 2-ի լիազորագիրը՝ խնդրել է վերջինիս անվամբ փոխանցված 1.100.000 ԱՄՆ դոլար գումարից անմիջապես հաջորդ օրը՝ 2012թ. նոյեմբերի 10-ին, կանխիկ ստանալու համար նախապատրաստել 400.000 ԱՄՆ դոլարի չափով գումար՝ նշելով, որ անձամբ է ժամանելու Մասնաճյուղ և ստանալու այն, միաժամանակ տեղեկացրել, որ 700.000 ԱՄՆ դոլար գումարը պետք է փոխանցվի իր անձնական հաշվեհամարներին, որոնց տվյալները կհայտնի 400.000 ԱՄՆ գումարը ստանալիս։
«Փրայմ» մասնաճյուղի կառավարիչ Ս.Զոհրաբյանը, թեև անձամբ Ք.Զադիկյանից նախապես խնդրել և էլեկտրոնային տարբերակով ստացել էր Հր.Սարգսյանին տրամադրված լիազորագրի էլեկտրոնային տարբերակը, նրա հետ ունեցած զրույցի ընթացքում առերևույթ համոզվել, որ Ք.Զադիկյանը քաջատեղյակ է այդ լիազորագրի բովանդակությունից, այնուամենայնիվ, որոշել է լրացուցիչ անգամ զանգահարել և 2012թ. նոյեմբերի 9-ին Ք.Զադիկյանի հետ կայացած հերթական հեռախոսազրույցի ընթացքում նրան տեղեկացրել է, որ վերջինիս անվամբ Մասնաճյուղում բացված հաշվեհամարին նախորդ օրը փոխանցվել է 1.100.000 ԱՄՆ դոլար գումար։ Հեռախոսակապի ցածրորակության պատճառով Ք.Զադիկյանը լսել է միայն գումարի չափը` չընկալելով, որ խոսքն ոչ թե դրամի, այլ իրականում ԱՄՆ դոլարի մասին է, ուստի և կարծելով, որ Հր.Սարգսյանն իր հաշվեհամարին, որպես կուտակված 80.000 ԱՄՆ դոլար պարտքի մի մասի մարում, փոխանցել է ընդամենը 1.100.000 ՀՀ դրամ և ոչ թե 20.000 ԱՄՆ դոլար` իր հերթին զանգահարել է Հր.Սարգսյանին, կատակել՝ հարցնելով, թե փոխանցված գումարն արդյո՞ք ԱՄՆ դոլարով չէ։ Հր.Սարգսյանը, կարծելով, որ Ք.Զադիկյանին ինչ-որ կերպ հաջողվել է տեղեկացել իր հանցավոր մտադրության մասին, խոստովանել է, որ Զադիկյանի անվամբ բացված հաշվեհամարին փոխանցված գումարը ԱՄՆ դոլարով է։ Անակնկալի գալով, բայց և ժամանակին արձագանքելով` Ք.Զադիկյանն անմիջապես զանգահարել է Մասնաճյուղի կառավարիչ Ս.Զոհրաբյանին, հանձնարարել մինչև իր՝ Երևան ժամանելը դադարեցնել լիազորագրի հետ կապված բոլոր գործարքները։ Մասնաճյուղի կառավարիչ Ս.Զոհրաբյանը, օգտվելով Բանկի կանոնադրությամբ իրեն վերապահված լիազորությունից, Ք.Զադիկյանի հանձնարարությունն անմիջապես կատարել և կանխիկացման գործարքը դադարեցրել է, որի հետևանքով Հր.Սարգսյանն իր կամքից անկախ հանգամանքներով զրկվել է 449.416.000 ՀՀ դրամին համարժեք 1.100.000 ԱՄՆ դոլար վարկի գումարը Մասնաճյուղում կանխիկացնելու և խարդախությամբ այն հափշտակելու դիտավորությունն ավարտելու հնարավորությունից։

3.Վերաքննիչ բողոքի հիմքերը, փաստարկները և պահանջը.
Վերաքննիչ բողոքը քննվում է հետևյալ հիմքերի սահմաններում, ներքոնշյալ հիմնավորումներով:
Բողոք բերած անձը գտել է, որ դատարանը խախտել է ՀՀ քրեական դատավարության օրենսգրքի 358-րդ հոդվածի պահանջները, դատավճիռն օրինական չէ, չի պահպանվել ՀՀ քրեական դատավարության օրենսգրքի 104-րդ հոդվածի պահանջները։
Նշել է, որ ինչպես որպես տուժողներ ներկայացած անձանց, այնպես էլ վկաների ցուցմունքներում չի անցնում այն տեղեկացվածությունը, որ «ՍՏՇ-Պիրամիդա» ՍՊԸ-ի տնօրեն Հրաչյա Սարգսյանը խաբեությամբ պետք է հափշտակեր, տիրանար վերցված վարկին, այլ ընդհակառակը, վկաներ Օհանջանյանի, Առաքելյանի, Ֆերոյանի ցուցմունքներով հիմնավորվել է, որ ամբաստանյալը միջոցներ է ձեռնարկել այդ վարկի անխափան վերադարձելիության ապահովման շուրջ։
Բողոքաբերի համոզմամբ` դատարանը գործում եղած այս ապացույցները չի գնահատել դրանց համակցության մեջ, դրանց բազմակողմանի, լրիվ և օբյեկտիվ քնության վրա հիմնված ներքին համոզմամբ, դատարանը չի պահպանել ՀՀ քրեական դատավարության օրենսգրքի 17-րդ հոդվածով նախատեսված գործի արդարացի քննության սկզբունքները, չի ձեռնարկել քրեական դատավարության օրենսգրքով նախատեսված բոլոր միջոցառումները գործի հանգամանքների բազմակողմանի, լրիվ և օբյեկտիվ հետազոտման համար չի պարզել ամբաստանյալին արդարացնող հանգամանքները այն դեպքում, երբ դրանք բազմաթիվ էին։ «ՍՏՇ-Պիրամիդա» ՍՊԸ-ի մասնակիցների ժողովի որոշման մեջ չի նշված, որ վարկը վերցվում է հիփոթեքի համար, այլ նշված է «ֆինանսավորման նպատակով դիմել «ՎՏԲ-Հայաստան բանկ» ՓԲԸ, ստանալ 1.800.000 ԱՍՆ դոլար գումարի չափով վարկ և դրա դիմաց, որպես գրավի առարկա առաջարկել Երևան քաղաքի Սայաթ-Նովա 20/2 և Մետաղագործների 28 շենքի 2 հասցեում գտնվող անշարժ գույքը։ Հիփոթեք հասկացությունը առաջացել է «ՎՏԲ-Հայաստան բանկ» ՓԲԸ-ի աշխատակիցների հետ զրուցելու ընթացքում, վարկի ցածր տոկոսադրույք ապահովելու նպատակով։ Բիզնես վարկը տրվում է մոտ 24%-ի սահմաններում։ Դատավճռի 15-րդ էջում զետեղված է «Արցախ բանկ» ՓԲԸ Երևանի «Կենտրոնականի» մասնաճյուղի կառավարչի տեղակալ, գործով որպես վկա հարցաքննված Դավիթ Գուլյանի ցուցմունքը։ Այս ցուցմունքից երևում է, որ ամբաստանյալ Հրաչյա Սարգսյանը 2006–2009թթ. չորս դրվագով վերցրել է 50, 360, 200 և 900 հազարական ԱՄՆ դոլար վարկ և դրանք ձևակերպվել են հիպոթեքային պայմանագրի հիման վրա, հիպոթեքային տարեկաև 15% տոկոսադրույքով և ամեն անգամ գրավադրվել է «ՍՏՇ-Պիրամիդա» ՍՊԸ-ին պատկանող Սայաթ-Նովա 20/2 և Մետաղագործների 28 շենքի թիվ 2 հասցեում գտնվող անշարժ գույքը, այդ հիպոթեքային վարկերը բացի վերջին 900 հազար ԱՄՆ դոլար վարկից ընկերությունը մարել է սահմանված ժամկետներում, իսկ 900 հազար ԱՍՆ դոլարի վարկի մարման ժամկետ է սահմանված, ըստ հիպոթեքային պայմանագրի, մինչև 2017թ. հունիսի 10-ը, ընկերության անշարժ գույքր ոչ-ոքի չի վաճառվել, ոչ-ոքի չի փոխանցվել, նույնը պետք է գործեր նաև այս պարագայում։ Ընդորում, այս չորս դրվագով վարկերի փաստաթղթերում՝ հիմնադիրների ժողովի որոշումները, երաշխավորությունները, հաջորդող գրավի պայմանագրերը հիմնադիրների՝ Ք.Զադիկյանի և Մ.Օհանյանի փոխարեն ստորագրությունները կեղծել է ամբաստանյալը, այսինքն, այդ չորս դրվագով վերցրած հիփոթեքային վարկերը վերցվել են նույն եղանակով, ինչ եղանակով, որ փորձ է արվել 5-րդ անգամ վարկ վերցնելու ժամանակ, սակայն այս անգամ «ՎՏԲ-Հայաստան բանկ» ՓԲԸ-ից։
Փաստել է, որ «Արցախ բանկ»-ից վերցրած չորս դրվագներով կատարված կեղծիքների, ստորազրությունների համար Հրաչյա Սարգսյանի նկատմամբ կիրառվել է ՀՀ քրեական օրենսգրքի 18-րդ հոդվածի երկրորդ պարբերության պահանջը և նրա նկատմամբ քրեական գործի հարուցումը յուրաքանչյուր դեպքով մերժվել է` հանցակազմի բացակայության պատճառով։ Իսկ 5-րդ անգամ վարկ վերցնելու փաստի պարագայում արդեն գույները խտացվել և նշվել է, որ այդ կեղծիքները կատարվել են խաբեությամբ ուրիշի գույքին տիրանալու, տվյալ դեպքում Ք.Զադիկյանի գումարին տիրանալու համար, զավեշտ է։
Ըստ բողոքաբերի` ինչպես քննիչը, այնպես էլ հարգելի դատավորն անտեսել են, որ Ք.Զադիկյանի լիազորագրում նշվել է, որ Հրաչյան միայն պետք է տնօրիներ գումարները, իսկ նրա 45 տոկոսանոց անշարժ գույքի վաճառքի մասին ոչինչ չկա նշված, իսկ վարկը վերցնելիս գրավադրվել է «ՍՏՇ-Պիրամիդա» ՍՊԸ-ի ամբողջ անշարժ գույքը: Դատարանը չնայած դատավճռի 18-րդ էջի 3-րդ «դատարանի իրավական վերլուծությունները և եզրահանգումները» պարագրաֆի 6-րդ պարբերությունում հիշատակել է՝
- Ընկերության վերոնշյալ անշարժ գույքի արգելանքի տակ արդեն իսկ գտնվելու փաստը «ՎՏԲ-Հայաստան Բանկ» ՓԲԸ աշխատակիցներից թաքցնելու նպատակով իրավունք վերապահող պաշտոնական կեղծ փաստաթուղթ (կեղծելը) պատրաստելը և ՀՀ ԿԱ անշարժ գույքի կադաստրի ստորաբաժանում ներկայացնելը, համարել է Ք.Զադիկյանի գումարին տիրանալու նախապատրաստման գործողություն։ Դատարանն անտեսել է, որ «ՍՏՇ Պիրամիդա» ՍՊԸ-ի անշարժ գույքը «Արցախ բանկ»–ի անվամբ գրավադրված լինելու պարագայում ՀՀ քաղաքացիական օրենսգրքի 236-րդ հոդվածի 3-րդ կետի համաձայն հաջորդող գրավի դեպքում նոր գրավառուի պահանջները բավարարված են գրավի առարկայի արժեքից նախորդ գրավառուի պահանջները բավարարելուց հետո, եթե այլ բան նախատեսված չէ օրենքով։ Տվյալ պարագայում այս նորմի առկայությամբ, ինչպես քննիչը, այնպես էլ դատարանն անտեսել են, որ այստեղ տուժածներ չեն կարող լինել ինչպես Ք.Զադիկյանը, այնպես էլ Մ.Օհանյանը, այստեղ որպես տուժող պետք է հանդես գար «ՎՏԲ-Հայաստան բանկ» ՓԲԸ-ն, իսկ նրանք, համարելով, որ որևէ վնաս չեն կրել իրենց գումարը մնացել է իրենց հաշվարկային հաշվում, Հրաչյա Սարգսյանի հրաժարման փաստով և այդ ուղղությամբ ընդհանրապես չեն մտածել։
Բացի այդ, փաստել է, որ դատարանը կրկնելով նախաքննական մարմնի մեղադրական եզրակացությամբ կատարված ձևակերպումները, ձգտել է գույները ավելի խտացնել օգտագործելով «բազմաքայլ ծրագիր» եզրույթը։ Սակայն միաժամանակ դատավճռի 3-րդ էջի 3-րդ պարբերությունում արձանագրել է` «վերոհիշյալ գործարքը բանկի տեսանկյունով դիտարկվել է որպես շահավետ»։ Եթե բանկը այդ գործարքը դիտել է շահավետ, ապա դատարանը ինչու է ավելի կաթոլիկ հադես գալիս քան Հռոմի պապն է։ Դատավճռի 20-րդ էջի 5-րդ պարբերությունում արված դատարանի հետևությունը պայմանավորված է իր պաշտպանյալ Հրաչյա Սարգսյանի կատարած հանցանքի բնույթով, թեև նրան վերագրվող հանցագործությունը կատարվել է շահադիտական դրդումներով, «ուր են այդ ապացույցները», սակայն դրա իրականացմամբ իր պաշտպանյալ Հրաչյա Սարգսյանը սույն քրեական գործի շրջանակում տուժողներ Ս.Օհանյանից և Ք.Զադիկյանից (նույնիսկ բանկից) նյութական օգուտ չի ստացել, նրանց իրական նյութական վնաս չի պատճառվել։
Բողոքաբերը փաստել է, որ նման հետևության հանգող դատարանը իրավունք չունի անմեղ մարդուն դատապարտել 34-178-րդ հոդվածի 3-րդ մասի 1-ին և 325-րդ հոդվածով, այն էլ 6 տարվա ազատազրկման, զավեշտ է, հետևաբար դատարանի դատավճիռը հիմնավորված և պատճառաբանված չէ։
Բացի այդ, Ք.Զադիկյանն ստանալով վկա Հայկ Սերոբյանի հեռախոսազանգը չի հասկացել, չի ըմբռնել խոսակցության իմաստը, կարծել է, որ Հրաչը և այդ Հայկը հանցավոր համաձայնության են եկել իր գումարների շուրջ և շտապել է հաղորդում տալ։ Սակայն առերես հարցաքննությամբ փարատվել են նրա կասկածները։ Եթե նախաքննական մարմինը և դատարանը վկաներ Հայկ Օհանյանի և Գ.Հարությունյանի Հրաչին օգնելու, նրա առջև եղած խոչընդոտները վերացնելու ուղղությամբ նրանց կատարած գործողություններում հացակազմ չեն տեսել, ապա իր պաշտպանյալի խոստովանության պարագայում, որ ինքն է, ստորագրել և կեղծել իրավունք հաստատող փաստաթղթերը, ինչպես նախորդ չորս դրվագներում և որ դա արել է «ՍՏՇ–Պիրամիդա» ՍՊԸ-ի կենսագործունեությունն ապահովելու, երկու հիմնադիրներին ամսեկան 9-ից 10 հազար ԱՄՆ դոլար շահույթի վճարումներ ապահովելու, 60-70 աշխատողներին աշխատավարձ վճարելու, հարկային պարտավորությունները և կոմունալ ծախսերը փակելու շարժառիթով, ապա ինչ հափշտակության մասին է խոսքը:
Ըստ բողոքաբերի` ինչպես նախորդ դրվագների նախադեպով, այնպես էլ այս, 5-րդ դրվագով նրա նկատմամբ ՀՀ քրեական օրենսգրքի 325-րդ հոդվածի 1-ին կետով նախատեսված հանցանքների մասով պետք է կիրառվեր ՀՀ քրական օրենսգրքի 18-րդ հոդվածի 2-րդ պարբերությունը և նրա կատարածը հասարակությանը, պետությանը, կազմակերպությանը կամ որևէ անձի վնաս չի պատճառել և չէր էլ կարող պատճառել, այլ հակառակը, իր ընտանիքի միակ օթևանը՝ Երևան, Աջափնյակ թաղամասում գտնվող բնակարանը, գրավադրել է «Արցախ բանկ»-ում և ստացած 15 միլիոն ՀՀ դրամ վարկից 5 միլիոնը վճարել է «ՍՏՇ–Պիրամիդա» ՍՊԸ-ի հարկային պարտավորությունների փակմանը, ինչպես նաև օգտագործվել է անշարժ գույքի պահպանման ու վերանորոգման ուղղությամբ և այստեղ վարկ վերցնելու գործընթացում որպես երաշխավոր է ցույց տվել «ՍՏՇ–Պիրամիդա» ՍՊԸ-ին և սա էլ հիմք է հանդիսացել նախաքննական մարմնին նոր մեղադրանք առաջադրել ՀՀ քրեական օրենսգրքի 325-րդ հոդվածի 1-ին մասով, որտեղ է տրամաբանությունը։ Եթե «ՍՏՇ Պիրամիդա» ՍՊԸ-ի տնօրենը իր երեխաների օթևանն է զոհաբերում հանուն իր ղեկավարած ՍՊԸ-ի կենսունակության ապահովմանը, ապա ում պետք է որպես երաշխավոր ձևակերպեր բանկում, եթե ոչ իր ղեկավարած ՍՊԸ-ի անշարժ գույքը։ Այստեղ ժողովուրդն ասում է «նպատակն է արդարացնում միջոցը», ընդորում այդպես երեք անգամ իր սեփական տունը գրավադրել և ստացած վարկով փակել է «ՍՏՇ–Պիրամիդա» ՍՊԸ-ի պարտքերը, իսկ այդ մասին տեղյակ չեն եղել հիմնադիրներ` Ք.Զադիկյանը և Մ.Օհանյանը։
Կրկին փաստել է, որ ամբաստանյալն իր երեխաների միակ օթևանը դրել է վտանգի տակ, որպեսզի ապահովի Ք.Զադիկյանի և Մ.Օհանյանի ամսեկան մոտ 10 հազար ԱՄՆ դոլար շահույթի վճարումը, այն էլ տնավարական եղանակով, առանց հարկային դաշտում ցույց տալու, հետաքրքիր է ինչու է լռել այս մասին դատարանը, չէ որ ինքն իր ճառում միջնորդել էր դատարանին, պետական մարմիններին, այսինքն դատախազությանը միջնորդել` քրեական գործ հարուցելու հարկային դաշտից խուսափած հիմնադիրների նկատմամբ, ինչպես նաև ՀՀ քրեական դատավարության օրենսգրքի 360-րդ հոդվածի կարգով լրացուցիչ որոշում կայացնել և այն ուղարկել ՀՀ ոստիկանության ՔԳՎ ղեկավարությանը, դատական քննության ժամանակ ի հայտ եկած խախտումները, այն է՝ նախաքննական մարմնի կողմից ստվերը չնկատելու, հարկային դաշտից խուսափած անձանց նկատմամբ անտարբերություն ցուցաբերելու փաստերի վրա։
Բողոքաբերի համոզմամբ` դատարանը թույլ է տվել դատական սխալ՝ նյութական և դատավարական նորմերի այնպիսի էական խախտումներ, որոնք ազդել են գործի ելքի վրա և ամբաստանյալ Հրաչյա Սարգսյանն անտեղի ազատազրկվել է 6 տարի ժամանակով, այն դեպքում, երբ ամբաստանյալի գործողություններում բացակայել է ՀՀ քրեական օրենսգրքի 178-րդ հոդվածի՝ խարդախության հանցակազմի սուբյեկտիվ կողմը, վարկի հափշտակման նպատակը` դիտավորութունը։
Վերոգրյալի հիման վրա բողոք բերած անձը խնդրել է բեկանել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 18.04.2014 թվականի թիվ ԵԿԴ/0207/01/13 դատավճիռը և ամբաստանյալ Հրաչյա Սարգսյանին ճանաչել անպարտ և դատարանով արդարացված։

4.Վերաքննիչ դատարանի պատճառաբանությունները և եզրահանգումը.
ՀՀ քրեական դատավարության օրենսգրքի 385-րդ հոդվածի 1-ին մասի համաձայն` վերաքննիչ դատարանը դատական ակտը վերանայում է վերաքննիչ բողոքի հիմքերի և հիմնավորումների սահմաններում:
ՀՀ քրեական դատավարության օրենսգրքի 381-րդ հոդվածի 3-րդ մասի համաձայն` վերաքննիչ բողոքի հիմքերը, հիմնավորումները և պահանջը ներկայացվում են բացառապես վերաքննիչ բողոքում, և դրանք չեն կարող փոփոխվել և լրացվել գործի դատական քննության ընթացքում:
Համաձայն ՀՀ քրեական դատավարության օրենսգրքի 386-րդ հոդվածի պահանջների` վերաքննիչ բողոքի հիման վրա վերաքննիչ դատարանն ստուգում է գործի փաստական հանգամանքների բացահայտման և քրեական օրենքի կիրառման ճշտությունը, ինչպես նաև գործը քննելիս և լուծելիս քրեական դատավարական օրենքի նորմերի պահպանումը:
Վերաքննիչ բողոքի հիմքերի և հիմնավորումների սահմաններում վերլուծելով գործի նյութերը, Վերաքննիչ դատարանը գտնում է, որ պաշտպանի վերաքննիչ բողոքը պետք է մերժել` հետևյալ պատճառաբանությամբ.
Քրեական գործի նյութերի ուսումնասիրությունը ցույց է տալիս, որ ամբաստանյալ Հրաչյա Սարգսյանը ՀՀ քրեական օրենսգրքի 34-178-րդ հոդվածով 3-րդ մասի 1-ին կետով առաջադրված մեղադրանքում իրեն մեղավոր չի ճանաչել, պատճառաբանելով, որ Ք.Զադիկյանը ցանկացել է իր բաժնեմասը վաճառել Մ.Օհանյանին, իսկ վերջինս՝ գնել այն, նրանք տեղյակ էին այդ նպատակով «Պիրամիդա» ընկերության անշարժ գույքի գրավադրմամբ 1.100.000 ԱՄՆ դոլարի չափով վարկ ստանալու մասին, ինքը գործել է վերջիններիս հանձնարարությամբ, ընկերության բնականոն գործունեությունն ապահովելու նպատակով անհրաժեշտ նյութական միջոցներ ստանալու շարժառիթով, այդ թվում՝ վերոնշյալ վարկը ստանալու նպատակով անհրաժեշտ փաստաթղթերը կազմելու, նրանց ստորագրությունները կեղծելու առումով։ Ընդունել է միայն «Արցախբանկ» ՓԲ ընկերության անունից փաստաթուղթ կեղծելու և «Պիրամիդա» ՍՊ ընկերությանը պատկանող Երևանի Սայաթ-Նովա 20/2 հասցեում գտնվող գույքի վրա դրված արգելանքը հանելու նպատակով կադաստր ներկայացնելու դրվագով նրան առաջադրված մեղադրանքը։ Չի ընդունել վարկի գումարը հափշտակելու դիտավորություն ունենալու փաստը՝ պատճառաբանելով, թե իբր, որպես տնօրեն, մշտապես գործ է ունեցել խոշոր գումարների հետ, սակայն երբևէ նման քայլի չի դիմել, ավելին՝ ունեցել է Ք.Զադիկյանի տված լիազորագրի հիման վրա 1.100.000 ԱՄՆ դոլար վարկի գումարը ստանալու իրական հնարավորություն, սակայն դրանից չի օգտվել, այլ լիազորագիրը կամովին վերադարձրել է։
Դատարանն արձանագրել է, որ ամբաստանյալ Հրաչյա Սարգսյանի հիշյալ պատճառաբանություններն անհիմն են և մտացածին, հետապնդում են հնարավոր քրեական պատասխանատվությունից և պատժի խուսափելու նպատակ, հերքվել են պատշաճ իրավական ընթացակարգերի շրջանակներում դատաքննությամբ հետազոտված հետևյալ ապացույցների գնահատման արդյունքներով.
Տուժող Մուշեղ Օհանյանի ցուցմունքներով այն մասին, որ իրենց ընտանիքը հանդիսանում է «Պիրամիդա» ՍՊ ընկերության 55% բաժնեմասի սեփականատերը, իսկ Քրիստիան Զադիկյանը 45% բաժնեմասի սեփականատերը։ Վերջին տարիներին ընկերության տնօրենի պաշտոնը զբաղեցրել է Հրաչյա Սարգսյանը, ով ղեկավարել է ընկերությանը պատկանող Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գործող «Պիրամիդա» համալիրի գործունեությունը։
Մ.Օհանյանը նշել է, որ երբեք չի ցանկացել գնել մյուս բաժնետեր Ք.Զադիկյանի բաժնեմասը, նման հանձնարարություն կամ թույլտվություն տնօրեն Հր.Սարգսյանին չի տվել, այդ թվում՝ այդ նպատակով «Պիրամիդա» ՍՊ ընկերությանը պատկանող անշարժ գույքը «ՎՏԲ-Հայաստան Բանկ» ՓԲ ընկերությունում գրավադնելու և 1.100.000 ԱՄՆ դոլարի վարկ ստանալու եղանակով։ Հերքել է նաև այդ կապակցությամբ որևէ փաստաթուղթ, այդ թվում՝ երաշխավորության պայմանագիր, ժողովի արձանագրության քաղվածք ստորագրելու հանգամանքը։
Ինչ վերաբերվում է 2006-2009թթ. «Արցախբանկ» ՓԲ ընկերության հետ կնքված հաջորդող գրավի /հիփոթեքի/ թվով չորս պայմանագրերին, ապա դրանք Հր.Սարգսյանը կնքել է իր հանձնարարությամբ ու Ք.Զադիկյանի գիտությամբ, ուստի նույն գործարքների շրջանակներում որպես վարկ տրամադրված 50.000, 36.000, 200.000 և 900.000 ԱՄՆ դոլարի չափով գումարները տնօրինել է անձամբ ու իր միջոցներից կատարել վարկի համապատասխան մարումներ։ Հետագայում, ընկերության տնօրենի փոփոխությունից հետո պարզվել է նաև, որ Հրաչյա Սարգսյանը «Պիրամիդա» ՍՊ ընկերության տնօրենի պարտականությունները կատարելու ժամանակ՝ դեռևս 2011թ. հունվարի 31-ին, «Արցախբանկ» ՓԲ ընկերության «Կենտրոնական» մասնաճյուղում կնքել է 15.000.000 ՀՀ դրամ գումարի վարկային պայմանագիր՝ որպես անշարժ գույք գրավադնելով սեփականության իրավունքով նրան պատկանող Երևան քաղաքի Շինարարների 35-րդ շենքի թիվ 37 հասցեում գտնվող 53.9 քմ ընդհանուր մակերեսով բնակարանը։ Հիշյալ պայմանագիրը կնքելու և վարկ ստանալու նպատակով Հր.Սարգսյանը նույն մասնաճյուղ է ներկայացրել «Պիրամիդա» ՍՊ ընկերության մասնակիցների արտահերթ ընդհանուր ժողովի թիվ 02-րդ արձանագրության քաղվածքը, որում կեղծել է իր և Ք.Զադիկյանի ստորագրությունները, ինչը հնարավորություն է տվել նույն բանկում որպես երաշխավոր ներկայացնել «Պիրամիդա» ՍՊ ընկերությանը։ Այդ պարագայում անգամ Հր.Սարգսյանը չի կատարել վարկային պայմանագրով նախատեսված իր պարտականությունները, որի հետևանքով բանկը հայցադիմում է ներկայացրել Երևան քաղաքի Աջափնյակ և Դավիթաշեն վարչական շրջանների ընդհանուր իրավասության դատարան, որը հայցագնի՝ 18.797.222 ՀՀ դրամի չափով արգելանք է դրել ինչպես Հր.Սարգսյանի բնակարանի, այնպես էլ «Պիրամիդա» ՍՊ ընկերությանը պատկանող գույքի կամ դրամական միջոցների վրա։
Նշել է, որ նախորդ խոշոր վարկերը Հր.Սարգսյանը վերցրել է իրենց նախաձեռնությամբ և հանձնարարությամբ, իսկ 1.100.000 ԱՄՆ դոլարի չափով վարկը` առանց դրա։ Մյուս բաժնետեր Ք.Զադիկյանը, թեև այդ վարկերից եղել է տեղյակ, տվել համաձայնությունը, սակայն վարկի գումարը տնօրինել է անձամբ, հետևաբար՝ մարումներին Ք.Զադիկյանը որևէ առնչություն չի ունեցել, քանի որ այդ գումարն ամբողջությամբ ստացել և տնօրինել է իր ընտանիքը։ Տեղյակ չեն եղել նաև Հր.Սարգսյանի 15.000.000 ՀՀ դրամ գումարի չափով վարկ վերցնելու և ընկերության անունից երաշխավորությունը կեղծելու մասին։ Հայտնել է նաև, որ թեև Հր.Սարգսյանի գործողությունների հետևանքով փաստացի վնաս չի կրել, սակայն 1.100.000 ԱՄՆ դոլար գումար վարկ վերցնելու հետևանքով, առանց իր համաձայնության, ընկերության անշարժ գույքը հայտնվել էր արգելանքի տակ։
Տուժող Քրիստիան Զադիկյանի ցուցմունքներով այն մասին, որ իր բաժնեմասը վաճառելու մտադրություն երբևէ չի ունեցել, այդ մասին որևէ անձի, այդ թվում, ընկերության տնօրեն Հր.Սարգսյանին չի հայտնել, առավել ևս նրա միջոցով իր բաժնեմասը վաճառելու նախաձեռնություն չի ցուցաբերել, համաձայնություն չի տվել, որևէ փաստաթուղթ չի ստորագրել։ Նշել է, որ 2006-2007թթ. ընթացքում ընկերության տնօրեն Հր.Սարգսյանն իրեն ու Մուշեղ Օհանյանին, յուրաքանչյուր ամիս վճարել է 4-5.000 ԱՄՆ դոլարի չափով շահույթ, հետագայում` 3.000 ԱՄՆ դոլարի չափով` պատճառաբանելով տնտեսական ճգնաժամի առկայությունը։ Վերջին երկու տարիների ընթացքում շահույթը նվազել է, հետևաբար՝ իր համաձայնությամբ շահույթը տրվել է նախ՝ Մ.Օհանյանին, իսկ իրեն հասանելիք շահույթի բաժնեմասը, որը կազմել է 80.000 ԱՄՆ դոլար գումար, պետք է տար նման հնարավորություն ծագելու առաջին իսկ պահին։ Վստահել է Հր.Սարգսյանին ու համբերատար կերպով սպասել, որ Մ.Օհանյանի գումարները վճարելուց հետո իր գումարները ևս կվճարի։ Ֆրանսիայում գտնվելու ժամանակ Հր.Սարգսյանը զանգահարել և խնդրել է նրա անվամբ լիազորագիր տալ՝ պատճառաբանելով, որ մտադիր է «ՎՏԲ-Հայաստան» բանկում իր անունով հաշվեհամար բացել և այդ հաշվեհամարին փոխանցել կուտակված 80.000 ԱՄՆ դոլար շահույթից 20.000 ԱՄՆ դոլար գումարը։ Նրան առաջարկել է սպասել՝ նշելով, որ մեկ շաբաթից գալու է Հայաստան, սակայն, քանի որ եվրոպական երկրներում օգտագործելու համար իրեն անհրաժեշտ էր մի շարք արտոնություններ վերապահող «Ինֆինիտի» բանկային քարտը, իսկ Հր.Սարգսյանը խոստացել է նաև զբաղվել այդ հարցով՝ ի վերջո վերջինիս առաջարկին համաձայնել է։ Պայմանավորվել են, որ մինչև իր՝ Հայաստան ժամանելն ինքը հաշվեհամարը բացելու լիազորագիր ուղարկի, իսկ մնացած հարցերին լուծում տան արդեն Հայաստան գալուց հետո։ Ուղարկել է Ֆրանսիայում ՀՀ դեսպանատան կնիքով հաստատված լիազորագիր, որում, բացի իր անվամբ հաշվեհամար բացելու լիազորությունից նշված է եղել նաև Հր.Սարգսյանի կողմից նույն հաշվեհամարից կանխիկ գումարներ ստանալու լիազորությունը։ Նշել է, որ այդ լիազորագրի տեքստի հեղինակը եղել է Հր.Սարգսյանը, ով իրեն է ուղարկել լիազորագրի նախագծի հայերեն և ֆրանսերեն տարբերակները։ Ստորագրել է հայերեն տարբերակը, որը վավերացվել է Ֆրանսիայում ՀՀ դեսպանատանը, ապա այն առձեռն ուղարկել է Հր.Սարգսյանին։ Կազմելուց երկու օր անց այն հասել է Հայաստան՝ հասցեատիրոջը։ Նշել է նաև, որ տեղյակ չէր իր հաշվեհամարին 1.100.000 ԱՄՆ դոլար փոխանցելու մասին, այդ պարագայում այդ հաշվեհամարից գումար կանխիկացնելու լիազորագիր Հր.Սարգսյանի չէր տա։ Երբ բանկի կառավարիչ Սուրեն Զոհրաբյանը Երևանից զանգահարել է Ֆրանսիա և տեղեկացրել իր անվամբ Հր.Սարգսյանի բացած հաշվեհամարին գումար փոխանցելու մասին, իրեն թվացել է, թե խոսքը ՀՀ դրամի մասին է, ինչի կապակցությամբ զանգահարել է Հր.Սարգսյանին, տեղեկացրել բանկի կառավարչի հետ կայացած հեռախոսազրույցի մասին, կատակել, թե այդ գումարը դոլարով է և զարմանալիորեն ստացել հաստատական պատասխան։ Հր.Սարգսյանին թվացել է, թե բանկի կառավարչի հետ կայացած զրույցից ինքն հասկացել էր, որ խոսքն ԱՄՆ դոլարի մասին է, մինչդեռ այդ զրույցից ինքը նման տեղեկություն չէր ստացել։ Դրանից անմիջապես հետո զանգահարել է բանկի կառավարչին, հանձնարարել արգելել գործարքի կատարման և գումարի կանխիկացման ուղղությամբ ցանկացած գործարք մինչև իր՝ Հայաստան վերադառնալը և տվյալ հարցում պարզություն մտցնելը, ինչն իր պահանջով կատարվել է, և Հր.Սարգսյանը այդ հաշվեհամարից վրա փոխանցված գումարից որևէ գումար չի ստացել։ Գալով Հայաստան և այցելելով բանկ՝ ծանոթացել է վարկային գործի փաստաթղթերին, բանկի կառավարչին հայտնել, որ վերոնշյալ գործարքից տեղյակ չէ՝ պահանջելով 1.100.000 ԱՄՆ դոլարը վերադարձնել փոխանցողին՝ բանկին։ Այդ զրույցին ներկա գտնվող Հր.Սարգսյանը պնդել է հակառակը, Ֆրանսիայից իր ուղարկած լիազորագիրը թողել է բանկում ու հեռացել։ Հաջորդ օրը Հր.Սարգսյանը զանգահարել ու փորձել է հիմնավորել այդ գործարքի անհրաժեշտության մասին՝ պատճառաբանելով, որ այդ գումարն ընկերության համար անհրաժեշտ է, սակայն իր բացասական պատասխանը լսելուց հետո բջջային հեռախոսներն անջատել ու դիմել է փախուստի՝ փորձելով մեկնել Վրաստան։ Դրանից հետո միայն հանցագործության մասին հաղորդմամբ դիմել է իրավապահներին։ Ընդունել է, որ «Արցախ բանկ» ՓԲ ընկերությունից 900.000 ԱՄՆ դոլար գումարը Հրաչյա Սարգսյանն ստացել է իր և Մ.Օհանյանի գիտությամբ, այդ վարկը նա վերցրել է իրենց պատկանող կազմակերպության անունից, կազմակերպության անշարժ գույքի գրավադրմամբ, սակայն Մ.Օհանյանի համար, ով ամբողջությամբ ստացել և միայնակ տնօրինել է վարկի գումարները, կատարել մարումները։ Նշել է նաև, որ 1.100.000 ԱՄՆ դոլար վարկը ձևակերպելու պահին մարվել էր նախորդ 900.000 ԱՄՆ դոլար վարկի գումարի միայն կեսը և ընկերության՝ որպես գրավ առաջարկված անշարժ գույքը «Արցախբանկի» կողմից պետք է գտնվեր արգելանքի տակ։
Վկա Ռաֆայել Օհանջանյանի ցուցմունքներով այն մասին, որ 2012թ. օգոստոսին Երևանի Վարդանանց և Նալբանդյանի փողոցների խաչմերուկում պատահաբար հանդիպել է իր ընկեր Հայկ Սերոբյանին։ Զրույցի ընթացքում Հ.Սերոբյանը տեղեկանալով, որ ինքը զբաղեցնում է «ՎՏԲ-Հայաստան Բանկ» ՓԲ ընկերության փոքր բիզնեսի վարչության կառավարող տնօրենի պաշտոնը՝ հայտնել է, որ Սեյրան Օհանյանի հանձնարարությամբ «Պիրամիդա» ՍՊ ընկերության տնօրեն Հրաչյա Սարգսյանը պատրաստվում է գրավադնել «Պիրամիդա» համալիրը, ապա հետաքրքրվել է, թե կարող է արդյոք հիշյալ գործընթացն ապահովել մատչելի տոկոսադրույքով։ Իր հերթին մի քանի մասնագիտական հարցեր է ուղղել Հ.Սերոբյանին, սակայն վերջինս չկարողանալով պատասխանել դրանց, պարտավորվել է հանդիպել արդեն Հր.Սարգսյանի մասնակցությամբ։ Պայմանավորվածության համաձայն` օրեր անց Երևան քաղաքի Նալբանդյան փողոցում տեղակայված «ՎՏԲ-Հայաստան Բանկ» ՓԲ ընկերության գրասենյակի մոտակայքում հանդիպել է Հ.Սերոբյանին ու Հր.Սարգսյանին, որտեղ վերջինիս հետ քննարկել է անշարժ գույքը գրավադնելու հարցը։ Զրույցի ընթացքում փորձել է պարզել վարկ ստանալու նպատակը՝ միաժամանակ պարզաբանելով, որ ՀՀ Կենտրոնական բանկը վերահսկողություն է սահմանում յուրաքանչյուր գործարքի նկատմամբ։ Հր.Սարգսյանը հայտնել է, որ վարկ ստանալու նպատակը պայմանավորված է ընկերության բաժնետերերից մեկի կողմից իր բաժնեմասը մյուսին վաճառելու անհրաժեշտությամբ։ Միաժամանակ տեղեկացնելով, որ բանկի անվտանգության ծառայությունն իր հերթին համապատասխան ստուգումներից հետո պետք է ներկայացնի եզրակացություն՝ այնուամենայնիվ, նշել է, որ նման գործարք կարող է իրականացվել։
Լսելով անվտանգության ծառայության կողմից կատարվելիք ստուգումների մասին` Հր.Սարգսյանը հետաքրքրվել է, թե ինչ բնույթի ստուգումների մասին է խոսք գնում և արդյոք, այն պարտադիր է, ապա իրենից տեղեկանալով, որ նմանատիպ ստուգումները կրում են պարտադիր բնույթ՝ Հր.Սարգսյանը տեղեկացրել է, որ այդ կապակցությամբ որևէ առարկություն չունի, ամեն ինչ կատարվում է սեփականատերերի գիտությամբ ու համաձայնությամբ։ Օրեր անց զանգահարել է Հ.Սերոբյանին, ապա խնդրել, որ վերջինս Հր.Սարգսյանին տեղեկացնի բանկ ներկայանալու և վարկ ստանալու դիմում ներկայացնելու մասին։ 2012թ. սեպտեմբերի 3-ին Երևան քաղաքի Նալբանդյան փողոցում գտնվող «ՎՏԲ-Հայաստան Բանկ» ՓԲ ընկերության մոտակայքում գործող սրճարանում հանդիպել է Հ.Սերոբյանին և Հր.Սարգսյանին, որտեղ վերջինս, որպես «Պիրամիդա» ՍՊ ընկերության տնօրեն, ստորագրել է վարկ ստանալու դիմումը, ինչպես նաև տեղեկացել բանկ ներկայացվելիք անհրաժեշտ փաստաթղթերի ցանկին։ Արդյունքում սկսվել է «Պիրամիդա» ՍՊ ընկերության ֆինանսական վիճակի գնահատման ու վերլուծության փուլը՝ պարզելու ընկերության շահույթը, եկամուտը, ծախսերը, դրամական մուտքերն ու ելքերը, սեփական կապիտալը, ապա և գույքը գրավադրելու ու վարկը հաստատելու գործընթացը, ինչի շրջանակներում կնքվել են անհրաժեշտ պայմանագրեր, այդ թվում՝ երաշխավորության պայմանագրեր, որի պայմաններում գրավադրվել է «Պիրամիդա» ՍՊ ընկերությանը պատկանող, Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող անշարժ գույքը՝ «Պիրամիդա» համալիրը, և որպես վարկի գումար հաստատվել է 1.100.000 ԱՄՆ դոլար։ Վարկի 1.100.000 ԱՄՆ դոլարը փոխանցվել է «ՎՏԲ-Հայաստան Բանկ» ՓԲ ընկերության «Մյասնիկյան» մասնաճյուղում բացված «Պիրամիդա» ՍՊ ընկերության հաշվեհամարին՝ անկանխիկ ձևով, որի պայմաններում ՍՊ ընկերությունը՝ ի դեմս Հրաչյա Սարգսյանի, չէր կարող «Մյասնիկյան» մասնաճյուղի իր հաշվեհամարից որևէ գումարի կանխիկացում կատարել, ավելին՝ հիշյալ գումարը ոչ միայն անկանխիկ ձևով է փոխանցվել «Մյասնիկյան» մասնաճյուղում բացված ընկերության հաշվեհամարին, այլև բանկի պահանջով գումարը պետք է փոխանցվեր Ք.Զադիկյանի անվամբ բացված այլ հաշվեհամարին, քանի որ վերջինս, ըստ բանկ ներկայացված փաստաթղթերի, հանդիսանում էր բաժնեմասը վաճառող կողմը։ Հր.Սարգսյանին տեղեկացրել էին վերոգրյալ մասին, նա գիտեր, որ չի կարող գումար կանխիկացնել «Մյասնիկյան» մասնաճյուղում բացված ՍՊ ընկերության հաշվեհամարից, և որ գումարը վերջնական հաշվով փոխանցվելու է Ք.Զադիկյանի անվամբ բացված անձնական հաշվեհամարին, վերջինս կամ նրա լիազորած անձն էր իրավունք ստանալու տնօրինել վարկի գումարը։ Մինչև 1.100.000 ԱՄՆ դոլար գումարը «Փրայմ» մասնաճյուղում Ք.Զադիկյանի անվամբ բացված հաշվեհամարին փոխանցելը՝ 2012թ. նոյեմբերին, Հր.Սարգսյանը «ՎՏԲ-Հայաստան Բանկ» է ներկայացրել Ք.Զադիկյանի կողմից տրված լիազորագիր, համաձայն որի՝ նա իրավասու էր տնօրինել «ՎՏԲ-Հայաստան Բանկ» ՓԲ ընկերության «Փրայմ» մասնաճյուղում Ք.Զադիկյանի անվամբ բացված հաշվեհամարին փոխանցվելիք 1.100.000 ԱՄՆ դոլար գումարը, այդ թվում՝ կանխիկացնել այդ ողջ գումարը։ Վկան հայտնել է նաև, որ շարադրված գործարքի ընթացքում անհրաժեշտություն է առաջացել կնքել երաշխավորության պայմանագիր «ՎՏԲ-Հայաստան Բանկ» ՓԲ ընկերության և Մուշեղ Օհանյանի միջև, ուստի Հր.Սարգսյանի հետ պայմանավորվածություն է ձեռք բերվել, որ Մ.Օհանյանը անձամբ չայցելի բանկ և վերջինիս անվամբ կազմված երաշխավորության պայմանագիրը ներկայացվի նրա ծանոթացմանն ու ստորագրմանը նրա իսկ գտնվելու վայրում։ 2012թ. հոկտեմբերի վերջերից մինչև նոյեմբերի սկիզբն ընկած ժամանակահատվածում Գ.Նազարյանին ու իրեն է հանդիպել Հ.Սերոբյանը, ով իրենց ուղեկցել է «Պիրամիդա» համալիր։ Տեղում իրենց դիմավորել է Հր.Սարգսյանը, ապա մատնացույց անելով սրահում սեղանի շուրջ նստած մի տարեց տղամարդու՝ հայտնել է, որ նա է Մ.Օհանյանը։ Նախկինում առիթ չունենալով անձամբ հանդիպել Մ.Օհանյանին՝ վստահել են Հր.Սարգսյանին, Գ.Նազարյանը երաշխավորության պայմանագիրը ներկայացրել է նրա ծանոթացմանն ու ստորագրությանը։ Հետագայում համացանց մուտք գործելով՝ ուսումնասիրել է Ս.Օհանյանի ընտանիքի անդամների, մասնավորապես՝ Մ.Օհանյանի լուսանկարը, պարզել, որ Հր.Սարգսյանի կողմից «Պիրամիդա» համալիրում իրենց որպես Մուշեղ Օհանյան ներկայացրած տարեց տղամարդն իրականում նա չէր։ Վկա Ռաֆայել Օհանջանյանը հստակեցրել է, որ Հրաչյա Սարգսյանն առանց լիազորագրի չէր կարող կանխիկացնել 1.100.000 ԱՄՆ դոլարը, որի մասին Հրաչյա Սարգսյանին բազմիցս հայտնել է։
Վկա Հայկ Սերոբյանի ցուցմունքներով այն մասին որ 2007-2009թթ. ընթացքում աշխատել է «Պիրամիդա» ՍՊ ընկերությանը պատկանող «Պիրամիդա» համալիրում՝ որպես տեխնիկայի պատասխանատու, հնչյունային ռեժիսոր, ապա՝ փոխտնօրեն։ 2006 թվականից նույն ընկերությունում աշխատանքի է անցել Հրաչյա Սարգսյանը` զբաղեցնելով ընկերության տնօրենի պաշտոնը։ 2012թ. օգոստոսի սկզբին Հր.Սարգսյանը հանդիպել և զրույցի ընթացքում տեղեկացրել է, որ Օհանյանների և Ք.Զադիկյանի հանձնարարությամբ «Պիրամիդա» համալիրը պետք է գրավադնի բանկում և ստանա 1.500.000-ից 1.800.000 ԱՄՆ դոլարի վարկ՝ հետաքրքրվելով, թե բացի «Արցախբանկից» որևէ այլ բանկում ծանոթ ունի, ով կարող է վարկ տրամադրել մատչելի տոկոսով և հնարավորինս արագ։ Խոստացել է հետաքրքրվել և տեղեկացնել։ Օրեր անց Երևանի Վարդանանց և Նալբանդյան փողոցների խաչմերուկում պատահաբար հանդիպել է իր բանակային ընկեր Ռաֆայել Օհանջանյանին, ապա զրույցի ընթացքում նրանից տեղեկանալով, որ վերջինս հանդիսանում է «ՎՏԲ-Հայաստան Բանկ» ՓԲ ընկերության փոքր բիզնեսի վարչության կառավարող տնօրենը՝ հայտնել է, որ Ս.Օհանյանի հանձնարարությամբ «Պիրամիդա» ՍՊ ընկերության տնօրեն Հր.Սարգսյանը պատրաստվում է գրավադրել «Պիրամիդա» համալիրը, ապա հետաքրքրվել է, թե Ռ.Օհանջանյանը կարող է արդյոք հիշյալ գործընթացն ապահովել ցածր տոկոսադրույքով։ Իր հերթին Ռ.Օհանջանյանը մի քանի մասնագիտական հարցեր է ուղղել, սակայն չկարողանալով դրանց պատասխանել՝ պայմանավորվածություն է ձեռք բերել հանդիպել նրան արդեն Հր.Սարգսյանի հետ։ Օրեր անց Երևան քաղաքի Նալբանդյան փողոցում տեղակայված «ՎՏԲ-Հայաստան բանկ» ՓԲ ընկերության գրասենյակի մոտակայքում Հր.Սարգսյանի հետ հանդիպել է Ռ.Օհանջանյանին, որտեղ վերջինս և Հր.Սարգսյանը քննարկել են անշարժ գույքը գրավադնելու հարցերը։ Զրույցի ընթացքում Ռ.Օհանջանյանը փորձել է պարզել վարկ ստանալու նպատակը՝ միաժամանակ պարզաբանելով, որ ՀՀ Կենտրոնական բանկը վերահսկողություն է սահմանում յուրաքանչյուր գործարքի նկատմամբ։ Հր.Սարգսյանը հայտնել է, որ վարկ ստանալու նպատակը պայմանավորված է ընկերության բաժնետերերից մեկի կողմից իր բաժնեմասը մյուսին վաճառելու անհրաժեշտությամբ։ Միաժամանակ, Ռ.Օհանջանյանը տեղեկացնելով, որ բանկի անվտանգության ծառայությունն իր հերթին համապատասխան ստուգումներից հետո պետք է ներկայացնի եզրակացություն, այնուամենայնիվ նշել է, որ նման գործարք կարող է իրականացվել։ Լսելով անվտանգության ծառայության կողմից կատարվելիք ստուգումների մասին` Հր.Սարգսյանը հետաքրքրվել է, թե ինչ բնույթի ստուգումների մասին է խոսքը գնում և արդյոք դա պարտադիր է, ապա Ռ.Օհանջանյանից տեղեկանալով, որ նմանատիպ ստուգումները կրում են պարտադիր բնույթ՝ Հր.Սարգսյանը տեղեկացրել է ներկաներին, որ այդ կապակցությամբ որևէ առարկություն չունի, ամեն ինչ կատարվում է սեփականատերերի գիտությամբ ու համաձայնությամբ։ Որոշ ժամանակ անց Ռ.Օհանջանյանը զանգահարել է իրեն, խնդրել Հր.Սարգսյանին տեղեկացնել բանկ ժամանելու և վարկ ստանալու վերաբերյալ դիմում ներկայացնելու անհրաժեշտության մասին։ 2013թ. սեպտեմբերի 3-ին Հր.Սարգսյանի հետ Երևան քաղաքի Նալբանդյան փողոցում տեղակայված «ՎՏԲ-Հայաստան Բանկ» ՓԲ ընկերության մոտակայքում գործող սրճարանում հանդիպել են Ռ.Օհանջանյանին, որտեղ վերջինս, որպես «Պիրամիդա» ՍՊ ընկերության տնօրեն, ստորագրել է վարկ ստանալու դիմումը։ Այնուհետև՝ օրեր անց, Ռ.Օհանջանյանը կրկին զանգահարել է իրեն, խնդրել Հր.Սարգսյանին տեղեկացնել բանկ այցելելու անհրաժեշտության մասին՝ ընթացիկ հարցերով և պահանջվող փաստաթղթերը ներկայացնելու համար։ Խոստացել է կապվել Հր.Սարգսյանի հետ և միևնույն ժամանակ խնդրել տվյալ գործարքի հետ կապված հարցերով այլևս իրեն չանհանգստացնել։
2012թ. հոկտեմբերի վերջերին Հր.Սարգսյանը Ռ.Օհանջանյանի և «ՎՏԲ-Հայաստան Բանկ» ՓԲ ընկերության փոքր բիզնեսի վարչության պետ Մեսրոպ Առաքելյանի հետ ունեցած հանդիպումների ընթացքում նրանցից տեղեկացել է, որ նկարագրված գործարքի իրականացման համար անհրաժեշտ են երաշխավորության պայմանագրեր կնքել Ս.Օհանյանի ու Մ.Օհանյանի հետ։ Իրենց հերթին Ռ.Օհանջանյանն ու Մ.Առաքելյանը, հասկանալով, որ ՀՀ պաշտպանության նախարար Սեյրան Օհանյանն աշխատանքային զբաղվածության պատճառով չի կարող անձամբ այցելել բանկ և ստորագրել նրա անվամբ կազմված երաշխավորության պայմանագիրը, համաձայնել են երաշխավորության պայմանագիրը հանձնել Հր.Սարգսյանին, որ վերջինս այն ուղարկի Ս.Օհանյանին՝ աշխատավայրում ծանոթանալու և տեղում՝ սակայն բանկի աշխատակիցների ներկայությամբ ստորագրելու համար։ Իր հերթին Հր.Սարգսյանը համաձայնել է և խոստացել ամեն ինչ կազմակերպել՝ հայտնելով, որ կկապվի ոմն Արթուրի հետ, ով պայմանագիրը կհանձնի նախարարին։ Ինչ վերաբերում է Մ.Օհանյանի անվամբ կազմված երաշխավորության պայմանագիրը ստորագրելուն, ապա նույն հանդիպումների ժամանակ Հր.Սարգսյանը Ռ.Օհանջանյանի ու Մ.Առաքելյանի հետ պայմանավորվածություն է ձեռք բերել այն մասին, որ Մ.Օհանյանին կհրավիրի «Պիրամիդա» համալիր, որտեղ վերջինիս կհանդիպեն բանկի համապատասխան աշխատակիցները և պայմանագրի օրինակները տեղում կներկայացնեն նրա ստորագրմանը։ Բանկից ստանալով 2012թ. հոկտեմբերի 30-ով թվագրված, Ս.Օհանյանի և Մ.Օհանյանի անվամբ կազմված պայմանագրերի օրինակները՝ Հր.Սարգսյանը հանդիպել է իրեն, ապա տեղեկացրել, որ Ս.Օհանյանի անվամբ կազմված երաշխավորության պայմանագիրն ոմն Արթուրը ներկայացրել է Ս.Օհանյանին, ով ստորագրել է այն, որից հետո Արթուրը պայմանագիրը ներկայացրել է բանկ։ Սակայն Մ.Առաքելյանը չի ընդունել այն՝ պատճառաբանելով, որ բանկի աշխատակիցն անձամբ պետք է նախարարությունից ստանա ստորագրված պայմանագիրը, ուստի նշել է, որ անհարմար է զգում ստորագրված պայմանագիրը հետ ուղարկել նախարարություն, որից հետո խնդրել է նույն պայմանագիրը հանձնել պաշտպանության նախարարության աշխատակից Գ.Հարությունյանին, որպեսզի վերջինս հաջորդ օրն առավոտյան պայմանագիրը դուրս բերի նախարարությունից և հանձնի բանկի համապատասխան աշխատակիցներին։ Կարծելով, որ իրոք Ս.Օհանյանը ստորագրել է պայմանագիրը, որ վերջինս տեղեկացված է նկարագրված գործարքից ու որ այդ ամենը զուտ պայմանագիրը փոխանցելու խնդրի լուծման միջոց է՝ համաձայնել է կատարել Հր.Սարգսյանի խնդրանքը։ Նույն օրը Երևանի Բաղրամյան փողոցում գործող «Ամերիկյան համալսարանի» մոտ հանդիպել է ընկերոջը՝ Գ.Հարությունյանին, նրան է հանձնել պայմանագրի օրինակը՝ թղթապանակով, ապա խնդրել թղթապանակն առավոտյան դուրս հանել պաշտպանության նախարարությունից և հանձնել բանկի աշխատակիցներին՝ վերջիններիս հայտնելով, որ նրանց չի կարող ներս տանել և որ հանձնարարվել է թղթապանակը հանձնել իրենց դրսում։ Ոչինչ չկասկածելով, որևէ այլ բան չմանրամասնելով, չստուգելով անգամ թղթապանակի պարունակությունը, միաժամանակ մտածելով, որ արտառոց ոչինչ չկա՝ Գ.Հարությունյանը համաձայնել է կատարել իր խնդրանքը։ Ձեռք բերված պայմանավորվածության համաձայն` 2012թ. նոյեմբերի 6-ին, առավոտյան Հր.Սարգսյանի խնդրանքով Մ.Առաքելյանի ու «ՎՏԲ-Հայաստան Բանկ» ՓԲ ընկերության վարկային գործարքների ձևակերպման վարչության աշխատակից, մինչ այդ իրեն անծանոթ Աշոտ Ֆերոյանի հետ ժամանել են պաշտպանության նախարարության վարչական շենքի մոտ, որտեղից զանգահարել է Գ.Հարությունյանին, տեղեկացրել իրենց ժամանման մասին։ Հր.Սարգսյանն անձամբ բանկի աշխատակիցներին այդ վայր չի ուղեկցել՝ պատճառաբանելով, որ վատառողջ է։ Որոշ ժամանակ անց Գ.Հարությունյանը նախարարության վարչական շենքից դուրս է եկել, մոտեցել իրենց ու բանկի աշխատակիցներին փոխանցել նախորդ օրն իրեն տրամադրված թղթապանակը՝ հայտարարելով, որ բանկի աշխատակիցները չեն կարող մուտք գործել նախարարության վարչական շենք և որ իրեն հանձնարարվել է թղթապանակը դուրս բերել նախարարությունից ու հանձնել նրանց։ 2012թ. նոյեմբերի 6-ին՝ երեկոյան, Հր.Սարգսյանը զանգահարել և հայտնել է, որ հաջորդ օրը՝ 2012թ. նոյեմբերի 7-ի առավոտյան, Մուշեղ Օհանյանը ժամանելու է «Պիրամիդա» համալիր՝ նրա անվամբ կազմված երաշխավորության պայմանագրին ծանոթանալու ու ստորագրելու նպատակով, ուստի խնդրել է, որպեսզի վերջինս Ռ.Օհանջանյանին տեղեկացնի Մ.Օհանյանի ժամանման մասին։ Հաջորդ օրը՝ 2012թ. նոյեմբերի 7-ին, Հր.Սարգսյանի խնդրանքով հանդիպել է Ռ.Օհանջանյանին ու «ՎՏԲ-Հայաստան Բանկ» ՓԲ ընկերության վարկային գործարքների ձևակերպման վարչության աշխատակից Գարիկ Նազարյանին, ապա վերջիններիս ուղեկցել է «Պիրամիդա» համալիրի սրճարան։ Տեղում նկատել է Հր.Սարգսյանին սրճարանում նստած մի տարեց տղամարդու հետ, նախկինում առիթ չունենալով հանդիպել Մուշեղ Օհանյանին՝ թյուրիմացաբար կարծել է, որ տարեց տղամարդը նույն ինքը Մ.Օհանյանն է։ Ռ.Օհանջանյանին ու Գ.Նազարյանին դիմավորել է Հր.Սարգսյանը, ապա վերջիններիս մատնացույց անելով քիչ հեռվում նստած նույն տղամարդուն` հայտնել, որ վերջինս հանդիսանում է Մ.Օհանյանը։ Գ.Նազարյանը մոտեցել է տարեց տղամարդուն, ապա երաշխավորության պայմանագիրը ներկայացրել է նրա ծանոթացմանն ու ստորագրմանը։
Վկա, «ՎՏԲ-Հայաստան Բանկ» ՓԲ ընկերության վարկային գործարքների ձևակերպման բաժնի ավագ մասնագետ Գարիկ Նազարյանի ցուցմունքներով այն մասին, որ «Պիրամիդա» ՍՊ ընկերության՝ ի դեմս տնօրեն Հրաչյա Սարգսյանի, և «ՎՏԲ-Հայաստան Բանկ» ՓԲ ընկերության միջև կնքվել են գլխավոր վարկային և անշարժ գույքի հիփոթեքի պայմանագրեր, որոնք ստորագրվել են նույն ընկերության տնօրեն Հր.Սարգսյանի կողմից։ Կնքվել են նաև գլխավոր վարկային պայմանագրի ենթավարկային պայմանագիր ու երաշխավորության պայմանագրեր։ Գործարքի շրջանակներում «Պիրամիդա» ՍՊ ընկերությունը՝ ի դեմս տնօրեն Հր.Սարգսյանի, գրավադրել է ընկերությանը պատկանող Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող անշարժ գույքը, ինչի դիմաց հաստատվել և տրամադրել է վարկ 1.100.000 ԱՄՆ դոլար գումարի չափով։ Հիշյալ գործարքի շրջանակում անհրաժեշտություն է առաջացել կնքել երաշխավորության պայմանագրեր «ՎՏԲ-Հայաստան Բանկ» ՓԲ ընկերության և Մ.Օհանյանի ու վերջինիս որդու՝ Ս.Օհանյանի միջև, ուստի Հր.Սարգսյանի հետ պայմանավորվածություն է ձեռք բերվել, որ վատառողջության կապակցությամբ Մ.Օհանյանն անձամբ չայցելի բանկ և որ վերջինիս անվամբ կազմված երաշխավորության պայմանագիրը ներկայացվի ծանոթացման ու ստորագրության նրա իսկ գտնվելու վայրում։ 2012թ. հոկտեմբերի վերջին, նոյեմբերի սկզբին Ռ.Օհանջանյանին ու իրեն է հանդիպել մինչ այդ անծանոթ Հ.Սերոբյանը, ով իրենց ուղեկցել է «Պիրամիդա» համալիր։ Տեղում իրենց դիմավորել է Հր.Սարգսյանը, ապա մատնացույց անելով սրահում սեղանի շուրջ նստած մի տարեց տղամարդու՝ հայտնել է, որ նույն տղամարդը Մ.Օհանյանն է։ Նախկինում առիթ չունենալով անձամբ հանդիպել Մ.Օհանյանին՝ Հ.Սարգսյանի կողմից ներկայացված տարեց տղամարդուն ընդունել է որպես Մ.Օհանյան, ապա երաշխավորության պայմանագիրը ներկայացրել է նրա ծանոթացմանն ու ստորագրությանը։ Միայն հետագայում է պարզվել, որ ստորագրողն իրականում Մուշեղ Օհանյանը չէր։ Նշել է նաև, որ այդ պայմանագրի նոտարական վավերացմանը ներկա են գտնվել ինքը, տնօրեն Հր.Սարգսյանը, սակայն նոտարական վավերացումը կատարվել է հաջորդ օրը՝ նոտարի կողմից միասնական տեղեկանքում թերություն հայտնաբերելու պատճառով։ Վերոնշյալ պայմանագիրը մշտապես գտնվել է իր մոտ։
Վկա Սուրեն Զոհրաբյանի ցուցմունքներով այն մասին, որ աշխատում է «ՎՏԲ-Հայաստան Բանկ» ՓԲ ընկերության Երևան քաղաքի Բաղրամյան 2/86 հասցեում գործող «Փրայմ» մասնաճյուղում՝ որպես կառավարիչ։ 2012թ. հոկտեմբերի 16-ին Մասնաճյուղում Ք.Զադիկյանի անվամբ բացվել է հաշվեհամար՝ 1.100.000 ԱՄՆ դոլար գումարի չափով փոխանցում կատարելու համար։ Մինչև հիշյալ գումարի փոխանցումը Մ.Առաքելյանից տեղեկացել է, որ Ք.Զադիկյանը լիազորագիր է տվել «Պիրամիդա» ՍՊ ընկերության տնօրեն Հր.Սարգսյանին, համաձայն որի՝ վերջինս կարող էր տնօրինել փոխանցվող ողջ գումարը։ Իր իսկ խնդրանքով Ք.Զադիկյանը իր կողմից տրված լիազորագրի բնօրինակի սքանավորված էլեկտրոնային տարբերակը ուղարկել է իրեն ու հայտնել իր հեռախոսահամարը։ Ստանալով պահանջվող փաստաթղթի՝ լիազորագրի էլեկտրոնային տարբերակը՝ զանգահարել է Ք.Զադիկյանին և անձամբ նրանից հավաստիացրել, որ վերջինս անձամբ է լիազորել Հր.Սարգսյանին։ 2012թ. նոյեմբերի 8-ին «Պիրամիդա» ՍՊ ընկերության հաշվից Մասնաճյուղում Ք.Զադիկյանի անվամբ բացված հաշվեհամարին փոխանցվել է 1.100.000 ԱՄՆ դոլար գումար։ Մինչ հիշյալ գումարի փոխանցումը Հր.Սարգսյանը մշտապես կապ է պահպանել իր հետ, տեղեկացրել, որ Ք.Զադիկյանը վստահում է իրեն և որ անձամբ պետք է տնօրինի փոխանցվող գումարը, ուստի փոխանցումից անմիջապես հետո տեղեկացրել է, որ 1.100.000 ԱՄՆ դոլար գումարի մի մասը՝ 400.000 ԱՄՆ դոլար գումարը, պետք է ստանա կանխիկ, 2012թ. նոյեմբերի 10-ին, իսկ 700.000 ԱՄՆ դոլար գումարը պետք է փոխանցվի իր անձնական հաշիվներին, ինչը կհստակեցնի տեղում։ Զրույցի ընթացքում Հր.Սարգսյանին հայտնել է փոխանցված գումարի մասին Ք.Զադիկյանին տեղյակ պահելու իր մտադրության մասին, ինչը լսելով՝ Հր.Սարգսյանը հորդորել է այդ քայլի չդիմել՝ փորձելով պարզաբանել, որ ամեն ինչ նորմալ է, և որ Ք.Զադիկյանը նման գործարքներից ոչինչ չի հասկանում։ Նույն օրը՝ 2012թ. նոյեմբերի 9-ին, հեռախոսով կապվել է Ք.Զադիկյանի հետ, տեղեկացրել, որ մասնաճյուղում իր անվամբ բացված հաշվեհամարին փոխանցվել է 1.100.000 գումար։ Քիչ անց իրեն է զանգահարել Ք.Զադիկյանը և նյարդայնացած, խուճապահար հայտնել, որ տեղյակ չէ այդ գործարքից, հանձնարարել է դադարեցնել բոլոր գործարքները և Հր.Սարգսյանին որևէ գումար չտրամադրել, ինչպես և վարվել է՝ օգտվելով բանկի ներքին կանոնակարգով նախատեսված իր լիազորություններից։ Նշեց նաև, որ մինչև Ք.Զադիկյանը 1.100.000 ԱՄՆ դոլարի վերաբերյալ գործարք կատարելու բանավոր կամ գրավոր թույլտվություն չտար, ինքը Հր.Սարգսյանին գումար չէր տա։ Հետագայում Ք.Զադիկյանն ու Հր.Սարգսյանը այցելել են Մասնաճյուղ, որտեղ վերջինս հայտարարել է, որ Ք.Զադիկյանը տեղյակ չէր հիշյալ վարկից, գրավադրման գործընթացից և որ իրականում վերջինս որևէ բաժնեմաս չի վաճառել, ավելին, բաժնեմասի վաճառքը կրել է ձևական բնույթ, բիզնեսի համար է եղել։ Զադիկյանը եղել է վրդովված, պնդել է, որ 1.100.000 ԱՄՆ դոլարի վարկ ստանալու լիազորություն Հր.Սարգսյանին չի տվել, տեղում չեղյալ է հայտարարել տված լիազորագիրը, նախատել է Հր.Սարգսյանին այն բանի համար, որ վերջինս նրան չի զգուշացրել վարկ ձևակերպելու և ստանալու մասին։
Վկա, «ՎՏԲ-Հայաստան Բանկ» ՓԲ ընկերության վարկային գործարքների ձևակերպման վարչության մանրածախ բիզնեսի վարկային գործարքների ձևակերպման բաժնի մասնագետ Աշոտ Ֆերոյանի ցուցմունքներով այն մասին, որ 2012թ. հոկտեմբերի վերջերին կամ նոյեմբերի սկզբներին վարկային գործարքների ձևակերպման վարչության պետ Նունե Յոլչյանը տեղեկացրել է, որ «Պիրամիդա» ՍՊ ընկերությանը պատկանող անշարժ գույքը բանկում գրավադրելու գործընթացի շրջանակներում անհրաժեշտություն էր առաջացել կնքել երաշխավորության պայմանագիր «ՎՏԲ-Հայաստան Բանկ» ՓԲ ընկերության ու Սեյրան Օհանյանի միջև, ուստի և հանձնարարել է վերջինիս անվամբ կազմված երաշխավորության պայմանագիրն անձամբ ներկայացնել նրա ստորագրմանը։ Միաժամանակ Ն.Յոլչյանը հանձնարարել է հանդիպել Բանկի աշխատակից Մեսրոպ Առաքելյանին, միասին գնալ Պաշտպանության նախարարություն ու հանդիպել նախարար Սեյրան Օհանյանին՝ տեղեկացնելով, որ պայմանագրի օրինակներն էլեկտրոնային տարբերակով նախապես տրամադրվել են Հր.Սարգսյանին՝ վերջինիս միջոցով Ս.Օհանյանի ծանոթացմանը ներկայացնելու նպատակով։ Պայմանավորվածության համաձայն` իր հետ վերցնելով երաշխավորության պայմանագրի օրինակները՝ նույն օրը Մ.Առաքելյանի աշխատասենյակում հանդիպել է վերջինիս ու մինչ այդ իրեն անծանոթ Հայկ Սերոբյանին, ով իրենց ուղեկցել է Պաշտպանության նախարարություն։ Տեղում ինչ-որ հեռախոսազանգ կատարելուց հետո Հ.Սերոբյանն իրենց տեղեկացրել է, որ նախարարության վարչական շենք մուտք գործել չեն կարող։ Որոշ ժամանակ անց նախարարությունից դուրս է եկել զինվորական համազգեստով մի անձնավորություն, մոտեցել և իրենց է փոխանցել թղթապանակ՝ հայտնելով, որ չեն կարող մուտք գործել նախարարություն և որ իրեն հանձնարարվել է այդ թղթապանակը հանձնել դրսում։ Ինքն ու Մ.Առաքելյանը բացել են թղթապանակը և պարզել, որ դրանցում առկա երաշխավորության պայմանագրի օրինակները լիովին համապատասխանում են իրենց մոտ եղած պայմանագրի օրինակներին, ավելին՝ Ս.Օհանյանի անվան դիմաց և այլ անհրաժեշտ տեղերում արդեն իսկ առկա են վերջինիս ստորագրություններ։ Մ.Առաքելյանն իր դժգոհությունն է հայտնել՝ նշելով, որ Հր.Սարգսյանի հետ ունեցել են այլ պայմանավորվածություն և հետագա գործողությունների վերաբերյալ անհրաժեշտ հրահանգ ստանալու ակնկալիքով նույն պահին զանգահարել է «ՎՏԲ-Հայաստան Բանկ» ՓԲ ընկերության վարկային գործարքների վարչության պետ Ն.Յոլչյանին, ներկայացրել ստեղծված իրավիճակը` միաժամանակ հայտնելով, որ փաստաթղթերը ստորագրված վիճակում իրենց տրամադրել է մայորի կոչումով անծանոթ մի սպա։ Ն.Յոլչյանը, հիմք ընդունելով այն հանգամանքը, որ պաշտպանության նախարարության սպաներից մեկն է թղթապանակը դուրս բերել և հանձնել իրենց, թույլատրել է ընդունել պայմանագիրը՝ համարելով, որ այն ստորագրվել է նախարար Ս.Օհանյանի կողմից։ Նշել է նաև, որ իր աշխատանքային պարտականություններից ելնելով՝ Մեսրոպ Առաքելյանի հետ միասին գնացել են ՀՀ պաշտպանության նախարարություն` երաշխավորության պայմանագիրը նախարար Սեյրան Օհանյանի ստորագրմանը ներկայացնելու նպատակով։ Իրենց թույլ չեն տվել բարձրանալ նախարարի մոտ, որի պատճառով զրկվել են պայմանագիրն անձամբ նախարարի ստորագրմանը ներկայացնելու հնարավորությունից։ Բավականին երկար ժամանակ սպասելուց հետո հսկիչ-անձնագրային կետում մայորի կոչումով մի անձնավորություն դուրս է բերել պայմանագիրը` արդեն իսկ ստորագրված վիճակում։ Իրեն ու Մ.Առաքելյանին ՊՆ ուղեկցել է վարորդ Հ.Սերոբյանը։ Իրենք նախարարություն գնացել են վարչության պետ Ն.Յոլչյանի հանձնարարությամբ և գիտությամբ։ Տեղյակ չէ, թե ինչ հանգամանքներում է այդ պայմանագիրը նախապես հանձնվել նախարար Սեյրան Օհանյանին։ Երբ պայմանագիրն իրեն հանձնել են արդեն իսկ ստորագրված վիճակում, զանգահարել է վարչության պետ Ն.Յոլչյանին և այդ մասին հայտնել նրան։ Վերջինս, քիչ անց վերադասից դիրքորոշումը ճշտելով, զանգահարել և հայտնել է, որ պայմանագիրն այդ վիճակում բերեն բանկ։ Ինքը տեղյակ էր, որ «Պիրամիդայի» համար պետք է վարկ տրամադրվեր 1.100.000 ԱՄՆ դոլարի չափով, որի համար երաշխավոր պետք է հանդես գար նաև նախարար Ս.Օհանյանը, սակայն թե ինչ առնչություն ուներ վերջինս այդ գործարքին, տեղյակ չէ։ Նշել է նաև, որ անցակետի մոտ սպասելու ընթացքում Հ.Սերոբյանն անընդհատ հեռախոսազրույց է ունեցել ինչ-որ անձի հետ` ձգձգման շուրջ անհանգստություն հայտնելով և հետաքրքրելով, թե երաշխավորության պայմանագիրն ինչ եղավ։
Վկա Գևորգ Հարությունյանի ցուցմունքներով այն մասին, որ 2012թ. նոյեմբերի սկզբներին, երբ աշխատել է ՀՀ Զինված ուժերի կապի և ԱԿՀ վարչությունում որպես կապի պլանավորման և կազմակերպման բաժնի կապի կազմակերպման բաժանմունքում` որպես սպա, իրեն է զանգահարել ընկերը` Հայկ Սերոբյանը, հետաքրքրվել իր աշխատանքի վայրից, ապա տեղեկանալով, որ դեռևս շարունակում է աշխատել Պաշտպանության նախարարությունում՝ առաջարկել է հանդիպել։ Օրեր անց, պայմանավորվածության համաձայն, Երևան քաղաքի Բաղրամյան փողոցում գործող «Ամերիկյան համալսարանի» մոտ հանդիպել է Հ.Սերոբյանին, ով զրույցի ընթացքում իրեն է հանձնել մի թղթապանակ, ապա խնդրել թղթապանակն առավոտյան դուրս հանել պաշտպանության նախարարությունից և հանձնել բանկի աշխատակիցներին՝ վերջիններիս հայտնելով, որ նրանց չի կարող ներս տանել և որ հանձնարարվել է թղթապանակը հանձնել դրսում։ Ոչինչ չկասկածելով, որևէ այլ բան չմանրամասնելով, չստուգելով թղթապանակի պարունակությունը, միաժամանակ մտածելով, որ արտառոց ոչինչ չկա՝ համաձայնել է կատարել Հ.Սերոբյանի խնդրանքը։ Ձեռք բերված պայմանավորվածության համաձայն` հաջորդ օրը՝ առավոտյան, իրեն է զանգահարել Հ.Սերոբյանը՝ տեղեկացնելով իրենց ժամանման մասին։ Ըստ նույն պայմանավորվածության՝ շուրջ 20 րոպե անց նախարարության վարչական շենքից դուրս է եկել, մոտեցել Հ.Սերոբյանին ու բանկի աշխատակիցներին, ապա վերջիններիս փոխանցել նախորդ օրն իրեն տրամադրված թղթապանակը՝ հայտարարելով, որ բանկի աշխատակիցները չեն կարող մուտք գործել նախարարության վարչական շենք և որ իրեն հանձնարարվել է թղթապանակը դուրս բերել նախարարությունից ու հանձնել նրանց։
Վկա «ՎՏԲ-Հայաստան Բանկ» ՓԲ ընկերության փոքր բիզնեսի վարչության պետ Մեսրոպ Առաքելյանի ցուցմունքներով այն մասին, որ 2012թ. օգոստոսին Ռաֆայել Օհանջանյանից տեղեկացել է, որ նա պատահաբար հանդիպել է իր բանակային ընկերներից Հայկ Սերոբյանին, ով հայտնել է, որ «Պիրամիդա» ՍՊ ընկերության տնօրեն Հրաչյա Սարգսյանը Սեյրան Օհանյանի հանձնարարությամբ պատրաստվում է գրավադնել «Պիրամիդա» համալիրը 1.500.000-ից 1.800.000 ԱՄՆ դոլար գումարի դիմաց։ Ռ.Օհանջանյանից տեղեկացել է նաև, որ վերջինս անձամբ է հանդիպել Հր.Սարգսյանին, քննարկել համալիրի գրավադրման հարցը, որի ընթացքում վերջինս իր հերթին տեղեկացրել է, որ համալիրը պետք է գրավադրվի և որ վարկ ստանալու նպատակը պայմանավորված է ընկերության բաժնետերերից մեկի կողմից իր բաժնեմասը մյուսին վաճառելու անհրաժեշտությամբ։ Այնուհետև հերթական հանդիպման ժամանակ Հր.Սարգսյանը ստորագրել է վարկ ստանալու դիմումը, ծանոթացել է բանկ ներկայացնելու անհրաժեշտ փաստաթղթերի ցանկին, ապա և ներկայացրել դրանք։ Հետագայում անձամբ հանդիպել է Հր.Սարգսյանին, հստակեցրել է վարկի պայմանները, որի ընթացքում վերջինս մշտապես վստահեցրել է, որ ընկերության հիմնադիրները տեղյակ են վարկավորման և գրավադրման գործընթացից։ Արդյունքում սկսվել է «Պիրամիդա» ՍՊ ընկերության ֆինանսական վիճակի գնահատման ու վերլուծության փուլը՝ պարզելու ընկերության շահույթը, եկամուտը, ծախսերը, դրամական մուտքերն ու ելքերը, սեփական կապիտալը, ապա և գույքը գրավադրելու ու վարկը հաստատելու գործընթացը, ինչի շրջանակներում կնքվել են անշարժ գույքի հիփոթեքի պայմանագիր, գլխավոր վարկային պայմանագրի ենթավարկային պայմանագիր, գլխավոր վարկային պայմանագիր, ինչպես նաև երաշխավորության պայմանագրեր, որպիսի պայմաններում գրավադրվել է «Պիրամիդա» ՍՊ ընկերությանը պատկանող, Երևանի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող անշարժ գույքը՝ «Պիրամիդա» համալիրը, և որպես վարկի գումար հաստատվել է 1.100.000 ԱՄՆ դոլար։ Այդ գումարը փոխանցվել է «ՎՏԲ-Հայաստան Բանկ» ՓԲ ընկերության «Մյասնիկյան» մասնաճյուղում բացված «Պիրամիդա» ՍՊ ընկերության հաշվեհամարին՝ անկանխիկ ձևով, իսկ նման պայմաններում ՍՊ ընկերությունը՝ ի դեմս տնօրեն Հր.Սարգսյանի, չէր կարող «Մյասնիկյան» մասնաճյուղի իր հաշվեհամարից որևէ գումարի կանխիկացում կատարել, ավելին՝ հիշյալ գումարը ոչ միայն անկանխիկ ձևով է փոխանցվել «Մյասնիկյան» մասնաճյուղում բացված ընկերության հաշվեհամարին, այլև բանկի պահանջով գումարը պետք է փոխանցվեր Ք.Զադիկյանի անվամբ բացված այլ հաշվեհամարին, քանի որ վերջինս հանդիսացել է վաճառող կողմ։ Իր հերթին Հր.Սարգսյանը քաջատեղյակ էր, որ «Մյասնիկյան» մասնաճյուղում բացված ՍՊ ընկերության հաշվեհամարից չի կարող կանխիկացում կատարել, և որ գումարը վերջնական հաշվով փոխանցվելու է Ք.Զադիկյանի անվամբ բացված անձնական հաշվեհամարին։ 2012թ. նոյեմբերին մինչև 1.100.000 ԱՄՆ դոլար գումարը «Փրայմ» մասնաճյուղում Ք.Զադիկյանի անվամբ բացված հաշվեհամարին փոխանցելը Հր.Սարգսյանը «ՎՏԲ-Հայաստան Բանկ» է ներկայացրել Ք.Զադիկյանի կողմից տրված լիազորագիր, համաձայն որի՝ «ՎՏԲ-Հայաստան Բանկ» ՓԲ ընկերության «Փրայմ» մասնաճյուղում Ք.Զադիկյանի անվամբ բացված հաշվեհամարին փոխանցվելիք 1.100.000 ԱՄՆ դոլար գումարը Հր.Սարգսյանը կարող է տնօրինել, այդ թվում՝ կանխիկացնել։ Վկա Մ.Առաքելյանը նաև հայտնել է, որ շարադրված գործարքի ընթացքում անհրաժեշտություն է առաջացել կնքել երաշխավորության պայմանագիր «ՎՏԲ-Հայաստան Բանկ» ՓԲ ընկերության և Ս.Օհանյանի միջև, ուստի պայմանավորվածություն է ձեռք բերվել երաշխավորության պայմանագրի նախագիծն հանձնել Հր.Սարգսյանին, որպեսզի վերջինս այն ուղարկի Ս.Օհանյանին՝ աշխատավայրում ծանոթանալու և տեղում ստորագրելու համար, պայմանով, որ բանկի համապատասխան աշխատակիցները, որպես երաշխիք, այցելեն պաշտպանության նախարարություն և նախարարի ստորագրմանն անձամբ ներկայացնեն այդ պայմանագիրը։ 2012թ. նոյեմբերի սկզբներին՝ առավոտյան, Հ.Սերոբյանը իրեն ու Աշոտ Ֆերոյանին ավտոմեքենայով ուղեկցել է պաշտպանության նախարարություն։ Տեղում ինչ-որ հեռախոսազանգ կատարելուց հետո Հ.Սերոբյանից պարզել են, որ նախարարության վարչական շենք չեն կարող մուտք գործել։ Որոշ ժամանակ անց նախարարությունից դուրս է եկել զինվորական համազգեստով մի անձնավորություն, ապա իրենց է փոխանցել թղթապանակ՝ վերահաստատելով, որ չեն կարող մուտք գործել նախարարություն և որ իրեն հանձնարարվել է թղթապանակը հանձնել դրսում։
Ինքն ու Ա.Ֆերոյանը բացել են թղթապանակը և պարզել, որ դրանցում առկա երաշխավորության պայմանագրի օրինակները լիովին համապատասխանում են իրենց մոտ եղած պայմանագրի օրինակներին, ինչպես նաև այն, որ նախարար Սեյրան Օհանյանի անվան դիմաց և այլ անհրաժեշտ տեղերում արդեն իսկ առկա են նույնանման ստորագրություններ։ Այդ կապակցությամբ հայտնել է իր դժգոհությունը՝ նշելով, որ Հր.Սարգսյանի հետ ունեցել են այլ պայմանավորվածություն, ուստի զանգահարել է վերջինիս, ով վստահեցրել է, որ պայմանագրերում առկա ստորագրությունները կատարվել են Ս.Օհանյանի կողմից։ Իրենց հետագա գործողությունների վերաբերյալ զանգահարել է «ՎՏԲ-Հայաստան Բանկ» ՓԲ ընկերության տնօրինությանը, ներկայացրել ստեղծված իրավիճակը` միաժամանակ հայտնելով, որ փաստաթղթերը ստորագրված վիճակում իրենց տրամադրել է զինվորական համազգեստով անծանոթ ծառայող։ Հիմք ընդունելով այն հանգամանքը, որ պաշտպանության նախարարության սպաներից մեկն է թղթապանակը դուրս բերել և հանձնել իրենց՝ տնօրինությունը թույլատրել է ընդունել այդ պայմանագիրը՝ վստահաբար կարծելով, որ այն ստորագրել է նախարար Ս.Օհանյանը։ Հայտնել է նաև, որ վարկային գործում պարտադիր չէր ընկերության հիմնադիր Ք.Զադիկյանի իր բաժնեմասը վաճառելու վերաբերյալ դիմումի (համաձայնության) առկայությունը, Բանկին է ներկայացվել այդ փաստը հաստատող ընկերության ժողովի որոշումը։ Նշել է նաև, որ չի հիշում, թե վերոնշյալ որոշման մեջ արդյո՞ք նշված էր բաժնեմասը Մուշեղ Օհանյանին վաճառելու մասին, սակայն Հր.Սարգսյանը պարբերաբար շեշտել է, որ վարկ վերցնելու նպատակը բաժնեմասի վաճառքն է։ Քանի որ բանկային պրակտիկայում ընդունված է վարկային ծառայությունների հետ մեկտեղ հաճախորդներին բանկային այլ ծառայություններ առաջարկելը, իրենք Հր.Սարգսյանին առաջարկել են վարկի տոկոսը նվազելու համար բանկային տարբերակներից ընտրել ավանդ ներդնելու եղանակը։ Նշել է նաև, որ վերոնշյալ վարկից 400.000 ԱՄՆ դոլարի չափով ավանդը կարող էր Բանկում դրվեր ընկերության հիմնադրի կամ տնօրենի անվամբ, սակայն ավանդի այդ գումարն ավանդատուն ցանկացած օր կարող էր Բանկից ետ ստանալ։ Նշել է նաև, որ վարկ տրամադրելուց առաջ ստուգել են «Պիրամիդա» ընկերության վարկային պատմությունը, սակայն հարցման պատասխանում նշված չի եղել «Արցախբանկում» 900.000 ԱՄՆ դոլար վարկի առկայության և այդ կապակցությամբ ընկերության անշարժ գույքն արդեն իսկ գրավադրված լինելու մասին, ինչը, հավանաբար, եղել է տեխնիկական վրիպակի հետևանք։
Վկա, «Արցախբանկ» ՓԲ ընկերության Երևանի «Կենտրոնական» մասնաճյուղի կառավարչի տեղակալ Դավիթ Գուլյանի ցուցմունքներով այն մասին, որ 2006թ. հուլիսի 24-ին «Արցախբանկ» ՓԲ ընկերության Երևանի «Կենտրոնական» մասնաճյուղը վարկի և հիփոթեքի պայմանագիր է կնքել «Պիրամիդա» ՍՊ ընկերության հետ՝ ի դեմս տնօրեն Հր.Սարգսյանի, ով գործել է ընկերության կանոնադրության հիման վրա։ Հիշյալ պայմանագրերի համաձայն՝ բանկը ՍՊ ընկերությանը տրամադրել է 50.000 ԱՄՆ դոլար գումարի չափով վարկ՝ մինչև 2008թ. հունվարի 25-ը մարման ժամկետով, տարեկան 15 տոկոս տոկոսադրույքով։ Նույն պայմանագրերում նշված պարտավորությունների կատարումն ապահովելու համար «Պիրամիդա» ՍՊ ընկերությունը՝ ի դեմս տնօրեն Հր.Սարգսյանի, որպես հաջորդող գրավ, տրամադրել է սեփականության իրավունքով ընկերությանը պատկանող Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող 115.5 քմ ընդհանուր մակերեսով բնակելի բնակարանը, 513.1 քմ ընդհանուր մակերեսով հասարակական տարածքը և 293.0 քմ ընդհանուր մակերեսով հողամասը։ Կնքված հիփոթեքի պայմանագրի շրջանակներում «Պիրամիդա» ՍՊ ընկերությունը «Արցախբանկ» ՓԲ ընկերությունում գրավադրել է նշված անշարժ գույքը« որի դիմաց հաստատվել է վարկ՝ 50.000 ԱՄՆ դոլար գումարի չափով« որն էլ փոխանցվել է ընկերության հաշվարկային հաշվին։ Տրամադրված վարկը «Պիրամիդա» ՍՊ ընկերության կողմից վերջնականապես մարվել է 2008թ. հունվարի 30-ին։ 2007թ. հուլիսի 20-ին «Արցախբանկ» ՓԲ ընկերության և «Պիրամիդա» ՍՊ ընկերության տնօրեն Հր.Սարգսյանի միջև կնքվել է թիվ 5131 հիփոթեքի պայմանագիր, համաձայն որի` ընկերությունը տրամադրվել է վարկ՝ 360.000 ԱՄՆ դոլար գումարի չափով, իսկ նույն պայմանագրով նախատեսված պարտավորությունների կատարումն ապահովելու համար ՍՊ ընկերությունը գրավադրել է սեփականության իրավունքով ընկերությանը պատկանող անշարժ գույքը՝ Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող 115.5 քմ ընդհանուր մակերեսով բնակելի բնակարանը« 513.1 քմ ընդհանուր մակերեսով հասարակական տարածքը և 293.0 քմ ընդհանուր մակերեսով հողամասը։ Պայմանագրի շրջանակներում տրամադրվել է վարկ՝ տարեկան 15 տոկոս տոկոսադրույքով, մինչև 2010թ. հուլիսի 20-ը մարման ժամկետով։ 360.000 ԱՄՆ դոլար գումարի չափով տրամադրված վարկը «Պիրամիդա» ՍՊ ընկերության կողմից վերջնական մարվել է 2008թ. մարտի 21-ին։ 2008թ. հուլիսի 24-ին «Արցախբանկ» ՓԲ ընկերության և «Պիրամիդա» ՍՊ ընկերության տնօրեն Հր.Սարգսյանի միջև կնքվել է թիվ 5164 հիփոթեքի պայմանագիր« համաձայն որի` բանկը ՍՊ ընկերությանը տրամադրել է 200.000 ԱՄՆ դոլար գումարի չափով վարկ՝ մինչև 2011թ. հուլիսի 24-ը մարման ժամկետով« տարեկան 15 տոկոս տոկոսադրույքով։ Այդ պայմանագրով նախատեսված պարտավորությունների կատարումն ապահովելու նպատակով ընկերությունը գրավադրել է սեփականության իրավունքով նրան պատկանող Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող 115.5 քմ ընդհանուր մակերեսով բնակելի բնակարանը, 513.1 քմ ընդհանուր մակերեսով հասարակական տարածքը և 293.0 քմ ընդհանուր մակերեսով հողամասը« ընդհանուր գույքի բաժնային սեփականության իրավունքները։ Հիշյալ վարկի վերջնական մարումն ընկերության կողմից կատարվել է 2011թ. հուլիսի 30-ին։ 2009թ. հունիսի 10-ին «Արցախբանկ» ՓԲ ընկերության ու «Պիրամիդա» ՍՊ ընկերության տնօրեն Հր.Սարգսյանի միջև կնքվել է թիվ 5178 պայմանագիրը, համաձայն որի՝ բանկը ընկերությանը տրամադրել է վարկ՝ 900.000 ԱՄՆ դոլար գումարի չափով, մինչև 2017թ. հունիսի 10-ը մարման ժամկետով« տարեկան 18% տոկոսադրույքով։ Վարկային պարտավորությունների կատարման համար ՍՊ ընկերությունը գրավադրել է սեփականության իրավունքով նրան պատկանող Երևան քաղաքի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գտնվող 115.5 քմ ընդհանուր մակերեսով բնակելի բնակարանը« 513.1 քմ ընդհանուր մակերեսով հասարակական տարածքը և 293.0 քմ ընդհանուր մակերեսով հողամասը, սակայն թիվ 5178 հիփոթեքի պայմանագրի շրջանակներում տրամադրված 900.000 ԱՄՆ դոլար գումարի չափով վարկն ամբողջությամբ չի մարվել։ Վարկի տրամադրման պահից մինչև 2013թ. փետրվարի 15-ը կատարվել են մայր գումարի մասնակի մարումներ և տոկոսադրույքի վճարումներ։ 2013թ. մայիս ամսվա դրությամբ մայր գումարից մարվել է 271.875 ԱՄՆ դոլար և մնացել է մայր գումարից մնացորդ՝ 628.125 ԱՄՆ դոլար գումարի չափով։ Նշեl է նաև, որ զննելով ուսումնասիրության համար իրեն ներկայացված 2012թ. սեպտեմբերի 11-ին «Արցախբանկ» ՓԲ ընկերության անունից ՀՀ ԿԱ անշարժ գույքի կադաստրի պետական կոմիտեի աշխատակազմի Երևանի Կենտրոն սպասարկման գրասենյակի ղեկավարին հասցեագրված, որպես իրեղեն ապացույց ճանաչված գրությունը՝ պնդեց, որ այն կեղծ է, քանի որ փաստաթուղթն իր որակական հատկանիշներով չի համապատասխանում բանկի ձևաթղթին, դրա հետնամասում առկա չէ թվային հաշվառում, ինչը պարտադիր է նման ձևաթղթերի համար։ Նշեց, որ ներկայացված փաստաթղթում ինքը չի ստորագրել և որ առկա ստորագրությունն էապես տարբերվում է իր ստորագրությունից։ Միաժամանակ հայտնեց նաև, որ 2012թ. սեպտեմբերի 11-ին հանդիսացել է մասնաճյուղի կառավարիչ« այլ ոչ թե կառավարչի ժամանակավոր պաշտոնակատար« ինչը գրառված է նրան ներկայացված կեղծ գրության ստորին հատվածում։ Հարցերին պատասխանելիս նշեց նաև, որ վերոնշյալ 900.000 ԱՄՆ դոլարի վարկն ընթացիկ է, այսինքն` դեռևս մարված չէ, հետևաբար՝ այդ վարկի շրջանակներում գրավի առարկայի վրա կիրառված սահմանափակումները բանկը չէր կարող վերացնել, մինչդեռ, իրենց համար անհայտ հանգամանքներում որպես վարկի վերադարձնելիության երաշխիք գրավադրված «Պիրամիդա» ՍՊ անշարժ գույքը հանվել է արգելանքից։
Վկա Սուրեն Հովհաննիսյանի ցուցմունքներով այն մասին, որ «Պիրամիդա» ՍՊ ընկերությանը պատկանող, Երևանի Սայաթ-Նովա 20/2 հասցեում տեղակայված անշարժ գույքի հետ կապված անհրաժեշտ գործարքներ կատարելու նպատակով, որպես նույն ընկերության նոր տնօրեն, դիմել է «Արցախբանկ» ՓԲ ընկերության «Կենտրոնական» մասնաճյուղ և տեղեկացել է, որ դեռևս 2011թ. հունվարի 31-ին նախկին տնօրեն Հրաչյա Սարգսյանը հիշյալ բանկում կնքել է վարկային պայմանագիր՝ գրավադրելով սեփականության իրավունքով նրան պատկանող Երևան քաղաքի Շինարարների 35 շենքի թիվ 37 հասցեում գտնվող 53.9 քմ ընդհանուր մակերեսով բնակարանը՝ դրա դիմաց ստանալով վարկ 15.000.000 ՀՀ դրամ գումարի չափով։ Հիշյալ գործարքը կնքելու շրջանակներում Հր.Սարգսյանը բանկ է ներկայացրել «Պիրամիդա» ՍՊ ընկերության մասնակիցների արտահերթ ընդհանուր ժողովի թիվ 02-րդ արձանագրության քաղվածք՝ դրանում կեղծելով ընկերության բաժնետերերի՝ Մ.Օհանյանի ու Ք.Զադիկյանի ստորագրությունները, ինչը նրան հնարավորություն է տվել, որպես վարկի վերադարձման երաշխավոր, ներկայացնել «Պիրամիդա» ՍՊ ընկերությանը։ 2011թ. հունվարի 31-ին Հր.Սարգսյանի ու բանկի միջև կնքվել է երաշխավորության պայմանագիր« որպես վարկատու հանդես է եկել բանկը, որպես վարկառու՝ Հր.Սարգսյանը, իսկ որպես երաշխավոր՝ «Պիրամիդա» ՍՊ ընկերությունը։ Արդյունքում Հր.Սարգսյանը չի կատարել պայմանագրով նախատեսված իր պարտավորությունները, ուստի բանկը հայցադիմում է ներկայացրել Երևան քաղաքի Աջափնյակ և Դավիթաշեն վարչական շրջանների ընդհանուր իրավասության դատարան։ Նույն դատարանի կողմից 2013թ. մայիսի 15-ին տրվել է կատարողական թերթ, համաձայն որի՝ հայցագնի 18.797.221.90 ՀՀ դրամի չափով արգելանք է դրվել Հր.Սարգսյանին ու «Պիրամիդա» ՍՊ ընկերությանը պատկանող գույքի կամ դրամական միջոցների վրա։ Մանրամասնել է նաև, որ տուժողների, գլխավորապես՝ Օհանյանների հանձնարարությամբ հետաքրքրվել է «Պիրամիդայի» հարկային պարտավորություններով, նշանակվել է ընկերության տնօրեն և աշխատեցնելով այն` մարել է հարկային պարտավորությունները։ Նշել է, որ բաժնետերերն են կատարել վճարումները, նույնիսկ, Քրիստիան Զադիկյանն անձնական միջոցներից 10.000 եվրո գումար է տվել։ Այնուհետև պարզվել է, որ ընկերությունը պետության հանդեպ ունի նաև գույքահարկի և մոտ 10.000 ԱՄՆ դոլարի այլ պարտավորություններ։ Հր.Սարգսյանը պարտավորվել է գրավադրել բնակարանը, վարկ վերցնել և մարել ընկերության այդ պարտքերը։ Նշել է նաև, որ բաժնետեր Ք.Զադիկյանի կողմից բաժնեմասը վաճառելու շուրջ որևէ խոսակցություն չի եղել, եթե նման մտադրություն վերջինս կամ Օհանյաններն ունենային, ինքն, անպայման, տեղյակ կլիներ։ Ք.Զադիկյանն է զանգել և հայտնել, որ մեկ միլիոն ԱՄՆ դոլարի չափով գումար կա իր հաշվին, որը պետք է սառեցնել։ Առաջին անգամ բանկում է տեղեկացել այն մասին, թե իբր Ք.Զադիկյանը բաժնեմասը վաճառում է Մուշեղ Օհանյանին, այնինչ, իրականում նման պայմանավորվածություն չի եղել։ Հր.Սարգսյանը բանկի կառավարչի մոտ պնդել է, թե իբր վարկը ստանալու նպատակով իր անձնական գույքը՝ բնակարանն ու համակարգչային գրասենյակն է գրավադրել։
Դատաձեռագրաբանական փորձաքննության 2013թ. փետրվարի 6-ի թիվ 154 եզրակացությամբ այն մասին, որ 2012թ. հոկտեմբերի 30-ի N Ե44Ի337դ երաշխավորության պայմանագրի առաջին էջի ստորին հատվածում, երրորդ էջի «ԵՐԱՇԽԱՎՈՐ» սյունակում «Սեյրան Օհանյանի» անունից եղած ստորագրությունները, հավանաբար, կատարվել են գործով ամբաստանյալ Հրաչյա Սարգսյանի կողմից։
Դատատեխնիկական և դատաձեռագրաբանական համալիր փորձաքննության 2013թ. օգոստոսի 2-ի թիվ 1600 եզրակացությամբ, համաձայն որի` «Պիրամիդա» ՍՊ ընկերության մասնակիցների արտահերթ՝ 2011թ. հունվարի 19-ի ընդհանուր ժողովի թիվ 02-րդ արձանագրության քաղվածքի ձևաթուղթը տպագրված է բազմացնող տպիչ սարքի միջոցով։
Այդ քաղվածքում «Մուշեղ Օհանյանի» անունից առկա ստորագրությունը կատարված չէ գործով տուժող Մուշեղ Օհանյանի կողմից, այլ կատարված է մեկ ուրիշ անձի կողմից։ Նույն քաղվածքում «Պիրամիդա» անունից առկա ստորագրությունը կատարված չէ գործով տուժող Քրիստիան Զադիկյանի կողմից, այլ կատարված է մեկ ուրիշ անձի կողմից։
Դատատեխնիկական և դատաձեռագրաբանական համալիր փորձաքննության 2013թ. հունիսի 18-ի թիվ 1177 եզրակացությամբ, որի համաձայն` «Արցախբանկ» ՓԲ ընկերության անունից ՀՀ ԿԱ անշարժ գույքի կադաստրի պետական կոմիտեի աշխատակազմի Երևանի Կենտրոն սպասարկման գրասենյակի ղեկավարին 2012թ. սեպտեմբերի 11-ին հասցեագրված գրության ձևաթուղթը թղթի որակով և տպագրության եղանակով տարբերվում է «Արցախբանկ» ՓԲ ընկերության ձևաթղթի նմուշից։ Գրությունն ամբողջությամբ տպագրվել է համակարգչային բազմացնող գունավոր տպիչ սարքի միջոցով, որից հետո արտատպված ստորագրության շտրիխները կրկնագծվել են գրող գործիքի միջոցով։ Հետազոտվող կնիքի դրոշմը թողնված չէ կնիքի կողմից, այլ արտատպված է «Արցախբանկ» ՓԲ ընկերության Երևանի «Կենտրոնական» մասնաճյուղի կլոր կնիքի որևէ դրոշմի կամ դրոշմի պատկերից, այսինքն՝ կնիքի դրոշմը կեղծելիս, որպես օրինակ, կարող էր ծառայել «Արցախբանկ» ՓԲ ընկերության Երևանի «Կենտրոնական» մասնաճյուղի կնիքի դրոշմներից որևէ մեկը։
Անձին լուսանկարով ճանաչման ներկայացնելու արձանագրությամբ այն մասին, որ վկա Գարիկ Նազարյանը 2012թ. դեկտեմբերի 14-ին կատարված քննչական այդ գործողության արդյունքներով չի ճանաչել այլ անձանց լուսանկարների թվում նրան ճանաչման ներկայացված, սույն գործով տուժող Մուշեղ Օհանյանին` նշելով նաև, որ ներկայացված լուսանկարներում բացակայում է այն անձը, որին «Պիրամիդա» համալիրի սրճարանում գործով ամբաստանյալ Հր.Սարգսյանը ներկայացրել է որպես Մուշեղ Օհանյանի։
2012թ. սեպտեմբերի 11-ին «Արցախբանկ» ՓԲ ընկերության անունից ՀՀ ԿԱ անշարժ գույքի կադաստրի պետական կոմիտեի աշխատակազմի Երևանի Կենտրոն սպասարկման գրասենյակի ղեկավարին հասցեագրված գրությամբ, համաձայն որի` «Արցախբանկ» ՓԲ ընկերությունում որպես վարկի ապահովման միջոց գրավադրված «Պիրամիդա» ՍՊ ընկերությանը սեփականության իրավունքով պատկանող Երևան քաղաքի Սայաթ-Նովա 20/2 հասցեում գտնվող անշարժ գույքն անհրաժեշտ է հանել արգելանքից, քանի որ բանկի առջև այդ գույքով ապահովված պարտավորությունները հաճախորդը չունի։ Գրությունը ստորագրված է «Արցախբանկ» ՓԲ ընկերության «Կենտրոնական» մասնաճյուղի կառավարչի ժամանակավոր պաշտոնակատար Դ.Գուլյանի անունից։
«Պիրամիդա» ՍՊ ընկերության մասնակիցների արտահերթ 2011թ. հունվարի 19-ի ընդհանուր ժողովի թիվ 02-րդ արձանագրության քաղվածքով, որի համաձայն` ժողովին մասնակցել են ընկերության մասնակիցներ Քրիստիան Զադիկյանը և Մուշեղ Օհանյանը, տնօրեն Հրաչյա Սարգսյանը։ Վերջինս ընտրվել է ժողովի նախագահ։ Համաձայն քաղվածքի՝ Հր.Սարգսյանը ներկայացրել է իր անձնական ֆինանսատնտեսական իրավիճակը և հեռանկարային պլանները և առաջարկել լրացուցիչ ֆինանսատնտեսական միջոցների ներգրավման նպատակով դիմել «Արցախբանկ» ՓԲ Երևանի «Կենտրոնական» մասնաճյուղին։ Ժողովը որոշել է ընկերության անունից երաշխավորել տնօրեն Հր.Սարգսյանին դիմել բանկի այդ մասնաճյուղին 15.000.000 ՀՀ դրամ վարկ ստանալու խնդրանքում մինչև 36 ամիս մարման վերջնական ժամկետով։ Քաղվածքը ստորագրված է «ժողովի նախագահ» Մ.Օհանյանի, ժողովի քարտուղար Ք.Զադիկյանի անուններից։
«Պիրամիդա» ՍՊ ընկերության 2012թ. օգոստոսի 31-ի ժողովի արձանագրությամբ այն մասին, որ նույն օրը տեղի ունեցած ՍՊ ընկերության հերթական նիստի ժամանակ հիմնադիրներ Քրիստիան Զադիկյանը և Մուշեղ Օհանյանը քննարկել են բաժնետոմսերի ձեռքբերման անհրաժեշտության կապակցությամբ «ՎՏԲ-Հայաստան Բանկ» ՓԲ ընկերության ֆինանսավորմանը դիմելու հարցը, այն է՝ ստանալ 1.800.000 ԱՄՆ դոլար գումարի վարկ՝ 60 ամիս ժամկետով տարեկան 12%-ով, ի ապահովումը վերոհիշյալ վարկի առաջարկել Երևանի Սայաթ-Նովա պողոտա 20/2 և Մետաղագործների փողոցի 28-րդ շենքի 2-րդ հասցեում գտնվող անշարժ գույք և Մուշեղ Օհանյանի, Սեյրան Օհանյանի և Հրաչյա Սարգսյանի անձնական երաշխավորությունները։ Ստորագրված է հիմնադիրների և տնօրեն Հր.Սարգսյանի անուններից։
2012թ. հոկտեմբերի 30-ին «ՎՏԲ-Հայաստան Բանկ» ՓԲ ընկերության և տնօրեն Հրաչյա Սարգսյանի միջև կնքված գլխավոր վարկային պայմանագրի անբաժանելի մաս կազմող 2012թ. հոկտեմբերի 30-ին կնքված NԵ44Ի337բ և NԵ44Ի337դ երաշխավորության պայմանագրերով, որոնց համաձայն՝ համապատասխանաբար՝ Մուշեղ Օհանյանը և Սեյրան Օհանյանը, իրենց ստորագրություններով իբրև թե երաշխավորել են 451.800.000 ՀՀ դրամի վարկային պայմանագրով նախատեսված «Ս.Տ.Շ.Պիրամիդիա» ՍՊ ընկերության տնօրեն Հրաչյա Սարգսյանի` «ՎՏԲ-Հայաստան Բանկ» ՓԲ ընկերության հանդեպ ստանձնած պարտավորությունների կատարման համար։
«ՎՏԲ-Հայաստան Բանկ» ՓԲ ընկերությունից առգրավված, Հրաչյա Սարգսյանի անվամբ ձևակերպված, Երևանի Սայաթ-Նովա 20/2 և Մետաղագործների 28-րդ շենքի թիվ 2 հասցեներում գործող «Պիրամիդա» համալիրը գրավադնելու վերաբերյալ կազմված վարկային գործի փաստաթղթերով, այդ թվում` թիվ ՄՏ-29102012-01-0064 միասնական տեղեկանքով, համաձայն որոնց` Հրաչյա Օգսենի Սարգսյանին 2012թ. հոկտեմբերի 29-ին` ժամը 12։58-ին տրամադրվել է տեղեկանք առ այն, որ Երևանի Սայաթ-Նովա պողոտա 20/2 հասցեում գտնվող շենքի և հողամասի նկատմամբ «Ս.Տ.Շ. Պիրամիդա» ՍՊ ընկերության սեփականության իրավունքների նկատմամբ գրանցված սահմանափակումներ չկան, թեև իրականում եղել են։
Տուժող Ք.Զադիկյանի կողմից Հր.Սարգսյանին տրամադրված լիազորագրով, որի համաձայն` Քրիստիան Զադիկյանը խաբեությամբ տված այդ փաստաթղթով 2012թ. նոյեմբերի 2-ին քաղ. Հրաչյա Օգսենի Սարգսյանին լիազորել է լինել իր ներկայացուցիչը «ՎՏԲ-Հայաստան» ՓԲ ընկերության բանկում, իր հաշվից ստանալ գումարներ, այդ թվում` նաև տոկոսագումարներ, կատարել փոխանցումներ, ներդրումներ, ստորագրել, անել հայտարարություններ, ստանալ տեղեկանքներ, կատարել մուծումներ և բոլոր գործողությունները կապված սույն հանձնարարության հետ։ Լիազորագիրը տրվել է 1 տարի ժամկետով, ստորագրված է Ք.Զադիկյանի կողմից։ Այն նույն օրը հաստատվել է նաև Ֆրանսիայում ՀՀ դեսպանության հյուպատոսական բաժնի կնիքով։
«ՎՏԲ-Հայաստան Բանկ» Մյասնիկյան մասնաճյուղի 2012թ. նոյեմբերի 8-ի թիվ 121108038338044-1 վճարման հանձնարարագրով, այն մասին, որ նշված օրը բանկի վերոնշյալ մասնաճյուղից Քրիստիան Զադիկյանի անվամբ նույն բանկի «Փրայմ» մասնաճյուղ է փոխանցվել 1.100.000 ԱՄՆ դոլար գումար, բաժնետոմսեր վաճառելու նպատակով։
Դատարանը գնահատելով դատաքննությամբ հետազոտված ապացույցները` հաստատված է համարել այն, որ ամբաստանյալ Հրաչյա Սարգսյանը օգտագործման նպատակով կեղծել և օգտագործել է իրավունք վերապահող ակնհայտ կեղծ պաշտոնական փաստաթղթեր, ինչպես նաև խարդախությամբ կատարել է ուրիշի` առանձնապես խոշոր չափերի գույքի հափշտակության փորձ, այսինքն` մեղավորությամբ կատարել է հանցավոր արարքներ, որոնք համապատասխանում են ՀՀ քրեական օրենսգրքի 325-րդ հոդվածի 1-ին մասով (երկու դրվագներով) և 34-178-րդ հոդվածի 3-րդ մասի 1-ին կետով նախատեսված հանցագործությունների հատկանիշներին, որի համար ենթակա է քրեական պատասխանատվության ու պատժի։
Դատարանն արձանագրել է, որ ամբաստանյալ Հրաչյա Սարգսյանին առաջադրված մեղադրանքում նրա մեղավորության վերաբերյալ հետևության է հանգել` նախապես քննարկելով և մերժելով հափշտակություն կատարելու դիտավորության բացակայության հիմքով վերջինիս արդարացնելու վերաբերյալ պաշտպանական ճառում պաշտպան Ռուբեն Բալաբանյանի հարուցած միջնորդությունը։
Դատարանն արձանագրել է նաև, որ խարդախություն կատարելու ուղղակի դիտավորության առկայության և այն ամբաստանյալ Հր.Սարգսյանի կամքից անկախ հանգամանքներով մինչև վերջ չհասցնելու փաստի մասին են վկայում հետևյալ փաստարկները.
- Ընկերության հիմնադիրներ Քրիստիան Զադիկյանի և Մուշեղ Օհանյանի անտեղյակությունը բաժնեմաս վաճառելու և գնելու, այդ նպատակով վարկ ստանալու վերաբերյալ, ամբաստանյալ Հր.Սարգսյանի կողմից հիմնադիրների համաձայնության մասին իբրև թե վկայող փաստաթղթեր կեղծելու և Բանկ ներկայացնելու (օգտագործելու) փաստը,
- 1.100.000 ԱՄՆ դոլարի վարկ ստանալու նպատակով այլ բանկ՝ «ՎՏԲ-Հայաստան Բանկ» ՓԲ ընկերությանը դիմելու փաստը՝ գիտակցելով այդ գումարի չափով վարկ ստանալու համար համարժեք անշարժ գույք գրավադնելու անհրաժեշտությունը (Բանկի պահանջը), ինչպես նաև որպես այդպիսին առաջարկվող ընկերության անշարժ գույքը «Արցախբանկ» ՓԲ ընկերությունում արդեն իսկ գրավադրված լինելու փաստը,
- Ընկերության վերոնշյալ անշարժ գույքի՝ արգելանքի տակ արդեն իսկ գտնվելու փաստը «ՎՏԲ-Հայաստան Բանկ» ՓԲ ընկերության աշխատակիցներից թաքցնելու նպատակով իրավունք վերապահող պաշտոնական կեղծ փաստաթուղթ ( կեղծելը) պատրաստելը և ՀՀ ԿԱ անշարժ գույքի կադաստրի ստորաբաժանում ներկայացնելը,
- Երաշխավորության պայմանագրերում Մուշեղ և Սեյրան Օհանյանների ստորագրությունները կեղծելու ծրագրի մշակումն ու իրականացումը, այդ թվում՝ այդ պայմանագրի օրինակները ՀՀ պաշտպանության նախարարության անցակետում, սպայի միջոցով «ՎՏԲ-Հայաստան Բանկ» ՓԲ ընկերության աշխատակիցներին հանձնելը, հիմնադիր Մուշեղ Օհանյանի փոխարեն այլ անձի որպես երաշխավոր բանկի աշխատակիցներին ներկայացնելը։
- Դատաքննությամբ հետազոտված ապացույցների, հատկապես՝ գործով տուժող Ք.Զադիկյանի և «Փրայմ» մասնաճյուղի կառավարիչ, գործով որպես վկա հարցաքննված Սուրեն Զոհրաբյանի ցուցմունքների համադրմամբ և գնահատմամբ հաստատվեց, որ Ք.Զադիկյանի անվամբ բացված հաշվեհամարին փոխանցված 1.100.000 ԱՄՆ դոլար գումարի (վարկի) կանխիկացումը խաբեությամբ և նրա վստահությունը չարաշահելու եղանակներով (արդեն իսկ գրավադրված անշարժ գույքի գրավադրմամբ նոր վարկ վերցնելու և Ք.Զադիկյանի 80.000 ԱՄՆ դոլարի պարտքը մասնակի վերադարձնելու պատրվակով) նման լիազորություն ձեռք բերած Հրաչյա Սարգսյանի կողմից ձախողվել է ոչ թե վերջինիս կողմից սկզբնական հանցավոր դիտավորության իրականացումից թեկուզ այդ փուլում կամովին հրաժարվելու, այլ կառավարիչ Ս.Զոհրաբյանի պատշաճ գործողությունների հետևանքով, որոնք իրենց հերթին պայմանավորված են եղել գումարի իրական չափի և գործարքի մասին պատահաբար տեղեկացած, մինչ այդ անտեղյակ գործով տուժող Ք.Զադիկյանի՝ ամեն տեսակի գործարքները դադարեցնելու վերաբերյալ կառավարչին տրված հանձնարարականով, այսինքն՝ այդ գումարը նախապատրաստելու համար նույն կառավարչին արդեն իսկ ցուցում տված, այն կանխիկացնելու և հափշտակելու դիտավորությամբ գործող Հր.Սարգսյանի կամքից անկախ հանգամանքներում։
Վերը նշվածից ելնելով դատարանն արձանագրել է, որ պաշտպանական ճառերում պաշտպան Ռ.Բալաբանյանի ներկայացրած պատճառաբանությունն անհիմն է, դատաքննությամբ հետազոտված ապացույցները թերի, սուբյեկտիվ և միակողմանի գնահատելու հետևանք։
Վերաքննիչ դատարանը գտնում է, որ դատարանի եզրահանգումներն այն մասին, որ ամբաստանյալ Հրաչյա Սարգսյանը կատարել է հանցավոր արարքներ նախատեսված ՀՀ քրեական օրենսգրքի 325-րդ հոդվածի 1-ին մասով (երկու դրվագներով) և 34-178-րդ հոդվածի 3-րդ մասի 1-ին կետով` հիմնավոր են, և բխում են ինչպես գործող օրենսդրության պահանջներից, այնպես էլ գործի փաստական հանգամանքներից ու տվյալներից:
Վերաքննիչ դատարանը վերլուծության և գնահատության ենթարկելով քրեական գործով ձեռք բերված, գործի դատաքննության ընթացքում հետազոտված և սույն որոշման մեջ շարադրված ապացույցներն իրենց համակցությամբ, հանգում է այն հետևության, որ դատարանն ամբաստանյալ Հրաչյա Սարգսյանին վերագրվող հանցավոր արարքների որակման առումով հիմնավոր հետևության հանգելու համար, անհրաժեշտ և բավարար վերլուծության և գնահատման է ենթարկել գործի լուծման համար անհրաժեշտ բացահայտման ենթակա հանգամանքները, որի արդյունքում ամբաստանյալ Հրաչյա Սարգսյանի հանցավոր արարքներին տրվել է ճիշտ քրեաիրավական գնահատական և կիրառվել է քրեական այն օրենքը, որը ենթակա է եղել կիրառման, ուստի ամբաստանյալ Հրաչյա Սարգսյանի նկատմամբ սույն քրեական գործի շրջանակներում արդարացման դատական ակտ կայացնելու հիմքեր չկան:
Տվյալ դեպքում, Վերաքննիչ դատարանը հարկ է համարում նաև նշել, որ ամբաստանյալ Հրաչյա Սարգսյանի շահերի պաշտպան Ռ.Բալաբանյանի վերաքննիչ բողոքում բերված պատճառաբանությունները բավարար չափով փաստարկված չեն, պարունակում են գնահատողական դատողություններ, որոնք արդեն իսկ դատարանի կողմից` վերը նշված եզրահանգումներով հերքվել են, ուստի չեն կարող բավարար հիմք հանդիսանալ այդ առումով դատական ակտը բեկանելու կամ փոփոխելու համար:
Վերաքննիչ դատարանը միևնույն ժամանակ արձանագրում է, որ գործը քննելիս և լուծելիս դատարանի կողմից քրեադատավարական իրավունքի այնպիսի էական խախտումներ, որոնք ազդել կամ կարող էին ազդել սույն գործով ճիշտ որոշում կայացնելու վրա` թույլ չեն տրվել:
Անդրադառնալով ամբաստանյալ Հրաչյա Սարգսյանի նկատմամբ կիրառված խափանման միջոցի հարցին, Վերաքննիչ դատարանը գտնում է, որ այն հիմնավոր է և պետք է թողնել անփոփոխ:
Ելնելով վերոգրյալներից և ղեկավարվելով ՀՀ քրեական դատավարության օրենսգրքի 393-394-րդ հոդվածներով, Վերաքննիչ դատարանը

Ո Ր Ո Շ Ե Ց

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2014 թվականի ապրիլի 18-ի դատավճիռը քրեական գործով ըստ մեղադրանքի` Հրաչյա Օգսենի Սարգսյանի` ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով 2 (երկու) դրվագներով, թողնել օրինական ուժի մեջ, իսկ ամբաստանյալ Հրաչյա Սարգսյանի շահերի պաշտպան Ռ.Բալաբանյանի վերաքննիչ բողոքը` մերժել:
Ամբաստանյալ Հրաչյա Սարգսյանի նկատմամբ կիրառված խափանման միջոցը` կալանավորումը թողնել անփոփոխ` մինչև սույն որոշման օրինական ուժի մեջ մտնելը:
Որոշումը կարող է բողոքարկվել ՀՀ Վճռաբեկ դատարան՝ այն հրապարակելու պահից մեկամսյա ժամկետում։

ՆԱԽԱԳԱՀՈՂ ԴԱՏԱՎՈՐ՝ ստորագրություն
ԴԱՏԱՎՈՐՆԵՐ՝ ստորագրություններ
Իսկականի հետ ճիշտ է՝

ՆԱԽԱԳԱՀՈՂ ԴԱՏԱՎՈՐ՝ Ա.ԽԱՉԱՏՐՅԱՆ














ՆԱԽԱԳԱՀՈՂ ԴԱՏԱՎՈՐ` Ա.ԽԱՉԱՏՐՅԱՆ

ԴԱՏԱՎՈՐՆԵՐ` Ա.ԴԱՆԻԵԼՅԱՆ

Ե.ԴԱՐԲԻՆՅԱՆ