ԵԿԴ/0182/01/13







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«22» հոկտեմբերի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր
դատական նիստերի քարտուղար
մեղադրող տուժող
պաշտպան

Մ.Պապոյան
Կ.Կարապետյան
Ա.Գևորգյան Թ.Մանուչարյան
Հ.Դավթյան
դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Ալեքսանդր Ալբերտի Հովհաննիսյանի` ծնված 1955 թվականի ապրիլի 28-ին Լեռնային Ղարաբաղում, ազգությամբ հայ, ՀՀ քաղաքացի, ըստ իր հայտարարության բարձրագույն կրթությամբ, ամուսնացած, չի աշխատում, նախկինում չդատապարտված, բնակվում է Կոտայքի մարզի Քասախ համայնքի 17-րդ շենքի 51-րդ բնակարանում, մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, արգելանքի տակ է 2013 թվականի օգոստոսի 6-ից:
1. Գործի դատավարական նախապատմությունը.
2013 թվականի հունիսի 21-ին ՀՀ ոստիկանության Կենտրոնականի քննչական բաժնի քննիչ Հ.Բաղմանյանի որոշմամբ ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 15124413 քրեական գործը:
2013 թվականի հունիսի 31-ին ՀՀ ոստիկանության Կենտրոնականի քննչական բաժնի քննիչ Հ.Բաղմանյանի որոշմամբ թիվ 15124413 քրեական գործով Ալեքսանդր Ալբերտի Հովհաննիսյանը ՀՀ քրեական օրենսգրքի 178-րդ հոդվածի 2-րդ մասի 2-րդ կետով ներգրավվել է որպես մեղադրյալ:
2013 թվականի օգոստոսի 3-ին ՀՀ ոստիկանության Կենտրոնականի քննչական բաժնի քննիչ Վ.Ասատրյանի որոշմամբ թիվ 15124413 քրեական գործն ընդունվել է վարույթ:

2013 թվականի սեպտեմբերի 20-ին Ալեքսանդր Ալբերտի Հովհաննիսյանի վերաբերյալ թիվ 15124413 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0182/01/13 համարը:
Ալեքսանդր Ալբերտի Հովհաննիսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, այն արարքի համար, որ նա 2012 թվականի մայիս-հունիս ամիսների ընթացքում չարաշահելով Թերեզա Մուշեղյանի վստահությունը խարդախությամբ հափշտակել է վերջինին պատկանող խոշոր չափի` 900.000 ՀՀ դրամ գումարը: Այսպես.
Ալեքսանդր Հովհաննիսյանը 2012 թվականի մայիս ամսին Երևան քաղաքի «Սուրբ Աստվածածին» բժշկական կենտրոնում ծանոթացել է Թերեզա Մանուչարյանի հետ, ներկայացել որպես բարձրաստիճան պաշտոնյա և տեղեկանալով, որ վերջինի որդին` Գևորգ Ստեփանյանը, աշխատանք է փնտրում, նպատակադրվել է` հիշյալ պատրվակն օգտագործելով, խարդախությամբ հափշտակել Թերեզա Մանուչարյանի գումարները: Ալեքսանդր Հովհաննիսյանը հանցավոր մտադրությունն իրականացնելու համար` խաբեությամբ գույքի հափշտակություն կատարելու դիտավորությամբ, Գևորգ Ստեփանյանին և նրա մորը` Թերեզա Մանուչարյանին հավաստիացրել է, թե Գևորգ Ստեփանյանին, մոտ ապագայում ստեղծվելիք «ՀՀ Նախագահին կից կազմակերպված հանցագործության, ահաբեկչության և կաշառակերության դեմ պայքարի միջազգային կոմիտե հայկական բյուրո» կառույցում աշխատանքի տեղավորելու համար անհրաժեշտ է, որպեսզի վերջինը ՌԴ Մոսկվա քաղաքում վերապատրաստման դասընթացներ անցնի, ապա նշված դասընթացներն անցնելու համար 2012 թվականի հունիս ամսին Երևան քաղաքի օպերային թատրոնի շենքի հարակից սրճարաններից մեկում Թերեզա Մանուչարյանից ստացել և խարդախությամբ հափշտակել է վերջինին պատկանող խոշոր չափերի` 900.000 ՀՀ դրամ գումարը:
2. Արագացված դատական քննություն.
Մինչ դատաքննությունն սկսելն ամբաստանյալ Ալեքսանդր Ալբերտի Հովհաննիսյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննությունն անցկացնելու հետևանքները, առաջադրված մեղադրանքներն իրեն պարզ են, համաձայն է մեղադրանքների հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Ալեքսանդր Ալբերտի Հովհաննիսյանը կատարել է արարք` նախատեսված ՀՀ քրեական օրենսգրքի 178-րդ հոդվածի 2-րդ մասի 2-րդ կետով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ՀՀ ոստիկանության ինֆորմացիոն կենտրոնի պահանջագիրը, բնութագիրը և թիվ 130918014491006 անդորրագիրը, եկավ հետևյալ եզրահանգման.
Ալեքսանդր Հովհաննիսյանի անձը դրականորեն բնութագրող հանգամանքներ են ամուսնացած լինելը և կատարածի համար զղջալը:
Ալեքսանդր Հովհաննիսյանի պատասխանատվությունն ու պատիժը մեղմացնող հանգամանք է տուժողին պատճառված վնասը` 900.000 ՀՀ դրամը կամովին փոխհատուցելը:
Դատարանը գտնում է, որ Ալեքսանդր Հովհաննիսյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Ալեքսանդր Հովհաննիսյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Ալեքսանդր Հովհաննիսյանը ենթակա է քրեական պատասխանատվության և պատժի:
Դատարանը, հաշվի առնելով Ալեքսանդր Հովհաննիսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Ալեքսանդր Հովհաննիսյանի կատարած արարքի համար ՀՀ քրեական օրենսգրքի 178-րդ հոդվածի 2-րդ մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկում` 2 (երկու) տարի ժամկետով:
«Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013 թվականի հոկտեմբերի 3-ի թիվ ԱԺՈ-080-Ն որոշման (այսուհետ նաև` Համաներման որոշում) 1-ին կետի 3-րդ ենթակետի համաձայն` պատժից պետք է ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի, այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 178-րդ հոդվածի 2-րդ մասը, այսինքն` ՀՀ քրեական օրենսգրքի 178-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման մեջ նշված այն սահմանափակումները, որոնք կարող են արգելք հանդիսանալ Ալեքսանդր Հովհաննիսյանի նկատմամբ Համաներման որոշման կիրառման համար:
Դատարանը, հիմք ընդունելով վերը նշվածը գտնում է, որ Համաներման որոշման կիրառմամբ ամբաստանյալ Ալեքսանդր Հովհաննիսյանին պետք է ազատել նշանակված պատժից:
ՀՀ քրեական դատավարության օրենսգրքի 151-րդ հոդվածի 2-րդ մասի համաձայն` խափանման միջոցը վերացվում է, երբ վերանում է դրա անհրաժեշտությունը:
Դատարանը, նկատի ունենալով, որ վերը նշված հիմնավորմամբ Ալեքսանդր Հովհաննիսյանին պետք է ազատել նշանակված պատժից, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի Ալեքսանդր Հովհաննիսյանի նկատմամբ ընտրված խափանման միջոցը` կալանավորումը, պետք է վերացնել:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2013 թվականի օգոստոսի 16-ի որոշմամբ իրեղեն ապացույց ճանաչված` «ՀՀ ԻԿՈԿՐԻՄ Հայկական բյուրոյի գործավարության կարգը հաստատելու մասին» ՀՀ Նախագահին կից կազմակերպված հանցագործության, ահաբեկչության և կաշառակերության դեմ պայքարի միջազգային կոմիտե հայկական բյուրոյի տնօրենի հրամանը, կադրերի հաշվառման անձնական թերթիկը և Գևորգ Ստեփանյանի լուսանկարը պետք է պահել քրեական գործի հետ միասին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Ալեքսանդր Հովհաննիսյանից դատարանի նախաձեռնությամբ ենթակա չեն բռնագանձման, քանի որ տուժող Թերեզա Մանուչարյանին պատճառված վնասն ամբողջությամբ վերականգնվել է: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Ալեքսանդր Ալբերտի Հովհաննիսյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ կետով և պատիժ նշանակել ազատազրկում` 2 (երկու) տարի ժամկետով:
«Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013 թվականի հոկտեմբերի 3-ի թիվ ԱԺՈ-080-Ն որոշման 1-ին կետի 3-րդ ենթակետի կիրառմամբ Ալեքսանդր Ալբերտի Հովհաննիսյանին պատժից ազատել:
Ալեքսանդր Ալբերտի Հովհաննիսյանի նկատմամբ ընտրված խափանման միջոցը` կալանավորումը, վերացնել և նրան անհապաղ ազատել կալանքից:
Դատավճիռն օրինական ուժի մեջ մտնելուց հետո` 2013 թվականի օգոստոսի 16-ի որոշմամբ իրեղեն ապացույց ճանաչված` «ՀՀ ԻԿՈԿՐԻՄ Հայկական բյուրոյի գործավարության կարգը հաստատելու մասին» ՀՀ Նախագահին կից կազմակերպված հանցագործության, ահաբեկչության և կաշառակերության դեմ պայքարի միջազգային կոմիտե հայկական բյուրոյի տնօրենի հրամանը, կադրերի հաշվառման անձնական թերթիկը և Գևորգ Ստեփանյանի լուսանկարը պետք է պահել քրեական գործի հետ միասին:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ