Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

16 դեկտեմբերի 2013թ. ք. Երևան

ԵԿԴ-0180/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրողներ Ա. Գալստյանի,
Շ. Իսրայելյանի,

պաշտպան Լ. Ավետիսյանի,

ամբաստանյալի օրինական
ներկայացուցիչ Ի. Դանիելյանի,

տուժող Տ. Դավթյանի,



դատարանում, դռնբաց դատական նիստում քննեց գործն ըստ մեղադրանքի
Արմեն Էդուարդի Պողոսյանի`
ծնված 1996թ. հուլիսի 23-ին Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուրի, խնամքին ոչ ոք, չի աշխատում, նախկինում չդատված, բնութագրվում է դրական, հաշվառված է և բնակվում է ք. Երևան, Սարյան փողոցի թիվ 40 շենքի թիվ 42 բնակարանում, կալանքի տակ չէ, մեղադրվում է ՀՀ քրեական օրենսգրքի 112-րդ հոդվածի 1-ին մասով։


Գործի դատավարական նախապատմությունը
Թիվ 13124213 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. մարտի 03-ին, ՀՀ քրեական օրենսգրքի 112-րդ հոդվածի 1-ին մասով և 113-րդ հոդվածի 1-ին մասով։
Քննիչի 10.09.2013թ. որոշմամբ`
- Ա. Պողոսյանի կողմից Ա. Այվազյանի ծնոտին մեկ անգամ հարվածելու դրվագով քրեական հետապնդում չի իրականացվել` հանցագործության դեպքի բացակայության պատճառաբանությամբ,
- Ա. Պողոսյանի, Է. Պողոսյանի, Օ. Հակոբյանի կողմից Է. Դավթյանի և Տ. Դավթյանի մարմնի տարբեր մասերին ոտքերով և ձեռքերով բազմաթիվ հարվածներ հասցնելու, այդ կերպ նրանց ծեծի ենթարկելու դրվագով քրեական հետապնդում չի իրականացվել` դիմողներ Է. Դավթյանի և Տ. Դավթյանի բողոքների բացակայության պատճառաբանությամբ,
- Տ. Դավթյանի և Է. Դավթյանի կողմից Ա. Պողոսյանի, Է. Պողոսյանի և Օ. Հակոբյանի մարմնի տարբեր մասերին ոտքերով և ձեռքերով բազմաթիվ հարվածներ հասցնելու, այդ կերպ նրանց ծեծի ենթարկելու դրվագով քրեական հետապնդում չի իրականացվել` դիմողներ Ա. Պողոսյանի, Է. Պողոսյանի և Օ. Հակոբյանի բողոքների բացակայության պատճառաբանությամբ,
- Տ. Դավթյանի կողմից Ա. Պողոսյանի քթին հարվածելու և նրա առողջությանը թեթև վնաս պատճառելու դրվագով քրեական հետապնդում չի իրականացվել` դիմող Ա. Պողոսյանի բողոքի բացակայության պատճառաբանությամբ,
- վիճաբանության մասնակիցներ Ա. Պողոսյանի, Է. Պողոսյանի, Օ. Հակոբյանի, Տ. Դավթյանի և Է. Դավթյանի նկատմամբ, ՀՀ քրեական օրենսգրքի 258-րդ հոդվածով քրեական հետապնդում չի իրականացվել` հանցակազմի բացակայության պատճառաբանությամբ։
Քննիչի նույն օրվա մեկ այլ որոշմամբ, Ա. Պողոսյանի կողմից Է. Դավթյանի մարմնի տարբեր մասերին դանակով հարվածներ հասցնելու և նրա առողջությանը թեթև վնաս պատճառելու դրվագով Ա. Պողոսյանի նկատմամբ քրեական հետապնդումը դադարեցվել է` մեղադրյալ Ա. Պողոսյանի հետ տուժող Է. Դավթյանի հաշտվելու պատճառաբանությամբ։
Անչափահաս ամբաստանյալ Արմեն Էդուարդի Պողոսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 116-րդ հոդվածի 2-րդ մասով հետևյալ արարքի համար. «որ նա 2013թ. մարտի 03-ին« ժամը 04։35-ի սահմանն»րում« Երևան քաղաքի Հանրապ»տության փողոցի 62 շենքի հարևանությամբ՝ Վարդանանց փողոցի և Վարդանանց անցուղու խաչմերուկում գործող« «Վիլ» անվանումը կրող կրպակի դիմաց վիճաբանության ժամանակ անհրաժեշտ պաշտպանության սահմանազանցմամբ դանակով հարվածել է Տ.Դավթյանի պարանոցի ձախ կեսի առաջային մակերեսին և նրա առողջությանը դիտավորությամբ պատճառել ծանր վնաս։
Այսպես. 2013թ. մարտի 03-ին« ժամը 04։35-ի սահմաններում Ա.Պողոսյանը հոր` Է.Պողոսյանի և ընկերոջ՝ Օ.Հակոբյանի հետ մոտեցել են Երևան քաղաքի Հանրապետության փողոցի 62 շենքի հարևանությամբ՝ Վարդանանց փողոցի և Վարդանանց անցուղու խաչմ»րուկում գործող« «Վիլ» անվանումը կրող կրպակին՝ գնումներ կատարելու։ Մինչ սպացել են« որպեսզի կրպակի վաճառողուհի Ա.Այվազյանը բացի մուտքի կողպված դուռը« վերջիններիս են մոտեցել Տ.Դավթյանն ու Է.Դավթյանը« ովքեր բարձրաձայն անհասցե սադրիչ արտահայտություններ են հնչեցրել։ Հասկանալով« որ լարված իրավիճակ է ստեղծվում« միաժամանակ անախորժություններից զերծ մնալու նպատակով՝ Է.Պողոսյանը դիմել է Տ.Դավթյանին և Է.Դավթյանին՝ կրպակից ինչ որ բան հյուրասիրելու առաջարկությամբ։ Ցավագին ընդունելով Է.Պողոսյանի նման առաջարկը՝ Տ.Դավթյանն ու Է.Դավթյանը« արհամարական ոճով պատասխանել են« որ իրենք վերջինիս ինչ որ բան կհյուրասիրեն։ Նույն ժամանակ կրպակի վաճառողուհի Ա.Այվազյանը բացել է մուտքի դուռը« ապա ներկաները՝ Ա.Պողսյանը« Է.Պողոսյանը« Օ.Հակոբյանը« Տ.Դավթյանը և Է.Դավթյանը« մուտք են գործել կրպակ« որտեղ Տ.Դավթյանն ու Է.Դավթյանը շարունակել են պարզաբանումներ պահանջել Է.Պողոսյանից իրենց հյուրասիրելու առաջարկություն անելու կապակցությամբ« ինչը տեսնելով՝ Ա.Պողոսյանը միջամտել է« ապա փորձել հանգստացնել Տ.Դավթյանին ու Է.Դավթյանին։ Է.Դավթյանը« օգտվելով Ա.Պողոսյանի դեռահաս լինելու հանգամանքից« երկու ձեռքերով բռնել է վերջինիս կրծքավանդակի շրջանից« ապա պահանջել այլևս չմիջամտել իրենց խոսակցությանը։ Է.Դավթյանի նման վարքագծի պատճառով Ա.Պողոսյանը« Օ.Հակոբյանը« Տ.Դավթյանը և Է.Դավթյանը սկսել են միմյանց քաշքշել« ապա դուրս են եկել կրպակից և շարունակել միմյանց քաշքշել կրպակի դիմացի հատվածում։ Իր հերթին Է.Պողոսյանը միջամտել և փորձել է բաժանել տղաներին« ինչը վերջինիս հաջողվել« սակայն վայրկյաններ անց Տ.Դավթյանը անակնկալ բռունցքով հարվածել է Ա.Պողոսյանի քթին« ինչի հետևանքով վերջինս կորցրել է հավասարակշռությունն ու վայր ընկել։ Նույն ժամանակ Է.Պողոսյանը« Օ.Հակոբյանը« Տ.Դավթյանն ու Է.Դավթյանը սկսկել են փոխադարձաբար միմյանց ոտքերով ու ձեռքերով հարվածներ հասցնել« ինչին քիչ անց միացել է նաև Ա.Պողոսյանը և իր հերթին նույն եղանակով հարվածներ է հասցրել իրենց հետ վիճաբանողներին։ Ունենալով շնչառական խնդիրներ՝ ծեծկռտուքի ընթացքում Օ.Հակոբյանը մի կողմ է քաշվել և այլևս չի միջամտել հիշյալ վիճաբանությանը։ Իր հերթին Ա.Պողոսյանը բաժանվելով վիճաբանողներից շտապել է կրպակ« Ա.Այվազյանից ջուր է խնդրել« ապա դուրս վազել։ Այնուհետև դուրս գալով կրպակից՝ Ա.Պողոսյանը նկատել է« թե ինչպես է հայրը վայր ընկնում Տ.Դավթյանի հարվածից« և այն որ վերջիններս շարունակում են հարձակվել միայնակ հոր վրա« ուստի նույն պահին վերադարձել է կրպակ« կրպակում գտնվող մսամթերքի սառնարանի վրայից վերցրել է խոհանոցային դանակը« ապա դուրս է վազել հորը՝ Է.Պողոսյանին« օգնության։ Նույն պահին տեսնելով« որ Տ.Դավթյանն ու Է.Դավթյանը դեռևս շարունակում են ոտնձգությունը հոր՝ Է.Պողոսյանի նկատմամբ« այն որ հայրը գտնվում է գետնին ընկած վիճակում« իսկ վերջիններս ոտքերով ու ձեռքերով հարվածներ են հասցնում նրան« վազելով մոտեցել է Տ.Դավթյանին« ապա թույլ տալով անհրաժեշտ պաշտպանության սահմանազանցում՝ հորը ծեծի ենթարկող անձի՝ Տ.Դավթյանի նկատմամբ ընտրելով ոտնձգության բնույթին ու վտանգավորությանը չհամապատասխանող պաշտպանության միջոց« իր մոտ եղած դանակով հարվածել է վերջինիս պարանոցի ձախ կեսի առաջային մակերեսին ու անհրաժեշտ պաշտպանության սահմանազանցմամբ նրա առողջությանը դիտավորությամբ պատճառել ծանր վնաս՝ կերակրափողի միջանցիկ թափանցող վնասվածքի ձևով։»։
19.09.2013թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։
Քրեական գործի դատական քննության ընթացքում մեղադրող Շ. Իսրայելյանը խստացման առումով փոփոխել է անչափահաս ամբաստանյալ Արմեն Էդուարդի Պողոսյանին նախաքննության ընթացքում առաջադրված մեղադրանքը և նոր մեղադրանք է առաջադրել ՀՀ քրեական օրենսգրքի 112-րդ հոդվածի 1-ին մասով, հիմնավորված համարելով` «որ նա 2013 թվականի մարտի 03-ին` ժամը 04։35-ից 04.40-նն ընկած ժամանակահատվածում« Երևանի Հանրապետության փողոցի 62-րդ շենքի հարևանությամբ՝ Վարդանանց փողոցի և Վարդանանց անցուղու խաչմերուկում գործող« «Վիլ» կրպակի դիմաց տեղի ունեցած փոխադարձ կռվի ընթացքում նշված կրպակից վերցրած դանակով հարվածել է Տ.Դավթյանի պարանոցի ձախ կեսի առաջնային մակերեսին` վերջինիս առողջությանը կերակրափողի միջանցիկ վիրավորումով ծակած-կտրած թափանցող վերքի ձևով դիտավորությամբ պատճառելով ծանր վնաս` կյանքին վտանգ սպառնացող։»։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Անչափահաս ամբաստանյալ Արմեն Պողոսյանն իր հայր, վկա Էդուարդ Պողոսյանի և իր ընկեր` վկա Օնիկ Հակոբյանի հետ միասին, 2013թ. մարտի 03-ին« ժամը 01։00-ի սահմաններում գնացել են Երևան քաղաքի Վարդանանց փողոցի թիվ 13 հասցեում գործող «Քրեյզի» գիշերային ակումբ` ժամանակ անցկացնելու։ Նույն օրը, ժամը 04։35-ի սահմաններում դուրս գալով ակումբից` նրանք մոտեցել են Երևան քաղաքի Հանրապետության փողոցի թիվ 62 շենքի հարևանությամբ` Վարդանանց փողոցի և Վարդանանց անցուղու խաչմերուկում գործող, «Վիլ» անվանումով կրպակին՝ Է.Պողոսյանի համար ծխախոտ գնելու նպատակով։ Տեսնելով, որ կրպակի դուռը կողպված է` թակել են այն։ Քիչ անց նրանց են մոտեցել տուժող Տիգրան Դավթյանը և նրա ազգական Էդուարդ Դավթյանը, որոնք գտնվել են հարբած վիճակում։ Նրանց միջև, Արմեն, Էդուարդ Պողոսյանների, Օնիկ Հակոբյանի` մի կողմից և Դավիթ, Էդուարդ Դավթյանների` մյուս կողմից, վիճաբանություն է սկսվել։ Այդ ընթացքում, կրպակի վաճառողուհի, վկա Ամալիյա Այվազյանը բացել է դուռը։ Վիճաբանողները մտել են կրպակ, այնտեղ շարունակել են վիճաբանությունը և հարվածել միմյանց։ Այնուհետև քաշքշելով միմյանց` նրանք դուրս են եկել կրպակից և դիմացի հատվածում շարունակել են փոխադարձ հարվածներ հասցնել միմյանց։
Այդ վիճաբանության և կռվի ընթացքում ամբաստանյալ Արմեն Պողոսյանը սկզբում փորձել է կրպակում գտնվող, ավտոմեքենայի կանգառն արգելող մետաղյա ցուցանակով հարվածել իր հետ կռվող Դավթյաններին, սակայն վկա Ամալիյա Այվազյանը նրա ձեռքից վերցրել է այն։ Կրպակի դիմաց միմյանց հարվածելը երբեմն ընդատվել է, ապա նորից վերսկսվել։ Հերթական անգամ վերսկսվելուց հետո, տեսնելով, որ միմյանց փոխադարձ հարվածներ են հասցնում Տիգրան և Էդուարդ Դավթյանները` մի կողմից և Էդուարդ Պողոսյանը` մյուս կողմից, ամբաստանյալ Արմեն Պողոսյանը մտել է կրպակ, այնտեղ գտնվող մսամթերքի սառնարանի վրայից վերցրել է խոհանոցային դանակը և դուրս գալով կրպակից, առանց հաշվի առնելու, որ միմյանց հարվածներ հասցնելն այդ պահին արդեն դադարել է` դանակով մեկ անգամ հարվածել է տուժող Տիգրան Դավթյանի պարանոցի ձախ կեսի առաջնային մակերեսին` վերջինիս առողջությանը կերակրափողի միջանցիկ վիրավորումով ծակած-կտրած վերքի ձևով դիտավորությամբ պատճառելով ծանր վնաս` կյանքին վտանգ սպառնացող։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ անչափահաս Արմեն Էդուարդի Պողոսյանը ծնվել է 1996թ. հուլիսի 23-ին Երևան քաղաքում, բնակվում է Երևանում, ծնողների հետ միասին։ Նրա դաստիարակութ¬յամբ և խնամքով զբաղվում են մայրը` Իզաբելլա Դանիելյանը և հայրը` Էդուարդ Պողոսյանը։ Նրանց ընտանիքը բավարար չափով նյութապես ապահովված է, Ա. Պողոսյանի կյանքի և դաստիարակության պայմանները բարվոք են, հոգեկան զարգացման աստիճանը և ընդհանուր զարգացման վիճակը` բավարար, ֆիզիկապես առողջ է, նախկինում դատված չի եղել, բնութագրվում է դրական, իրեն վերագրվող արարքը կատարել է` լինելով անչափահաս, տասնվեց տարեկան հասակում, մեղայականով ներկայացել է նախաքննության մարմնին, տուժողի հետ հաշտվել են։
Քրեական գործի նախաքննության ընթացքում, «Հայաստանի Հանրապետության փորձաքննությունների ազգային բյուրո» պետական ոչ առևտրային կազմակերպությունում կատարվել են դատահոգեբանական և տեսաձայնագրառման փորձաքննություններ, որոնց ընդհանուր արժեքը կազմել է 125.034 /հարյուր քսանհինգ հազար երեսունչորս/ ՀՀ դրամ գումար։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Տիգրան Արայի Դավթյանի ցուցմունքներով այն մասին« որ 2013թ. մարտի 03-ին« ժամը 04։30-ի սահմաններում, Էդուարդ Դավթյանի հետ մոտեցել է Երևան քաղաքի Հանրապետության փողոցի թիվ 62 շենքի հարևանությամբ գործող «Վիլ» կրպակին՝ գնումներ կատարելու համար։ Նույն վայրում կանգնած են եղել նաև մինչ այդ իրեն անծանոթ Արմեն Պողոսյանը« Էդուարդ Պողոսյանը և Օնիկ Հակոբյանը։ Մինչ սպասել են« որպեսզի կրպակի վաճառողուհին բացի կողպված դուռը` Ա. Պողոսյանի« Է. Պողոսյանի« Օ. Հակոբյանի և իրենց միջև խոսակցություն է սկսվել« որից հետո մուտք գործելով կրպակ` սկսել են քաշքշել միմյանց։
Միջադեպի հետագա զարգացման մանրամասները չի մտաբերում։ Միայն հիշում է« որ իրենց հետ վիճաբանողներից երկուսը բռնել են երրորդ անձնավորության ձեռքը« որից անմիջապես հետո զգացել է« որ շնչահեղձ է լինում։
Իրեն ներկայացված, BK_CH12_20130303_010000 անվամբ տեսագրությունում, 02։40։31 վայրկային երևացող, սև բաճկոնով բարձրահասակ անձն ինքն է, որտեղ երևում է, թե ինչպես է բռունցքով հարվածում վիճաբանության մասնակիցներից մեկին և ենթադրում է, որ նա Էդուարդ Պողոսյանն է։ Այդ պահին իր կողքին կանգնած անձն իր հորեղբոր որդի Էդուարդ Դավթյանն է։ Վիճաբանության ժամանակ փոխադարձ հարվածներ միմյանց հասցրել են հինգ հոգով, որոնցից երկուսը` ինքն ու Էդուարդ Դավթյանն են, իսկ մյուս երեքին չի կարող անհատականացնել։ Տեսագրությունում երևացող, 02։40։49 վայրկյանին վիճաբանության մասնակցի կողմից հարված ստանալուց վայր ընկնողն Էդուարդ Դավթյանն է։
Իր նկատմամբ նախաքննության ընթացքում որևէ բռնություն չի գործադրվել, սակայն իր հետ վիճաբանող անձի` որպես «Գեբելս Էդո» ներկայանալու հանգամանքը գրել է քննիչի ուղղորդմամբ, քանի որ նման բան չի հիշել։
Ամբաստանյալի նկատմամբ բողոք և նյութական որևէ պահանջ չունի, հաշտվել են, խնդրում է նրա նկատմամբ մեղմ վերաբերվել։
/դատական նիստի արձանագրություն, հատոր 1, գ.թ. 63« 80-81« 198, հատոր 2, գ.թ. 47-48« 49-50, 160/
Վկա Ամալիյա Մկրտչի Այվազյանի ցուցմունքներով այն մասին« որ 2013թ. մարտի 03-ին« ժամը 04։30-ի սահմաններում գտնվել է աշխատանքի վայրում՝ Երևան քաղաքի Հանրապետության փողոցի թիվ 62 շենքի հարևանությամբ գործող «Վիլ» կրպակում։ Լսել է մուտքի դռան թակոց« ապա մոտեցել է դռանը« որպեսզի բացի այն։ Դռան դիմաց նկատել է հինգ անծանոթ անձանց։ Մտածելով« որ նրանք հաճախորդներ են՝ բացել է կրպակի կողպված դուռը։ Այդ անձինք մուտք ենք գործել կրպակ« որից հետո վիճաբանել և քաշքշել են միմյանց։ Նրանցից երկուսն անընդհատ ասել են, որ իրենք խմած են և խնդրել են մյուս երեք անձանց, որ վերջ տան և առավել չխորացնեն, չսրեն ստեղծված իրավիճակը։ Ինքը պահանջել է նրանցից դուրս գալ կրպակից և դիտողություն է արել` ասելով, որ կրպակը հարցեր պարզաբանելու վայր չէ։ Դրանից հետո վիճաբանողները գնացել են կրպակի ձախակողմյան հատված, որտեղ ոտքերով և ձեռքերով փոխադարձ հարվածներ են հասցրել միմյանց։ Տեսել է, որ վիճաբանողներից մեկը մոտեցել է կրպակի սառնարանների մոտ դրված, ավտոմեքենայի կայանումը արգելող մետաղական նշանին և վերցրել է այն։ Հասկանալով, որ նա ցանկանում է դրանով հարվածել վիճաբանողներից որևէ մեկին` անմիջապես վերցրել է նրա ձեռքից և դրել է նույն վայրում։ Այնուհետև վիճաբանողներից մեկը մտել է կրպակ և ջուր է խնդրել։ Ինքը նրա խնդրանքը կատարել և շշով ջուր է տվել նրան։ Դրանից հետո մոտեցել է դռանը, որպեսզի կողպի այն։ Այդ ժամանակ նույն անձը, որին շշով ջուր էր տվել, մտել է կրպակ, բռունցքով հարվածել է իր ծնոտի ձախ կեսին, որի հետևանքով ինքը վայր է ընկել։ Այդ հարվածից հետո չի տեսել, թե նշված անձը կրպակում ինչ գործողություններ է կատարել։ Միայն տեսել է, որ դրանից հետո կրպակ է մտել վիճաբանողներից մեկը և իրեն հարվածող անձը նրան հանձնարարել է թույլ չտալ, որպեսզի ինքը ոտքի կանգնի։ Այդ պահին ինքը նստած է եղել գետնին, իսկ հանձնարարություն ստացած անձը ձեռքով սեղմել է իր աջ ուսի շրջանը` այդ կերպ հասկացնելով, որ ոտքի չկանգնի։ Դրանից հետո այդ երկու անձինք շտապ դուրս են վազել կրպակից։ Չի տեսել, թե նշված անձանցից որևէ մեկը կրպակից որևէ իր կամ առարկա վերցրել է, թե ոչ։
Մինչև միջադեպը կրպակում եղել են երեք դանակներ, որոնցից երկուսը` փայտե բռնակով, իսկ երրորդը` պլաստմասե բռնակով։ Դրանք օգտագործվել են սննդամթերքը կտրատելու նպատակով։ Դեպքի հաջորդ օրը պարզել է, որ պլաստմասե բռնակով դանակը բացակայում է։ Հասկացել է, որ վիճաբանողներից մեկը վերցրել է այն։ Կարծում է, որ դանակը վերցնողը եղել է իրեն հարվածող անձը։
/դատական նիստի արձանագրություն, հատոր 1, գ.թ. 29-31« 92-94/
Վկա Էդուարդ Արմենի Պողոսյանի ցուցմունքներով այն մասին« որ 2013թ. մարտի 03-ին« ժամը 01։00-ի սահմաններում, իր որդի Արմեն Պողոսյանի և վերջինիս ընկեր Օնիկ Հակոբյանի հետ միասին գնացել են Երևան քաղաքի Վարդանանց փողոցի թիվ 13 հասցեում գործող «Քրեյզի» գիշերային ակումբ` ժամանակ անցկացնելու։ Նույն օրը, ժամը 04։35-ի սահմաններում, դուրս գալով ակումբից` մոտեցել են Երևան քաղաքի Հանրապետության փողոցի թիվ 62 շենքի հարևանությամբ` Վարդանանց փողոցի և Վարդանանց անցուղու խաչմերուկում գործող «Վիլ» կրպակին՝ իր համար ծխախոտ գնելու նպատակով։ Մինչև սպասել են« որպեսզի կրպակի վաճառողուհին բացի մուտքի կողպված դուռը` կրպակին են մոտեցել մինչ այդ իրենց անծանոթ Տիգրան և Էդուարդ Դավթյանները« որոնք բարձրաձայն անհասցե արտահայտություններ են հնչեցրել։ Հասկանալով« որ լարված իրավիճակ է ստեղծվում՝ դիմել է տղաներին՝ կրպակից ինչ-որ բան հյուրասիրելու առաջարկությամբ։ Ցավագին ընդունելով իր առաջարկը՝ Տ.Դավթյանը և Է.Դավթյանը արհամարհական տոնով պատասխանել են« որ նրանք ինչ-որ բան կհյուրասիրեն։ Այդ ժամանակ կրպակի վաճառողուհին բացել է մուտքի դուռը« որից հետո բոլորը միասին մուտք են գործել կրպակ։ Այնտեղ Տ.Դավթյանն ու Է.Դավթյանը շարունակել են պարզաբանումներ պահանջել` իրենց հյուրասիրելու առաջարկություն անելու կապակցությամբ։
Այնուհետև կրպակում Ա. Պողոսյանը« Օ. Հակոբյանը« Տ. Դավթյանը և Է. Դավթյանը սկսել են քաշքշել միմյանց« որից հետո դուրս են եկել կրպակից։ Տեղում միջամտել և բաժանել է տղաներին« սակայն վայրկյաններ անց Տ. Դավթյանն անսպասելիորեն բռունցքով հարվածել է իր որդի Ա. Պողոսյանի քթին« ինչի հետևանքով ինքը« Օ. Հակոբյանը« Տ. Դավթյանը և Է. Դավթյանը սկսել են ոտքերով և ձեռքերով խառը հարվածներ հասցնել միմյանց։ Նույն ծեծկռտուքի ընթացքում Տ. Դավթյանը բռունցքով ուժգին հարվածել է իր դեմքին« որի հետևանքով կորցրել է հավասարակշռությունն ու վայր ընկել։ Դրանից հետո« երբ ուշքի է եկել` Ա. Պողոսյանի աջ ձեռքում նկատել է արյունոտված դանակ։ Հասկացել է« որ իրենց հետ վիճաբանողներից մեկին որդին դանակով մարմնական վնասվածք է պատճառել։ Այնուհետև նա դանակը հանձնել է իրեն« որն ինքը թաքցրել է Վ.Մամիկոնյանի արձանի աջակողմյան հողածածկ հատվածում։ Օրեր անց որդու հետ միասին գնացել է նշված վայր« հողից հանել է դանակը՝ իրավապահ մարմիններին ներկայացնելու նպատակով։
Իրեն ներկայացված, BK_CH12_20130303 անվամբ տեսագրությունում երևացող, 02։40։31 վայրկյանին վիճաբանության ժամանակ երիտասարդի հարվածից վայր ընկնող տղամարդն ինքն է։ Տեսագրությունում երևացող, 02։40։30 վայրկյանին իրեն հարվածող, ստիպակ տաբատով երիտասարդը Տիգրան Դավթյանն է, իսկ նրա կողքին կանգնած, մուգ հագուստներով երիտասարդը` Էդուարդ Դավթյանն է։ 02։40։03 վայրկայնին կրպակ մուտք գործող և 02։40։33-ին կրպակից դուրս եկող, որից հետո 02։40։36-ին կրկին կրպակ մուտք գործողն իր որդի Արմեն Պողոսյանն է։ Ինչպես երևում է տեսագրությունում, 02։40։46-ին Ա. Պողոսյանը դուրս է գալիս կրպակից և դանակը ձեռքին հարվածներ է հասցնում այդ պահին կրպակի հարևանությամբ կայանված, սպիտակ ավտոմեքենայի առջևի ձախակողմյան հատվածում իր առջև գտնվող այդ երկու տղաներից մեկին։ Երբ 02։40։46-ին Ա. Պողոսյանը դուրս է գալիս կրպակից` այդ պահին նրա հետ դուրս է գալիս նաև Օնիկը, որը հետագայում փորձում է բռնել Ա. Պողոսյանին և թույլ չտալ շարունակել։ 02։42։12 վայրկյանից սկսած դեպի տեսանկարահանող սարքը քայլող երեք անձանցից առաջինն Օնիկն է, վերջինն ինքն է, իսկ իրենից մի փոքր առաջ դանակը ձեռքին և դեպի ձախ քայլողն Արմեն Պողոսյանն է։ 02։42։18 վայրկյանին ինքն Արմենի ձեռքից վերցրել է դանակը։
Չի կարող պատճառաբանել, թե ինչու է հարվածները դադարելուց հետո ինքը հարվածել սպիտակ տաբատով անձին, որից հետո նրանից հարված է ստացել և վայր ընկել։ Հավանաբար ինքը հարվածել է, քանի որ վիրավորված է եղել` որդուն հարվածներ հասցնելու համար։ Որդու կողմից դանակով հարվածներ հասցնելու ժամանակ մյուսների հետ բռնել է նրան, քանի որ ցանկացել է դանակը վերցնել նրա ձեռքից` որպեսզի շարունակություն չլիներ և մյուս կողմը չվերցնի դանակը։ Բացի այդ որդին դանակով անկանոն շարժումներ է կատարել և կարող էր որևէ մեկին վնասել։
Դեպքի օրն իրենք ոգելից խմիչք չեն օգտագործել, իսկ մյուս կողմի պահվածքից ենթադրում է, որ նրանք եղել են ոգելից խմիչք օգտագործած վիճակում։ Դեպքի ժամանակ ինքը ներկայացել է այդ տղաներին` հայտնելով, որ «Գեբելս» մականունով Էդոն է և բնակվել է այդ թաղամասում։ Այդպես է վարվել, որպեսզի փորձի գոնե այդ եղանակով կանխել վիճաբանությունը։
/դատական նիստի արձանագրություն, հատոր 1, գ.թ. 186-188, հատոր 2, գ.թ. 47-48, 154/
Վկա Օնիկ Ռոբերտի Հակոբյանի ցուցմունքներով այն մասին« որ 2013թ. մարտի 03-ին« ժամը 04։35-ի սահմաններում, իր ընկեր Ա.Պողոսյանի և վերջինիս հայր Է.Պողոսյանի հետ մոտեցել են Երևան քաղաքի Հանրապետության փողոցի թիվ 62 շենքի հարևանությամբ՝ Վարդանանց փողոցի և Վարդանանց անցուղու խաչմերուկում գործող «Վիլ» կրպակին՝ ծխախոտ գնելու համար։ Մինչև սպասել են« որպեսզի կրպակի վաճառողուհին բացի մուտքի կողպված դուռը` իրենց են մոտեցել մինչ այդ իրենց անծանոթ Տիգրան ու Էդուարդ Դավթյանները և բարձրաձայն անհասցե արտահայտություններ են հնչեցրել։ Հասկանալով« որ լարված իրավիճակ է ստեղծվում՝ Է.Պողոսյանը դիմել է տղաներին՝ կրպակից ինչ-որ բան հյուրասիրելու առաջարկությամբ։ Ցավագին ընդունելով Է.Պողոսյանի այդ առաջարկը՝ Տ.Դավթյանն ու Է.Դավթյանը արհամարհական տոնով պատասխանել են« որ իրենք վերջինիս ինչ-որ բան կհյուրասիրեն։ Այդ ժամանակ կրպակի վաճառողուհին բացել է մուտքի դուռը« ապա միասին« այդ թվում` Տիգրան և Էդուարդ Դավթյանները մուտք են գործել կրպակ« որտեղ Տ.Դավթյանը և Է.Դավթյանը շարունակել են պարզաբանումներ պահանջել իրենց հյուրասիրելու առաջարկություն անելու կապակցությամբ։ Տեսնելով« որ տղաները շարունակում են պարզաբանումներ պահանջել՝ Ա. Պողոսյանը միջամտել և փորձել է հանդարտեցնել Տ. Դավթյանին և Է. Դավթյանին« ինչը նրան չի հաջողվել« քանի որ Է. Դավթյանը երկու ձեռքով բռնել է վերջինիս կրծքավանդակից և պահանջել է այլևս չմիջամտել իրենց խոսակցությանը։ Է. Դավթյանի նման վարքագծի պատճառով ինքը« Ա. Պողոսյանը« Տ. Դավթյանը և Է. Դավթյանը սկսել են քաշքշել միմյանց« ապա դուրս են եկել կրպակից և շարունակել են միմյանց քաշքշել կրպակի դիմացի հատվածում։ Այդ ժամանակ միջամտել է Է. Պողոսյանը և բաժանել է իրենց« սակայն վայրկյաններ անց Տ.Դավթյանն անսպասելիորեն բռունցքով հարվածել է Ա. Պողոսյանի քթին« ինչի հետևանքով վերջինս կորցրել է հավասարակշռությունն ու վայր ընկել։ Այնուհետև ինքը« Է. Պողոսյանը« Տ. Դավթյանը և Է. Դավթյանը սկսել են ոտքերով ու ձեռքերով խառը հարվածներ հասցնել միմյանց։ Ունենալով շնչառական խնդիրներ՝ բաժանվել է իրենց հետ վիճաբանողներից և այլևս չի միջամտել ծեծկռտուքին։ Նույն ծեծկռտուքի ընթացքում նկատել է« թե ինչպես է Տ. Դավթյանը բռունցքով ուժգին հարվածում Է. Պողոսյանի դեմքին և վայր գցում վերջինիս։ Երբ Է. Պողոսյանը ոտքի է կանգնել` Տ. Դավթյանը և Է. Դավթյանը հարվածներ հասցնելով և քաշքշելով նրան` տարել են կրպակի ձախակողմյան հատված և շարունակել են ծեծի ենթարկել։ Դրանից հետո նկատել է Ա. Պողոսյանին« որը դուրս գալով կրպակից` տեսել է, թե ինչպես են ծեծի ենթարկում հորը« որից հետո անմիջապես մուտք է գործել նույն կրպակ։ Երբ հետևել է Ա.Պողոսյանին` տեսել է« որ կրպակում Ա.Պողոսյանը ինչ-որ բան է փնտրում։ Քիչ անց Ա.Պողոսյանն աջ ձեռքում դանակ բռնած դուրս է վազել կրպակից։ Հետևելով նրան՝ տեսել է« թե ինչպես է Ա. Պողոսյանն իր մոտ եղած դանակով հարվածում Տ. Դավթյանին։
Իրեն ներկայացված, BK_CH12_20130303_010000 անվամբ տեսագրությունում երևացող, բաց գույնի ջինսե տաբատով, սև կոշիկներով և սև բաճկոնով անձն ինքն է։ Տեսագրությունում ֆիքսված, 02։40։10 վայրկյանից մինչև 02։40։16 վայրկյանն ինքը, Էդուարդ Պողոսյանը և Տիգրան ու Էդուարդ Դավթյանները փոխադարձ հարվածում են միմյանց։ 02։40։16-ին ինքն առանձնացել է, քանի որ շնչառական խնդիրներ ունի և մի քանի քայլ է կատարել դեպի Ալավերդյան փողոցի կողմը։ Այդ ժամանակ Արմեն Պողոսյանը գտնվել է կրպակում։ Այնուհետև քայլելով գնացել է կրպակի կողմը, որտեղ կրպակի մուտքի մոտ տեսել է Արմենին։ Վերջինս մուտք է գործել կրպակ, իսկ ինքը գնացել է նրա հետևից, սակայն կրպակ չի մտել։ Մի քանի վայրկյան անց Արմենը` դանակը ձեռքին արագ դուրս է եկել կրպակից և շարժվել դեպի Տիգրան և Էդուարդ Դավթյանների ուղղությամբ։ Ինքը քայլել է Արմենի հետևից` փորձելով կանգնեցնել նրան։ 02։40։46-ին Արմենը դուրս է եկել կրպակից և 02։40։49-ին առաջին հարվածն է հասցրել Էդուարդ Դավթյանին։ 02։50։31-ին Տիգրան Դավթյանը հարվածել է Էդուարդ Պողոսյանին։ Երբ Արմենի հետևից մտել է կրպակ` նրան ոչինչ չի ասել, իսկ դուրս գալուց հետո նրա հետևից գոռալով` փորձել է կանգնեցնել։ Տեսագրությունում ֆիքսված, 02։42։17 վայրկյանին դեպի տեսախցիկը քայլող առաջին անձն ինքն է, վերջինը` Էդուարդ Պողոսյանն է, իսկ նրանից դեպի ձախ և մի փոքր առաջ քայլում է Արմեն Պողոսյանը։
/դատական նիստի արձանագրություն, հատոր 1, գ.թ. 264-267, հատոր 2, գ.թ. 155/
Վկա Մհեր Օլեգի Հակոբյանի ցուցմունքներով այն մասին« որ 2013թ. մարտի 03-ին« ժամը 04։40-ի սահմաններում, իր բջջային հեռախոսահամարին զանգահարել է իր հորաքրոջ որդի Տիգրան Դավթյանը և խնդրել շտապ գնալ Երևան քաղաքի Վարդանանց և Հանրապետության փողոցների խաչմերուկ։ Քիչ անց գնալով նշված վայր՝ հանդիպել է Տիգրան և Էդուարդ Դավթյաններին։ Նկատել է« որ Տ. Դավթյանի ձեռքերն ու կրծքավանդակի շրջանն ամբողջությամբ արյունոտված են։ Տ.Դավթյանից տեղեկացել է« որ իրենց անծանոթ անձանց հետ կռվի են բռնվել։ Նշված վայրում այլ անձանց չի տեսել։ Դեպքի վերաբերյալ որևէ այլ տեղեկություն չունի, չգիտի, թե ինչ հանգամանքներում են նրանք վնասվածքներ ստացել։
/դատական նիստի արձանագրություն, հատոր 1, գ.թ. 11-13/
Դատաբժշկական փորձաքննության 2013թ. մարտի 18-ի թիվ 332/հ եզրակացությամբ« որի համաձայն` «Տ. Դավթյանի ստացված մարմնական վնասվածքը՝ պարանոցի ձախ կեսի առաջային մակերեսի ծակած-կտրած թափանցող վերքի ձևով« որը ուղեկցվել է կերակրափողի միջանցիկ վիրավորումով« պատճառվել է սուր ծակող-կտրող գործիքով« հնարավոր է նշված ժամկետում, չի բացառվում որոշման մեջ նկարագրված գործի հանգամանքներին և պատճառել է առողջությանը ծանր վնաս, կյանքին վտանգ սպառնացող։»։
/հատոր 1, գ.թ. 150-151/
Դատաբժշկական փորձաքննության 2013թ. ապրիլի 02-ի թիվ 900 եզրակացությամբ« որի համաձայն` «Քաղ. Ա. Պողոսյանի ստացած մարմնական վնասվածքը քթի ոսկրերի ոչ ճիշտ սերտաճած բեկորային կոտրվածքի ձևով` պատճառվել է բութ առարկայի ներգործության հետևանքով« հնարավոր է նշված ժամանակին և հանգամանքներում, որոնք պատճառել են առողջությանը թեթև վնաս՝ առողջության կարճատև քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը վեց օրից ավելի` բայց ոչ ավելի քան 21 օրից։»։
/հատոր 2, գ.թ. 8-9/
Դատահետքաբանական փորձաքննության 2013թ. ապրիլի 19-ի թիվ 681 եզրակացությամբ, որի համաձայն`
«1. Փորձաքննությանը ներկայացված` Է. Դավթյանի սվիտերի և մայկայի վրա առկա միաժամանակ առաջացած վնասվածքները իրենց բնույթով ծակած-կտրած են և հնարավոր է, որ առաջացել են մեկ սայրանի ծակող-կտրող շեղբ ունեցող գործիքի /ների/ հնարավոր է` դանակի /ների/ շեղբի ներգործության արդյունքում։
Փորձաքննությանը ներկայացված` Է. Դավթյանի ջինսե և սպորտային անդրավարտիքների վրա առկա մեխանիկական բնույթի վնասվածքները կարող էին առաջանալ պինդ, համեմատաբար անհարթ, գոգավոր մակերեսների հետ շփման մեջ մտնելու հետևանքով։
Փորձաքննությանը ներկայացված` Տ. Դավթյանի սվիտերի վրա առկա վնասվածքը իր բնույթով ծակած-կտրած է և հնարավոր է, որ առաջացել է ինչպես մեկ սայրանի, այնպես էլ երկսայրանի սրվածության ծակող-կտրող շեղբ ունեցող գործիքի, հնարավոր է` դանակի շեղբի ներգործության արդյունքում։
Փորձաքննությանը ներկայացված` Տ. Դավթյանի սվիտերի վրա առկա վնասվածքի բացակայության հնարավոր հանգամանքը ուսաժապավեններով մայկայի համապատասխան մակերեսին, կարող է պայմանավորված լինել մայկայի կտորի տվյալ հատվածի բացակա լինելու պայմանով։
Փորձաքննությանը ներկայացված` Տ. Դավթյանի անդրավարտիքի մակերեսներին վնասվածքներ չհայտնաբերվեցին։
Ելնելով Տ. Դավթյանի և Է. Դավթյանի հագուստների վրա հայտնաբերված ծակած-կտրած բնույթի վնասվածքների և ներկայացված դանակի չափային և կառուցվածքային տվյալներից կարելի է եզրակացնել, որ հագուստների վրա առկա վնասվածքները կարող էին առաջանալ ինչպես ներկայացված դանակի շեղբի, այնպես էլ նմանատիպ շեղբ ունեցող այլ գործիքի /ների/ շեղբի ներգործությունների արդյունքում։
2. Քանի որ փորձաքննությանը ներկայացված Տ. Դավթյանի և Է. Դավթյանի հագուստների վրա առկա ծակած-կտրած բնույթի վնասվածքներում չկան ներգործող գործիք /ների/ կողմից թողնված որևէ անհատականացնող հատկանիշներ, ուստի պատասխանել այն հարցին, թե վերջիններիս հագուստների վրա առկա վնասվածքները պատճառվել են միևնույն, թե տարբեր գործիքներով` հնարավոր չէ։
3. «Տուժողներ Է. Դավթյանի և Տ. Դավթյանի մարմնի վրա առկա վնասվածքները իրենց տեղակայումով, չափերով և առաջացման մեխանիզմով համընկնում են արդյոք վերջինիս հագուստների վրա առկա քերծվածքներին կամ պատռվածքներին» հարցին հնարավոր է պատասխանել դատահետքաբանական և դատաբժշկական համալիր փորձաքննության շրջանակներում։»։
/հատոր 2, գ.թ. 16-22/
Դատահետքաբանական և դատաբժշկական համալիր փորձաքննության 2013թ. մայիսի 15-ի թիվ 965 եզրակացությամբ, որի համաձայն`
«1. Փորձաքննությանը ներկայացված` Տ. Դավթյանի սվիտերի առաջամասի ձախ կողմի վերին կիսամասի վրա առկա ծակած-կտրած բնույթի վնասվածքը իր տեղակայությամբ, ուղղվածությամբ և չափով հիմնականում համընկնում է վերջինիս մարմնական վնասվածքի վերաբերյալ դ/բ-ի թիվ 332/հ եզրակացությունում նկարագրված պարանոցի ձախ կեսի առաջային մակերեսի ծակած-կտրած թափանցող վերքի հետ։
Փորձաքննությանը ներկայացված` Է. Դավթյանի սվիտերի, մայկայի և ձախ թևքերի հետնամասերի վերին կիսամասերի վրա առկա վնասվածքները իրենց տեղակայություններով, ուղղվածություններով և չափերով հիմնականում համընկնում են վերջինիս մարմնական վնասվածքների վերաբերյալ դ/բ-ի թիվ 331/հ եզրակացությունում նկարագրված` կրծքավանդակի ձախ կեսի և ձախ բազկի վ/3-ի հետին մակերեսներին առկա ծակած-կտրած վերքերի հետ։
Է. Դավթյանի հագուստների և մարմնական վնասվածքների տեղակայությունների որոշակի տարբերությունների հնարավոր հանգամանքը կարող է պայմանավորված լինել վերջինիս հագուստների կտորի տվյալ տեղամասերի որոշակի տեղաշարժված լինելու պատճառով։»։
/հատոր 2, գ.թ. 56-59/
Դատահետքաբանական փորձաքննության 2013թ. ապրիլի 10-ի թիվ 680 եզրակացությամբ, որի համաձայն` «Հմ. 13124213 քր. գործով փորձաքննությանը ներկայացված` Արմեն Պողոսյանի մայկայի վրա առկա վնասվածքը իր բնույթով պատռվածք է և կարող էր առաջանալ մեխանիկական ձգվածության, ուժի ներգործության` քաշել-ձգելու հետևանքով։
Փորձաքննությանը ներկայացված Էդուարդ Պողոսյանի սվիտերի ընդհանուր մակերեսներին հետազոտությամբ վնասվածքներ չհայտնաբերվեցին։
«Ծեծկռտուք, քաշքշուկ» գործողությունների պարզաբանումը չի մտնում հետքաբան փորձագետի իրավասության մեջ։»։
/հատոր 1, գ.թ. 254-256/
Դատահետքաբանական փորձաքննության 2013թ. մայիսի 17-ի թիվ 835 եզրակացությամբ, որի համաձայն` «Փորձաքննությանը ներկայացված սպորտային վերնամասի վրա առկա թվով երեք վնասվածքները պատռվածքներ են և կարող էին առաջանալ մեխանիկական ձգվածության` ուժի ներգործության, քաշել-ձգելու հետևանքով։»։
/հատոր 2, գ.թ. 53-54/
Դատակենսաբանական փորձաքննության 2013թ. հուլիսի 04-ի թիվ 190 եզրակացությամբ« որի համաձայն`
«1. Փորձաքննության ներկայացված` Օ. Հակոբյանից վերցված արյան նմուշն ըստ արյան ABO իզոշճաբանական համակարգի պատկանում է արյան A խմբին։
2. Փորձաքննության ներկայացված` Է. Դավթյանից վերցված արյան նմուշն ըստ արյան ABO իզոշճաբանական համակարգի պատկանում է արյան A խմբին։
3. Փորձաքննության ներկայացված` Տ. Դավթյանից վերցված արյան նմուշն ըստ արյան ABO իզոշճաբանական համակարգի պատկանում է արյան A խմբին։
4. Փորձաքննության ներկայացված` Ա. Պողոսյանից վերցված արյան նմուշն ըստ արյան ABO իզոշճաբանական համակարգի պատկանում է արյան O խմբին։
5. Փորձաքննության ներկայացված` է. Պողոսյանից վերցված արյան նմուշն ըստ արյան ABO իզոշճաբանական համակարգի պատկանում է արյան O խմբին։
6. Փորձաքննության ներկայացված` Օ. Հակոբյանի բաճկոնի վրա առկա կասկածելի արնանման հետքում հաստատվեց մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է արյան A խումբ ունեցող որևէ անձից կամ անձանցից, այդ թվում հնարավոր էր առաջանալ և Օ. Հակոբյանից, և Տ. Դավթյանից, և Է. Դավթյանից։
7. Փորձաքննության ներկայացված` Է. Պողոսյանի ջեմպրի վրա առկա կասկածելի արնանման հետքում հաստատվեց մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է Օ խումբ ունեցող որևէ անձից կամ անձանցից, այդ թվում հնարավոր էր ինչպես Է. Պողոսյանից, այնպես էլ` Ա. Պողոսյանից։
8. Փորձաքննության ներկայացված` Ա. Պողոսյանի մայկայի վրա առկա կասկածելի արնանման հետքում հաստատվեց մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է արյան O խումբ ունեցող որևէ անձից կամ անձանցից, այդ թվում հնարավոր էր ինչպես Ա. Պողոսյանից, այնպես էլ` Է. Պողոսյանից։
9. Փորձաքննության ներկայացված` Տ. Դավթյանի ջեմպրի, անթև մայկայի և ջինսե անդրավարտիքի վրա առկա կասկածելի արնանման հետքում հաստատվեց մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է արյան A խումբ ունեցող որևէ անձից կամ անձանցից, այդ թվում հնարավոր էր առաջանար և Տ. Դավթյանից, և Օ. Հակոբյանից, և Է. Դավթյանից։
10. Փորձաքննության ներկայացված` Է. Դավթյանի ջեմպրի, կիսաթև մայկայի և ջինսե անդրավարտիքի վրա առկա կասկածելի արնանման հետքում հաստատվեց մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է արյան A խումբ ունեցող որևէ անձից կամ անձանցից, այդ թվում հնարավոր էր առաջանար և Է. Դավթյանից, և Տ. Դավթյանից, և Օ. Հակոբյանից։
11. Փորձաքննության ներկայացված` դեպքի վայրից վերցված թվով 2 բամբակյա խծուծների վրա առկա կասկածելի արնանման հետքում հաստատվեց մարդկային ծագման արյան առկայություն, որոնք ըստ արյան ABO իզոշճաբանական համակարգի առաջացել են արյան Օ խումբ ունեցող որևէ անձից կամ անձանցից, այդ թվում հնարավոր էր ինչպես Ա. Պողոսյանից, այնպես էլ` Է. Պողոսյանից։
12. Փորձաքննության ներկայացված` դեպքի վայրից վերցված թղթի կտորի վրա առկա կասկածելի արնանման հետքում հաստատվեց մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է արյան Օ խումբ ունեցող որևէ անձից կամ անձանցից, այդ թվում հնարավոր էր ինչպես Ա. Պողոսյանից, այնպես էլ` Է. Պողոսյանից։
13. Փորձաքննության ներկայացված` Տ. Դավթյանի սև գույնի սպորտային անդրավարտիքի մանրակրկիտ զննությամբ արնանման կասկածելի հետքեր չեն հայտնաբերվել։
14. Փորձաքննության ներկայացված` դանակից արված քսվածքներում արյուն չի հայտնաբերվել։
15. Փորձագետի թիվ 190 եզրակացությանը կցվում են դանակի թվով 2 լուսանկարներ։»։
/հատոր 2, գ.թ. 100-108/
Դատահոգեբանական փորձաքննության 2013թ. հուլիսի 25-ի թիվ 13-1437 եզրակացությամբ« որի համաձայն`
«1,2,4,6,7,8. 03.03.2013թ. նկարագրված արարքը կատարելու պահին Ա. Պողոսյանը չի գտնվել ֆիզիոլոգիական աֆեկտի /հոգեկան խիստ հուզմունքի/ վիճակում։ Ա. Պողոսյանը հետազոտվող իրավիճակում գտնվել է հուզական գրգռված վիճակում, որն էապես ազդել է նրա վարքի և գիտակցության վրա, նվազեցնելով նրա վարքի կամային կառավարման ունակությունը։
3. Ա. Պողոսյանի այնպիսի անհատական հոգեբանական առանձնահատկությունները ինչպիսիք են բարձր զգայունակությունը, տպավորվողականությունը, ինչպես նաև տարիքային առանձնահատկությունները կարող էին ազդել նրա վարքի վրա հետազոտվող իրավիճակում։
5. Ա. Պողոսյանի մոտ հոգեկան հիվանդության հետ չկապված հոգեկան զարգացման հապաղում առկա չէ։»։
/հատոր 2, գ.թ. 112-125/
Քննչական փորձարարություն կատարելու մասին 2013թ. ապրիլի 07-ի արձանագրությամբ և դրան կից լուսանկարչական հավելվածով« որոնց համաձայն` Արմեն Էդուարդի Պողոսյանը մատնացույց է արել Երևան քաղաքի Հանրապետության փողոցի թիվ 62 շենքի հարևանությամբ, Վարդանանց փողոցի և Վարդանանց անցուղու խաչմերուկում գործող «Վիլ» կրպակի ձախակողմյան հատվածում տեղակայված դեպքի վայրը՝ հայտարարելով« որ հենց այդ հատվածում է կրպակից վերցրած դանակով հարվածել Տիգրան Դավթյանին։
/հատոր 1, գ.թ. 236-242/
Որպես այլ փաստաթուղթ` ապացույց ճանաչված, ՀՀ ոստիկանության Երևան քաղաքի վարչության Կենտրոնականի բաժնից ստացված լազերային սկավառակով և այն զննելու մասին 2013թ. մարտի 13-ի արձանագրությամբ« որոնց համաձայն` նշված լազերային սկավառակը պարունակում է 2013թ. մարտի 3-ին, ժամը 04։35-ի սահմաններում, Երևան քաղաքի Հանրապետության փողոցի թիվ 62 շենքի հարևանությամբ, Երևանի Վարդանանց փողոցի և Վարդանանց անցուղու խաչմերուկում գործող «Վիլ» կրպակի դիմաց տեղի ունեցած ծեծկռտուքի տեսանյութերը։
/հատոր 1, գ.թ. 83-85, հատոր 2, գ.թ. 173/
Որպես այլ փաստաթուղթ` ապացույց ճանաչված, մեղայականով ներկայանալու մասին 2013թ. մարտի 28-ի արձանագրությամբ, որի համաձայն` Արմեն Էդուարդի Պողոսյանը, 2013թ. մարտի 28-ին, ժամը 19։15-ին ներկայացել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին և հայտարարել, որ 2013թ. մարտի 03-ին, ժամը 04։30-ի սահմաններում, Երևանի Հանրապետության փողոցի թիվ 62 շենքի հարևանությամբ գործող «Վիլ» կրպակի մոտ, երկու անծանոթ անձանց հետ ծագած վիճաբանության ժամանակ, նույն կրպակից վերցրած դանակով հարվածել է վերջիններիս` պատճառելով մարմնական վնասվածքներ։
/հատոր 1, գ.թ. 155, 188-189/
Իրեղեն ապացույցներ ճանաչված« ամբաստանյալ Արմեն Պողոսյանի, տուժող Տիգրան Դավթյանի, վկաներ Օնիկ Պողոսյանի և Էդուարդ Պողոսյանի հագուստներով, հանցագործության գործիք հանդիսացող դանակով, հանցագործության հետքեր պարունակող բամբակե խծուծներով, թղթի կտորով և այդ իրեղեն ապացույցները զննելու մասին արձանագրություններով։
/հատոր 1, գ.թ. 54-55, 182« 267, հատոր 2, գ.թ. 167-172, 188-189/
Անչափահաս ամբաստանյալ Արմեն Էդուարդի Պողոսյանը նախաքննության ընթացքում ցուցմունքներ է տվել այն մասին« որ 2013թ. մարտի 03-ին« ժամը 04։35-ի սահմաններում, իր հայր Էդուարդ Պողոսյանի և ընկեր Օնիկ Հակոբյանի հետ մոտեցել են Երևան քաղաքի Հանրապետության փողոցի թիվ 62 շենքի հարևանությամբ՝ Վարդանանց փողոցի և Վարդանանց անցուղու խաչմերուկում գործող «Վիլ» կրպակին՝ ծխախոտ գնելու համար։ Մինչև սպասել են« որպեսզի կրպակի վաճառողուհին բացի մուտքի կողպված դուռը` նույն կրպակին են մոտեցել մինչ այդ իրենց անծանոթ Տիգրան և Էդուարդ Դավթյանները« որոնք բարձրաձայն անհասցե արտահայտություններ են հնչեցրել։ Հասկանալով« որ լարված իրավիճակ է ստեղծվում՝ իր հայր Էդուարդ Պողոսյանը դիմել է տղաներին՝ կրպակից ինչ-որ բան հյուրասիրելու առաջարկությամբ։ Ցավագին ընդունելով իր հոր առաջարկը՝ Տ. Դավթյանն ու Է. Դավթյանն արհամարհական տոնով պատասխանել են« որ իրենք վերջինիս ինչ-որ բան կհյուրասիրեն։ Այդ ժամանակ կրպակի վաճառողուհին բացել է մուտքի դուռը« ապա միասին« այդ թվում` Տիգրան և Էդուարդ Դավթյանները մուտք են գործել կրպակ« որտեղ Տ. Դավթյանն ու Է. Դավթյանը շարունակել են պարզաբանումներ պահանջել հորից` իրենց հյուրասիրելու առաջարկություն անելու կապակցությամբ։ Տեսնելով« որ տղաները շարունակում են պարզաբանումներ պահանջել՝ միջամտել և փորձել է հանդարտեցնել Տ. Դավթյանին և Է. Դավթյանին« սակայն դա իրեն չի հաջողվել« քանի որ Է. Դավթյանը երկու ձեռքով բռնել է իր կրծքավանդակի շրջանից և պահանջել է այլևս չմիջամտել իրենց խոսակցությանը։ Է. Դավթյանի պահվածքի պատճառով ինքը« Օ. Հակոբյանը« Տ. Դավթյանը և Է. Դավթյանը սկսել են քաշքշել միմյանց« ապա դուրս են եկել կրպակից և շարունակել են միմյանց քաշքշել կրպակի դիմացի հատվածում։ Իր հայրը միջամտել և բաժանել է իրենց« սակայն վայրկյաններ անց Տ. Դավթյանն անսպասելիորեն բռունցքով հարվածել է իր քթին« ինչի հետևանքով կորցրել է հավասարակշռությունն ու վայր ընկել։ Քիչ անց ուշքի է եկել« շտապել է կրպակ« վաճառողուհուց ջուր է խնդրել« ապա դուրս է վազել։ Այնուհետև դուրս գալով կրպակից՝ նկատել է« թե ինչպես է հայրը վայր ընկնում Տ.Դավթյանի հարվածից և շարունակում են հարձակվել միայնակ հոր վրա։ Նույն պահին վերադարձել է կրպակ« կրպակում գտնվող մսամթերքի սառնարանի վրայից վերցրել է խոհանոցային դանակ« դուրս է վազել` հորը օգնության հասնելու համար։ Այդ պահին տեսնելով« որ հայրը գտնվում է գետնին ընկած վիճակում« իսկ Տիգրան և Էդուարդ Դավթյանները ոտքերով և ձեռքերով հարվածներ են հասցնում նրան՝ չդադարեցնելով ծեծը, վազելով մոտեցել է Տ.Դավթյանին« ապա կրպակից վերցրած դանակով հարվածել է նրա պարանոցի շրջանին« որից հետո միայն ծեծկռտուքը դադարել է։
Դեպքից հետո դանակը հանձնել է հորը։ Վերջինս նույն օրը դանակը թաքցրել է Վ.Մամիկոնյանի արձանի աջակողմյան հողածածկ հատվածում։ Օրեր անց հոր հետ միասին գնացել են նշված վայր« հողից հանել են դանակը՝ իրավապահ մարմիններին ներկայացնելու համար։
/հատոր 1, գ.թ. 172-176« 216-217« 284-286, հատոր 2, գ.թ. 49-51« 156-157« 183-184/
Դատաքննության ընթացքում անչափահաս ամբաստանյալ Արմեն Պողոսյանը ՀՀ քրեական օրենսգրքի 112-րդ հոդվածի 1-ին մասով առաջադրված մեղադրանքում իրեն մեղավոր չի ճանաչել և հրաժարվել է ցուցմունքներ տալուց։
/դատական նիստի արձանագրություն/



Դատարանի իրավական վերլուծությունները

Վերլուծելով անչափահաս ամբաստանյալ Արմեն Էդուարդի Պողոսյանի նախաքննական ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ անչափահաս ամբաստանյալ Արմեն Էդուարդի Պողոսյանի ցուցմունքները` իր կողմից տուժող Տ. Դավթյանին ծանր մարմնական վնասվածք պատճառելիս նրա և Էդուարդ Դավթյանի կողմից իր հայր Էդուարդ Պողոսյանին ծեծի ենթարկելու` այսինքն անհրաժեշտ պաշտպանության սահմանազանցմամբ տուժողին դանակահարելու մասին, իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում, հերքվում են արդեն իսկ նշված ապացույցներով։
Վերլուծելով անչափահաս ամբաստանյալ Արմեն Էդուարդի Պողոսյանին ՀՀ քրեական օրենսգրքի 112-րդ հոդվածի 1-ին մասով առաջադրված մեղադրանքը և գործով ձեռք բերված ապացույցները` դատարանը գտնում է, որ անչափահաս ամբաստանյալ Արմեն Էդուարդի Պողոսյանի կողմից, նրա մեղավորությամբ, դիտավորությամբ մեկ ուրիշին մարմնական ծանր վնասվածք պատճառելը, որը վտանգավոր է կյանքի համար` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Արմեն Էդուարդի Պողոսյանի նկատմամբ պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, տուժողի հետ հաշտվել են։ Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում մեղայականով ներկայանալը և հանցանք կատարելու պահին հանցավորի անչափահաս` տասնվեց տարեկան լինելը, իսկ նրա պատասխանատվությունը և պատիժը ծանրացնող հանգամանքներ առկա չեն։
Անչափահաս ամբաստանյալ Արմեն Էդուարդի Պողոսյանն իր կատարած` Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցագործության համար ենթակա է պատժի ազատազրկման ձևով։
Քննարկելով նշանակված պատիժն ամբաստանյալ Արմեն Էդուարդի Պողոսյանի կողմից կրելու հարցը` դատարանը գտնում է հետևյալը.
«Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ԱԺ 2013թ. հոկտեմբերի 3-ի որոշման 1-ին կետի 3-րդ ենթակետի համաձայն` որոշվել է.
«1. Պատժից ազատել, բացառությամբ սույն որոշման 8-րդ կետի 4-6-րդ ենթակետերով եւ 9-րդ կետով նախատեսված դեպքերի`
(…)
3) այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ։»։
Նույն որոշման 2-րդ կետի 3-րդ ենթակետի համաձայն` որոշվել է.
«Պատժից ազատել այն անձանց, բացառությամբ սույն որոշման 8-րդ կետի 4-6-րդ ենթակետերով եւ 9-րդ կետով նախատեսված դեպքերի, որոնց նկատմամբ առավելագույնը հինգ տարի ժամկետով ազատազրկում է նշանակվել`
(…)
3) հանցագործությունը մինչեւ 18 տարին լրանալը կատարած այն անձանց, որոնք նախկինում դիտավորյալ հանցագործություն կատարելու համար ազատությունից զրկելու հետ կապված պատիժ չեն կրել կամ կրել են, uակայն չունեն դատվածություն. (...)»։
Դատարանը գտնում է, որ սույն դատավճռով Արմեն Էդուարդի Պողոսյանի նկատմամբ ենթակա է կիրառման «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013թ. հոկտեմբերի 03-ի որոշումը և առավելագույնը հինգ տարի ժամկետով ազատությունից զրկելու հետ կապված պատիժ նշանակելու դեպքում նա ենթակա է պատժից ազատման։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի` օրինական ուժի մեջ մտնելուց հետո, 10.09.2013թ. որոշումներով իրեղեն ապացույցներ ճանաչված, ամբաստանյալ Արմեն Պողոսյանի հագուստները պետք է վերադարձնել Ա. Պողոսյանին, տուժող Տիգրան Դավթյանի հագուստները` Տ. Դավթյանին, վկա Օնիկ Պողոսյանի հագուստները` Օ. Պողոսյանին, վկա Էդուարդ Պողոսյանի հագուստները` Է. Պողոսյանին, իսկ դանակը, բամբակե խծուծները և թղթի կտորը` պետք է ոչնչացնել։
Քննարկելով խափանման միջոցի հարցը` դատարանը գտնում է, որ անչափահաս ամբաստանյալ Արմեն Պողոսյանի նկատմամբ որպես խափանման միջոց ընտրված հսկողության հանձնելը ենթակա է վերացման։
Քննարկելով դատական ծախսերի հարցը` դատարանը գտնում է հետևյալը.
ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետի համաձայն`
«1. Դատական ծախսերը բաղկացած են`
(…)
3) մասնագետի, փորձագետի, թարգմանչի վարձատրության գումարներից.
(…)»։
Նույն օրենսգրքի 169-րդ հոդվածի 4-րդ մասի համաձայն` «Անչափահասին դատապարտելու դեպքում դատական ծախսերը կարող են դրվել նրա օրինական ներկայացուցչի վրա։»։
Հետևաբար, դատարանը գտնում է, որ անչափահաս ամբաստանյալ Արմեն Էդուարդի Պողոսյանի օրինական ներկայացուցիչ Իզաբելլա Ֆրունզիկի Դանիելյանից հօգուտ ՀՀ պետական բյուջեի բռնագանձման է ենթակա դատահոգեբանական և տեսաձայնագրառման փորձաքննությունների կատարման արժեք հանդիսացող 125.034 /հարյուր քսանհինգ հազար երեսունչորս/ ՀՀ դրամ ընդհանուր գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-365-րդ, 369-373-րդ, 439-442-րդ հոդվածներով, դատարանը`


Վ Ճ Ռ Ե Ց

Անչափահաս ամբաստանյալ Արմեն Էդուարդի Պողոսյանին մեղավոր ճանաչել Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցանքում և դատապարտել ազատազրկման 3 /երեք/ տարի ժամկետով։
Համաներման ակտի` «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2013թ. հոկտեմբերի 03-ի որոշման 1-ին կետի 3-րդ ենթակետի կիրառմամբ անչափահաս ամբաստանյալ Արմեն Էդուարդի Պողոսյանին ազատել նշանակված պատիժը կրելուց։
Արմեն Պողոսյանի նկատմամբ ընտրված խափանման միջոց հսկողության հանձնելը վերացնել։
Դատավճռի օրինական ուժի մեջ մտնելուց հետո, 10.09.2013թ. որոշումներով իրեղեն ապացույցներ ճանաչված, ամբաստանյալ Արմեն Պողոսյանի հագուստները վերադարձնել Ա. Պողոսյանին, տուժող Տիգրան Դավթյանի հագուստները` Տ. Դավթյանին, վկա Օնիկ Պողոսյանի հագուստները` Օ. Պողոսյանին, վկա Էդուարդ Պողոսյանի հագուստները` Է. Պողոսյանին, իսկ դանակը, բամբակե խծուծները և թղթի կտորը` ոչնչացնել։
Անչափահաս ամբաստանյալ Արմեն Էդուարդի Պողոսյանի օրինական ներկայացուցիչ Իզաբելլա Ֆրունզիկի Դանիելյանից հօգուտ ՀՀ պետական բյուջեի բռնագանձել 125.034 /հարյուր քսանհինգ հազար երեսունչորս/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ