ԵԿԴ/0173/01/13





ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

05.11.2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Կ.Կարապետյանի, մասնակցությամբ մեղադրող Թ.Միրզաբեկյանի, տուժողի ներկայացուցիչ Ն.Կարապետյանի, ամբաստանյալ Ռոմիկ Իսպիրի Հովհաննիսյանի, պաշտպան Ռ.Սաֆարյանի, դռնբաց դատական նիստում քննելով քրեական գործն ըստ մեղադրանքի Ռոմիկ Իսպիրի Հովհաննիսյանի (ծնված 1939 թվականի հուլիսի 30-ին Գյումրի քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, չի աշխատում, հաշվառված է Երևան քաղաքի Նանսենի փողոցի 9-րդ շենքի 57-րդ բնակարանում, խափանման միջոց է ընտրվել չհեռանալու մասին ստորագրություն)` ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասի 1-ին, 3-րդ կետերով

Պ Ա Ր Զ Ե Ց

2011 թվականի հուլիսի 15-ին ՀՀ գլխավոր դատախազության պետական շահերի պաշտպանության վարչության պետի տեղակալ Ն.Հակոբյանի որոշմամբ ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասի 1-ին, 3-րդ կետերով նախատեսված հանցագործությունների հատկանիշներով հարուցվել է քրեական գործ:
2011 թվականի հուլիսի 21-ին ՀՀ ոստիկանության Կենտրոնականի քննչական բաժնի ավագ քննիչ Կ.Ներսիսյանի որոշմամբ թիվ 61204411 քրեական գործն ընդունվել է վարույթ:
2012 թվականի մայիսի 15-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ թիվ 61204411 քրեական գործով Ռոմիկ Իսպիրի Հովհաննիսյանի կողմից առանձնապես խոշոր չափերի` 7.000.000 ՀՀ դրամ հափշտակելու կապակցությամբ քրեական հետապնդում չի իրականացվել` հանցակազմի բացակայության հիմքով:
2012 թվականի մայիսի 15-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ թիվ 61204411 քրեական գործով վարույթը կարճվել է և Ռոմիկ Իսպիրի Հովհաննիսյանի նկատմամբ ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասի 1-ին, 3-րդ կետերով քրեական հետապնդում չի իրականացվել` համաներման ակտի ընդունման հիմքով:
2012 թվականի մայիսի 29-ին Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Ա.Բեգինյանի որոշմամբ վերացվել է ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի 2012 թվականի մայիսի 15-ի որոշումը` Ռոմիկ Իսպիրի Հովհաննիսյանի կողմից առանձնապես խոշոր չափերի` 7.000.000 ՀՀ դրամ հափշտակելու կապակցությամբ:
2012 թվականի մայիսի 29-ին Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Ա.Բեգինյանի որոշմամբ վերացվել է ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի 2012 թվականի մայիսի 15-ի` ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի հիմքով կայացված որոշումը` Ռոմիկ Իսպիրի Հովհաննիսյանի կողմից ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասի 1-ին, 3-րդ կետերով նախատեսված հանցագործություններ կատարելու կապակցությամբ:
2012 թվականի հունիսի 7-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ թիվ 61204411 քրեական գործով վարույթը վերսկսվել է:
2012 թվականի դեկտեմբերի 22-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ թիվ 61204411 քրեական գործով Ռոմիկ Իսպիրի Հովհաննիսյանի կողմից առանձնապես խոշոր չափերի` 7.000.000 ՀՀ դրամ հափշտակելու կապակցությամբ քրեական հետապնդում չի իրականացվել` հանցակազմի բացակայության հիմքով:
2012 թվականի դեկտեմբերի 22-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ թիվ 61204411 քրեական գործով վարույթը կարճվել է և Ռոմիկ Իսպիրի Հովհաննիսյանի նկատմամբ ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասի 1-ին, 3-րդ կետերով քրեական հետապնդում չի իրականացվել` համաներման ակտի ընդունման հիմքով: Լուծարային հանձնաժողովի նախագահ Արամ Հարությունյանի և հանձնաժողովի անդամների նկատմամբ քրեական հետապնդում չի իրականացվել` հանցագործության դեպքի բացակայության պատճառաբանությամբ:
2013 թվականի ապրիլի 23-ին ՀՀ գլխավոր դատախազ Ա.Հովսեփյանի որոշմամբ վերացվել է ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի 2012 թվականի դեկտեմբերի 26-ի` քրեական գործի վարույթը կարճելու և քրեական հետապնդում չիրականացնելու մասին որոշումը:
2013 թվականի ապրիլի 29-ին ՀՀ ոստիկանության Կենտրոնականի քննչական բաժնի քննիչ Լ.Թաթոյանի որոշմամբ թիվ 61204411 քրեական գործն ընդունվել է վարույթ և այն վերսկսվել է:
2013 թվականի մայիսի 24-ին ՀՀ ոստիկանության Կենտրոնականի քննչական բաժնի քննիչ Լ.Թաթոյանի որոշմամբ թիվ 61204411 քրեական գործով Ռոմիկ Իսպիրի Հովհաննիսյանին մեղադրանք է առաջադրվել ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասի 1-ին, 3-րդ կետերով այն արարքների համար, որ նա, հանդիսանալով «Էկրան» ՓԲ ընկերության տնօրեն, առևտրային կազմակերպության ծառայող, իրականացնելով կառավարչական գործառույթներ, խախտելով «Բաժնետիրական ընկերությունների մասին» ՀՀ օրենքի 28-րդ հոդվածի պահանջները, 2009 թվականի հոկտեմբերի 1-ից չունենալով ընկերության գործերի կառավարման լիազորություններ և առանց լուծարման հանձնաժողովի համաձայնության, իր լիազորությունների չարաշահման միջոցով, դրանք օգտագործելով կազմակերպության շահերին հակառակ և իր օգտին, 2009 թվականի հոկտեմբերի 1-ից մինչև 2010 թվականի նոյեմբերի 9-ն ընկած ժամանակահատվածում, ՀՀ Կառավարության որոշմամբ լուծարման գործընթացում գտնվող ընկերության հաշվարկային հաշվից, ԼՂՀ կրթության և գիտության նախարարության հետ պետության կարիքների համար ապրանքների գնման վերաբերյալ 2009 թվականի հուլիսի 16-ին կնքված պայմանագրի համաձայն` 2009 թվականի հուլիսի 31-ին ստացված 7.000.000 ՀՀ դրամից մնացած 4.578.000 ՀՀ դրամը կանխիկացրել է և ծախսել այլ նպատակներով, այդ թվում` որպես առհաշիվ պարտքի մարում իրեն վճարել է 1.587.000 ՀՀ դրամ, որի հետևանքով էական վնաս է պատճառվել պետության իրավունքներին և օրինական շահերին: Բացի այդ, Ռոմիկ Հովհաննիսյանը հանդիսանալով «Էկրան» ՓԲ ընկերության տնօրեն, մինչև 2010 թվականի նոյեմբերի 11-ն ընկած ժամանակահատվածում պաշտոնեական դիրքն օգտագործելով յուրացման և վատման միջոցով հափշտակել է իրեն վստահված ՀՀ կրթության և գիտության նախարարությանը պատկանող խոշոր չափի` 616.000 ՀՀ դրամ արժողությամբ «Էկրան» ՓԲ ընկերության գույքը:
2013 թվականի սեպտեմբերի 10-ին Ռոմիկ Իսպիրի Հովհաննիսյանի վերաբերյալ թիվ 61204411 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0173/01/13 համարը:
2013 թվականի նոյեմբերի 5-ին նշանակված դատական նիստի ժամանակ ամբաստանյալ Ռոմիկ Իսպիրի Հովհաննիսյանի պաշտպան Ռ.Սաֆարյանը Դատարանին միջնորդեց «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման կիրառմամբ թիվ ԵԿԴ/0173/01/13 քրեական գործի վարույթը կարճել և Ռոմիկ Իսպիրի Հովհաննիսյանի նկատմամբ քրեական հետապնդումը դադարեցնել: Ռ.Սաֆարյանը միաժամանակ նշեց, որ ՀՀ կրթության և գիտության նախարարությունն իր պաշտպանյալին պարտք է 4.247.800 ՀՀ դրամ, իսկ ըստ մեղադրանքի կողմի` նա հափշտակել է ՀՀ կրթության և գիտության նախարարությանը պատկանող 616.000 ՀՀ դրամ արժողության գույքը, այսինքն` նշված գումարը պարտք եղած գումարին հաշվակցելու պայմաններում հարթված կլինի ՀՀ քրեական օրենսգրքով չթույլատրված արարքով պատճառված վնասը:
Ամբաստանյալ Ռոմիկ Իսպիրի Հովհաննիսյանը միացավ իր պաշտպանին և հայտնեց, որ չի առարկում, որպեսզի «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման կիրառմամբ թիվ ԵԿԴ/0173/01/13 քրեական գործի վարույթը կարճվի և իր նկատմամբ քրեական հետապնդումը դադարեցվի:
Տուժողի ներկայացուցիչ Ն.Կարապետյանը հայտնեց, որ ինքը, որպես ՀՀ կրթության և գիտության նախարարության ներկայացուցիչ ամբաստանյալ Ռոմիկ Հովհաննիսյանից որևէ պահանջ չունի, քանի որ պետք է հաշվակցում կատարվի նրան պարտք եղած գումարին:
Մեղադրող Թ.Միրզաբեկյանը հայտնեց, որ չի առարկում, որպեսզի «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման կիրառմամբ թիվ ԵԿԴ/0173/01/13 քրեական գործի վարույթը կարճվի և Ռոմիկ Իսպիրի Հովհաննիսյանի նկատմամբ քրեական հետապնդումը դադարեցվի, քանի որ ՀՀ կրթության և գիտության նախարարությունը նրան պարտք է ավելի շատ, քան նրա պատճառած վնասը:
ՀՀ ոստիկանության ինֆորմացիոն կենտրոնի պահանջագրի համաձայն` Ռոմիկ Իսպիրի Հովհաննիսյանը նախկինում դատապարտված չի եղել:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 3-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով սույն որոշման 2-րդ կետում թվարկված անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան հինգ տարի ժամկետով ազատազրկում», իսկ Համաներման որոշման 2-րդ կետում, ի թիվս այլոց, թվարկված են 60 տարին լրացած անձինք:
ՀՀ քրեական օրենսգրքի 214-րդ հոդվածի 1-ին մասի սանկցիան որպես պատիժ նախատեսում է տուգանք` նվազագույն աշխատավարձի երկուհարյուրապատիկից չորսհարյուրապատիկի չափով, կամ կալանք` մեկից երեք ամիս ժամկետով, կամ ազատազրկում` առավելագույնը երկու տարի ժամկետով:
ՀՀ քրեական օրենսգրքի 179-րդ հոդվածի 2-րդ մասի սանկցիան որպես պատիժ նախատեսում է տուգանք` նվազագույն աշխատավարձի հինգհարյուրապատիկից հազարապատիկի չափով, կամ ազատազրկում` երկուսից հինգ տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով առավելագույնը երեք տարի ժամկետով կամ առանց դրա:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 214-րդ հոդվածի 1-ին մասը և 179-րդ հոդվածի 2-րդ մասը, այսինքն` ՀՀ քրեական օրենսգրքի 214-րդ հոդվածի 1-ին մասով և 179-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Համաներման որոշման կիրառման համար:
Դատարանը, հիմք ընդունելով վերը նշվածը և նկատի ունենալով, որ Ռոմիկ Իսպիրի Հովհաննիսյանը խնդրել է իր նկատմամբ կիրառել Համաներման որոշումը, գտնում է, որ Համաներման որոշման կիրառմամբ սույն քրեական գործի վարույթը պետք է կարճել և Ռոմիկ Իսպիրի Հովհաննիսյանի նկատմամբ քրեական հետապնդումը դադարեցնել:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Ռոմիկ Իսպիրի Հովհաննիսյանի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Ռոմիկ Իսպիրի Հովհաննիսյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35-րդ, 41-րդ, 151-րդ, 313-րդ և 379-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը` Դատարանը

Ո Ր Ո Շ Ե Ց

Թիվ ԵԿԴ/0173/01/13 քրեական գործի վարույթը կարճել և Ռոմիկ Իսպիրի Հովհաննիսյան նկատմամբ քրեական հետապնդումը դադարեցնել` համաներման ակտի ընդունման հիմքով:
Որոշումն օրինական ուժի մեջ մտնելուց հետո Ռոմիկ Իսպիրի Հովհաննիսյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Սույն որոշումը կարող է բողոքարկվել Հայաստանի Հանրապետության քրեական վերաքննիչ դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ