ԵԿԴ/0161/01/13
ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ



«16» հոկտեմբեր 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Կ.Կարապետյանի, մասնակցությամբ մեղադրող Ա.Նաղդալյանի, ամբաստանյալ Սերգեյ Մանուկյանի, տուժող Գայանե Կոլոյանի, դռնբաց դատական նիստում քննելով քրեական գործն ըստ մեղադրանքի Սերգեյ Համազասպի Մանուկյանի (ծնված 1975 թվականի հունիսի 11-ին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, նախկինում դատապարտված, չամուսնացած, չի աշխատում, բնակվում է Արմավիրի մարզի Դողս գյուղի Թորոմոնյան փողոցի 5-րդ տանը, որպես խափանման միջոց ընտրվել է չհեռանալու մասին ստորագրությունը)` ՀՀ քրեական օրենսգրքի 177-րդ հոդվածի 1-ին մասով
ՊԱՐԶԵՑ

2013 թվականի հունիսի 26-ին ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնի քննիչ Ս.Դումանյանի որոշմամբ ՀՀ քրեական օրենսգրքի 177-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 15125913 քրեական գործը:
2013 թվականի հուլիսի 19-ին ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնի քննիչ Ս.Դումանյանի որոշմամբ թիվ 15125913 քրեական գործով Սերգեյ Համազասպի Մանուկյանին մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով:
2013 թվականի օգոստոսի 21-ին Սերգեյ Համազասպի Մանուկյանի վերաբերյալ թիվ 15125913 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0161/01/13 համարը:
Սերգեյ Համազասպի Մանուկյանին մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով այն արարքի համար, որ նա 2013 թվականի հունիսի 23-ին` ժամը 21:00-ի սահմաններում, Երևան քաղաքի Տիգրան Մեծ պողոտայից Հանրապետության հրապարակ ընկած տարածքում թիվ 44 համարի երթուղային ավտոբուսի մեջ գաղտնի հափշտակել է Գայանե Կոլոյանի 5.000 ՀՀ դրամ արժողության դրամապանակը, որի մեջ եղել է զգալի չափի` 302.000 ՀՀ դրամ գումար:
Դատական քննության ժամանակ տուժող Գայանե Համլետի Կոլոյանը հայտնեց, որ հաշտվում է ամբաստանյալ Սերգեյ Համազասպի Մանուկյանի հետ: Գայանե Համլետի Կոլոյանը միաժամանակ նշեց, որ գիտակցում է հաշտվելու հետևանքները:
Դատական քննության ժամանակ ամբաստանյալ Սերգեյ Համազասպի Մանուկյանը հայտնեց, որ ինքը նույնպես հաշտվել է տուժող Գայանե Համլետի Կոլոյանի հետ և գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 177-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Գայանե Համլետի Կոլոյանը և ամբաստանյալ Սերգեյ Համազասպի Մանուկյանը հաշտվել են միմյանց հետ, գտնում է, որ թիվ ԵԿԴ/0161/01/13 քրեական գործի վարույթը պետք է կարճել և ամբաստանյալ Սերգեյ Համազասպի Մանուկյանի նկատմամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը դադարեցնել:
Դատարանը գտնում է, որ Սերգեյ Համազասպի Մանուկյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
ՀՀ քրեական դատավարության օրենսգրքի 238-րդ հոդվածը սահմանում է, որ գույքը, քրեական վարույթն իրականացնող մարմնի որոշմամբ ազատվում է կալանքից, եթե քաղաքացիական հայցը ետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը:
Սույն քրեական գործով 2013 թվականի օգոստոսի 12-ին Սերգեյ Համազասպի Մանուկյանի «Սամսունգ» տեսակի բջջային հեռախոսի վրա կալանք դնելու մասին որոշում է կայացվել: Դատարանը, գտնում է, որ 2013 թվականի օգոստոսի 12-ի որոշմամբ Սերգեյ Համազասպի Մանուկյանի «Սամսունգ» տեսակի բջջային հեռախոսի վրա դրված կալանքը պետք է վերացնել, քանի որ դատական քննության ընթացքում տուժող Գայանե Համլետի Կոլոյանի կողմից քաղաքացիական հայցից հրաժարվելու պայմաններում նրա կողմից հարուցած քաղաքացիական հայցի վարույթը կարճվել է, այսինքն` վերացել է Սերգեյ Համազասպի Մանուկյանի գույքի վրա կալանք դնելուց բխող սահմանափակումների կիրառման անհրաժեշտությունը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ, 238-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0161/01/13 քրեական գործի վարույթը կարճել և Սերգեյ Համազասպի Մանուկյանի նկատմամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը դադարեցնել` տուժող Գայանե Համլետի Կոլոյանի հաշտվելու հիմքով:
Սերգեյ Համազասպի Մանուկյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
2013 թվականի օգոստոսի 12-ի որոշմամբ Սերգեյ Համազասպի Մանուկյանի «Սամսունգ» տեսակի բջջային հեռախոսի վրա դրված կալանքը վերացնել:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ