ԵԿԴ/0145/01/13






ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


«23» օգոստոսի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Էդ.Մկրտչյանի, մասնակցությամբ մեղադրող Հ.Մելքոնյանի, տուժող Մ.Սուքիասյանի, ամբաստանյալ Արարատ Հենրիկի Ղարիբյանի, դռնբաց դատական նիստում քննելով քրեական գործն ըստ մեղադրանքի Արարատ Հենրիկի Ղարիբյանի (ծնված 1963 թվականի ապրիլի 25-ին Երևան քաղաքում, ազգությամբ հայ, ՀՀ քաղաքացի, դատվածություն չունեցող, ութամյա կրթությամբ, ամուսնալուծված, չի աշխատում, բնակվում է Երևան քաղաքի Ա.Ավետիսյան փողոցի 23-րդ շենքի 31-րդ բնակարանում, որպես խափանման միջոց ընտրվել է չհեռանալու մասին ստորագրությունը)` ՀՀ քրեական օրենսգրքի 117-րդ հոդվածով
ՊԱՐԶԵՑ

2013 թվականի մայիսի 8-ին ՀՀ ոստիկանության Կենտրոնականի քննչական բաժնի քննիչ Հ.Մանուկյանի որոշմամբ ՀՀ քրեական օրենսգրքի 117-րդ հոդվածով նախատեսված հանցագործության հատկանիշներով հարուցվել և վարույթ է ընդունվել թիվ 15105613 քրեական գործը:
2013 թվականի հունիսի 24-ին ՀՀ ոստիկանության Կենտրոնականի քննչական բաժնի քննիչ Հ.Մանուկյանի որոշմամբ թիվ 15105613 քրեական գործով Արարատ Հենրիկի Ղարիբյանին մեղադրանք է առաջադրվել ՀՀ քրեական օրենսգրքի 117-րդ հոդվածով:
2013 թվականի հուլիսի 27-ին ՀՀ ոստիկանության Կենտրոնականի քննչական բաժնի քննիչ Հ.Մանուկյանի որոշմամբ թիվ 15105613 քրեական գործով Արարատ Ղարիբյանի և Սերգեյ Տեր-Մարկոսյանի նկատմամբ խուլիգանություն կատարելու մասով քրեական հետապնդում չի իրականացվել` նրանց արարքներում հանցակազմի բացակայության հիմքով:
2013 թվականի օգոստոսի 1-ին Արարատ Հենրիկի Ղարիբյանի վերաբերյալ թիվ 15105613 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որին շնորհվել է ԵԿԴ/0145/01/13 համարը:
Արարատ Հենրիկի Ղարիբյանին մեղադրանք է առաջադրվել ՀՀ քրեական օրենսգրքի 117-րդ հոդվածով այն արարքի համար, որ նա, 2013 թվականի ապրիլի 16-ին` ժամը 12:00-ի սահմաններում, Երևան քաղաքի Սարյանի արձանի մոտ վիճաբանել է Մարինա Բագրատի Սուքիասյանի հետ, որի ընթացքում բռունցքով հարվածել է վերջինի դեմքին և դիտավորությամբ նրա առողջությանը պատճառել թեթև վնաս` առողջության կարճատև քայքայումով` քթոսկրի կոտրվածքի, զույգ ստորին կոպերի արյունազեղման ձևով:
Դատական քննության ժամանակ տուժող Մարինա Բագրատի Սուքիասյանը հայտնեց, որ հաշտվել է ամբաստանյալ Արարատ Հենրիկի Ղարիբյանի հետ և նշեց, որ գիտակցում է հաշտվելու հետևանքները:
Դատական քննության ժամանակ ամբաստանյալ Արարատ Հենրիկի Ղարիբյանը հայտնեց, որ ինքը նույնպես հաշտվել է տուժող Մարինա Բագրատի Սուքիասյանի հետ և գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 117-րդ հոդվածով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Մարինա Բագրատի Սուքիասյանը և ամբաստանյալ Արարատ Հենրիկի Ղարիբյանը հաշտվել են միմյանց հետ, գտնում է, որ թիվ ԵԿԴ/0145/01/13 քրեական գործի վարույթը պետք է կարճել և ամբաստանյալ Արարատ Հենրիկի Ղարիբյանի նկատմամբ ՀՀ քրեական օրենսգրքի 117-րդ հոդվածով քրեական հետապնդումը պետք է դադարեցնել:
Դատարանը գտնում է, որ Արարատ Հենրիկի Ղարիբյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0145/01/13 քրեական գործի վարույթը կարճել և Արարատ Հենրիկի Ղարիբյանի նկատմամբ ՀՀ քրեական օրենսգրքի 117-րդ հոդվածով քրեական հետապնդումը դադարեցնել` տուժող Մարինա Բագրատի Սուքիասյանի հաշտվելու հիմքով:
Արարատ Հենրիկի Ղարիբյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ