Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

24 հուլիսի 2013թ. ք. Երևան

ԵԿԴ-0131/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Հայաստանի Հանրապետության /այսուհետ ՀՀ/
զինվորական կենտրոնական դատախազության
ավագ դատախազ Պ. Գյուլումյանի,



դատարանում, դռնբաց դատական նիստում քննեց գործն ըստ մեղադրանքի
Տիգրան Բաբիկի Խաչատրյանի`
ծնված 1989թ. դեկտեմբերի 19-ին Մասիս քաղաքում, հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, բնութագրվում է դրական, աշխատում է ՀՀ պաշտպանության նախարարության թիվ 95532 զորամասում որպես պայմանագրային զինծառայող (շարքային), հաշվառված է և բնակվում է ք. Մասիս, Նոր թաղամասի թիվ 36 շենքի թիվ 31 բնակարանում, կալանքի տակ չէ, մեղադրվում է ՀՀ քրեական օրենսգրքի 235-րդ հոդվածի 4-րդ մասով։



Գործի դատավարական նախապատմությունը

Թիվ 90257613 քրեական գործը ՀՀ պաշտպանության նախարարության քննչական ծառայության 4-րդ կայազորային քննչական բաժնում հարուցվել է 2013թ. հունիսի 07-ին, ՀՀ քրեական օրենսգրքի 235-րդ հոդվածի 4-րդ մասով։
Ամբաստանյալ Տիգրան Բաբիկի Խաչատրյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով` հետևյալ արարքի համար. «որ նա հանդիսանալով ՀՀ ՊՆ 95532 զորամասի պայմանագրային զինծառայող, կոչումով շարքային, 02.05.2013թ., ժամը 11։30-ի սահմաններում, մետրոպոլիտենի «Զորավար Անդրանիկ» կայարանում ապօրինի կերպով կրել է «Վալտեր» տեսակի ձայնագազային ատրճանակ։»։
2013թ. հունիսի 21-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ, ՀՀ պաշտպանության նախարարության թիվ 95532 զորամասի պայմանագրային զինծառայող, շարքային Տիգրան Բաբիկի Խաչատրյանը, 2013թ. մայիսի 02-ին, ժամը 11։30-ի սահմաններում, Երևանի մետրոպոլիտենի «Զորավար Անդրանիկ» կայարանում ապօրինի կերպով, գոտկատեղում թաքցնելով կրել է գազային զենք` «Վալտեր» մակնիշի ձայնագազային ատրճանակ։ Այդ պահին, ՀՀ ոստիկանության Երևան քաղաքի վարչության «Կարեն Դեմիրճյանի» անվան մետրոպոլիտենի պահպանության բաժնի աշխատակիցները, ապօրինի զենք կրելու կասկածանքով Տիգրան Բաբիկի Խաչատրյանին բերման են ենթարկել ՀՀ ոստիկանության Երևան քաղաքի վարչության «Կարեն Դեմիրճյանի» անվան մետրոպոլիտենի պահպանության բաժին, որտեղ ամբաստանյալ Տ. Խաչատրյանի անձնական խուզարկությամբ, նրա տաբատի գոտկատեղի հատվածում հայտնաբերվել է վերոհիշյալ «Վալտեր» մակնիշի ձայնագազային ատրճանակը։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Տիգրան Խաչատրյանը նախկինում դատված չի եղել, բնութագրվում է դրական, իրեն լիովին մեղավոր է ճանաչել և տվել է ինքնախոստովանական ցուցմունքներ։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Տիգրան Բաբիկի Խաչատրյանի ինքնախոստովանական ցուցմունքներով այն մասին, որ 2013թ. ապրիլի 10-ին, ժամը 19։00-ի սահմաններում, Մասիս քաղաքի սպորտ-դպրոցի մոտակայքում քայլելիս` ճամփեզրին նկատել է ձայնագազային ատրճանակ, որը վերցրել, ուսումնասիրել և թաքցնելու նպատակով այն գցել է խոտերի մեջ` հետագայում հնարավորության դեպքում այն օրինականացնելու համար։ 2013թ. ապրիլի 27-ին վերադառնալով հերթափոխից, գնացել է սպորտ-դպրոցի մոտ, ստուգել է ատրճանակի առկայությունը, ուսումնասիրել է այն, որից հետո կրկին ատրճանակը թաքցնելով խոտերի մեջ` հեռացել է։
2013թ. մայիսի 02-ին, ժամը 09։30-ի սահմաններում, նշված տարածքից վերցրել է ձայնագազային ատրճանակը, այն ամրացրել է իր գոտկատեղում և ուղևորվել Երևան` որսորդական խանութ փնտրելու և հնարավորության դեպքում ատրճանակն օրինականացնելու համար, որից հետո որոշել է տեսակցել ընկերուհուն։ Հասնելով Երևան` մետրոպոլիտենի «Սասունցի Դավիթ» կայարանից գնացքով ուղևորվել է «Զորավար Անդրանիկ» կայարան, որտեղ նույն օրը, ժամը 11։30-ի սահմաններում, իրեն են մոտեցել ոստիկանության աշխատակիցներ և ապօրինի կերպով զենք կրելու կասկածանքով իրեն ենթարկել են անձնական խուզարկության, որի ժամանակ իր մոտից հայտնաբերել են «Վալտեր» տեսակի ձայնագազային ատրճանակ։ Նշված ատրճանակի մասին որևէ մեկին չի պատմել։
/դատական նիստի արձանագրություն, գ.թ. 71-73/
Վկա, ՀՀ ոստիկանության Երևան քաղաքի վարչության «Կարեն Դեմիրճյանի» անվան մետրոպոլիտենի պահպանության բաժնի կրտսեր օպեր-լիազոր Պետրոս Հարությունի Պետրոսյանի ցուցմունքներով այն մասին, որ 2013թ. մայիսի 02-ին ծառայություն են իրականացրել Երևանի մետրոպոլիտենի «Զորավար Անդրանիկ» կայարանում։ Նույն օրը, ժամը 11։30-ի սահմաններում, նշված կայարանի նախասրահում նկատել են մի երիտասարդի, որի գոտկատեղում` մեջքի հատվածում, ակնհայտ երևացել է ատրճանակի բռնակ։ Ապօրինի զենք կրելու կասկածանքով մոտեցել են նշված քաղաքացուն, ներկայացել են և նրան հրավիրել են մետրոկայարանի ոստիկանության սենյակ, որտեղ վերջինիս անձնական խուզարկությամբ հայտնաբերվել է «Վալտեր» տեսակի ձայնագազային ատրճանակ։ Պարզվել է, որ նշված քաղաքացին հանդիսանում է Տիգրան Բաբիկի Խաչատրյանը, որը ծառայում է ՀՀ զինված ուժերում։ Տ. Խաչատրյանը հայտարարել է, որ նշված ատրճանակն ինքը գտել է Մասիս քաղաքի սպորտ-դպրոցի ճամփեզրից։
/դատական նիստի արձանագրություն, գ.թ. 53-54/
Վկա, ՀՀ ոստիկանության Երևան քաղաքի վարչության «Կարեն Դեմիրճյանի» անվան մետրոպոլիտենի պահպանության բաժնի քրեական հետախուզության բաժանմունքի կրտսեր օպեր-լիազոր Կարեն Հենրիկի Ստեփանյանի ցուցմունքներով այն մասին, որ 2013թ. մայիսի 02-ին, ժամը 09։00-ից ոստիկանության բաժնի աշխատակիցների հետ ծառայություն են իրականացրել Երևանի մետրոպոլիտենի «Զորավար Անդրանիկ» կայարանում։ Նույն օրը, ժամը 11։30-ի սահմաններում, նշված կայարանի նախասրահում նկատել են մի երիտասարդի, որի գոտկատեղում` մեջքի հատվածում, ակնհայտ երևացել է ատրճանակի բռնակ։ Ապօրինի կերպով զենք կրելու կասկածանքով մոտեցել են նշված քաղաքացուն, ներկայացել են և նրան հրավիրել են մետրոկայարանի ոստիկանության սենյակ, որտեղ վերջինիս անձնական խուզարկությամբ հայտնաբերվել է «Վալտեր» տեսակի ձայնագազային ատրճանակ։ Նշված երիտասարդը հայտարարել է, որ հայտնաբերված ատրճանակը գտել է Մասիս քաղաքի սպորտ-դպրոցի ճամփեզրից։ Պարզվել է, որ վերջինս հանդիսանում է Տիգրան Բաբիկի Խաչատրյանը, որը ծառայում է ՀՀ զինված ուժերում։
/դատական նիստի արձանագրություն, գ.թ. 55-56/
Վկա Բաբիկ Նորիկի Խաչատրյանի ցուցմունքներով այն մասին, որ 2013թ. մայիսի 02-ի առավոտյան, իր որդի Տիգրան Խաչատրյանը տնից դուրս է եկել և ուղևորվել Երևան` ընկերուհուն տեսակցելու համար։ Նույն օրը, ժամը 14։00-ից 15։00-ն ընկած ժամանակահատվածում, որդին զանգահարել և հայտնել է, որ Երևանի մետրոպոլիտենի «Զորավար Անդրանիկ» կայարանում ոստիկանության աշխատակիցները նրա մոտից ատրճանակ են հայտնաբերել և բերման են ենթարկել ոստիկանության բաժին։ Ինքը տեղյակ չի եղել նշված զենքից և որդու մոտ երբևէ զենք չի տեսել։ Տ. Խաչատրյանը նույնպես երբևէ իրեն չի հայտնել, որ զենք ունի։
/դատական նիստի արձանագրություն, գ.թ. 51-52/
Դատաձգաբանական փորձաքննության 2013թ. մայիսի 08-ի թիվ 980 եզրակացությամբ, որի համաձայն` «Ներկայացված արտասահմանյան գործարանային արտադրության «WALTHER PPK» մոդելի առանց համարի 8մմ տրամաչափի ձայնագազային ատրճանակը պիտանի է կրակելու համար, հրազեն չի համարվում։»։
/գ.թ. 28/
Բերման ենթարկելու մասին 2013թ. մայիսի 02-ի արձանագրությամբ, որի համաձայն` 2013թ. մայիսի 02-ին, ժամը 13։00-ին, Տիգրան Բաբիկի Խաչատրյանը, զենք պահելու և կրելու կասկածանքով, Երևանի մետրոպոլիտենի «Զորավար Անդրանիկ» կայարանից բերման է ենթարկվել ՀՀ ոստիկանության Երևան քաղաքի վարչության «Կարեն Դեմիրճյանի» անվան մետրոպոլիտենի պահպանության բաժին։
/գ.թ. 2/
Անձնական խուզարկություն կատարելու մասին 02.05.2013թ. արձանագրությամբ, որի համաձայն` Տիգրան Բաբիկի Խաչատրյանի անձնական խուզարկությամբ, նրա տաբատի գոտկատեղից հայտնաբերվել է առանց փամփուշտների, «Վալտեր» մակնիշի գազային ատրճանակ։
/գ.թ. 3/
Իրեղեն ապացույց ճանաչված, «Վալտեր» մակնիշի ձայնագազային ատրճանակով։
/գ.թ. 79/


Դատարանի իրավական վերլուծությունները.

Վերլուծելով ամբաստանյալ Տիգրան Բաբիկի Խաչատրյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Տիգրան Բաբիկի Խաչատրյանի կողմից, նրա մեղավորությամբ, գազային զենք ապօրինի կերպով կրելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Տիգրան Բաբիկի Խաչատրյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, իրեն լիովին մեղավոր է ճանաչել և տվել է ինքնախոստովանական ցուցմունքներ։
Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ առկա չեն։
Ամբաստանյալ Տիգրան Բաբիկի Խաչատրյանն իր կատարած` Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցագործության համար ենթակա է պատժի տուգանքի ձևով։
Դատարանը գտնում է, որ իր նկատմամբ նշանակված պատիժն ամբաստանյալ Տիգրան Խաչատրյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցի հարցը` դատարանը գտնում է, որ դատավճռի օրինական ուժի մեջ մտնելուց հետո, 29.06.2013թ. որոշմամբ իրեղեն ապացույց ճանաչված, «Վալտեր» տեսակի ձայնագազային ատրճանակը պետք է բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Քննարկելով խափանման միջոցի հարցը` դատարանը գտնում է, որ ամբաստանյալ Տիգրան Խաչատրյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-365-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Տիգրան Բաբիկի Խաչատրյանին մեղավոր ճանաչել Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցանքում և դատապարտել տուգանքի նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 29.06.2013թ. որոշմամբ իրեղեն ապացույց ճանաչված, «Վալտեր» տեսակի ձայնագազային ատրճանակը բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ