ԵԿԴ/0123/01/13







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«24» հուլիսի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Կ.Կարապետյան
մեղադրող Ա.Գալստյան
պաշտպան Կ.Հակոբյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արմեն Արամի Աբգարյանի` ծնված 1982 թվականի օգոստոսի 14-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, դատվածություն չունեցող, բնակվում է Երևան քաղաքի Դրոյի փողոցի 84-րդ տանը, մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով, որպես խափանման միջոց է ընտրվել չհեռանալու մասին ստորագրությունը:
1. Գործի դատավարական նախապատմությունը.
2013 թվականի ապրիլի 2-ին ՀՀ ոստիկանության Կենտրոնականի քննչական բաժնի քննիչ Վ.Ավագյանի որոշմամբ ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 13138413 քրեական գործը:
2013 թվականի հունիսի 11-ին ՀՀ ոստիկանության Կենտրոնականի քննչական բաժնի քննիչ Վ.Ավագյանի որոշմամբ թիվ 13138413 քրեական գործով Արմեն Արամի Աբգարյանին մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով:
2013 թվականի հունիսի 21-ին ՀՀ ոստիկանության Կենտրոնականի քննչական բաժնի քննիչ Վ.Ավագյանի որոշմամբ թիվ 13138413 քրեական գործով Արմեն Արամի Աբգարյանի նկատմամբ խուլիգանություն կատարելու և ապօրինի գազային ատրճանակ կրելու դրվագներով քրեական հետապնդում չի իրականացվել` վերջինի գործողություններում հանցակազմի բացակայության հիմքով:
2013 թվականի հունիսի 28-ին Արմեն Արամի Աբգարյանի վերաբերյալ թիվ 13138413 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0123/01/13 համարը:
Արմեն Արամի Աբգարյանին մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով` այն արարքի համար, որ նա, գտնվելով ալկոհոլի ազդեցության տակ, իր տաբատի գրպանում ապօրինի կրել է սառը զենք հանդիսացող որսորդական ծալովի դանակ, որը վերջինի մոտից հայտնաբերվել է 2013 թվականի մարտի 19-ին ՀՀ ոստիկանության Կենտրոնականի բաժնում:
2. Արագացված դատական քննություն.
Մինչ դատաքննությունն սկսելն ամբաստանյալ Արմեն Արամի Աբգարյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Արամի Աբգարյանը կատարել է արարք` նախատեսված ՀՀ քրեական օրենսգրքի 235-րդ հոդվածի 4-րդ մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, բնութագիրը, եկավ հետևյալ եզրահանգման.
Արմեն Արամի Աբգարյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Դավիթ Սիմոնյանի պատասխանատվությունն ու պատիժը մեղմացնող հանգամանք է դրականորեն բնութագրվելը:
Դատարանը միաժամանակ արձանագրում է, որ Արմեն Արամի Աբգարյանի պատասխանատվությունն ու պատիժը ծանրացնող հանգամանքներ սույն քրեական գործում առկա չեն:
Ինչ վերաբերում է հանցանքն ալկոհոլի ազդեցության տակ կատարելը պատասխանատվությունն ու պատիժը ծանրացնող հանգամանք դիտելուն, ապա ՀՀ քրեական օրենսգրքի 63-րդ հոդվածի 2-րդ մասի համաձայն` դատարանը, ելնելով հանցագործության բնույթից, կարող է ծանրացնող չհամարել հանցանքն ալկոհոլի ազդեցության տակ կատարելը: Դատարանը գտնում է, որ հանցանքն ալկոհոլի ազդեցության տակ կատարելը` որպես պատասխանատվությունն ու պատիժը ծանրացնող հանգամանք, պետք է հաշվի առնել այն դեպքում, երբ ալկոհոլի օգտագործումն ուղղակիորեն ազդել է անձի վարքագծի վրա, այսինքն` հանդիսացել է ՀՀ քրեական օրենսգրքով արգելված արարք կատարելուն նպաստող պայման: Տվյալ դեպքում ամբաստանյալի կողմից հանցանքն ալկոհոլի ազդեցության տակ կատարելը Դատարանը չի դիտում պատասխանատվությունն ու պատիժը ծանրացնող հանգամանք, քանի որ Արմեն Աբգարյանի ալկոհոլի օգտագործումը չի նպաստել նրա կողմից ապօրինի սառը զենք հանդիսացող որսորդական ծալովի դանակ կրելուն:



Կատարած արարքի համար ամբաստանյալ Արմեն Արամի Աբգարյանը ենթակա է քրեական պատասխանատվության և պատժի:
Դատարանը, հաշվի առնելով Արմեն Արամի Աբգարյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանք, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Արմեն Արամի Աբգարյանի կատարած արարքի համար ՀՀ քրեական օրենսգրքի 235-րդ հոդվածի 4-րդ մասի սանկցիայով նախատեսված է պատիժ նաև տուգանքի ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Արմեն Արամի Աբգարյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2013 թվականի ապրիլի 8-ի որոշմամբ իրեղեն ապացույց ճանաչված` սառը զենք հանդիսացող որսորդական ծալովի դանակը պետք է թողնել ՀՀ ոստիկանության տնօրինմանը:
Դատարանը գտնում է, որ դատական ծախսերն ամբաստանյալ Արմեն Արամի Աբգարյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը
ՎՃՌԵՑ

Արմեն Արամի Աբգարյանին մեղավոր ճանաչել ՀՀ քրեական օրենսգրքի 235-րդ հոդվածի 4-րդ մասով և պատիժ նշանակել տուգանք` նվազագույն աշխատավարձի երեքհարյուրապատիկի չափով:
Արմեն Արամի Աբգարյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2013 թվականի ապրիլի 8-ի որոշմամբ իրեղեն ապացույց ճանաչված` սառը զենք հանդիսացող որսորդական ծալովի դանակը թողնել ՀՀ ոստիկանության տնօրինմանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ