Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

09 հուլիսի 2013թ. ք. Երևան

ԵԿԴ-0120/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Գ. Մարգարյանի,



դատարանում, դռնբաց դատական նիստում քննեց գործն ըստ մեղադրանքի
Արտակ Վարդանի Հովհաննիսյանի`
ծնված 1989թ. մարտի 19-ին Եղեգնաձոր քաղաքում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, Երևանի Մալաթիա համայնքի շուկայում զբաղվում է առևտրով, հաշվառված է Վայոց ձորի մարզի Խաչիկ գյուղում, փաստացի, առանց հաշվառման բնակվում է Երևանում, որտեղ մշտական բնակության վայր չունի, կալանքի տակ չէ, մեղադրվում է ՀՀ քրեական օրենսգրքի 268-րդ հոդվածի 1-ին մասով։



Գործի դատավարական նախապատմությունը

Թիվ 15106313 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. մայիսի 14-ին, ՀՀ քրեական օրենսգրքի 268-րդ հոդվածի 1-ին մասով, Արտակ Հովհաննիսյանի կողմից ապօրինի զգալի չափի թմրամիջոց ձեռք բերելու և պահելու դեպքի առթիվ։
Ամբաստանյալ Արտակ Վարդանի Հովհաննիսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 268-րդ հոդվածի 1-ին մասով` հետևյալ արարքի համար. «որ նա 2012թ. սեպտեմբեր ամսվա ընթացքում Վայոց ձորի մարզի Խաչիկ գյուղին հարակից` «Քարակոփ» կոչվող արոտավայրում վայրի աճած կանեփի թուփը քաղելու և չորացնելու միջոցով առանց իրացնելու նկատակի` իր գործածման համար ապօրինի պատրաստել և անասնագոմում պահել է զգալի չափի` 0,98 գրամ «չորացված մարիխուանա» տեսակի թմրամիջոց։
Այնուհետև, Ա. Հովհաննիսյանը 2013թ. ապրիլ ամսին հերթական անգամ Խաչիկ գյուղ այցելելով, իր կողմից ապօրինի պատրաստված թմրամիջոցն անասնագոմից վերցնելով, հետագա գործածման համար այն պահել է վերնաշապիկի գրպանում։
2013թ. մայիսի 01-ին, ժամը 23։30-ի սահմաններում Երևան քաղաքի Մաշտոցի պողոտայում զբոսնելու ընթացքում Ա. Հովհաննիսյանին ոստիկանության աշխատակիցները բերման են ենթարկել ՀՀ ոստիկանության Կենտրոնականի բաժին, որտեղ էլ կատարված անձնական խուզարկության ընթացքում Ա. Հովհաննիսյանի կողմից ապօրինի պատրաստված և պահվող զգալի չափի` 0,98 գրամ «չորացված մարիխուանա» տեսակի թմրամիջոցը հայտնաբերվել է։»։
2013թ. հունիսի 26-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
2012թ. սեպտեմբերին, ամբաստանյալ Արտակ Վարդանի Հովհաննիսյանը, Վայոց ձորի մարզի Խաչիկ գյուղին հարակից, «Քարակոփ» կոչվող արոտավայրում աճած կանեփի թուփը քաղելու և չորացնելու միջոցով, առանց իրացնելու նկատակի` իր գործածման համար ապօրինի պատրաստել և անասնագոմում պահել է զգալի չափի` 0,98 գրամ «չորացված մարիխուանա» տեսակի թմրամիջոց։
Այնուհետև, 2013թ. ապրիլին, ամբաստանյալ Ա. Հովհաննիսյանը հերթական անգամ գնացել է Խաչիկ գյուղ և իր կողմից ապօրինի պատրաստված թմրամիջոցն անասնագոմից վերցնելով` հետագա գործածման համար այն պահել է վերնաշապիկի գրպանում։
2013թ. մայիսի 01-ին, ժամը 23։30-ի սահմաններում, Երևան քաղաքի Մաշտոցի պողոտայում զբոսնելու ընթացքում ամբաստանյալ Ա. Հովհաննիսյանը բերման է ենթարկվել ՀՀ ոստիկանության Երևան քաղաքի վարչության Կենտրոնականի բաժին, որտեղ ենթարկվել է անձնական խուզարկության։ Ա. Հովհաննիսյանի վերնաշապիկի գրպանից հայտնաբերվել է նրա կողմից ապօրինի պատրաստված և պահվող զգալի չափի` 0,98 գրամ «չորացված մարիխուանա» տեսակի թմրամիջոցը։
Քրեական գործի նախաքննության ընթացքում, Հայաստանի Հանրապետության «Փորձաքննությունների ազգային բյուրո» ՊՈԱԿ-ում կատարվել է տոքսիկոքիմիական փորձաքննություն, որի արժեքը կազմել է 19.236 /տասնինը հազար երկու հարյուր երեսունվեց/ ՀՀ դրամ գումար։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Արտակ Հովհաննիսյանը նախկինում դատված չի եղել, իրեն լիովին մեղավոր է ճանաչել և տվել է ինքնախոստովանական ցուցմունքներ։




Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Արտակ Վարդանի Հովհաննիսյանի ինքնախոստովանական ցուցմունքներով այն մասին, որ 2012թ. սեպտեմբերին, Վայոց ձորի մարզի Խաչիկ գյուղին հարակից, «Քարակոփ» կոչվող արոտավայրում գտնվելու ժամանակ այնտեղից հավաքել է կանեփանման թուփ, որը հետագայում պահել է Խաչիկ գյուղում գտնվող իրենց տան անասնագոմում։ 2013թ. ապրիլին, հերթական անգամ Խաչիկ գյուղ այցելության ժամանակ, իր կողմից անասնագոմում պահված կանեփի թուփը վերցրել և պահել է իր մոտ, այնուհետև այն տեղափոխել է Երևան` իր կողմից հետագա գործածման համար։
2013թ. մայիսի 01-ին, ժամը 21։30-ի սահմաններում, Երևանի Մաշտոցի պողոտայում զբոսնելու ընթացքում, ոստիկանության աշխատակիցներն իրեն բերման են ենթարկել ՀՀ ոստիկանության Կենտրոնականի բաժին, որտեղ իր անձնական խուզարկությամբ հայտնաբերվել է նշված թմրամիջոցը։
/դատական նիստի արձանագրություն, գ.թ. 29-31, 40-42/
Դատաքիմիական փորձաքննության 2013թ. մայիսի 06-ի թիվ 161Ք եզրակացությամբ, որի համաձայն`
«1. Փորձաքննության ներկայացված բուսական ծագմամբ 0,98 գրամ հաստատուն քաշով նյութը հանդիսանում է չորացված մարիխուանա տեսակի թմրամիջոց։
2. Մարիխուանա տեսակի թմրամիջոցը պատրաստվում է տնայնագործական եղանակով կանեփի բույսից։
Ծանոթություն. հետազոտությամբ ծախսվեց 0,1 գրամ նյութ մարիխուանա տեսակի թմրամիջոցից։»։
/գ.թ. 16-18/
Որպես այլ փաստաթուղթ` ապացույց ճանաչված, անձին ոստիկանության բաժին բերման ենթարկելու մասին 01.05.2013թ. արձանագրությամբ, որի համաձայն` 2013թ. մայիսի 01-ին, ժամը 23։30-ին, Արտակ Վարդանի Հովհաննիսյանը, թմրանյութ օգտագործելու և պահելու կասկածանքով, Երևանի Մաշտոցի պողոտայից բերման է ենթարկվել ՀՀ ոստիկանության Երևան քաղաքի վարչության Կենտրոնականի բաժին։
/գ.թ. 3, 64/
Որպես այլ փաստաթուղթ` ապացույց ճանաչված, անձին ոստիկանության բաժնում խուզարկության ենթարկելու մասին 01.05.2013թ. արձանագրությամբ, որի համաձայն` Արտակ Հովհաննիսյանի անձնական խուզարկությամբ, նրա վերնաշապիկի ձախ գրպանից հայտնաբերվել է պոլիէթիլենային փաթեթ, որի մեջ առկա է եղել շուրջ 1,2 գրամ քաշով դեղնականաչավուն զանգված։
/գ.թ. 4, 64/
Որպես այլ փաստաթուղթ` ապացույց ճանաչված, ՀՀ ոստիկանության Երևան քաղաքի վարչության Կենտրոնականի բաժնի քրեական հետախուզության բաժանմունքի ավագ օպեր-լիազոր Կ. Հովսեփյանի 01.05.2013թ. զեկուցագրով, որի համաձայն` 2013թ. մայիսի 01-ին, ժամը 23։30-ին, իրացնելով օպերատիվ տվյալները` Երևանի Մաշտոցի պողոտայի և Արամի փողոցի խաչմերուկից, թմրանյութ պահելու և օգտագործելու կասկածանքով ՀՀ ոստիկանության Երևան քաղաքի վարչության Կենտրոնականի բաժին բերման են ենթարկել Վայոց ձորի մարզի Խաչիկ գյուղի բնակիչ, 17.03.1989թ. ծնված Արտակ Վարդանի Հովհաննիսյանին, որի անձնական խուզարկությամբ հայտնաբերվել է շուրջ 1,2 գրամ քաշով դեղնականաչավուն զանգված։
/գ.թ. 2, 64/



Դատարանի իրավական վերլուծությունները.

Վերլուծելով ամբաստանյալ Արտակ Վարդանի Հովհաննիսյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Արտակ Վարդանի Հովհաննիսյանի կողմից, նրա մեղավորությամբ, առանց իրացնելու նպատակի զգալի չափերով թմրամիջոցներ ապօրինի պատրաստելը և պահելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 268-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Արտակ Վարդանի Հովհաննիսյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, իրեն լիովին մեղավոր է ճանաչել և տվել է ինքնախոստովանական ցուցմունքներ։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ առկա չեն։
Ամբաստանյալ Արտակ Վարդանի Հովհաննիսյանն իր կատարած` Հայաստանի Հանրապետության քրեական օրենսգրքի 268-րդ հոդվածի 1-ին մասով նախատեսված հանցագործության համար ենթակա է պատժի կալանքի ձևով։
Դատարանը գտնում է, որ իր նկատմամբ նշանակված պատիժն ամբաստանյալ Արտակ Հովհաննիսյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 14.06.2013թ. որոշմամբ իրեղեն ապացույց ճանաչված, 0,98 գրամ քաշով «չորացված մարիխուանա» տեսակի թմրամիջոցը պետք է ոչնչացնել։
Քննարկելով խափանման միջոցի հարցը` դատարանը գտնում է, որ ամբաստանյալ Արտակ Հովհաննիսյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է, որ ամբաստանյալ Արտակ Վարդանի Հովհաննիսյանից հօգուտ ՀՀ պետական բյուջեի բռնագանձման է ենթակա տոքսիկոքիմիական փորձաքննության արժեք հանդիսացող 19.236 /տասնինը հազար երկու հարյուր երեսունվեց/ ՀՀ դրամ գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-365-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Արտակ Վարդանի Հովհաննիսյանին մեղավոր ճանաչել Հայաստանի Հանրապետության քրեական օրենսգրքի 268-րդ հոդվածի 1-ին մասով նախատեսված հանցանքում և դատապարտել կալանքի 1 /մեկ/ ամիս ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով կալանավորման պահից։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 14.06.2013թ. որոշմամբ իրեղեն ապացույց ճանաչված, 0,98 գրամ քաշով «չորացված մարիխուանա» տեսակի թմրամիջոցը ոչնչացնել։
Ամբաստանյալ Արտակ Վարդանի Հովհաննիսյանից հօգուտ ՀՀ պետական բյուջեի բռնագանձել 19.236 /տասնինը հազար երկու հարյուր երեսունվեց/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ