Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

12 հուլիսի 2013թ. ք. Երևան

ԵԿԴ-0110/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Գ. Մարգարյանի,



դատարանում, դռնբաց դատական նիստում քննեց գործն ըստ մեղադրանքի
Կարեն Արշակի Ավանեսյանի`
ծնված 1979թ. օգոստոսի 05-ին Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, ութամյա կրթությամբ, ամուրի, խնամքին ոչ ոք, նախկինում չդատված, բնութագրվում է դրական, վատառողջ է` 2-րդ խմբի հաշմանդամ, չի աշխատում, հաշվառված է և բնակվում է ք. Երևան, Ավան, Սայաթ-Նովա թաղամասի թիվ 8/1 շենքի թիվ 4 բնակարանում, կալանքի տակ չէ, մեղադրվում է ՀՀ քրեական օրենսգրքի 235-րդ հոդվածի 4-րդ մասով։



Գործի դատավարական նախապատմությունը

Թիվ 15122913 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. հունիսի 18-ին, ՀՀ քրեական օրենսգրքի 235-րդ հոդվածի 4-րդ մասով, Կարեն Արշակի Ավանեսյանի կողմից ապօրինի սառը զենք կրելու դեպքի առթիվ։
Ամբաստանյալ Կարեն Արշակի Ավանեսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով` հետևյալ արարքի համար. «որ նա ձեռք է բերել և ապօրինի կերպով կրել է սառը զենք հանդիսացող` սևեռվող շեղբով գործարանային արտադրության որսորդական դանակ, որը վերջինիս մոտ 2013թ. հուլիսի 05-ին ժամը 15.10-ին հայտնաբերվել է Երևան քաղաքի Ամիրյան փողոցում ծառայություն կատարող ՀՀ ոստիկանության ՊՊԾ գնդի 5-րդ հատուկ գումարտակի աշխատակիցների կողմից։»։
2013թ. հունիսի 21-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Կարեն Արշակի Ավանեսյանը, 2013թ. սկզբներին, Երևան քաղաքում, խանութից գնել է սառը զենք հանդիսացող, քաղաքացիական շեղբով գործարանային արտադրության որսորդական դանակ, որն անդրավարտիքի գոտկատեղում ամրացնելով` ապօրինի կրել է։
2013թ.-ի հունիսի 05-ին, ժամը 15։10-ի սահմաններում, ամբաստանյալ Կ. Ավանեսյանը, Երևան քաղաքի Մաշտոցի պողոտայում գործող տարադրամի փոխանակման կետում գործարք կատարելուց հետո մոտեցել է Երևանի Ամիրյան փողոցի թիվ 19 շենքի մոտակայքում գտնվող ցայտաղբյուրին և կռանալով` ջուր է խմել։ Այդ ընթացքում մոտակայքում ծառայություն իրականացնող, ՀՀ ոստիկանության ՊՊԾ գնդի 5-րդ գումարտակի ոստիկաններ Տիգրան Ստեփանյանը և Գևորգ Վարդանյանը նկատել են ամբաստանյալ Կ. Ավանեսյանի կողմից ապօրինի կերպով կրվող սառը զենքը, ուստի մոտեցել են և պահանջել են ներկայացնել այն։ Ամբաստանյալ Կ. Ավանեսյանը կատարել է ոստիկանների պահանջը և ներկայացրել է անդրավատիքի գոտկատեղում ապօրինի կերպով կրվող, սառը զենք հանդիսացող, գործարանային արտադրության ընդհանուր նշանակության որսորդական դանակը։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Կարեն Ավանեսյանը նախկինում դատված չի եղել, բնութագրվում է դրական, վատառողջ է` 2-րդ խմբի հաշմանդամ է, իրեն լիովին մեղավոր է ճանաչել և տվել է ինքնախոստովանական ցուցմունքներ։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Կարեն Արշակի Ավանեսյանի ինքնախոստովանական ցուցմունքներով այն մասին, որ 2013թ.-ի սկիզբներին, Երևան քաղաքում գործող խանութներից մեկից գնել է ծալովի դանակ, որն անդրավարտիքի գոտկատեղում ամրացնելով` կրել է ապահովության համար։
2013թ. հունիսի 05-ին, ժամը 15։00-ի սահմաններում, Երևան քաղաքի Մաշտոցի պողոտայում գործող տարադրամի փոխանակման կետում տարադրամ է փոխանակել, որից հետո մոտեցել է քիչ հեռվում գտնվող ցայտաղբյուրին և մի փոքր կռանալով` ջուր է խմել։ Մոտակայքում ծառայություն իրականացնող ՀՀ ոստիկանության աշխատակիցները հավանաբար նկատելով իր կողմից կրվող դանակը` մոտեցել են իրեն և պահանջել են ներկայացնել գոտկատեղում կրվող դանակը, ինչն էլ ինքը կատարել է։ Դրանից հետո իրեն ուղեկցել են ՀՀ ոստիկանության Կենտրոնականի բաժին։
Այդ դանակը ձեռք է բերել ինքնապաշտպանության համար, քանի որ 2013թ. հունվարի 9-ին հարձակում է կատարվել իր եղբոր վրա և նրան ծանր մարմնական վնասվածքներ են պատճառել։ Քանի որ դեպքը չի բացահայտվել, ուստի ենթադրել է, որ նման դեպք կարող է կրկնվել և դրանից պաշտպանվելու համար այդ դանակն է կրել։
/դատական նիստի արձանագրություն, գ.թ. 20-21, 33/
Վկա, ՀՀ ոստիկանության ՊՊԾ գնդի 5-րդ հատուկ գումարտակի 2-րդ վաշտի ավագ ոստիկան Տիգրան Վարդանի Ստեփանյանի ցուցմունքներով այն մասին, որ 2013թ. հունիսի 05-ին, ժամը 15.10-ի սահմաններում, Երևան քաղաքի Ամիրյան փողոցում, նույն գումարտակի ոստիկան Գևորգ Վարդանյանի հետ ծառայություն կատարելու ընթացքում նկատել են ցայտաղբյուրից ջուր խմող անծանոթ անձնավորության, որի անդրավարտիքի գոտկատեղից դանակին նմանվող իր է կախված եղել։ Մոտեցել են նրան և պահանջել են ներկայացնել նշված իրը։ Անծանոթ անձնավորությունն իրենց պահանջով ներկայացրել է դանակ, որից հետո կանչել են պարեկային ավտոմեքենա և նշված անձնավորությանը տեղափոխել են ՀՀ ոստիկանության Երևան քաղաքի վարչության Կենտրոնականի բաժին։ Այնտեղ պարզվել է, որ նա հանդիսանում է Երևան քաղաքի բնակիչ Կարեն Ավանեսյանը։
/դատական նիստի արձանագրություն, գ.թ. 24-25/
Վկա, ՀՀ ոստիկանության ՊՊԾ գնդի 5-րդ հատուկ գումարտակի 2-րդ վաշտի 1-ին դասակի ծառայության տեսուչ Գևորգ Խաչատուրի Վարդանյանի ցուցմունքներով այն մասին, որ 2013թ. հունիսի 05-ին, ժամը 15.10-ի սահմաններում, Երևան քաղաքի Ամիրյան փողոցում, նույն գումարտակի ոստիկան Տիգրան Ստեփանյանի հետ ծառայություն կատարելու ընթացքում նկատել են ցայտաղբյուրից ջուր խմող անծանոթ անձնավորության, որի անդրավարտիքի գոտկատեղից դանակին նմանվող իր է կախված եղել։ Մոտեցել են նրան և պահանջել են ներկայացնել նշված իրը։ Անծանոթ անձնավորությունն իրենց պահանջով ներկայացրել է դանակ, որից հետո կանչել են պարեկային ավտոմեքենա և նշված անձնավորությանը տեղափոխել են ՀՀ ոստիկանության Երևան քաղաքի վարչության Կենտրոնականի բաժին։ Այնտեղ պարզվել է, որ նա հանդիսանում է Երևան քաղաքի բնակիչ Կարեն Ավանեսյանը։
/դատական նիստի արձանագրություն, գ.թ. 27-28/
Դատատեխնիկական փորձաքննության 2013թ. հունիսի 12-ի թիվ 1308 եզրակացությամբ, որի համաձայն` «Փորձաքննության ներկայացված սևեռվող շեղբով ծալովի դանակը գործարանային արտադրության ընդհանուր նշանակության ծավալի որսորդական դանակ է, դասվում է քաղաքացիական շեղբավոր սառը զենքերի շարքին։»։
/գ.թ. 7-8/
Որպես այլ փաստաթուղթ` ապացույց ճանաչված, ՀՀ ոստիկանության ՊՊԾ գնդի 5-րդ հատուկ գումարտակի 2-րդ վաշտի 1-ին դասակի ծառայության տեսուչ Գևորգ Վարդանյանի զեկուցագրով, որի համաձայն` 2013թ. հունիսի 5-ին, նույն գումարտակի 2-րդ վաշտի ավագ ոստիկան Տիգրան Ստեփանյանի հետ ծառայություն են իրականացրել Կենտրոն վարչական շրջանում։ Ժամը 15։10-ի սահմաններում, Երևանի Մաշտոցի պողոտայի և Ամիրյան փողոցի խաչմերուկում գտնվող «Արայ» խանութի մոտ նկատել են մի տղամարդու, որի տաբատի գոտկատեղից ամրակով և կասկածելի ուրվագծով իր են նկատել։ Մոտեցել են նշված տղամարդուն, ներկայացել են և պահանջել են ներկայացնել ամրակով կասկածելի իրը։ Վերջինս իր ձեռքով ներկայացրել է ֆիքսվող փականով, սև մետաղից դանակ, որի երկարությունը 23սմ է եղել, շեղբի երկարությունը 10սմ, իսկ բռնակի երկարությունը` 13սմ։ Այնուհետև ռադիոկապով կանչել են 0651 պարեկային ավտոմեքենան և նշված քաղաքացուն, դանակի հետ միասին ներկայացրել են ՀՀ ոստիկանության Երևան քաղաքի վարչության Կենտրոնականի բաժին, որտեղ պարզվել է, որ նշված քաղաքացին հանդիսանում է Կարեն Արշակի Ավանեսյանը։
/գ.թ. 2,14/
Իրեղեն ապացույց ճանաչված, սառը զենք հանդիսացող որսորդական դանակով։
/գ.թ. 13/


Դատարանի իրավական վերլուծությունները.

Վերլուծելով ամբաստանյալ Կարեն Արշակի Ավանեսյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Կարեն Արշակի Ավանեսյանի կողմից, նրա մեղավորությամբ, սառը զենք ապօրինի կերպով կրելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Կարեն Արշակի Ավանեսյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, վատառողջ է` 2-րդ խմբի հաշմանդամ է, իրեն լիովին մեղավոր է ճանաչել և տվել է ինքնախոստովանական ցուցմունքներ։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ առկա չեն։
Ամբաստանյալ Կարեն Արշակի Ավանեսյանն իր կատարած` Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցագործության համար ենթակա է պատժի տուգանքի ձևով։
Դատարանը գտնում է, որ իր նկատմամբ նշանակված պատիժն ամբաստանյալ Կարեն Ավանեսյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցի հարցը` դատարանը գտնում է, որ դատավճռի օրինական ուժի մեջ մտնելուց հետո, 18.06.2013թ. որոշմամբ իրեղեն ապացույց ճանաչված որսորդական դանակը պետք է բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Քննարկելով խափանման միջոցի հարցը` դատարանը գտնում է, որ ամբաստանյալ Կարեն Ավանեսյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-365-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Կարեն Արշակի Ավանեսյանին մեղավոր ճանաչել Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցանքում և դատապարտել տուգանքի նվազագույն աշխատավարձի երկուհարյուրհիսնապատիկի` 250.000 /երկու հարյուր հիսուն հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 18.06.2013թ. որոշմամբ իրեղեն ապացույց ճանաչված որսորդական դանակը բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ