ԵԿԴ/0107/01/13





ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

«22» հուլիսի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Կ.Կարապետյանի, մասնակցությամբ մեղադրող Ա.Նադոյանի, ամբաստանյալ Կառլեն Միրզոյանի, պաշտպան Ս.Ասլանյանի, տուժող Անտոն Ավդալյանի, տուժողի ներկայացուցիչ Ա.Ղազարյանի, դռնբաց դատական նիստում քննելով քրեական գործն ըստ մեղադրանքի Կառլեն Ալեքսեյի Միրզոյանի (ծնված 1984 թվականի հունիսի 12-ին ԼՂՀ Հադրութի շրջանի Ցոր գյուղում, ազգությամբ հայ, ՀՀ քաղաքացի, նախկինում չդատապարտված, բարձրագույն կրթությամբ, չամուսնացած, բնակվում է Երևան քաղաքի Նորագյուղ թաղամասի 362-րդ տանը, որպես խափանման միջոց ընտրվել է չհեռանալու մասին ստորագրությունը)` ՀՀ քրեական օրենսգրքի 242-րդ հոդվածի 1-ին մասով
ՊԱՐԶԵՑ

2013 թվականի ապրիլի 17-ին ՀՀ հատուկ քննչական ծառայության ՀԿԳ քննիչ Ա.Գրիգորյանի որոշմամբ ՀՀ քրեական օրենսգրքի 242-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 62203713 քրեական գործը:
2013 թվականի հունիսի 1-ին ՀՀ հատուկ քննչական ծառայության ՀԿԳ քննիչ Ա.Գրիգորյանի որոշմամբ Գեղամ Գևորգյանի առողջությանն անզգուշությամբ միջին ծանրության վնաս պատճառելու մասով` ՀՀ քրեական օրենսգրքի 242-րդ հոդվածի 1-ին մասով Կառլեն Միրզոյանի նկատմամբ քրեական հետապնդում չի իրականացվել` դիմողի բողոքի բացակայության պատճառաբանությամբ:
2013 թվականի հունիսի 3-ին ՀՀ հատուկ քննչական ծառայության ՀԿԳ քննիչ Ա.Գրիգորյանի որոշմամբ թիվ 62203713 քրեական գործով Կառլեն Ալեքսեյի Միրզոյանին մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով:
2013 թվականի հունիսի 17-ին Կառլեն Ալեքսեյի Միրզոյանի վերաբերյալ թիվ 62203713 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0107/01/13 համարը:
Կառլեն Ալեքսեյի Միրզոյանին մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով այն արարքի համար, որ նա, 2013 թվականի մարտի 2-ին` ժամը 08:20-ի սահմաններում, իր վարած «Մերսեդես» մակնիշի 28ՍԼ916 պետհամարանիշի ավտոմեքենայով Երևան քաղաքի Ծովակալ Իսակովի պողոտայի և Վերֆել փողոցի խաչմերուկում հետադարձ կատարելիս, խախտելով «Ճանապարհային երթևեկության անվտանգության մասին» ՀՀ օրենքի 23-րդ հոդվածի 3-րդ մասի և Ճանապարհային երթևեկության կանոնների 36-րդ և 99-րդ կետերի պահանջները` նախապես չհամոզվելով հետադարձ կատարելու անվտանգության մեջ, ճանապարհը չի զիջել հանդիպակաց ուղղությամբ ընթացող «Զազ-Սենս» մակնիշի 15ՍՕ385 պետհամարանիշի ավտոմեքենային, բախվել է վերջինին, որի հետևանքով «Զաս-Սենս» մակնիշի ավտոմեքենայի վարորդ, ՀՀ ոստիկանության կրթահամալիրի քոլեջի ուսանող, ոստիկանության կրտսեր սերժանտ Անտոն Ավդալյանի առողջությանն անզգուշությամբ պատճառվել է ծանր վնաս:
Դատական քննության ժամանակ տուժող Անտոն Աբելի Ավդալյանը հայտնեց, որ հաշտվել է ամբաստանյալ Կառլեն Ալեքսեյի Միրզոյանի հետ և նշեց, որ գիտակցում է հաշտվելու հետևանքները:
Դատական քննության ժամանակ ամբաստանյալ Կառլեն Ալեքսեյի Միրզոյանը հայտնեց, որ ինքը նույնպես հաշտվել է տուժող Անտոն Աբելի Ավդալյանի հետ և գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 242-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Անտոն Աբելի Ավդալյանը և ամբաստանյալ Կառլեն Ալեքսեյի Միրզոյանը հաշտվել են միմյանց հետ, գտնում է, որ թիվ ԵԿԴ/0107/01/13 քրեական գործի վարույթը պետք է կարճել և ամբաստանյալ Կառլեն Ալեքսեյի Միրզոյանի նկատմամբ ՀՀ քրեական օրենսգրքի 242-րդ հոդվածի 1-ին մասով քրեական հետապնդումը պետք է դադարեցնել:
Դատարանը գտնում է, որ Կառլեն Ալեքսեյի Միրզոյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0107/01/13 քրեական գործի վարույթը կարճել և Կառլեն Ալեքսեյի Միրզոյանի նկատմամբ ՀՀ քրեական օրենսգրքի 242-րդ հոդվածի 1-ին մասով քրեական հետապնդումը դադարեցնել` տուժող Անտոն Աբելի Ավդալյանի հաշտվելու հիմքով:
Կառլեն Ալեքսեյի Միրզոյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ