ԵԿԴ/0105/01/13



Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

20 նոյեմբերի 2013թ. ք.Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ` Ա.ԴԱՆԻԵԼՅԱՆ
ԴԱՏԱՎՈՐՆԵՐ` Ա.ԽԱՉԱՏՐՅԱՆ
Լ.ԹԱԴԵՎՈՍՅԱՆ

ՔԱՐՏՈՒՂԱՐՈՒԹՅԱՄԲ` Մ.ՄԱՀՏԵՍՅԱՆԻ

ՄԱՍՆԱԿՑՈՒԹՅԱՄԲ`

ՄԵՂԱԴՐՈՂ` Ա.ԲԵԳԻՆՅԱՆԻ

ՊԱՇՏՊԱՆ` Մ.ԳՐԻԳՈՐՅԱՆԻ

ԱՄԲԱՍՏԱՆՅԱԼՆԵՐ` Ա.ԱԼԵՔՍԱՆՅԱՆԻ
Տ.ՔՈԼՈՅԱՆԻ

Դռնբաց դատական նիստում քննության առնելով պաշտպանի վերաքննիչ բողոքը` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռի դեմ.

Պ Ա Ր Զ Ե Ց

Գործի դատավարական նախապատմությունը.

2012 թվականի հոկտեմբերի 19-ին ՀՀ քրեական օրենսգրքի 176-րդ հոդվածի 1-ին մասի հատկանիշներով հարուցվել է թիվ 15114612 քրեական գործը:
2013 թվականի մայիսի 06-ին որոշում է կայացվել թիվ 15114613 քրեական գործի նյութերով Արսեն Ալեքսանյանի և Տիգրան Քոլոյանի կողմից սուտ մատնություն կատարելու դեպքի առթիվ ՀՀ քրեական օրենսգրքի 333-րդ հոդվածի 1-ին մասով թիվ 15104113 քրեական գործ հարուցելու մասին:
2013 թվականի մայիսի 14-ին որոշում է կայացվել Արսեն Սուրենի Ալեքսանյանին ՀՀ քրեական օրենսգրքի 333-րդ հոդվածի 1-ին մասով որպես մեղադրյալ ներգրավելու մասին:
2013 թվականի մայիսի 14-ին որոշում է կայացվել Տիգրան Ազատի Քոլոյանին ՀՀ քրեական օրենսգրքի 333-րդ հոդվածի 1-ին մասով որպես մեղադրյալ ներգրավելու մասին:
2013 թվականի հունիսի 17-ին քրեական գործը մեղադրական եզրակացությամբ ուղարկվել է Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան:
Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռով.
Արսեն Սուրենի Ալեքսանյանը ճանաչվել է մեղավոր ՀՀ քրեական օրենսգրքի 333-րդ հոդվածի 1-ին մասով նախատեսված հանցագործության կատարման մեջ, նրա նկատմամբ նշանակվել է պատիժ` տուգանք 300.000 /երեք հարյուր հազար/ ՀՀ դրամի չափով:
Արսեն Ալեքսանյանի նկատմամբ որպես խափանման միջոց ընտրված չհեռանալու մասին ստորագրությունը վերացնել` սույն դատավճիռն օրինական ուժի մեջ մտնելուց հետո:
Տիգրան Ազատի Քոլոյանը ճանաչվել է մեղավոր ՀՀ քրեական օրենսգրքի 333-րդ հոդվածի 1-ին մասով նախատեսված հանցագործության կատարման մեջ, նրա նկատմամբ նշանակվել է պատիժ` տուգանք 300.000 /երեք հարյուր հազար/ ՀՀ դրամի չափով:
Տիգրան Քոլոյանի նկատմամբ որպես խափանման միջոց ընտրված չհեռանալու մասին ստորագրությունը վերացնել` սույն դատավճիռն օրինական ուժի մեջ մտնելուց հետո:
Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռի դեմ վերաքննիչ բողոք է ներկայացրել պաշտպան` Մ.Գրիգորյանը:

Գործի փաստական հանգամանքները.

Ընդհանուր իրավասության դատարանը հաստատված է համարել այն, որ ամբաստանյալներ Տիգրան Քոլոյանը և Արսեն Ալեքսանյանը, գիտակցելով իրենց տրամադրած տեղեկատվության կեղծ լինելու հանգամանքը, ՀՀ ոստիկանության Կենտրոնական բաժնում համապատասխանաբար` 2012 թվականի սեպտեմբերի 25-ին և 2012 թվականի հոկտեմբերի 15-ին հաղորդում են տվել այն մասին, թե իբր 2012 թվականի սեպտեմբերի 25-ին, ժամը 01:09-ին Երևան քաղաքի Բեյրութի փողոցի վրա` Մանկական զբոսայգու մոտ, նրանց, ինչպես նաև Գևորգ Քոլոյանին, Հարություն Կարապետյանին դիտավորությամբ ծեծի են ենթարկել մի խումբ անձինք, իսկ մինչ այդ վերջիններիցս մեկը` Վիգեն Այվազյանը, բացահայտ հափշտակել, այսինքն` կողոպտել է Արսեն Ալեքսանյանի պայուսակը, որի մեջ եղել է զգալի չափի` 200 ԱՄՆ դոլար գումար:

Վերաքննիչ բողոքի հիմքերը, հիմնավորումները և պահանջը.

Պաշտպան` Մ.Գրիգորյանը վկայակոչելով իր իսկ վերաքննիչ բողոքում նշված պատճառաբանությունները, խնդրել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի թիվ ԵԿԴ/0105/01/13 քրեական գործով 28.08.2013թ.-ին կայացված դատավճիռը բեկանել և Արսեն Ալեքսանյանին և Տիգրան Քոլոյանին արդարացնել:
Վերաքննիչ բողոքը ներկայացվել է հետևյալ հիմնավորումներով.
Դատարանը թույլ է տվել նյութական և դատավարական իրավունքի նորմերի խախտումներ, չի կիրառել այն օրենքը, որը պետք է կիրառեր:
Ա.Ալեքսանյանի և Տ.Քոլոյանի վերաբերյալ գործի քննության ընթացքում խախտվել է արդարացի քննության իրավունքը:
Նախաքննության մարմինը միջոցներ չձեռնարկելով բացահայտելու համար այն անձանց, ովքեր դեպքի վայրից դիմել են փախուստի առանց բավարար ապացույցների Ա.Ալեքսանյանին և Տ.Քոլոյանին մեղադրանք են առաջադրել ՀՀ քրեական օրենսգրքի 333-րդ հոդվածի առաջին մասով, որն էլ դատարանն առանց որևէ հիմնավորումների հաստատված համարեց:
ՀՀ քրեական օրենսգրքի 333-րդ հոդվածը սուտ մատնությունը սահմանում է որպես հանցագործության մասին սուտ մատնություն, եթե անձը գործել է, գիտակցելով, որ իր տրամադրած տեղեկատվությունը կեղծ է: Այսինքն` նախաքննության մարմինը պետք է ապացուցեր անձի ուղղակի դիտավորությունը գիտակցված կեղծ տեղեկատվություն տրամադրելու մեջ: Այն, որ նախաքննության մարմինն անարդյունավետ նախաքննության արդյունքում չի ապացուցում անձի հայտնած տեղեկատվության հիմքում ընկած հանգամանքները, չի կարող հիմք հանդիսանալ անձին սուտ մատնության մեջ մեղադրելու համար:
Հարկ է արձանագրել, որ վերաքննիչ դատարանում, դատական նիստում, պաշտպանության կողմն ըստ էության պնդելով իր իսկ ներկայացված վերաքննիչ բողոքը, խնդրեց այն բավարարել:

Վերաքննիչ դատարանի պատճառաբանությունները և եզրահանգումը.

Վերաքննիչ բողոքում նշված հիմքերի և հիմնավորումների սահմաններում վերլուծելով գործի նյութերը, վերաքննիչ դատարանը հանգում է այն հետևության, որ պաշտպանի վերաքննիչ բողոքը պետք է մերժել հետևյալ պատճառաբանությամբ:
Ըստ ներկայացված քրեական գործի նյութերի.
Ամբաստանյալ Արսեն Ալեքսանյանն առաջադրված մեղադրանքում իրեն մեղավոր չի ճանաչել և ըստ էության վերահաստատել է նախաքննության ընթացքում տված ցուցմունքն այն մասին, որ 2012թ. սեպտեմբերի 25-ին, ժամը 01:00-ի սահմաններում, ընկերների հետ գտնվել է Մանկական զբոսայգու հարևանությամբ գտնվող մայթին և զրուցել են միմյանց հետ, երբ իրենց է մոտեցել ՚Օպելՙ մակնիշի 25 ՍՍ 525 պետհամարանիշի ավտոմեքենան: Սրահում գտնվող 4-5 երիտասարդները սկսել են սեռական բնույթի հայհոյանքներ տալ իրենց հասցեին, իսկ նրանցից գեր կազմվածքովը, մոտ կանչելով իրեն, հափշտակել է իր ձեռքի պայուսակը, դրա պարունակությունը դատարկել է ավտոմեքենայի մեջ, ապա պայուսակը շպրտել է իրենց վրա: Պայուսակի մեջ եղել է 200 ԱՄՆ դոլար գումար: Պահանջել է, որ նրանք հեռանան, սակայն վերջիններս շարունակել են իրենց հայհոյել: Նրանք բացել են ավտոմեքենայի բեռնախցիկը, և իրեն թվացել է, թե ցանկանում են այնտեղից ինչ-որ բան հանել: Այնուհետև նրանք հետապնդել են իրեն և Տիգրան Քոլոյանին, որի ընթացքում վերջինս բջջային հեռախոսով զանգահարել է ոստիկանություն: Այդ տղաները, հասկանալով, որ իրենք զանգահարել են ոստիկանություն, ցանկացել են փախչել, սակայն նրանց մեքենան խափանվել է: Քիչ անց եկել են ոստիկանության աշխատակիցները և նրանց բերման են ենթարկել ՀՀ ոստիկանության Կենտրոնականի բաժին, թեև դատարանում նշել է, որ դեպքի վայրից ոստիկանության բաժին բերման են ենթարկվել ոչ բոլոր տղաները, ինչով և պայմանավորել է իր գումարը բերման ենթարկվածների մոտ չհայտնաբերվելու հանգամանքը: Նշել է, որ այդ տղաներից որևէ մեկն անձամբ իրեն ծեծի չի ենթարկել:
Նշել է նաև, որ գումարը հափշտակել է Վիգեն Այվազյանը` պայուսակի պարունակությունը դատարկելով մեքենայի սրահում, հենց վերջինս է տեսել, որ վազելու ընթացքում Տիգրան Քոլոյանը ոստիկանություն է զանգահարում, այդ պատճառով էլ դադարեցրել է իրենց հետապնդելը: Ինքն ու Տիգրանը փախուստի են դիմել այդ տղաների կողմից ավտոմեքենայի բեռնախցիկը բացելուց հետո, վախեցել են, որ այնտեղից որևէ իր կհանեն ու դրանով կծեծեն իրենց: Ավելացրել է նաև, որ պայուսակի պարունակությունը, այդ թվում` հարդարման պարագաներն իրեն չի վերադարձվել, իսկ դրամապանակը շպրտել են իր վրա: Հայտնել է նաև, որ հնարավոր է` հուզված լինելու պատճառով է իրենից հափշտակված գումարի չափը 200 ԱՄՆ դոլարի փոխարեն բացատրությունում նշել 2000 ԱՄՆ դոլար:
Ամբաստանյալ Տիգրան Քոլոյանն առաջադրված մեղադրանքում իրեն մեղավոր չի ճանաչել: Հայտնել է, որ 2012թ. սեպտեմբերի 25-ին, ժամը 01:09-ի սահմաններում, Մանկական զբոսայգու մոտ իրենց է մոտեցել ՚Օպելՙ մակնիշի 25 ՍՍ 525 պետհամարանիշի ավտոմեքենան: Մեքենայի մեջ եղել են 5 երիտասարդներ, որոնք սկսել են հայհոյել իրենց: Նրանցից պահանջել են հեռանալ, սակայն այդ երիտասարդները շարունակել են հայհոյանքներ տալը: Այդ ժամանակ երիտասարդներից մեկը վերցրել է Արսեն Ալեքսանյանի պայուսակը, դրա պարունակությունը դատարկել նրանց մեքենայի մեջ և դատարկ պայուսակը հետ շպրտել իրենց վրա: Այնուհետև, բացելով ավտոմեքենայի բեռնախցիկը, ինչ-որ բան են հանել և հետապնդել իրենց: Այդ ընթացքում ինքը զանգահարել է ոստիկանություն` նշելով, որ իրենց ծեծի են ենթարկում, սակայն գումարի հափշտակության մասին չի հայտնել: Քիչ անց եկել են ոստիկանության աշխատակիցները, իրենք մատնացույց են արել նույն տղաներին և հայտնել, որ վերջիններիցս մեկը հափշտակել է Ա.Քոլոյանի պայուսակը: Դրանից հետո ոստիկանները ավտոմեքենայի մեջ եղած անձանց բերման են ենթարկել ոստիկանության Կենտրոնականի բաժին, թեև դատարանում նշել է, որ դեպքի վայրից ոստիկանության բաժին բերման են ենթարկվել ոչ բոլոր տղաները, ինչով և պայմանավորել է իր գումարը բերման ենթարկվածների մոտ չհայտնաբերվելու հանգամանքը: Նշել է, որ անձամբ իրեն այդ տղաներից որևէ մեկը ծեծի չի ենթարկել:
Նշել է, որ Արսենի պայուսակը վերցնելու, դրա պարունակությունը ավտոմեքենայի վարորդի նստատեղի կողքի նստատեղին դատարկելու պահն անձամբ է նկատել: Այդ հինգ տղաներից մեկը բացել է ավտոմեքենայի բեռնախցիկը, ինչից իրենք վախեցել ու փախել են` ենթադրելով, որ նա մահակ կամ ինչ-որ առարկա է հանում, որ իրենց ծեծի ենթարկի: Նշել է նաև, որ վազելու ընթացքում ինքն է ոստիկանություն զանգահարել:
Վերաքննիչ դատարանը հանգում է այն հետևության, որ ամբաստանյալներ Արսեն Սուրենի Ալեքսանյանին ՀՀ քրեական օրենսգրքի 333-րդ հոդվածի 1-ին մասով մեղսագրված արարքը և Տիգրան Ազատի Քոլոյանին ՀՀ քրեական օրենսգրքի 333-րդ հոդվածի 1-ին մասով մեղսագրված արարքը հիմնավորվում, իսկ վերջիններիս վերը բերված պատճառաբանությունները` իրենց մեղավոր չճանաչելու, հանցանքի կատարումն իրենց իսկ կողմից բացառելու և այլնի վերաբերյալ, հերքվում են գործով ձեռք բերված հետևյալ ապացույցներով:
Ամբաստանյալների ցուցմունքներն ըստ էության հաստատել են քննվող դեպքի օրը ՚Կոմայգուՙ հարևանությամբ գտնված վերջիններիս ընկերները, մասնավորապես`
Վկա Հարություն Կարապետյանը հայտնել է, որ 2012թ. սեպտեմբերի 25-ին, ժամը 01:00-ի սահմաններում, ընկերների, այդ թվում` Տիգրան Քոլոյանի և Արսեն Ալեքսանյանի հետ գտնվել են Երևան քաղաքի ՚Կոմայգումՙ, երբ իրենց է մոտեցել ՚Օպելՙ մակնիշի 25 ՍՍ 525 պետհամարանիշի ավտոմեքենան: Մեքենայի մեջ եղել են 5 երիտասարդներ, որոնք հայհոյել են իրենց: Նրանցից պահանջել են հեռանալ, սակայն այդ երիտասարդները պատասխանել են սեռական բնույթի հայհոյանքներով: Նկատել է, որ նրանցից մեկը հափշտակել է իր ընկեր Արսեն Ալեքսանյանի պայուսակը, ապա բացելով այն` պարունակությունը դատարկել է մեքենայի մեջ և դատարկ պայուսակը հետ շպրտել իրենց վրա: Այնուհետև բացելով ավտոմեքենայի բեռնախցիկը, ինչ-որ բան են հանել և վազել իրենց հետևից, որի ընթացքում Տ.Քոլոյանը զանգահարել է ոստիկանություն: Իրենց ոչ ոք ծեծի չի ենթարկել: Քիչ անց եկել են ոստիկանության աշխատակիցները, սակայն իրենք չեն հայտնել պայուսակի հափշտակության դեպքի մասին, այլ այդ մասին հայտնել են ոստիկանության Կենտրոնականի բաժնում: Դրանից հետո ոստիկանները ավտոմեքենայի մեջ եղած անձանց բերման են ենթարկել ոստիկանության Կենտրոնականի բաժին:
Վկա Գևորգ Թոքմաջյանը հայտնել է, որ 2012թ. սեպտեմբերի 25-ին, ժամը 01:00-ի սահմաններում, ընկերների` Տիգրան Քոլոյանի, Հարություն Կարապետյանի և Արսեն Ալեքսանյանի հետ գտնվել են Երևան քաղաքի Բեյրութի փողոցի հարակից զբոսայգում, երբ իրենց են մոտեցել 5 երիտասարդ և սկսել են հայհոյել` ասելով, որ իրենք անառակներ են: Նրանցից պահանջել են հեռանալ, սակայն այդ երիտասարդները պատասխանել են սեռական բնույթի հայհոյանքներով: Այնուհետև հափշտակել են Ա.Ալեքսանյանի պայուսակը, պարունակությունը դատարկել են մեքենայի մեջ, ապա դատարկ պայուսակը նետել իրենց վրա: Իրենց ոչ ոք ծեծի չի ենթարկել: Քիչ անց եկել են ոստիկանության աշխատակիցները, սակայն իրենք չեն հայտնել պայուսակի հափշտակության դեպքի մասին, այլ այդ մասին հայտնել են ոստիկանության Կենտրոնականի բաժնում: Գ.Թոքմաջյանն իր բացատրության մեջ նշել էր, որ դեպքի վայր եկած ոստիկանության աշխատակիցներին հայտնել են պայուսակի հափշտակության մասին, ինչպես նաև այդ երիտասարդներից սև շորերով մեկը վազել է իր հետևից և ոտքով հարվածել կոնքի աջ հատվածին, որի հետևանքով թեև ստացել է մարմնական վնասվածք, սակայն հրաժարվել է դատաբժշկական փորձաքննության ներկայանալուց:
Պաշտպանական կողմի միջնորդությամբ ընդհանուր իրավասության առաջին ատյանի դատարան են հրավիրվել և որպես վկա հարցաքննվել քննվող դեպքին ականատես այլ անձինք, որոնք ըստ էության ապացուցողական արժեք ներկայացնող որևէ փաստական տվյալներ չեն հայտնել:
Այսպես`
- վկա Նշան Մալխասյանը հայտնել է, որ քննվող դեպքի օրը ՚Կոմայգուՙ մոտ կանգնած լինելու ժամանակ նկատել է մոտ մեկ ժամ այգու շուրջ պտտվող մի մեքենա, որի սրահում եղել են հինգ երիտասարդներ, ովքեր սեռական բնույթի հայհոյանքներ են տվել իրենց հասցեին: Արդեն Տիգրանենց գալուց հետո վերջիններիս խորհուրդ է տվել զգուշանալ այդ ավտոմեքենայի ուղևորներից: Քիչ անց բարձրանալով Կոնգրես հյուրանոցի մոտ, տեսել են նույն մեքենայի ուղևորներին` Տիգրանենց հետապնդելուց, ինչը նկատելով` ինքը ևս տաքսի ավտոմեքենայով փախուստի է դիմել:
- Վկա Դավիթ Հակոբյանը հայտնել է, որ քննվող դեպքի օրն այգու մոտ կանգնած լինելու ժամանակ նկատել է մոտ մեկ ժամ այգու դիմացը պտտվող մի մեքենա, որի սրահում եղել են հինգ երիտասարդներ: Այդ մեքենայի վարորդը եղել է գեր, մի երիտասարդի հագին եղել է կարմիր սպորտային զգեստ: Նրանք սեռական բնույթի հայհոյանքներ են տվել իրենց հասցեին: Իրեն թվացել է, որ ինչ-որ արտառոց բան է կատարվելու, իսկ երբ տղաներն այդ մեքենայից իջել են, տաքսի ավտոմեքենայով դիմել է փախուստի:
Դատարանը արձանագրել է, որ քննվող դեպքի, դրան նախորդած հանգամանքների վերաբերյալ տրամագծորեն հակառակ ցուցմունքներ են տվել ՚Օփելՙ մակնիշի 25 ՍՍ 525 պետհամարանիշի ավտոմեքենայի սրահում գտնվող անձինք, մասնավորապես`
Վկա Արայիկ Ղորղանյանը հայտնել է, որ 2012թ. սեպտեմբերի 25-ին, ժամը 24:00-ի սահմաններում, իր ընկերներ Վիգեն Այվազյանի և Էդուարդ Մովսիսյանի հետ միասին ՚Օպելՙ մակնիշի 25 ՍՍ 525 պետհամարանիշի ավտոմեքենայով գնացել են Երևան քաղաքի Մաշտոցի պողոտայի դեղատներից մեկը, սակայն դեղատունը փակ լինելու պատճառով դեղ չեն կարողացել գնել: Տուն վերադառնալու ճանապարհին իրենց ՚Օպելՙ մակնիշի 25 ՍՍ 525 հ/հ-ի ավտոմեքենան խափանվել է, կանգ են առել ՚Կոմայգուՙ մոտ` անսարքությունը վերացնելու նպատակով: Այդ ժամանակ իրենց են մոտեցել նշված վայրում գտնվող արվամոլները, որոնք սկսել են բղավել և պահանջել հեռանալ այդտեղից: Նրանց հայտնել են, որ ավտոմեքենան անսարք է, և այն վերանորոգելուց հետո նոր միայն կհեռանան: Այդ ընթացքում մոտեցել է պատահական անցնող իրենց ընկերը` Լյուդվիգ Ալոյանը, տեղեկանալով, որ ավտոմեքենան փչացել է, մոտեցրել է ավտոմեքենան և հոսանքալարի միջոցով փորձել են գործի դնել շարժիչը: Քիչ անց մոտեցել են ոստիկանության աշխատակիցները, ում դիմելով` արվամոլները պահանջել են իրենց բերման ենթարկեն ոստիկանության Կենտրոնականի բաժին: Այդ ոստիկանները տեղում զննել են իրենց ավտոմեքենան, սակայն 200 ԱՄՆ դոլար գումար, շպարման պարագաներ, պահպանակներ, առավել ևս` մահակներ կամ մարմնական վնասվածք պատճառելու համար օգտագործվող այլ առարկաներ չեն հայտնաբերել: Այդ արվամոլներին չեն ծեծել, չեն ծաղրել կամ հայհոյել, առավել ևս նրանցից որևէ մեկի պայուսակը չեն վերցրել:
Վկա Էդուարդ Մովսիսյանը` նախաքննության ընթացքում վկա Ա.Ղորղանյանի ցուցմունքներին ըստ էության նույնաբովանդակ ցուցմունքներ է տվել:
Վկա Վիգեն Այվազյանը նախաքննության ընթացքում ցուցմունք է տվել այն մասին, որ 2012թ. սեպտեմբերի 25-ին Երևան քաղաքի Բեյրութի փողոցով անցնելու ընթացքում իրենց ՚Օպելՙ մակնիշի 25 ՍՍ 525 հ/հ-ի ավտոմեքենան խափանվել է, ուստի կանգնել են այդտեղ` անսարքությունը վերացնելու նպատակով: Այդ ժամանակ իրենց են մոտեցել նշված վայրում կանգնած արվամոլները, որոնք սկսել են բարձր ձայնով բղավել և պահանջել, որպեսզի հեռանան, սակայն հայտնել են, որ ավտոմեքենան անսարք է, և այն վերանորոգելուց հետո կհեռանան: Քիչ անց մոտեցել են ոստիկանության աշխատակիցները, իսկ արվամոլները պահանջել են, որպեսզի իրենց բերման ենթարկեն ոստիկանության Կենտրոնականի բաժին: Այդ արվամոլներին չեն ծեծել, չեն ծաղրել կամ հայհոյել, առավել ևս նրանցից որևէ մեկի պայուսակը չեն վերցրել:
Մի կողմից ամբաստանյալներ Տ.Քոլոյանի և Ա.Ալեքսանյանի, վերջիններիս պնդումները հաստատած վերոնշյալ վկաների, մյուս կողմից գործով վկա Արայիկ Ղորղանյանի և վերջինիս պնդումները հաստատած Էդուարդ Մովսիսյանի, Վիգեն Այվազյանի հակասական և իրարամերժ ցուցմունքները պատշաճ իրավական ընթացակարգերի շրջանակներում հետազոտելու, միմյանց, ինչպես նաև դատաքննությամբ հետազոտված այլ, հարաբերականորեն չեզոք ապացույցների հետ համադրելու և գնահատելու արդյունքներով ընդհանուր իրավասության առաջին ատյանի դատարանն առավել արժևորել և կարևորել է երկրորդ խումբ ապացույցները /վկա Ա.Ղորղանյանի և մյուսների/, որպիսի հետևությունների հանգել է հետևյալ վերլուծություններով.
Այսպես, ՀՀ ոստիկանության ՊՊԾ գնդի 3-րդ հատուկ գումարտակի ոստիկաններ, գործով որպես վկա հարցաքննված Կարապետ Հաջյանը և Ժորա Հովհաննիսյանը ըստ էության նույնաբովանդակ ցուցմունքներ են տվել այն մասին, որ 2012թ. սեպտեմբերի 25-ին ծառայություն են իրականացրել Երևանի Կենտրոն վարչական շրջանում, որն ավարտելուց հետո` ժամը 01.15-ի սահմաններում տուն գնալու ժամանակ, Բեյրութի փողոցի միջնամասում` Մանկական զբոսայգու մուտքի մոտ, նկատել են միմյանց հետ բարձրաձայն զրուցող մի խումբ երիտասարդների: Մոտեցել են նշված անձանց` պարզելու, թե ինչ է պատահել: Վերջիններս հայտնել են, որ որևէ վիճաբանություն տեղի չի ունենում, նրանց ավտոմեքենան է խափանվել, որը փորձում են վերանորոգել: Այդ պահին այգուց դուրս են եկել մի խումբ համասեռամոլներ, որոնք բարձրաձայն հայհոյել և մատնացույց են արել երիտասարդներին, հայտարարել, որ նրանք մահակներով ծեծի են ենթարկել իրենց, տվել են սեռական բնույթի հայհոյանքներ: Պահանջել են նրանց տեղափոխել ոստիկանության Կենտրոնականի բաժին: Տեղում զննել են այդ ավտոմեքենան, սակայն մահակներ կամ մարմնական վնասվածք պատճառելու համար օգտագործվող այլ առարկաներ, ինչպես նաև գումար, շպարման պարագաներ կամ պահպանակներ ավտոմեքենայի սրահում և բեռնախցիկում չեն հայտնաբերել: Նշել են, որ ՀՀ ոստիկանության Կենտրոնական բաժին բերման են ենթարկել ՚Օփելՙ մակնիշի ավտոմեքենայում գտնվող բոլոր անձանց: Նախաքննական ցուցմունքների հրապարակումից հետո պնդել են, որ պայուսակի և դրանում առկա գումարի հափշտակության դեպքի մասին տեղում համասեռամոլներն իրենց ոչինչ չեն հայտնել, դրա մասին իրենց հայտնի է դարձել արդեն ոստիկանության բաժնում:
Ընդհանուր իրավասության առաջին ատյանի դատարանն ամբաստանյալների պատճառաբանությունները հերքված, իսկ նրանց առաջադրված մեղադրանքները հաստատված է համարել նաև`
- անմիջապես քննվող դեպքի օրը` 2012թ. սեպտեմբերի 25-ին կատարված ՚Օպելՙ մակնիշի 25 ՍՍ 525 պետհամարանիշի ավտոմեքենայի զննության արձանագրության համաձայն. ավտոմեքենայի մեջ պայուսակ, արտարժույթ, մահակներ կամ դանակներ չեն հայտնաբերվել:
-վկաներ Վիգեն Այվազյանի, Լյուդվիգ Ալոյանի, Էդուարդ Մովսիսյանի և Արայիկ Ղորղանյանի` 2012թ. սեպտեմբերի 25-ին կատարված անձնական խուզարկության արձանագրությունների համաձայն. քննվող դեպքի վայրից` Բեյրութի փողոցից, դեպքից գրեթե անմիջապես ՀՀ ոստիկանության Կենտրոնականի բաժին բերման ենթարկված վերոնշյալ անձանց անձնական խուզարկությունների արդյունքներով ևս ենթադրյալ կողոպուտի և ծեծի վերաբերյալ ամբաստանյալների վարկածը հաստատող տվյալներ` իրեր կամ առարկաներ, այդ թվում` արտարժույթ, շպարման պարագաներ, պահպանակներ չեն հայտնաբերվել:
Գործով վկաներ Լյուդվիգ Ալոյանի, Էդուարդ Մովսիսյանի և Արայիկ Ղորղանյանի բնակության վայրերում 2012թ. նոյեմբերի 3-ին կատարված խուզարկության արձանագրությունների համաձայն. հափշտակված պայուսակ, գումար, մահակներ, դանակ կամ քննության համար նշանակություն ունեցող այլ իրեր ու առարկաներ չեն հայտնաբերվել:
Ամբաստանյալների մեղավորությունը ընդհանուր իրավասության առաջին ատյանի դատարանը հատատված է համարել նաև որպես ապացույց ճանաչված և գործին կցված փաստաթղթերի առկայությամբ, մասնավորապես՝ - Տիգրան Քոլոյանի` 2012թ. սեպտեմբերի 25-ի` ոստիկանության Կենտրոնականի բաժնում տված հաղորդման արձանագրության համաձայն. վերջինս, նախազգուշացվելով սուտ մատնություն կատարելու համար նախատեսված քրեական պատասխանատվության մասին, նշել է, որ 2012թ. սեպտեմբերի 25-ին, ժամը 01:09-ին գտնվել են Բեյրութի փողոցի Մանկական զբոսայգու հարևանությամբ, երբ իրենց է մոտեցել ՚Օպելՙ մակնիշի 25 ՍՍ 525 հ/հ-ի ավտոմեքենան, որի սրահում գտնվել են հինգ երիտասարդ տղաներ: Նրանք սկսել են իրենց հայհոյել, իսկ Արսեն Ալեքսանյանից հափշտակել են /հոգնակի թվով/ պայուսակը, իջել են մեքենայից և վազել իրենց հետևից, որի ընթացքում ինքը զանգահարել է ոստիկանություն:
-Տիգրան Քոլոյանի` 2012թ. սեպտեմբերի 25-ին տված բացատրության համաձայն. 2012թ. սեպտեմբերի 25-ին, ժամը 01:00-ի սահմաններում Բեյրութի փողոցի հարակից տարածքում ընկերների հետ զբոսնել են Մանկական զբոսայգում, երբ մոտեցել է ՚Օպելՙ մակնիշի 25 ՍՍ 525 պետհամարանիշի ավտոմեքենան: Մեքենայի սրահում եղել են 5 երիտասարդներ, որոնք սկսել են հայհոյել իրենց: Պահանջել են նրանց հեռանալ, սակայն այդ երիտասարդները շարունակել են հայհոյել: Այդ ժամանակ երիտասարդներից մեկը վերցրել է Արսեն Ալեքսանյանի պայուսակը, որի պարունակությունը դատարկել է մեքենայի մեջ, ապա դատարկ վիճակում պայուսակը հետ է շպրտել իրենց վրա: Այնուհետև, բացելով ավտոմեքենայի բեռնախցիկը, ինչ-որ բան են հանել և վազել իրենց հետևից, այդ ընթացքում զանգահարել է ոստիկանություն, համասեռամոլ ընկերների հետ նստել են Զաքյան փողոցի հարակից տարածքում կանգնած ՚Վազ 2107ՙ մակնիշի սպիտակ տաքսի ավտոմեքենան, պտտվել են այնքան ժամանակ, մինչև ոստիկանության աշխատակիցները ժամանեն:
- Արսեն Ալեքսանյանի` ՀՀ ոստիկանության Կենտրոնականի բաժնում 2012թ. հոկտեմբերի 15-ին հանցագործության մասին տված հաղորդման արձանագրության համաձայն. վերջինս, նախազգուշացվելով սուտ մատնություն կատարելու համար նախատեսված քրեական պատասխանատվության մասին, նշել է, որ 2012թ. սեպտեմբերի 25-ին տեղի ուենցած դեպքի ժամանակ վիճաբանությանը մասնակցել և իրենց ծեծի են ենթարկել մի խումբ անձինք, որոնցից մեկը հափշտակել է իր պայուսակը, որում եղել է 200 ԱՄՆ դոլար գումար:
-Արսեն Ալեքսանյանի` 2012թ. սեպտեմբերի 25-ին տված բացատրության համաձայն. 2012թ. սեպտեմբերի 25-ին, ժամը 1:00-ի սահմաններում ընկերների հետ գտնվել է Բեյրութի փողոցի զբոսայգու հարևանությամբ գտնվող մայթին և զրուցելիս են եղել միմյանց հետ, երբ իրենց է մոտեցել ՚Օպելՙ մակնիշի 25 ՍՍ 525 պետհամարանիշի ավտոմեքենան: Դրա մեջ գտնվող երիտասարդները սկսել են սեռական բնույթի հայհոյանքներ տալ իրենց հասցեին, նրանցից մեկը մոտեցել է իրեն, հափշտակել ձեռքի պայուսակը, ավտոմեքենայի մեջ դատարկել է դրա պարունակությունը: Պայուսակի մեջ եղել է 2.000 ԱՄՆ դոլար, այնուհետև պայուսակը շպրտել է իրենց վրա: Թեև պահանջել է, սակայն վերջիններս չեն հեռացել, շարունակել են իրենց հայհոյել: Իրեն չեն հարվածել, սակայն եթե չփախչեր, կհարվածեին, հարվածել են միայն իր ընկեր Գևորգ Թոքմաջյանի աջ ոտքին:
Գնահատելով ամբաստանյալ Արսեն Ալեքսանյանի` գործի քննության ընթացքում տված ցուցմունքները, դրանք համադրելով գործով ձեռք բերված մյուս փաստական տվյալների հետ, վերաքննիչ դատարանը ոչ արժանահավատ է համարում վերջինիս կողմից բերված պատճառաբանություններն` իրեն մեղավոր չճանաչելու, իր իսկ կողմից հանցանքի կատարումը բացառելու և այլնի վերաբերյալ, քանի որ դրանք չեն բխում գործի օբյեկտիվ տվյալներից, որով փորձ է արվում իրեն հնարավորինս զերծ պահել քրեական պատասխանատվությունից:
Գնահատելով ամբաստանյալ Տիգրան Քոլոյանի` գործի քննության ընթացքում տված ցուցմունքները, դրանք համադրելով գործով ձեռք բերված մյուս փաստական տվյալների հետ, վերաքննիչ դատարանը ոչ արժանահավատ է համարում վերջինիս կողմից բերված պատճառաբանություններն` իրեն մեղավոր չճանաչելու, իր իսկ կողմից հանցանքի կատարումը բացառելու և այլնի վերաբերյալ, քանի որ դրանք չեն բխում գործի օբյեկտիվ տվյալներից, որով փորձ է արվում իրեն հնարավորինս զերծ պահել քրեական պատասխանատվությունից:
Այսպիսով, վերլուծելով գործի փաստական տվյալները, գնահատելով ինչպես յուրաքանչյուր ապացույց, այնպես էլ դրանք իրենց համակցությամբ, վերաքննիչ դատարանը հանգում է այն հետևության, որ ամբաստանյալներ Արսեն Սուրենի Ալեքսանյանին ՀՀ քրեական օրենսգրքի 333-րդ հոդվածի 1-ին մասով մեղսագրված արարքը և Տիգրան Ազատի Քոլոյանին ՀՀ քրեական օրենսգրքի 333-րդ հոդվածի 1-ին մասով մեղսագրված արարքը որակված է ճիշտ, և նրանք պետք է քրեական պատասխանատվության և պատժի ենթարկվեն:
Հիմք ընդունելով վերոգրյալը, վերաքննիչ դատարանը գտնում է, որ ընդհանուր իրավասության առաջին ատյանի դատարանն ամբաստանյալներ Արսեն Սուրենի Ալեքսանյանի և Տիգրան Ազատի Քոլոյանի արարքների քրեաիրավական որակման հարցում հանգել է ճիշտ հետևության, հետևաբար` սույն գործով վիճարկվող դատական ակտը բեկանելու և վերջիններիս նկատմամբ արդարացման դատական ակտ կայացնելու հիմքեր չկան:
Նման պայմաններում, վերը շարադրված հանգամանքների առկայության պայմաններում, վերաքննիչ դատարանը հանգում է այն հետևության, որ պաշտպանության կողմի վերաքննիչ բողոքում բերված պատճառաբանությունները` դատարանի կողմից նյութական և դատավարական նորմերի խախտումներ թույլ տալու, իր պաշտպանյալներին արդարացնելու պահանջի և այլնի վերաբերյալ, անհիմն են, չեն բխում գործի օբյեկտիվ տվյալներից և ներկայացված վերաքննիչ բողոքը բավարարելու առումով որևէ իրավական հետևանք առաջացնել չեն կարող:
Հարկ է նշել, որ ՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ ԱԺ 03.10.2013թ. որոշման 1-ին կետի 2-րդ ենթակետի համաձայն. պատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի` այն անձանց, որոնց նկատմամբ նշանակվել է ազատությունից զրկելու հետ չկապված պատիժ:
Հարկ է արձանագրել, որ սույն գործով վիճարկվող դատական ակտով Արսեն Սուրենի Ալեքսանյանը ճանաչվել է մեղավոր ՀՀ քրեական օրենսգրքի 333-րդ հոդվածի 1-ին մասով նախատեսված հանցագործության կատարման մեջ, նրա նկատմամբ նշանակվել է պատիժ` տուգանք 300.000 /երեք հարյուր հազար/ ՀՀ դրամի չափով:
Վերաքննիչ դատարանը արձանագրում է, որ ՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ ԱԺ 03.10.2013թ. որոշմամբ ամբաստանյալ Արսեն Սուրենի Ասլանյանի նկատմամբ համաներումը չկիրառելու հիմքեր չկան:
Հիմք ընդունելով վերոգրյալը, վերաքննիչ դատարանը հանգում է այն հետևության, որ ՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ Ազգային ժողովի կողմից 2013 թվականի հոկտեմբերի 03-ի ընդունված որոշման 1-ին կետի 2-րդ ենթակետի կիրառմամբ ամբաստանյալ Արսեն Սուրենի Ալեքսանյանին պետք է ազատել Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռով նշանակված պատժից:
Հարկ է նշել, որ ՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ ԱԺ 03.10.2013թ. որոշման 1-ին կետի 2-րդ ենթակետի համաձայն. պատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի` այն անձանց, որոնց նկատմամբ նշանակվել է ազատությունից զրկելու հետ չկապված պատիժ:
Հարկ է արձանագրել, որ սույն գործով վիճարկվող դատական ակտով Տիգրան Ազատի Քոլոյանը ճանաչվել է մեղավոր ՀՀ քրեական օրենսգրքի 333-րդ հոդվածի 1-ին մասով նախատեսված հանցագործության կատարման մեջ, նրա նկատմամբ նշանակվել է պատիժ` տուգանք 300.000 /երեք հարյուր հազար/ ՀՀ դրամի չափով:
Վերաքննիչ դատարանը արձանագրում է, որ ՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ ԱԺ 03.10.2013թ. որոշմամբ ամբաստանյալ Տիգրան Ազատի Քոլոյանի նկատմամբ համաներումը չկիրառելու հիմքեր չկան:
Հիմք ընդունելով վերոգրյալը, վերաքննիչ դատարանը հանգում է այն հետևության, որ ՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ Ազգային ժողովի կողմից 2013 թվականի հոկտեմբերի 03-ի ընդունված որոշման 1-ին կետի 2-րդ ենթակետի կիրառմամբ ամբաստանյալ Տիգրան Ազատի Քոլոյանին պետք է ազատել Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռով նշանակված պատժից:
Անդրադառնալով նաև, ամբաստանյալներ Արսեն Սուրենի Ալեքսանյանի և Տիգրան Ազատի Քոլոյանի նկատմամբ ընտրված խափանման միջոցի հարցին, վերաքննիչ դատարանը հանգում է այն հետևության, որ համաներում կիրառելու պարագայում, վերջիններիս նկատմամբ ընտրված խափանման միջոցները` ստորագրություն չհեռանալու մասին, պետք է վերացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 393-394-րդ հոդվածներով, վերաքննիչ դատարանը.

Ո Ր Ո Շ Ե Ց

Արսեն Սուրենի Ալեքսանյանի նկատմամբ ՀՀ քրեական օրենսգրքի 333-րդ հոդվածի 1-ին մասով և Տիգրան Ազատի Քոլոյանի նկատմամբ ՀՀ քրեական օրենսգրքի 333-րդ հոդվածի 1-ին մասով, Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճիռը թողնել օրինական ուժի մեջ, իսկ պաշտպանի վերաքննիչ բողոքը մերժել:
՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ Ազգային ժողովի 2013թ. հոկտեմբերի 03-ի որոշման 1-ին կետի 2-րդ ենթակետի կիրառմամբ ամբաստանյալ Արսեն Սուրենի Ալեքսանյանին ազատել Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռով նշանակված պատժից` 300.000 ՀՀ դրամ տուգանքից:
՚Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասինՙ ՀՀ Ազգային ժողովի 2013թ. հոկտեմբերի 03-ի որոշման 1-ին կետի 2-րդ ենթակետի կիրառմամբ Տիգրան Ազատի Քոլոյանին ազատել Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 28.08.2013թ. դատավճռով նշանակված պատժից` 300.000 ՀՀ դրամ տուգանքից:
Ամբաստանյալներ Արսեն Սուրենի Ալեքսանյանի և Տիգրան Ազատի Քոլոյանի նկատմամբ ընտրված խափանման միջոցները` ստորագրություն չհեռանալու մասին վերացնել:
Սույն որոշումը կարող է բողոքարկվել ՀՀ վճռաբեկ դատարան` հրապարակվելու պահից մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ

Իսկականի հետ ճիշտ է.


ՆԱԽԱԳԱՀՈՂ ԴԱՏԱՎՈՐ` Ա.ԴԱՆԻԵԼՅԱՆ