Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

22 hուլիսի 2013թ. ք. Երևան

ԵԿԴ-0097/01/13

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող,
Երևան քաղաքի դատախազության
դատախազ Ա. Շահբազյանի,

պաշտպան Ժ. Օհանյանի,

տուժող Դ. Հասասյան,



դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Համբարձում Հունանի Ավետիսյանի`
ծնված 1993թ. նոյեմբերի 21-ին Վրաստանի Հանրապետությունում /այսուհետ ՎՀ/, հայ, ՎՀ քաղաքացի, ըստ իր հայտարարության` սովորում է Ուկրաինայի Տերնոպոլի համալսարանի Երևանյան մասնաճյուղի երրորդ կուրսում, ամուրի, խնամքին ոչ ոք, նախկինում չդատված, վատառողջ է, կալանքի տակ չէ, հաշվառված է ՎՀ, Նինոծմինդայի շրջանի Փոկա գյուղում, Հայաստանում մշտական բնակության վայր չունի, փաստացի, առանց հաշվառման բնակվում է Երևան քաղաքի Քեռու փողոցի թիվ 58/1 շենքի թիվ 1 բնակարանում, մեղադրվում է ՀՀ քրեական օրենսգրքի 112-րդ հոդվածի 1-ին մասով։


Գործի դատավարական նախապատմությունը

Թիվ 13106412 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 10.02.2012թ., ՀՀ քրեական օրենսգրքի 112-րդ հոդվածի 1-ին մասով, անհայտ անձանց կողմից դիտավորությամբ Դ. Հասասյանի առողջությանը ծանր վնաս պատճառելու դեպքի առթիվ։
2012թ. փետրվարի 13-ին թիվ 13106412 քրեական գործն ուղարկվել է ՀՀ ոստիկանության ՔԳՎ Երևան քաղաքի քննչական վարչություն և նույն օրվա որոշմամբ ընդունվել է ծանր հանցագործությունների քննության բաժնի ավագ քննիչի վարույթ։
18.04.2012թ. որոշմամբ հայտարարվել է մեղադրյալ Համբարձում Ավետիսյանի հետախուզումը։
Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի նույն օրվա որոշմամբ, մեղադրյալ Հ. Ավետիսյանի նկատմամբ որպես խափանման միջոց է ընտրվել կալանավորումը։
Քննիչի 2012թ. օգոստոսի 08-ի որոշմամբ, թիվ 13106412 քրեական գործի վարույթը կասեցվել է` մեղադրյալ Համբարձում Ավետիսյանի կողմից քննությունից թաքնվելու, նրա գտնվելու վայրն անհայտ լինելու, Արման Սարգսյանի, Էդուարդ Մկրտչյանի և Վահան Չատինյանի առողջությանը թեթև վնաս պատճառած, ինչպես նաև փայտյա մահակով և երկաթյա ձողով ծեծկռտուքին մասնակից անձանց ինքնությունները պարզված չլինելու պատճառաբանությամբ։
Քննիչի 2012թ. սեպտեմբերի 26-ի որոշմամբ, թիվ 13106412 քրեական գործի վարույթը վերսկսվել է։
24.01.2013թ. որոշում է կայացվել թիվ 13106412 քրեական գործի վարույթը կրկին կասեցնելու մասին` մեղադրյալ Համբարձում Ավետիսյանի կողմից քննությունից թաքնվելու, նրա գտնվելու վայրն անհայտ լինելու, Արման Սարգսյանի, Էդուարդ Մկրտչյանի և Վահան Չատինյանի առողջությանը թեթև վնաս պատճառած, ինչպես նաև փայտյա մահակով և երկաթյա ձողով ծեծկռտուքին մասնակից անձանց ինքնությունները պարզված չլինելու պատճառաբանությամբ։
Քննիչի 2013թ. փետրվարի 20-ի որոշմամբ, թիվ 13106412 քրեական գործի վարույթը կրկին վերսկսվել է։
2013թ. փետրվարի 28-ին որոշում է կայացվել` Ավետիս Ավետիսյանին և Արման Մարաբյանին ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործություն կատարելու համար քրեական պատասխանատվությունից ազատելու մասին` իրադրության փոփոխման հետևանքով։
Երևան քաղաքի դատախազության դատախազ Ա. Շահբազյանի 30.05.2013թ. որոշմամբ, մեղադրյալ Համբարձում Ավետիսյանի նկատմամբ ընտրված խափանման միջոց կալանավորումը վերացվել է։
31.05.2013թ. մեղադրյալ Հ. Ավետիսյանը «Բավրա» հսկիչ անցագրային կետից բերման է ենթարկվել ՀՀ ոստիկանության Շիրակի մարզային վարչության Աշոցքի բաժին։
Նույն օրը մեղադրյալ Հ. Ավետիսյանի նկատմամբ որպես խափանման միջոց է ընտրվել չհեռանալու մասին ստորագրությունը։
Քննիչի 2013թ. հունիսի 04-ի որոշմամբ`
- Ավետիս Ավետիսյանի, Արման Մարաբյանի, Անդրանիկ Մարկոսյանի, Հովհաննես Իրիցյանի, Էդուարդ Մկրտչյանի նկատմամբ ՀՀ քրեական օրենսգրքի 258-րդ հոդվածով քրեական հետապնդումը դադարեցվել է` հանցակազմի բացակայության պատճառաբանությամբ և նրանց նկատմամբ ընտրված խափանման միջոց չհեռանալու մասին ստորագրությունը վերացվել է,
- Ավետիս Ավետիսյանի կողմից դիտավորությամբ Արշակ Մարգարյանի առողջությանը թեթև վնաս պատճառելու համար քրեական հետապնդում չի իրականացվել` Ա. Մարգարյանի բողոքի բացակայության պատճառաբանությամբ,
- Արման Մարաբյանի կողմից դիտավորությամբ Գագիկ Ավետիսյանի առողջությանը թեթև վնաս պատճառելու համար քրեական հետապնդում չի իրականացվել` Գ. Ավետիսյանի բողոքի բացակայության պատճառաբանությամբ,
- անհայտ անձանց կողմից դիտավորությամբ Վահան Չատինյանի, Արման Սարգսյանի և Էդուարդ Մկրտչյանի առողջությանը թեթև վնաս պատճառելու համար քրեական հետապնդում չի իրականացվել` Վ. Չատինյանի, Ա. Սարգսյանի և Էդ. Մկրտչյանի բողոքի բացակայության պատճառաբանությամբ։
Ամբաստանյալ Համբարձում Հունանի Ավետիսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով հետևյալ արարքի համար. «որ նա 2012թ. փետրվարի 9-ին` ժամը 18։30-ին, Երևան քաղաքի Կորյուն 2 փողոցի հատվածում տեղի ունեցած վիճաբանության ընթացքում Դավիթ Հասասյանի առողջությանը ծանր վնաս պատճառելու դիտավորությամբ, իր մոտ պահվող դանակով, մեկ անգամ հարվածել է վերջինիս կրծքավանդակի աջ կեսի շրջանին, որն առաջացրել է ծակած-կտրած վերք, միջկողային զարկերակի, ստոծանու և լյարդի աջ բլթի 7-րդ սեգմենտի վնասումով և նրա առողջությանը պատճառել է ծանր վնաս՝ կյանքին վտանգ սպառնացող։»։
2013թ. հունիսի 11-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։
Մեղադրողը մեղադրական եզրակացությունում չի առարկել դատական քննության արագացված կարգ կիրառելու դեմ։



Արագացված դատական քննություն

Ամբաստանյալ Համբարձում Հունանի Ավետիսյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։
2013թ. հուլիսի 03-ին դատարան է ստացվել տուժող Դավիթ Հասասյանի դիմումը, որով հայտնել է, որ ամբաստանյալի նկատմամբ պարտք ու պահանջ չունի և դատական քննության արագացված կարգ կիրառելու դեմ չի առարկում։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Համբարձում Հունանի Ավետիսյանը կատարել է ՀՀ քրեական օրենսգրքի 112-րդ հոդվածի 1-ին մասով նախատեսված արարք։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Համբարձում Ավետիսյանը նախկինում դատված չի եղել, վատառողջ է` նրա մոտ ախտորոշվել է «էխինոկոկկոզ, ձախ թոքի էխինոկոկային բուշտ», որի պատճառով 09.07.2013թ. վիրահատվել է, իրեն լիովին մեղավոր է ճանաչել և նախաքննության ընթացքում տվել է ինքնախոստովանական ցուցմունք։
Իր վերջին խոսքում Հ. Ավետիսյանը հայտարարեց, որ զղջում է կատարածի համար և հայտարարում է, որ իրեն վերագրվող արարքը կատարելու դիտավորություն չի ունեցել։



Դատարանի իրավական վերլուծությունները

Առաջադրված մեղադրանքն ամբաստանյալ Համբարձում Հունանի Ավետիսյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ Համբարձում Հունանի Ավետիսյանի կողմից, նրա մեղավորությամբ, դիտավորությամբ մեկ ուրիշին մարմնական ծանր վնասվածք պատճառելը, որը վտանգավոր է կյանքի համար` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Համբարձում Հունանի Ավետիսյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, վատառողջ է, իրեն լիովին մեղավոր է ճանաչել և նախաքննության ընթացքում տվել է ինքնախոստովանական ցուցմունք։
Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ առկա չեն։
Ամբաստանյալ Համբարձում Հունանի Ավետիսյանն իր կատարած` Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցագործության համար ենթակա է պատժի ազատազրկման ձևով։
Դատարանը գտնում է, որ իր նկատմամբ նշանակված պատիժն ամբաստանյալ Համբարձում Ավետիսյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 06.08.2012թ. որոշումներով իրեղեն ապացույցներ ճանաչված հագուստները պետք է վերադարձնել տուժող Դավիթ Հասասյանին, իսկ լազերային սկավառակները պետք է պահել քրեական գործի հետ միասին։
Քննարկելով խափանման միջոցի հարցը` դատարանը գտնում է, որ ամբաստանյալ Համբարձում Ավետիսյանի նկատմամբ որպես խափանման միջոց ընտրված չհեռանալու մասին ստորագրությունը պետք է փոփոխել, որպես խափանման միջոց պետք է ընտրել կալանավորումը և Համբարձում Ավետիսյանին պետք է կալանավորել դատական նիստերի դահլիճում հետևյալ պատճառաբանությամբ. Համբարձում Ավետիսյանը Հայաստանի Հանրապետությունում մշտական բնակության վայր չունի և որևէ հասցեում հաշվառված չէ, սույն քրեական գործով նախաքննության ընթացքում նա արդեն իսկ թաքնվել է վարույթն իրականացնող մարմնից և գտնվել է հետախուզման մեջ։ Հետևաբար, ազատազրկման ձևով պատժի դատապարտվելու դեպքում, քրեական պատասխանատվությունից և նշանակված պատիժը կրելուց խուսափելու հավանականությունը բարձրանում է։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 134-138-րդ, 357-360-րդ, 364-365-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Համբարձում Հունանի Ավետիսյանին մեղավոր ճանաչել Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցանքում և դատապարտել ազատազրկման 3 /երեք/ տարի ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2013թ. հուլիսի 22-ից։
Խափանման միջոց չհեռանալու մասին ստորագրությունը փոփոխել, խափանման միջոց ընտրել կալանավորումը և Համբարձում Ավետիսյանին կալանավորել դատական նիստերի դահլիճում։
Դատավճռի օրինական ուժի մեջ մտնելուց հետո, 06.08.2012թ. որոշումներով իրեղեն ապացույցներ ճանաչված հագուստները վերադարձնել տուժող Դավիթ Հասասյանին, իսկ լազերային սկավառակները պահել քրեական գործի հետ միասին։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։
Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։



ԴԱՏԱՎՈՐ` Մ. ՄԱՐՏԻՐՈՍՅԱՆ