Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

04 հուլիսի 2013թ. ք. Երևան

ԵԿԴ-0094/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ
մեղադրող`
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Հ. Էյրամջյանի,

պաշտպան Ա. Հոբոսյանի,

տուժող Գ. Սարգսյանի,

տուժողի ներկայացուցիչ Բ. Սարգսյանի,


դատարանում, դռնբաց դատական նիստում քննեց գործն ըստ մեղադրանքի
Թաթուլ Հայկի Փիլոսյանի`
ծնված 1971թ. մայիսի 09-ին Արտաշատ քաղաքում, հայ, Հայաստանի Հանրապետության /այսուհետ ՀՀ/ քաղաքացի, ըստ իր հայտարարության` բարձրագույն կրթությամբ, ամուսնացած, խնամքին ոչ ոք, նախկինում դատված`
1/ Արտաշատի շրջանի ժողդատարանի 21.03.1996թ. դատավճռով, ՀՀ նախորդ քրեական օրենսգրքի 96-րդ հոդվածի 2-րդ մասով դատապարտվել է ազատազրկման 5 /հինգ/ տարի ժամկետով։ Ներում շնորհելու մասին ՀՀ Նախագահի 23.12.1997թ. հրամանագրով ազատվել է պատժից,
2/ Արտաշատի շրջանի ժողդատարանի 28.12.1998թ. դատավճռով, ՀՀ նախորդ քրեական օրենսգրքի 86-րդ հոդվածի 2-րդ մասով, 231-րդ հոդվածի 1-ին մասով, նույն օրենսգրքի 37-րդ հոդվածի կիրառմամբ դատապարտվել է ազատազրկման 4 /չորս/ տարի ժամկետով։ Արարատի մարզի առաջին ատյանի դատարանի 27.07.2001թ. որոշմամբ, ՀՀ նախորդ քրեական օրենսգրքի 86-րդ հոդվածի 2-րդ մասով նախատեսված արարքը համապատասխանեցվել է ՀՀ նախորդ քրեական օրենսգրքի 92-րդ հոդվածի 1-ին մասին, պատիժ է նշանակվել ազատազրկում 6 /վեց/ ամիս ժամկետով, իսկ ՀՀ նախորդ քրեական օրենսգրքի 231-րդ հոդվածով նշանակված պատիժը` 1 /մեկ/ տարի ժամկետով ազատազրկումը թողնվել է անփոփոխ։ ՀՀ նախորդ քրեական օրենսգրքի 37-րդ հոդվածի կիրառմամբ նշանակվել է պատիժ` ազատազրկում 1 /մեկ/ տարի ժամկետով և նույն օրն ազատվել է պատժից` նշանակված պատիժը փաստացի կրած լինելու պատճառով,
3/ Արարատի մարզի առաջին ատյանի դատարանի 03.10.2003թ. դատավճռով, ՀՀ քրեական օրենսգրքի 117-րդ հոդվածով դատապարտվել է տուգանքի` 60.000 ՀՀ դրամ գումարի չափով,
4/ Արարատի մարզի առաջին ատյանի դատարանի 08.11.2006թ. դատավճռով, ՀՀ քրեական օրենսգրքի 178-րդ հոդվածի 2-րդ մասի 3-րդ կետով դատապարտվել է ազատազրկման 2 /երկու/ տարի ժամկետով, 22.08.2008թ. ազատվել է պատժից` այն լրիվ կրելու արդյունքում,
5/ Արարատի և Վայոց ձորի մարզերի առաջին ատյանի դատարանի 14.05.2010թ. դատավճռով, ՀՀ քրեական օրենսգրքի 178-րդ հոդվածի 2-րդ մասի 3-րդ կետով դատապարտվել է ազատազրկման 3 /երեք/ տարի 6 /վեց/ ամիս ժամկետով։ Նույն դատարանի 24.06.2011թ. որոշմամբ, վերոհիշյալ արարքը համապատասխանեցվել է ՀՀ քրեական օրենսգրքի 178-րդ հոդվածի 1-ին մասին և պատիժ է նշանակվել ազատազրկում` 1 /մեկ/ տարի 3 /երեք/ ամիս ժամկետով, 30.06.2011թ. ազատվել է պատժից` այն լրիվ կրելու արդյունքում,
6/ ՀՀ ոստիկանության Արաբկիրի բաժնի 2011թ. նոյեմբերի 04-ի որոշմամբ ազատվել է ՀՀ քրեական օրենսգրքի 118-րդ հոդվածով նախատեսված արարք /ծեծը/ կատարելու համար քրեական պատասխանատվությունից` ՀՀ քրեական դատավարության օրենսգրքի 35-րդ հոդվածի 1-ին մասի 4-րդ կետի հիման վրա, դիմողի բողոքի բացակայության պատճառաբանությամբ, դատվածությունը չմարված, հաշվառված է ք. Արտաշատ, Արազի փողոցի թիվ 1 տանը, փաստացի բնակվել է Կոտայքի մարզի Առինջ գյուղում, կալանքի տակ է 26.12.2012թ.-ից, մեղադրվում է ՀՀ քրեական օրենսգրքի 112-րդ հոդվածի 1-ին մասով։



Գործի դատավարական նախապատմությունը

Թիվ 15135212 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 26.12.2012թ., ՀՀ քրեական օրենսգրքի 112-րդ հոդվածի 1-ին մասով։
Ամբաստանյալ Թաթուլ Հայկի Փիլոսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով հետևյալ արարքի համար. «որ նա գտնվելով ոգելից խմիչքի ազդեցության տակ` 2012թ. դեկտեմբերի 7-ին, ժամը 20։00-ի սահմաններում, Երևան քաղաքի Նալբանդյան 50 հասցեի դիմաց գտնվող նախկին հրշեջ կայանում, սուրճ խմելու հարցի շուրջ ծագած վիճաբանության ընթացքում, սեղանին դրված խոհանոցային դանակով հարվածել է Գևորգ Բորիկի Սարգսյանի աջ ազդրի շրջանին` նրա առողջությանը դիտավորությամբ պատճառելով կյանքին վտանգ սպառնացող ծանր վնաս, որն ուղեկցվել է պրուֆոզ արյունահոսությամբ, 2-3-րդ աստիճանի հեմոռագիկ շոկով։»։
2013թ. հունիսի 10-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ, նախկինում բազմիցս դատապարտված Թաթուլ Հայկի Փիլոսյանը 2012թ. հոկտեմբերից Երևանի Նալբանդյան փողոցի թիվ 50 հասցեի դիմացի հատվածում գտնվող, նախկին հրշեջ կայանի մասնաշենքում աշխատել է որպես պահակ և միաժամանակ բնակվել է նույն վայրում։ Աշխատանքի ընթացքում նա ծանոթացել է Երևանի Պուշկինի փողոցի թիվ 1 հասցեում գործող, «Դավիթ» ՍՊ ընկերությանը պատկանող ավտոկայանատեղի հսկիչ, տուժող Գևորգ Բորիկի Սարգսյանի հետ, սակայն վերջինիս հետ գրեթե չի շփվել։
2012թ. դեկտեմբերի 7-ին, ժամը 20.00-ի սահմաններում, Երևանի Նալբանդյան 50 հասցեի դիմացի հատվածում, ամբաստանյալ Թաթուլ Հայկի Փիլոսյանը սուրճ խմելու հարցի շուրջ ծագած վիճաբանության ընթացքում խոհանոցային դանակով հարվածել է տուժող Գևորգ Բորիկի Սարգսյանի աջ ազդրին և դիտավորությամբ նրա առողջությանը պատճառել է կյանքին վտանգ սպառնացող ծանր վնաս, որն ուղեկցվել է պրուֆոզ արյունահոսությամբ, 2-3-րդ աստիճանի հեմոռագիկ շոկով։
Քրեական գործի նախաքննության ընթացքում, Հայաստանի Հանրապետության «Փորձաքննությունների ազգային բյուրո» ՊՈԱԿ-ում կատարվել է դատաբժշկական և դատահետքաբանական համալիր փորձաքննություն, որի արժեքը կազմել է 77.402 /յոթանասունյոթ հազար չորս հարյուր երկու/ ՀՀ դրամ գումար։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ Թաթուլ Փիլոսյանն իրեն վերագրվող արարքը կատարել է ալկոհոլի ազդեցության տակ, նրա կատարած հանցագործության համար պատիժ նշանակելիս` առկա է հանցագործությունների առանձնապես վտանգավոր ռեցիդիվ։




Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Գևորգ Բորիկի Սարգսյանի ցուցմունքներով այն մասին, որ շուրջ երկու տարի աշխատում է Երևան քաղաքի Պուշկինի փողոցի թիվ 1 հասցեում գործող ավտոկայանատեղիում` որպես հսկիչ։ 2012թ. սկզբից ճանաչում է Թաթուլ Փիլոսյանին և Սամվել Համբարձումյանին, որոնք աշխատում են Սախարովի անվան հրապարակում գտնվող, նախկին հրշեջ կայանի շենքում։ 2012թ. դեկտեմբերի 7-ին ամբողջ օրը գտնվել է աշխատանքի վայրում։ Ժամը 20։00-ի սահմաններում, տաքանալու նպատակով մտել է նախկին հրշեջ կայանի մասնաշենք, որտեղ գտնվել են Ս.Համբարձումյանն ու Թ. Փիլոսյանը։ Վերջինիս խնդրել է իր համար նույնպես ջուր տաքացնել, սակայն այդ հանգամանքը Թ.Փիլոսյանին դուր չի եկել և նա լինելով ալկոհոլ օգտագործած վիճակում` սեռական բնույթի հայհոյանքներ է տվել իր հասցեին և պահանջել է հեռանալ մասնաշենքից։ Դուրս գալով սենյակից` քայլել է մուտքի դռան ուղղությամբ։ Այդ ընթացքում նկատել է, որ Թ. Փիլոսյանը սեղանի վրայից վերցնելով սպիտակ բռնակով խոհանոցային դանակը` հարձակվել է իր վրա և միանգամից նույն դանակով հարվածել իր աջ ոտքին, որից սկսվել է առատ արյունահոսել։ Այնուհետև իրեն տեղափոխել են հիվանդանոց, որտեղ ենթարկվել է վիրահատության։
/դատական նիստի արձանագրություն, գ.թ. 41-43, 61-62/
Վկա Սամվել Հենրիկի Համբարձումյանի ցուցմունքներով այն մասին, որ 2012թ նոյեմբերից որպես պահակ աշխատել է Երևանի Սախարովի անվան հրապարակի հարևանությամբ գտնվող նախկին հրշեջ կայանի մասնաշենքում, որտեղ ծանոթացել է որպես պահակ աշխատող Թ. Փիլոսյանի հետ։
2012թ դեկտեմբերի 7-ին, ժամը 20։00-ի սահմաններում, Թ. Փիլոսյանի հետ գտնվել են նախկին հրշեջ կայանի մասնաշենքի` իրենց համար նախատեսված սենյակում, ընթրել են միասին, որի ընթացքում օգտագործել են ոգելից խմիչք։ Այդ ընթացքում իրենց է այցելել նույն շենքի հարևանությամբ գործող ավտոկայանատեղի հսկիչ Գևորգ Սարգսյանը և նկատելով, որ իրենք պատրաստվում են սուրճ խմել` նա նույնպես սուրճ խմելու ցանկություն է հայտնել և շատ տհաճ կերպով փորձել է խմել Թ. Փիլոսյանի սուրճը։ Այդ հանգամանքը զայրացրել է Թ. Փիլոսյանին, որը սեռական բնույթի հայհոյանքներ տալով Գ. Սարգսյանի հասցեին` պահանջել է նրան հեռանալ սենյակից, սակայն Գ. Սարգսյանը չի հեռացել և փորձել է խմել Թ. Փիլոսյանի սուրճը։ Այդ կապակցությամբ Գ.Սարգսյանի և Թ. Փիլոսյանի միջև բանավեճ է առաջացել, որի ընթացքում Թ. Փիլոսյանը սենյակում գտնվող սեղանի վրայից վերցնելով խոհանոցային դանակը և ուղղելով Գ. Սարգսյանի վրա` պահանջել է, որ վերջինս իր հետ դուրս գա սենյակից։ Այնուհետև Գ. Սարգսյանն ու Թ. Փիլոսյանը միասին դուրս են եկել սենյակից և շուրջ երկու րոպե անց, Թ. Փիլոսյանը սեղանից վերցված խոհանոցային դանակը ձեռքին վերադարձել է սենյակ և հայտնել է, որ դանակով հարվածել է Գ. Սարգսյանին, իսկ դանակի ծայրին արյան հետք է եղել։ Դրանից հետո Գ. Սարգսյանին տեղափոխել են հիվանդանոց, որտեղ նա ենթարկվել է վիրահատության։
Հիշողության հետ կապված խնդիրներ ունի և դեպքի մանրամասները չի հիշում։ Նախկինում դատապարտվել և ազատազրկման ձևով պատիժ է կրել։ Նախաքննության ժամանակ իր նկատմամբ բռնություն չի գործադրվել։
/դատական նիստի արձանագրություն, գ.թ. 126-129, 153-155/
Դատաբժշկական փորձաքննության 2012թ. դեկտեմբերի 24-ի թիվ 1863/հ եզրակացությամբ, որի համաձայն` «Գ.Սարգսյանի ստացած մարմնական վնասվածքը` աջ ազդրի շրջանի ծակած-կտրած վերքի ձևով, որն ուղեկցվել է պրոֆուզ արյունահոսությամբ, 2-3-րդ աստիճանի հեմոռագիկ շոկով, պատճառվել է սուր ծակող-կտրող գործիքով, հնարավոր է որոշման մեջ նշված ժամկետում և հանգամանքներում, որը պատճառել է առողջությանը ծանր վնաս` կյանքին վտանգ սպառնացող։»։
/գ.թ. 32-33/
Դատահետքաբանական փորձաքննության 2013թ. հունվարի 25-ի թիվ 2097 եզրակացությամբ, որի համաձայն`
«1.2. Փորձաքննությանը ներկայացված Գևորգ Սարգսյանի անդրավարտիքի և ներքնաշորի վրա առկա վնասվածքները ծակած-կտրած են և կարող էին առաջանալ ինչպես փորձաքննությանը ներկայացված դանակի շեղբի, այնպես էլ նմանատիպ` միակողմանի սրվածություն ունեցող ծակող-կտրող շեղբ ունեցող այլ գործիքի` հնարավոր է դանակի շեղբի մեկ ներգործության արդյունքում։»։
/գ.թ. 102-106/
Դատաբժշկական և դատահետքաբանական համալիր փորձաքննության 2013թ. ապրիլի 18-ի թիվ 13-0762 եզրակացությամբ, որի համաձայն`
«1-4. Փորձաքննությանը ներկայացված սպորտային անդրավարտիքի և ներքնաշորի վնասվածքները, ինչպես նաև Գ.Սարգսյանի վերաբերյալ ներկայացված փաստաթղթերում նշված մարմնական վնասվածքը իրենց բնույթով ծակած-կտրած են և տեղակայություններով համապատասխանում են միմյանց, պատճառվել են միակողմանի սուր սայր ունեցող խորաթափանցման մակարդակին շեղբի համապատասխան լայնություն ունեցող ծակող-կտրող գործիքով` դանակով, որի ներթափանցող հարվածային ներգործությունը տեղակայվել է Գ.Սարգսյանի աջ ազդրի ստորին երրորդի առաջա-դրսային մակերերեսին։
Ելնելով նշված հագուստների վրա առկա ծակած-կտրած վնասվածքների բնույթից և չափային տվյալներից, ներկայացված բժշկական փաստաթղթերում նկարագրված մարմնական վնասվածքի` վերքի և վերքային խողովակի չափային տվյալներից, ինչպես նաև ներկայացված դանակի կառուցվածքային և չափային տվյալներից, նշված վնասվածքները կարող էին պատճառվել ինչպես փորձաքննությանը ներկայացված դանակի շեղբի, այնպես էլ նմանատիպ կառուցվածքային և չափային տվյալներ ունեցող մեկ այլ միակողմանի սուր սայր ունեցող ծակող-կտրող գործիքի` դանակի հարվածային ներգործությամբ։
Ելնելով մարմնական և հագուստների վնասվածքի բնույթից և չափսերից, ինչպես նաև վերքային խողովակի խորաթափանցման մակարդակից, հիմքեր չկան հաստատելու դրանց առաջացման հնարավորությունը Թաթուլ Փիլոսյանի կողմից նշված մեխանիզմով։»։
/գ.թ. 160-165/
Դեպքի վայրի զննություն կատարելու մասին 08.12.2012թ. արձանագրությամբ, որի համաձայն` դեպքի վայրը Երևանի Նալբանդյան փողոցի թիվ 50 հասցեի դիմաց գտնվող, նախկին հրշեջ կայանի շենքն է, որը բաղկացած է 3 հարկից։ Տուժող Գ.Սարգսյանը մատնացույց անելով նշված շենքի առաջին հարկի պահակների սենյակի մուտքի դռան առջևի հատվածը` հայտարարել է, որ 2012թ. դեկտեմբերի 7-ին, ժամը 20.00-ի սահմաններում, այդ հատվածում իրեն դանակահարել է նույն մասնաշենքում որպես պահակ աշխատող Թ.Փիլոսյանը։
/գ.թ. 16/
Որպես այլ փաստաթուղթ` ապացույց ճանաչված, Գևորգ Սարգսյանի հագին եղած հագուստները ներկայացնելու և զննելու մասին 07.12.2012թ. արձանագրությամբ, որի համաձայն` 3-րդ կլինիկական հիվանդանոցի վիրահատարանի բուժքույր Մ. Խաչատրյանը ներկայացրել է Գ. Սարգսյանի հագին եղած շագանակագույն կոստյումը, կապույտ գծավոր սվիտերը, մուգ կանաչ սպորտային գլխարկը, դեղնավուն կոշիկները, սև և սպիտակ սպորտային շալվարը, որոնց վրա առկա են եղել արնանման հետքեր։ Սպորտային շալվարի աջ ազդրի վրա, գոտկատեղից շուրջ 30սմ դեպի ներքև առկա է եղել ուղղահայաց, շուրջ 3սմ երկարությամբ մեկ կտրվածք։ Ներկայացվել է նաև մեկ այլ` սև սպորտային տաբատ, որի վրա նույնպես եղել են արնանման հետքեր։
/գ.թ. 6, 183-184/
Որպես այլ փաստաթուղթ` ապացույց ճանաչված, դանակը ներկայացնելու մասին 08.12.2012թ. արձանագրութամբ, որի համաձայն` Թ. Փիլոսյանը Երևանի Պուշկինի փողոցի թիվ 2 հասցեում ներկայացրել է 30 սմ երկարությամբ դանակ, որի շեղբի երկարությունը 20սմ է, իսկ լայնությունը` 3 սմ։ Ըստ Թ. Փիլոսյանի բանավոր հայտարարության` 2012թ. դեկտեմբերի 07-ին, ժամը 20։00-ի սահմաններում, Երևանի Նալբանդյան փողոցի թիվ 50 հասցեի դիմաց գտնվող նախկին հրշեջ կայանի մոտ անզգուշությամբ ոլորել է Գևորգ Սարգսյանի թևը, ում ձեռքում գտնվել է նշված դանակը, որի ժամանակ դանակը մտել է Գևորգ Սարգսյանի ոտքը։
/գ.թ. 7, 183-184/
Իրեղեն ապացույցներ ճանաչված, Թ. Փիլոսյանի կողմից ներկայացված, գործարանային արտադրության խոհանոցային դանակով և դեպքի օրը Գ. Սարգսյանի հագին եղած հագուստներով։
/գ.թ. 182/
Ամբաստանյալ Թաթուլ Հայկի Փիլոսյանն առաջադրված մեղադրանքում իրեն մեղավոր չի ճանաչել և ցուցմունքներ է տվել այն մասին, որ 2012թ. հոկտեմբերից աշխատել է Երևանի Սախարովի անվան հրապարակի հարևանությամբ գտնվող, նախկին հրշեջ կայանի մասնաշենքում` որպես պահակ։ 2012թ. դեկտեմբերի 7-ին, նույն վայրում որպես բանվոր աշխատող Սամվել Համբարձումյանի հետ գտնվել են աշխատավայրում, երբ ժամը 20.00-ի սահմաններում եկել է իրենց մասնաշենքի հարևանությամբ գտնվող ավտոկայանատեղի հսկիչ Գևորգ Սարգսյանը և իրենց հետ միասին սուրճ խմելու ցանկություն է հայտնել, որին ինքն առարկել է։ Այնուհետև, Գ.Սարգսյանը թքել է սուրճի բաժակի մեջ և սեղանի վրայից վերցնելով խոհանոցային դանակը` վազելով դուրս է եկել սենյակից։ Ինքն անմիջապես գնացել է նրա հետևից և պահանջել է վերադարձնել դանակը, սակայն Գ.Սարգսյանը ոչ միայն չի վերադարձրել դանակը, այլև այն ուղղել է իր վրա։ Ինքը բռնել է Գ. Սարգսյանի աջ ձեռքը, հնարք կատարելով և ձեռքը ոլորելու միջոցով փորձել է խլել դանակը, սակայն նկատել է, որ Գ.Սարգսյանի ոտքն արյունահոսում է։ Նրան ցույց է տվել անհրաժեշտ առաջնային բժշկական օգնություն, որից հետո պատահական տաքսի ավտոմեքենայով տեղափոխել է հիվանդանոց։
Գ. Սարգսյանին դանակով հարվածելու և վնասվածք պատճառելու նպատակ չի ունեցել և վերջինս վնասվածքը ստացել է պատահաբար։ Դեպքի օրը խմել է ընդամենը մեկ բաժակ օղի։
/դատական նիստի արձանագրություն, գ.թ. 54-55, 80, 168/


Դատարանի իրավական վերլուծությունները.

Վերլուծելով ամբաստանյալ Թաթուլ Հայկի Փիլոսյանի նախաքննական և դատաքննական ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Թաթուլ Հայկի Փիլոսյանի ցուցմունքներն իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են արդեն իսկ նշված ապացույցներով։
Վերլուծելով ամբաստանյալ Թաթուլ Հայկի Փիլոսյանին առաջադրված մեղադրանքը և գործով ձեռք բերված ապացույցները` դատարանը գտնում է, որ ամբաստանյալ Թաթուլ Հայկի Փիլոսյանի կողմից, նրա մեղավորությամբ, դիտավորությամբ մեկ ուրիշին մարմնական ծանր վնասվածք պատճառելը, որը վտանգավոր է կյանքի համար` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Թաթուլ Հայկի Փիլոսյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը։ Ամբաստանյալի պատասխանատվությունը և պատիժը մեղմացնող հանգամանքներ դատարանը չի արձանագրում, իսկ որպես նրա պատասխանատվությունը և պատիժը ծանրացնող հանգամանքներ` դատարանը հաշվի է առնում հանցանքը կատարելու առանձնապես վտանգավոր ռեցիդիվը և հանցանքն ալկոհոլի ազդեցության տակ կատարելը։
Քննարկելով ամբաստանյալի նկատմամբ պատիժ նշանակելու հարցը` դատարանը գտնում է հետևյալը.
ՀՀ քրեական օրենսգրքի 22-րդ հոդվածի համաձայն`
«1. Հանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար։
(…)
3. Հանցագործությունների ռեցիդիվն առանձնապես վտանգավոր է համարվում անձի կողմից՝
1) դիտավորությամբ այնպիսի հանցանք կատարելու դեպքում, որի համար նա դատապարտվում է ազատազրկման, եթե անձը նախկինում երեք անգամից ոչ պակաս ցանկացած հաջորդականությամբ ազատազրկման է դատապարտվել միջին ծանրության դիտավորյալ հանցագործության, ծանր կամ առանձնապես ծանր հանցագործության համար.
2) այնպիսի ծանր հանցանք կատարելու դեպքում, որի համար նա դատապարտվում է ազատազրկման, եթե անձը նախկինում երկու անգամ ազատազրկման է դատապարտվել ծանր կամ առանձնապես ծանր հանցագործության համար.
(…)»։
ՀՀ քրեական օրենսգրքի 67.1 հոդվածի համաձայն`
«1. Հանցագործությունների ռեցիդիվի, վտանգավոր և առանձնապես վտանգավոր ռեցիդիվի դեպքում պատիժ նշանակելիս հաշվի են առնվում կատարված հանցագործությունների քանակը, բնույթը և ծանրությունը, այն հանգամանքները, որոնց հետևանքով նախկին պատիժը բավարար չի եղել մեղավորի ուղղման համար, ինչպես նաև նոր հանցագործության բնույթը, ծանրությունը և հետևանքները։
2. (…)
Հանցագործությունների առանձնապես վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երեք քառորդից։»։
Թաթուլ Փիլոսյանը նախկինում երեք անգամից ոչ պակաս ազատազրկման է դատապարտվել տարբեր դիտավորյալ հանցագործությունների համար։
Հայաստանի Հանրապետության քրեական օրենսգրքի 112-րդ հոդվածով նախատեսված հանցագործության կատարման համար ամբաստանյալ Թաթուլ Փիլոսյանը ենթակա է պատժի ազատազրկման ձևով, որը չի կարող նվազ լինել հինգ տարի երեք ամիս ժամկետով ազատազրկումից, քանի որ այդ հոդվածի սանկցիայով որպես առավելագույն պատիժ սահմանված է ազատազրկում յոթ տարի ժամկետով։
Դատարանը գտնում է, որ իր նկատմամբ նշանակված պատիժն ամբաստանյալ Թաթուլ Փիլոսյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 31.05.2013թ. որոշմամբ իրեղեն ապացույցներ ճանաչված հագուստները պետք է վերադարձնել տուժող Գևորգ Սարգսյանին, իսկ դանակը` պետք է ոչնչացնել։
Քննարկելով խափանման միջոցի հարցը` դատարանը գտնում է, որ ամբաստանյալ Թաթուլ Փիլոսյանի նկատմամբ որպես խափանման միջոց կալանավորումն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է, որ ամբաստանյալ Թաթուլ Հայկի Փիլոսյանից հօգուտ ՀՀ պետական բյուջեի բռնագանձման է ենթակա դատաբժշկական և դատահետքաբանական համալիր փորձաքննության արժեք հանդիսացող 77.402 /յոթանասունյոթ հազար չորս հարյուր երկու/ ՀՀ դրամ գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-365-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Թաթուլ Հայկի Փիլոսյանին մեղավոր ճանաչել Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցանքում և դատապարտել ազատազրկման 5 /հինգ/ տարի 3 /երեք/ ամիս ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. դեկտեմբերի 26-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 31.05.2013թ. որոշմամբ իրեղեն ապացույցներ ճանաչված հագուստները վերադարձնել տուժող Գևորգ Սարգսյանին, իսկ դանակը` ոչնչացնել։
Ամբաստանյալ Թաթուլ Հայկի Փիլոսյանից հօգուտ ՀՀ պետական բյուջեի բռնագանձել 77.402 /յոթանասունյոթ հազար չորս հարյուր երկու/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ