Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

23 մայիսի 2013թ. ք. Երևան

ԵԿԴ-0065/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ
մեղադրող`
Հայաստանի Հանրապետության /այսուհետ ՀՀ/
գլխավոր դատախազության
ավագ դատախազ Ա. Նադոյանի,

պաշտպան Գ. Մարգարյանի,

տուժող Վ. Հարությունյան,



դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Էվելինա Արմենի Մանվելյանի`
ծնված 1988թ. հուլիսի 16-ին Երևանում, հայ, ՀՀ քաղաքացի, բարձրագույն կրթությամբ, ամուսնացած, խնամքին ոչ ոք, նախկինում չդատված, բնութագրվում է դրական, չի աշխատում, (որպես օրդինատոր սովորում է «Շենգավիթ» բժշկական կենտրոնում), հաշվառված է և բնակվում է Երևանի Նալբանդյան փողոցի թիվ 17 շենքի թիվ 10 բնակարանում, կալանքի տակ չէ, մեղադրվում է ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով։


Գործի դատավարական նախապատմությունը

Թիվ 62205412 քրեական գործը ՀՀ հատուկ քննչական ծառայությունում հարուցվել է 2012թ. մայիսի 30-ին, ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով, Էվելինա Մանվելյանի կողմից Վլադիմիր Հարությունյանին վրաերթի ենթարկելու և ճանապարհատրանսպորտային պատահարի վայրը թողնելու դեպքի առթիվ։
26.06.2012թ. հայտարարվել է մեղադրյալ Էվելինա Արմենի Մանվելյանի հետախուզումը։
Քննիչի 2012թ. հունիսի 30-ի որոշմամբ, թիվ 62205412 քրեական գործի վարույթը կասեցվել է` մինչև մեղադրյալ Էվելինա Մանվելյանին հայտնաբերելը։
15.04.2013թ. մեղադրյալ Է. Մանվելյանն ինքնակամ ներկայացել է նախաքննության մարմնին։
Ամբաստանյալ Էվելինա Արմենի Մանվելյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով հետևյալ արարքների համար. «որ նա ավտոմեքենա վարելով` խախտել է ճանապարհային երթևեկության կանոնները, որը մարդու առողջությանն անզգուշությամբ պատճառել է միջին ծանրության վնաս, որից հետո թողնելով ճանապարհատրանսպորտային պատահարի վայրը` հեռացել է։
Այսպես, Էվելինա Մանվելյանը 2012թ. ապրիլի 16-ին` ժամը 1345-ի սահմաններում, Երևան քաղաքի Նալբանդյան փողոցի 104-րդ հասցեում գտնվող ՀՀ ԱԱԾ վարչական շենքի դիմաց «Տոյոտա-Պրադո» մակնիշի, 531ԼԼ11 հաշվառման համարանիշի ավտոմեքենան վարելու ընթացքում իրականացրել է ոչ պատշաճ ու վտանգավոր կառավարում` ավտոմոբիլը վարելով հանդիպակաց ուղեմասով վրաերթի է ենթարկել հետիոտներ` ՀՀ ԱԱԾ քննչական վարչության քննիչներ Սամվել Տավարացյանին, Կարեն Հովհաննիսյանին և Վլադիմիր Հարությունյանին, տեխնիկական տեսակետից ստեղծել է վթարային իրադրություն և թույլ տվել «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի ու ՃԵԿ-ի 2-րդ կետի պահանջներին հակասող գործողություններ, դրանով իսկ պայմանավորել տվյալ վրաերթի առաջացումը` ինքն իրեն զրկելով այն կանխելու տեխնիկական հնարավորությունից։
Վրաերթի հետևանքով Վլադիմիր Հարությունյանի առողջությանն անզգուշությամբ պատճառվել է միջին ծանրության վնաս։
Վրաերթից հետո Էվելինա Մանվելյանը, խախտելով «Ճանապարհային երթևեկության անվտանգության ապահովման մասին» ՀՀ օրենքի 24-րդ հոդվածի 2-րդ մասի «դ» ենթակետի պահանջները, թողել է ճանապարհատրանսպորտային պատահարի վայրը և հեռացել։»։
2013թ. մայիսի 02-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Արագացված դատական քննություն

Ամբաստանյալ Էվելինա Արմենի Մանվելյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։
Մեղադրողը դատական քննության արագացված կարգ կիրառելու դեմ չառարկեց։
22.05.2013թ. և 23.05.2013թ. դատարան են ստացվել տուժող Վ. Հարությունյանի դիմումները, որոնցով հայտնել է, որ ամբաստանյալի նկատմամբ քաղաքացիական հայցի պահանջ չունի, նրա հետ չի հաշտվել, դատական քննության արագացված կարգ կիրառելու դեմ չի առարկում։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Էվելինա Արմենի Մանվելյանը կատարել է ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով նախատեսված արարքներ։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվեց, որ ամբաստանյալ Էվելինա Մանվելյանը նախկինում դատված չի եղել, բնութագրվում է դրական, ինքնակամ ներկայացել է նախաքննության մարմնին։


Դատարանի իրավական վերլուծությունները

Առաջադրված մեղադրանքն ամբաստանյալ Էվելինա Արմենի Մանվելյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ, ավտոմեքենա վարող Էվելինա Արմենի Մանվելյանի կողմից, նրա մեղավորությամբ, ճանապարհային երթևեկության կանոնները խախտելը, որը մարդու առողջությանն անզգուշությամբ պատճառել է միջին ծանրության վնաս` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 242-րդ հոդվածի 1-ին մասով նախատեսված հանցագործության հատկանիշներին։
Ապացուցված է նաև ՀՀ քրեական օրենսգրքի 242-րդ հոդվածով նախատեսված հետևանքների առաջացման դեպքում տրանսպորտային միջոց վարող և ճանապարհային երթևեկության կանոնները խախտած անձի` ամբաստանյալ Էվելինա Արմենի Մանվելյանի կողմից, նրա մեղավորությամբ ճանապարհատրանսպորտային պատահարի վայրը թողնելը, այդ արարքը նույնպես ճիշտ է որակված և համապատասխանում է Հայաստանի Հանրապետության քրեական օրենսգրքի 244-րդ հոդվածով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Էվելինա Արմենի Մանվելյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, ինքնակամ ներկայացել է նախաքննության մարմնին։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Ամբաստանյալ Էվելինա Արմենի Մանվելյանն իր կատարած արարքների` Հայաստանի Հանրապետության քրեական օրենսգրքի 242-րդ հոդվածի 1-ին մասով նախատեսված հանցագործության համար ենթակա է պատժի տուգանքի ձևով, տրանսպորտային միջոցներ վարելու իրավունքից զրկելով` 1 /մեկ/ տարի ժամկետով, իսկ 244-րդ հոդվածով նախատեսված հանցագործության համար նա ենթակա է պատժի տուգանքի ձևով, առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու։
Դատարանը գտնում է, որ իր նկատմամբ նշանակված պատիժներն ամբաստանյալ Էվելինա Մանվելյանը պետք է կրի, քանի որ դրանց խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցի հարցը` դատարանը գտնում է, որ 25.04.2013թ. որոշմամբ իրեղեն ապացույց ճանաչված տեսաերիզը պետք է պահել քրեական գործի հետ միասին։
Քննարկելով խափանման միջոցի հարցը` դատարանը գտնում է, որ ամբաստանյալ Էվելինա Մանվելյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ, 3751-3754-րդ հոդվածներով, դատարանը`


Վ Ճ Ռ Ե Ց

Ամբաստանյալ Էվելինա Արմենի Մանվելյանին մեղավոր ճանաչել Հայաստանի Հանրապետության քրեական օրենսգրքի 242-րդ հոդվածի 1-ին մասով, 244-րդ հոդվածով նախատեսված հանցանքներում և դատապարտել. ՀՀ քրեական օրենսգրքի 242-րդ հոդվածի 1-ին մասով` տուգանքի նվազագույն աշխատավարձի հիսնապատիկի` 50.000 /հիսուն հազար/ ՀՀ դրամ գումարի չափով` տրանսպորտային միջոցներ վարելու իրավունքից զրկելով` 1 /մեկ/ տարի ժամկետով, 244-րդ հոդվածով` տուգանքի նվազագույն աշխատավարձի հարյուրապատիկի` 100.000 /հարյուր հազար/ ՀՀ դրամ գումարի չափով, առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու։
ՀՀ քրեական օրենսգրքի 66-րդ հոդվածով սահմանված` պատիժների լրիվ գումարման սկզբունքի կիրառմամբ, ամբաստանյալ Էվելինա Արմենի Մանվելյանի նկատմամբ պատիժ նշանակել տուգանք նվազագույն աշխատավարձի հարյուրհիսնապատիկի` 150.000 /հարյուր հիսուն հազար/ ՀՀ դրամ գումարի չափով` տրանսպորտային միջոցներ վարելու իրավունքից զրկելով` 1 /մեկ/ տարի ժամկետով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 25.04.2013թ. որոշմամբ իրեղեն ապացույց ճանաչված տեսաերիզը պահել քրեական գործի հետ միասին։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։
Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։


ԴԱՏԱՎՈՐ` Մ. ՄԱՐՏԻՐՈՍՅԱՆ