ԵԿԴ/0061/01/13





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«13» մայիսի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Կ.Կարապետյան
մեղադրող Գ.Տիգրանյան
պաշտպան Է.Աղաջանյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Աշոտ Վանուշի Ստեփանյանի` ծնված 1962 թվականի հունվարի 3-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, ամուսնացած, հաշվառված է Երևան քաղաքի Ավանեսովի փողոցի 6-րդ շենքի 16-րդ բնակարանում, մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով, որպես խափանման միջոց ընտրվել է կալանավորումը:
1. Գործի դատավարական նախապատմությունը.
2012 թվականի դեկտեմբերի 12-ին ՀՀ ԿԱ ԱԱԾ քննչական վարչության քննիչ Ա.Հարությունյանի որոշմամբ ՀՀ քրեական օրենսգրքի 325-րդ հոդվածի 1-ին մասի հատկանիշներով հարուցվել է թիվ 58212212 քրեական գործը:
2012 թվականի դեկտեմբերի 26-ին ՀՀ ԿԱ ԱԱԾ քննչական վարչության քննիչ Ա.Հարությունյանի որոշմամբ թիվ 58212212 քրեական գործով Աշոտ Վանուշի Ստեփանյանին մեղադրանք է առաջադրվել ՀՀ քրեական օրենսգրքի 325-րդ հոդվածի 2-րդ մասով:
2013 թվականի ապրիլի 22-ին ՀՀ ԿԱ ԱԱԾ քննչական վարչության քննիչ Ա.Հարությունյանի որոշմամբ թիվ 58212212 քրեական գործով Աշոտ Վանուշի Ստեփանյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով:
2013 թվականի ապրիլի 23-ին ՀՀ ԿԱ ԱԱԾ քննչական վարչության քննիչ Ա.Հարությունյանի որոշմամբ թիվ 58212212 քրեական գործից անջատվել է մեղադրյալ Աշոտ Վանուշի Ստեփանյանի վերաբերյալ մասը, որին շնորհվել է 58204013 համարը:
2013 թվականի ապրիլի 25-ին Աշոտ Վանուշի Ստեփանյանի վերաբերյալ թիվ 58204013 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0061/01/13 համարը:
Աշոտ Վանուշի Ստեփանյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով` այն արարքի համար, որ նա, հանդիսանալով «Ֆորտունա-93» ՍՊ ընկերության տնօրենը և զբաղվելով տուրիզմի հետ կապված գործունեությամբ, 2012 թվականի նոյեմբերին համապատասխան վարձատրության դիմաց ստանձնել է ՀՀ քաղաքացիներ, հայր և որդի Կարապետ և Դավիթ Հովհաննիսյանների համար կազմակերպել Շենգենյան համաձայնության երկրների մուտքի արտոնագրեր ձևակերպելու գործընթացը: Գիտակցելով, որ Հայաստանի Հանրապետությունում գործող համապատասխան դեսպանություններից մուտքի արտոնագրերը ձեռք բերելու հնարավորություն չունի, նպատակադրվել է արտոնագրերը ձեռք բերել Ուկրաինայում գտնվող Հունաստանի դեսպանությունից` անձնագրերում կեղծիքներ կատարելով ու կեղծված այդ անձնագրերը նույն քաղաքացիներին հետագայում իրացնելով: Հանցավոր մտադրությունն իրականացնելով, Կարապետ և Դավիթ Հովհաննիսյանների ՀՀ քաղաքացու թիվ AM 0913115 և թիվ AM 0913114 անձնագրերում 2012 թվականի նոյեմբերին դրել է իր տրամադրության տակ գտնվող Ուկրաինայի «Բորիսպոլ» հսկիչ անցագրային կետի մուտքի թիվ 191 և ելքի թիվ 366 կեղծ կնիքները, ինչպես նաև Ուկրաինայում ժամանակավորապես բնակվելու թույլտվության կեղծ կնիքները, դրանով իսկ փաստելով, թե իբր նշված քաղաքացիները գտնվել և բնակվել են Ուկրաինայի տարածքում և այդ պատճառով են դիմում տեղի դեսպանությանը, որից հետո Կարապետ և Դավիթ Հովհաննիսյանների Հայաստանի Հանրապետությունում փաստացի գտնվելու պայմաններում, կեղծված անձնագրերը ուղարկել է Ուկրաինայի Կիև քաղաքում գտնվող քննությամբ անձը չպարզված իր ծանոթին, ով անձնագրերը ներկայացրել է Կիև քաղաքում գտնվող Հունաստանի դեսպանություն, որտեղից ստացվել են Շենգենյան համաձայնության երկրների մուտքի թիվ 000975940 և 000975939 օրինական արտոնագրերը: Այնուհետև անձնագրերը` փակցված արտոնագրերով, Ուկրաինայից վերադարձվել են Աշոտ Ստեփանյանին և վերջինը, 7.700 ԱՄՆ դոլար ստանալով, կեղծված անձնագրերն իրացրել է Կարապետ Հովհաննիսյանին ու նա, որդու` Դավիթ Հովհաննիսյանի հետ միասին 2012 թվականի նոյեմբերի 20-ին «Զվարթնոց» օդանավակայանից մեկնել է Փարիզ:
2. Արագացված դատական քննություն.
Մինչ դատաքննությունն սկսելն ամբաստանյալ Աշոտ Վանուշի Ստեփանյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Աշոտ Վանուշի Ստեփանյանը կատարել է արարք` նախատեսված ՀՀ քրեական օրենսգրքի 325-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, եկավ հետևյալ եզրահանգման.
Աշոտ Ստեփանյանի անձը դրականորեն բնութագրող հանգամանքներ են ինքնախոստովանական ցուցմունքներ տալը, բարձրագույն կրթություն ունենալը, ամուսնացած լինելը և կատարածի համար զղջալը:
Դատարանը գտնում է, որ Աշոտ Ստեփանյանի պատասխանատվությունն ու պատիժը մեղմացնող հանգամանք պետք է դիտել նախկինում արատավորված` դատապարտված չլինելը:
Դատարանը միաժամանակ արձանագրում է, որ Աշոտ Ստեփանյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Աշոտ Ստեփանյանը ենթակա է քրեական պատասխանատվության և պատժի:
Դատարանը, հաշվի առնելով Աշոտ Ստեփանյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքը, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Աշոտ Ստեփանյանի կատարած արարքի համար ՀՀ քրեական օրենսգրքի 325-րդ հոդվածի 1-ին մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց: Այսպիսով, Դատարանը գտնում է, որ Աշոտ Ստեփանյանի նկատմամբ նշանակվելիք պատժի ժամկետին պետք է հաշվակցել սույն քրեական գործով 2012 թվականի դեկտեմբերի 24-ից մինչև 2013 թվականի հունվարի 14-ը արգելանքի տակ գտնվելու ժամկետը` 21 (քսանմեկ) օրը:
Դատարանը գտնում է, որ Աշոտ Ստեփանյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև 2013 թվականի հունիսի 2-ը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2013 թվականի ապրիլի 12-ի որոշմամբ իրեղեն ապացույց ճանաչված` Կարապետ Հակոբի Հովհաննիսյանի տվյալներով ՀՀ քաղաքացու թիվ AM 0913115 և Դավիթ Կարապետի Հովհաննիսյանի տվյալներով ՀՀ քաղաքացու թիվ AM 0913114 անձնագրերը պետք է հանձնել ՀՀ ոստիկանությանը:
Դատարանը գտնում է, որ դատական ծախսերն ամբաստանյալ Աշոտ Ստեփանյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը
ՎՃՌԵՑ

Աշոտ Վանուշի Ստեփանյանին մեղավոր ճանաչել ՀՀ քրեական օրենսգրքի 325-րդ հոդվածի 1-ին մասով և պատիժ նշանակել ազատազրկում` 5 (հինգ) ամիս ժամկետով:
Աշոտ Վանուշի Ստեփանյանի նկատմամբ նշանակված պատժի ժամկետին հաշվակցել սույն քրեական գործով 2012 թվականի դեկտեմբերի 24-ից մինչև 2013 թվականի հունվարի 14-ը արգելանքի տակ գտնվելու ժամկետը` 21 (քսանմեկ) օրը, և վերջնական պատիժ թողնել կրելու` ազատազրկում` 4 (չորս) ամիս 9 (ինը) օր ժամկետով:
Պատժի կրման սկիզբը հաշվել 2013 թվականի հունվարի 24-ից:
Աշոտ Վանուշի Ստեփանյանի նկատմամբ ընտրված խափանման միջոցը` կալանավորումը, թողնել անփոփոխ` մինչև 2013 թվականի հունիսի 2-ը:
Դատավճիռն օրինական ուժի մեջ մտնելուց հետո` 2013 թվականի ապրիլի 12-ի որոշմամբ իրեղեն ապացույց ճանաչված` Կարապետ Հակոբի Հովհաննիսյանի տվյալներով ՀՀ քաղաքացու թիվ AM 0913115 և Դավիթ Կարապետի Հովհաննիսյանի տվյալներով ՀՀ քաղաքացու թիվ AM 0913114 անձնագրերը հանձնել ՀՀ ոստիկանությանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ