Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

13 մայիսի 2013թ. ք. Երևան

ԵԿԴ-0060/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Երևանի Կենտրոն և Նորք-Մարաշ վարչական
շրջանների դատախազի տեղակալ Ա. Գալստյանի,



դատարանում, դռնբաց դատական նիստում քննեց գործն ըստ մեղադրանքի
Հարություն Սամվելի Բեգլարյանի`
ծնված 1987թ. օգոստոսի 24-ին Ադրբեջանի Հանրապետության Բաքու քաղաքում, հայ, փախստական, բարձրագույն կրթությամբ, ամուրի, խնամքին ոչ ոք, նախկինում չդատված, բնութագրվում է դրական, բնակվում է ք. Երևան, Նորքի 9-րդ փողոցի թիվ 14 տանը, կալանքի տակ չէ, մեղադրվում է ՀՀ քրեական օրենսգրքի 235-րդ հոդվածի 4-րդ մասով։



Գործի դատավարական նախապատմությունը

Թիվ 13144013 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. ապրիլի 13-ին, ՀՀ քրեական օրենսգրքի 235-րդ հոդվածի 4-րդ մասով։
Ամբաստանյալ Հարություն Սամվելի Բեգլարյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով` հետևյալ արարքի համար. «որ նա Երևան քաղաքի Նորք-Մարաշ 17 փողոցի ամայի տարածքից գտել և իր տաբատի գոտկատեղում ապօրինի կերպով կրել է 9 մմ տրամաչափի «5007» համարի «S*WESSON*CORMANI» տեսակի ձայնագազային ատրճանակ, որը հայտնաբերվել և առգրավվել է նրան 13.04.2013թ-ին ժամը 17։30-ին Ոստիկանության Երևան քաղաքի վարչություն բերման ենթարկելու և անձնական խուզարկություն կատարելու ժամանակ։»։
2013թ. ապրիլի 25-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
2013թ. ապրիլի 13-ին, ամբաստանյալ Հ. Բեգլարյանն իր տաբատի գոտկատեղում ապօրինի կերպով կրելով 9մմ տրամաչափի, 5007 համարի, «Էս*Վեսոն*Քորմանի» /«S*WESSON*CORMANI»/ տեսակի գազային ատրճանակը` զբոսնել է Երևանի Ալեք Մանուկյան փողոցի վրա գտնվող, Երևանի պետական մանկավարժական համալսարանի կուլտուրայի ֆակուլտետի մոտակայքում։ Նույն օրը, ժամը 17։30-ին, ապօրինի կերպով զենք կրելու կասկածանքով, նշված վայրից ամբաստանյալ Հարություն Բեգլարյանը բերման է ենթարկվել ՀՀ ոստիկանության Երևան քաղաքի վարչություն, որտեղ նրա անձնական խուզարկությամբ հայտնաբերվել է վերոհիշյալ գազային ատրճանակը։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Հարություն Բեգլարյանը նախկինում դատված չի եղել, բնութագրվում է դրական, իրեն լիովին մեղավոր է ճանաչել և տվել է ինքնախոստովանական ցուցմունքներ։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Հարություն Սամվելի Բեգլարյանի ինքնախոստովանական ցուցմունքներով այն մասին, որ 5-ից 6 տարի առաջ, Երևանի Նորք-Մարաշ 17-րդ փողոցի ամայի տարածքից պատահաբար գտել է դատարկ փամփշտակալով գազային ատրճանակ, որը պահել է իրենց տան այգու չերևացող հատվածում։ 2013թ. ապրիլի 13-ին կրելով այդ ատրճանակը` զբոսնել է Երևանի Ալեք Մանուկյան փողոցի վրա գտնվող, Երևանի պետական մանկավարժական համալսարանի կուլտուրայի ֆակուլտետի մոտակայքում։ Ժամը 17։30-ի սահմաններում, ապօրինի զենք կրելու կասկածանքով բերման է ենթարկվել ՀՀ ոստիկանության Երևան քաղաքի վարչություն, որտեղ նրա անձնական խուզարկությամբ հայտնաբերվել է վերոհիշյալ գազային ատրճանակը։ Անկեղծորեն զղջում է կատարածի համար և խնդրում է մեղմ պատժել։
/դատական նիստի արձանագրություն, գ.թ. 36/
Դատաձգաբանական փորձաքննության 2013թ. ապրիլի 13-ի թիվ 777 եզրակացությամբ, որի համաձայն` «Ներկայացված ատրճանակը հանդիսանում է գործարանային արտադրության 9մմ տրամաչափի «5007» համարի «S*WESSON*CORMANI» տեսակի ձայնա-գազային ատրճանակ, պիտանի է կրակելու համար ձայնային ու գազային փամփուշտներով։ Ներկայացված վիճակում ատրճանակի փողանցքի արգելափակիչը բացակայում է, ինչը հնարավորություն է տալիս ատրճանակից կրակոցներ կատարել նաև փողաբերանից լիցքավորվող համապատասխան տրամագծի արկերով և այդ դեպքում ատրճանակը հանդիսանում է ողորկափող հրազեն։»։
/գ.թ. 10/
Որպես այլ փաստաթուղթ` ապացույց ճանաչված, անձին խուզարկության ենթարկելու մասին 2013թ. ապրիլի 13-ի արձանագրությամբ, որի համաձայն` Հարություն Բեգլարյանի անձնական խուզարկությամբ, նրա ջինսե տաբատի գոտկատեղի հետնամասից հայտնաբերվել է 5007 համարի, «Էս*Վեսոն*Քորմանի» /«S*WESSON*CORMANI»/ տեսակի, սև պլաստամասե բռնակով, դատարկ պահունակով ատրճանակ։ Ըստ Հ. Բեգլարյանի բանավոր հայտարարության` հայտնաբերված ատրճանակը 5-ից 6 տարի առաջ գտել է Նորքի անտառից, որը մինչև օրս պահել է իր մոտ։
/գ.թ. 4, 42/
Իրեղեն ապացույց ճանաչված, 9մմ տրամաչափի, 5007 համարի, «Էս*Վեսոն*Քորմանի» /«S*WESSON*CORMANI»/ տեսակի գազային ատրճանակով։
/գ.թ. 41/



Դատարանի իրավական վերլուծությունները.

Վերլուծելով ամբաստանյալ Հարություն Սամվելի Բեգլարյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Հարություն Սամվելի Բեգլարյանի կողմից, նրա մեղավորությամբ, ապօրինի կերպով գազային զենք կրելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Հարություն Սամվելի Բեգլարյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, տալով ինքնախոստովանական ցուցմունքներ` անկեղծորեն զղջացել է կատարածի համար։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Ամբաստանյալ Հարություն Սամվելի Բեգլարյանն իր կատարած` Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցագործության համար ենթակա է պատժի տուգանքի ձևով։
Դատարանը գտնում է, որ իր նկատմամբ նշանակված պատիժն ամբաստանյալ Հարություն Բեգլարյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցի հարցը` դատարանը գտնում է, որ դատավճռի օրինական ուժի մեջ մտնելուց հետո, 23.04.2013թ. որոշմամբ իրեղեն ապացույց ճանաչված, 9մմ տրամաչափի, 5007 համարի, «Էս*Վեսոն*Քորմանի» /«S*WESSON*CORMANI»/ տեսակի գազային ատրճանակը պետք է բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Քննարկելով խափանման միջոցի հարցը` դատարանը գտնում է, որ ամբաստանյալ Հարություն Բեգլարյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ հոդվածներով, դատարանը`



Վ Ճ Ռ Ե Ց

Ամբաստանյալ Հարություն Սամվելի Բեգլարյանին մեղավոր ճանաչել Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցանքում և դատապարտել տուգանքի նվազագույն աշխատավարձի չորսհարյուրապատիկի` 400.000 /չորս հարյուր հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 23.04.2013թ. որոշմամբ իրեղեն ապացույց ճանաչված, 9մմ տրամաչափի, 5007 համարի, «Էս*Վեսոն*Քորմանի» /«S*WESSON*CORMANI»/ տեսակի գազային ատրճանակը բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ