ԵԿԴ/0040/01/13






ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ



«19» ապրիլի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Կ.Կարապետյանի, մասնակցությամբ մեղադրող Ս.Հարությունյանի, ամբաստանյալ Սամվել Մամիկոնի Կիրակոսյանի, տուժող Ծովինար Գևորգի Պողոսյանի, դռնբաց դատական նիստում քննելով քրեական գործն ըստ մեղադրանքի Սամվել Մամիկոնի Կիրակոսյանի (ծնված 1958 թվականի սեպտեմբերի 12-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, դատվածություն չունեցող, ամուսնացած, չի աշխատում, բնակվում է Երևան քաղաքի Ջիվանու 1-ին շենքի 34-րդ բնակարանում, որպես խափանման միջոց ընտրվել է չհեռանալու մասին ստորագրությունը)` ՀՀ քրեական օրենսգրքի 177-րդ հոդվածի 1-ին մասով

ՊԱՐԶԵՑ

2013 թվականի փետրվարի 5-ին ՀՀ ոստիկանության Կենտրոնականի քննչական բաժնի քննիչ Լ.Թաթոյանի որոշմամբ ՀՀ քրեական օրենսգրքի 177-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13111613 քրեական գործը:
2013 թվականի փետրվարի 12-ին ՀՀ ոստիկանության Կենտրոնականի քննչական բաժնի քննիչ Լ.Թաթոյանի որոշմամբ թիվ 13111613 քրեական գործով Սամվել Մամիկոնի Կիրակոսյանին մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով:
2013 թվականի մարտի 28-ին Սամվել Մամիկոնի Կիրակոսյանի վերաբերյալ թիվ 13111613 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0040/01/13 համարը:
Սամվել Մամիկոնի Կիրակոսյանին մեղադրանք է առաջադրվել ՀՀ քրեական օրենսգրքի ՀՀ քրեական օրենսգրքի 177-րդ հոդվածի 1-ին մասով այն արարքի համար, որ նա 2013 թվականի փետրվարի 4-ին` ժամը 15:10-ի սահմաններում, Երևան քաղաքի Կորյուն և Աբովյան փողոցների խաչմերուկի մոտ գտնվող կանգառում Ծովինար Պողոսյանի վերարկուի գրպանից գաղտնի հափշտակել է վերջինին պատկանող զգալի չափի` 45.000 ՀՀ դրամ արժողության «Սամսունգ C3222» մոդելի բջջային հեռախոսը:
Դատական քննության ժամանակ տուժող Ծովինար Գևորգի Պողոսյանը հայտնեց, որ հաշտվում է ամբաստանյալ Սամվել Մամիկոնի Կիրակոսյանի հետ: Ծովինար Գևորգի Պողոսյանը միաժամանակ նշեց, որ գիտակցում է հաշտվելու հետևանքները:
Դատական քննության ժամանակ ամբաստանյալ Սամվել Մամիկոնի Կիրակոսյանը հայտնեց, որ ինքը նույնպես հաշտվել է տուժող Ծովինար Գևորգի Պողոսյանի հետ և գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 177-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Ծովինար Գևորգի Պողոսյանը և ամբաստանյալ Սամվել Մամիկոնի Կիրակոսյանը հաշտվել են միմյանց հետ, գտնում է, որ թիվ ԵԿԴ/0040/01/13 քրեական գործի վարույթը պետք է կարճել և ամբաստանյալ Սամվել Մամիկոնի Կիրակոսյանի նկատմամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը դադարեցնել:
Դատարանը գտնում է, որ Սամվել Մամիկոնի Կիրակոսյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0040/01/13 քրեական գործի վարույթը կարճել և Սամվել Մամիկոնի Կիրակոսյանի նկատմամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը դադարեցնել` տուժող Ծովինար Գևորգի Պողոսյանի հաշտվելու հիմքով:
Սամվել Մամիկոնի Կիրակոսյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ