Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

29 մարտի 2013թ. ք. Երևան

ԵԿԴ-0032/01/13

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող`
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Հ. Էյրամջյանի,



դատարանում, դռնբաց դատական նիստում քննեց գործն ըստ մեղադրանքի
Սամվել Սերգեյի Վարդանյանի`
ծնված 1961թ. նոյեմբերի 15-ին Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուսնացած, խնամքին ոչ ոք, նախկինում չդատված, չի աշխատում, հաշվառված է և բնակվում է ք. Երևան, Նորագյուղ թիվ 333 տանը, կալանքի տակ չէ, մեղադրվում է ՀՀ քրեական օրենսգրքի 235-րդ հոդվածի 4-րդ մասով։


Գործի դատավարական նախապատմությունը

Թիվ 13126513 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2013թ. մարտի 04-ին, ՀՀ քրեական օրենսգրքի 235-րդ հոդվածի 4-րդ մասով, Սամվել Վարդանյանի կողմից ապօրինի կերպով սառը զենք կրելու դեպքի առթիվ։
Քննիչի 2013թ. մարտի 12-ի որոշմամբ, Սամվել Վարդանյանի կողմից Ջորջ Հակոբյանին սպանության սպառնալիք տալու մասով քրեական հետապնդում չի իրականացվել` Ս. Վարդանյանի և Ջ. Հակոբյանի հաշտվելու պատճառաբանությամբ։
Ամբաստանյալ Սամվել Սերգեյի Վարդանյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 235-րդ հոդվածի 4-րդ մասով` հետևյալ արարքի համար. «որ նա ապօրինի կերպով կրել է քաղաքացիական շեղբավոր սառը զենքերի շարքին դասվող գործարանային արտադրության «Ժալո» տեսակի ընդհանուր նշանակության որսորդական դանակ, որը վերջինիս մոտ հայտնաբերվել է 2013թ. փետրվարի 05-ին Երևան քաղաքի Գ.Լուսավորիչ փողոցում ծառայություն կատարող ՀՀ ոստիկանության աշխատակիցների կողմից։»։
2013թ. մարտի 19-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Սամվել Սերգեյի Վարդանյանը չունենալով մշտական աշխատանք` իր «Օփել» մակնիշի, 33PL684 պետհամարանիշի ավտոմեքենայով կատարել է ուղևորափոխադրումներ։ Նա 2012թ.-ին ձեռք է բերել և իր կողմից վարվող ավտոմեքենայի առջևի ձախ դռան գրպանում պահել է սառը զենք հանդիսացող, «Ժալո» /«ԻԸխԿ»/ տեսակի ընդհանուր նշանակության որսորդական դանակ։
2013թ. փետրվարի 05-ին, ժամը 14.00-ի սահմաններում, ամբաստանյալ Ս.Վարդանյանն իր ավտոմեքենան վարել է Երևան քաղաքի Արշակունյաց պողոտայով դեպի Գ.Լուսավորիչ փողոցի ուղղությամբ։ Երթևեկության ընթացքում, «Մերսեդես» մակնիշի, 08US369 պետհամարանիշի ավտոմեքենայով համընթաց երթևեկող Ջորջ Հակոբյանը երթևեկության համար անբարենպաստ պայման է ստեղծել, որի պատճառով ամբաստանյալ Ս.Վարդանյանը կտրուկ արգելակել է, ապա ձեռքը դուրս հանելով ավտոմեքենայից` թափահարել է և նախատել Ջ.Հակոբյանին, որից հետո ավտոմեքենան վարելով` հեռացել է։ Ջ.Հակոբյանը հետևել է ամբաստանյալ Ս.Վարդանյանին, ապա Երևանի Գ.Լուսավորիչ փողոցում գտնվող, ՀՀ-ում Ֆրանսիայի Հանրապետության դեսպանության շենքի մոտ փակելով վերջինիս ավտոմեքենայի ճանապարհը` կանգնեցրել է ավտոմեքենան։ Այնուհետև Ջ. Հակոբյանն իջնելով ավտոմեքենայից` մոտեցել է Ս.Վարդանյանին և կատարվածի համար պարզաբանում պահանջել, որի պատճառով Ջ.Հակոբյանի և Ս.Վարդանյանի միջև վիճաբանություն է սկսվել։ Այդ ընթացքում ամբաստանյալ Ս. Վարդանյանն իր կողմից ապօրինի կերպով կրվող դանակը ձեռքում պահելով` Ջ.Հակոբյանին սպառնալիքներ է տվել։ Նույն պահին ամբաստանյալ Ս. Վարդանյանին և Ջ. Հակոբյանին են մոտեցել ՀՀ ոստիկանության պետական պահպանության գլխավոր վարչության Կենտրոնականի պահպանության բաժնի աշխատակիցներ Արսեն Համբարձումյանը և Սերգեյ Մխիթարյանը։ Վերջիններս ամբաստանյալ Ս.Վարդանյանի ձեռքից վերցրել են ապօրինի կերպով կրվող, սառը զենք հանդիսացող դանակը, որից հետո նրան բերման են ենթարկել ՀՀ ոստիկանության Երևան քաղաքի վարչության Կենտրոնականի բաժին։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Սամվել Վարդանյանը նախկինում դատված չի եղել, իրեն լիովին մեղավոր է ճանաչել և տվել է ինքնախոստովանական ցուցմունքներ։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Սամվել Սերգեյի Վարդանյանի ինքնախոստովանական ցուցմունքներով այն մասին, որ 2012թ. ընթացքում ձեռք է բերել և իր կողմից վարվող «Օփել» մակնիշի ավտոմեքենայի առջևի ձախ դռան գրպանում պահել է դանակ։
2013թ. փետրվարի 05-ին, ժամը 14.00-ի սահմաններում, իր ավտոմեքենան վարել է Երևան քաղաքի Արշակունյաց պողոտայով դեպի Գ.Լուսավորիչ փողոցի ուղղությամբ։ Երթևեկության ընթացքում «Մերսեդես» մակնիշի ավտոմեքենայով երթևեկող, իրեն անծանոթ անձնավորությունը երթևեկության համար անբարենպաստ պայման է ստեղծել, որի պատճառով կտրուկ արգելակել է, ապա ձեռքը դուրս հանելով ավտոմեքենայից` թափահարել է և նախատել նրան, որից հետո ավտոմեքենան վարելով` հեռացել է։ Այնուհետև Երևանի Գ.Լուսավորիչ փողոցում գտնվող, ՀՀ-ում Ֆրանսիայի Հանրապետության դեսպանության շենքի մոտ, նույն «Մերսեդես» մակնիշի ավտոմեքենայի վարորդը փակելով իր ճանապարհը` իջել է ավտոմեքենայից։ Դրանից հետո վերցրել է դանակը, ապա ձեռքում պահելով` իջել է ավտոմեքենայից և վիճել է այդ անծանոթի հետ։ Նույն պահին իրենց են մոտեցել ոստիկանության աշխատակիցները, իր ձեռքից վերցրել են դանակը, որից հետո բերման են ենթարկել ՀՀ ոստիկանության Երևան քաղաքի վարչության Կենտրոնականի բաժին։ Այնտեղ տեղեկացել է, որ «Մերսեդես» մակնիշի ավտոմեքենայի վարորդը հանդիսանում է Ջորջ Հակոբյանը։
/դատական նիստի արձանագրություն, գ.թ. 31-32, 50/
Վկա, ՀՀ ոստիկանության պետական պահպանության գլխավոր վարչության Կենտրոնականի պահպանության բաժնի ոստիկան Արսեն Ալեքսանի Համբարձումյանի նախաքննական ցուցմունքով այն մասին, որ 2013թ. փետրվարի 05-ին, Երևան քաղաքի Կենտրոն վարչական շրջանի տարածքում ծառայություն է իրականացրել նույն բաժնի ոստիկան Սերգեյ Վարդանի Մխիթարյանի հետ։
Նույն օրը, ժամը 14.40-ի սահմաններում, պարեկային ավտոմեքենայով Երևան քաղաքի Գ.Լուսավորիչ փողոցով երթևեկելիս նկատել են, որ ՀՀ-ում Ֆրանսիայի Հանրապետության դեսպանության շենքի մոտակայքում, «Մերսեդես» մակնիշի ավտոմեքենայի վարորդն ավտոմեքենան կտրուկ կանգնեցրել է «Օփել» մակնիշի ավտոմեքենայի դիմաց, որից հետո վարորդն ավտոմեքենայից իջնելով` մոտեցել է «Օփել» մակնիշի ավտոմեքենայի վարորդին և նրանց միջև վիճաբանություն է սկսվել։ Անմիջապես մոտեցել են նրանց և տեսել, որ «Օփել» մակնիշի ավտոմեքենայի վարորդի ձեռքին դանակ կա։ Վերջինիս ձեռքից վերցրել են դանակը, որից հետո բերման են ենթարկել ՀՀ ոստիկանության Երևան քաղաքի վարչության Կենտրոնականի բաժին։ Այնտեղ պարզվել է, որ դանակ կրող անձնավորությունը հանդիսանում է Սամվել Վարդանյանը, իսկ մյուս քաղաքացին` Ջորջ Հակոբյանը։
/դատական նիստի արձանագրություն, գ.թ. 37-38/
Վկա, ՀՀ ոստիկանության պետական պահպանության գլխավոր վարչության Կենտրոնականի պահպանության բաժնի ոստիկան Սերգեյ Վարդանի Մխիթարյանի նախաքննական ցուցմունքով այն մասին, որ 2013թ. փետրվարի 05-ին, Երևան քաղաքի Կենտրոն վարչական շրջանի տարածքում ծառայություն է իրականացրել նույն բաժնի ոստիկան Արսեն Ալեքսանի Համբարձումյանի հետ։
Նույն օրը, ժամը 14.40-ի սահմաններում, պարեկային ավտոմեքենայով Երևան քաղաքի Գ.Լուսավորիչ փողոցով երթևեկելիս նկատել են, որ ՀՀ-ում Ֆրանսիայի Հանրապետության դեսպանության շենքի մոտակայքում, «Մերսեդես» մակնիշի ավտոմեքենայի վարորդն ավտոմեքենան կտրուկ կանգնեցրել է «Օփել» մակնիշի ավտոմեքենայի դիմաց, որից հետո վարորդն ավտոմեքենայից իջնելով` մոտեցել է «Օփել» մակնիշի ավտոմեքենայի վարորդին և նրանց միջև վիճաբանություն է սկսվել։ Անմիջապես մոտեցել են նրանց և տեսել, որ «Օփել» մակնիշի ավտոմեքենայի վարորդի ձեռքին դանակ կա։ Վերջինիս ձեռքից վերցրել են դանակը, ապա բերման ենթարկել ՀՀ ոստիկանության Երևան քաղաքի վարչության Կենտրոնականի բաժին։ Այնտեղ պարզվել է, որ դանակ կրող անձնավորությունը հանդիսանում է Սամվել Վարդանյանը, իսկ մյուս քաղաքացին` Ջորջ Հակոբյանը։
/դատական նիստի արձանագրություն, գ.թ. 42-43/
Դատատեխնիկական փորձաքննության 2013թ. փետրվարի 27-ի թիվ 351 եզրակացությամբ, որի համաձայն` «Փորձաքննությանը ներկայացված միակողմանի սահմանափակիչով դանակը գործարանային արտադրության «ԻԸխԿ» տեսակի ընդհանուր նշանակության որսորդական դանակ է, դասվում է քաղաքացիական շեղբավոր սառը զենքերի շարքին։»։
/գ.թ. 16-18/
Որպես այլ փաստաթուղթ` ապացույց ճանաչված, անձին ոստիկանության բաժին բերման ենթարկելու մասին 05.02.2013թ. արձանագրությամբ, որի համաձայն` 2012թ. փետրվարի 05-ին, խուլիգանություն կատարելու կասկածանքով, Երևանի Գ. Լուսավորիչ փողոցի թիվ 8 հասցեի դիմացից Սամվել Վարդանյանը բերման է ենթարկվել ՀՀ ոստիկանության Երևան քաղաքի վարչության Կենտրոնականի բաժին։
/գ.թ. 4, 25/
Որպես այլ փաստաթուղթ` ապացույց ճանաչված, դանակը ներկայացնելու մասին 05.02.2013թ. արձանագրությամբ, որի համաձայն` ՀՀ ոստիկանության ՊՊԳ վարչության Կենտրոնականի պահպանության բաժնի ոստիկան Ա. Համբարձումյանը ՀՀ ոստիկանության Երևան քաղաքի վարչության Կենտրոնականի բաժին է ներկայացրել 24սմ երկարությամբ շեղբով, 2սմ լայնությամբ դանակ և հայտարարել, որ նշված դանակը 2013թ. փետրվարի 05-ին, ժամը 14։40-ի սահմաններում, Երևանի Գ. Լուսավորիչ փողոցում տեղի ունեցած վիճաբանության ընթացքում վերցրել է ՀՀ ոստիկանության Երևան քաղաքի վարչության Կենտրոնականի բաժին բերման ենթարկված Սամվել Վարդանյանի ձեռքից։
/գ.թ. 6, 25/
Որպես այլ փաստաթուղթ` ապացույց ճանաչված, ՀՀ ոստիկանության ՊՊԳՎ Կենտրոնականի պահպանության բաժնի ոստիկան Ա.Համբարձումյանի 05.02.2013թ. զեկուցագրով, որի համաձայն` 2013թ. փետրվարի 05-ին, ժամը 14։40-ի սահմաններում ծառայություն են իրականացրել Երևանի Գ. Լուսավորիչ և Իտալիայի փողոցների խաչմերուկում, երբ նկատել են, որ ՀՀ-ում Ֆրանսիայի դեսպանության շենքի դիմաց երկու ավտոմեքենա կանգնել են ճանապարհի երթևեկելի մասում, որից հետո այդ ավտոմեքենաների վարորդները իջնելով` սկսել են վիճաբանել։ Արագ մոտենալով նրանց` նկատել են, որ նրանցից մեկի ձեռքին դանակ կա։ Անմիջապես վնասազերծել են նրան և բերման ենթարկել ՀՀ ոստիկանության Երևան քաղաքի վարչության Կենտրոնականի բաժին։ Այնտեղ պարզվել է, որ բերման ենթարկված անձը հանդիսանում է Սամվել Սերգեյի Վարդանյանը, իսկ մյուս անձը` Ջորջ Հակոբի Հակոբյանը։
/գ.թ. 3, 25/
Իրեղեն ապացույց ճանաչված, «Ժալո» /«ԻԸխԿ»/ տեսակի ընդհանուր նշանակության որսորդական դանակով։
/գ.թ. 23/



Դատարանի իրավական վերլուծությունները.

Վերլուծելով ամբաստանյալ Սամվել Սերգեյի Վարդանյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Սամվել Սերգեյի Վարդանյանի կողմից, նրա մեղավորությամբ, ապօրինի կերպով սառը զենք կրելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Սամվել Սերգեյի Վարդանյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա տալով ինքնախոստովանական ցուցմունքներ` անկեղծորեն զղջացել է կատարածի համար, նախկինում դատված չի եղել։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Ամբաստանյալ Սամվել Սերգեյի Վարդանյանն իր կատարած` Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցագործության համար ենթակա է պատժի տուգանքի ձևով։
Դատարանը գտնում է, որ իր նկատմամբ նշանակված պատիժն ամբաստանյալ Սամվել Վարդանյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցի հարցը` դատարանը գտնում է, որ դատավճռի օրինական ուժի մեջ մտնելուց հետո, 04.03.2013թ. որոշմամբ իրեղեն ապացույց ճանաչված դանակը պետք է բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Քննարկելով խափանման միջոցի հարցը` դատարանը գտնում է, որ ամբաստանյալ Սամվել Վարդանյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Սամվել Սերգեյի Վարդանյանին մեղավոր ճանաչել Հայաստանի Հանրապետության քրեական օրենսգրքի 235-րդ հոդվածի 4-րդ մասով նախատեսված հանցանքում և դատապարտել տուգանքի նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 04.03.2013թ. որոշմամբ իրեղեն ապացույց ճանաչված դանակը բռնագրավել հօգուտ Հայաստանի Հանրապետության` այն հանձնելով Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայությանը` «Հրապարակային սակարկությունների մասին» Հայաստանի Հանրապետության օրենքով սահմանված կարգով իրացնելու համար։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ