ԵԿԴ/0023/01/13







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«10» ապրիլի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Կ.Կարապետյան
մեղադրող Ա.Մնացականյան
տուժող Ա.Նալբանդյան
տուժողի ներկայացուցիչ Կ.Սիմիդյան
պաշտպան Ա.Հովհաննիսյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Աղասի Գրիշայի Ավետիսյանի` ծնված 1961 թվականի հուլիսի 28-ին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ամուսնալուծված, նախկինում չդատապարտված, չի աշխատում, բնակվում է Երևան քաղաքի Մ.Խորենացի 2-րդ փակուղու 27-րդ տանը, մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2012 թվականի դեկտեմբերի 26-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի քննիչ Ա.Գասոյանի որոշմամբ ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով հարուցվել և վարույթ է ընդունվել թիվ 60134512 քրեական գործը:
2013 թվականի հունվարի 25-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի քննիչ Ա.Գասոյանի որոշմամբ թիվ 60134512 քրեական գործով Աղասի Գրիշայի Ավետիսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով:
2013 թվականի փետրվարի 27-ին Աղասի Գրիշայի Ավետիսյանի վերաբերյալ թիվ 60134512 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0023/01/13 համարը:
Աղասի Գրիշայի Ավետիսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով` այն արարքների համար, որ նա 2012 թվականի նոյեմբերի 24-ին` ժամը 13:40-ի սահմաններում, իր անձնական օգտագործման «Ֆոլկսվագեն» մակնիշի 30ՕՏ511 պետհամարանիշի ավտոմեքենան վարել է Երևան քաղաքի Տիգրան Մեծի պողոտայի կողմից Նար-Դոս փողոցով դեպի Մ.Խորենացի փողոցի ուղղությամբ, շուրջ 40 կմ/ժամ արագությամբ, մոտենալով Նար-Դոս և Մ.Խորենացի փողոցների խաչմերուկին` խախտել է ՃԵԿ-ի 18-րդ, 2-րդ կետերի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջները, այն է` լուսացույցի արգելող ազդանշանի առկայության պայմաններում փորձելով մուտք գործել խաչմերուկ, ավտոմեքենան դուրս է բերել հանդիպակաց երթևեկելի ուղեմաս, իրականացրել ձախակողմյան երթևեկություն, իր գործողություններով ստեղծել է վթարային իրադրություն և հետիոտնային անցման վրա, ավտոմեքենայի առջևի կենտրոնական մասով վրաերթի է ենթարկել հետիոտն Արամ Աշոտի Նալբանդյանին, անզգուշությամբ պատճառել նրա առողջությանը տևական քայքայումով միջին ծանրության վնաս` ինքն իրեն զրկելով վրաերթը կանխելու տեխնիկական հնարավորությունից: Այնուհետև ՃԵԿ-ի 18-րդ, 2-րդ կետերի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջների խախտմամբ վրաերթ կատարելուց հետո, ավտովարորդ Աղասի Ավետիսյանը թողնելով ճանապարհատրանսպորտային պատահարի վայրը, իր վարած «Ֆոլկսվագեն» մակնիշի 30OՏ511 պետհամարանիշի ավտոմեքենայով հեռացել է:
2. Արագացված դատական քննություն.
Մինչ դատաքննությունն սկսելն ամբաստանյալ Աղասի Գրիշայի Ավետիսյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Աղասի Գրիշայի Ավետիսյանը կատարել է արարքներ` նախատեսված ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, «Քանաքեռ-Զեյթուն» բժշկական կենտրոնի էպիկրիզի պատճենը և սթափության վիճակի զննության թիվ 102864 արձանագրությունը, եկավ հետևյալ եզրահանգման.
Աղասի Ավետիսյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Աղասի Ավետիսյանի պատասխանատվությունն ու պատիժը մեղմացնող հանգամանքներ պետք է դիտել վատառողջ լինելը և նախկինում արատավորված` դատապարտված չլինելը:
Դատարանն արձանագրում է, որ Աղասի Ավետիսյանի պատասխանատվությունն ու պատիժը ծանրացնող հանգամանք է հանցանքներն ալկոհոլի ազդեցության տակ կատարելը:
Վերը նշված անձը դրականորեն բնութագրող և պատասխանատվությունն ու պատիժը մեղմացնող և ծանրացնող հանգամանքները Աղասի Ավետիսյանի կատարած բոլոր արարքներով էլ առկա են:
Կատարած արարքների համար ամբաստանյալ Աղասի Ավետիսյանը ենթակա է քրեական պատասխանատվության և պատժի:
Դատարանը, հաշվի առնելով Աղասի Ավետիսյանի կատարած արարքների հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ Աղասի Ավետիսյանի կողմից կատարված արարքների համար ՀՀ քրեական օրենսգրքի 242-րդ հոդվածի 1-ին մասի և 244-րդ հոդվածի սանկցիաներով որպես հիմնական պատիժ նախատեսված է նաև տուգանք, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ հիմնական պատիժներ պետք է նշանակել տուգանքի ձևով: Միաժամանակ Դատարանը գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար ամբաստանյալ Աղասի Ավետիսյանի նկատմամբ պետք է նշանակել ՀՀ քրեական օրենսգրքի 242-րդ հոդվածի 1-ին մասի և 244-րդ հոդվածի սանկցիաներով նախատեսված լրացուցիչ պատիժները` որոշակի գործունեությամբ` վարորդությամբ, զբաղվելու իրավունքից զրկելը:
Դատարանը գտնում է, որ ամբաստանյալ Աղասի Ավետիսյանի նկատմամբ վերջնական պատիժ պետք է նշանակել ՀՀ քրեական օրենսգրքի 66-րդ հոդվածով սահմանված` հիմնական և լրացուցիչ պատիժները մասնակիորեն գումարելու կանոնի կիրառմամբ, որը նա պետք է կրի:
Դատարանը գտնում է, որ Աղասի Ավետիսյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցը ենթակա է արդյոք բավարարման, ում օգտին և ինչ չափով:
ՀՀ քրեական դատավարության օրենսգրքի 375.1 հոդվածի 6-րդ մասի համաձայն` եթե տվյալ գործով հարուցված է նաև քաղաքացիական հայց և ամբաստանյալն ընդունում է այն, ապա դատարանը դատավճռով բավարարում է քաղաքացիական հայցը, եթե այն չի հակասում օրենքին:
Սույն քրեական գործով տուժող Արամ Նալբանդյանի ներկայացուցիչ Կարինե Սիմիդյանը ներկայացրել է քաղաքացիական հայց` ամբաստանյալ Աղասի Ավետիսյանից պահանջելով հանցագործությամբ տուժող Արամ Նալբանդյանին պատճառված վնասը` 600.000 ՀՀ դրամը, իսկ ամբաստանյալ Աղասի Ավետիսյանը կամավոր ընդունել է ներկայացված քաղաքացիական հայցը: Նշվածը հաշվի առնելով Դատարանը գտնում է, որ Աղասի Ավետիսյանի դեմ ներկայացված տուժող Արամ Նալբանդյանի ներկայացուցիչ Կարինե Սիմիդյանի քաղաքացիական հայցի պահանջը պետք է բավարարել, և Աղասի Ավետիսյանից հօգուտ Արամ Նալբանդյանի, որպես հանցագործությամբ պատճառված վնաս, պետք է բռնագանձել 600.000 ՀՀ դրամ, քանի որ դա չի հակասում օրենքին և չի վերաբերվում այլ անձանց իրավունքներին:
Դատարանը, ղեկավարվելով ՀՀ քրեական դատավարության օրենսգրքի 232-րդ հոդվածով, գտնում է, որ բավարարված քաղաքացիական հայցն ապահովելու համար անհրաժեշտ է դրա ընդհանուր` 600.000 ՀՀ դրամի չափով, կալանք դնել ամբաստանյալ Աղասի Ավետիսյանի գույքի և դրամական միջոցների վրա:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2013 թվականի փետրվարի 19-ի որոշմամբ իրեղեն ապացույց ճանաչված` Արամ Նալբանդյանի հագուստները պետք է վերադարձնել նրան:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Աղասի Ավետիսյանից դատարանի նախաձեռնությամբ ենթակա չեն բռնագանձման: Ավելին` վերոգրյալ հիմնավորմամբ տուժող Արամ Նալբանդյանի ներկայացուցիչ Կարինե Սիմիդյանի կողմից ներկայացված քաղաքացիական հայցը պետք է բավարարվի: Ինչ վերաբերվում է ՀՀ քրեական դատավարության օրենսգրքի 168-րդ հոդվածի 1-ին մասի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 232-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը
ՎՃՌԵՑ

Աղասի Գրիշայի Ավետիսյանին մեղավոր ճանաչել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով:
ՀՀ քրեական օրենսգրքի 242-րդ հոդվածի 1-ին մասով Աղասի Գրիշայի Ավետիսյանի նկատմամբ պատիժ նշանակել տուգանք` նվազագույն աշխատավարձի հարյուրհիսնապատիկի չափով` զրկելով որոշակի գործունեությամբ` վարորդությամբ զբաղվելու իրավունքից` 2 (երկու) տարի 6 (վեց) ժամկետով:
ՀՀ քրեական օրենսգրքի 244-րդ հոդվածով Աղասի Գրիշայի Ավետիսյանի նկատմամբ պատիժ նշանակել տուգանք` նվազագույն աշխատավարձի երկուհարյուրապատիկի չափով` զրկելով որոշակի գործունեությամբ` վարորդությամբ զբաղվելու իրավունքից` 1 (մեկ) տարի ժամկետով:
ՀՀ քրեական օրենսգրքի 66-րդ հոդվածով սահմանված կարգով` նշանակված պատիժները մասնակիորեն գումարելու միջոցով, Աղասի Գրիշայի Ավետիսյանի նկատմամբ վերջնական պատիժ նշանակել տուգանք` նվազագույն աշխատավարձի երկուհարյուրհիսնապատիկի չափով` զրկելով որոշակի գործունեությամբ` վարորդությամբ զբաղվելու իրավունքից` 3 (երեք) տարի ժամկետով:
Աղասի Գրիշայի Ավետիսյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Տուժող Արամ Նալբանդյանի ներկայացուցիչ Կարինե Սիմիդյանի քաղաքացիական հայցը բավարարել. Աղասի Գրիշայի Ավետիսյանից հօգուտ Արամ Աշոտի Նալբանդյանի, որպես հանցագործությամբ պատճառված վնաս, բռնագանձել 600.000 (վեց հարյուր հազար) ՀՀ դրամ:
Բավարարված քաղաքացիական հայցի` 600.000 (վեց հարյուր հազար) ՀՀ դրամի չափով, կալանք դնել Աղասի Գրիշայի Ավետիսյանի գույքի և դրամական միջոցների վրա:
Դատավճիռն օրինական ուժի մեջ մտնելուց հետո 2013 թվականի փետրվարի 19-ի որոշմամբ իրեղեն ապացույց ճանաչված` տուժող Արամ Աշոտի Նալբանդյանի հագուստները վերադարձնել նրան:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ