Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

28 մարտի 2013թ. ք. Երևան

ԵԿԴ-0022/01/13

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող,
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Հ. Էյրամջյանի,

պաշտպան Լ. Գրիգորյանի,

տուժող Մ. Մնեյանի,



դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Սմբաթ Նուշերվանի Սարգսյանի `
ծնված 1959թ. նոյեմբերի 24-ին Գեղարքունիքի մարզի Վերին Գետաշեն գյուղում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ-մասնագիտական կրթությամբ, ամուսնացած, խնամքին ոչ ոք, նախկինում դատված`
1/ Երևանի Էրեբունի և Նուբարաշեն համայնքների առաջին ատյանի դատարանի 11.10.2002թ. դատավճռով, ՀՀ նախորդ քրեական օրենսգրքի 222-րդ հոդվածի 1-ին մասով դատապարտվել է տուգանքի 40.000 /քառասուն հազար/ ՀՀ դրամ գումարի չափով,
2/ Երևանի Էրեբունի և Նուբարաշեն համայնքների առաջին ատյանի դատարանի 04.07.2003թ. դատավճռով, ՀՀ նախորդ քրեական օրենսգրքի 222-րդ հոդվածի 3-րդ մասով դատապարտվել է ազատազրկման մեկ տարի ժամկետով, 22.12.2003թ. պայմանական վաղաժամկետ ազատվել է պատժի` յոթ ամիս տասնվեց օր չկրած մասի կրումից,
3/ Երևանի Էրեբունի և Նուբարաշեն համայնքների առաջին ատյանի դատարանի 09.06.2004թ. դատավճռով, ՀՀ քրեական օրենսգրքի 177-րդ հոդվածի 1-ին մասով, նույն օրենսգրքի 67-րդ հոդվածի կիրառմամբ դատապարտվել է ազատազրկման մեկ տարի վեց ամիս ժամկետով, 19.04.2005թ. պայմանական վաղաժամկետ ազատվել է պատժի մնացած մասը կրելուց, դատվածությունը մարված, կալանքի տակ է 26.11.2012թ.-ից, հաշվառված է Գեղարքունիքի մարզի Վերին Գետաշեն գյուղում, փաստացի բնակվել է Արարատի մարզի Խարբերդ գյուղում, մեղադրվում է ՀՀ քրեական օրենսգրքի 112-րդ հոդվածի 1-ին մասով։



Գործի դատավարական նախապատմությունը

Թիվ 15126012 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 26.11.2012թ., ՀՀ քրեական օրենսգրքի 112-րդ հոդվածի 1-ին մասով, անհայտ անձի կողմից Մովսես Մնեյանի առողջությանը դիտավորությամբ ծանր վնաս պատճառելու դեպքի առթիվ։
Քննիչի 2013թ. փետրվարի 19-ի որոշմամբ, Մովսես Սմբատի Մնեյանի կողմից Սմբաթ Նուշերվանի Սարգսյանի առողջությանը միջին ծանրության վնաս պատճառելու մասով քրեական հետապնդում չի իրականացվել` վնաս պատճառած արարքը քրեական օրենքով իրավաչափ համարվելու պատճառաբանությամբ։
Ամբաստանյալ Սմբաթ Նուշերվանի Սարգսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով հետևյալ արարքի համար. «որ նա 2012թ. նոյեմբերի 26-ին, ժամը 01։30-ի սահմաններում Երևան քաղաքի «Կոմայգի» զբոսայգու տարածքում վիճաբանելով Մովսես Սմբատի Մնեյանի հետ՝ իր մոտ եղած ծակող-կտրող գործիքով հարվածել է վերջինիս որովայնին և նրա առողջությանը դիտավորությամբ պատճառել ծանր վնաս` կյանքին վտանգ սպառնացող։»։
2013թ. փետրվարի 27-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։
Մեղադրողը մեղադրական եզրակացությունում չի առարկել դատական քննության արագացված կարգ կիրառելու դեմ։


Արագացված դատական քննություն

Ամբաստանյալ Սմբաթ Նուշերվանի Սարգսյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։
Տուժող Մովսես Մնեյանը միջնորդության դեմ չառարկեց։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Սմբաթ Նուշերվանի Սարգսյանը կատարել է ՀՀ քրեական օրենսգրքի 112-րդ հոդվածի 1-ին մասով նախատեսված արարք։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվեց, որ ամբաստանյալ Սմբաթ Սարգսյանը ներկայացել է մեղայականով, իրեն լիովին մեղավոր ճանաչելով և տալով ինքնախոստովանական ցուցմունքներ` անկեղծորեն զղջում է կատարածի համար, տուժողի հետ հաշտվել են։



Դատարանի իրավական վերլուծությունները

Առաջադրված մեղադրանքն ամբաստանյալ Սմբաթ Նուշերվանի Սարգսյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ Սմբաթ Նուշերվանի Սարգսյանի կողմից, նրա մեղավորությամբ, դիտավորությամբ մեկ ուրիշին մարմնական ծանր վնասվածք պատճառելը, որը վտանգավոր է կյանքի համար` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Սմբաթ Նուշերվանի Սարգսյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա իրեն լիովին մեղավոր ճանաչելով և տալով ինքնախոստովանական ցուցմունքներ` անկեղծորեն զղջում է կատարածի համար, տուժողի հետ հաշտվել են։ Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում մեղայականով ներկայանալը, իսկ նրա պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Սմբաթ Նուշերվանի Սարգսյանն իր կատարած` Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցագործության համար ենթակա է պատժի ազատազրկման ձևով։
Դատարանը գտնում է, որ իր նկատմամբ նշանակված պատիժն ամբաստանյալ Սմբաթ Սարգսյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 21.02.2013թ. որոշմամբ իրեղեն ապացույց ճանաչված հագուստները պետք է վերադարձնել տուժող Մովսես Մնեյանին։
Քննարկելով խափանման միջոցի հարցը` դատարանը գտնում է, որ ամբաստանյալ Սմբաթ Սարգսյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ հոդվածներով, դատարանը`





Վ Ճ Ռ Ե Ց

Ամբաստանյալ Սմբաթ Նուշերվանի Սարգսյանին մեղավոր ճանաչել Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցանքում և դատապարտել ազատազրկման 3 /երեք/ տարի ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. նոյեմբերի 26-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 21.02.2013թ. որոշմամբ իրեղեն ապացույց ճանաչված հագուստները վերադարձնել տուժող Մովսես Մնեյանին։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։
Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։


ԴԱՏԱՎՈՐ` Մ. ՄԱՐՏԻՐՈՍՅԱՆ