ԵԿԴ/0016/01/13






ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


«4» ապրիլի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Կ.Կարապետյանի, մասնակցությամբ մեղադրող Ա.Բեգինյանի, տուժող Վ.Բախշյանի, ամբաստանյալ Գուրգեն Լյովայի Ալեքսանդրյանի, դռնբաց դատական նիստում քննելով քրեական գործն ըստ մեղադրանքի Գուրգեն Լյովայի Ալեքսանդրյանի (ծնված 1964 թվականի փետրվարի 28-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, հաշվառված է Երևան քաղաքի Մոլդովական փողոցի 6/2 շենքի 4-րդ բնակարանում, բնակվում է Երևան քաղաքի Աբովյան փողոցի 34ա շենքի 28-րդ բնակարանում, որպես խափանման միջոց ընտրվել է չհեռանալու մասին ստորագրությունը)` ՀՀ քրեական օրենսգրքի 178-րդ հոդվածի 1-ին մասով
ՊԱՐԶԵՑ

2012 թվականի դեկտեմբերի 19-ին ՀՀ ոստիկանության Կենտրոնականի քննչական բաժնի քննիչ Հ.Բաղմանյանի որոշմամբ ՀՀ քրեական օրենսգրքի 178-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 15132812 քրեական գործը:
2013 թվականի հունվարի 29-ին ՀՀ ոստիկանության Կենտրոնականի քննչական բաժնի քննիչ Հ.Բաղմանյանի որոշմամբ թիվ 15132812 քրեական գործով Գուրգեն Լյովայի Ալեքսանդրյանին մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով:
2013 թվականի փետրվարի 19-ին Գուրգեն Լյովայի Ալեքսանդրյանի վերաբերյալ թիվ 15132812 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որին շնորհվել է ԵԿԴ/0016/01/13 համարը:
Գուրգեն Լյովայի Ալեքսանդրյանին մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով այն արարքի համար, որ նա, 2012 թվականի հունիս-սեպտեմբեր ամիսների ընթացքում չարաշահելով Վերգինե Բախշյանի վստահությունը, խարդախությամբ հափշտակել է վերջինին պատկանող զգալի չափի` 324.416 ՀՀ դրամին համարժեք 800 ԱՄՆ դոլար: Այսպես. Գուրգեն Ալեքսանդրյանը 2012 թվականի ապրիլին Երևան քաղաքի Թումանյան փողոցում պատահաբար հանդիպելով իր մանկության ընկեր Արտուշ Ծատուրյանին, նրա հետ ունեցած խոսակցությունից տեղեկացել է, որ անմեղսունակ վիճակում քրեական օրենքով արգելված արարք կատարելու համար Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի ապրիլի 11-ի որոշմամբ վերջինի որդի` Արտավազդ Ծատուրյանի նկատմամբ կիրառվել է բժշկական բնույթի հարկադրական միջոց և Արտավազդ Ծատուրյանը հարկադրական բուժում է ստանում ՀՀ ԱՆ «Հոգեբուժական բժշկական կենտրոն» ՓԲ ընկերության կլինիկայում: Գուրգեն Ալեքսանդրյանը խաբեությամբ գույքի հափշտակություն կատարելու դիտավորությամբ, Արտուշ Ծատուրյանին և նրա կնոջը` Վերգինե Բախշյանին հավաստիացրել է, թե կարող է կազմակերպել Արտավազդ Ծատուրյանի հարկադրական բուժումը վերացնելու գործընթացը, ապա փաստաբանին վճարելու պատրվակով, խաբեությամբ 2012 թվականի հունիս-սեպտեմբեր ամիսների ընթացքում, միասնական հանցավոր մտադրությամբ միավորված` շարունակաբար Երևան քաղաքի Հյուսիսային պողոտայում Վերգինե Բախշյանից ստացել և խարդախությամբ հափշտակել է վերջինին պատկանող զգալի չափի` 324.416 ՀՀ դրամին համարժեք 800 ԱՄՆ դոլար:
Դատական քննության ժամանակ տուժող Վերգինե Վարենդարի Բախշյանը հայտնեց, որ ամբաստանյալ Գուրգեն Լյովայի Ալեքսանդրյանի կողմից ամբողջությամբ հատուցվել է իրեն պատճառված վնասը, որի արդյունքում ինքը հաշտվում է ամբաստանյալ Գուրգեն Լյովայի Ալեքսանդրյանի հետ: Վերգինե Վարենդարի Բախշյանը միաժամանակ նշեց, որ գիտակցում է հաշտվելու հետևանքները:
Դատական քննության ժամանակ ամբաստանյալ Գուրգեն Լյովայի Ալեքսանդրյանը հայտնեց, որ ինքը նույնպես հաշտվում է տուժող Վերգինե Վարենդարի Բախշյանի հետ և գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 178-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Վերգինե Վարենդարի Բախշյանը և ամբաստանյալ Գուրգեն Լյովայի Ալեքսանդրյանը հաշտվել են միմյանց հետ, գտնում է, որ թիվ ԵԿԴ/0016/01/13 քրեական գործի վարույթը պետք է կարճել և ամբաստանյալ Գուրգեն Լյովայի Ալեքսանդրյանի նկատմամբ ՀՀ քրեական օրենսգրքի 178-րդ հոդվածի 1-ին մասով քրեական հետապնդումը պետք է դադարեցնել:
Դատարանը գտնում է, որ Գուրգեն Լյովայի Ալեքսանդրյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0016/01/13 քրեական գործի վարույթը կարճել և Գուրգեն Լյովայի Ալեքսանդրյանի նկատմամբ ՀՀ քրեական օրենսգրքի 178-րդ հոդվածի 1-ին մասով քրեական հետապնդումը դադարեցնել` տուժող Վերգինե Վարենդարի Բախշյանի հաշտվելու հիմքով:
Գուրգեն Լյովայի Ալեքսանդրյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ