ԵԿԴ/0014/01/13





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«18» մարտի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Կ.Կարապետյան
մեղադրող Գ.Տիգրանյան
պաշտպան Վ.Էլբակյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արթուր Փիլոսի Սահակյանի` ծնված 1986 թվականի ապրիլի 30-ին Վրաստանի Ասպինձայի շրջանի Դամալա գյուղում, ազգությամբ հայ, Հայաստանի Հանրապետության և Վրաստանի քաղաքացի, ութամյա կրթությամբ, նախկինում չդատապարտված, ամուսնացած, հաշվառված է Երևան քաղաքի Գ.Նժդեհ փողոցի 19-րդ շենքի 40-րդ բնակարանում, բնակվել է Երևան քաղաքի Ավանեսովի փողոցի 5-րդ շենքի 29-րդ բնակարանում, մեղադրանք է առաջադրվել ՀՀ քրեական օրենսգրքի 325-րդ հոդվածի 2-րդ մասով, արգելանքի տակ է 2012 թվականի սեպտեմբերի 7-ից:
1. Գործի դատավարական նախապատմությունը.
2012 թվականի սեպտեմբերի 7-ին ՀՀ ԿԱ ազգային անվտանգության ծառայության քննչական վարչության ՀԿԳ ավագ քննիչ Ա.Աղաջանյանի որոշմամբ ՀՀ քրեական օրենսգրքի 325-րդ հոդվածի 2-րդ մասի հատկանիշներով հարուցվել և վարույթ է ընդունվել թիվ 58208312 քրեական գործը:
2012 թվականի սեպտեմբերի 10-ին ՀՀ ԿԱ ազգային անվտանգության ծառայության քննչական վարչության ՀԿԳ ավագ քննիչ Ա.Աղաջանյանի որոշմամբ թիվ 58208312 քրեական գործով Արթուր Փիլոսի Սահակյանին մեղադրանք է առաջադրվել ՀՀ քրեական օրենսգրքի 325-րդ հոդվածի 2-րդ մասով:
2013 թվականի փետրվարի 7-ին ՀՀ ԿԱ ազգային անվտանգության ծառայության քննչական վարչության ՀԿԳ ավագ քննիչ Ա.Աղաջանյանի որոշմամբ թիվ 58208312 քրեական գործով վարույթի մասը` Լովա Խաչատուրի Մադոյանի կողմից` Արթուր Սահակյանի և մյուսների հետ նախնական համաձայնությամբ, ակնհայտ կեղծ փաստաթղթեր իրացնելու և օգտագործելու վերաբերյալ կարճվել է` վերջինի կողմից գործուն զղջալու հիմքով:
2013 թվականի փետրվարի 7-ին ՀՀ ԿԱ ազգային անվտանգության ծառայության քննչական վարչության ՀԿԳ ավագ քննիչ Ա.Աղաջանյանի որոշմամբ թիվ 58208312 քրեական գործով վարույթի մասը` Արթուր Սահակյանի և Լովա Մադոյանի կողմից կեղծ փաստաթղթեր պատրաստելուն, իրացնելուն և օգտագործելուն` Սերգո Հարությունի Ֆիդանյանի կողմից դրդելու վերաբերյալ կարճվել է` վերջինի կողմից գործուն զղջալու հիմքով:
2013 թվականի փետրվարի 7-ին ՀՀ ԿԱ ազգային անվտանգության ծառայության քննչական վարչության ՀԿԳ ավագ քննիչ Ա.Աղաջանյանի որոշմամբ թիվ 58208312 քրեական գործից անջատվել է` Վրաստանի կեղծ ժամանակավոր զինգրքույկներ պատրաստելու հետ առնչություն ունեցած ոմն Էդոյի և մյուսների, ինչպես նաև 2010-2012 թվականների ընթացքում ՀՀ քաղաքացիություն ստացած Վրաստանի` զինակոչի տարիքի ազգությամբ հայ քաղաքացիների կողմից կեղծ ժամանակավոր զինգրքույկներ օգտագործելու հնարավոր դեպքերի վերաբերյալ թիվ 58200913 քրեական գործը:
2013 թվականի փետրվարի 15-ին Արթուր Փիլոսի Սահակյանի վերաբերյալ թիվ 58208312 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0014/01/13 համարը:
Արթուր Փիլոսի Սահակյանին մեղադրանք է առաջադրվել ՀՀ քրեական օրենսգրքի 325-րդ հոդվածի 2-րդ մասով` այն արարքի համար, որ նա, նպատակ ունենալով համակարգչային տեխնիկայի կիրառմամբ կեղծ փաստաթղթեր պատրաստելու և իրացնելու միջոցով շահույթ ստանալ, հանցավոր մտահաղացումն իրականացնելու համար նախնական հանցավոր համաձայնություն ձեռք բերելով Վրաստանի նախկին բնակիչ` Լովա Մադոյանի և մյուսների հետ, ՀՀ քաղաքացիություն հայցող` ազգությամբ հայ Վրաստանի քաղաքացիների պատվերով և տվյալներով պատրաստել և վերջիններին իրացրել է Վրաստանի կեղծ ժամանակավոր զինգրքույկներ, որոնց հիման վրա այնուհետև, Լովա Մադոյանի հետ միասին կազմակերպել են ՀՀ Երևան քաղաքի զինկոմիսարիատներում և ՀՀ ոստիկանության Երևան քաղաքի վարչության անձնագրային բաժիններում նշված քաղաքացիների հաշվառման գործընթացը, յուրաքանչյուր դեպքով պահանջելով և ստանալով` 500-700 ԱՄՆ դոլար:
Մասնավորապես` Վրաստանի կեղծ զինվորական գրքույկ պատրաստելու և դրա հիման վրա Երևան քաղաքի որևէ զինկոմիսարիատում և ոստիկանության անձնագրային բաժանմունքում հաշվառման կանգնեցնելու ու ՀՀ քաղաքացու անձնագիր ստանալու գործընթացը կազմակերպելու դիմաց, 2012 թվականի հուլիսի 30-ին իրեն դիմած Վրաստանի քաղաքացի Սերգո Հարությունի Ֆիդանյանից պահանջել ու 2012 թվականի հուլիսի 31-ին ստացել է 500 ԱՄՆ դոլար և երկու գունավոր լուսանկար, որի ժամանակ վերջինին ծանոթացրել է գործընկերոջ` Լովա Մադոյանի հետ, նրան ներկայացնելով որպես հաշվառումների և ՀՀ քաղաքացու անձնագիր ստանալու գործընթացով զբաղվող անձնավորության: Այնուհետև, հանցավոր մտահաղացման իրագործման նպատակով ձեռք բերված համակարգչային տեխնիկայի միջոցով, քննությամբ դեռևս չպարզված ոմն Էդգարի հետ միասին պատրաստելով Սերգո Ֆիդանյանի տվյալներով և լուսանկարով Վրաստանի կեղծ ժամանակավոր զինգրքույկ, 2012 թվականի օգոստոսի 3-ին ՀՀ ոստիկանության անձնագրային և վիզաների վարչության շենքի մոտ Լովա Մադոյանի հետ միասին նորից հանդիպել են Սերգո Ֆիդանյանին ու նրան հանձնել կեղծ զինգրքույկը, պայմանավորվելով մի քանի օրվա ընթացքում կարգավորել կեղծ փաստաթղթերով հաշվառման կանգնելու և ՀՀ քաղաքացու անձնագիր ստանալու հարցերը, սակայն ավարտին չեն հասցրել հանցավոր մտահաղացումը, քանի որ հանցավոր գործունեությունը բացահայտվել է ՀՀ ԿԱ ազգային անվտանգության ծառայության աշխատակիցների կողմից:

2. Արագացված դատական քննություն.
Մինչ դատաքննությունն սկսելն ամբաստանյալ Արթուր Փիլոսի Սահակյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արթուր Փիլոսի Սահակյանը կատարել է արարք` նախատեսված ՀՀ քրեական օրենսգրքի 325-րդ հոդվածի 2-րդ մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ծննդյան վկայականի պատճենը և ՀՀ ոստիկանության ինֆորմացիոն կենտրոնի պահանջագիրը, եկավ հետևյալ եզրահանգման.
Արթուր Սահակյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Արթուր Սահակյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երեխայի առկայությունը:
Դատարանը գտնում է, որ Արթուր Սահակյանի պատասխանատվությունն ու պատիժը մեղմացնող հանգամանք պետք է դիտել նաև նախկինում արատավորված` դատապարտված չլինելը:
Դատարանը միաժամանակ արձանագրում է, որ Արթուր Սահակյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Արթուր Սահակյանը ենթակա է քրեական պատասխանատվության և պատժի:
Դատարանը, հաշվի առնելով Արթուր Սահակյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Արթուր Սահակյանի կատարած արարքի համար ՀՀ քրեական օրենսգրքի 325-րդ հոդվածի 2-րդ մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Դատարանը գտնում է, որ Արթուր Սահակյանի պատժի կրման սկիզբը պետք է հաշվել 2012 թվականի սեպտեմբերի 7-ից, քանի որ նա ձերբակալվել է այդ օրը, իսկ 2012 թվականի սեպտեմբերի 10-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Արթուր Սահակյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2013 թվականի փետրվարի 5-ի որոշմամբ իրեղեն ապացույց ճանաչված` Սերգո Հարությունի Ֆիդանյանի տվյալներով պատրաստված Վրաստանի կեղծ ժամանակավոր թիվ 151 զինգրքույկը, «Մերկուրի» տեսակի համակարգիչը, լազերային սկավառակը և ՀՀ ՊՆ Շենգավիթի զինկոմիսարիատից 2013 թվականի հունվարի 31-ին ստացված` Սերգո Ֆիդանյանին զինկոմիսարիատում հաշվառման կանգնեցնելու հիմքերի պատճենները պետք է թողնել լուծելու թիվ 58200913 քրեական գործով:
Դատարանը գտնում է, որ դատական ծախսերն ամբաստանյալ Արթուր Սահակյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը
ՎՃՌԵՑ

Արթուր Փիլոսի Սահակյանին մեղավոր ճանաչել ՀՀ քրեական օրենսգրքի 325-րդ հոդվածի 2-րդ մասով և պատիժ նշանակել ազատազրկում` 8 (ութ) ամիս ժամկետով` պատժի կրման սկիզբը հաշվելով 2012 թվականի սեպտեմբերի 7-ից:
Արթուր Փիլոսի Սահակյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2013 թվականի փետրվարի 5-ի որոշմամբ իրեղեն ապացույց ճանաչված` Սերգո Հարությունի Ֆիդանյանի տվյալներով պատրաստված Վրաստանի կեղծ ժամանակավոր թիվ 151 զինգրքույկը, «Մերկուրի» տեսակի համակարգիչը, լազերային սկավառակը և ՀՀ ՊՆ Շենգավիթի զինկոմիսարիատից 2013 թվականի հունվարի 31-ին ստացված` Սերգո Ֆիդանյանին զինկոմիսարիատում հաշվառման կանգնեցնելու հիմքերի պատճենները թողնել լուծելու թիվ 58200913 քրեական գործով:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ