ԵԿԴ/0008/01/13





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«14» մայիսի 2013թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան)


նախագահող դատավոր
դատական նիստերի քարտուղար
մեղադրողներ

տուժողներ

պաշտպան
Մ.Պապոյան
Կ.Կարապետյան
Վ.Պողոսյան
Ա.Նաղդալյան
Ն.Գևորգյան
Մ.Գրիգորյան
Ս.Խաչատրյան


դռնբաց դատական նիստում քննեց քրեական գործն ըստ մեղադրանքի`
Ռոբերտ Կոնստանտինի Հովսեփյանի` ծնված 1984 թվականի հոկտեմբերի 15-ին Երևան քաղաքում, ազգությամբ հայ, ՀՀ քաղաքացի, չամուսնացած, չի աշխատում, նախկինում դատապարտված, հաշվառված է Երևան քաղաքի Ավագ Պետրոսյան փողոցի 6-րդ շենքի 4-րդ բնակարանում, բնակվել է Երևան քաղաքի Միկոյան փողոցի 12-րդ շենքի 32-րդ բնակարանում, մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1.1 կետով, արգելանքի տակ է 2012 թվականի հոկտեմբերի 3-ից:
1. Գործի դատավարական նախապատմությունը.
2012 թվականի օգոստոսի 3-ին ՀՀ ոստիկանության Կենտրոնականի քննչական բաժնի քննիչ Ա.Տոնոյանի որոշմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով և 324-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13144712 քրեական գործը:
2012 թվականի օգոստոսի 3-ին ՀՀ ոստիկանության Կենտրոնականի քննչական բաժնի քննիչ Պ.Աղաբաբյանի որոշմամբ թիվ 13144712 քրեական գործն ընդունվել է վարույթ:
2012 թվականի օգոստոսի 18-ին ՀՀ ոստիկանության Կենտրոնականի քննչական բաժնի քննիչ Լ.Թաթոյանի որոշմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով և 324-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13148712 քրեական գործը:
2012 թվականի օգոստոսի 24-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված հանցագործության հատկանիշներով հարուցվել և վարույթ է ընդունվել թիվ 13149712 քրեական գործը:
2012 թվականի սեպտեմբերի 1-ին ՀՀ ոստիկանության Կենտրոնականի քննչական բաժնի քննիչ Ն.Մխիթարյանի որոշմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված հանցագործության հատկանիշներով հարուցվել և վարույթ է ընդունվել թիվ 15102312 քրեական գործը:
2012 թվականի սեպտեմբերի 3-ին ՀՀ ոստիկանության Կենտրոնականի քննչական բաժնի քննիչ Ա.Ղուկասյանի որոշմամբ թիվ 15102312 քրեական գործն ընդունվել է վարույթ:
2012 թվականի սեպտեմբերի 6-ին ՀՀ ոստիկանության Կենտրոնականի քննչական բաժնի քննիչ Հ.Մանուկյանի որոշմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված հանցագործության հատկանիշներով հարուցվել և վարույթ է ընդունվել թիվ 15103412 քրեական գործը:
2012 թվականի սեպտեմբերի 22-ին ՀՀ ոստիկանության Կենտրոնականի քննչական բաժնի քննիչ Ա.Մխիթարյանի որոշմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված հանցագործության հատկանիշներով հարուցվել և վարույթ է ընդունվել թիվ 15108112 քրեական գործը:
2012 թվականի հոկտեմբերի 4-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործն ընդունվել է վարույթ:
2012 թվականի հոկտեմբերի 5-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13149712 քրեական գործը միացվել է թիվ 15108112 քրեական գործին:
2012 թվականի հոկտեմբերի 5-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15102312 քրեական գործն ընդունվել է վարույթ:
2012 թվականի հոկտեմբերի 5-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15102312 քրեական գործը միացվել է թիվ 15108112 քրեական գործին:
2012 թվականի հոկտեմբերի 6-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործով Ռոբերտ Կոնստանտինի Հովսեփյանին մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1.1 կետով, 177-րդ հոդվածի 3-րդ մասի 1.1 կետով, 177-րդ հոդվածի 3-րդ մասի 1.1 կետով և 177-րդ հոդվածի 3-րդ մասի 1.1 կետով:
2012 թվականի նոյեմբերի 1-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13144712 քրեական գործն ընդունվել է վարույթ:
2012 թվականի նոյեմբերի 1-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13144712 քրեական գործը միացվել է թիվ 15108112 քրեական գործին:
2012 թվականի նոյեմբերի 1-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15103412 քրեական գործն ընդունվել է վարույթ:
2012 թվականի նոյեմբերի 1-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15103412 քրեական գործը միացվել է թիվ 15108112 քրեական գործին:
2012 թվականի նոյեմբերի 2-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13148712 քրեական գործն ընդունվել է վարույթ:
2012 թվականի նոյեմբերի 2-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13148712 քրեական գործը միացվել է թիվ 15108112 քրեական գործին:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործով մեղադրյալ Ռոբերտ Կոնստանտինի Հովսեփյանի կողմից Հայկ Կարապետյանի, Գնել Նալբանդյանի և Լիլյա Մանգասարյանի բնակարաններից գողություն կատարելու կապակցությամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով քրեական հետապնդումը դադարեցվել է` ապացույցների անբավարարության հիմքով, իսկ Կարեն Գալստյանի, Նաիրա Չալկադարյանի և Ալբերտ Գևորգյանի բնակարաններից գողություններ կատարելու կապակցությամբ քրեական հետապնդում չի իրականացվել` ապացույցների անբավարարության հիմքով:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործի նյութերով անհայտ անձի կողմից ապօրինի մուտք գործելու եղանակով Երևան քաղաքի Աբովյան փողոցի 26բ շենքի 19-րդ բնակարանից գողություն կատարելու դեպքի առթիվ ՀՀ քրեական օրենսգրքի 177-րդ հոդվածի 3-րդ մասի 1.1 կետով հարուցվել է թիվ 15133212 քրեական գործը և առանձնացվել առանձին վարույթ:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործից անջատվել է թիվ 15102312 քրեական գործը և առանձնացվել առանձին վարույթ:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործից անջատվել է թիվ 15103412 քրեական գործը և առանձնացվել առանձին վարույթ:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործից անջատվել է թիվ 13144712 քրեական գործը և առանձնացվել առանձին վարույթ:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործից անջատվել է թիվ 13148712 քրեական գործը և առանձնացվել առանձին վարույթ:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 15108112 քրեական գործից անջատվել է թիվ 13149712 քրեական գործը և առանձնացվել առանձին վարույթ:
2012 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13149712 քրեական գործով Ռոբերտ Կոնստանտինի Հովսեփյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1.1 կետով:
2012 թվականի դեկտեմբերի 21-ին ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի որոշմամբ թիվ 13149712 քրեական գործով Ալբերտ Գևորգյանի կողմից ակնհայտ հանցավոր ճանապարհով ձեռք բերված գույք գնելու կապակցությամբ քրեական հետապնդում չի իրականացվել` հանցակազմի բացակայության հիմքով:
2013 թվականի հունվարի 22-ին Ռոբերտ Կոնստանտինի Հովսեփյանի վերաբերյալ թիվ 13149712 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որտեղ քրեական գործին շնորհվել է ԵԿԴ/0008/01/13 համարը:
Ռոբերտ Կոնստանտինի Հովսեփյանին մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1.1 կետով` այն արարքի համար, որ նա, 2012 թվականի օգոստոսի 8-ից մինչև 2012 թվականի օգոստոսի 24-ն ընկած ժամանակահատվածում տեխնիկական միջոցների գործադրմամբ բացել է Նաիրա Գևորգյանին պատկանող` Երևան քաղաքի Ավագ Պետրոսյան փողոցի 4-րդ շենքի 27-րդ բնակարանի խոհանոցի պատուհանը, ապա ապօրինի մուտք է գործել հիշյալ բնակարան և այնտեղից գաղտնի հափշտակել Նաիրա Գևորգյանին պատկանող զգալի չափի` 230.000 ՀՀ դրամ ընդհանուր արժողության արծաթյա զարդեր, բիժուտերիա և «Ասուս» տեսակի նեթբուք համակարգիչ:
2. Ապացույցների հետազոտում և գնահատում.
Ամբաստանյալ Ռոբերտ Հովսեփյանը դատական քննության ընթացքում առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ 2012 թվականի հոկտեմբերի 3-ին` ժամը 22:00-ի սահմաններում, ինքն իր ծանոթների հետ «Գաջի» գործարանի փողոցով գնացել է տուն: Ճանապարհին իրենք կանգնել են, որպեսզի կրպակից առևտուր անեն և 1-2 րոպե չանցած, ինքը տեսել է 7-8 անձանց: Մի ակնթարթ է տևել, ինքն ընկել է գետնին և իրեն ծեծելով նստեցրել են մեքենան: Ինքը նրանց հարցրել է, թե ովքեր են, սակայն նրանք չեն ներկայացել: Ճանապարհին ինքը հասկացել է, որ իրեն տանում են ՀՀ ոստիկանության Կենտրոնականի բաժին: Իրեն ծեծելով ասել են, որ ինքը պետք է գողություններ ու ավազակային հարձակումներ պատմի, իսկ ինքը նրանց ասել է, որ ոչնչից տեղյակ չէ, որ իր հայրը ծանր հիվանդ է և ինքն անգամ տանից դուրս չի գալիս, նույնիսկ հեռախոս չունի, սակայն նրանք իրեն ասել են, որ ինքը դատված է եղել ու կրկին է դատվելու: Ոստիկանությունում իրեն մահակով ծեծել են, որի պատճառով ինքն ուշագնաց է եղել: Ծեծի արդյունքում կոտրվել են իր ոտքերը և պայթել ականջի թաղանթը: Այնուհետև ոստիկանները երկու արվամոլ են բերել, որոնցից մեկը կանգնել է դռների մոտ, որպեսզի ինքը չփախնի, իսկ մյուսը մոտեցել է իրեն: Այդ ժամանակ ինքը ոստիկաններին ասել է, որպեսզի նրանք թույլ չտան այդ արվամոլներին իրեն մոտենալ, և ինքը համաձայնվել է անել նրանց ասածը: Դրանից հետո այդ արվամոլները գնացել են, իսկ Խաչիկ Բախբուդարյանը իրեն սուբոտեքս է տվել: Այնուհետև ոստիկանների պահանջով ինքը զանգահարել է իր մորը և ասել, որպեսզ նա իր անձնագիրը տանի ոստիկանություն: Դրանից հետո Արտակ Բարսեղյանը կատարված մի քանի գողությունների դրվագներ թելադրել է քննիչին, ով գրի է առել դրանք, իսկ ինքը ստիպված ստորագրել է այդ փաստաթղթի տակ: Դրանից հետո իրեն տարել են Մկրտչյանի աշխատասենյակ, ով իրեն 2-3 բաժակ կոնյակ է հյուրասիրել և ասել, որ. «ինքն է, թե ինքը չէ, դա կապ չունի, մեկ է ինքը դատվելու է»: Այնուհետև իրեն տարել են ՁԱՊՎ, որտեղ ինքը ցանկացել է իր կյանքին վերջ տալ, քանի որ իրեն մեղադրել են մի բանի համար, որն ինքը չի կատարել: Հաջորդ օրն իրեն տարել են ՀՀ ոստիկանության Կենտրոնականի քննչական բաժնի պետի մոտ և ինքն այնտեղ ասել է, որ պաշտպան է ցանկանում, իսկ նա պատասխանել է, որ իրեն պաշտպան անհրաժեշտ չէ: ՁԱՊՎ-ում գտնվելու ժամանակ իր մոտ «Մարդու իրավունքների պաշտպան»-ի գրասենյակից անձինք են գնացել և ինքը նրանց ասել է, որ իրեն առաջադրված մեղադրանքների հետ ինքը որևէ կապ չունի: Դրանից հետո իրեն տարել են դատաբժշկի մոտ, ով արձանագրել է իր մարմնի վրա առկա վնասվածքները: Դրանից հետո իրեն մեղսագրված գողությունների մի քանի դրվագներով իր նկատմամբ քրեական հետապնդումը դադարեցվել է, իսկ մեկ դրվագով մեղադրանք է առաջադրվել: Ինքը «քրչի բազառ» կոչվող վայրից Էրիկ անունով անձից 50.000 ՀՀ դրամով գնել է սև գույնի «Տոշիբա» ֆիրմայի համակարգիչ: Համակարգիչը գնելուց հետո ինքը պատահական հանդիպել է իր հոր ընկերոջը, ով պահանջել է տալ նրա խանութից գնած հագուստների գումարը: Այդ պատճառով ինքը նույն օրը նշված համակարգիչը 25.000 ՀՀ դրամով վաճառել է Ալբերտ Գևորգյանին: Իր վաճառած համակարգչի հետ եղել է լիցքավորիչ, որի վրա փաթաթված է եղել սև կպչուն ժապավեն: Համակարգիչը վաճառող անձի` Էրիկի հեռախոսահամարը թղթի վրա գրված եղել է իր մոտ, որը անձնական խուզարկության ժամանակ Խաչիկը վերցրել է:
Ամբաստանյալ Ռոբերտ Հովսեփյանը նախնական քննության ընթացքում` 2012 թվականի հոկտեմբերի 4-ին, որպես կասկածյալ ցուցմունք է տվել այն մասին, որ 2012 թվականի օգոստոսի վերջերին` կոնկրետ օրը չի հիշում, ժամը 24:00-ից մինչև 03:00-ն ընկած ժամանակահատվածում, ինքը որոշել է մտնել իրենց կողքի շենքի բնակիչ Մյասնիկենց բնակարան ու ինչ-որ բան գողանալ, քանի որ իրեն գումար է անհրաժեշտ եղել: Ինքն այդ ժամանակ եղել խմած է: Մյասնիկը բնակվում է Երևան քաղաքի Ավագ Պետրոսյան փողոցի 4-րդ շենքի 27-րդ բնակարանում: Շենքի վթարային աստիճանները բարձրանում են մինչև նրանց պատշգամբի կողքը և ինքն այդ աստիճաններով բարձրացել է վերև ու այդտեղից մտել է բաց պատշգամբ: Նրանց բնակարանի պատուհանը ճաղավանդակ չի ունեցել և ինքն երկաթի օգնությամբ բացել է պատուհանը և մտել է ներս: Բնակարանի պահարանների դարակներից ինքը գտել է ինչ-որ զարդեր, որոնք տեղավորել է իր գրպաններում, որից հետո սեղանի վրայից վերցրել է նեթբուք տեսակի համակարգիչը, այն տեղավորել է իր գոտկատեղում և նույն ճանապարհով հեռացել: Ինքը դուրս է եկել փողոց և հասկացել, որ գողացած զարդերը ոսկի կամ արծաթ չեն: Այնուհետև քայլել է դեպի Երևան քաղաքի Խանջյան փողոց և այդ զարդերը նետել է գետառը, իսկ համակարգիչը պահել է իր մոտ: Դրանից հետո ինքը գնացել է Երևան քաղաքի իրենց շենքի բակ և շենքի մուտքում` չերևացող տեղ, դրել է այդ համակարգիչը, որպեսզի տանը չիմանան և գնացել է քնելու: Հաջորդ օրն ինքը գնացել է Երևան քաղաքի Նալբանդյան փողոցում գործող «Սթար» բար: Ինքը ճանաչում է այդ բարի տիրոջը` Ալբերտին, քանի որ նախկինում նա բնակվել է այդ թաղերում: Ինքը Ալբերտին ասել է, որ նեթբուք ունի ու իրեն շտապ գումար է հարկավոր և ցանկանում է այն վաճառել: Նա իրեն հարցրել է, թե այն փաստաթուղթ ունի, իսկ ինքն էլ պատասխանել է, որ չունի, քանի որ իր ընտանիքի անդամներն են գնել: Համաձայնության են եկել և համակարգիչն ինքը 25.000 ՀՀ դրամով վաճառել է Ալբերտին ու գումարը ծախսել իր անձնական կարիքների համար: 2012 թվականի ամռանն ինքն օգտագործել է 077-51-04-99 բջջային հեռախոսահամարը: Ինքը 2012 թվականին արտերկրում չի եղել:
Նաիրա Գևորգյանը դատական քննության ընթացքում, որպես տուժող ցուցմունք տվեց այն մասին, որ ինքը ճանաչում է Ռոբերտ Հովսեփյանին, ով բնկավել է իրենց հարևանությամբ: Իրենք բնակվում են Երևան քաղաքի Ավագ Պետրոսյան փողոցի 4-րդ շենքում, որը չորս հարկանի է: 2012 թվականի օգոստոսի 8-ից մինչև 24-ը իրենք բացակայել են տանից: Տուն վերադառնալուց հետո ինքը տեսել է, որ տան ճաշասենյակի դարակները լրիվ թափված են և տանից բացակայել են իր դստեր նեթբուք համակարգիչը, զարդերն ու բիժուտերիան և երկու կերամիկական փոքրիկ տիկնիկներ, որոնց մասին ինքը ոստիկանությանը չի հայտնել: Նեթբուք համակարգիչը եղել է սպիտակ գույնի, «Ասուս» ֆիրմայի: Այդ ժամանակ ինքը նկատել է, որ իրենց բնակարանի խոհանոցի պատուհանը գտնվում է բաց վիճակում, որի վրա առկա են եղել մեխանիկական վնասվածքներ, այսինքն` ինչ-որ բանի միջոցով բացել են խոհանոցի պատուհանը և մուտք գործել բնակարան: Նշվածի պատճառով ինքը զանգահարել է ոստիկանություն: Ոստիկանները գնացել են իրենց տուն և կազմել արձանագրություն: Այդ ժամանակ ոստիկանները պարանն են տեսել աստիճաններից կախված, որի միջոցով գողը մտել է իրենց բնակարան: Իրենց շենքն ունի մեկ շքամուտք, որն ունի երկկողմանի դռներ: Իրենց շենքի դրսի հատվածում առկա են վթարային աստիճաններ: Այդ աստիճանները բարձրացնում են դեպի տանիք, իսկ իրենց բնակարանը գտնվում է չորրորդ հարկում: Իրենց տանից հափշտակված իրերից ոչ մեկն իրեն չի պատկանել, այլ դրանք պատկանել է իր աղջկան: Այդ նեթբուք համակարգչի վրա առկա է եղել վնասվածք` քերծվածքի ճաքի ձևով: Երբ իրենց կանչել են ոստիկանություն և ցույց տվել 2-3 նեթբուք համակարգիչներ, ինքն ու իր աղջիկը դրանց մեջ ճանաչել են իրենց տանից գողացված սպիտակ գույնի համակարգիչը: Այդ ժամանակ քննիչի աշխատասենյակում եղել են քննիչը, ինքը, իր աղջիկը և ևս մեկ տղամարդ: Իրենց բնակարան ներխուժել են խոհանոցի պատշգամբով` վերևի տանիքից: Ինքը համոզված է, որ տանիքից ներքև պարան է կախված եղել: Հափշտակության հետևանքով իրենց պատճառվել է մոտ 150.000 ՀՀ դրամի գույքային վնաս:
Տուժող Մարինե Գրիգորյանը դատական քննության ընթացքում, որպես վկա ցուցմունք տվեց այն մասին, որ ճանաչում է Ռոբերտ Հովսեփյանին, ով բնակվել է իրեն հարևանությամբ: Իրենց բնակարանը գտնվում է Երևան քաղաքի Թումանյան 1-ին նրբանցքի 26-րդ շենքի 27-րդ հասցեում, որը հին հասցեն է, իսկ նորը` Ավագ Պետրոսյան 4: 2012 թվականի օգոստոսի 8-ին հանգստանալու նպատակով իրենք գնացել են Բաթումի քաղաք և երբ իրենք վերադարձել են տուն, տեսել են, որ ամբողջ տունը տակնուվրա է արված եղել, որից հետո նկատել են, որ տանից բացակայում է համակարգիչ և իր զարդերը: Երբ իրենք մտել են բնակարան, խոհանոցի պատուհանը գտնվել է բաց վիճակում, որի վրա առկա են եղել վնասվածքի հետքեր, իսկ պատշգամբի պատից կախված է եղել կարմիր գույնի պարան: Նշվածի մասին իրեն տեղեկացրել են ոստիկանությանը: Այդ համակարգիչը եղել է «Ասուս» ֆիրմայի, սպիտակ գույնի: Համակարգիչը միայն իր սեփականությունը չի եղել, այլ այն օգտագործվել է իրենց ընտանիքի բոլոր անդամների կողմից: Իրենց համակարգիչն արտաքինից` վերևի մասում, քերծվածք է ունեցել և ինքը դրանով այն կարող է ճանաչել: Իրենց բնակարանից հափշտակված իրերի մեջ եղել են նաև արծաթյա զարդեր և բիժուտերիա: Իրենց պատճառվել է մոտ 300.000 ՀՀ դրամի գույքային վնաս: Դեպքից մոտ 5-10 օր հետո ոստիկանությունից իրենք տեղեկացել, որ իրենց համակարգիչը հայտնաբերվել է, որի պատճառով իրենց հրավիրել են ոստիկանություն և ճանաչման ներկայացրել համակարգիչը: Ճանաչման ժամանակ ներկա են գտնվել ինքը, իր մայրը և ևս 2 կամ 3 այլ անձինք: Որքանով, որ ինքը հիշում է, իրենց ճանաչման ներկայացված նեթբուքները եղել են սև, կարմիր և սպիտակ գույների:
Վկա Ալբերտ Գևորգյանը դատական քննության ընթացքում ցուցմունք տվեց այն մասին, որ ինքը ճանաչում է Ռոբերտ Հովսեփյանին, ով բնակվել է իրեն հարևանությամբ: Ռոբերտն իրեն համակարգիչ է վաճառել, սակայն որոշ ժամանակ անց իրեն հրավիրել են ՀՀ ոստիկանության Կենտրոնականի քննչական բաժին, որտեղ ինքը պատմել է, որ նա իրեն համակարգիչ է վաճառել և իրենից պահանջել են, որպեսզի ներկայացնի այդ համակարգիչը: Մինչև Ռոբերտի կողմից համակարգիչն իրեն վաճառելը, նա զանգահարել է իրեն և ասել, որ նրան գումար է անհրաժեշտ, որի պատճառով նա վաճառում է քրոջ համակարգիչը: Այնուհետև Ռոբերտը համակարգիչը տարել է Երևան քաղաքի Նալբանդյան փողոցում գտնվող «Սթար» սրճարան, իսկ ինքն էլ նայել է համակարգչի տվյալներն ու տեսել, որ դրանում գրանցված է ինչ-որ աղջկա անուն: Այդ ժամանակ ինքը նրան հարցրել է, թե համակարգիչն ում է պատկանում, իսկ նա պատասխանել է, որ նրա քրոջ համակարգիչն է: Համակարգիչը եղել է սպիտակ գույնի, սակայն ինքը չի հիշում, թե ինչ ֆիրմայի: Համակարգչի դիմաց ինքը Ռոբերտին վճարել է 40.000 ՀՀ դրամ: Նա խոստացել է, որ հաջորդ օրն իրեն կտա համակարգչի փաստաթղթերը և լիցքավորիչը, սակայն նա չի տվել դրանք: ՀՀ ոստիկանության Կենտրոնականի բաժնի օպեր-լիազորներին` Խաչիկ Բախբուդարյանին և Արտակ Բարսեղյանին ինքը ճանաչում է միայն դեմքով: Իր բնակարանում գողություն է կատարվել և մեկ անգամ էլ` գողության փորձ, որոնց հետ կապված ինքը առնչվել է նրանց հետ: Այսինքն` ինքը նրանց ճանաչել է որպես ՀՀ ոստիկանության Կենտրոնականի բաժնի աշխատակիցներ: Հնարավոր է, որ երբ Ռոբերտին ոստիկանության շենքից դուրս հանելու ժամանակ նրան ուղեկցած լինեն Արտակն ու Խաչիկը, սակայն ինքը նրանց հետ չի զրուցել: Հնարավոր է նաև, որ ՀՀ ոստիկանության Կենտրոնականի բաժնից իրեն Խաչիկն ու Արտակը զանգահարած լինեն, սակայն ներկայում ինքը նման բան չի հիշում: Ռոբերտից գնած համակարգիչն ինքը տվել է քննիչին, ով այդ մասին կազմել է արձանագրություն: Այդ ժամանակ ներկա են եղել ևս 3-4 տղամարդիկ: Ինքը մինչև 2003 թվականը աշխատել է ՀՀ ոստիկանության Կենտրոնականի բաժնում` որպես անչափահասների տեսուչ, տեղամասային տեսուչ, քրեական հետախուզության օպեր-լիազոր:
Վկա Քերոբ Սիմունյանը դատական քննության ընթացքում ցուցմունք տվեց այն մասին, որ ճանաչում է Ռոբերտ Հովսեփյանին և նրա հետ գտնվում է մտերիմ հարաբերությունների մեջ: 2012 թվականի հոկտեմբերի 3-ին` ժամը 23:00-ի սահմաններում, իրեն, Ռոբերտին և իրենց ընկերներից ևս երեք անձանց, «Գաջի» գործարանի ճանապարհից, առևտուր անելու ժամանակ բերման են ենթարկել ոստիկանության բաժին: Բերման ենթարկելու ժամանակ նրանք չեն ներկայացել: Ոստիկանությունում իրեն չեն ծեծել, իսկ իր ընկերներին ծեծել են, թե ոչ, ինքը չի կարող ասել: Հաջորդ օրը` առավոտյան, ոստիկանության բաժնում ինքը տեսել է Ռոբերտին, ում աջ աչքի կողքի վերևի հատվածում առկա է եղել վնասվածք, իսկ նրան հագուստները եղել են արյունոտված:
Վկա Ջուլիետա Սարգսյանը դատական քննության ընթացքում ցուցմունք տվեց այն մասին, որ Նաիրա Գևորգյանն իր հարևանուհին է: 2012 թվականի օգոստոսին ինքը պատշգամբից լվացք փռելու ժամանակ շուրջ երկու օր տեսել է, որ նրանց խոհանոցի պատուհանը բաց է: Դրանից հետո, երբ ոստիկանները գնացել են նրանց տուն մատնահետքեր վերցնելու, ինքն այդ ժամանակ ոստիկաններին ասել է այդ մասին: Հետագայում այդ մասին հայտնել է նաև պաշտպանին, բայց թե կոնկրետ երբ, չի հիշում: Իրենց շենքը երկու կողմից էլ մուտք ունի, իրենց շենքում առկա է նաև հրդեհային աստիճան, որն անցնում է անմիջապես Նաիրայենց պատուհանի կողքով: Նրանք դեպքից մի քանի տարի առաջ պատուհանի դիմաց պատ են շարել: Այդ պատը հրդեհային աստիճաններից գտնվում է մոտ մեկ մետր հեռավորության վրա: Ինքը տեսել է այդ աստիճաններին կախված կարմիր գույնի պարանը միայն Նաիրայի ասելուց հետո, սակայն ինքը դրանից առաջ չի իմացել, որ այդպիսի բան է եղել:
Վկա Ստեփան Ղազարյանը դատական քննության ընթացքում ցուցմունք տվեց այն մասին, որ ճանաչում է Ռոբերտ Հովսեփյանին, ինքը նրանց ընտանիքի հետ մոտ է: Ինքը հագուստի խանութ ունի, իսկ Ռոբերտենց ընտանիքը հաճախակի օգտվում է իր խանութից: 2012 թվականին օգոստոսին նա հագուստներ է գնել իր խանութից և ասել, որ գումարը մեկ շաբաթ հետո կվճարի, սակայն նա չի վճարել: Այնուհետև` 2012 թվականի օգոստոսի վերջին կամ սեպտեմբերի սկզբին, ինքը հանկարծակի Երևան քաղաքի Սայաթ-Նովա փողոցում տեսել է Ռոբերտին, բարկացել նրա վրա և հարցրել, թե ինչու նա գումարը չի վճարում, իսկ նա պատասխանել է, որ այդ օրն անպայման կվճարի: Այդ ժամանակ նրա ձեռքում տոպրակ է եղել, որի միջի պարունակությունը ինքը չի իմացել, քանի որ նա իրեն ցույց չի տվել, սակայն տոպրակի միջից ինչ-որ լար է երևացել: Նույն օրը` ժամը 19:00-ի սահմաններում, նա հագուստների գումարը` 25.000 ՀՀ դրամը վերադարձրել է:
Դեպքի վայրի զննության մասին 2012 թվականի օգոստոսի 24-ի արձանագրության համաձայն` դեպքի վայրը հանդիսանում է Երևան քաղաքի Ավագ Պետրոսյան փողոցի 4-րդ շենքի 27-րդ բնակարանը: Բնակարանի մուտքի դուռը երկաթյա է, մուտքի դռնից ներս առկա է 4x6 մետր չափի նախասրահ, նախասրահի ձախ պատին առկա է 3x2 մետր չափի պահարան, որի ձախ կողմի դռները գտնվում են փակ վիճակում, իսկ աջ կողմի դռները, որոնք ապակյա են, գտնվում են կիսաբաց վիճակում, կիսաբաց դռներով դարակներում առկա են կանոնավոր կերպով դասավորված գրքեր և նույն կերպով դրված են կանացի զարդեր և հարդարման պարագաներ: Մուտքի դռան դեմ դիմաց` պատին, առկա է դուռ, որը տանում է դեպի 3x2 մետր չափի ննջասենյակ, որի դիմացի պատին առկա է անկանոն ձևով հավաքված պահարան և համակարգչի սեղան, պահարանի դռները գտնվում են կիսաբաց վիճակում: Համակարգչի սեղանին առկա են դատարկ զարդատուփեր: Սենյակի աջ պատի մոտ առկա է 80x1,50սմ չափի գրասեղան, որի դարակները գտնվում են բաց վիճակում, սենյակում առկա է նաև պահարան, որի դռները գտնվում են փակ վիճակում: Բնակարանի նախասրահի աջ կողմում առկա է դուռ, որը տանում է դեպի 5x9 մետր չափի հյուրասենյակ, որի ձախ անկյունում առկա է սեղան իր աթոռներով, իսկ ձախ պատի մոտ առկա է 2x3 մետր չափի պահարան, որի բոլոր դռները գտնվում են բաց վիճակում, պահարանի պարունակությունը անկանոն կերպով դրված տարբեր կենցաղային առարկաներ են: Հյուրասենյակի աջ պատի մոտ առկա է բազմոց և բազկաթոռ, որի կողքին առկա դռնից մտնում է դեպի բնակարանի 3x4 մետր չափի խոհանոց: Խոհանոցի դիմացի պատին առկա է 1,8x1,5 մետր չափի սպիտակ գույնի «եվրո» պատուհան, որը գտնվում է բաց վիճակում: Պատուհանի բացված հատվածում առկա են քերծվածքներ, որտեղ ներկը թափված է: Ըստ բնակարանի սեփականատեր Նաիրա Ալբերտի Գևորգյանի հայտարարության` 2012 թվականի օգոստոսի 8-ին` ժամը 14:00-ի սահմաններում, նրանք դուրս են եկել տանից, մեկնել են Վրաստան ու վերադարձել են 2012 թվականի օգոստոսի 24-ին` ժամը 15:00-ին և հայտնաբերել են բնակարանը նշված վիճակում: Բնակարանի դուռը և բոլոր պատուհանները գտնվել են փակ վիճակում, բացառապես խոհանոցի պատուհանի: Ըստ մասնակիցների խոսքերի տանից բացակայում է «Ասուս» տեսակի նեթբուք համակարգիչ, «Տիֆանի և Կո» և «Սիլվեր Սիթի» տեսակի բիժուտերիաներ` թևնոցներ, ականջօղներ և վզնոցներ, ընդհանուր մոտ` 290.000 ՀՀ դրամ արժողության: Ըստ մասնակիցների խոսքերի` խոհանոցի պատուհանից այն կողմ առկա է շենքի վթարային աստիճան և հանցագործը կարող էր մտնել այդ ճանապարհով:
Փորձագետի 2012 թվականի հոկտեմբերի 26-ի թիվ 12-3447 եզրակացության համաձայն` Երևան քաղաքի Ավագ Պետրոսյան փողոցի 4-րդ շենքի 27-րդ բնակարանի խոհանոցի պատուհանի բացվող հատվածի և դրան հարող հատվածներում առկա վնասվածքները և հետքերն առաջացել են կոշտ, սահմանափակ, 7-9մմ աշխատանքային եզր ունեցող առարկայի` հնարավոր է պտուտակահանի ներգործության հետևանքով, պատուհանի փականով փակ փեղկը բացելիս լծակի ուժ գործադրելու արդյունքում:
Փորձագետի 2012 թվականի հոկտեմբերի 26-ի թիվ 12-3447 եզրակացությանը կից հաշիվ-ապրանքագիր հանդիսացող հանձնման-ընդունման արձանագրության համաձայն` փորձաքննության համար վճարման ենթակա գումարը կազմում է 20.610 (քսան հազար վեց հարյուր տաս) ՀՀ դրամ:
Զննություն կատարելու մասին 2012 թվականի դեկտեմբերի 23-ի արձանագրության համաձայն` զննվել է Երևան քաղաքի Նալբանդյան փողոցի 29-րդ հասցեում գործող «Սթար» բարի սրահը: Զննությամբ պարզվել է, որ «Սթար» բարը գտնվում է շենքի կիսանկուղային հարկում, մուտքի դռնից ներս առկա է 4x11 մետր չափերի նախասրահ, որի ձախ կողմում պատերի տակ առկա են թվով 8 բազմոցներ: Մուտքի դռնից աջ առկա է բարի սեղան, որի դիմաց դրված են աթոռներ, բարի սեղանի ետևի պատին` անկյունային մասում առկա է տեսախցիկ, իսկ աջ և ձախ պատերին դրված են տարբեր տեսակի ապակյա շշերով խմիչքներ: Բարի սեղանի կողքին առկա է 1,5x3 մետր չափերի միջանցք, որը տանում է դեպի առանձին սենյակներ, իսկ միջանցքի վերջում առկա է 2x4 մետր չափերի տարածք, որի աջ և ձախ պատին և դիմացի պատին առկա են սենյակներ: Նշված միջանցքի ետևի պատին առկա է տեսանկարահանող սարք, որն ուղղված է դեպի դիմացի պատին առկա սենյակի դուռը, որը հանդիսանում է տնօրենի աշխատասենյակը:
Առգրավում կատարելու մասին 2012 թվականի հոկտեմբերի 5-ի արձանագրության համաձայն` Ալբերտ Շավարշի Գևորգյանից առգրավվել է «Ասուս» տեսակի նեթբուք համակարգիչը, որն իրեն էր վաճառել իր ծանոթ Ռոբերտ Հովսեփյանը: Միաժամանակ արձանագրության մեջ նշված է, որ առգրավում կատարելու ժամանակ որպես ընթերականեր մասնակցել են Գոհար Համայակի Թադևոսյանը (ծնված 1947 թվականին, հասցե` ք.Երևան, Վարդանանց 115) և Զինա Էդուարդի Առաքելյանը (ծնված 1992 թվականին, հասցե` ք.Երևան, Սունդուկյան 27 շ., բն. 23):
ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի կողմից 2012 թվականի հոկտեմբերի 6-ին կազմված տեղեկանքի համաձայն` թվով չորս հատ սպիտակ գույնի «Ասուս» տեսակի նեթբուք համակարգիչները դրվել են իրար կողքի, որոնցից աջից ձախ դրված երրորդ համակարգիչը հանդիսացել է Ալբերտ Գևորգյանից առգրավված «Ասուս» տեսակի սպիտակ գույնի նեթբուք համակարգիչը:
Առարկաները ճանաչման ներկայացնելու մասին 2012 թվականի հոկտեմբերի 6-ի արձանագրության համաձայն` տուժող Նաիրա Գևորգյանը, զննելով իրեն ճանաչման ներկայացված առարկաները, հայտարարել է, որ ներկայացված նեթբուք համակարգիչներից ճանաչում է աջից ձախ երրորդ համակարգիչը, որը ճանաչել է գույնից, ձևից և մաշվածության աստիճանից: Նշված «Ասուս» տեսակի նեթբուք համակարգիչը հանդիսանում է իր դստեր` Մարինե Գրիգորյանի համակարգիչը, որը 2012 թվականի օգոստոսի վերջերին իրենց բնակարանի հյուրասենյակի սեղանից գողացել էր հանցագործը: Միաժամանակ արձանագրության մեջ նշված է, որ առարկաները ճանաչման ներկայացնելու ժամանակ որպես ընթերականեր մասնակցել են Գոհար Համայակի Թադևոսյանը (ծնված 1947 թվականին, հասցե` ք.Երևան, Վարդանանց 115) և Մամիկոն Հրայրի Խաչատրյանը (ծնված 1976 թվականին, հասցե` ք.Երևան, 16-րդ թաղամաս 79 շ., բն. 90):
Առարկաները ճանաչման ներկայացնելու մասին 2012 թվականի հոկտեմբերի 6-ի արձանագրության համաձայն` Մարինե Գրիգորյանը, զննելով իրեն ճանաչման ներկայացված առարկաները, հայտարարել է, որ ճանաչում է աջից ձախ դրված երրորդ համակարգիչը, այն իրեն պատկանող «Ասուս» տեսակի համակարգիչն է, որը հանցագործը 2012 թվականի օգոստոսին հափշտակել է իրենց տանից: Համակարգիչը ճանաչել է ձևից, գույնից, մաշվածության աստիճանից և բացի այդ համակարգչի վրա առկա են սև խազեր: Աջից ձախ դրված նեթբուք համակարգիչներից երրորդը հանդիսանում է իր համակարգիչը: Միաժամանակ արձանագրության մեջ նշված է, որ առարկաները ճանաչման ներկայացնելու ժամանակ որպես ընթերականեր մասնակցել են Գոհար Համայակի Թադևոսյանը (ծնված 1947 թվականին, հասցե` ք.Երևան, Վարդանանց 115) և Մամիկոն Հրայրի Խաչատրյանը (ծնված 1976 թվականին, հասցե` ք.Երևան, 16-րդ թաղամաս 79 շ., բն. 90):
Երևան քաղաքի Աջափնյակ վարչական շրջանի ղեկավարի 2012 թվականի նոյեմբերի 27-ի գրությամբ հայտնվել է, որ, ըստ համատիրության նախագահի կողմից տրված տեղեկանքի, Մամիկոն Հրայրի Խաչատրյանը Երևան քաղաքի 16-րդ թաղամասի 19-րդ շենքի 90-րդ բնակարանում չի բնակվում:
Երևան քաղաքի Կենտրոն վարչական շրջանի ղեկավարի տեղակալի 2012 թվականի նոյեմբերի 20-ի գրությամբ հայտնվել է, որ Երևան քաղաքի Վարդանանց փողոցի 115 տուն հասցե գոյություն ունի, սակայն նշված հասցեում Գոհար Համայակի Թադևոսյան չի բնակվում:
Փորձագետի 2012 թվականի նոյեմբերի 8-ի թիվ 12-4056 եզրակացության համաձայն` օգտագործված, սարքին վիճակում գտնվող «ASUS, Eee PC 1001 PXD» մոդելի նեթբուքի միջին շուկայական արժեքը 2012 թվականի օգոստոսի դրությամբ կարող է կազմել շուրջ 80.000 (ութսուն հազար) ՀՀ դրամ:
Փորձագետի 2012 թվականի նոյեմբերի 8-ի թիվ 12-4056 եզրակացությանը կից հաշիվ-ապրանքագիր հանդիսացող հանձնման-ընդունման արձանագրության համաձայն` փորձաքննության համար վճարման ենթակա գումարը կազմում է 13.740 (տասներեք հազար յոթ հարյուր քառասուն) ՀՀ դրամ:
Փորձագետի 2012 թվականի դեկտեմբերի 6-ի թիվ 236-12 եզրակացության համաձայն` Ռոբերտ Կոնստանտինի Հովսեփյանը տառապում է «Ափիոնային թմրամոլություն դադարի շրջանում» ախտորոշմամբ, ուստի հարկադիր բուժման կարիք չունի:
Իրեղեն ապացույց ճանաչելու մասին 2012 թվականի դեկտեմբերի 20-ի որոշման համաձայն` թիվ 13149712 քրեական գործով «Ասուս» տեսակի նեթբուք համակարգիչը ճանաչվել է իրեղեն ապացույց, որը հետազոտվել է դատական քննության ընթացքում:
Այլ փաստաթուղթն ապացույց ճանաչելու մասին 2012 թվականի դեկտեմբերի 20-ի որոշման համաձայն` թիվ 13149712 քրեական գործով «Ասուս» տեսակի նեթբուք համակարգչի տեխնիկական անձնագիրը ճանաչվել է ապացույց:
Դատական քննության ընթացքում իրեղեն ապացույց ճանաչված «Ասուս» տեսակի նեթբուք համակարգչի զննությամբ պարզվեց, որ համակարգիչը սպիտակ գույնի է, որի վրա առկա է «ASUS, Eee PC 1001 PXD» համարը: «Ասուս» տեսակի նեթբուք համակարգչի վերևի հատվածում առկա է քերծվածք, մոնիտորը սև գույնի է, իսկ ստեղնաշարը` սպիտակ: Համակարգչի մեջ դրված է փաստաթուղթ, որի վրա առկա է եղել «ASUS, Eee PC» գրառումը: Դատական քննության ընթացքում Մարինե Գրիգորյանը հայտարարեց, որ զննվող «Ասուս» տեսակի նեթբուք համակարգիչը իրենց տանից հափշտակված համակարգիչն է, ինքն այն ճանաչեց վերևում առկա քերծվածքից, ինչպես նաև նշեց, որ համակարգչի անձնագիրը հետագայում ինքն է ներկայացրել ոստիկանություն: Նաիրա Գևորգյանը հայտարարեց, որ ինքն էլ է վստահ, որ դա իրենց «Ասուս» տեսակի նեթբուք համակարգիչն է, քանի որ իրենց ներկայացրած փաստաթղթի և համակարգչի համարները համընկնում են: Ինչպես նաև վկա Ալբերտ Գևորգյանը հայտարարեց, որ զննվող «Ասուս» տեսակի նեթբուք համակարգիչը իր կողմից քննիչին ներկայացված համակարգիչն է, ինքն այն ճանաչեց վերևում առկա ճաքից: Համակարգիչը միացվեց, որի արդյունքում պարզվեց, որ որպես օգտագործողի անուն գրված է «MARISH», իսկ համակարգչում առկա են բազմաթիվ լուսանկարներ և ֆայլեր: Բացվեցին լուսանկարներից մի քանիսը, որոնցում Մարինե Գրիգորյանն է: Բացի այդ, զննվեցին համակարգչում առկա երգերից մի քանիսը և պարզվեց, որ դրանք ներբեռնված են համապատասխանաբար 2012 թվականի հունիսի 27-ին, հուլիսի 7-ին և հուլիսի 17-ին:
ՀՀ ոստիկանության Կենտրոնականի քննչական բաժնի ավագ քննիչ Ն.Բարսեղյանի կողմից 2012 թվականի դեկտեմբերի 27-ին կազմված տեղեկանքի համաձայն` 2012 թվականի դեկտեմբերի 27-ին` ժամը 17:30-ին, 077-04-11-11 հեռախոսահամարից իր բջջային` 094-12-51-50 հեռախոսահամարին զանգահարել է մի քաղաքացի, ներկայացել է ՀՀ ԱՆ «Գորիս» ՔԿ հիմնարկի դատապարտյալ` Գևորգ Սուքիասյան և հայտարարել է, որ 077-04-11-11 և 077-11-66-66 բջջային հեռախոսահամարները գրանցված են իր կնոջ` Ինեսա Ղևոնդյանի անվամբ, սակայն գտնվել են և օգտագործվել են նրա կողմից: Գևորգ Սուքիասյանը հայտարարել է, որ 2012 թվականի ամռան ընթացքում 077-51-04-99 հեռախոսահամարից իրեն զանգահարել է վաղեմի ծանոթ Ռոբերտ Հովսեփյանը, ում հետ ծանոթացել է ՀՀ ԱՆ «Աբովյան» ՔԿ հիմնարկում (մալալետկա) դեռևս 11 տարի առաջ և հետաքրքրվել է իր որպիսությունից, իսկ ինքն էլ իր համարներից մի քանի անգամ զանգահարել է Ռոբերտի 077-51-04-99 հեռախոսահամարին:
Այլ փաստաթուղթն ապացույց ճանաչելու մասին 2012 թվականի դեկտեմբերի 28-ի որոշման համաձայն` թիվ 13149712 քրեական գործով մեղադրյալ Ռոբերտ Հովսեփյանի 077-51-04-99 բջջային հեռախոսահամարների մուտքային և ելքային հեռախոսազանգերի վերծանումները և 2012 թվականի դեկտեմբերի 27-ին կազմված տեղեկանքը ճանաչվել են ապացույց:
«ԱրմենՏել» և «Ղ-Տելեկոմ» ՓԲ ընկերությունների վերծանումների պատճենների համաձայն` 2012 թվականի հոկտեմբերի 3-ից մինչև հոկտեմբերի 5-ն ընկած ժամանակահատվածում Արտակ Բարսեղյանն ու Խաչիկ Բախբուդարյանն Ալբերտ Գևորգյանի հետ գտնվել են հեռախոսակապի մեջ:
ՀՀ ոստիկանության ինֆորմացիոն կենտրոնի պահանջագրի համաձայն` Ռոբերտ Կոնստանտինի Հովսեփյանը.
-Երևան քաղաքի Կենտրոն և Նոր-Նորք համայնքների առաջին ատյանի դատարանի 2001 թվականի ապրիլի 17-ի դատավճռով մեղավոր է ճանաչվել Քրեական օրենսգրքի 86-րդ հոդվածի 2-րդ մասով և պատիժ է նշանակվել ազատազրկում` 2 (երկու) տարի ժամկետով: Քրեական օրենսգրքի 42-րդ հոդվածի կիրառմամբ Ռոբերտ Կոնստանտինի Հովսեփյանի նկատմամբ պատիժը պայմանականորեն չի կիրառվել` սահմանելով փորձաշրջան 1 տարի ժամկետով:
-Երևան քաղաքի Կենտրոն և Նորք-Մարաշ համայնքների առաջին ատյանի դատարանի 2004 թվականի մայիսի 24-ի դատավճռով մեղավոր է ճանաչվել ՀՀ քրեական օրենսգրքի 177-րդ հոդվածի 1-ին մասով և պատիժ է նշանակվել ազատազրկում` 1 (մեկ) տարի ժամկետով:
-Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի 2010 թվականի նոյեմբերի 19-ի դատավճռով մեղավոր է ճանաչվել ՀՀ քրեական օրենսգրքի 177-րդ հոդվածի 2-րդ մասի 2-րդ, 3-րդ և 4-րդ կետերով և պատիժ է նշանակվել ազատազրկում` 2 (երկու) տարի ժամկետով: 2011 թվականի հունիսի 30-ին «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 1-ին ենթակետի կիրառմամբ Ռոբերտ Կոնստանտինի Հովսեփյանն ազատվել է պատժի կրումից:
Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի 2010 թվականի նոյեմբերի 19-ի դատավճռի պատճենի համաձայն` Ռոբերտ Կոնստանտինի Հովսեփյանը մեղավոր է ճանաչվել ՀՀ քրեական օրենսգրքի 177-րդ հոդվածի 2-րդ մասի 2-րդ, 3-րդ և 4-րդ կետերով և նրա նկատմամբ պատիժ է նշանակվել ազատազրկում` 2 (երկու) տարի ժամկետով: Պատժի կրման սկիզբը հաշվվել է 2010 թվականի փետրվարի 15-ից:
Փորձագետի 2012 թվականի դեկտեմբերի 7-ի թիվ 437/12 եզրակացության համաձայն` Ռոբերտ Կոնստանտինի Հովսեփյանը հոգեկան հիվանդությամբ չի տառապել և ներկայում նույնպես չի տառապում, այլ նա հանդիսանում է` «անձի հիսթերիկ խանգարում» ախտորոշմամբ փսիխոպաթ անձնավորություն: Սակայն վերը նշված անձնային առանձնահատկություններն արտահայտված չեն այն աստիճան, որպեսզի նրան զրկեն իր գործողությունների վտանգավորությունը գիտակցելու և դրանք ղեկավարելու հնարավորությունից: Ինչպես իրավախախտումը կատարելու պահին, այնպես էլ ներկայում նա կարող է հաշիվ տալ իր գործողություններին և ղեկավարել դրանք: Ուստի Ռոբերտ Կոնստանտինի Հովսեփյանին հարկ է ճանաչել մեղսունակ: Իր ներկա հոգեկան վիճակով նա կարող է մասնակցել դատաքննչական գործողություններին: Դատապարտվելու դեպքում նա կարիք ունի ամբուլատոր բուժման և հսկողության նյարդահոգեբույժի մոտ կալանավայրի պայմաններում:
Փորձագետի 2012 թվականի հոկտեմբերի 18-ի թիվ 12-3968 եզրակացության համաձայն` Ռոբերտ Կոնստանտինի Հովսեփյանից վերցված մազի փորձանմուշի մեջ հայտնաբերվել են ափիոնի խմբին պատկանող թմրամիջոցի թմրալկալոիդներ: Մեզի փորձանմուշի մեջ թմրամիջոցներ չեն հայտնաբերվել:
Բերման ենթարկելու մասին 2012 թվականի հոկտեմբերի 4-ի արձանագրության համաձայն` 2012 թվականի հոկտեմբերի 4-ին` ժամը 15:00-ին, Ռոբերտ Կոնստանտինի Հովսեփյանը բերման է ենթարկվել ՀՀ ոստիկանության Կենտրոնականի բաժին:
Ձերբակալման մասին 2012 թվականի հոկտեմբերի 4-ի արձանագրության համաձայն` 2012 թվականի հոկտեմբերի 4-ին` ժամը 18:00-ին, Ռոբերտ Կոնստանտինի Հովսեփյանը ձերբակալվել է:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2012 թվականի հոկտեմբերի 6-ի որոշման համաձայն` Ռոբերտ Կոնստանտինի Հովսեփյանի նկատմամբ որպես խափանման միջոց կիրառվել է կալանավորումը` երկու ամիս ժամանակով:
Դատարանը գտնում է, որ մտացածին են և սույն քրեական գործով ձեռք բերված օբյեկտիվ տվյալներով հերքվում է ամբաստանյալ Ռոբերտ Կոնստանտինի Հովսեփյանի ցուցմունքն այն մասին, որ ինքը Երևան քաղաքի Ավագ Պետրոսյան փողոցի 4-րդ շենքի 27-րդ բնակարանից գողություն չի կատարել, իսկ վկա Ալբերտ Գևորգյանը իրականությանը չհամապատասխանող ցուցմունքներ է տվել:
Դատարանն անհրաժեշտ է համարում անդրադառնալ ամբաստանյալ Ռոբերտ Հովսեփյանի պաշտպան Սարգիս Խաչատրյանի միջնորդություններին.
ա) Ռոբերտ Հովսեփյանի 2012 թվականի հոկտեմբերի 4-ի որպես կասկածյալ տված ցուցմունքը անթույլատրելի ապացույց ճանաչելու և սույն դատավճռի հիմքում չդնելու վերաբերյալ.
Պաշտպան Սարգիս Խաչատրյանը, մասնավորապես նշել է, որ Ռոբերտ Հովսեփյանը ՀՀ ոստիկանության Երևան քաղաքի վարչության Կենտրոնականի բաժին բերման է ենթարկվել 2012 թվականի հոկտեմբերի 3-ին` ժամը 23:00-ի սահմաններում, իսկ բերման ենթարկելու արձանագրությունը կազմվել է 2012 թվականի հոկտեմբերի 4-ին` ժամը 15:00-ին: Իր կողմից փաստաբանական մասնավոր հարցման են ենթարկվել Ռոբերտ Հովսեփյանին բերման ենթարկելուն ականատես վկաները, ովքեր հստակ նկարագրել են, թե երբ և ինչ եղանակով են բերման ենթարկել Ռոբերտ Հովսեփյանին: Բացի այդ, Ռոբերտ Հովսեփյանին բերման ենթարկելու և ոչ իրավաչափ եղանակով ցուցմունքներ կորզելու փաստի առթիվ ՀՀ ոստիկանության Երևան քաղաքի վարչության Կենտրոնականի բաժնի քրեական հետախուզության աշխատակիցներ Խաչիկ Բախբուդարյանի և Արտակ Բարսեղյանի նկատմամբ հարուցվել է քրեական գործ, իսկ Ռոբերտ Հովսեփյանը ճանաչվել է որպես տուժող: Նշված քրեական գործով Խաչիկ Բախբուդարյանին և Արտակ Բարսեղյանին մեղադրանք է առաջադրվել ՀՀ քրեական օրենսգրքի 309-րդ հոդվածի 2-րդ մասով և 314-րդ հոդվածով:
Դատարանը, նկատի ունենալով, որ Խաչիկ Բախբուդարյանի և Արտակ Բարսեղյանի վերաբերյալ քրեական գործը գտնվում է դատական քննության փուլում, այսինքն` դեռևս առկա չէ օրինական ուժի մեջ մտած դատական ակտ, հետևապես գտնում է, որ սույն քրեական գործով հնարավոր չէ վերջնական գնահատական տալ վերը նշված անձանց գործողություններին (մեղադրանքին), սակայն գտնում է, որ սույն դատավճռի հիմքում չպետք է դնել Ռոբերտ Հովսեփյանի 2012 թվականի հոկտեմբերի 4-ի որպես կասկածյալ տված ցուցմունքը և անուղղակիորեն պետք է ընդունել, որ Ռոբերտ Հովսեփյանը անազատության մեջ է գտնվում 2012 թվականի հոկտեմբերի 3-ից, քանի որ հակառակ մոտեցման և Խաչիկ Բախբուդարյանի ու Արտակ Բարսեղյանի վերաբերյալ քրեական գործով մեղադրական դատավճիռ կայացվելու պարագայում կասկածի տակ կարող է առնվել սույն դատական ակտի հիմնավորվածությունը:
Հարկ է նկատել, որ ՀՀ Վճռաբեկ դատարանն իր` 2009 թվականի փետրվարի 16-ի ՎԴ/0551/05/08 որոշմամբ արձանագրել է այն իրավական դիրքորոշումը, որ եթե վճիռը (դատական ակտը) զուրկ է իրավական հիմնավորումից, ապա չի կարող լինել օրինական, համոզիչ, ինչպես նաև հեղինակավոր: Այսինքն` դատական ակտը պետք է լինի նաև համոզիչ և հավատ ներշնչի:
բ) առգրավում կատարելու մասին 2012 թվականի հոկտեմբերի 5-ի և առարկաները ճանաչման ներկայացնելու մասին 2012 թվականի հոկտեմբերի 6-ի արձանագրություններն անթույլատրելի ապացույց ճանաչելու և սույն դատավճռի հիմքում չդնելու վերաբերյալ.
Պաշտպան Սարգիս Խաչատրյանը, մասնավորապես նշել է, որ Ալբերտ Գևորգյանից «Ասուս» տեսակի նեթբուք համակարգիչն առգրավելու ժամանակ, ինչպես նաև տուժողների կողմից «Ասուս» տեսակի նեթբուք համակարգչի ճանաչելու ժամանակ որպես ընթերակա հանդես է եկել Գոհար Համայակի Թադևոսյանը (ծնված 1947 թվականին, հասցե` ք.Երևան, Վարդանանց 115), սակայն Երևան քաղաքի Կենտրոն վարչական շրջանի ղեկավարի տեղակալի կողմից տրված գրության համաձայն` Երևան քաղաքի Վարդանանց փողոցի 115 տուն հասցեում Գոհար Համայակի Թադևոսյան չի բնակվում: Ավելին` դատաքննության ժամանակ վկա Ալբերտ Գևորգյանը ցուցմունք տվեց այն մասին, որ առգրավման ժամանակ նման անձնավորություն չի եղել, իսկ տուժողները ցուցմունք տվեցին այն մասին, որ «Ասուս» տեսակի նեթբուք համակարգչի ճանաչման ժամանակ ընթերականեր չեն մասնակցել և ճանաչման են ներկայացվել տարբեր գույների (սև, կարմիր, սպիտակ) նեթբուք համակարգիչներ:
Դատարանը գտնում է, որ առգրավում կատարելու մասին 2012 թվականի հոկտեմբերի 5-ի առարկաները ճանաչման ներկայացնելու մասին 2012 թվականի հոկտեմբերի 6-ի և արձանագրությունները պետք է ճանաչել անթույլատրելի ապացույցներ և չդնել սույն դատավճռի հիմքում, քանի որ ՀՀ քրեական դատավարության օրենսգրքի 105-րդ հոդվածի 1-ին մասի 5-րդ կետի համաձայն` քրեական գործով վարույթում մեղադրանքի հիմքում չեն կարող դրվել և որպես ապացույց օգտագործվել այն նյութերը, որոնք ձեռք են բերվել քննչական կամ այլ դատավարական գործողության կատարման կարգի էական խախտմամբ, իսկ սույն քրեական գործով ձեռք են բերվել օբյեկտիվ տվյալներ, որ վերը նշված քննչական գործողությունները կատարվել են օրենքի էական խախտմամբ:
գ) Ալբերտ Գևորգյանի ցուցմունքներն անարժանահավատ ճանաչելու և սույն դատավճռի հիմքում չդնելու վերաբերյալ.
Պաշտպան Սարգիս Խաչատրյանը, մասնավորապես նշել է, որ վկա Ալբերտ Գևորգյանը նախկինում աշխատել է ՀՀ ոստիկանության Կենտրոնականի բաժնում, ճանաչել է Խաչիկ Բախբուդարյանին ու Արտակ Բարսեղյանին, մինչ Ռոբերտ Հովսեփյանին ՀՀ ոստիկանության Կենտրոնականի բաժին բերման ենթարկելը և դրանից հետո ունեցել է բազմաթիվ հեռախոսազանգեր վերը նշված անձանց հետ և բացի այդ, սույն քրեական գործով նախնական քննության մարմնի կողմից սկզբնական շրջանում Ռոբերտ Հովսեփյանին առաջադրված մեղադրանքների յոթ դրվագ գողություններից մեկը հենց Ալբերտ Գևորգյանի բնակարանի գողության փաստն է: Այսինքն` Ալբերտ Գևորգյանն իր ցուցմունքներով ուղղակի փորձել է օգնել նախաքննությանը:
Դատարանը գտնում է, որ պաշտպան Սարգիս Խաչատրյանի միջնորդությունը` Ալբերտ Գևորգյանի ցուցմունքներն անարժանահավատ ճանաչելու և սույն դատավճռի հիմքում չդնելու վերաբերյալ, ենթակա է մերժման, քանի որ սույն քրեական գործով ձեռք չի բերվել որևէ օբյեկտիվ տվյալ, որը կարող էր կասկածի տակ դնել վկա Ալբերտ Գևորգյանի ցուցմունքների արժանահավատությունը:
Հարկ է նաև նկատել, որ առգրավում կատարելու մասին 2012 թվականի հոկտեմբերի 5-ի և առարկաները ճանաչման ներկայացնելու մասին 2012 թվականի հոկտեմբերի 6-ի արձանագրությունները սույն գործի լուծման համար ելակետային նշանակություն ունենալ չեն կարող, քանի որ դատական քննության ընթացքում իրեղեն ապացույց ճանաչված «Ասուս» տեսակի նեթբուք համակարգիչը զննելու ժամանակ վկա Ալբերտ Գևորգյանը հայտնեց, որ այն իր կողմից քննիչին ներկայացված համակարգիչն է և նշեց, թե ինչպիսի հատկանիշներով է այն ճանաչում, ինչպես նաև տուժող Մարինե Գրիգորյանը և Նաիրա Գևորգյանը հայտնեցին, որ այն իրենց բնակարանից հափշտակված համակարգիչն է` նշելով թե ինչպիսի հատկանիշներից են այն ճանաչում: Ավելին` զննությամբ պարզվեց, որ համակարգչում առկա են Մարինե Գրիգորյանի լուսանկարները և դրանում առկա ֆայլերը ներբեռնված են մինչև 2012 թվականի հուլիսի 17-ը, այսինքն` մինչև Ռոբերտ Հովսեփյանին մեղսագրվող արարքի կատարումը:
Իսկ ինչ վերաբերվում է նախնական քննության ընթացքում Նաիրա Գևորգյանին տուժող ճանաչելուն և նրան որպես տուժող հարցաքննելուն, իսկ վերջինի դստեր` Մարինե Գրիգորյանին, որպես վկա հարցաքննելուն, ապա Դատարանը նկատի ունենալով, որ սույն քրեական գործի դատական քննության ընթացքում նշված անճշտությունը վերացել է, այսինքն` Մարինե Գրիգորյանը ճանաչվել է տուժող, հետևապես նշվածը չի կարող համարվել քրեադատավարական օրենքի էական խախտում, քանի որ այն շտկվել է գործի դատական քննության ընթացքում:
3. Դատարանի իրավական վերլուծությունները.
Վերոգրյալ թույլատրելի ապացույցների հիման վրա Դատարանը գալիս է այն եզրահանգման, որ Ռոբերտ Կոնստանտինի Հովսեփյանը 2012 թվականի օգոստոսի 8-ից մինչև 24-ն ընկած ժամանակահատվածում ապօրինի մուտք է գործել Երևան քաղաքի Ավագ Պետրոսյան փողոցի 4-րդ շենքի 27-րդ բնակարան և գաղտնի հափշտակել Մարինե Գրիգորյանին պատկանող 80.000 (ութսուն հազար) ՀՀ դրամ արժողության «Ասուս» տեսակի նեթբուք համակարգիչ և չհստակեցված արժեքով արծաթյա զարդեր ու բիժուտերիա, այսինքն` Ռոբերտ Կոնստանտինի Հովսեփյանն ապօրինի մուտք գործելով բնակարան գաղտնի հափշտակել է Մարինե Գրիգորյանի զգալի չափերով գույքը:
Ապացուցված է Ռոբերտ Հովսեփյանի մեղավորությունը ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված արարքը կատարելու մեջ:
Ռոբերտ Հովսեփյանի անձը դրականորեն բնութագրող և պատասխանատվությունն ու պատիժը մեղմացնող հանգամանքներ սույն գործում առկա չեն:
Դատարանը միաժամանակ արձանագրում է, որ Ռոբերտ Հովսեփյանի պատասխանատվությունն ու պատիժը ծանրացնող հանգամանք է հանցանքները կատարելու ռեցիդիվը, քանի որ նա 2010 թվականի նոյեմբերի 19-ին դատապարտվել է ՀՀ քրեական օրենսգրքի 177-րդ հոդվածի 2-րդ մասի 2-րդ, 3-րդ և 4-րդ կետերով նախատեսված դիտավորյալ հանցագործություն կատարելու համար, որի դատվածությունը մարված չէ:
Կատարած արարքի համար ամբաստանյալ Ռոբերտ Հովսեփյանը ենթակա է քրեական պատասխանատվության և պատժի:
Դատարանը, հաշվի առնելով Ռոբերտ Հովսեփյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող, պատասխանատվությունը և պատիժը մեղմացնող հանգամանքների բացակայությունը, պատասխանատվությունն ու պատիժը ծանրացնող հանգամանքը, ինչպես նաև այն, որ ՀՀ քրեական օրենսգրքի 177-րդ հոդվածի 3-րդ մասի սանկցիայով որպես հիմնական պատիժ նախատեսված է միայն ազատազրկում, գտնում է, որ նրա նկատմամբ ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված արարք կատարելու համար պատիժ պետք է նշանակել ազատազրկման ձևով: Ընդ որում` ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված արարքի համար չպետք է նշանակել տվյալ հոդվածի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց: Ռոբերտ Հովսեփյանի պատժի կրման սկիզբը պետք է հաշվել 2012 թվականի հոկտեմբերի 3-ից, քանի որ Դատարանի վերոգրյալ հիմնավորմամբ այդ օրվանից նա գտնվում է արգելանքի տակ:
Դատարանը գտնում է, որ Ռոբերտ Հովսեփյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2012 թվականի դեկտեմբերի 20-ի որոշմամբ իրեղեն ապացույց ճանաչված «Ասուս» տեսակի նեթբուք համակարգիչը պետք է վերադարձնել տուժող Մարինե Մյասնիկի Գրիգորյանին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը ամբաստանյալ Ռոբերտ Հովսեփյանից ենթակա չեն բռնագանձման, քանի որ տուժողի կողմից իր գույքային շահերն անձամբ պաշտպանելու անհնարինության մասին տվյալները բացակայում են: Ավելին, վերոգրյալ հիմնավորմամբ իրեղեն ապացույց ճանաչված «Ասուս» տեսակի նեթբուք համակարգիչը պետք է վերադարձվի տուժող Մարինե Մյասնիկի Գրիգորյանին: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մասի 2-րդ և 4-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված ծախսեր սույն քրեական գործով առկա չեն, իսկ 2-րդ և 5-րդ կետերով նախատեսված դատական ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետով նախատեսված դատական ծախսին, ապա Դատարանը գտնում է, որ ամբաստանյալ Ռոբերտ Հովսեփյանից պետք է բռնագանձել թիվ 12-3447 փորձաքննության համար վճարվելիք գումարը` 20.610 (քսան հազար վեց հարյուր տաս) ՀՀ դրամ (հիմք` փորձագետի 2012 թվականի հոկտեմբերի 26-ի թիվ 12-3447 եզրակացությանը կից հաշիվ-ապրանքագիր հանդիսացող հանձնման-ընդունման արձանագրություն) և թիվ 12-4056 փորձաքննության համար վճարվելիք գումարը` 13.740 (տասներեք հազար յոթ հարյուր քառասուն) ՀՀ դրամ (հիմք` փորձագետի 2012 թվականի նոյեմբերի 8-ի թիվ 12-4056 եզրակացությանը կից հաշիվ-ապրանքագիր հանդիսացող հանձնման-ընդունման արձանագրություն):
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 138-րդ, 168-րդ, 238-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը

ՎՃՌԵՑ

Ռոբերտ Կոնստանտինի Հովսեփյանին մեղավոր ճանաչել ՀՀ քրեական օրենսգրքի 177-րդ հոդվածի 3-րդ մասի 1.1 կետով և պատիժ նշանակել ազատազրկում` 7 (յոթ) տարի ժամկետով, պատժի կրման սկիզբը հաշվելով 2012 թվականի հոկտեմբերի 3-ից:
Ռոբերտ Կոնստանտինի Հովսեփյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2012 թվականի դեկտեմբերի 20-ի որոշմամբ իրեղեն ապացույց ճանաչված «Ասուս» տեսակի նեթբուք համակարգիչը վերադարձնել տուժող Մարինե Մյասնիկի Գրիգորյանին:
Ռոբերտ Կոնստանտինի Հովսեփյանից, հօգուտ Հայաստանի Հանրապետության, որպես դատական ծախս, բռնագանձել 34.350 (երեսունչորս հազար երեք հարյուր հիսուն) ՀՀ դրամ:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` հրապարակելու օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ