Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

17 մայիսի 2013թ. ք. Երևան

ԵԿԴ-0257/01/12

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.


նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրողներ`
Երևան քաղաքի դատախազության
ավագ դատախազ Ա. Երիցյանի,

նույն դատախազության դատախազ Ա. Շահբազյանի,

պաշտպան Հ. Իսրայելյանի,

ամբաստանյալի օրինական
ներկայացուցիչ Ա. Տերյանի,

տուժող Ն. Նաջարյան,

տուժողի օրինական
ներկայացուցիչ Ռ. Նաջարյան,


դատարանում, դռնբաց դատական նիստում քննեց գործն ըստ մեղադրանքի
Գրիգոր Արտեմի Տերյանի`
ծնված 1996թ. մայիսի 21-ին Երևանում, հայ, Հայաստանի Հանրապետության /այսուհետ ՀՀ/ քաղաքացի, սովորում է Երևանի թիվ 3 ավագ դպրոցի 11-րդ դասարանում, նախկինում չդատված, չի աշխատում, բնութագրվում է դրական, հաշվառված է Երևանի Հանրապետության նրբանցքի թիվ 6 շենքի թիվ 4 բնակարանում, փաստացի բնակվում է Երևանի Բագրատունյաց 4-րդ փողոցի թիվ 12 տանը, կալանքի տակ չէ, մեղադրվում է ՀՀ քրեական օրենսգրքի 112-րդ հոդվածի 2-րդ մասի 6-րդ կետով։


Գործի դատավարական նախապատմությունը
Թիվ 13112612 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2012թ. մարտի 07-ին, ՀՀ քրեական օրենսգրքի 112-րդ հոդվածի 1-ին մասով, Ռ. Գաբոյանի կողմից Ն. Նաջարյանի առողջությանը դիտավորությամբ կյանքին վտանգ սպառնացող ծանր վնաս հասցնելու դեպքի առթիվ։
2012թ. ապրիլի 19-ի թիվ 13112612 քրեական գործն ուղարկվել է ՀՀ ոստիկանության ՔԳՎ Երևան քաղաքի քննչական վարչություն և նույն օրվա որոշմամբ ընդունվել է ծանր հանցագործությունների քննության բաժնի քննիչի վարույթ։
Քննիչի 20.12.2012թ. որոշմամբ, թիվ 13112612 քրեական գործից անջատվել է Գ. Տերյանի հետ Ն. Նաջարյանին ծեծի ենթարկած և դիտավորությամբ վերջինիս առողջությանը ծանր վնաս պատճառած անձանց` չպարզված հանցակիցների վերաբերյալ մասը, այն առանձնացվել է առանձին վարույթ և անջատված մասին շնորհվել է թիվ 13112612/1 համարը։
Անչափահաս ամբաստանյալ Գրիգոր Արտեմի Տերյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով հետևյալ արարքի համար. «որ նա 2012թ. փետրվարի 20-ին ժամը 14.00-ից մինչև 14.30-ն ընկած ժամանակահատվածում Երևան քաղաքի Չայկովսկու փողոցի թիվ 15 շենքի մոտ Աննա Զարգարյանի վերաբերյալ վատ արտահայտվելու հարցի շուրջ վիճաբանել է վերջինիս ընկեր Նարեկ Ռոմանի Նաջարյանի հետ, որի ընթացքում անհայտ անձանց հետ` խմբի կազմում, Ն. Նաջարյանի առողջությանը ծանր վնաս պատճառելու նախնական միասնական դիտավորությամբ ձեռքերով հարվածներ են հասցրել վերջինիս գլխին, որի արդյունքում Ն. Նաջարյանի առողջությանը պատճառվել է կյանքին վտանգ սպառնացող ծանր վնաս` դեմքի շրջանի քերծվածքների, ենթամաշկային արյունահավաքների, սալջարդ վերքերի, ձախ աչքի սպիտակուցային արյունազեղման, քթի ոսկրերի կոտրվածքի, գլխուղեղի աջ ծոծորակայինի և գագաթային բլթերում, ուղեղիկի աջ կիսագնդում կոնտուզիոն-հեմոռագիկ օջախներով, ենթաոստայնենային արյունազեղումներով` գլխուղեղի ծանր աստիճանի սալջարդ վնասվածքների ձևով, որոնցից յուրաքանչյուրը առանձին վերցրած Ն. Նաջարյանի առողջությանը պատճառել է ծանր վնաս։»։
26.12.2012թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Անչափահաս տուժող Նարեկ Ռոմանի Նաջարյանը, 2009թ.-ից սովորելով Երևանի «Մխիթար Սեբաստացի» կրթահամալիրում` 2011թ. աշնանից մտերմացել և ընկերություն է արել նույն կրթահամալիրի սան, վկա Աննա Դավիթի Զարգարյանի հետ։ Նույն ժամանակահատվածում Աննա Զարգարյանի ընկերուհի, վկա Նարե Արմենի Զաքարյանը պարբերաբար Ա. Զարգարյանին հայտնել է, որ իր ընկեր, վկա Էդգար Արմենի Ֆրանգյանը իրեն չի թողնում շփվել նրա հետ, քանի որ Է. Ֆրանգյանի ընկեր, անչափահաս ամբաստանյալ Գրիգոր Արտեմի Տերյանը հանդիսանալով Աննա Զարգարյանի նախկին ընկերը` վատ է արտահայտվել վերջինիս մասին։
2012թ. փետրվարին, անչափահաս տուժող Նարեկ Նաջարյանը տեղեկանալով վերոհիշյալ խնդրի մասին` մտադրվել է հանդիպել Էդգար Ֆրանգյանի և Գրիգոր Տերյանի հետ` այդ հարցը պարզաբանելու և խնդրին լուծում տալու համար։ Համացանցային կայքերի, ապա հեռախոսազանգերի միջոցով անչափահաս տուժող Ն. Նաջարյանը պայմանավորվել է անչափահաս ամբաստանյալ Գ. Տերյանի հետ հանդիպել վերջինիս ուսման վայրի` Երևանի թիվ 3 ավագ դպրոցի մոտակայքում։
2012թ. փետրվարի 20-ին, ժամը 14.00-ի սահմաններում, անչափահաս տուժող Ն. Նաջարյանն իր ընկերներ, վկաներ Ռաֆայել Դիլոյանի, Գրիգոր Սահակյանի և Հովսեփ Ավագյանի ուղեկցությամբ գնացել է Երևանի թիվ 3 ավագ դպրոց, որի մոտակայքում հանդիպել է անչափահաս ամբաստանյալ Գրիգոր Արտեմի Տերյանին և վերջինիս` քննությամբ չպարզված ընկերներին։ Նույն օրը, ժամը 14.00-ից մինչև 14.30-ն ընկած ժամանակահատվածում, Երևան քաղաքի Չայկովսկու փողոցի թիվ 15 շենքի մոտ, անչափահաս ամբաստանյալ, այդ պահին դեռևս 15 տարեկան Գրիգոր Արտեմի Տերյանը և նրա` գործով չպարզված ընկերները վիճաբանել են անչափահաս տուժող Նարեկ Նաջարյանի հետ, որի ընթացքում Գրիգոր Տերյանը և նրա ընկերները Ն. Նաջարյանի առողջությանը ծանր վնաս պատճառելու նախնական միասնական դիտավորությամբ, ձեռքերով, առնվազն 5-ից 6 հարվածներ են հասցրել վերջինիս գլխին, որի արդյունքում Ն. Նաջարյանի առողջությանը պատճառվել է կյանքին վտանգ սպառնացող ծանր վնաս` դեմքի շրջանի քերծվածքների, ենթամաշկային արյունահավաքների, սալջարդ վերքերի, ձախ աչքի սպիտակուցային արյունազեղման, քթի ոսկրերի կոտրվածքի, գլխուղեղի աջ ծոծորակայինի և գագաթային բլթերում, ուղեղիկի աջ կիսագնդում կոնտուզիոն-հեմոռագիկ օջախներով, ենթաոստայնենային արյունազեղումներով` գլխուղեղի ծանր աստիճանի սալջարդ վնասվածքների ձևով, որոնցից յուրաքանչյուրը առանձին վերցրած Ն. Նաջարյանի առողջությանը պատճառել է ծանր վնաս։
Անչափահաս ամբաստանյալ Գրիգոր Արտեմի Տերյանը ծնվել է 1996թ. մայիսի 21-ին Երևանում, բնակվում է ծնողների հետ միասին։ Նրա դաստիարակութ¬յամբ և խնամքով զբաղվում են ծնողները, մայրը` Նազիկ Տերյանը և հայրը` Արտեմ Տերյանը։ Նրանց ընտանիքը բավարար չափով նյութապես ապահովված է, Գ. Տերյանի կյանքի և դաստիարակության պայմանները բարվոք են, հոգեկան զարգացման աստիճանը և ընդհանուր զարգացման վիճակը` բավարար։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Գրիգոր Տերյանը նախկինում դատված չի եղել, բնութագրվում է դրական, իրեն վերագրվող արարքը կատարել է` լինելով անչափահաս, տասնհինգ տարեկան հասակում, տուժողի հետ հաշտվել են և հանցագործությամբ տուժողին պատճառված գույքային վնասը` 500.000 ՀՀ դրամ գումարի չափով, կամովին հատուցել է։
Քրեական գործի նախաքննության ընթացքում, ՀՀ «Փորձաքննությունների ազգային բյուրո» և «Դատաբժշկական գիտագործնական կենտրոն» պետական ոչ առևտրային կազմակերպություններում կատարվել են դատաբժշկական և դատաբժշկական ու դատահետքաբանական համալիր փորձաքննություններ, որոնց ընդհանուր արժեքը կազմել է 117.402 /հարյուր տասնյոթ հազար չորս հարյուր երկու/ ՀՀ դրամ գումար։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Անչափահաս ամբաստանյալ Գրիգոր Արտեմի Տերյանի ցուցմունքներով այն մասին, որ առաջադրված մեղադրանքում իրեն մեղավոր է ճանաչում մասնակիորեն։ 2012թ. փետրվարի 20-ին, դասերից հետո, Երևանի թիվ 3 ավագ դպրոցի մոտակայքում ինքը հանդիպել է Նարեկ Նաջարյանին և վերջինիս ընկերներին։ Ճշտելով, թե ով է Ն. Նաջարյանը` ինքը աջ ձեռքի բռունցքով մեկ հարված է հասցրել Ն. Նաջարյանի դեմքին` ձախ այտի շրջանում, ինչից վերջինս վայր է ընկել, իսկ ինքը դիմել է փախուստի։ Ն. Նաջարյանին հարվածել է, քանի որ վերջինս հեռախոսազրույցի ընթացքում իրեն հայհոյել է։ Թե ով է եղել այդ միջադեպի մասնակից սպիտակ բաճկոնով տղան` ինքը չգիտի։ Հնարավոր է, որ նա եղել է այնտեղ գտնվողներից մեկը, քանի որ ինքը միայնակ է եղել։ Հնարավոր է, որ բացի իրենից` Նարեկին հարվածել են նաև նրա ընկերները, քանի որ Նարեկն իրեն ընդհանրապես վատ է պահել։ Մինչ այդ, մի քանի անգամ հեռախոսազրույց է ունեցել Նարեկի հետ։ Վերջինս իրեն հարցրել է, թե ինչու է վատ արտահայտվել Աննայի մասին և պայմանավորվել են հանդիպել, սակայն նա նախորդ հանդիպումներին չի եկել։
/դատական նիստի արձանագրություն, հատոր 1, գ.թ. 143-145, հատոր 2, գ.թ. 23-27, 114-115, 236-237, հատոր 3, գ.թ. 358-359/
Անչափահաս տուժող Նարեկ Ռոմանի Նաջարյանի նախաքննական ցուցմունքներով այն մասին, որ 2009թ.-ից հանդիսացել է Երևանի «Մխիթար Սեբաստացի» կրթահամալիրի աշակերտ։ 2011թ. աշնանից մտերմություն, ապա ընկերություն է արել նույն կրթահամալիրի աշակերտուհի Աննա Դավիթի Զարգարյանի հետ։ 2012թ. փետրվարին տեղեկացել է, որ Աննա Զարգարյանի հետ 3-րդ դպրոցում նախկինում սովորած և մտերմություն արած Գրիգոր Արտեմի Տերյանը, որին Գրիշ են կոչում, վատ է արտահայտվել Աննայի մասին։ Համացանցային կայքերի, ապա հեռախոսազանգերի միջոցով կապնվել է Գրիգորի հետ և պայմանավորվել են հանդիպել։
2012թ. փետրվարի 20-ին, ժամը 14.00-ի սահմաններում, իր ընկերներ Գրիգոր Սահակյանի, Ռաֆայել Դիլոյանի, Հովսեփ Ավագյանի հետ գնացել է Երևանի թիվ 3 ավագ դպրոց, որի դիմաց երկու անծանոթ, տեսքից շուրջ 18-ից 19 տարեկան տղաներ դիմավորել են իրեն և առաջարկել են զրուցելու համար առանձնանալ հանգիստ վայր։ Քայլելով մի փոքր հեռու` տեսել է հավաքված շուրջ երեսուն երիտասարդ տղաների, որոնցից իրեն մոտեցել և ծանոթացել է Գրիգոր Տերյանը։ Ճշտելով, որ ինքն է Նարեկը և ինքն է հեռախոսազրույց ունեցած տղան` Գրիգորը բռունցքով հարվածել է իր դեմքին` ձախ այտի և աչքի շրջանում, ինչից ինքն ընկել և ուշաթափ է եղել։ Հետագայում արթնացել է հիվանդանոցում։
/հատոր 1. գ.թ. 80-82, 164-166, հատոր 2, գ.թ. 130-132, հատոր 3, գ.թ. 301/
Անչափահաս տուժող Ն. Նաջարյանն իր ցուցմունքը պնդել է նաև անչափահաս ամբաստանյալ Գ. Տերյանի և վկա Ռ. Գաբոյանի հետ առերես հարցաքննությունների ժամանակ։
/հատոր 3, գ.թ. 38, 302/
Վկա Աննա Դավիթի Զարգարյանի ցուցմունքներով այն մասին, որ 2010-2011թթ. ուսումնական տարում հաճախել է Երևանի թիվ 3 ավագ դպրոց, որտեղ մտերիմ հարաբերությունների մեջ է գտնվել նույն դպրոցի աշակերտ Գրիգոր Արտեմի Տերյանի հետ։ 2011թ. տեղափոխվել է Երևանի «Մխիթար Սեբաստացի» կրթահամալիր, որտեղ աշնանից սկսած ընկերություն է արել նույն կրթահամալիրի աշակերտ Նարեկ Ռոմանի Նաջարյանի հետ։
2011թ. աշնանից իր ընկերուհի Նարե Զաքարյանը պարբերաբար իրեն ասել է, որ իր ընկեր Էդգարը դեմ է իրենց շփմանը, քանի որ վերջինիս ընկեր Գրիգոր Տերյանը վատ է արտահայտվել իր մասին։ Տեղեկանալով այդ մասին` ինքը փորձել է «Համադասարանցիներ» համացանցային կայքով Էդգարի հետ պարզաբանել, թե ինչու է խոչընդոտում իր և Նարեի շփմանը։ Նարեկը նույնպես օգտվել է տվյալ կայքից և տեղեկանալով այդ մասին` 2012թ. փետրվարին, նշված կայքի միջոցով կապ է հաստատել Էդգարի և Գրիգորի հետ, պայմանավորվել են վերջիններիս հետ հանդիպել և պարզաբանել այդ հարցը։
2012թ. փետրվարի 20-ի առավոտյան, սովորականի պես կրթահամալիրում հանդիպել է Նարեկին։ Վերջինս ասել է, որ իր ընկերներ Գրիգորի և Ռաֆայելի հետ կեսօրից հետո պետք գնա թիվ 3 դպրոց` Գրիգորին և Էդգարին հանդիպելու համար։ Դրանից հետո միայն երեկոյան է կարողացել կապնվել Նարեկի հետ։ Վերջինս հայտնել է, որ իրեն ծեծի են ենթարկել և գտնվում է հիվանդանոցում։ Նա պատմել է նաև, որ հարվածողները եղել են շատ և մահակներով, որոնցից ճանաչել է միայն Գրիգոր Տերյանին, որն առաջինն է հարվածել և ծեծկռտուք է սկսվել։ Նույն կամ հաջորդ օրը խոսել է նաև Նարեի հետ։ Վերջինս հայտնել է, որ Էդգարն իրեն պատմել է, որ կռվից հետո մի հոգու հիվանդանոց են տարել, իսկ երկուսին` ոստիկանություն։ Այդ մասին իրեն պատմել են նաև Նարեկի ընկերներ Հովսեփը և Գրիգորը։
/դատական նիստի արձանագրություն, հատոր 1, գ.թ. 107-110, հատոր 2, գ.թ. 50-51, հատոր 3, գ.թ. 113/
Վկա Արտեմ Գրիգորի Տերյանի ցուցմունքներով այն մասին, որ իր որդի Գրիգոր Տերյանն իրեն պատմել է, որ 2012թ. փետրվարին, դպրոցում կռիվ է եղել, որի հետ ինքը կապ չունի և դրա համար իրեն ոստիկանություն են հրավիրում։ Հետագայում Գրիգորը խոստովանել է, որ ինքն է կռիվ արել` չհայտնելով կռվի մանրամասները։ Դեպքից հետո տուժողին փոխհատուցել են 500.000 ՀՀ դրամ գումար։
/դատական նիստի արձանագրություն, հատոր 2, գ.թ. 45/
Վկա Հովսեփ Հրաչյայի Ավագյանի ցուցմունքներով այն մասին, որ 2012թ. փետրվարի վերջերին, ժամը 14.00-ի սահմաններում, իր ընկեր Նարեկ Նաջարյանի և վերջինիս ընկերների, այդ թվում` Ռաֆայելի և Գրիգորի հետ գնացել են Երևանի թիվ 3 դպրոց` պարզելու համար, թե ինչու են վիրավորել Նարեկի ընկերուհուն։ Դպրոցի մոտ իրենց ոչ ոք չի սպասել։ Զանգը տալուց հետո դպրոցից դուրս են եկել 10-ից ավելի անծանոթ երիտասարդ տղաներ, որոնցից մեկը ներկայացել է որպես Գրիշ։ Ինքը մի փոքր հեռու է կանգնած եղել, երբ Գրիշը խոսակցության ժամանակ բռունցքով հարվածել է Նարեկի դեմքին։ Այդ ժամանակ ինքը մոտեցել է, սակայն ասել են, որ ոստիկաններ են գալիս և բոլորը փախել են։ Ինքը ձայներ լսելով` նույնպես դիմել է փախուստի։ Մինչև փախչելը հասցրել է երկու հոգու հարվածել։ Ինքը միայնակ է փախել, ուստի մնացած իրադարձությունները հնարավոր է, որ տեսած չլինի։ Նրանց ձեռքերում մահակներ չի տեսել։
/դատական նիստի արձանագրություն, հատոր 2, գ.թ. 83-86, հատոր 3, գ.թ. 76/
Վկա Ռաֆայել Վահրամի Դիլոյանի նախաքննական ցուցմունքներով այն մասին, որ 2012թ. փետրվարի 20-ին, իրեն և իր ընկեր Գրիգոր Սահակյանին ընդհանուր ընկեր Նարեկ Նաջարյանը զանգահարել և կանչել է Երևանի թիվ 3 դպրոցի մոտ` ասելով «թեմա կա»։ Երբ հասել են նշված դպրոցի մոտ` փոքր-ինչ ներս ընկած մասում տեսել է, որ ավելի քան վեց անծանոթ երիտասարդ տղաներ սկսել են հարվածել Նարեկին։ Տեսել է, թե ինչպես է սպիտակ բաճկոնով մի տղա հարվածում Նարեկին, որից Նարեկը վայր է ընկել։ Դրանից հետո Նարեկը ոտքի է կանգնել, սակայն մեկ այլ տղա կրկին հարվածել է նրան, որից Նարեկը ընկել է, իսկ հետո դիմել է փախուստի։ Այնուհետև սպիտակ բաճկոնով տղան Նարեկին հետևից հարվածել և տապալել է գետնին, ապա դիմել է փախուստի։ Ինքը վազել է Նարեկին ծեծի ենթարկած երիտասարդների հետևից, սակայն ոչ ոքի չի կարողացել բռնել։ Վերադարձել է Նարեկի մոտ, ով ուշագնաց ընկած է եղել։ Եկել է շտապօգնության ավտոմեքենան և Նարեկին հիվանդանոց տարել, իսկ իրեն և Գրիգորին ոստիկանները տարել են ոստիկանություն։ Հետագայում տեղեկացել է, որ Նարեկի ընկերուհի Աննային վիրավորել են, որի պատճառով Նարեկը գնացել է 3-րդ դպրոց` այդ հարցը պարզաբանելու համար։
/հատոր 1, գ.թ. 48-53, հատոր 2, գ.թ. 179-182, հատոր 3, գ.թ. 312-313/
Վկա Ռաֆայել Վահրամի Դիլոյանը դատարանում ցուցմունք տվեց այն մասին, որ Նարեկին հարվածել են երեք անգամ, որից երկուսը հարվածել է սպիտակ բաճկոնով տղան, իսկ մյուս հարվածը չի նկատել, թե ում կողմից է եղել։ Ինքը քննիչի մոտ չի ասել, որ Ռուբոն հարվածել է Նարեկին։ Քննիչի մոտ այնքան որ մի բան ասել է և արագ հեռացել, քանի որ իր տան անդամները չեն իմացել, թե ինքը որտեղ է գտնվում։ Ինքն ամբաստանյալ Գրիգոր Տերյանին առաջին անգամ է տեսնում։
/դատական նիստի արձանագրություն/
Վկա Գրիգոր Գագիկի Սահակյանի ցուցմունքներով այն մասին, որ 2012թ. փետրվարի 20-ին, ժամը 13.00-ի սահմաններում, իր ընկեր Ռաֆայել Դիլոյանի հետ գտնվել է «Մխիթար Սեբաստացի» կրթահամալիրի մոտ։ Իրենց ընդհանուր ընկեր Նարեկ Նաջարյանը զանգահարել է և հայտնել, որ ընկերուհուն վիրավորել են և խնդրել է գնալ Երևանի թիվ 3 դպրոցի մոտ։ Ժամը 14.00-ի սահմաններում հասել են այդ դպրոցի մոտ գտնվող նեղ փողոց։ Այնտեղ տեսել է, որ շուրջ 10-ից 15 անծանոթ երիտասարդ տղաներ խառը հարվածներ են հասցնում և ծեծի ենթարկում Նարեկին։ Երբ ինքը և Ռաֆայելը մոտեցել են նրանց` Նարեկը դիմել է փախուստի, որի ընթացքում մի անծանոթ երիտասարդ հետևից հարվածել և գետնին է գցել Նարեկին, ինչից վերջինս ուշագնաց է եղել։ Այնուհետև այդ անծանոթները փախել են, իսկ ինքը մնացել է Նարեկի մոտ` օգնություն ցույց տալու համար։ Որոշ ժամանակ անց շտապօգնություն է եկել և Նարեկին հիվանդանոց տարել, իսկ իրեն և Ռաֆայելին ոստիկանները տարել են ոստիկանություն։ Հիվանդանոցում տեղեկացել է, որ Նարեկի ընկերուհի Աննային վիրավորելու համար Նարեկը գնացել է 3-րդ դպրոց` այդ հարցը պարզաբանելու համար։
/դատական նիստի արձանագրություն, հատոր 1, գ.թ. 61-64/
Վկա Լևիկ Ստեփանի Գրիգորյանի նախաքննական ցուցմունքով այն մասին, որ իր թոռ Լևոն Հովհաննեսի Գրիգորյանը, որը սովորում է Երևանի թիվ 3 ավագ դպրոցում, պատմել է, որ իրենց դպրոցի աշակերտ Գրիգոր Տերյանը 2012թ. փետրվարին դպրոցի մոտակայքում ինչ-որ աղջկա պատճառով կռիվ է արել և դպրոցից շատ աշակերտներ են այդտեղ եղել։
/հատոր 2, գ.թ. 246-247/
Վկա Լևիկ Ստեփանի Գրիգորյանը դատարանում ցուցմունք տվեց այն մասին, որ ինքը քննիչին չի հայտնել, որ իր թոռն իրեն պատմել է Գրիգորի կողմից կռիվ անելու մասին։ Ինքը միայն իր թոռանն ասել է, որ քիչ շփվի Գրիգորի հետ, քանի որ վերջինս շատ ակտիվ երեխա է։
Նախագահողի այն հարցին, թե ինչու է իր նախաքննական ցուցմունքում գրել Գրիգորի կողմից կռիվ անելու մասին լսած լինելու մասին, վկան որևէ պատասխան չտվեց։
/դատական նիստի արձանագրություն/
Վկա Շողեր Մռավի Ջալալյանի ցուցմունքներով այն մասին, որ հանդիսանում է Երևանի թիվ 3 ավագ դպրոցի ծնողկոմիտեի նախագահը։ Այդ դպրոցում սովորում է նաև իր որդի Հենրիկ Սարգսյանը։ 2012թ. մարտին, դպրոցի ընդհանուր խոսակցություններից տեղեկացել է, որ իր որդու զուգահեռ դասարանի աշակերտ Գրիգոր Տերյանը դպրոցի մոտ, մեկ այլ տեղից եկած տղաների հետ կռիվ է արել։ Գ. Տերյանը բնութագրվում է դրական, դպրոցի ամենալավագույն աշակերտներից է և ակտիվ մասնակցություն է ունենում դպրոցում կազմակերպված միջոցառումներին։
/դատական նիստի արձանագրություն, հատոր 3, գ.թ. 215-216/
Վկա Զավեն Հովհաննեսի Առաքելյանի ցուցմունքներով այն մասին, որ սովորում է Երևանի թիվ 3 ավագ դպրոցում։ Գրիգոր Տերյանն իր դասընկերն է։ 2012թ. փետրվարի 20-ին, ժամը 14.00-ից 14.30-ի սահմաններում, դպրոցից դուրս գալու ժամանակ, երաժշտական դպրոցի կողմից ձայներ է լսել և արագ գնացել է այդ կողմ։ Տեսել է դեպի «Վերնիսաժ» և Ալավերդյան փողոցի կողմ փախչող 4-ից 5 տղաների, որոնցից ճանաչել է միայն Գրիշին։ Նրանց ձեռքերին մահակներ կամ այլ առարկաներ չի նկատել։ Հաջորդ օրը դպրոցում հանդիպել է Գրիշին, որն իրեն պատմել է, որ ինչ-որ «բանգլադեշցի» Նարեկի հետ հեռախոսով վիճել է Աննա անունով մի աղջկա պատճառով, որից հետո Նարեկը և նրա ընկերներն անսպասելիորեն եկել են իրենց դպրոց և հանդիպել նրա հետ։ Վերջինս հարվածել է Նարեկին, որն էլ մայթից վայր է ընկել։
/դատական նիստի արձանագրություն, հատոր 3, գ.թ. 309-310/
Վկա Վոլոդյա Վաղարշակի Մուրադյանի ցուցմունքներով այն մասին, որ սովորում է Երևանի թիվ 3 ավագ դպրոցում։ Գրիգոր Տերյանն իր զուգահեռ դասարանից է։ Դպրոցի ընդհանուր խոսակցություններից լսել է, որ Գրիգորը կռիվ է արել։ Ինքը զանգահարել է նրան և հետաքրքրվել այդ մասին։ Գրիգորը միայն կարճ պատասխանել է, որ կռիվ է եղել և այլ մանրամասներ չի պատմել։
/դատական նիստի արձանագրություն, հատոր 3, գ.թ. 317-318/
Վկա Արտակ Կարենի Բադալյանի նախաքննական ցուցմունքով այն մասին, որ սովորում է Երևանի թիվ 3 ավագ դպրոցում։ Գրիգոր Տերյանն իր զուգահեռ դասարանից է։ Դպրոցի ընդհանուր խոսակցություններից լսել է, որ Գրիգորը կռիվ է արել ինչ-որ աղջկա պատճառով։ Այդ կռվին ներկա են եղել նաև Գ. Էմինի դպրոցի աշակերտ Ռուբիկ Գաբոյանը և Գրիգորի ընկեր ու համադասարանցի Զավենը։ Գրիգորին հարցրել է այդ կռվի մասին։ Վերջինս պատասխանել է, որ կռիվ են արել, սակայն մանրամասները չի պատմել։
/հատոր 3, գ.թ. 319-320/
Վկա Արտակ Կարենի Բադալյանը դատարանում ցուցմունք տվեց այն մասին, որ ինքը քննիչին չի ասել, որ Զավենը և Ռուբիկը մասնակցել են կռվին։ Քննիչը պարզապես հարցրել է, թե ճանաչում է նրանց, ինքն էլ պատասխանել է, որ ճանաչում է։ Չի հիշում Ռուբիկի և Զավենի մասին ինքը լսել է, թե ոչ։
/դատական նիստի արձանագրություն/
Վկա Վահագն Հայկի Սանոսյանի նախաքննական ցուցմունքով այն մասին, որ սովորում է Երևանի թիվ 3 ավագ դպրոցում։ 2010թ. փետրվարի 20-ին, ժամը 14։00-ի սահմաններում գտնվել է դպրոցում և տեղեկացել է, որ իրենց դպրոցի աշակերտ Գրիգոր Տերյանը, որն իրենից մեկ դասարան ցածր է, կռիվ պետք է անի ինչ-որ մեկի հետ։ Դասերից հետո միայնակ քայլել է դեպի դպրոցի հետնամաս` անշարժ գույքի կադաստրի շենքի մոտ։ Տեսել է շուրջ իր տարիքի 30-ից 40 հավաքված երիտասարդների, որոնց մեջ եղել են Գրիգորը և նրա տաս համադասարանցիները, որոնց անուններով չգիտի, ինչպես նաև շուրջ տաս անծանոթ երիտասարդներ, որոնք եղել են հակառակ կողմից։ Գրիգորը խոսել է այդ տղաների հետ և կարճ ժամանակ անց աջ ձեռքի բռունցքով հարվածել է իր դիմաց կանգնած տղայի դեմքին, ինչից վերջինս վայր է ընկել։ Սկսվել է երկկողմանի կռիվ, որը տևել է 1-ից 2 րոպե։
Հաջորդ օրը, առավոտյան, Գրիգորը դպրոցում տեսնելով իրեն` գլուխ գովելով պատմել է, որ այն տղային, ում ինքը հարվածել է և գետնին է գցել, տղաներով այն աստիճանի են ծեծել, որ հետո նրան հիվանդանոց են տարել։
/հատոր 3, գ.թ. 299-300/
Վկա Վահագն Հայկի Սանոսյանը դատարանում ցուցմունք տվեց այն մասին, որ չի լսել, որ Գրիգորը պետք է կռիվ անի։ Չի տեսել նաև, որ Գրիգորը հարվածած լինի ինչ-որ մեկին։ Դեպքից հետո Գրիգորին չի տեսել։ Դեպքի վայրում զենք, մահակ կամ դանակ չի տեսել։ Իր նախաքննական ցուցմունքը գրել է քննիչի թելադրանքով։
/դատական նիստի արձանագրություն/
Վկա Ռոման Ֆեդյայի Նաջարյանի նախաքննական ցուցմունքներով այն մասին, որ 2012թ. փետրվարի 20-ին, իր որդի Նարեկ Նաջարյանին ծեծի են ենթարկել, որի արդյունքում վերջինս հայտնվել է հիվանդանոցում։ Տեղեկացել է, որ միջադեպը տեղի է ունեցել Նարեկի ընկերուհի Աննա Զարգարյանին նեղացնելու հետ կապված։ Նարեկը գնացել է Երևանի թիվ 3 դպրոց, որտեղ հանդիպել է անծանոթ երիտասարդ տղաների։ 18-ից 19 տարեկան երկու տղաներ խոսելու նպատակով Նարեկին տարել են նշված դպրոցի հետնամաս, որտեղ նրան ծեծի են ենթարկել։
/հատոր 1. գ.թ. 85-86, հատոր 2, գ.թ. 126-127/
Դատաբժշկական փորձաքննության 2012թ. մարտի 01-ի թիվ 227/հ եզրակացությամբ, որի համաձայն` «Ն. Նաջարյանի մարմնական վնասվածքները` դեմքի շրջանի քերծվածքների, ենթամաշկային արյունահավաքների, սալջարդ վերքերի` ներկայիս սպիների, ձախ աչքի սպիտակուցաթաղանթի արյունազեղման, քթի ոսկրերի կոտրվածքի, գլխուղեղի աջ ծոծրակային և գագաթային բլթերում, ուղեղիկի աջ կիսագնդում կոնտուզիոն-հեմոռագիկ օջախներով, ենթաոստայնենային արյունազեղումներով` գլխուղեղի ծանր աստիճանի սալջարդի ձևով, հասցվել են` բութ, կոշտ առարկաներով, հնարավոր է նշված ժամկետում և հանգամանքներում, և պատճառվել է առողջությանը ծանր վնաս` կյանքին վտանգ սպառնացող։ Վերոնշյալ վնասվածքների առկայության պայմաններում, հնարավոր է, որ Ն. Նաջարյանն ունենար հիշողության որոշակի կորուստ։»։
/հատոր 1, գ.թ. 24-25/
Դատաբժշկական փորձաքննության 2012թ. մարտի 24-ի թիվ 304/հ եզրակացությամբ, որի համաձայն՝ «Ն. Նաջարյանի մարմնական վնասվածքները` դեմքի շրջանի քերծվածքների, ենթամաշկային արյունահավաքների, սալջարդ վերքերի` ներկայիս սպիների, ձախ աչքի սպիտակուցաթաղանթի արյունազեղման, քթի ոսկրերի կոտրվածքի, գլխուղեղի աջ ծոծրակային և գագաթային բլթերում, ուղեղիկի աջ կիսագնդում կոնտուզիոն-հեմոռագիկ օջախներով, ենթաոստայնենային արյունազեղումներով` գլխուղեղի ծանր աստիճանի սալջարդի ձևով, հասցվել են բութ, կոշտ առարկաներով, հնարավոր է նշված ժամկետում և հանգամանքներում, հնարավոր չէ վայր ընկնելու հետևանքով, միմյանցից տարանջատել հնարավոր չէ և պատճառվել է առողջությանը ծանր վնաս` կյանքին վտանգ սպառնացող։ Վերը նշված մարմնական վնասվածքները ստանալու պահին Ն. Նաջարյանը տարածության մեջ կարող էր գտնվել ցանկացած` վնասվածքների պատճառումը չբացառող դիրքերում, կոնկրետ վնասվածքները ստանալու պահին մարմնի տվյալ մակերեսներով ուղղված դեպի ազդող բութ առարկան /ները/։»։
/հատոր 1, գ.թ. 113-114/
Դատաբժշկական ու հետքաբանական համալիր փորձաքննության 2012թ. հուլիսի 19-ի թիվ 12-1571 եզրակացությամբ, որի համաձայն`
«I-VII. Ըստ ներկայացված բժշկական փաստաթղթերի` «Սուրբ Աստվածամայր» ԲԿ-ի ստացիոնար հիվանդի հմ. 1020/75/105 բժշկական քարտի և դատաբժշկական փորձաքննության թիվ 227/հ և թիվ 304/հ «Փորձագետի եզրակացություններ»-ի տվյալների, սույն փորձաքննության իրականացման շրջանակներում կատարված հետազոտությունների արդյունքների` Նարեկ Նաջարյանի մոտ եղել են հետևյալ մարմնական վնասվածքները. փակ գանգուղեղային վնասվածք` գլխուղեղի ծանր աստիճանի սալջարդ` աջ գագաթային և ծոծրակային բլթերում և ուղեղիկի աջ կիսագնդում կոնտուզիոն-հեմոռագիկ օջախների, գլխուղեղի այտուցի առաջացումով, ենթաոստայնենային արյունազեղում, քթոսկրերի կոտրվածք, արյունահավաքներ և տրավմատիկ այտուց ձախից վերին և ստորին կոպերի, դեմքի ձախ կեսի շրջաններում, ենթակոնյունկտիվալ արյունազեղում ձախ ակնագնդի դրսային կեսի շրջանում, մեկական սալջարդ վերքեր ձախից ստորհոնքային, ձախ այտային և վերին շրթունքի ձախ կեսի մաշկի և լորձաթաղանթի շրջաններում, քերծվածք ձախ այտային շրջանում, որոնց չափային և մյուս տվյալները ըստ հնարավոր նկարագրությունների նշված են սույն եզրակացության «դատաբժշկական մաս» բաժնում։ Նշված մարմնական վնասվածքները պատճառվել են սահմանափակ մակերես ունեցող բութ կոշտ առարկաների կամ գործիքների բազմակի` առնվազն 5-6 և ավելի ներգործություններով, որոնց վնասող ուժերը տեղակայվել են Ն. Նաջարյանի գլխի նշված շրջաններում։ Ինչ վերաբերում է առաջնային հարվածից առաջացած վնասվածքի որոշմանը, ապա տվյալ դեպքում եղած փորձագիտական չափանիշներով դրա վերաբերյալ ստույգ եզրահանգում կատարել հնարավոր չէ։ Ելնելով Ն. Նաջարյանի մոտ եղած մարմնական վնասվածքների բնույթից և տեղակայությունից, դրանց ծանրության աստիճանը միմյանցից տարանջատել հնարավոր չէ, որոնք նրա առողջությանը պատճառել են ծանր վնաս` կյանքի համար վտանգավորության աստիճանով։
Որոշման պահանջի համաձայն սույն եզրակացությանը կցվում է Ն. Նաջարյանի մոտ եղած գլխի շրջանի վերքերի ու քերծվածքի սույն փորձաքննության իրականացման ընթացքում հայտնաբերված ապաքինման հետքերի` սպիների և ապապիգմենտավորված տեղամասի սխեմատիկ պատկերը «1» թերթից, միևնույն ժամանակ հարկ է նշել, որ տվյալ սխեմայում Ն. Նաջարյանի մոտ եղած և մինչ սույն փորձաքննության իրականացումն անհետք ապաքինված մյուս մարմնական վնասվածքների սխեմատիկ պատկերումը հնարավոր չէ` դրանց բավարար նկարագրության բացակայության պատճառով։
VIII, IX. Փորձաքննությանը ներկայացված Նարեկ Նաջարյանի հագուստների վրա մեխանիկական բնույթի վնասվածքներ չեն հայտնաբերվել։»։
/հատոր 3, գ.թ. 226-234/
Դատաբժիշկ-փորձագետ Արգամ Նորայրի Հովսեփյանի նախաքննական ցուցմունքներով այն մասին, որ Նարեկ Նաջարյանի մոտ առաջացել է փակ գանգուղեղային վնասվածք՝ գլխուղեղի ծանր աստիճանի սալջարդի առաջացումով և քանի որ պատճառված բոլոր մարմնական վնասվածքները տեղակայված են Ն. Նաջարյանի գլխի շրջանում, որտեղ ներդրված վնասող ուժերից կարող են առաջանալ և արտաքին մարմնական վնասվածքներ, և գանգոսկրերի կոտրվածքներ ու գլխուղեղի վնասվածքներ, դրանք միմյանցից տարանջատել հնարավոր չէ։ Հետևաբար, գլխուղեղի ծանր աստիճանի սալջարդը կարող էր առաջանալ Ն. Նաջարյանի գլխի շրջանում հասցված յուրաքանչյուր վնասվածքից։
/հատոր 3. գ.թ. 249-250, 277-278/
Որպես այլ փաստաթուղթ` ապացույց ճանաչված, անչափահաս ամբաստանյալ Գ. Տերյանի 098 53-01-88 հեռախոսահամարի մուտքային և ելքային հեռախոսազանգերի վերծանումներով, որոնց համաձայն` դեպքի ժամանակ, 20.02.2012թ., ժամը 14.00-ից 14.30-ի սահմաններում, նշված հեռախոսահամարի մուտքային և ելքային հեռախոսազանգերը սպասարկվել են Երևան քաղաքի Խանջյան փողոցի թիվ 9 հասցեում գործող, թիվ 3 ավագ դպրոցի և Չայկովսկու փողոցի թիվ 15 հասցեին հարակից, Երևանի Տիգրան Մեծի պողոտայի թիվ 17 և թիվ 31, Խանջյան փողոցի թիվ 13Ա հասցեներում տեղակայված, «Ղ-Տելեկոմ» ՓԲ ընկերության կապի ծածկույթն ապահովող կայանների կողմից։
/հատոր 2. գ.թ. 143-158, հատոր 3, գ.թ. 265-266, 348-349/


Դատարանի իրավական վերլուծությունները


Վերլուծելով ամբաստանյալ Գրիգոր Արտեմի Տերյանի նախաքննական և դատաքննական ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Գրիգոր Արտեմի Տերյանի ցուցմունքները` ոչ թե մի խումբ անձանցով, այլ մենակ` տուժողին հարվածելու մասին, իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են արդեն իսկ նշված ապացույցներով։
Վերլուծելով վկաներ Արտակ Կարենի Բադալյանի, Լևիկ Ստեփանի Գրիգորյանի, Ռաֆայել Վահրամի Դիլոյանի և Վահագն Հայկի Սանոսյանի նախաքննական և դատաքննական ցուցմունքները` վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ վկա Արտակ Բադալյանի, Լևիկ Գրիգորյանի, Ռաֆայել Դիլոյանի և Վահագն Սանոսյանի դատաքննական ցուցմունքներն իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու հարցում ամբաստանյալ Գրիգոր Արտեմի Տերյանին օգնելու նպատակ են հետապնդում և հերքվում են քրեական գործով ձեռք բերված և դատարանում հետազոտված վերոհիշյալ ապացույցներով։
Վերլուծելով անչափահաս ամբաստանյալ Գրիգոր Արտեմի Տերյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ անչափահաս ամբաստանյալ Գրիգոր Արտեմի Տերյանի կողմից, նրա մեղավորությամբ, մի խումբ անձանց հետ միասին, դիտավորությամբ մեկ ուրիշին մարմնական ծանր վնասվածք պատճառելը, որը վտանգավոր է կյանքի համար` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 2-րդ մասի 6-րդ կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Գրիգոր Արտեմի Տերյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, տուժողի հետ հաշտվել են։ Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում հանցանք կատարելու պահին հանցավորի անչափահաս` տասնհինգ տարեկան լինելը և հանցագործությամբ տուժողին պատճառված գույքային վնասը կամովին հատուցելը, իսկ նրա պատասխանատվությունը և պատիժը ծանրացնող հանգամանքներ դատարանը չի արձանագրում։
Անչափահաս ամբաստանյալ Գրիգոր Արտեմի Տերյանն իր կատարած` Հայաստանի Հանրապետության քրեական օրենսգրքի 112-րդ հոդվածի 2-րդ մասի 6-րդ կետով նախատեսված հանցագործության համար ենթակա է պատժի ազատազրկման ձևով։
Քննարկելով այն հարցը, թե արդյոք անչափահաս ամբաստանյալ Գրիգոր Տերյանը պետք է կրի իր նկատմամբ նշանակված պատիժը` դատարանը գտնում է հետևյալը.
ՀՀ քրեական օրենսգրքի 70-րդ հոդվածի համաձայն` եթե դատարանը կալանքի, ազատազրկման, կարգապահական գումարտակում պահելու ձևով պատիժ նշանակելով հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին։
ՀՀ վճռաբեկ դատարանն իր` 2007թ. հունիսի 12-ի թիվ ՎԲ-124/07 որոշմամբ ՀՀ քրեական օրենսգրքի 70-րդ հոդվածի կիրառման կապակցությամբ արտահայտել է այն իրավական դիրքորոշումը, որ վկայակոչված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում և դրա կիրառումը սահմանափակված չէ նաև հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, որոնց նկատմամբ այն չի կարող կիրառվել։ ՀՀ վճռաբեկ դատարանը միաժամանակ նշել է. «ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է։ Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները։ Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց նշանակված պատիժը կրելու»։ ՀՀ վճռաբեկ դատարանը մեկ այլ` 2008թ. փետրվարի 1-ի թիվ ՎԲ-01/08 որոշմամբ նշել է, որ պատիժը պայմանականորեն չկիրառելու իրավական հիմքերը բացահայտելու համար ՀՀ քրեական օրենսգրքի 70-րդ հոդվածում սահմանված իրավադրույթներն անհրաժեշտ է մեկնաբանել նաև ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում, այսինքն` պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը։
Հաշվի առնելով վերոգրյալը և այն հանգամանքները, որ Գրիգոր Տերյանը նախկինում դատված չի եղել, բնութագրվում է դրական, տուժողի հետ հաշտվել են, հանցանքը կատարել է անչափահաս տարիքում` 15 տարեկան հասակում, հանցագործությամբ տուժողին պատճառված գույքային վնասը կամովին հատուցել է, հաշվի առնելով նաև ամբաստանյալի պատասխանատվությունն ու պատիժը ծանրացնող հանգամանքների բացակայությունը, դատարանը գտնում է, որ Գրիգոր Տերյանի կողմից կատարված հանցագործության հանրորեն վտանգավորության աստիճանը նվազել է և հնարավոր է հանգել հետևության, որ Գրիգոր Արտեմի Տերյանի ուղղվելը հնարավոր է առանց նրա նկատմամբ նշանակվող ազատազրկման ձևով պատիժը կրելու։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով խափանման միջոցի հարցը` դատարանը գտնում է, որ անչափահաս ամբաստանյալ Գրիգոր Տերյանի նկատմամբ որպես խափանման միջոց հսկողության հանձնելն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է հետևյալը.
ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետի համաձայն`
«1. Դատական ծախսերը բաղկացած են`
(…)
3) մասնագետի, փորձագետի, թարգմանչի վարձատրության գումարներից.
(…)»։
Նույն օրենսգրքի 169-րդ հոդվածի 4-րդ մասի համաձայն` «Անչափահասին դատապարտելու դեպքում դատական ծախսերը կարող են դրվել նրա օրինական ներկայացուցչի վրա։»։
Հետևաբար, դատարանը գտնում է, որ անչափահաս ամբաստանյալ Գրիգոր Տերյանի օրինական ներկայացուցիչ Արտեմ Տերյանից հօգուտ ՀՀ պետական բյուջեի բռնագանձման է ենթակա դատաբժշկական և դատաբժշկական ու դատահետքաբանական համալիր փորձաքննությունների կատարման արժեք հանդիսացող 117.402 /հարյուր տասնյոթ հազար չորս հարյուր երկու/ ՀՀ դրամ ընդհանուր գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 168-169-րդ, 357-360-րդ, 364-366-րդ, 369-373-րդ, 439-442-րդ հոդվածներով, դատարանը`


Վ Ճ Ռ Ե Ց

Անչափահաս ամբաստանյալ Գրիգոր Արտեմի Տերյանին մեղավոր ճանաչել Հայաստանի Հանրապետության քրեական օրենսգրքի 112-րդ հոդվածի 2-րդ մասի 6-րդ կետով նախատեսված հանցանքում և դատապարտել ազատազրկման 5 /հինգ/ տարի ժամկետով։
ՀՀ քրեական օրենսգրքի 70-րդ հոդվածի կիրառմամբ, անչափահաս ամբաստանյալ Գրիգոր Արտեմի Տերյանի նկատմամբ պատիժը պայմանականորեն չկիրառել` սահմանելով փորձաշրջան 5 /հինգ/ տարի ժամկետով։ Գրիգոր Տերյանին և նրա օրինական ներկայացուցիչ Արտեմ Տերյանին պարտավորեցնել չփոխել Գրիգոր Տերյանի մշտական բնակության վայրը` նրա վարքագծի նկատմամբ վերահսկողությունը դնելով ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի վրա։
Խափանման միջոց հսկողության հանձնելը թողնել անփոփոխ` մինչև դատավճռի օրինական ուժի մեջ մտնելը։
Անչափահաս ամբաստանյալ Գրիգոր Տերյանի օրինական ներկայացուցիչ Արտեմ Տերյանից հօգուտ ՀՀ պետական բյուջեի բռնագանձել 117.402 /հարյուր տասնյոթ հազար չորս հարյուր երկու/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ