Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

08 փետրվարի 2013թ. ք. Երևան

ԵԿԴ-0238/01/12

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող,
Երևանի Կենտրոն և Նորք-Մարաշ
վարչական շրջանների
դատախազության դատախազ Մ. Գեղամյանի,

տուժողներ Ս. Մոշթաղի,
Ա. Դելքաբադի,
Ա. Շահրադ,
Ա. Յազդանի,
Ն. Էբրահիմփուր,


դատարանում, դռնբաց դատական նիստում, քննեց գործն ըստ մեղադրանքի
Հրայր Հայկի Աթասյանի`
ծնված 1981թ. նոյեմբերի 02-ին Լեռնային Ղարաբաղի Հանրապետության Մարտակերտի շրջանի Վաղուհաս գյուղում, հայ, Հայաստանի Հանրապետության /այսուհետ ՀՀ/ քաղաքացի, ութամյա կրթությամբ, ամուրի, խնամքին ոչ ոք, նախկինում դատված`
1/ ՀՀ Սյունիքի մարզի առաջին ատյանի դատարանի 07.04.2001թ. դատավճռով, ՀՀ նախորդ քրեական օրենսգրքի 254-րդ հոդվածի «ա» կետով դատապարտվել է ազատազրկման մեկ տարի ժամկետով, 07.06.2001թ. պայմանական վաղաժամկետ ազատվել է պատժի մնացած մասի կրումից,
2/ ՀՀ Սյունիքի մարզի առաջին ատյանի դատարանի 12.04.2002թ. դատավճռով, ՀՀ նախորդ քրեական օրենսգրքի 254-րդ հոդվածի 1-ին մասով դատապարտվել է ազատազրկման վեց ամիս ժամկետով, 30.04.2002թ. ազատվել է պատժից` այն լրիվ կրելու արդյունքում,
3/ Երևանի Կենտրոն և Նորք-Մարաշ համայնքների առաջին ատյանի դատարանի 20.05.2003թ. դատավճռով, ՀՀ նախորդ քրեական օրենսգրքի 86-րդ հոդվածի 2-րդ մասով, 15-92-րդ հոդվածի 1-ին մասով, 92-րդ հոդվածի 1-ին մասով, նույն օրենսգրքի 37-րդ հոդվածի կիրառմամբ դատապարտվել է ազատազրկման երեք տարի ժամկետով,
4/ Երևանի քրեական դատարանի 29.07.2008թ. դատավճռով, ՀՀ քրեական օրենսգրքի 177-րդ հոդվածի 2-րդ մասի 2-րդ, 3-րդ, 4-րդ կետերով դատապարտվել է ազատազրկման երկու տարի ժամկետով, պատժի կրման սկիզբը հաշվելով 2008թ. մայիսի 31-ից, 31.05.2010թ. ազատվել է պատժից` այն լրիվ կրելու արդյունքում, դատվածությունը չմարված, հաշվառված է և բնակվել է ԼՂՀ, ք. Ստեփանակերտ, Ա.Մանուկյան փողոցի թիվ 120 շենքի թիվ 77 բնակարանում, կալանքի տակ է 07.07.2012թ-ից, մեղադրվում է երկու դրվագով` ՀՀ քրեական օրենսգրքի 177-րդ հոդվածի 3-րդ մասի 1.1 կետով,

Գործի դատավարական նախապատմությունը
Թիվ 13139612 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2012թ. հուլիսի 07-ին, ՀՀ քրեական օրենսգրքի 177-րդ հոդվածի 3-րդ մասի 1.1 կետով, Հրայր Հայկի Աթասյանի կողմից գույքի գաղտնի հափշտակություն կատարելու դեպքի առթիվ։
Քննիչի 2012թ. դեկտեմբերի 07-ի որոշմամբ, Գրիգոր Սիմոնյանի և Արամայիս Հակոբյանի նկատմամբ քրեական հետապնդում չի իրականացվել` հանցակազմի բացակայության պատճառաբանությամբ։
Քննիչի նույն օրվա մեկ այլ որոշմամբ, Երևանի Թումանյան փողոցի թիվ 38 շենքի թիվ 54 բնակարանից, Պուշկինի փողոցի թիվ 43 շենքի թիվ 31 բնակարանից, Նալբանդյան փողոցի թիվ 9 շենքի թիվ 21 բնակարանից, Թումանյան փողոցի թիվ 24 շենքի թիվ 13, 30 և 34 բնակարաններից, Զաքյան փողոցի թիվ 2 շենքի թիվ 25 բնակարանից և Զաքյան փողոցի թիվ 2բ շենքի թիվ 51 բնակարանից, Հրայր Աթասյանի կողմից գույքի գաղտնի հափշտակություններ կատարելու կապակցությամբ քրեական հետապնդում չի իրականացվել` հանցագործության դեպքի բացակայության պատճառաբանությամբ։
Ամբաստանյալ Հրայր Հայկի Աթասյանին նախաքննության մարմնի կողմից մեղադրանք է առաջադրվել երկու դրվագով` ՀՀ քրեական օրենսգրքի 177-րդ հոդվածի 3-րդ մասի 1.1 կետով հետևյալ արարքների համար. «որ նա 2012թ. հուլիսի 07-ին, ժամը 01.00-ից 04.00-ն ընկած ժամանակահատվածում բաց դռնից ապօրինի մուտք է գործել Երևան քաղաքի Չարենցի փողոցի թիվ 5 հասցեում գտնվող` Իրանի Իսլամական Հանրապետության քաղաքացիներ Ֆրեյդուն Էսքանդարի Էբրահիփուրիի և Ասադոլահ Հաքինմուհամի Յազդանիի վարձակալած բնակարան և այնտեղից գաղտնի հափշտակել վերջիններիս պատկանող խոշոր չափի` 555.997 ՀՀ դրամ ընդհանուր արժողության «Այֆոն 4» մոդելի բջջային հեռախոս, 450 ԱՄՆ դոլար գումար, 85.000 ՀՀ դրամ և 300.000 ԻԻՀ թուման կանխիկ գումարներ։
Այսինքն` Հրայր Հայկի Աթասյանը կատարել է ՀՀ քր. օր.-ի 177 հոդվածի 3-րդ մասի 1.1 կետով նախատեսված հանցագործություն։
Բացի այդ, Հրայր Հայկի Աթասյանը նույն օրը, ժամը 04.00-ից 08.00-ն ընկած ժամանակահատվածում բաց դռնից ապօրինի մուտք է գործել Երևան քաղաքի Տ.Մեծ պողոտայի 10 շենքի թիվ 16 հասցեում գտնվող` Իրանի Իսլամական Հանրապետության քաղաքացիներ Աբաթալեպ Ալիռեզայի Դելքաբադիի, Ալի Մոհամեդբաշերի Շահադիի, Սաջադ Ռեզաալիի Նադերի Մոշաթաղիի կողմից վարձակալած բնակարան և այնտեղից գաղտնի հափշտակել վերջիններիս պատկանող զգալի չափի` 172.920 ՀՀ դրամ ընդհանուր արժողության ձեռքի 2 պայուսակները, 2 շապիկները, 2 տաբատները, լողազգեստը, անձնական հիգենայի պարագաները, «Սամսունգ Գալաքսի» մոդելի բջջային հեռախոսը, «Փոլիս» տեսակի արևային ակնոցները և 60.000 ԻԻՀ թուման կանխիկ գունմարը։
Այսինքն` Հրայր Աթասյանը կատարել է ՀՀ քր. օր.-ի 177 հոդվածի 3-րդ մասի 1.1 կետով նախատեսված հանցագործություն։»։
17.12.2012թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Հրայր Հայկի Աթասյանը նախկինում չորս անգամ դատապարտվել է տարբեր հանցագործություններ կատարելու համար, մասնավորապես`
1. ՀՀ Սյունիքի մարզի առաջին ատյանի դատարանի 07.04.2001թ. դատավճռով, ՀՀ նախորդ քրեական օրենսգրքի 254-րդ հոդվածի «ա» կետով Հ. Աթասյանը դատապարտվել է ազատազրկման մեկ տարի ժամկետով, 07.06.2001թ. պայմանական վաղաժամկետ ազատվել է պատժի մնացած մասի կրումից։
2. ՀՀ Սյունիքի մարզի առաջին ատյանի դատարանի 12.04.2002թ. դատավճռով, ՀՀ նախորդ քրեական օրենսգրքի 254-րդ հոդվածի 1-ին մասով Հ. Աթասյանը դատապարտվել է ազատազրկման վեց ամիս ժամկետով, 30.04.2002թ. ազատվել է պատժից` այն լրիվ կրելու արդյունքում։
3. Երևանի Կենտրոն և Նորք-Մարաշ համայնքների առաջին ատյանի դատարանի 20.05.2003թ. դատավճռով, ՀՀ նախորդ քրեական օրենսգրքի 86-րդ հոդվածի 2-րդ մասով, 15-92-րդ հոդվածի 1-ին մասով, 92-րդ հոդվածի 1-ին մասով, նույն օրենսգրքի 37-րդ հոդվածի կիրառմամբ Հ. Աթասյանը դատապարտվել է ազատազրկման երեք տարի ժամկետով։
4. Երևանի քրեական դատարանի 29.07.2008թ. դատավճռով, ՀՀ քրեական օրենսգրքի 177-րդ հոդվածի 2-րդ մասի 2-րդ, 3-րդ, 4-րդ կետերով Հ. Աթասյանը դատապարտվել է ազատազրկման երկու տարի ժամկետով, պատժի կրման սկիզբը հաշվելով 2008թ. մայիսի 31-ից։ 2010թ. մայիսի 31-ին նա ազատվել է պատժից` այն լրիվ կրելու արդյունքում, որից հետո որևէ տեղ չի աշխատել և մշտական զբաղմունք չունենալով` կրկին կատարել է գույքի գաղտնի հափշտակություններ հետևյալ հանգամանքներում.
Ամբաստանյալ Հ. Աթասյանը, 2012թ. հուլիսի 07-ին, ժամը 01.00-ից 04.00-ն ընկած ժամանակահատվածում, բաց դռնից ապօրինի մուտք է գործել Երևան քաղաքի Չարենցի փողոցի թիվ 5 հասցեում գտնվող, Իրանի Իսլամական Հանրապետության քաղաքացիներ Ֆրեյդուն Էսքանդարի Էբրահիփուրիի և Ասադոլահ Հաքինմուհամի Յազդանիի վարձակալած բնակարան և այնտեղից գաղտնի հափշտակել է վերջիններիս պատկանող, խոշոր չափի` 555.997 ՀՀ դրամ ընդհանուր արժողության «Այֆոն 4» /«Iphone 4»/ մոդելի բջջային հեռախոս, 450 ԱՄՆ դոլար գումար, 85.000 ՀՀ դրամ և 300.000 ԻԻՀ թուման կանխիկ գումարներ։
Այնուհետև, ամբաստանյալ Հ. Աթասյանը, նույն օրը, ժամը 04.00-ից 08.00-ն ընկած ժամանակահատվածում, բաց դռնից ապօրինի մուտք է գործել Երևան քաղաքի Տ.Մեծ պողոտայի թիվ 10 շենքի թիվ 16 հասցեում գտնվող, Իրանի Իսլամական Հանրապետության քաղաքացիներ Աբութալեպ Ալիռեզայի Դելքաբադիի, Ալի Մոհամեդբաշերի Շահրադի, Սաջադ Ռեզաալիի Նադերի Մոշթաղիի կողմից վարձակալած բնակարան և այնտեղից գաղտնի հափշտակել է վերջիններիս պատկանող, զգալի չափի` 172.920 ՀՀ դրամ ընդհանուր արժողության երկու պայուսակները, երկու շապիկները, երկու տաբատները, լողազգեստը, անձնական հիգիենայի պարագաները, «Սամսունգ Գալաքսի» մոդելի բջջային հեռախոսը, «Փոլիս» տեսակի արևային ակնոցները և 60.000 ԻԻՀ թուման կանխիկ գումարը։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Հրայր Հայկի Աթասյանի կատարած հանցագործություններից յուրաքանչյուրի համար պատիժ նշանակելիս` առկա է հանցագործությունների առանձնապես վտանգավոր ռեցիդիվ, նա տալով ինքնախոստովանական ցուցմունքներ` անկեղծորեն զղջացել է կատարածի համար։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Հրայր Հայկի Աթասյանի ինքնախոստովանական ցուցմունքներով այն մասին, որ նախկինում մի քանի անգամ դատապարտվել է տարբեր հանցագործություններ կատարելու համար։ Վերջին անգամ դատապարտվելուց հետո պատժի կրումից ազատվել է 2010թ. մայիսին։ Չունենալով մշտական աշխատանք և զբաղմունք` 2012թ. հունիսի 17-ից Լեռնային Ղարաբաղի Հանրապետությունից տեղափոխվել է Երևան և ժամանակավոր բնակվել է տարբեր թաղամասերում։ 2012թ. հունիսի կեսերից իր ընկեր Գրիգոր Սիմոնյանի և Արամայիսի հետ բնակվել է Երևանի Սախարովի անվան հրապարակի մոտակայքում։
2012թ. հուլիսի 06-ի երեկոյան գնացել է Հանրապետության հրապարակ և Իրանի Իսլամական Հանրապետության քաղաքացիներ է փնտրել` նրանց հետևելու, բնակության վայրը ճշտելու և հետագայում բնակարանից գողություն կատարելու համար։ Նույն օրը, ցերեկային ժամերին հանդիպել է ԻԻՀ քաղաքացիների և նրանց հետևելով` տեսել է, որ նրանց բնակարանը գտնվում է Երևանի Այգեստան թաղամասում։ Այնուհետև, երեկոյան հանդիպելով Մայիսին` վերջինիցս խնդրել է ժամանակավորապես տրամադրել «Վազ 2121» մակնիշի ավտոմեքենան` Լեռնային Ղարաբաղի Հանրապետությունից ժամանած քույրերին տուն ճանապարհելու համար, որից հետո նրանց ավտոմեքենայով տուն է ուղեկցել և վերադարձել տղաների մոտ։ Այդ ժամանակ Մայիսը խնդրել է վերադարձնել դյուրակիր համակարգիչը, որի համար ինքն ու Գրիգորը գնացել են քույրերի վարձակալած բնակարան։ Որոշ ժամանակ ավտոմեքենայով Երևան քաղաքում շրջելուց հետո գնացել է Այգեստան թաղամաս, ավտոմեքենան թողել է Երևանի Չարենց փղոցում, իսկ ինքն առանց Գրիգորին իր մտադրության մասին տեղյակ պահելու` գնացել է պարսիկների բնակարան։ Բնակարանի դուռը կողպված չի եղել։ Երբ ինքը մտել է բնակարան` բնակիչները քնած են եղել։ Բնակարանում եղած տաբատների գրպաններից գողացել է պարսկական դրամ, 450 ԱՄՆ դոլար, 25.000 ՀՀ դրամ գումարներ և «Այֆոն» տեսակի բջջային հեռախոս, որից հետո հեռացել է։ Դրանից հետո ավտոմեքենայով գնացել է Երևանի Տ.Մեծ պողոտայում գործող «Երևան Սիթի» հանրախանութի մոտակայք և ծխախոտ գնելու նպատակով իջել է ավտոմեքենայից։ Նույն պահին նկատել է հանրախանութի կողային մուտքով բարձրացող, ազգությամբ պարսիկ մի քանի քաղաքացիների։ Նրանց հետևելով` շուրջ 30 րոպե անց չկողպված դռնից մտել է նրանց բնակարան և այնտեղից գողացել է երկու պայուսակներ, երկու տաբատներ, «Սամսունգ» տեսակի բջջային հեռախոս, որից հետո հեռացել է։ Շենքից դուրս գալով` քայլելով գնացել է «Կոնվերս» բանկի հարևանությամբ գտնվող «Սենյոր» հյուրանոց։ Երևանի Այգեստան թաղամասում գտնվող բնակարանից գողացված իրերի մի մասը թողել է ավտոմեքենայի մեջ, իսկ մնացած մասը մնացել է իր մոտ, որոնք հայտնաբերվել են ոստիկանության աշխատակիցների կողմից։
/դատական նիստի արձանագրություն, հատոր 1, գ.թ. 40-42, 97, հատոր 2, գ.թ. 202-203/
Տուժող Սաջադ Ռեզաալիի Նադերի Մոշթաղիի նախաքննական ցուցմունքով այն մասին, որ 2012թ. հուլիսի 06-ին իր ընկերներ, Իրանի Իսլամական Հանրապետության քաղաքացիներ Ալի Շահրադի, Հուսեին Առֆայիսանի, Աբութալեբ Դելքաբադիի և Ֆախրեդին Խամսեի հետ զբոսաշրջության նպատակով այցելել են Հայաստանի Հանրապետություն։ Երևան ժամանել են 2012թ. հուլիսի 07-ի գիշերը, ժամը 03։00-ի սահմաններում, ապա գնացել են իրենց կողմից վարձակալած` Երևան քաղաքի Տ.Մեծ պողոտայի թիվ 10 շենքի թիվ 16 բնակարան և տեղ հասնելուց անմիջապես հետո քնել են։
Նույն օրը, ժամը 08։00-ի սահմաններում, իրենց վարձակալած բնակարան են եկել ոստիկանության աշխատակիցներ և հետաքրքրվել, թե արդյոք բնակարանից գողություն չի կատարվել։ Ստուգմամբ պարզել են, որ բնակարանից բացակայում են Ալիին պատկանող «Սամսունգ Գալաքսի» տեսակի բջջային հեռախոսը, Աբութալեբին պատկանող պայուսակը, ինչպես նաև իր պայուսակը, որի մեջ եղել է արևային ակնոց և 60.000-70.000 ԻԻՀ թուման գումար։ Դրանից հետո ոստիկանների հետ գնացել են ոստիկանության բաժին, որտեղ տեղեկացել են, որ գողությունը կատարել է Հրայր Աթասյանը։
/հատոր 1, գ.թ. 50-51/
Տուժող Աբութալեբ Ալիռեզայի Դելքաբադիի նախաքննական ցուցմունքով այն մասին, որ 2012թ. հուլիսի 06-ին իր ընկերներ, Իրանի Իսլամական Հանրապետության քաղաքացիներ Ալի Շահրադի, Հուսեին Առֆայիսանի, Սաջադ Ռեզաալիի Նադերի Մոշթաղիի և Ֆախրեդին Խամսեի հետ զբոսաշրջության նպատակով այցելել են Հայաստանի Հանրապետություն։ Երևան ժամանել են 2012թ. հուլիսի 07-ի գիշերը, ժամը 03։00-ի սահմաններում, ապա գնացել են իրենց կողմից վարձակալած` Երևան քաղաքի Տ.Մեծ պողոտայի թիվ 10 շենքի թիվ 16 բնակարան և տեղ հասնելուց անմիջապես հետո քնել են։
Նույն օրը, ժամը 08։00-ի սահմաններում, իրենց վարձակալած բնակարան են եկել ոստիկանության աշխատակիցներ և հետաքրքրվել, թե արդյոք բնակարանից գողություն չի կատարվել։ Ստուգմամբ պարզել են, որ բնակարանից բացակայում են Ալիին պատկանող «Սամսունգ Գալաքսի» մոդելի բջջային հեռախոսը, իրեն և Սաջադին պատկանող պայուսակները։ Իր պայուսակի մեջ լողազգեստ, 10 ԱՄՆ դոլար և անձնական հիգիենայի պարագաներ են եղել։ Դրանից հետո ոստիկանների հետ գնացել են ոստիկանության բաժին, որտեղ տեղեկացել են, որ գողությունը կատարել է Հրայր Աթասյանը։
/հատոր 1, գ.թ. 54-55/
Տուժող Ալի Մոհամադբաղերի Շահրադի նախաքննական ցուցմունքով այն մասին, որ 2012թ. հուլիսի 06-ին իր ընկերներ, Իրանի Իսլամական Հանրապետության քաղաքացիներ Աբութալեբ Դելքաբադիի, Հուսեին Առֆայիսանի, Սաջադ Ռեզաալիի Նադերի Մոշթաղիի և Ֆախրեդին Խամսեի հետ զբոսաշրջության նպատակով այցելել են Հայաստանի Հանրապետություն։ Երևան ժամանել են 2012թ. հուլիսի 07-ի գիշերը, ժամը 03։00-ի սահմաններում, ապա գնացել են իրենց կողմից վարձակալած` Երևան քաղաքի Տ.Մեծ պողոտայի թիվ 10 շենքի թիվ 16 բնակարան և տեղ հասնելուց անմիջապես հետո քնել են։
Նույն օրը, ժամը 08։00-ի սահմաններում, իրենց վարձակալած բնակարան են եկել ոստիկանության աշխատակիցներ և հետաքրքրվել, թե արդյոք բնակարանից գողություն չի կատարվել։ Ստուգմամբ պարզել են, որ բնակարանից բացակայում են իրեն պատկանող «Սամսունգ Գալաքսի» տեսակի բջջային հեռախոսը, ինչպես նաև Ալիին և Սաջադին պատկանող պայուսակները։ Դրանից հետո ոստիկանների հետ գնացել են ոստիկանության բաժին, որտեղ տեղեկացել են, որ գողությունը կատարել է Հրայր Աթասյանը։
/հատոր 1, գ.թ. 60-61/
Տուժող Ասադոլահ Հաքինմուհամի Յազդանիի նախաքննական ցուցմունքով այն մասին, որ 2012թ. հուլիսի 03-ին իր ընկեր, ԻԻՀ քաղաքացի Ֆրեյդուն Էսքանդարի Էբրահիփուրիի հետ այցելել է Հայաստանի Հանրապետություն և վարձակալական հիմունքներով բնակվել Երևան քաղաքի Չարենցի փողոցի թիվ 5 հասցեում գտնվող տանը։
2012թ. հուլիսի 06-ին, ժամը 20.00-ից Ֆրեյդունի հետ զբոսնել են Երևան քաղաքի Սայաթ-Նովայի փողոցում, ապա հուլիսի լույս 07-ի գիշերը, ժամը 00.30-ի սահմաններում վերադարձել են վարձակալած բնակարան։ Հոգնած լինելու պատճառով անմիջապես քնել են։ Նույն օրը, ժամը 05.30-ի սահմաններում Ֆրեյդունն իրեն արթնացրել է և հայտնել, որ գրպանից բացակայում են բջջային հեռախոսը և գումարները։ Ինքը նույնպես պարզել է, որ իր գրպանից բացակայում են 60.000 ՀՀ դրամ և 300.000 ԻԻՀ թուման գումարները։ Ֆրեյդունի հետ որոշել և նույն օրը վերադարձել են Իրանի Իսլամական Հանրապետություն։ Ճանապարհին Ֆրեյդունին զանգահարել են ոստիկանության աշխատակիցներ և հայտնել են, որ գողությունը կատարած անձնավորությունը հայտնաբերվել է։ Դրանից հետո ոստիկանների հետ գնացել են ոստիկանության բաժին, որտեղ տեղեկացել են, որ գողությունը կատարել է Հրայր Աթասյանը։
/հատոր 1, գ.թ. 65-66/
Տուժող Ֆրեյդուն Էբրահիմփուրի նախաքննական ցուցմունքով այն մասին, որ 2012թ. հուլիսի 03-ին իր ընկեր, ԻԻՀ քաղաքացի Ասադոլահ Հաքինմուհամի Յազդանիի հետ այցելել է Հայաստանի Հանրապետություն և վարձակալական հիմունքներով բնակվել Երևան քաղաքի Չարենցի փողոցի թիվ 5 հասցեում գտնվող տանը։
2012թ. հուլիսի 06-ին, ժամը 20.00-ից Ասադոլահի հետ զբոսնել են Երևան քաղաքի Սայաթ-Նովայի փողոցում, ապա հուլիսի լույս 07-ի գիշերը, ժամը 00.30-ի սահմաններում վերադարձել վարձակալած բնակարան։ Հոգնած լինելու պատճառով անմիջապես քնել են։ Նույն օրը, ժամը 05.30-ի սահմաններում, երբ փորձել է լիցքավորել բջջային հեռախոսը` պարզել է, որ այն բացակայում է տաբատի գրպանից։ Ասադոլահին արթնացրել է, որից հետո միասին պարզել են, որ քնելուց առաջ բանալին թողել են տան մուտքի դռան փականի մեջ։ Ստուգմամբ պարզվել է, որ անհայտ հանցագործը բնակարանից գողացել է Ասադոլահի գումարները, իր «Այֆոն» մոդելի բջջային հեռախոսը, 450 ԱՄՆ դոլար և 25.000 ՀՀ դրամ գումարները։
/հատոր 1, գ.թ. 68-69/
Վկա Հոսեին Ալի Աքբարի Առֆայի Սանիի նախաքննական ցուցմունքով այն մասին, որ 2012թ. հուլիսի 06-ին իր ընկերներ, Իրանի Իսլամական Հանրապետության քաղաքացիներ Ալի Շահրադի, Ասադոլահ Հաքինմուհամի Յազդանիի, Աբութալեբ Դելքաբադիի և Ֆախրեդին Խամսեի հետ զբոսաշրջության նպատակով այցելել են Հայաստանի Հանրապետություն։ Երևան ժամանել են 2012թ. հուլիսի 07-ի գիշերը, ժամը 03։00-ի սահմաններում, ապա գնացել են իրենց կողմից վարձակալած` Երևան քաղաքի Տ.Մեծ պողոտայի թիվ 10 շենքի թիվ 16 բնակարան և տեղ հասնելուց անմիջապես հետո քնել են։
Նույն օրը, ժամը 08։00-ի սահմաններում, իրենց վարձակալած բնակարան են եկել ոստիկանության աշխատակիցներ և հետաքրքրվել, թե արդյոք բնակարանից գողություն չի կատարվել։ Ստուգմամբ պարզել են, որ բնակարանից բացակայում են Ալիին պատկանող «Սամսունգ Գալաքսի» մոդելի բջջային հեռախոսը, Աբութալեբին և Սաջադին պատկանող պայուսակները։ Դրանից հետո ոստիկանների հետ գնացել են ոստիկանության բաժին, որտեղ տեղեկացել են, որ գողությունը կատարել է Հրայր Աթասյանը։
/հատոր 1, գ.թ. 70-71/
Վկա Արամայիս Հրաչյայի Հակոբյանի ցուցմունքներով այն մասին, որ որ 2012թ. հուլիսի 06-ին, ժամը 23.00-ի սահմաններում, Երևան քաղաքի Աբովյան փողոցում գործող «Ջազվե» սրճարանում հանդիպել է իր ընկերներ Գրիգոր Սիմոնյանին, Հրայր Աթասյանին և վերջինիս երկու քույրերին։ Շուրջ 15-ից 20 րոպե անց Հ. Աթասյանն իր անձնական օգտագործման «Վազ 2121» մակնիշի, 32 ԼԼ 233 պետհամարանիշի ավտոմեքենայով քույրերին տուն է տեղափոխել և վերադարձել։ Դրանից հետո երեքով գնացել են Երևան քաղաքի Հարավ-արևմտյան թաղամասում գործող «Ռոյալ պլյուս» հյուրանոց։ Ժամը 02.30-ի սահմաններում Գ.Սիմոնյանը և Հ.Աթասյանը վերցրել են իր ավտոմեքենան, որպեսզի վերջինիս քույրերին սննդամթերք տանեն։ Դրանից հետո ինքը քնել է, իսկ առավոտյան ոստիկանության աշխատակիցներն իրեն բերման են ենթարկել ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք։ Այնտեղ տեղեկացել է, որ Հրայրը գողություններ է կատարել։
/դատական նիստի արձանագրություն, հատոր 1, գ.թ. 56-57/
Վկա Գրիգոր Պապիկի Սիմոնյանի ցուցմունքներով այն մասին, որ 2012թ. հուլիսի 06-ին, ժամը 21.00-ի սահմաններում, Երևան քաղաքի Աբովյան փողոցում գործող «Ջազվե» սրճարանում հանդիպել է իր ընկեր Հրայր Աթասյանին և վերջինիս երկու քույրերին։ Ժամը 23.00-ի սահմաններում իրենց է միացել Արամայիս Հակոբյանը։ Շուրջ 15-ից 20 րոպե անց Հ.Աթասյանն Ա.Հակոբյանի անձնական օգտագործման «Վազ 2121» մակնիշի, 32 ԼԼ 233 պետհամարանիշի ավտոմեքենայով իր քույրերին տուն է տեղափոխել և վերադարձել։ Դրանից հետո երեքով գնացել են Երևան քաղաքի Հարավ-արևմտյան թաղամասում գործող «Ռոյալ պլյուս» հյուրանոց։ Ժամը 02.30-ի սահմաններում, Ա. Հակոբյանի ավտոմեքենայով Հ. Աթասյանի հետ գնացել են նրա քույրերի համար սննդամթերք գնելու։ Ա.Հակոբյանը մնացել է հյուրանոցում, իսկ ինքն ու Հ.Աթասյանը գնացել են Երևան քաղաքի Տ.Մեծ պողոտայում գործող «Երևան Սիթի» հանրախանութի մոտ։ Հ.Աթասյանը ավտոմեքենայից դուրս է եկել, որպեսզի քույրերի համար սննդամթերք գնի, իսկ ինքը մնացել է ավտոմեքենայի մեջ։ Որոշ ժամանակ անց ավտոմեքենային մոտեցել են ոստիկանության աշխատակիցներ և բերման են ենթարկել ոստիկանության բաժին։ Այնտեղ տեղեկացել է, որ Հրայրը պարսիկների բնակարաններից գողություններ է կատարել։
/դատական նիստի արձանագրություն, հատոր 1, գ.թ. 33-34/
Դատաապրանքագիտական փորձաքննության 30.07.2012թ. թիվ 404-ԱՊ եզրակացությամբ, որի համաձայն` Երևան քաղաքի Չարենցի փողոցում գտնվող թիվ 5 բնակարանից և Տ.Մեծ պողոտայի թիվ 10 շենքի թիվ 16 բնակարանից հափշտակված և փորձաքննությանը ներկայացված ապրանքների ընդհանուր շուկայական արժեքը 2012թ. հուլիսի 07-ի դրությամբ կազմել է 315.400 ՀՀ դրամ գումար։
/հատոր 2, գ.թ. 15-17/
Քննչական փորձարարություն կատարելու մասին 09.07.2012թ. արձանագրությամբ, որի համաձայն` ամբաստանյալ Հրայր Աթասյանը մատնացույց է արել Երևանի Այգեստան 9-րդ փողոցի թիվ 5 տունը, Երևանի Տիգրան Մեծի պողոտայի թիվ 10 շենքի թիվ 5 բնակարանը և հանգամանորեն նկարագրել նշված հասցեներից գողություններ կատարելու մանրամասները։
/հատոր 1, գ.թ. 87-89/
Որպես այլ փաստաթուղթ` ապացույց ճանաչված, անձին բերման ենթարկելու մասին 07.07.2012թ. արձանագրությամբ, որի համաձայն` 2012թ. հուլիսի 07-ին, ժամը 10։30-ին, գողություն կատարելու կասկածանքով, Երևանի Տ. Մեծի պողոտայում գործող «Ռոսիա» տոնավաճառի մոտից Հրայր Հայկի Աթասյանը բերման է ենթարկվել ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք։
/հատոր 1, գ.թ. 4, հատոր 2, գ.թ. 194-195/
Որպես այլ փաստաթուղթ` ապացույց ճանաչված, անձին խուզարկության ենթարկելու վերաբերյալ 07.07.2012թ. արձանագրությամբ, որի համաձայն` Հրայր Հայկի Աթասյանի անձնական խուզարկությամբ հայտնաբերվել են մեկ հատ «Բիլայն» մոդելի, 357555044398891 գործարանային համարի բջջային հեռախոս` 096004443 հեռախոսաքարտով, «Սամսունգ» մոդելի, 35237705715497 գործարանային համարի բջջային հեռախոս` արտասահմանյան օպերատորի հեռախոսաքարտով, յոթ հատ 50.000, տաս հատ 20.000, երեք հատ 10.000 Իրանի Իսլամական Հանրապետության ռիալ անվանական արժեքով թղթադրամներ։ Ըստ Հ. Աթասյանի բանավոր հայտարարության` «Սամսունգ» մոդելի բջջային հեռախոսը և Իրանի Իսլամական Հանրապետության ռիալ թղթադրամները գողացել է Երևանի Տիգրան Մեծի պողոտայում գտնվող ոմն պարսիկի բնակարանից։
Հ. Աթասյանի տաբատի հետևի աջ գրպանից հայտնաբերվել են ինը հատ 50 ԱՄՆ դոլար, երկու հատ 20.000 և մեկ հատ 10.000 ՀՀ դրամ անվանական արժեքներով թղթադրամներ։ Ըստ Հ. Աթասյանի բանավոր հայտարարության` այդ գումարները պատկանում են իրեն։
/հատոր 1, գ.թ. 5-6, հատոր 2, գ.թ. 194-195/
Որպես այլ փաստաթուղթ` ապացույց ճանաչված, «Վազ 2121» մակնիշի, 32ԼԼ233 պետհամարանիշի ավտոմեքենայի զննության մասին 07.07.2012թ. արձանագրությամբ, որի համաձայն` ավտոմեքենայի սրահի զննությամբ հայտնաբերվել է «Այֆոն» մոդելի բջջային հեռախոս։ Ըստ Հ. Աթասյանի բանավոր հայտարարության` նշված բջջային հեռախոսն ինքը գողացել է Երևանի Այգեստան թաղամասում գտնվող տներից մեկից։ Ավտոմեքենայի սրահի աջ կողմի դիմային հատվածի հատակից հայտնաբերվել է շագանակագույն դրամապանակ, որի մեջ եղել են տարբեր կտրոններ, բանկային քարտ և 323.000 Իրանի Իսլամական Հանրապետության ռիալ տեսակի գումար։ Նշված հատվածից հայտնաբերվել են ևս երկու շագանակագույն դրամապանակներ։
/հատոր 1, գ.թ. 11, հատոր 2, գ.թ. 194-195/
Որպես այլ փաստաթուղթ` ապացույց ճանաչված, պայուսակներ և այլ իրեր ու առարկաներ ներկայացնելու մասին 07.07.2012թ. արձանագրությամբ, որի համաձայն` Հ. Աթասյանը Երևանի Վ. Սարգսյան փողոցի թիվ 24 հասցեում գտնվող «Սենյոր» հյուրանոցային համալիրի թիվ 5 սենյակից ներկայացրել է մեկ հատ շագանակագույն փոքր պայուսակ, որի մեջ եղել են Սաջադ Նադերի Մոշթաղիի անձնագիրը, 096-74-82-59 հեռախոսաքարտը, արևային ակնոցներ, 2.000 ԻԻՀ թղթադրամ և «Սամսունգ» մոդելի բջջային հեռախոսի լիցքավորման մարտկոց։ Հ. Աթասյանը ներկայացրել է նաև երկու հատ տաբատներ, մեկ հատ սև պայուսակ, որի մեջ եղել է հագուստ։ Ըստ Հ. Աթասյանի բանավոր հայտարարության` նշված պայուսակները և տաբատներն ինքը հափշտակել է Երևանի Տ. Մեծի պողոտայում գտնվող բնակարաններից մեկից։
/հատոր 1, գ.թ. 12, հատոր 2, գ.թ. 194-195/
Որպես այլ փաստաթուղթ` ապացույց ճանաչված, ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունքի քրեական հետախուզության խմբի ավագ օպեր-լիազոր Է.Գրիգորյանի 07.07.2012թ. զեկուցագրով, որի համաձայն` իրացնելով ստացված օպերատիվ տվյալները, ՀՀ ոստիկանության Երևան քաղաքի վարչության Կենտրոնականի բաժնի պրոֆիլակտիկայի բաժանմունքի աշխատակիցների հետ համատեղ, 2012թ. հուլիսի 07-ին, ժամը 10։30-ին, Երևանի Տ. Մեծի պողոտայի վրա գործող «Ռոսիա» տոնավաճառի մոտից, գողություն կատարելու կասկածանքով, Հրայր Հայկի Աթասյանը և Գրիգոր Պապիկի Սիմոնյանը բերման են ենթարկվել ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք։ Ձեռնարկված միջոցառումներով պարզվել է, որ Հրայր Աթասյանը 2012թ. հուլիսի 7-ին, ժամը 04։00-ից մինչև 08։00-ն ընկած ժամանակահատվածում մուտք է գործել Երևանի Տ. Մեծի պողոտայի թիվ 10 շենքի թիվ 16 բնակարան և այնտեղից գաղտնի հափշտակել է «Սամսունգ Գալաքսի» մոդելի բջջային հեռախոս, երկու պայուսակներ, որոնց մեջ եղել են անձնական իրեր և 60.000-ից 70.000 ԻԻՀ թուման գումար։
/հատոր 1, գ.թ. 1, հատոր 2, գ.թ. 194-195/
Իրեղեն ապացույցներ ճանաչված, տուժողներ Աբութալեբ Ալիռեզայի Դելքաբադիին, Ալի Մոհամադբաղերի Շահրադին և Սաջադ Ռեզաալիի Նադերի Մոշթաղիին պատկանող երկու պայուսակներով, երկու շապիկներով, երկու տաբատներով, մեկ լողազգեստով և անձնական հիգիենայի պարագաներով, «Սամսունգ Գալաքսի» մոդելի բջջային հեռախոսով` իր ԻԻՀ բջջային օպերատորի հեռախոսաքարտով, «Փոլիս» տեսակի արևային ակնոցով, 903.000 ԻԻՀ ռիալ գումարով, տուժողներ Ֆրեյդուն Էսքանդարի Էբրահիմփուրին և Ասադոլահ Հաքինմուհամի Յազդանիին պատկանող «Այֆոն» մոդելի բջջային հեռախոսով, 450 ԱՄՆ դոլար և 50.000 ՀՀ դրամ գումարներով։
/հատոր 1, գ.թ. 115/


Դատարանի իրավական վերլուծությունները

Վերլուծելով ամբաստանյալ Հրայր Հայկի Աթասյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Հրայր Հայկի Աթասյանի կողմից, նրա մեղավորությամբ, նրան ՀՀ քրեական օրենսգրքի 177-րդ հոդվածի 3-րդ մասի 1.1 կետով առաջադրված մեղադրանքի երկու դրվագներից յուրաքանչյուրով, բնակարան ապօրինի մուտք գործելով գողություն կատարելն ապացուցված է, նրա արարքները ճիշտ են որակված և համապատասխանում են ՀՀ քրեական օրենսգրքի 177-րդ հոդվածի 3-րդ մասի 1.1 կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները` ամբաստանյալ Հրայր Հայկի Աթասյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա տալով ինքնախոստովանական ցուցմունքներ` անկեղծորեն զղջացել է կատարածի համար։ Ամբաստանյալի պատասխանատվությունը և պատիժը մեղմացնող հանգամանքներ դատարանը չի արձանագրում, իսկ որպես նրա պատասխանատվությունը և պատիժը ծանրացնող հանգամանք` դատարանը հաշվի է առնում հանցագործությունների առանձնապես վտանգավոր ռեցիդիվը։
Քննարկելով ամբաստանյալի նկատմամբ պատիժ նշանակելու հարցը` դատարանը գտնում է հետևյալը.
ՀՀ քրեական օրենսգրքի 22-րդ հոդվածի համաձայն`
«1. Հանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար։
(…)
3. Հանցագործությունների ռեցիդիվն առանձնապես վտանգավոր է համարվում անձի կողմից՝
1) դիտավորությամբ այնպիսի հանցանք կատարելու դեպքում, որի համար նա դատապարտվում է ազատազրկման, եթե անձը նախկինում երեք անգամից ոչ պակաս ցանկացած հաջորդականությամբ ազատազրկման է դատապարտվել միջին ծանրության դիտավորյալ հանցագործության, ծանր կամ առանձնապես ծանր հանցագործության համար.
(…)»։
ՀՀ քրեական օրենսգրքի 67.1 հոդվածի համաձայն`
«1. Հանցագործությունների ռեցիդիվի, վտանգավոր և առանձնապես վտանգավոր ռեցիդիվի դեպքում պատիժ նշանակելիս հաշվի են առնվում կատարված հանցագործությունների քանակը, բնույթը և ծանրությունը, այն հանգամանքները, որոնց հետևանքով նախկին պատիժը բավարար չի եղել մեղավորի ուղղման համար, ինչպես նաև նոր հանցագործության բնույթը, ծանրությունը և հետևանքները։
(…)
Հանցագործությունների առանձնապես վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երեք քառորդից։»։
Հետևաբար, իր կատարած, երկու դրվագով` Հայաստանի Հանրապետության քրեական օրենսգրքի 177-րդ հոդվածի 3-րդ մասի 1.1 կետով նախատեսված յուրաքանչյուր հանցագործության կատարման համար ամբաստանյալ Հրայր Աթասյանը ենթակա է պատժի ազատազրկման ձևով, որը չի կարող նվազ լինել վեց տարի ժամկետով ազատազրկումից, քանի որ այդ հոդվածի սանկցիայով, որպես առավելագույն պատիժ սահմանված է ազատազրկում ութ տարի ժամկետով։
Դատարանը գտնում է, որ իր նկատմամբ նշանակված պատիժն ամբաստանյալ Հրայր Աթասյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով ամբաստանյալի գույքի վրա դրված կալանքի հարցը` դատարանը գտնում է, որ Հրայր Հայկի Աթասյանի գույքի վրա նախաքննության մարմնի 09.07.2012թ. և 07.12.2012թ. որոշումներով դրված կալանքը պետք է վերացնել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 13.07.2012թ. որոշմամբ իրեղեն ապացույցներ ճանաչված, տուժողներ Աբութալեբ Ալիռեզայի Դելքաբադիին, Ալի Մոհամադբաղերի Շահրադին և Սաջադ Ռեզաալիի Նադերի Մոշթաղիին պատկանող երկու պայուսակները, երկու շապիկները, երկու տաբատները, մեկ լողազգեստը և անձնական հիգիենայի պարագաները, «Սամսունգ Գալաքսի» մոդելի բջջային հեռախոսը, «Փոլիս» տեսակի արևային ակնոցը, 323.000 ԻԻՀ ռիալ գումարը, տուժողներ Ֆրեյդուն Էսքանդարի Էբրահիմփուրին և Ասադոլահ Հաքինմուհամի Յազդանիին պատկանող «Այֆոն» մոդելի բջջային հեռախոսը, 450 ԱՄՆ դոլար և 50.000 ՀՀ դրամ գումարները պետք է վերադարձնել նրանց, ԻԻՀ բջջային օպերատորի հեռախոսաքարտը պետք է թողնել տուժող Ալի Մոհամադբաղերի Շահրադի, իսկ 580.000 ԻԻՀ ռիալ գումարը` տուժող Սաջադ Ռեզաալիի Նադերի Մոշթաղիի տնօրինմանը։
Քննարկելով խափանման միջոցի հարցը` դատարանը գտնում է, որ ամբաստանյալ Հրայր Աթասյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Հրայր Հայկի Աթասյանին մեղավոր ճանաչել երկու դրվագով` Հայաստանի Հանրապետության քրեական օրենսգրքի 177-րդ հոդվածի 3-րդ մասի 1.1 կետով նախատեսված հանցանքներում և դատապարտել.
- առաջին դրվագով` ազատազրկման 6 /վեց/ տարի ժամկետով` առանց գույքի բռնագրավման,
- երկրորդ դրվագով` ազատազրկման 6 /վեց/ տարի ժամկետով` առանց գույքի բռնագրավման։
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Հրայր Հայկի Աթասյանի նկատմամբ պատիժ նշանակել ազատազրկում 7 /յոթ/ տարի ժամկետով` առանց գույքի բռնագրավման, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. հուլիսի 07-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Հրայր Հայկի Աթասյանի գույքի վրա նախաքննության մարմնի 09.07.2012թ. և 07.12.2012թ. որոշումներով դրված կալանքը վերացնել։
Դատավճռի օրինական ուժի մեջ մտնելուց հետո, 13.07.2012թ. որոշմամբ իրեղեն ապացույցներ ճանաչված, տուժողներ Աբութալեբ Ալիռեզայի Դելքաբադիին, Ալի Մոհամադբաղերի Շահրադին և Սաջադ Ռեզաալիի Նադերի Մոշթաղիին պատկանող երկու պայուսակները, երկու շապիկները, երկու տաբատները, մեկ լողազգեստը և անձնական հիգիենայի պարագաները, «Սամսունգ Գալաքսի» մոդելի բջջային հեռախոսը, «Փոլիս» տեսակի արևային ակնոցը, 323.000 ԻԻՀ ռիալ գումարը, տուժողներ Ֆրեյդուն Էսքանդարի Էբրահիմփուրին և Ասադոլահ Հաքինմուհամի Յազդանիին պատկանող «Այֆոն» մոդելի բջջային հեռախոսը, 450 ԱՄՆ դոլար և 50.000 ՀՀ դրամ գումարները վերադարձնել նրանց, ԻԻՀ բջջային օպերատորի հեռախոսաքարտը թողնել տուժող Ալի Մոհամադբաղերի Շահրադի, իսկ 580.000 ԻԻՀ ռիալ գումարը` տուժող Սաջադ Ռեզաալիի Նադերի Մոշթաղիի տնօրինմանը։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ