ԵԿԴ/0192/01/12







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«11» դեկտեմբերի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Կ.Կարապետյան
մեղադրող Ա.Սիմոնյան
պաշտպան Գ.Հակոբյան
տուժող Խ.Բադալյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արայիկ Պարույրի Ենոքյանի` ծնված 1968 թվականի հունվարի 7-ին Երևան քաղաքում, ազգությամբ հայ, ՀՀ քաղաքացի, ամուսնացած, չի աշխատում, նախկինում չդատապարտված, բնակվել է Երևան քաղաքի Գյուլիքեխվյան փողոցի 9-րդ շենքի 23-րդ բնակարանում, մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, արգելանքի տակ է 2012 թվականի մարտի 15-ից:
1. Գործի դատավարական նախապատմությունը.
2012 թվականի մարտի 15-ին ՀՀ ոստիկանության քննչական գլխավոր վարչության ՀԿԳ քննության վարչության բաժնի պետի տեղակալ Ա.Կարապետյանի որոշմամբ ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության հատկանիշներով հարուցվել և վարույթ է ընդունվել թիվ 69102512 քրեական գործը:
2012 թվականի մարտի 17-ին ՀՀ ոստիկանության քննչական գլխավոր վարչության ՀԿԳ քննության վարչության բաժնի պետի տեղակալ Ա.Կարապետյանի որոշմամբ թիվ 69102512 քրեական գործով Արայիկ Պարույրի Ենոքյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով:
2012 թվականի հոկտեմբերի 9-ին ՀՀ ոստիկանության քննչական գլխավոր վարչության ՀԿԳ քննության վարչության բաժնի պետի տեղակալ Ա.Կարապետյանի որոշմամբ թիվ 69102512 քրեական գործով Արայիկ Պարույրի Ենոքյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով:
2012 թվականի հոկտեմբերի 26-ին Արայիկ Պարույրի Ենոքյանի վերաբերյալ թիվ 69102512 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0192/01/12 համարը:
Արայիկ Պարույրի Ենոքյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով` այն արարքի համար, որ նա ուրիշի առանձնապես խոշոր չափի գույքը հափշտակելու դիտավորությամբ, չարաշահելով իր ծանոթ Խաժակ Լիպարիտի Բադալյանի վստահությունը, գումարը տարադրամի փոխանակման գործում ներդնելու, ինչպես նաև` բորսայում գործարքներ կատարելու և ստացված եկամուտը հավասար բաժանելու պատրվակով, միասնական հանցավոր մտադրությամբ, 2009 թվականի կեսերից մինչև 2011 թվականի նոյեմբեր ամիսն ընկած ժամանակահատվածում` տարբեր օրերի, վերջինիցս խաբեությամբ մաս-մաս ստացել և հափշտակել է առանձնապես խոշոր չափով` 2.450.424.320 ՀՀ դրամին համարժեք 6.376.000 ԱՄՆ դոլար:
2. Արագացված դատական քննություն.
Մինչ դատաքննությունն սկսելն ամբաստանյալ Արայիկ Պարույրի Ենոքյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արայիկ Պարույրի Ենոքյանը կատարել է արարք` նախատեսված ՀՀ քրեական օրենսգրքի 178-րդ հոդվածի 3-րդ մասի 1-ին կետով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, կատարածի համար զղջալը, ՀՀ ոստիկանության ինֆորմացիոն կենտրոնի պահանջագիրը, ծննդյան վկայականի պատճենը, բնութագիրը, եկավ հետևյալ եզրահանգման.
Արայիկ Ենոքյանի անձը դրականորեն բնութագրող հանգամանքներ են ամուսնացած լինելը, անչափահաս երեխային խնամելը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Արայիկ Ենոքյանի պատասխանատվությունն ու պատիժը մեղմացնող հանգամանքներ են նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Արայիկ Ենոքյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Արայիկ Ենոքյանը ենթակա է քրեական պատասխանատվության և պատժի:
Դատարանը, հաշվի առնելով Արայիկ Ենոքյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Արայիկ Ենոքյանի կատարած արարքի համար ՀՀ քրեական օրենսգրքի 178-րդ հոդվածի 3-րդ մասի սանկցիայով որպես հիմնական պատիժ նախատեսված է միայն ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի: Դատարանը գտնում է, որ ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված արարք կատարելու համար Արայիկ Ենոքյանի նկատմամբ չպետք է նշանակել ՀՀ քրեական օրենսգրքի 178-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Դատարանը գտնում է, որ Արայիկ Ենոքյանի պատժի կրման սկիզբը պետք է հաշվել 2012 թվականի մարտի 15-ից, քանի որ նա ձերբակալվել է այդ օրը, իսկ 2012 թվականի մարտի 17-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Արայիկ Ենոքյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Արայիկ Ենոքյանից դատարանի նախաձեռնությամբ ենթակա չեն բռնագանձման, քանի որ տուժող Խաժակ Բադալյանի կողմից իր գույքային շահերն անձամբ պաշտպանելու անհնարինության մասին տվյալները բացակայում են: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև հանցագործությամբ պատճառված գույքային վնասի հատուցումը կամ գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը:
Սույն գործով 2012 թվականի մարտի 19-ին և 2012 թվականի հոկտեմբերի 9-ին կայացվել են գույքի վրա կալանք դնելու մասին որոշումներ, համաձայն որոնց որոշվել է քրեական գործով հնարավոր քաղաքացիական հայցը, գույքի բռնագրավումը կամ դատական ծախսերն ապահովելու նպատակով կալանք դնել Արայիկ Ենոքյանի գույքի վրա: Դատարանը, նկատի ունենալով, որ սույն քրեական գործով քաղաքացիական հայց չի ներկայացվել, վերոգրյալ հիմնավորմամբ նրա նկատմամբ որպես լրացուցիչ պատիժ գույքի բռնագրավում չի նշանակվել և չկան բռնագանձման ենթակա դատական ծախսեր, գտնում է, որ դատավճիռն օրինական ուժի մեջ մտնելուց հետո` 2012 թվականի մարտի 19-ի և 2012 թվականի հոկտեմբերի 9-ի որոշումներով Արայիկ Պարույրի Ենոքյանի գույքի վրա դրված կալանքը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Արայիկ Պարույրի Ենոքյանին մեղավոր ճանաչել ՀՀ քրեական օրենսգրքի 178-րդ հոդվածի 3-րդ մասի 1-ին կետով և պատիժ նշանակել ազատազրկում` 5 (հինգ) տարի ժամկետով` առանց գույքի բռնագրավման, պատժի կրման սկիզբը հաշվելով 2012 թվականի մարտի 15-ից:
Արայիկ Պարույրի Ենոքյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռն օրինական ուժի մեջ մտնելուց հետո 2012 թվականի մարտի 19-ի և 2012 թվականի հոկտեմբերի 9-ի որոշումներով Արայիկ Պարույրի Ենոքյանի գույքի վրա դրված կալանքը վերացնել:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ