ԵԿԴ/0186/01/12






ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


«15» նոյեմբերի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Կ.Կարապետյանի, մասնակցությամբ մեղադրող Հ.Էյրամջյանի, ամբաստանյալ Դավիթ Յուրիկի Զոհրաբյանի, դռնբաց դատական նիստում քննելով քրեական գործն ըստ մեղադրանքի Դավիթ Յուրիկի Զոհրաբյանի (ծնված 1992 թվականի մայիսի 21-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատապարտված, չամուսնացած, չի աշխատում, հաշվառված է Երևան քաղաքի Գյուլիքեխվյան փողոցի 31-րդ շենքի 24-րդ բնակարանում, բնակվել է Երևան քաղաքի Կոմիտասի պողոտայի 26-րդ շենքի 108-րդ բնակարանում)` ՀՀ քրեական օրենսգրքի 113-րդ հոդվածի 1-ին մասով

ՊԱՐԶԵՑ

2012 թվականի օգոստոսի 4-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Ս.Հակոբյանի որոշմամբ ՀՀ քրեական օրենսգրքի 113-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13145712 քրեական գործը:
2012 թվականի օգոստոսի 17-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Ս.Հակոբյանի որոշմամբ թիվ 13145712 քրեական գործով Դավիթ Յուրիկի Զոհրաբյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով:
2012 թվականի հոկտեմբերի 23-ին Դավիթ Յուրիկի Զոհրաբյանի վերաբերյալ թիվ 13145712 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0186/01/12 համարը:
Դավիթ Յուրիկի Զոհրաբյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով այն արարքի համար, որ նա 2012 թվականի օգոստոսի 2-ին` ժամը 14:00-ի սահմաններում, Երևան քաղաքի Մոսկովյան 9-րդ շենքի 3ա բնակարանում վիճաբանել է Մկրտիչ Գալուստի Գալստյանի հետ, որի ընթացքում բնակարանում գտնվող դանակով հարվածել է Մկրտիչ Գալստյանին և դիտավորությամբ նրա առողջությանը պատճառել միջին ծանրության վնաս` աջ բազկի վերին երրորդականի կտրած վերքի` երկգլխանի մկանի մասնակի վնասման, աջ ուսահոդի շրջանի առաջային մակերեսի կտրած վերքի, ձախ դաստակի հինգերորդ մատի եղնգային ֆալանգի կտրած վերքի, որովայնի և կրծքավանդակի ծակած-կտրած չթափանցող վերքերի, պարանոցի և դեմքի շրջանի ծակած և կտրած արյունահոսող վերքերի ձևով:
2012 թվականի նոյեմբերի 13-ին Դատարան ներկայացված թվով երեք դիմումների համաձայն` տուժող Մկրտիչ Գալուստի Գալստյանը հայտնել է, որ ամբաստանյալ Դավիթ Յուրիկի Զոհրաբյանի կողմից հատուցվել է իր բուժման ծախսերը, ինքը հաշտվել է նրա հետ և չի ցանկանում, որ նա ենթարկվի քրեական պատասխանատվության:
Դատական քննության ժամանակ տուժող Մկրտիչ Գալուստի Գալստյանը հայտնեց, որ հաշտվել է ամբաստանյալ Դավիթ Յուրիկի Զոհրաբյանի հետ և նշեց, որ գիտակցում է հաշտվելու հետևանքները:
Դատական քննության ժամանակ ամբաստանյալ Դավիթ Յուրիկի Զոհրաբյանը հայտնեց, որ ինքը նույնպես հաշտվել է տուժող Մկրտիչ Գալուստի Գալստյանը հետ և գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 113-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Մկրտիչ Գալուստի Գալստյանը և ամբաստանյալ Դավիթ Յուրիկի Զոհրաբյանը հաշտվել են միմյանց հետ, գտնում է, որ թիվ ԵԿԴ/0186/01/12 քրեական գործի վարույթը պետք է կարճել և ամբաստանյալ Դավիթ Յուրիկի Զոհրաբյանի նկատմամբ ՀՀ քրեական օրենսգրքի 113-րդ հոդվածի 1-ին մասով քրեական հետապնդումը դադարեցնել:
Դատարանը գտնում է, որ Դավիթ Յուրիկի Զոհրաբյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ որոշումն օրինական ուժի մեջ մտնելուց հետո` 2012 թվականի հոկտեմբերի 10-ի որոշմամբ իրեղեն ապացույց ճանաչված տուժող Մկրտիչ Գալուստի Գալստյանի հագուստները պետք է վերադարձնել նրան:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 116-րդ, 119-րդ, 151-րդ, 183-րդ և 313-րդ հոդվածներով` Դատարանը
ՈՐՈՇԵՑ

Թիվ ԵԿԴ/0186/01/12 քրեական գործի վարույթը կարճել և Դավիթ Յուրիկի Զոհրաբյանի նկատմամբ ՀՀ քրեական օրենսգրքի 113-րդ հոդվածի 1-ին մասով քրեական հետապնդումը դադարեցնել` տուժող Մկրտիչ Գալուստի Գալստյանի հաշտվելու հիմքով:
Դավիթ Յուրիկի Զոհրաբյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումն օրինական ուժի մեջ մտնելուց հետո 2012 թվականի հոկտեմբերի 10-ի որոշմամբ իրեղեն ապացույց ճանաչված տուժող Մկրտիչ Գալուստի Գալստյանի հագուստները վերադարձնել նրան:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ