ԵԿԴ/0184/01/12




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«15» նոյեմբերի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան)

նախագահող դատավոր
դատական նիստերի քարտուղար
մեղադրող

Մ.Պապոյան
Կ.Կարապետյան
Լ.Չարխիֆալակյան
դռնբաց դատական նիստում քննեց քրեական գործն ըստ մեղադրանքի`
Անդրանիկ Արայիկի Մարտիրոսյանի` ծնված 1992 թվականի մարտի 20-ին Չարենցավան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում չդատապարտված, հաշվառված է Չարենցավան քաղաքի 1ա թաղամասի 1-ին շենքի 36-րդ բնակարնում, բնակվում է Երևան քաղաքի Գուլակյան փողոցի 39/1 տանը, մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2012 թվականի սեպտեմբերի 15-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 15106212 քրեական գործը:
2012 թվականի սեպտեմբերի 15-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Կ.Ներսիսյանի որոշմամբ թիվ 15106212 քրեական գործով Անդրանիկ Արայիկի Մարտիրոսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով:
2012 թվականի հոկտեմբերի 19-ին Անդրանիկ Արայիկի Մարտիրոսյանի վերաբերյալ թիվ 15106212 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որտեղ քրեական գործին շնորհվել է ԵԿԴ/0184/01/12 համարը:
Անդրանիկ Արայիկի Մարտիրոսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով` այն արարքի համար, որ նա, 2012 թվականի սեպտեմբերի 15-ին` ժամը 00:30-ի սահմաններում, Երևան քաղաքի Աբովյան 39 հասցեում գտնվող «Կրիստալ» գիշերային ակումբում, պարուհիների հանդերձարան ներս չթողնելու համար, վճաբանել է հիշյալ ակումբի աշխատակից Գենադի Սամվելի Թովմասյանի հետ, ապա դիտավորությամբ կոպիտ կերպով խախտելով հասարակական կարգը` խանգարելով ակումբի բնականոն աշխատանքը և բացահայտ անհարգալից վերաբերմունք դրսևորելով հասարակության` աշխատողների նկատմամբ, շուրջ 5-10 րոպե տևողությամբ բարձրաձայն սեռական բնույթի անհասցե հայհոյանքներ տվել, որի ժամանակ իրեն պատկանող` «Կառլ 2005 Մագնում-6413» (թույլտվություն` թիվ Գ-3402) գործարանային համարի գազային ատրճանակից երկու անգամ կրակ է արձակել դեպի օդ:
2. Ապացույցների հետազոտում և գնահատում.
Դատական քննության ընթացքում ամբաստանյալ Անդրանիկ Մարտիրոսյանն առաջադրված մեղադրանքում իրեն մեղավոր ճանաչեց և օգտվելով իր իրավունքից հրաժարվեց ցուցմունք տալ:
Ամբաստանյալ Անդրանիկ Մարտիրոսյանը նախնական քննության ընթացքում 2012 թվականի սեպտեբերի 15-ին ցուցմունք է տվել այն մասին, որ նախկինում մի քանի օր ինքն աշխատել է «Կրիստալ» ակումբում որպես մենեջեր: 2012 թվականի սեպտեմբերի 15-ին` ժամը 24:00 սահմաններում, գնացել է «Կրիստալ» ակումբ զվարճանալու: Ակումբում ինքը ցանկացել է երգ պատվիրել, որի պատճառով փորձել է մտնել դիջեյի սենյակ: Այդ պահին ակումբի մենեջերը մոտեցել է իրեն և ասել է, որ ինքը չի կարող այդ սենյակ մտնել, քանի որ այն պարուհիների հանդերձարանն է: Իրենք սկսել են վիճաբանել: Կոնկրետ չի հիշում ինչ բառեր են միմյանց ասել, սակայն ոչ ինքը և ոչ ակումբի մենեջերը հայհոյանքներ չեն տվել: Վիճաբանության ժամանակ ինքը նյարդայնացել է և շալվարի գոտու աջ մասից հանել իր անձնական գազային ատրճանակն ու երկու անգամ կրակել օդ: Վիճաբանությունը տևել է 5-10 րոպե: Վիճաբանության ժամանակ եղել են նաև քաշքշոցներ, սակայն ինքը որևէ մեկին չի հարվածել և իրեն էլ ոչ ոք չի հարվածել:
Ամբաստանյալ Անդրանիկ Մարտիրոսյանը նախնական քննության ընթացքում 2012 թվականի սեպտեբերի 18-ին, ցուցմունք է տվել այն մասին, որ 2012 թվականի սեպտեմբերի 15-ին` ժամը 00:30-ի սահմաններում, ինքը եղել է «Կրիստալ» գիշերային ակումբում: Այդ ժամանակ ինքը ցանկացել է մտնել դիջեյի սենյակ, սակայն ակումբի մենեջեր Գենադին իրեն թույլ չի տվել` ասելով, որ դա պարուհիների հանդերձարան է: Իր և Գենադիի միջև վիճաբանություն է սկսվել: Վիճաբանության մանրամասները չի հիշում, հնարավոր է, որ վիճաբանության ժամանակ սեռական բնույթի հայհոյանքներ տված լինի, սակայն դրանք եղել են անհասցե: Վիճաբանության ժամանակ իրեն ոչ ոք չի հարվածել, ինքը նույնպես ոչ ոքի չի հարվածել: Ուղղակի այդ ընթացքում նյարդայնացած է եղել, գոտկատեղից հանել է իր անձնական գազային ատրճանակը և վախեցնելու համար երկու անգամ օդ է կրակել: Զղջում է կատարածի համար և խնդրում է իր նկատմամբ մեղմ վերաբերվել:
Վկա Գենադի Թովմասյանը դատական քննության ընթացքում ցուցմունք տվեց այն մասին, որ ինքն աշխատում է Երևան քաղաքի Աբովյան փողոցում գտնվող «Կրիստալ» գիշերային ակումբում` որպես մենեջեր: 2012 թվականի սեպտեմբեր 15-ին Անդրանիկ Մարտիրոսյանը եղել է ակումբում, և այդ ժամանակ նա ցանկացել է մտնել պարուհիների հանդերձարան: Ինքն ասել է, որ ներս մտնել չի կարելի, և իրենց միջև վիճաբանություն է սկսվել: Այնուհետև ինքը մտել է պարուհիների հանդերձարան և մի քանի րոպե հետո լսվել են կրակոցների ձայներ: Միջադեպը տևել է 5-10 րոպե:
Վկա Վիգեն Շահբազյանը դատական քննության ընթացքում ցուցմունք տվեց այն մասին, որ ինքը Երևան քաղաքի Աբովյան 39 հասցեում գտնվող «Կրիստալ» ակումբի սեփականատերն է: 2012 թվականի սեպտեմբերն` (օրը չի հիշում) ժամը 23:00-ի սահմաններում, ինքը գնացել է իր ակումբ և տեսել, որ Անդրանիկ Մարտիրոսյանին այդտեղից դուրս են հանում: Այդ ժամանակ ինքն ու Անդրանիկը զրուցել են, որի ժամանակ անհասցե հայհոյանքներ են եղել: Այնուհետև ինքը ակումբի աշխատակիցներից տեղեկացել է, որ Անդրանիկը ցանկացել է մտնել հանդերձարան, որի պատճառով նրա և Գենադի Թովմասյանի միջև վիճաբանություն է սկսվել, որի ժամանակ Անդրանիկը կրակել է:
Վկա Հայկանուշ Վարդանյանը դատական քննության ընթացքում ցուցմունք տվեց այն մասին, որ ինքն աշխատում է «Կրիստալ» գիշերային ակումբում` որպես մատուցողուհի: Դեպքի օրն ինքը Անդրանիկ Մարտիրոսյանն տեսել է ակումբում: Այնուհետև ինքը լսել է երկու կրակոցի ձայն:
Վկա Գեորգի Միրզոյանը դատական քննության ընթացքում ցուցմունք տվեց այն մասին, որ ինքը աշխատում է «Կրիստալ» ակումբում` որպես բարմեն: 2012 թվականի սեպտեմբերն` (օրը չի հիշում) ժամը 24:00-ի սահմաններում, ակումբում կրակոցի ձայներ են հնչել, ինչից ինքը վախեցել է ու փախել: Ինքը նկատել է, որ ակումբում խառնաշփոթ է առաջացել:
Վկա Լիանա Գրիգորյանը դատական քննության ընթացքում ցուցմունք տվեց այն մասին, որ ինքն աշխատում է «Կրիստալ» գիշերային ակումբում: Դեպքի օրն Անդրանիկ Մանուկյանը ցանկացել է մտնել պարուհիների հանդերձարան, որից հետո Անդրանիկի և Գենադիի միջև վեճ է սկսվել, և կրակոցներ են հնչել: Այդ վիճաբանությունը տևել է մոտ 10 րոպե:
Վկա Վլադիմիր Մանուկյանը դատական քննության ընթացքում ցուցմունք տվեց այն մասին, որ ինքն աշխատում է Երևան քաղաքի Աբովյան 39 հասցեում գտնվող «Կրիստալ» գիշերային ակումբում` որպես դիջեյ: Ակումբում տեղի ունեցած դեպքի պահին ինքը չի լսել, թե ինչ է պատահել, քանի որ եղել է ականջակալերով: Սակայն հետո տեղեկացել է, որ վիճաբանություն է եղել, որի ժամանակ Անդրանիկ Մարտիրոսյանը կրակել է:
Փորձագետի 2012 թվականի հոկտեմբերի 1-ի թիվ 28391203 եզրակացության համաձայն` ներկայացված ատրճանակը հանդիսանում է «Կառլ-Մագնում» տեսակի, 9մմ տրամաչափի, գործարանային արտադրության գազային ատրճանակ, որի համարն է 6413, հանդիսանում է գազային զենք և պիտանի է նպատակային օգտագործման համար: Ներկայացված ատրճանակը հրազեն չի հանդիսանում: Ներկայացված «Կառլ-Մագնում» թիվ 6413 ատրճանակի վերջին մաքրումից հետո կատարվել է կրակոց` ածուխ վառոդով լիցքավորված փամփուշտով: Պարզել կատարված կրակոցի վաղեմությունը հնարավոր չէ` գիտականորեն մշակված մեթոդիկայի բացակայության պատճառով:
ՀՀ «Փորձագիտական կենտրոն» ՊՈԱ կազմակերպության տնօրենի 2012 թվականի հոկտեմբերի 1-ի թիվ 28391203 գրության համաձայն` փորձաքննության արժեքը կազմել է 55.200 (հիսունհինգ հազար երկու հարյուր) ՀՀ դրամ:
Իրեղեն ապացույց ճանաչելու մասին 2012 թվականի հոկտեմբերի 10-ի որոշման համաձայն` գործարանային արտադրության 9մմ տրամաչափի «Կառլ 2005 Մագնում-6413» ատրճանակը ճանաչվել է իրեղեն ապացույց:
ՀՀ ոստիկանության ինֆորմացիոն կենտրոնի 2012 թվականի հոկտեմբերի 2-ի պահանջագրի համաձայն` 2012 թվականի հունիսի 21-ին Անդրանիկ Մարտիրոսյանի նկատմամբ ՀՀ քրեական օրենսգրքի 117-րդ հոդվածով քրեական հետապնդում չի իրակացվել` ՀՀ քրեական օրենսգրքի 35-րդ հոդված 1-ին մասի 4-րդ կետով նախատեսված հիմքով:
Արաբկիրի թիվ 9 տեղամասի լիազոր ներկայացուցչի կողմից հաստատված բնութագրի համաձայն` Անդրանիկ Մարտիրոսյանը բնութագրվում է դրական:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Անդրանիկ Արայիկի Մարտիրոսյանը 2012 թվականի սեպտեմբերի 15-ին` ժամը 00:30-ի սահմաններում, Երևան քաղաքի Աբովյան փողոցի 39 հասցեում գտնվող «Կրիստալ» գիշերային ակումբում, իրեն պարուհիների հանդերձարան ներս չթողնելու պատճառով, վճաբանել է ակումբի աշխատակից Գենադի Սամվելի Թովմասյանի հետ, շուրջ 5-10 րոպե տևողությամբ բարձրաձայն հայհոյանքներ տվել և «Կառլ 2005 Մագնում-6413» գազային ատրճանակից երկու անգամ կրակել օդ: Այսինքն` Անդրանիկ Արայիկի Մարտիրոսյանը հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպիտ կերպով խախտել է հասարակական կարգը, ինչը համապատասխանում է ՀՀ քրեական օրենսգրքի 258-րդ հոդվածի 1-ին մասի հատկանիշներին:
Ապացուցված է Անդրանիկ Արայիկի Մարտիրոսյանի մեղավորությունը ՀՀ քրեական օրենսգրքի 258-րդ հոդվածի 1-ին մասով նախատեսված արարքը կատարելու մեջ:
Անդրանիկ Մարտիրոսյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Դատարանն արձանագրում է, որ Անդրանիկ Մարտիրոսյանի պատասխանատվությունն ու պատիժը մեղմացնող և ծանրացնող հանգամանքներ սույն քրեական գործում առկա չեն:
Կատարած արարքի համար ամբաստանյալ Անդրանիկ Մարտիրոսյանը ենթակա է քրեական պատասխանատվության և պատժի:
Դատարանը, հաշվի առնելով Անդրանիկ Մարտիրոսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, պատասխանատվությունն ու պատիժը մեղմացնող և ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 258-րդ հոդվածի 1-ին մասի սանկցիայով նախատեսված է պատիժ նաև տուգանքի ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Անդրանիկ Մարտիրոսյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2012 թվականի հոկտեմբերի 10-ի որոշմամբ իրեղեն ապացույց ճանաչված` «Կառլ 2005 Մագնում-6413» ատրճանակը պետք է բռնագրավել և հանձնել ՀՀ ոստիկանությանը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածով նախատեսված դատական ծախսերն ամբաստանյալ Անդրանիկ Մարտիրոսյանից դատարանի նախաձեռնությամբ ենթակա չեն բռնագանձման, քանի որ նշված հոդվածի 1-ին մասի 1-ին կետով նախատեսված դատական ծախս սույն քրեական գործով չկա: Ամբաստանյալից բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված ծախսեր սույն քրեական գործով առկա չեն, իսկ 2-րդ և 5-րդ, կետերով նախատեսված դատական ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետով նախատեսված դատական ծախսին, ապա Դատարանը գտնում է, որ Անդրանիկ Մարտիրոսյանից պետք է բռնագանձել փորձաքննության համար վճարվելիք գումարները` 55.200 (հիսունհինգ հազար երկու հարյուր) ՀՀ դրամ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Անդրանիկ Արայիկի Մարտիրոսյանին մեղավոր ճանաչել ՀՀ քրեական օրենսգրքի 258-րդ հոդվածի 1-ին մասով և պատիժ նշանակել տուգանք` նվազագույն աշխատավաձի հիսնապատիկի չափով:
Անդրանիկ Արայիկի Մարտիրոսյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2012 թվականի հոկտեմբերի 10-ի որոշմամբ իրեղեն ապացույց ճանաչված «Կառլ 2005 Մագնում-6413» ատրճանակը բռնագրավել և հանձնել ՀՀ ոստիկանությանը:
Անդրանիկ Արայիկի Մարտիրոսյանից, հօգուտ Հայաստանի Հանրապետության, որպես դատական ծախս, բռնագանձել 55.200 (հիսունհինգ հազար երկու հարյուր) ՀՀ դրամ:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ