Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

12 դեկտեմբերի 2012թ. ք. Երևան

ԵԿԴ-0171/01/12

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղարներ` Է. Մկրտչյան,
Լ. Առաքելյան,
Ա. Հովհաննիսյան,

մասնակցությամբ
մեղադրող`
Երևանի Կենտրոն և Նորք-Մարաշ վարչական
շրջանների դատախազի տեղակալ Լ. Չարխիֆալակյանի,



դատարանում, դռնբաց դատական նիստում քննեց գործն ըստ մեղադրանքի
Կամո Թորգոմի Հովհաննիսյանի`
ծնված 1969թ. դեկտեմբերի 31-ին Արարատի մարզի Այնթապ գյուղում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուսնացած, խնամքին մինչև տասնչորս տարեկան երկու երեխա, հաշվառված է և բնակվում է Արարատի մարզի Այնթապ գյուղի 10-րդ փողոցի թիվ 5 տանը, կալանքի տակ չէ, մեղադրվում է ՀՀ քրեական օրենսգրքի 268-րդ հոդվածի 1-ին մասով։



Գործի դատավարական նախապատմությունը

Թիվ 13119012 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2012թ. ապրիլի 27-ին, ՀՀ քրեական օրենսգրքի 268-րդ հոդվածի 1-ին մասով։
Քննիչի 24.09.2012թ. որոշմամբ, թիվ 13119012 քրեական գործի նյութերով, անհայտ անձի կողմից, գործով չպարզված ժամանակ և հանգամանքներում Կամո Թորգոմի Հովհաննիսյանին ապօրինի 0,15 գրամ ընդհանուր քաշով 3 հատ «տրամադոլ» տեսակի հոգեմետ նյութ պարունակող և 1 հատ 0,002 գրամ ընդհանուր քաշով «լորազեպամ» տեսակի հոգեմետ նյութ պարունակող դեղահաբեր իրացնելու, ինչպես նաև վերջինիս և Արմեն Կարապետյանին, դարձյալ գործով չպարզված ժամանակ և հանգամանքներում, չպարզված քանակությամբ ափիոնի և կանաբիսի խմբին պատկանող թմրամիջոցներ, չպարզված քանակությամբ «տրամադոլ» տեսակի հոգեմետ դեղամիջոցներ իրացնելու դեպքի առթիվ, ՀՀ քրեական օրենսգրքի 266-րդ հոդվածի 1-ին մասով հարուցվել է թիվ 15108412 քրեական գործը և այն առանձնացվել է առանձին վարույթում։
Ամբաստանյալ Կամո Թորգոմի Հովհաննիսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 268-րդ հոդվածի 1-ին մասով հետևյալ արարքի համար. «որ նա գործով չպարզված ժամանակ և հանգամանքներում, անհայտ անձից, առանց իրացնելու նպատակի ապօրինի ձեռք է բերել և վերնաշապիկի գրպանում ապօրինի պահել զգալի չափերի` 0,15 գրամ ընդհանուր քաշով «տրամադոլ» տեսակի հոգեմետ նյութ պարունակող 3 հատ դեղահաբեր և 0,002 գրամ ընդհանուր քաշով «լորազեպամ» տեսակի հոգեմետ նյութ պարունակող 1 հատ դեղահաբ։
2012թ-ի ապրիլի 26-ին, ժամը 20։45-ի սահմաններում, Կամո Հովհաննիսյանը թմրամիջոց ապօրինի պահելու կասկածանքով Երևան քաղաքի Սայաթ-Նովա փողոցի թիվ 39 շենքի նկուղային շքամուտքից բերման է ենթարկվել ՀՀ ոստիկանության կազմակերված հանցավորության դեմ պայքարի գլխավոր վարչություն, որտեղ էլ կատարված անձնական խուզարկության ընթացքում վերջինիս կողմից ապօրինի ձեռք բերված և պահվող նշված հոգեմետ նյութեր պարունակող դեղահաբերը հայտնաբերվել են։»։
2012թ. սեպտեմբերի 26-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Կամո Թորգոմի Հովհաննիսյանը գործով չպարզված ժամանակ և հանգամանքներում, անհայտ անձից, առանց իրացնելու նպատակի` իր գործածման համար ապօրինի ձեռք է բերել և վերնաշապիկի գրպանում ապօրինի պահել է զգալի չափի` 0,15 գրամ ընդհանուր քաշով «տրամադոլ» տեսակի հոգեմետ նյութ պարունակող երեք դեղահաբեր և 0,002 գրամ ընդհանուր քաշով «լորազեպամ» տեսակի հոգեմետ նյութ պարունակող մեկ դեղահաբ։ Այնուհետև, 2012թ. ապրիլի 26-ի երեկոյան, նախնական պայմանավորվածության համաձայն` իր ծանոթ, գործով վկա Արմեն Աշոտի Կարապետյանի հետ հանդիպելու և վերջինիս հետ ՌԴ-ում բնակվող իր ընկերոջ համար նկուղային տարածք ձեռք բերելու շուրջ խորհրդակցելու նպատակով, գնացել է Երևան քաղաքի Սայաթ-Նովա փողոցի թիվ 39 շենքի նկուղային տարածք, որտեղից թմրամիջոց պահելու կասկածանքով Կ. Հովհաննիսյանը և Ա. Կարապետյանը բերման են ենթարկել ՀՀ ոստիկանության կազմակերված հանցավորության դեմ պայքարի գլխավոր վարչություն։ Այնտեղ Կ. Հովհաննիսյանի անձնական խուզարկությամբ, վերջինիս վերնաշապիկի գրպանից հայտնաբերվել և առգրավվել են երեք հատ «տրամադոլ» տեսակի հոգեմետ նյութ պարունակող և մեկ հատ «լորազեպամ» տեսակի հոգեմետ նյութ պարունակող դեղահաբերը։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Կամո Հովհաննիսյանը նախկինում դատված չի եղել, անկեղծորեն զղջում է կատարածի համար, խնամքին ունի մինչև տասնչորս տարեկան երկու երեխա (Գոռ Կամոյի Հովհաննիսյանը` ծնված 23.01.2001թ. և Մերի Կամոյի Հովհաննիսյանը` ծնված 04.06.2003թ.-ին)։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Կամո Թորգոմի Հովհաննիսյանի ցուցմունքներով այն մասին, որ ոտքի կոտրվածքի պատճառով երկու անգամ վիրահատություն է տարել և բուժվել է թիվ 1 հիվանդանոցում, որտեղից էլ օրինական կարգով ստացել է «տրամադոլ» և «լորազեպամ» տեսակի հոգեմետ դեղեր։ Հոգեմետ դեղահաբերը պահել է իր մոտ, որպեսզի սուր ցավեր ունենալու դեպքում օգտագործի։ Ընդունում է, որ հոգեմետ դեղահաբեր չպետք է պահեր իր մոտ և զղջում է կատարածի համար։
/դատական նիստի արձանագրություն, գ.թ. 40-42, 74-75, 147-149, 194-196/
Վկա, Երևանի Մխիթար Հերացու անվան պետական բժշկական համալսարանի «Հերացի» թիվ 1 հիվանդանոցային համալիրի վնասվածքաբանության և օրթոպեդիայի կլինիկայի ղեկավար Արսեն Սամվելի Ազիզբեկյանի ցուցմունքներով այն մասին, որ Կամո Հովհաննիսյանի 2008թ. թիվ 998/150 և 2009թ. թիվ 2412/440 հիվանդության պատմագրերի ուսումնասիրությամբ վերջինս երկու անգամ ոտքի վիրահատություն է տարել թիվ 1 հիվանդանոցային համալիրում։ Այդ ընթացքում սուր ցավեր ունենալու պատճառով, հեղուկ վիճակում նրան ներարկվել են համապատասխան հաշվառման տակ գտնվող, հոգեմետ նյութեր հանդիսացող «տրամադոլ» և «դիազեպամ» տեսակի դեղորայք։ Կ. Հովհաննիսյանին, ինչպես նաև որևէ հիվանդի ոչ ինքը և ոչ էլ որևէ բուժ. աշխատակից հոգեմետ նյութ պարունակող դեղորայք չի տրամադրել և չէր էլ կարող տրամադրել, քանի որ դրանք համապատասխան հաշվառման մեջ են գտնվում և հիվանդները միայն ներարկման միջոցով են ստանում, որի վերաբերյալ համապատասխան գրանցում է կատարվում։ Քանի որ հիվանդանոցը հոգեմետ դեղորայքը հաբերի տեսքով, պինդ վիճակում երբևէ չի ստանում, ուստի բացառվում է հոգեմետ նյութեր պարունակող դեղահաբերի տրամադրումը հիվանդներից որևիցե մեկին, այդ թվում նաև` Կամո Հովհաննիսյանին։
/դատական նիստի արձանագրություն, գ.թ. 255-256/
Վկա Արմեն Աշոտի Կարապետյանի նախաքննական ցուցմունքով այն մասին, որ Կամո Հովհաննիսյանի հետ ծանոթացել է 2012թ. ապրիլի սկզբներին, Արարատի մարզի Այնթապ գյուղում, իր ծանոթ, նույն գյուղի բնակիչ և այժմ ԱՄՆ-ում բնակվող Պողոսի միջոցով։ Կ. Հովհաննիսյանի հետ հանդիպել է երեք անգամ և խոսակցության ընթացքում նրան հայտնել է, որ Երևան քաղաքի Սայաթ-Նովա փողոցի թիվ 39 շենքի նկուղային տարածքը վաճառվում է և դրա մուտքի բանալիները գտնվում են իր մոտ։ Կ. Հովհաննիսյանն իրեն հայտնել էր, որ իր ընկերը ցանկանում է Երևան քաղաքում նման տարածք գնել, ուստի 2012թ. ապրիլի 26-ին, պայմանավորվածության համաձայն` իր 055-37-64-26 հեռախոսահամարից զանգահարել է Կ. Հովհաննիսյանին և երեկոյան գնացել են նշված տարածք։ Երբ ցանկացել են մտնել Երևանի Սայաթ-Նովա փողոցի թիվ 39 շենքի նկուղային տարածք` իրենց բռնել են ոստիկանության աշխատակիցները և բերման ենթարկել ՀՀ ոստիկանության ԿՀԴՊ գլխավոր վարչություն, որտեղ Կամո Հովհաննիսյանի մոտից հայտնաբերվել են ինչ-որ հոգեմետ դեղահաբեր, որոնց վերաբերյալ ինքը տեղեկություն չի ունեցել և Կ. Հովհաննիսյանն այդ մասին իրեն ոչինչ չի հայտնել։ Երևան քաղաքի Սայաթ-Նովա փողոցի թիվ 39 շենքի նկուղային տարածքում դեռևս 1992թ. գործել է «Ալպիական մանուշակ» ռեստորանը, որը փաստացի տնօրինել է ինքը։ Քանի որ դեռևս սեփականաշնորհված չի եղել այդ տարածքը և ինքը ցանկություն է ունեցել աճուրդային կարգով ձեռք բերել այն` Կ. Հովհաննիսյանին հայտնել է, որ նշված նկուղային տարածքը վաճառվում է և նրան ցույց տալու նպատակով գնացել են այդ տարածք, որտեղից իրենց բերման են ենթարկել ոստիկանություն։
/գ.թ. 44-46/
Դատաքիմիական փորձաքննության 26.04.2012թ. թիվ 163Ք եզրակացությամբ, որի համաձայն` «Փորձաքննությանը ներկայացված «Трамадол 50 мг КRKA» գրառմամբ դեղաթիթեղում առկա թվով երեք դեղապարկուճներում /կապսուլաներում/ հայտնաբերվեց տրամադոլ տեսակի հոգեմետ նյութ։ Թվով երեք պարկուճներում տրամադոլ տեսակի հոգեմետ նյութի ընդհանուր քաշը կազմում է 0,15 գրամ։
Ծանոթություն. հետազոտությամբ ծախսվեց` մեկ դեղապարկուճ։»։
/գ.թ. 27-29/
Դատաքիմիական փորձաքննության 04.05.2012թ. թիվ 164Ք եզրակացությամբ, որի համաձայն` «Փորձաքննությանը ներկայացված «2 мг таб…» գրառմամբ դեղաթիթեղի վրա առկա թվով մեկ դեղահաբում հայտնաբերվեց լորազեպամ տեսակի հոգեմետ նյութ։ Հաբում առկա լորազեպամի քաշը կազմում է 0,002 գրամ։
Ծանոթություն. հետազոտությամբ ծախսվեց` կես հաբ։»։
/գ.թ. 160-163/
Դատաքիմիական փորձաքննության 2012թ. մայիսի 07-ի թիվ 0368 եզրակացությամբ, որի համաձայն`
«ա/ 26.04.2012թ. Արմեն Աշոտի Կարապետյանի մեզի փորձանմուշում հայտնաբերվեցին ափիոնի և կանաբիսի խմբի թմրամիջոցների թմրալկալոիդները և տրամադոլ տեսակի դեղամիջոցի մետաբոլիտները։
բ/ 26.04.2012թ. Արմեն Աշոտի Կարապետյանի մոտ 1.0սմ երկարությամբ մազի փորձանմուշում հայտնաբերվեցին ափիոնի և կանաբիսի խմբերի թմրամիջոցների թմրալկալոիդների հետքերը։»։
/գ.թ. 183/
Դատաքիմիական փորձաքննության 2012թ. մայիսի 07-ի թիվ 0369 եզրակացությամբ, որի համաձայն`
«ա/ 26.04.2012թ. Կամո Թորգոմի Հովհաննիսյանի մեզի փորձանմուշում հայտնաբերվեցին ափիոնի և կանաբիսի խմբի թմրամիջոցների թմրալկալոիդները և տրամադոլ տեսակի դեղամիջոցի մետաբոլիտները։
բ/ 26.04.2012թ. Կամո Թորգոմի Հովհաննիսյանի մոտ 0.8սմ երկարությամբ մազի փորձանմուշում հայտնաբերվեցին ափիոնի և կանաբիսի խմբերի թմրամիջոցների թմրալկալոիդների հետքերը։»։
/գ.թ. 184/
Դատանարկոլոգիական ամբուլատոր փորձաքննության 13.07.2012թ. թիվ 154-12 եզրակացությամբ, որի համաձայն` «Կամո Թորգոմի Հովհաննիսյանը տառապում է «Ափիոնային թմրամոլություն» ախտորոշմամբ, ուստի հարկադիր բուժման կարիք ունի, որի համար հակացուցումներ չկան։»։
/գ.թ. 206-207/
Որպես այլ փաստաթուղթ` ապացույց ճանաչված, անձին անձնական խուզարկության ենթարկելու մասին 26.04.2012թ. արձանագրությամբ, որի համաձայն` Կամո Հովհաննիսյանի անձնական խուզարկությամբ, նրա վերնաշապիկի ձախ գրպանից հայտնաբերվել են «Տրամադոլ» /«Трамадол/ գրառմամբ տուփով, կապույտ և սպիտակ երեք դեղահաբեր և «2 մգ» գրառմամբ տուփով մեկ սպիտակ դեղահաբ։ Ըստ Կ. Հովհաննիսյանի բանավոր հայտարարության` ինքը 2012թ. փետրվարին, Ռուսաստանի Դաշնության Մոսկվա քաղաքից տաս հատ «տրամադոլ» և երկու հատ «դիազեպամ» տեսակի դեղահաբեր է բերել։ Տաս հատ «տրամադոլ» տեսակի դեղահաբերից վեցն ինքը գործածել է խմելու եղանակով, իսկ երկու հատ «դիազեպամ» տեսակի դեղահաբերից գործածել է մեկը։
/գ.թ. 7, 217-218/
Որպես այլ փաստաթուղթ` ապացույց ճանաչված, Երևանի Մխիթար Հերացու անվան պետական բժշկական համալսարանի «Հերացի» թիվ 1 հիվանդանոցային համալիրում Կ. Հովհաննիսյանի անվամբ կազմված, 2008թ. թիվ 998/150 և 2009թ. թիվ 2412/440 հիվանդության պատմագրերով, որոնց համաձայն` այդ հիվանդանոցային համալիրից Կամո Թորգոմի Հովհաննիսյանը «տրամադոլ», «լորազեպամ» կամ «դիազեպամ» տեսակի հոգեմետ նյութեր պարունակող դեղահաբեր չի ստացել։ Միայն 2009թ.-ին Երևանի Մխիթար Հերացու անվան պետական բժշկական համալսարանի «Հերացի» թիվ 1 հիվանդանոցային համալիրում նրան հեղուկ վիճակում ներարկվել են «տրամադոլ» և «դիազեպամ» տեսակի հոգեմետ նյութեր, որոնք նույնպես նրան չեն տրամադրվել։
/գ.թ. 106-142, 217-218/
Իրեղեն ապացույց ճանաչված, 3 /երեք/ հատ 0,15 գրամ ընդհանուր քաշով «տրամադոլ» տեսակի և 1 /մեկ/ հատ 0,002 ընդհանուր քաշով «լորազեպամ» տեսակի հոգեմետ նյութեր պարունակող դեղահաբերով։
/գ.թ. 166/

Դատարանի իրավական վերլուծությունները


Վերլուծելով ամբաստանյալ Կամո Թորգոմի Հովհաննիսյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Կամո Թորգոմի Հովհաննիսյանի կողմից, նրա մեղավորությամբ, առանց իրացնելու նպատակի, զգալի չափերով հոգեմետ նյութեր ապօրինի ձեռք բերելը և պահելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 268-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Կամո Թորգոմի Հովհաննիսյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նախկինում դատված չի եղել, անկեղծորեն զղջում է կատարածի համար։ Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում խնամքին մինչև տասնչորս տարեկան երկու երեխայի առկայությունը, իսկ ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Կամո Թորգոմի Հովհաննիսյանն իր կատարած` Հայաստանի Հանրապետության քրեական օրենսգրքի 268-րդ հոդվածի 1-ին մասով նախատեսված հանցագործության համար ենթակա է պատժի ազատազրկման ձևով, քանի որ պատժի նվազ խիստ տեսակ կալանքը չի կարող ապահովել պատժի նպատակները։
Քննարկելով այն հարցը, թե արդյոք ամբաստանյալ Կամո Թորգոմի Հովհաննիսյանը պետք է կրի իր նկատմամբ նշանակված պատիժը, դատարանը գտնում է հետևյալը.
ՀՀ քրեական օրենսգրքի 70-րդ հոդվածի համաձայն` եթե դատարանը կալանքի, ազատազրկման, կարգապահական գումարտակում պահելու ձևով պատիժ նշանակելով հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին։
ՀՀ վճռաբեկ դատարանն իր` 2007թ. հունիսի 12-ի թիվ ՎԲ-124/07 որոշմամբ ՀՀ քրեական օրենսգրքի 70-րդ հոդվածի կիրառման կապակցությամբ արտահայտել է այն իրավական դիրքորոշումը, որ վկայակոչված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում և դրա կիրառումը սահմանափակված չէ նաև հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, որոնց նկատմամբ այն չի կարող կիրառվել։ ՀՀ վճռաբեկ դատարանը միաժամանակ նշել է. «ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է։ Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները։ Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց նշանակված պատիժը կրելու»։ ՀՀ վճռաբեկ դատարանը մեկ այլ` 2008թ. փետրվարի 1-ի թիվ ՎԲ-01/08 որոշմամբ նշել է, որ պատիժը պայմանականորեն չկիրառելու իրավական հիմքերը բացահայտելու համար ՀՀ քրեական օրենսգրքի 70-րդ հոդվածում սահմանված իրավադրույթներն անհրաժեշտ է մեկնաբանել նաև ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում, այսինքն` պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը։
Հաշվի առնելով վերոգրյալը և այն հանգամանքները, որ Կամո Հովհաննիսյանը կատարել է ոչ մեծ ծանրության հանցանք, որի համար նախատեսված ազատազրկման ձևով պատժի առավելագույն ժամկետը մեկ տարի է, նախկինում դատված չի եղել, անկեղծորեն զղջում է կատարածի համար, խնամքին ունի մինչև տասնչորս տարեկան երկու երեխա, հաշվի առնելով նաև ամբաստանյալի պատասխանատվությունն ու պատիժը ծանրացնող հանգամանքների բացակայությունը` դատարանը գտնում է, որ Կամո Հովհաննիսյանի կողմից կատարված հանցագործության հանրորեն վտանգավորության աստիճանը նվազել է և հնարավոր է հանգել հետևության, որ նրա ուղղվելը հնարավոր է առանց նրա նկատմամբ նշանակվող ազատազրկման ձևով պատիժը կրելու։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 15.06.2012թ. որոշմամբ իրեղեն ապացույց ճանաչված, 3 /երեք/ հատ 0,15 գրամ ընդհանուր քաշով «տրամադոլ» տեսակի և 1 /մեկ/ հատ 0,002 ընդհանուր քաշով «լորազեպամ» տեսակի հոգեմետ նյութեր պարունակող դեղահաբերը պետք է վերադարձնել վարույթն իրականացնող մարմնին` թիվ 15108412 քրեական գործով տնօրինելու համար։
Քննարկելով խափանման միջոցի հարցը` դատարանը գտնում է, որ ամբաստանյալ Կամո Հովհաննիսյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով ամբաստանյալի նկատմամբ հարկադրական բուժում կիրառելու հարցը՝ դատարանը գտնում է, որ ամբաստանյալ Կամո Թորգոմի Հովհաննիսյանի նկատմամբ պետք է կիրառել հարկադրական բուժում թմրամոլության դեմ և նրա վերաբերյալ նյութերը պետք է հանձնել առողջապահության մարմիններ` նրան բուժելու հարցը լուծելու համար։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Կամո Թորգոմի Հովհաննիսյանին մեղավոր ճանաչել Հայաստանի Հանրապետության քրեական օրենսգրքի 268-րդ հոդվածի 1-ին մասով նախատեսված հանցանքում և դատապարտել ազատազրկման 6 /վեց/ ամիս ժամկետով։
ՀՀ քրեական օրենսգրքի 70-րդ հոդվածի կիրառմամբ, ամբաստանյալ Կամո Թորգոմի Հովհաննիսյանի նկատմամբ պատիժը պայմանականորեն չկիրառել` սահմանելով փորձաշրջան 1 /մեկ/ տարի ժամկետով։ Կամո Հովհաննիսյանին պարտավորեցնել չփոխել մշտական բնակության վայրը` նրա վարքագծի նկատմամբ վերահսկողությունը դնելով ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի վրա։
Ամբաստանյալ Կամո Թորգոմի Հովհաննիսյանի նկատմամբ կիրառել հարկադրական բուժում թմրամոլության դեմ և նրա վերաբերյալ նյութերը հանձնել առողջապահության մարմիններ` նրան բուժելու հարցը լուծելու համար։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, 15.06.2012թ. որոշմամբ իրեղեն ապացույց ճանաչված, 3 /երեք/ հատ 0,15 գրամ ընդհանուր քաշով «տրամադոլ» տեսակի և 1 /մեկ/ հատ 0,002 ընդհանուր քաշով «լորազեպամ» տեսակի հոգեմետ նյութեր պարունակող դեղահաբերը վերադարձնել վարույթն իրականացնող մարմնին` թիվ 15108412 քրեական գործով տնօրինելու համար։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ