Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

26 սեպտեմբերի 2012թ. ք. Երևան

ԵԿԴ-0143/01/12

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,


մասնակցությամբ
մեղադրող`
Երևան քաղաքի դատախազության
ավագ դատախազ Ա. Մնացականյանի,

պաշտպան Ս. Սարգսյանի,

տուժողի իրավահաջորդ Հ. Գիժլարյանի,

տուժողի իրավահաջորդի ներկայացուցիչ Մ. Բաբայանի,


դատարանում, դռնբաց դատական նիստում քննեց գործն ըստ մեղադրանքի
Ռոման Հրանտի Հակոբյանի`
ծնված 1983թ. սեպտեմբերի 18-ին Ապարան քաղաքում, հայ, Հայաստանի Հանրապետության /այսուհետ ՀՀ/ քաղաքացի, բարձրագույն կրթությամբ, նախկինում չդատված, աշխատում է «Դաբլ Ռիելթի» ՍՊԸ-ում որպես տնօրեն, հաշվառված է ք. Ապարան, Ն. Ստեփանյան փողոցի թիվ 6 տանը, փաստացի բնակվել է Կոտայքի մարզի Զովունի գյուղում, կալանքի տակ է 13.06.2012թ.-ից, մեղադրվում է ՀՀ քրեական օրենսգրքի 242-րդ հոդվածի 2-րդ մասով։



Գործի դատավարական նախապատմությունը

Թիվ 60115012 քրեական գործը ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում հարուցվել է 2012թ. հունիսի 13-ին, ՀՀ քրեական օրենսգրքի 242-րդ հոդվածի 2-րդ մասով, ավտովթարի հետևանքով անզգուշությամբ Մարգարիտա Հրաչիկի Գիժլարյանին մահ պատճառվելու դեպքի առթիվ։
Քննիչի 2012թ. հուլիսի 26-ի որոշմամբ, թիվ 60115012 քրեական գործով Մարիամ Ռուբենի Գևորգյանին, Նարինե Խաչատուրի Գրիգորյանին պատճառված մարմնական վնասվածների մասով մեղադրյալ Ռոման Հրանտի Հակոբյանի նկատմամբ ՀՀ քրեական օրենսգրքի 242-րդ հոդվածի 1-ին մասով քրեական հետապնդում չի իրականացվել` հանցակազմի բացակայության պատճառաբանությամբ, իսկ Շամիրամ Գրիգորյանին պատճառված մարմնական վնասվածքների մասով` նրա և մեղադրյալ Ռ. Հակոբյանի հաշտվելու պատճառաբանությամբ։
Ամբաստանյալ Ռոման Հրանտի Հակոբյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով` հետևյալ արարքի համար. «որ նա խախտելով «Ճանապարհային երթևեկության անվտանգության ապահովման մասին» ՀՀ օրենքի 24 հոդվածի 5-րդ և 7-րդ կետերի պահանջները՝ չունենալով վարորդական իրավունքի վկայական և գտնվելով 0,46 աստիճանի ալկոհոլային հարբածության վիճակում, 2012թ. հունիսի 13-ին, ժամը 01.30-ի սահմաններում, իրեն վստահված «ԲՄՎ» մակնիշի 33 ԼՕ 321 պ/հ ավտոմեքենան վարել է Երևան քաղաքի Գր. Լուսավորիչ փողոցի կողմից Խանջյան փողոցով դեպի Սայաթ-Նովա փողոցի ուղղությամբ։ Հասնելով թիվ 11 շենքի դիմաց՝ թույլ է տվել «Ճանապարհային երթևեկության անվտանգության ապահովման մասին» ՀՀ օրենքի 23 հոդվածի 3-րդ մասի, ՃԵԿ-ի 65, 66 և 129 կետերի պահանջներին հակասող գործողություններ, այն է՝ գտնվելով ոչ սթափ վիճակում և մեքենան վարելով բնակավայրի սահմաններում գտնվող տվյալ ճանապարհահատվածում երթևեկության համար սահմանված թույլատրելի առավելագույն 60 կմ/ժամը գերազանցող՝ շուրջ 90-100 կմ/ժամ արագությամբ և հանդիպակաց ուղղության երթևեկելի ուղեմասով մոտեցող ավտոմեքենայի լապտերների հեռահար լույսից շլանալու պահից սկսած, երթևեկության անվտանգությունն ապահովելու և պատահարի առաջացումը բացառելու համար չի միացրել ավտոմեքենայի վթարային-լուսային ազդանշանը և չփոխելով երթևեկության գոտին, ժամանակին կատարած արգելակումով չի դանդաղեցրել իր ավտոմեքենայի ընթացքը, անհրաժեշտության դեպքում ընդհուպ մինչև մեքենան կանգնեցնելը, ինչի տեխնիկական հնարավորությունն ունեցել է՝ ինքն իրեն զրկելով ավտովթարը կանխելու տեխնիկական հնարավորությունից, մեքենայի ընթացքի ուղղությունը կտրուկ մանևրել է աջ, որի արդյունքում զրկված է եղել մեքենայի շարժման նկատմամբ կառավարումն ապահովելու տեխնիկական հնարավորությունից, որից ավտոմեքենան դարձել է անկառավարելի, ընկել կողասահքի մեջ, դուրս եկել երթևեկելի մասից և ընդհարվել բորդյուրին, այնուհետև՝ Երևան քաղաքի Խանջյան փողոցի թիվ 32 էլ. սյանը, որի հետևանքով ավտոմեքենայի ուղևոր Մարգարիտա Հրաչիկի Գիժլարյանին անզգուշությամբ պատճառել է մահ։»։
30.07.2012թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։



Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ, տրանսպորտային միջոցներ վարելու իրավունք չունեցող Ռոման Հրանտի Հակոբյանը խախտելով «Ճանապարհային երթևեկության անվտանգության ապահովման մասին» ՀՀ օրենքի 24-րդ հոդվածի 5-րդ և 7-րդ կետերի պահանջները՝ չունենալով վարորդական իրավունքի վկայական և գտնվելով 2-րդ աստիճանի ալկոհոլային հարբածության վիճակում, 2012թ. հունիսի 13-ին, ժամը 01.30-ի սահմաններում, իրեն վստահված «Բի Էմ Դաբլյու» մակնիշի, 33 ԼՕ 321 պետհամարանիշի ավտոմեքենան վարել է Երևան քաղաքի Գր. Լուսավորիչ փողոցի կողմից Խանջյան փողոցով դեպի Սայաթ-Նովա փողոցի ուղղությամբ։ Հասնելով թիվ 11 շենքի դիմաց՝ նա թույլ է տվել «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի, Ճանապարհային երթևեկության կանոնների 65-րդ, 66-րդ և 129-րդ կետերի պահանջներին հակասող գործողություններ, այն է՝ գտնվելով ոչ սթափ վիճակում և մեքենան վարելով բնակավայրի սահմաններում գտնվող տվյալ ճանապարհահատվածում երթևեկության համար սահմանված թույլատրելի առավելագույն 60 կմ/ժամը գերազանցող` շուրջ 100 կմ/ժամ արագությամբ, հանդիպակաց ուղղության երթևեկելի ուղեմասով մոտեցող ավտոմեքենայի լապտերների հեռահար լույսից շլանալու պահից սկսած, երթևեկության անվտանգությունն ապահովելու և պատահարի առաջացումը բացառելու համար չի միացրել ավտոմեքենայի վթարային-լուսային ազդանշանը և չփոխելով երթևեկության գոտին` ժամանակին կատարած արգելակումով չի դանդաղեցրել իր ավտոմեքենայի ընթացքը, անհրաժեշտության դեպքում ընդհուպ մինչև մեքենան կանգնեցնելը, ինչի տեխնիկական հնարավորությունն ունեցել է, ինքն իրեն զրկելով ավտովթարը կանխելու տեխնիկական հնարավորությունից` մեքենայի ընթացքի ուղղությունը կտրուկ մանևրել է դեպի աջ, որի արդյունքում զրկված է եղել ավտոմեքենայի շարժման նկատմամբ կառավարումն ապահովելու տեխնիկական հնարավորությունից։ Այդ պատճառով ավտոմեքենան դարձել է անկառավարելի, ընկել կողասահքի մեջ, դուրս եկել երթևեկելի մասից և ընդհարվել է եզրաքարին, այնուհետև` Երևան քաղաքի Խանջյան փողոցի թիվ 32 էլեկտրական սյանը։ Վթարի հետևանքով ավտոմեքենայի ուղևոր Մարգարիտա Հրաչիկի Գիժլարյանին անզգուշությամբ պատճառվել է մահ, նույն ավտոմեքենայի ուղևորներ Մարիամ Ռուբենի Գևորգյանին՝ առողջության կարճատև քայքայումով թեթև մարմնական վնասվածքներ, Նարինե Խաչատուրի Գրիգորյանին՝ առողջության թեթև վնասի հատկանիշներ չպարունակող, իսկ Շամիրամ Խաչատուրի Գրիգորյանին՝ կյանքին վտանգ սպառնացող ծանր մարմնական վնասվածքներ։
Քրեական գործի նախաքննության ընթացքում, «Դատաբժշկական գիտագործնական կենտրոն» պետական ոչ առևտրային կազմակերպությունում կատարվել է դատաբժշկական փորձաքննություն, որի արժեքը կազմել է 152.700 /հարյուր հիսուներկու հազար յոթ հարյուր/ ՀՀ դրամ գումար։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Ռ. Հակոբյանը նախկինում դատված չի եղել, իրեն լիովին մեղավոր ճանաչելով և տալով ճշմարտացի, ինքնախոստովանական ցուցմունքներ` անկեղծորեն զղջացել է կատարածի համար, տուժողի իրավահաջորդի հետ հաշտվել են, հանցագործությամբ պատճառված գույքային վնասը` տուժողի հուղարկավորության ծախսերը կամովին հատուցել է, իրեն վերագրվող արարքը կատարել է ալկոհոլ գործածած վիճակում։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Ռոման Հրանտի Հակոբյանի ինքնախոստովանական ցուցմունքներով այն մասին, որ աշխատում է անշարժ գույքի գործակալությունում որպես տնօրեն։ 2012թ. հունիսի 12-ին, ժամը 20.00-ի սահմաններում գտնվել է աշխատանքի վայրում, երբ զանգահարել է իր մտերիմ Մանանը և իր ու ընկերուհիների անունից հրավիրել «Փարվանա» ռեստորանային համալիր՝ մասնակցելու Շամիրամի ծննդյան տոնի շարունակությանը։ Ինքը հրավերը չի մերժել և ժամը 22.30-ից 23.00-ի սահմաններում գնացել է ռեստորան, որտեղ իրեն դիմավորել են Մանանը, Նարինեն, Շամիրամը, Մագան և Մանանի մայր Մարգարիտան։ Ժամը 00։15-ից հետո իրենց է միացել նաև իր ընկեր Արսենը, իսկ շուրջ 30 րոպե անց բոլորով դուրս են եկել ռեստորանից։ Ինքը նստել է մորաքրոջ որդու «Բի Էմ Դաբլյու» մակնիշի, 33 ԼՕ 321 պետհամարանիշի ավտոմեքենան, որը նախորդ օրվանից գտնվել է իր մոտ և ինքն է վարել։ Իր կողքի նստարանին նստել է Մանանը, հետևի նստարանի աջակողմյան հատվածում նստել է Նարինեն, Նարինեի ձախ կողքին՝ Շամիրամը, իսկ նրա կողքին՝ Մագան։ Արսենի մեքենայի մեջ նստել է Մանանի մայր Մարգարիտան։ Ինքն ավտոմեքենան վարել է Երևան քաղաքի Գր. Լուսավորիչ փողոցի կողմից Խանջյան փողոցով դեպի Սայաթ-Նովա փողոցի ուղղությամբ, հոծ գծից շուրջ 3 մետր հեռավորությամբ։ Խանջյան փողոցի գետնանցումից դուրս գալուց հետո զարգացնելով շուրջ 90-ից 100 կմ/ժամ արագություն` վերադասավորվել է երկրորդ ուղեգոտի և անցնելով որոշակի տարածություն` շուրջ հինգ վայրկյան շլացել է հանդիպակաց ուղղությամբ երթևեկող ավտոմեքենայի լույսերից, ապա կորցրել մեքենայի կառավարումը, ղեկը կտրուկ մանևրել դեպի աջ, որի հետևանքով ավտոմեքենան ընկել է կողասահքի մեջ և ընդհարվել թիվ 32 էլեկտրական սյանը։ Իր վարած ավտոմեքենային խանգարող ավտոմեքենաներ և հետիոտներ չեն եղել։ Վթարի բուն պատճառը եղել է այն, որ ավտոմեքենան վարել է շատ արագ և ալկոհոլ գործածած վիճակում, որն օգտագործել է «Փարվանա» ռեստորանում։ Վթարի հետևանքով ստացել է մարմնական վնասվածքներ և բուժօգնության դիմել թիվ 3-րդ հիվանդանոցում։ Առանց վարորդական իրավունքի վկայականի ավտոմեքենա վարում է շուրջ մեկ տարի։
/դատական նիստի արձանագրություն, գ.թ. 39-41, 55-56, 150-151/
Վկա Նարինե Խաչատուրի Գրիգորյանի ցուցմունքներով այն մասին, որ 2012թ. հունիսի 12-ին, ինքը, իր քույր Շամիրամը և ընկերուհի Մարգարիտան գտնվել են Մարիամ Գևորգյանի տանը։ Ժամը 22.00-ի սահմաններում, ժամանակ անցկացնելու նպատակով գնացել են «Փարվանա» ռեստորանային համալիր։ Ռեստորանում իրենց հետ ներկա է եղել նաև Մարիամի մայր Մարգո Սուվարյանը։ Որոշ ժամանակ անց իրենց է միացել նաև Մարիամի բարեկամ Ռոմանը, որից հետո` նրա ընկերը։ 2012թ. հունիսի 13-ին, ժամը 01.00-ի սահմաններում դուրս են եկել ռեստորանից, նստել Ռոմանի «Բի Էմ Դաբլյու» մակնիշի ավտոմեքենան և ընթացել դեպի Մարիամենց տան ուղղությամբ։ Ավտոմեքենան վարել է Ռոմանը։ Վերջինիս կողքի նստարանին նստած է եղել Մարիամը, անմիջապես վարորդի հետևի նստարանին` Մարգարիտան, նրա կողքին` Շամիրամը, իսկ ինքը նստել է Շամիրամի կողքին։ Ռոմանն ավտոմեքենան վարել է Երևան քաղաքի Գր. Լուսավորիչ փողոցի կողմից դեպի Խանջյան փողոցի ուղղությամբ։ Շատ բարձր արագությամբ մուտք են գործել Խանջյան փողոցի գետնանցում, նույն արագությամբ դուրս եկել գետնանցումից և շարունակել ընթացքը։ Որոշակի տարածություն անցնելուց հետո ինքը հասկացել է, որ ավտոմեքենան դարձել է անկառավարելի։ Ռոմանը չի կարողացել ավտոմեքենան արգելակել, ավտոմեքենայի ուղղությունը կտրուկ փոխվել է դեպի աջ և նույն արագությամբ ընդհարվել եզրաքարերին, որից հետո ուժեղ հարված է զգացել, իսկ ավտոմեքենան պտտվելով` կանգնել է։ Վթարից հետո հավաքվել են մարդիկ, նրանց օգնությամբ ցանկացել են ուշքի բերել Մագային և իր քույր Շամիրամին։ Որոշ ժամանակ անց եկել են շտապօգնության ավտոմեքենաներ և իրենց տեղափոխել հիվանդանոց։ Ռ. Հակոբյանը եկել է ռեստորան ոգելից խմիչք օգտագործած վիճակում, իսկ ռեստորանում օգտագործել է գարեջուր, թե որքան, ինքը չի նկատել, սակայն նա իրեն կարողացել է տիրապետել, այլապես ինքը նրա ավտոմեքենան չէր նստի։
Մարգարիտա Գիժլարյանն ունեցել է երկու հեռախոս և նրա մոտ միշտ գումար է եղել։ Դեպքից հետո կորել է իր քույր Շամիրամի դրամապանակը և հեռախոսը։ Մարգարիտայի պայուսակը եղել է իր մոտ, որն ինքը տարել է իր հետ հիվանդանոց։ Հիվանդանոցում այն թողել է միջանցքում, որտեղ եղել են Մարիամը և նրա մայրը։
/դատական նիստի արձանագրություն, գ.թ. 31-32/
Վկա Շամիրամ Խաչատուրի Գրիգորյանի ցուցմունքներով այն մասին, որ 2012թ. հունիսի 12-ին, ինքը, իր քույր Նարինեն և ընկերուհի Մարգարիտան գտնվել են Մարիամ Գևորգյանի տանը։ Ժամը 22.00-ից 22.30-ի սահմաններում, սուրճ խմելու նպատակով գնացել են «Փարվանա» ռեստորանային համալիր, որտեղ կենդանի երաժշտությամբ պարել և ուրախացել են։ Ռեստորանում ներկա է եղել նաև Մարիամի մայր Մարգարիտա Սուվարյանը։ Որոշ ժամանակ անց, Մարիամի մայր Մարգարիտայի հրավերով իրենց է միացել նաև Ռոմանը, որն իր իմանալով եղել է Մարիամի բարեկամը։ Շուրջ 10-ից 15 րոպե անց իրենց է միացել նաև Ռոմանի ընկերը։ Ժամը 01.00-ի սահմաններում բոլորով դուրս են եկել ռեստորանային համալիրից։ Մարիամի մայր Մարգարիտան նստել է Ռոմանի ընկերոջ ավտոմեքենան, իսկ ինքն ընկերուհիների հետ նստել է Ռոմանի «Բի Էմ Դաբլյու» մակնիշի ավտոմեքենան։ Ի սկզբանե Ռոմանն արագ է վարել ավտոմեքենան։ Ինքը և Մագան նրան ճանապարհին դիտողություն են արել, որ եթե նա ավտոմեքենան շարունակի արագ վարել, ապա իրենք կիջնեն և ճանապարհը կշարունակեն տաքսի ավտոմեքենայով։ Բարձր արագությամբ մուտք գործելով դեպի Խանջյան փողոց տանող գետնանցում և նույն արագությամբ դուրս գալով գետնանցումից` Ռոմանը կորցրել է ավտոմեքենայի կառավարումը և որոշ տարածություն անցնելուց հետո լսել է ուժեղ հարվածի ձայն, որից հետո այլևս ոչինչ չի հիշում։ Ավտոմեքենան վարելիս` Ռ. Հակոբյանի համար առջևից, հետևից և կողքից երթևեկող և նրա համար խոչընդոտ հանդիսացող ավտոմեքենաներ և քաղաքացիներ չեն եղել։ Չի իմացել, որ Ռոման Հակոբյանը վարորդական իրավունքի վկայական չունի։ Չի նկատել, թե նա ոգելից խմիչք օգտագործել է, թե ոչ։ Միայն նկատել է, որ նրա աչքերը մի փոքր կարմրած են եղել։ Տեղյակ է, որ այդ օրը Մագան համակարգիչ է վաճառել և նրա մոտ բավականին գումար է եղել։ Մագան ունեցել է երկու հեռախոս, հեռախոսահամարներից մեկը եղել է 094 78-94-92 համարի, իսկ մյուս հեռախոսահամարը չի հիշում։ Դեպքից հետո անհետացել են իր և Մագայի իրերը։ Իր մոտից կորել է իր դրամապանակը, որի մեջ եղել է 30.000 ՀՀ դրամ գումար և «Սամսունգ» մոդելի բջջային հեռախոսը, իսկ Մագայի մոտից կորել է բջջային հեռախոսը և գումարը։ Մագայի հեռախոսները եղել են «Այֆոն» և «Մոտորոլա» մոդելների։
/դատական նիստի արձանագրություն, գ.թ. 64-65/
Վկա Մարիամ Ռուբենի Գևորգյանի ցուցմունքներով այն մասին, որ 2012թ. հունիսի 12-ին, իր ընկերուհիներ Մարգարիտան, Նարինեն և Շամիրամը գտնվել են իրենց տանը։ Ժամը 21.30-ի սահմաններում, անծանոթ տաքսի ավտոմեքենայով գնացել են «Փարվանա» ռեստորանային համալիր՝ ընկերուհիներից Շամիրամի ծննդյան տոնը նշելու համար։ Իրենց հետ ռեստորանում ներկա է եղել նաև իր մայր Մարգարիտան, որի հրավերով որոշ ժամանակ անց իրենց է միացել նաև իրենց մտերիմ Ռոմանը։ Պարելու ընթացքում հեռվից նկատել է, որ իրենց սեղանին է մոտեցել և նստել Ռոմանի ընկեր Արսենը։ Մի պահ մոտեցել և բարևել է, որից հետո գնացել ու ընկերուհիների հետ շարունակել է պարել։ Արսենի գալուց 10-ից 15 րոպե անց բոլորով դուրս են եկել ռեստորանից։ Ինքն ընկերուհիների հետ նստել է Ռոմանի «Բի Էմ Դաբլյու» մակնիշի ավտոմեքենան, որի մեջ տեղ չլինելու պատճառով իր մայրը նստել է Ռոմանի ընկեր Արսենի ավտոմեքենան։ Ռոմանը նստել է ղեկին, ինքը նստել է Ռոմանի կողքի նստարանին։ Անմիջապես իր հետևում նստել է Նարինեն, Նարինեի կողքին նստել է Շամիրամը, իսկ վարորդի հետևի նստարանին` Մարգարիտան։ Ճանապարհին Ռոմանն ավտոմեքենան վարել է շատ արագ, իսկ դեպի Խանջյան փողոց տանող գետնանցում մտնելուց ու դուրս գալուց հետո ավտոմեքենայի արագությունը ավելի է բարձրացել։ Որոշ տարածություն անցնելուց հետո Ռ. Հակոբյանը չի կարողացել կառավարել ավտոմեքենան։ Ավտոմեքենայի ուղղությունը փոխվել է դեպի աջ և ընդհարվել է եզրաքարին, այնուհետև` էլեկտրասյանը, որից հետո ոչինչ չի հիշում։ Գիտակցության է եկել հիվանդանոցում։ Ճանապարհին Ռ. Հակոբյանի երթևեկության համար որևէ խոչընդոտ չի եղել։
Մագան ունեցել է երկու հեռախոս, որոնցից մեկի մեջ եղել է 091-56-06-49 հեռախոսահամարը։
/դատական նիստի արձանագրություն, գ.թ. 66-68/
Վկա Մարգո Բաբկենի Սուվարյանի ցուցմունքներով այն մասին, որ 2012թ. հունիսի 12-ին ինքն իր դստեր և ընկերուհիների հետ գտնվել է տանը։ Ժամը 21.30-ի սահմաններում, իր դստեր և ընկերուհիների հետ միասին, անծանոթ տաքսի ավտոմեքենայով գնացել են «Փարվանա» ռեստորանային համալիր՝ նշելու համար Շամիրամի ծննդյան օրը։ Ռեստորանում աղջիկներն ուրախացել են։ Որոշ ժամանակ անց, երբ ցանկացել են դուրս գալ ռեստորանից` ինքը զանգահարել է Ռոմանին, որպեսզի գա, միանա իրենց, իսկ այնուհետև ճանապարհի տուն։ Քիչ հետո իրենց է միացել Ռոմանը, գարեջուր է պատվիրել և սկսել խմել, իսկ թե որքան է խմել, ինքը չգիտի։ Շուրջ երեսուն րոպե անց իրենց է միացել Ռոմանի ընկեր Արսենը։ Վերջինիս գալուց 8-ից 10 րոպե անց միասին դուրս են եկել ռեստորանից։ Արսենը ռեստորանում Ռոմանի հետ գարեջուր չի խմել։ Աղջիկները նստել են Ռոմանի ավտոմեքենան, որի մեջ տեղ չլինելու պատճառով ինքը նստել է Արսենի ավտոմեքենան։ Մի պահ Ռոմանի ավտոմեքենան երևացել է իրենց տեսադաշտում, այնուհետև կորցրել են իրենց տեսադաշտից։ Այդ ընթացքում Արսենը զանգահարել է Ռոմանին, սակայն Ռոմանը չի պատասխանել հեռախոսազանգին։ Ինքը զանգահարել է իր դստերը և նա իրեն հայտնել է, որ իրենք կրկեսի մոտ են։ Նույն ուղղությամբ շարունակել են ճանապարհն Աթենքի փողոցից դեպի կրկեսի ուղղությամբ։ Գր. Լուսավորիչ փողոցից գետնանցումով դուրս են եկել դեպի Խանջյան փողոց և երաժշտական դպրոցի դիմացի մայթին տեսել են, որ Ռ. Հակոբյանի վարած «Բի Էմ Դաբլյու» մակնիշի ավտոմեքենան ընդհարվել է էլեկտրական սյանը և հավաքվել են քաղաքացիներ։
/դատական նիստի արձանագրություն, գ.թ. 69-70/
Տուժողի իրավահաջորդ, որպես վկա հարցաքննված Հրաչիկ Հայկազի Գիժլարյանի ցուցմունքներով այն մասին, որ հանդիսանում է Մարգարիտա Գիժլարյանի հայրը։ Դստեր մահվան մասին իմացել է իր որդի Մեխակ Գիժլարյանից, երբ գտնվել է Ռոստովի մարզի Սալսկ քաղաքում։ Որդին իրեն հայտնել է, որ Մագան ավտովթարի հետևանքով մահացել է, իսկ ինքը գտնվում է հիվանդանոցում։ Անմիջապես վերադարձել է Հայաստան և տեղեկացել, որ 12.06.2012թ. իր դուստրն ընկերուհիներով գնացել է «Փարվանա» ռեստորան` սուրճ խմելու և ընկերուհի Ջուլիին տեսնելու համար, ով երգել է այդ ռեստորանում։ Այդ ընթացքում մյուս ընկերուհի Մանանի մայրը զանգահարել է իր ծանոթին և խնդրել, որ գա և իրենց տեղափոխի տուն։ Ճանապարհին տեղի է ունեցել վթարը։ Տեղեկացել է նաև, որ վարորդը վթարի պահին եղել է ոգելից խմիչք օգտագործած վիճակում և ավտոմեքենան վարել է շատ արագ։ Ինքը վարորդի նկատմամբ բողոք և քաղաքացիական հայցի պահանջ չունի։
Քննիչը տեղյակ չի պահել իր հարազատներին դստեր մահվան մասին։ Իր դստեր հուղարկավորությունից հետո երկար ժամանակ ոչ ոք իրենց չի կանչել` հարցաքննելու և որպես տուժողի իրավահաջորդ ճանաչելու համար։ Ստիպված ինքն է ներկայացել քննիչի մոտ և հայտնել իր վրդովմունքը։
Դեպքից հետո կորել է իր դստեր երկրորդ բջջային հեռախոսը, պայուսակը, որի մեջ եղել են նաև շուրջ 200.000 ՀՀ դրամ գումար և բանալիներ։ Իր դստեր կորած հեռախոսի մեջ տեղադրված է եղել 091-56-06-49 հեռախոսաքարտը։
/դատական նիստի արձանագրություն, գ.թ. 98-99/
Դատաբժշկական փորձաքննության 19.07.2012թ. թիվ 536 եզրակացությամբ, որի համաձայն`
«1.2. Մ. Գիժլարյանի մահը վրա է հասել հեմոռագիկ և տրավմատիկ շոկից՝ համակցված գանգուղեղային, կրծքավանդակի, որովայնի, կոնքի փակ, բութ վնասվածքներ ստանալու հետևանքով։ Տվյալ հետևությունը հիմնավորվում է բժշկական փաստաթղթերի տվյալներով և դիակի դատաբժշկական փորձաքննությամբ հայտնաբերված հետևյալ վնասվածքների առկայություններով՝ արյունազեղում գլխի մաշկի տակ հետին ճակատային շրջանում, գլխուղեղի սալջարդ, ուղեղի և ուղեղաբնի սալջարդեր, սուբարախնոիդալ արյունազեղում և արյունահավաք, արյունազեղումներ կրծքավանդակի և ստորին վերջույթների շրջաններում, երկկողմանի կողերի կոտրվածքներ տարբեր անատոմիական գծերով աջ թոքի պատռումով, փայծաղի պատռվածք կայացած ներքին արյունահոսությամբ և նրա վիրահատական հեռացում, աջակողմյան հեմոպնևմոթորաքս, ձախակողմյան հեմոթորաքս, կոնքի ոսկրերի կոտրվածք, հետորովայնամզային հեմատոմա, արյունազեղումներ ներքին օրգանների դրունքների շրջաններում։ Նշված բոլոր վնասվածքները հասցվել են կենդանության օրոք, բութ առարկաների ներգործությամբ, այդպիսիք կենդանի անձանց մոտ ունեն առողջությանը ծանր վնասի պատճառման չափանիշներ, որոնք մահվան պատճառի հետ գտնվում են պատճառական կապի մեջ և տվյալ դեպքում բերել են մահվան։ Ըստ թիվ 5817 հիվանդության պատմության նկարագրի Մ. Գիժլարյանի մահը վրա է հասել 13.06.12թ. ժամը 04.00-ին, որը չի հակասում դիակի դատաբժշկական փորձաքննության տվյալներին։
3. Տրավմայի առաջացման մեխանիզմում տեղ է գտել շատ կարճ ժամանակահատվածում տրավմատիկ ուժերի ներդրումը գլխի, կրծքավանդակի և կոնքի շրջաններում։
4. Ըստ դիակի դատաբժշկական փորձաքննության տվյալների կենդանության օրոք Մ. Գիժլարյանը եղել է գործնականում առողջ։
5. Մ. Գիժլարյանի դիակից վերցված արյան դատա-քիմիական ուսումնասիրությամբ սպիրտներ չեն հայտնաբերվել։
6. Մ. Գիժլարյանի դիակից վերցված արյունը պատկանում է Ա խմբին հակա Բ իզոհեմագլյուտինինով։»։
/գ.թ. 122-125/
Դատաավտոտեխնիկական փորձաքննության 25.07.2012թ. թիվ 145ա եզրակացությամբ, որի համաձայն`
«1. և 2. Պատահարին նախորդող պահին ԲՄՎ մակնիշի 33 ԼՕ 321 հ/հ ավտոմեքենայի կախոցները, անիվները, ընթացքային մասերը և ղեկային կառավարման ու արգելակային համակարգերը, ինչպես նաև՝ արտաքին լուսային սարքերը գտնվել են սարքին վիճակում և դրանց այնպիսի անսարքություններ, որպիսիք գոյություն ունեցած լինեին մինչև տվյալ պատահարը կամ առաջացած լինեին տվյալ պատահարին նախորդող պահին ու պայմանավորած լինեին մեքենայի կառավարելիության կորստի ու տվյալ պատահարի առաջացումը, չհայտնաբերվեցին։
3. և 4. ԲՄՎ մակնիշի ավտոմեքենայի վարորդը, երթևեկության անվտանգությունն ապահովելու նպատակով, նախ պետք է ընդհանրապես ձեռնպահ մնար ոչ սթափ վիճակում մեքենան վարելուց, իսկ բնակավայրի սահմաններում գտնվող տվյալ ճանապարհահատվածում պետք է մեքենան վարեր երթևեկության համար սահմանված թույլատրելի առավելագույն 60 կմ/ժ-ը չգերազանցող այնպիսի արագությամբ, որի պայմաններում կպահպաներ մեքենայի շարժման նկատմամբ լիարժեք կառավարումն ապահովելու տեխնիկական հնարավորությունն ու հանդիպակաց ուղղության երթևեկելի ուղեմասով մոտեցող ավտոմեքենայի լապտերների հեռահար լույսից շլանալու պահից սկսած էլ, երթևեկության անվտանգությունն ապահովելու և տվյալ պատահարի առաջացումը բացառելու համար, պետք է միացներ մեքենայի վթարային լուսային ազդանշանը և, չփոխելով երթևեկության գոտին, ժամանակին կատարված արգելակումով դանդաղեցներ իր վարած մեքենայի ընթացքն՝ անհրաժեշտության դեպքում ընդհուպ մինչև մեքենան կանգնեցնելը, ինչի տեխնիկական հնարավորությունը ԲՄՎ մակնիշի ավտոմեքենայի վարորդն ունեցել է և, ինչը կատարելով, նա կխուսափեր տվյալ պատահարի առաջացումից։
Դրա փոխարեն, գտնվելով ոչ սթափ վիճակում և մեքենան վարելով բնակավայրի սահմաններում գտնվող տվյալ ճանապարհահատվածում երթևեկության համար սահմանված թույլատրելի առավելագույն 60 կմ/ժամը գերազանցող՝ շուրջ (90։100) կմ/ժ արագությամբ, իսկ հանդիպակաց ուղղության երթևեկելի ուղեմասով մոտեցող ավտոմեքենայի լապտերների հեռահար լույսից շլանալուց հետո մեքենայի ընթացքի ուղղությունը կտրուկ մանևրելով դեպի աջ, որի արդյունքում զրկված է եղել մեքենայի շարժման նկատմամբ կառավարումն ապահովելու տեխնիկական հնարավորությունից և նրա վարած ավտոմեքենան դառնալով անկառավարելի և ընկնելով կողասահքի մեջ, դուրս է եկել երթևեկելի մասից, ԲՄՎ մակնիշի ավտոմեքենայի վարորդը թույլ է տվել «Ճանապարհային երթևեկության անվտանգության ապահովման մասին» ՀՀ օրենքի 23 հոդվածի 3-րդ մասի, 24 հոդվածի 7-րդ մասի և ՃԵԿ-ի 65, 66 և 129 կետերի պահանջներին հակասող գործողություններ, դրանցով իսկ պայմանավորել տվյալ պատահարի առաջացումն՝ ինքն իրեն զրկելով այն կանխելու տեխնիկական հնարավորությունից։
Ինչ վերաբերվում է այն հանգամանքին, որ ԲՄՎ մակնիշի ավտոմեքենայի վարորդը մեքենան վարելիս է եղել՝ չունենալով վարորդական իրավունքի վկայական, ապա այդ առումով ԲՄՎ մակնիշի ավտոմեքենայի վարորդի գործողության, ինչպես նաև՝ այդ գործողության և տեղի ունեցած պատահարի առաջացման միջև պատճառական կապի գնահատման համար ավտոտեխնիկական փորձագետի հատուկ մասնագիտական գիտելիքներ չեն պահանջվում։ Դրանք ենթակա են իրավական գնահատման՝ ելնելով «Ճանապարհային երթևեկության անվտանգության ապահովման մասին» ՀՀ օրենքի 24 հոդվածի 5-րդ մասի պահանջի տեսանկյունից։»։
/գ.թ. 130-137/
Ճանապարհա-տրանսպորտային դեպքի վայրի զննության մասին 13.06.2012թ. արձանագրությամբ, որի համաձայն` վթարը տեղի է ունեցել Երևան քաղաքի Խանջյան փողոցում, թիվ 11 շենքի դիմաց, որտեղ ճանապարհն ասֆալտապատ է, հարթ, հորիզոնական, ուղիղ։ Փողոցը հոծ գծով բաժանված է երկու ուղեմասերի, իսկ ուղեմասերը ընդհատվող բաժանարար նշագծումներով՝ երեք գոտիների։ Այն ուղեմասի լայնությունը, որով ընթացել է վթար կատարած ավտոմեքենան` 9,8 մետր է։ Փողոցը մութ ժամանակ լուսավորվել է արհեստական լույսերով։ Դեպքի վայրում՝ ճանապարհի երթևեկելի մասի աջակողմյան հատվածում և մայթեզրի կողքին 1 x 1,5 սմ չափով թափված են եղել կոտրված ապակու կտորներ։ Դեպքի վայրում հայտնաբերվել են երկու զույգ կողասահքի հետքեր` տասնմեկ մետր երկարությամբ, միմյանցից 3,2 մետր հեռավորությամբ, որոնք սկսվում են երկրորդ երթևեկելի գոտուց։
/գ.թ. 4-9/
Մեղադրյալի մասնակցությամբ դեպքի վայրը զննելու մասին 28.06.2012թ. արձանագրությամբ, որի համաձայն` Ռ. Հակոբյանը մատնացույց է արել Երևանի Գր. Լուսավորիչ փողոցի կողմից դեպի Խանջյան փողոց տանող գետնանցումը և հայտարարել, որ 13.06.2012թ., ժամը 01.30-ի սահմաններում, «Բի Էմ Դաբլյու» մակնիշի, 33 ԼՕ 321 պետհամարանիշի ավտոմեքենան վարել է Երևանի Գրիգոր Լուսավորիչ փողոցի կողմից Խանջյան փողոցով դեպի Սայաթ-Նովա փողոցի ուղղությամբ, շուրջ 80-100 կմ/ժամ արագությամբ։ Նշված գետնանցումից դուրս գալով՝ ավելի է զարգացրել արագությունը և կենտրոնական գոտիով անցնելով որոշակի տարածություն` շուրջ հինգ վայրկյան շլացել է հանդիպակաց ուղեմասով երթևեկող ավտոմեքենայի լույսերից, որի հետևանքով կորցրել է ավտոմեքենայի կառավարումը։ Ռ. Հակոբյանը մատնացույց է արել Երևանի Խանջյան փողոցից դեպի Սայաթ-Նովա փողոցի կողմը տանող ուղեմասի կենտրոնական գոտու այն հատվածը, որտեղ կորցրել է ավտոմեքենայի կառավարումը, ապա մատնացույց է արել թիվ 32 էլեկտրական սյունը և հայտարարել, որ նշված հատվածում մեքենայի կառավարումը կորցնելուց հետո, աջ կողասահքով դուրս է եկել ճանապարհի երթևեկելի գոտուց և աջ կողային մասով ընդհարվել մայթեզրի եզրաքարերին, ապա ձախակողմյան հատվածով՝ թիվ 32 էլեկտրասյանը և կանգնել է։
/գ.թ. 100-104/
Տրանսպորտային միջոցի զննության մասին 13.06.2012թ. արձանագրությամբ, որի համաձայն` «Բի Էմ Դաբլյու» մակնիշի, 33 ԼՕ 321 պետհամարանիշի ավտոմեքենան գտնվել է տեխնիկապես սարքին վիճակում։ Վթարի հետևանքով ամբողջությամբ վնասվել է ավտոմեքենայի ձախ կողային մասը։
/գ.թ. 10-11/
Շտապբուժօգնություն ՊՓԲԸ-ի կողմից տրված սթափության վիճակի զննության 13.06.2012թ. արձանագրությամբ, որի համաձայն` Ռոման Հրանտի Հակոբյանը գտնվել է 2-րդ աստիճանի ալկոհոլային հարբածության վիճակում։
/գ.թ. 15/


Դատարանի իրավական վերլուծությունները

Վերլուծելով ամբաստանյալ Ռոման Հրանտի Հակոբյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ, ավտոմեքենա վարող Ռոման Հրանտի Հակոբյանի կողմից, նրա մեղավորությամբ, ճանապարհային երթևեկության կանոնները խախտելը, որն անզգուշությամբ առաջացրել է մարդու մահ, ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության հատկանիշներին։
ՀՀ վճռաբեկ դատարանի կողմից` ԳԴ1/0003/01/10 գործով 2010թ. օգոստոսի 27-ին կայացված որոշման 22-րդ կետում դատարանն արտահայտել է հետևյալ իրավական դիրքորոշումը. «(…) Վճռաբեկ դատարանն արձանագրում է, որ ՀՀ քրեական օրենսգրքի 48-րդ հոդվածի 2-րդ մասում նշված պատժի նպատակների իրագործման տեսանկյունից կարևոր է նաև ՀՀ քրեական օրենսգրքի 242-րդ հոդվածով նախատեսված հանցագործության կատարումից հետո անձի դրսևորած վարքագծի գնահատումը։
Այս առումով Վճռաբեկ դատարանը կարևորում է հանցագործության կատարումից անմիջապես հետո հանցանք կատարած անձի վարքագիծը, ինչպես նաև նրա վարքագիծը հետագայում հարուցված քրեական գործի քննության ընթացքում։ Մասնավորապես, Վճռաբեկ դատարանը գտնում է, որ ՀՀ քրեական օրենսգրքի 242-րդ հոդվածով նախատեսված հանցագործություն կատարած անձի նկատմամբ պատիժ նշանակելիս և պատժի կրման նպատակահարմարության հարցը լուծելիս դատարանը պետք է գնահատի այն հանգամանքը, թե հանցագործության կատարումից անմիջապես հետո ամբաստանյալն արդյոք անհրաժեշտ օգնություն է ցուցաբերել տուժողին, թե, թողնելով դեպքի վայրը, դիմել է փախուստի։ Հետագա վարքագծի գնահատման համար դատարանը պետք է ուշադրության արժանացնի նաև այն, թե քրեական գործի քննության ընթացքում ամբաստանյալն արդյոք ինքնակամ ներկայացել է վարույթն իրականացնող մարմնին, դեպքի վերաբերյալ տվել ճշմարտացի, ինքնախոստովանական ցուցմունքներ, արդյոք որոշակի քայլեր է ձեռնարկել տուժողի կամ նրա հարազատների հետ հաշտվելու ուղղությամբ կամ ինքնակամ հատուցել է հանցագործության արդյունքում տուժողի բուժման կամ հուղարկավորության ծախսերը։»։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները` ամբաստանյալ Ռոման Հրանտի Հակոբյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նախկինում դատված չի եղել, իրեն լիովին մեղավոր ճանաչելով և տալով ճշմարտացի, ինքնախոստովանական ցուցմունքներ` անկեղծորեն զղջացել է կատարածի համար, տուժողի իրավահաջորդի հետ հաշտվել են։ Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում հանցագործությամբ պատճառված գույքային վնասը` տուժողի հուղարկավորության ծախսերը կամովին հատուցելը, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցանքն ալկոհոլի ազդեցության տակ կատարելը։
Ամբաստանյալ Ռոման Հրանտի Հակոբյանն իր կատարած` Հայաստանի Հանրապետության քրեական օրենսգրքի 242-րդ հոդվածի 2-րդ մասով նախատեսված հանցագործության համար ենթակա է պատժի ազատազրկման ձևով։
Քննարկելով ամբաստանյալ Ռոման Հրանտի Հակոբյանի նկատմամբ ՀՀ քրեական օրենսգրքի 242-րդ հոդվածի 2-րդ մասով նախատեսված լրացուցիչ պատիժ նշանակելու հարցը` դատարանը գտնում է, որ այդ հոդվածով նախատեսված հանցագործության համար նա ենթակա է պատժի ազատազրկման ձևով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, քանի որ հանցագործությունը կատարելիս` այնպիսի պաշտոն նա չի զբաղեցրել կամ այնպիսի գործունեությամբ զբաղվելու իրավունք չի ունեցել` որն օգտագործած լիներ այդ արարքը կատարելիս, իսկ ավտոմեքենան վարել է` առանց տրանսպորտային միջոցներ վարելու իրավունք ունենալու։
Դատարանը գտնում է, որ իր նկատմամբ նշանակված պատիժն ամբաստանյալ Ռոման Հակոբյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով խափանման միջոցի հարցը` դատարանը գտնում է, որ ամբաստանյալ Ռոման Հրանտի Հակոբյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է, որ ամբաստանյալ Ռոման Հրանտի Հակոբյանից հօգուտ ՀՀ պետական բյուջեի բռնագանձման է ենթակա դատաբժշկական փորձաքննության կատարման արժեք հանդիսացող 152.700 /հարյուր հիսուներկու հազար յոթ հարյուր/ ՀՀ դրամ գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 168-169-րդ, 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Ռոման Հրանտի Հակոբյանին մեղավոր ճանաչել Հայաստանի Հանրապետության քրեական օրենսգրքի 242-րդ հոդվածի 2-րդ մասով նախատեսված հանցանքում և դատապարտել ազատազրկման 2 /երկու/ տարի 6 /վեց/ ամիս ժամկետով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. հունիսի 13-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Ռոման Հրանտի Հակոբյանից հօգուտ ՀՀ պետական բյուջեի բռնագանձել 152.700 /հարյուր հիսուներկու հազար յոթ հարյուր/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ