Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

29 օգոստոսի 2012թ. ք. Երևան

ԵԿԴ-0137/01/12

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,

մասնակցությամբ`
մեղադրող,
Երևան քաղաքի դատախազության
ավագ դատախազ Գ. Շահբազյանի,

պաշտպան Ա. Ալվանդյանի,

տուժող Հ. Կարապետյան,



դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Լևոն Ռուբենի Ոսկանյանի`
ծնված 1954թ. մարտի 24-ին Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, բարձրագույն կրթությամբ, ամուսնացած, խնամքին ոչ ոք, չի աշխատում, նախկինում չդատված, բնութագրվում է դրական, ձերբակալվել է 18.05.2012թ., 21.05.2012թ. որպես խափանման միջոց կիրառվել է կալանավորումը, իսկ 25.06.2012թ. այն փոխարինվել է գրավով, նույն օրն ազատ է արձակվել` անազատության մեջ մնալով 1 /մեկ/ ամիս 7 /յոթ/ օր ժամկետով, հաշվառված է և բնակվում է ք. Երևան, Տիգրան Մեծի պողոտայի թիվ 28 շենքի թիվ 34 բնակարանում, մեղադրվում է ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով։





Գործի դատավարական նախապատմությունը

Թիվ 59101012 քրեական գործը ՀՀ ոստիկանության ՔԳՎ Երևան քաղաքի քննչական վարչության ծանր հանցագործությունների քննության բաժնում հարուցվել է 2012թ. մայիսի 18-ին, ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով, Լևոն Ոսկանյանի կողմից ուրիշի խոշոր չափի գումարը կաշառք ստանալու պատրվակով խարդախությամբ հափշտակելու դեպքի առթիվ։
Քննիչի 2012թ. հուլիսի 13-ի որոշմամբ, Հրայր Կարապետյանի, Կարինե Ավետիսյանի և Մարիամ Բաղդասարյանի նկատմամբ, ՀՀ քրեական օրենսգրքի 312-րդ հոդվածով քրեական հետապնդում չի իրականացվել` հանցակազմի բացակայության պատճառաբանությամբ։
Ամբաստանյալ Լևոն Ռուբենի Ոսկանյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով հետևյալ արարքների համար. «որ նա 2011թ. դեկտեմբեր ամսին տեղեկանալով Հրայր Կարապետյանի կողմից սեփական տուն գնելու համար հիպոթեքային վարկ ձևակերպելու և ստանալու ցանկության մասին, վերջինիս ներկայացել է որպես Ազգային անվտանգության աշխատակից և խոստացել օգնել հիպոթեքային վարկը «Արդշինինվեստ բանկ» ՓԲ ընկերության Երևանի Իսահակյան 18 հասցեում գտնվող «Երևան» մասնաճյուղից ստանալ։ Մինչդեռ, խաբեության եղանակով ուրիշի գույքը դիտավորությամբ հափշտակելու նպատակով, կաշառք ստանալու պատրվակով, վերջինիցս պահանջել և իր` Երևանի Տ.ՄԵծի 28 շենքի 34 բնակարանում մաս-մաս 2011թ. դեկտեմբեր ամսվա ընթացքում ստացել է խոշոր չափի հասնող 1.149.660 ՀՀ դրամին համարժեք 3000 ԱՄՆ դոլար` իբրև «Արդշինինվեստ բանկ» ՓԲ ընկերության «Երևան» մասնաճյուղի կառավարչին և բանկի գլխամասի աշխատակիցներին կաշառք տալու համար, սակայն գումարը խարդախությամբ հափշտակել է` Հ.Կարապետյանին պատճառելով խոշոր չափի 1.149.660 ՀՀ դրամի գույքային վնաս։
Այսինքն` Լևոն Ոսկանյանը խարդախությամբ` կաշառք ստանալու պատրվակով, հափշտակել է խոշոր չափի հասնող գումար, կատարել է հանցավոր արարք, որը նախատեսված է ՀՀ քրեական օրենսգրքի 178 հոդվածի 2-րդ մասի 2-րդ և 5-րդ կետով։
Բացի այդ, Լևոն Ոսկանյանը կրկին խաբեության եղանակով ուրիշի գույքը դիտավորությամբ հափշտակելու նպատակով` կաշառք ստանալու պատրվակով, Հրայր Կարապետյանից պահանջել և Երևանի Տ.Մեծի փողոցի վրա գտնվող «Ֆիրդուսի» կոչվող տոնավաճառի մոտ վերջինիս մոր` Կարինե Ավետիսյանի միջոցով, 2012թ. փետրվար ամսին ստացել է զգալի չափի հասնող 77.726 ՀՀ դրամին համարժեք 200 ԱՄՆ դոլար` ՀՀ ոստիկանության Արաբկիրի քննչական բաժնի աշխատակիցներին կաշառք տալու համար, որպեսզի վերջիններս Կարինե Ավետիսյանի և նրա ընկերուհի Աննա Նիկողոսյանի «Ռուզաննա Շահվերդյան» ՍՊԸ-ում չգրանցված աշխատողներ լինելու հանգամանքների մասին չհայտնեն ՀՀ ԿԱ ՊԵԿ Արաբկիրի հարկային տեսչություն։ Մինչդեռ, գումարը խարդախությամբ հափշտակել է` Հ.Կարապետյանին պատճառելով զգալի չափի հասնող 77.726 ՀՀ դրամի գույքային վնաս։
Այսինքն` Լևոն Ոսկանյանը խարդախությամբ` կաշառք ստանալու պատրվակով, հափշտակել է զգալի չափի հասնող գումար, կատարել է հանցավոր արարք, որը նախատեսված է ՀՀ քրեական օրենսգրքի 178 հոդվածի 2-րդ մասի 5-րդ կետով։»։
2012թ. հուլիսի 18-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Արագացված դատական քննություն

Ամբաստանյալ Լևոն Ռուբենի Ոսկանյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։
Մեղադրողը միջնորդության դեմ չառարկեց։
2012թ. օգոստոսի 23-ին դատարան է ստացվել տուժող Հ. Կարապետյանի դիմումը, որով հայտնել է, որ ամբաստանյալի նկատմամբ պահանջ չունի և չի առարկում դատական քննության արագացված կարգ կիրառելու դեմ։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Լևոն Ռուբենի Ոսկանյանը կատարել է ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով նախատեսված արարքներ։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվեց, որ ամբաստանյալ Լևոն Ռուբենի Ոսկանյանը նախկինում դատված չի եղել, բնութագրվում է դրական, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողին պատճառված գույքային վնասը կամովին հատուցել է։

Դատարանի իրավական վերլուծությունները

Առաջադրված մեղադրանքն ամբաստանյալ Լևոն Ռուբենի Ոսկանյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ Լևոն Ռուբենի Ոսկանյանի կողմից, նրա մեղավորությամբ, խոշոր չափերով և կաշառք ստանալու պատրվակով խարդախություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով նախատեսված հանցագործության հատկանիշներին։
Ապացուցված է նաև ամբաստանյալ Լևոն Ռուբենի Ոսկանյանի կողմից, նրա մեղավորությամբ, կաշառք ստանալու պատրվակով խարդախություն կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 2-րդ մասի 5-րդ կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Լևոն Ռուբենի Ոսկանյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նախկինում դատված չի եղել, բնութագրվում է դրական, իրեն լիովին մեղավոր ճանաչելով` անկեղծորեն զղջում է կատարածի համար։ Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում տուժողին պատճառված գույքային վնասը կամովին հատուցելը, իսկ նրա պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալի նկատմամբ պատիժ նշանակելու հարցը քննարկելիս` դատարանը գտնում է, որ նրա նկատմամբ Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով և 178-րդ հոդվածի 2-րդ մասի 5-րդ կետով նախատեսված յուրաքանչյուր հանցագործության համար պետք է պատիժ նշանակվի տուգանքի ձևով` հաշվի առնելով նաև հետևյալ հանգամանքը.
ՀՀ քրեական օրենսգրքի 69-րդ հոդվածի համաձայն`
(…)
5. Մինչև դատական քննությունը կալանքի տակ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու ձևով պատիժ նշանակելիս դատարանը, հաշվի առնելով կալանքի տակ պահելու ժամկետը, մեղմացնում է նշանակված պատիժը կամ լրիվ ազատում պատիժը կրելուց։
(…)»։
Հաշվի առնելով, որ ամբաստանյալ Լևոն Ոսկանյանը 2012թ. մայիսի 18-ից մինչև 2012թ. հունիսի 25-ը, այսինքն մեկ ամիս յոթ օր գտնվել է կալանքի տակ, դատարանը գտնում է, որ ամբաստանյալի նկատմամբ տուգանքի ձևով նշանակված պատիժը, ՀՀ քրեական օրենսգրքի 69-րդ հոդվածի 5-րդ մասի կիրառմամբ ենթակա է մեղմացման։
Դատարանը գտնում է, որ իր նկատմամբ նշանակված պատիժն ամբաստանյալ Լևոն Ոսկանյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով խափանման միջոցի հարցը` դատարանը գտնում է, որ ամբաստանյալ Լևոն Ոսկանյանի նկատմամբ որպես կալանավորման այլընտրանքային խափանման միջոց գրավը պետք է թողնել անփոփոխ, որից հետո, գրավի գումար հանդիսացող 500.000 /հինգ հարյուր հազար/ ՀՀ դրամը, մուծված 25.06.2012թ. Ռուբեն Լևոնի Ոսկանյանի կողմից` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 900013298014 հաշվին, ենթակա է վերադարձման այդ գումարը վճարած Ռուբեն Ոսկանյանին։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-366-րդ, 369-373-րդ, 3751-3754-րդ հոդվածներով, դատարանը`
Վ Ճ Ռ Ե Ց

Ամբաստանյալ Լևոն Ռուբենի Ոսկանյանին մեղավոր ճանաչել Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով նախատեսված հանցանքներում և դատապարտել.
- առաջին դրվագով` ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով, տուգանքի` նվազագույն աշխատավարձի յոթհարյուրապատիկի` 700.000 /յոթ հարյուր հազար/ ՀՀ դրամ գումարի չափով,
- երկրորդ դրվագով` ՀՀ քրեական օրենսգրքի 178-րդ հոդվածի 2-րդ մասի 5-րդ կետով, տուգանքի` նվազագույն աշխատավարձի հինգհարյուրապատիկի` 500.000 /հինգ հարյուր հազար/ ՀՀ դրամ գումարի չափով։
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Լևոն Ռուբենի Ոսկանյանի նկատմամբ պատիժ նշանակել տուգանք նվազագույն աշխատավարձի հազարապատիկի` 1.000.000 /մեկ միլիոն/ ՀՀ դրամ գումարի չափով։
Կալանավորման այլընտրանքային խափանման միջոց գրավը թողնել անփոփոխ` մինչև դատավճռի օրինական ուժի մեջ մտնելը, որից հետո, գրավի գումար հանդիսացող 500.000 /հինգ հարյուր հազար/ ՀՀ դրամը, մուծված 25.06.2012թ. Ռուբեն Լևոնի Ոսկանյանի կողմից` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 900013298014 հաշվին, վերադարձնել այդ գումարը վճարած Ռուբեն Ոսկանյանին։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։
Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։


ԴԱՏԱՎՈՐ` Մ. ՄԱՐՏԻՐՈՍՅԱՆ