ԵԿԴ/0093/01/12







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«17» հուլիսի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Հ.Էյրամջյան
տուժող Ա.Բաբայանի
պաշտպան Ռ.Սիրեկանյան
թարգմանիչ Մ.Ալավերդյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Միխեիլ Ջեմալի Մուրադաշվիլիի` ծնված 1979 թվականի հունվարի 14-ին Վրաստանում, ազգությամբ վրացի, Վրաստանի քաղաքացի, միջնակարգ կրթությամբ, ամուսնացած, աշխատել է որպես հացթուխ, հաշվառված է Վրաստանի Գորի քաղաքի Շինդիս պողոտայի 1-ին շենքի 52-րդ բնակարանում, մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին կետով, արգելանքի տակ է 2012 թվականի հունվարի 14-ից:
1. Գործի դատավարական նախապատմությունը.
2012 թվականի հունվարի 14-ին ՀՀ ոստիկանության Կենտրոնականի քննչական բաժնի ավագ քննիչ Գ.Բեգոյանի որոշմամբ ՀՀ քրեական օրենսգրքի 176-րդ հոդվածի 2-րդ մասի 1-ին կետով նախատեսված հանցագործության հատկանիշներով հարուցվել և վարույթ է ընդունվել թիվ 13101412 քրեական գործը:
2012 թվականի հունվարի 16-ին ՀՀ ոստիկանության Կենտրոնականի քննչական բաժնի ավագ քննիչ Գ.Բեգոյանի որոշմամբ թիվ 13101412 քրեական գործով Միխեիլ Ջեմալի Մուրադաշվիլիին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին կետով:
2012 թվականի մայիսի 25-ին ՀՀ ոստիկանության Կենտրոնականի քննչական բաժնի ավագ քննիչ Գ.Բեգոյանի որոշմամբ թիվ 13101412 քրեական գործից անջատվել է Միխեիլ Մուրադաշվիլիի հետ կողոպուտ կատարած և ինքնությունը չպարզված անձի վերաբերյալ մասը, որին շնորհվել է թիվ 13101412/1 համարը:
2012 թվականի մայիսի 25-ին ՀՀ ոստիկանության Կենտրոնականի քննչական բաժնի ավագ քննիչ Գ.Բեգոյանի որոշմամբ թիվ 13101412 քրեական գործով Միխեիլ Ջեմալի Մուրադաշվիլիին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին կետով:
2012 թվականի հունիսի 5-ին Միխեիլ Ջեմալի Մուրադաշվիլիի վերաբերյալ թիվ 13101412 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0093/01/12 համարը:
Միխեիլ Ջեմալի Մուրադաշվիլիին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին կետով` այն արարքի համար, որ նա, ուրիշի գույքի բացահայտ հափշտակություն կատարելու դիտավորությամբ, նախնական համաձայնության գալով գործով չպարզված անձի հետ, 2011 թվականի դեկտեմբերի 25-ին` ժամը 18:00-ի սահմաններում, Երևան քաղաքի Տիգրան Մեծի պողոտայի թիվ 6 հասցեում գտնվող «Երևան Սիթի» սուպերմարկետի մոտ Աննա Լևոնի Բաբայանից բացահայտ հափշտակել է 3.000 ՀՀ դրամ արժողության ձեռքի դրամապանակը, որի մեջ եղել է 75.000 ՀՀ դրամ կանխիկ գումար և 96.000 ՀՀ դրամ արժողությամբ «Սամսունգ» մոդելի բջջային հեռախոսն ու դիմել փախուստի, որից հետո գողոնը բաժանել են միմյանց մեջ` Աննա Բաբայանին պատճառելով ընդհանուր 174.000 ՀՀ դրամի գույքային վնաս:
2. Արագացված դատական քննություն.
Մինչ դատաքննությունն սկսելն ամբաստանյալ Միխեիլ Ջեմալի Մուրադաշվիլին միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Միխեիլ Ջեմալի Մուրադաշվիլին կատարել է արարք` նախատեսված ՀՀ քրեական օրենսգրքի 176-րդ հոդվածի 2-րդ մասի 1-ին կետով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ՀՀ ոստիկանության ինֆորմացիոն կենտրոնի և Վրաստանի ՆԳՆ պահանջագրերը, բնութագրերը, առողջական վիճակի վերաբերյալ փաստաթղթերը և ծննդյան վկայականի թարգմանությունը, եկավ հետևյալ եզրահանգման.
Միխեիլ Մուրադաշվիլիի անձը դրականորեն բնութագրող հանգամանքներ են ամուսնացած լինելը և կատարածի համար զղջալը:
Միխեիլ Մուրադաշվիլիի պատասխանատվությունն ու պատիժը մեղմացնող հանգամանք է պատիժ նշանակելու պահին նրա խնամքին 14 տարին չլրացած երեխայի (Սալոմե Մուրադաշվիլիի` ծնված 2000 թվականի հոկտեմբերի 27-ին) առկայությունը:
Դատարանը գտնում է, որ Միխեիլ Մուրադաշվիլիի պատասխանատվությունն ու պատիժը մեղմացնող հանգամանքներ պետք է դիտել նաև վատառողջ լինելը և դրականորեն բնութագրվելը:
Դատարանը միաժամանակ արձանագրում է, որ Միխեիլ Մուրադաշվիլիի պատասխանատվությունն ու պատիժը ծանրացնող հանգամանքներ առկա չեն:
Կատարած արարքի համար ամբաստանյալ Միխեիլ Մուրադաշվիլին ենթակա է քրեական պատասխանատվության և պատժի:
Դատարանը, հաշվի առնելով Միխեիլ Մուրադաշվիլիի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Միխեիլ Մուրադաշվիլիի կատարած արարքի համար ՀՀ քրեական օրենսգրքի 176-րդ հոդվածի 2-րդ մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Միխեիլ Մուրադաշվիլիի պատժի կրման սկիզբը պետք է հաշվել 2012 թվականի հունվարի 14-ից, քանի որ նա ձերբակալվել է այդ օրը, իսկ 2012 թվականի հունվարի 16-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Միխեիլ Մուրադաշվիլիի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցը ենթակա է արդյոք բավարարման, ում օգտին և ինչ չափով։ ՀՀ քրեական դատավարության օրենսգրքի 3751 հոդվածի 6-րդ մասի համաձայն` եթե տվյալ գործով հարուցված է նաև քաղաքացիական հայց և ամբաստանյալն ընդունում է այն, ապա դատարանը դատավճռով բավարարում է քաղաքացիական հայցը, եթե այն չի հակասում օրենքին: Այդ դեպքում դատարանը պետք է լրացուցիչ պարզի, թե արդյոք հայցի ընդունումը կամավոր է, և արդյոք այն վերաբերում է այլ անձանց իրավունքներին: Դատարանը, գտնելով, որ հայցի ընդունումը հակասում է օրենքին կամ կամավոր չէ կամ վերաբերում է այլ անձանց իրավունքներին, հայցը թողնում է առանց քննության` քաղաքացիական հայցվորին բացատրելով քաղաքացիական դատավարության կարգով հայց ներկայացնելու նրա իրավունքը:
Սույն քրեական գործով քաղաքացիական հայց է ներկայացրել տուժող Աննա Լևոնի Բաբայանը` խնդրելով Միխեիլ Մուրադաշվիլիին մեղավոր ճանաչելու դեպքում նրանից հօգուտ իրեն բռնագանձել 174.000 ՀՀ դրամ` որպես հանցագործությամբ պատճառված վնաս: Ամբաստանյալ Միխեիլ Մուրադաշվիլիի կողմից քաղաքացիական հայցը կամավոր ընդունելու պայմաններում` Դատարանը գտնում է, որ Միխեիլ Մուրադաշվիլիի դեմ Աննա Բաբայանի կողմից ներկայացված քաղաքացիական հայցի պահանջը պետք է բավարարել և Միխեիլ Մուրադաշվիլիից հօգուտ Աննա Բաբայանի, որպես հանցագործությամբ պատճառված վնաս, պետք է բռնագանձել 174.000 ՀՀ դրամ, քանի որ դա չի հակասում օրենքին և չի վերաբերում այլ անձանց իրավունքներին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Միխեիլ Մուրադաշվիլիից դատարանի նախաձեռնությամբ ենթակա չեն բռնագանձման, քանի որ հանցագործությամբ պատճառված վնասի հատուցման համար ներկայացված քաղաքացիական հայցը վերոնշյալ հիմնավորմամբ պետք է բավարարել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Միխաեիլ Ջեմալի Մուրադաշվիլիին մեղավոր ճանաչել ՀՀ քրեական օրենսգրքի 176-րդ հոդվածի 2-րդ մասի 1-ին կետով և պատիժ նշանակել ազատազրկում` 3 (երեք) տարի ժամկետով` պատժի կրման սկիզբը հաշվելով 2012 թվականի հունվարի 14-ից:
Միխաեիլ Ջեմալի Մուրադաշվիլիի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Աննա Լևոնի Բաբայանի քաղաքացիական հայցը բավարարել. Միխաեիլ Ջեմալի Մուրադաշվիլիից հօգուտ Աննա Լևոնի Բաբայանի, որպես հանցագործությամբ պատճառված վնաս, բռնագանձել 174.000 (հարյուր յոթանասունչորս հազար) ՀՀ դրամ:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ