Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

18 սեպտեմբերի 2012թ. ք. Երևան

ԵԿԴ-0078/01/12

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,

մասնակցությամբ`
մեղադրող,
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Լ. Չարխիֆալակյանի,


պաշտպաններ Յու. Խաչատրյանի,
Տ. Գալստյանի,



դատարանում, դռնբաց դատական նիստում քննեց գործն ըստ մեղադրանքի
1. Սամվել Ռոլանդի Դեմիրճյանի`
ծնված 1970թ. դեկտեմբերի 11-ին Երևանում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուսնացած, չի աշխատում, վատառողջ է` 2-րդ խմբի հաշմանդամ, նախկինում դատված` Երևանի Մալաթիա-Սեբաստիա վարչական շրջանի ընդհանուր իրավասության առաջին ատյանի դատարանի 25.08.2010թ. դատավճռով, ՀՀ քրեական օրենսգրքի 215-րդ հոդվածի 4-րդ մասով և 266-րդ հոդվածի 3-րդ մասի 1-ին, 2-րդ կետերով, ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 9 /ինը/ տարի 6 /վեց/ ամիս ժամկետով, գույքի` մաքսանենգության առարկաների բռնագրավմամբ, պատժի սկիզբը հաշվելով 2009թ. հոկտեմբերի 13-ից, պատիժը կրում է ՀՀ ԱՆ «Վարդաշեն» ՔԿՀ-ում, հաշվառված է Երևանի Գալշոյան փողոցի թիվ 10 շենքի թիվ 41 բնակարանում, փաստացի բնակվել է Կոտայքի մարզի Ջրվեժ գյուղում, սույն քրեական գործով խափանման միջոց չի ընտրվել, մեղադրվում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով,

2. Արսեն Լևոնի Ավետիսյանի
ծնված 1972թ. սեպտեմբերի 01-ին Երևան քաղաքում, հայ, ՀՀ քաղաքացի, միջնակարգ կրթությամբ, ամուսնացած, խնամքին մինչև տասնչորս տարեկան մեկ երեխա, նախկինում չդատված, անհատ ձեռնարկատեր, վատառողջ է, բնութագրվում է դրական, հաշվառված է և բնակվել է Երևան քաղաքի Նոր Նորքի 5-րդ զանգվածի Բ. Մուրադյան փողոցի թիվ 5 շենքի թիվ 41 բնակարանում, կալանքի տակ է 15.02.2012թ.-ից, մեղադրվում է ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով և 268-րդ հոդվածի 1-ին մասով։



Գործի դատավարական նախապատմությունը

Թիվ 13107912 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 15.02.2012թ., ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով և 268-րդ հոդվածի 2-րդ մասի 2-րդ կետով։
Քննիչի 2012թ. ապրիլի 16-ի որոշմամբ, թիվ 13107912 քրեական գործով մեղադրյալ Լևոն Աշոտի Աթոյանի կողմից ապօրինի խոշոր չափի` 67.25 գրամ «հաշիշ» տեսակի թմրամիջոց ապօրինի ձեռք բերելու փորձ կատարելու կապակցությամբ, նրա նկատմամբ քրեական հետապնդում չի իրականացվել` հանցակազմի բացակայության պատճառաբանությամբ։
Քննիչի նույն օրվա մեկ այլ որոշմամբ, թիվ 13107912 քրեական գործով մեղադրյալներ Արսեն Ավետիսյանի և Սամվել Դեմիրճյանի կողմից 2012թ. հունվարին, Երևան քաղաքի Ա. Արմենակյան փողոցում ապօրինի թմրամիջոց իրացնելու կապակցությամբ, նրանց նկատմամբ քրեական հետապնդում չի իրականացվել` հանցագործության դեպքի բացակայության պատճառաբանությամբ։
Նույն որոշմամբ, թիվ 13107912 քրեական գործով մեղադրյալ Արսեն Ավետիսյանի կողմից ապօրինի առանձնապես խոշոր չափի` 478 գրամ «հաշիշ» տեսակի թմրամիջոց պահելու կապակցությամբ, նրա նկատմամբ քրեական հետապնդում չի իրականացվել` ՀՀ քրեական օրենսգրքի 266-րդ հոդվածի 6-րդ մասի համաձայն թմրամիջոցը կամովին հանձնելու պատճառաբանությամբ։
Քննիչի 22.04.2012թ. որոշմամբ, մեղադրյալ Արսեն Լևոնի Ավետիսյանի մարմնական վնասվածքներ ստանալու վերաբերյալ նախապատրաստված նյութերով քրեական գործի հարուցումը մերժվել է` հանցագործության դեպքի բացակայության պատճառաբանությամբ։
2012թ. մայիսի 04-ին որոշում է կայացվել թիվ 13107912 քրեական գործով Ռոբերտ Աշոտի Գաբրիելյանի նկատմամբ ՀՀ քրեական օրենսգրքի 235-րդ հոդվածի 1-ին մասով քրեական հետապնդում չիրականացնելու մասին` Ռ. Գաբրիելյանի մահվան պատճառաբանությամբ։
Քննիչի նույն օրվա մեկ այլ որոշմամբ, թիվ 13107912 քրեական գործի նյութերով, անհայտ անձի կողմից Արտաշես Արամի Աբիսողոմոնյանին ապօրինի թմրամիջոց իրացնելու դեպքի առթիվ, ՀՀ քրեական օրենսգրքի 266-րդ հոդվածի 1-ին մասով հարուցվել է քրեական գործ, այն առանձնացվել է առանձին վարույթում և դրան շնորհվել է թիվ 13119912 համարը։
Քննիչի 2012թ. մայիսի 07-ի որոշմամբ, թիվ 13107912 քրեական գործից անջատվել է Ս. Դեմիրճյանին ապօրինի առանձնապես խոշոր չափի` 549,97 գրամ քաշով «հաշիշ» տեսակի թմրամիջոց իրացրած, ինչպես նաև Արմեն Խաչատրյանին, Զավեն Վարդանյանին և Վարդևար Գաբրիելյանին կանաբիսի խմբին պատկանող թմրամիջոցներ ապօրինի իրացրած, ինքնությունը չպարզված անձանց վերաբերյալ մասը, այն առանձնացվել է առանձին վարույթում և դրան շնորհվել է թիվ 13121012 համարը։
Ամբաստանյալ Սամվել Ռոլանդի Դեմիրճյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 266-րդ հոդվածի 3-րդ մասի 2-րդ կետով հետևյալ արարքի համար. «որ նա չպարզված հանգամանքներում իրացնելու նպատակով ապօրինի ձեռք է բերել և պահել առանձնապես խոշոր չափի` 549.97 գրամը գերազանցող «հաշիշ» տեսակի թմրամիջոց, որի մի մասն Արսեն Լևոնի Ավետիսյանի օժանդակությամբ ապօրինի իրացրել է Լևոն Աշոտի Աթոյանին։
Այսպես. Ս.Դեմիրճյանը չպարզված հանգամանքներում իրացնելու նպատակով ապօրինի ձեռք է բերել և իր մոտ պահել առանձնապես խոշոր չափի` 549.97 գրամը գերազանցող «հաշիշ» տեսակի թմրամիջոց, որը փաթեթավորված վիճակում` առանց փաթեթի պարունակության մասին հայտնելու 2009թ. աշնանը Իրանի Իսլամական Հանրապետություն մեկնելուց առաջ, թողել է իրեն «Զվարթնոց» օդանավակայան տեղափոխած Արսեն Լևոնի Ավետիսյանի Վազ 21010 մակնիշի, S 8006 պետհամարանիշի ավտոմեքենայի սրահում և խնդրել է մի քանի օր ժամանակով` մինչ ՀՀ վերադառնալը, պահել, ինչն էլ վերջինս կատարել է։
Ս.Դեմիրճյանը թմրամիջոցների մաքսանենգություն կատարելու համար 2009թ. հոկտեմբերի 13-ին ՀՀ վերադառնալիս «Զվարթնոց» օդանավակայանում ձերբակալվել է, հարուցված քրեական գործով նրան մեղադրանք է առաջադրվել ՀՀ քր. օր.-ի 215 հոդվածի 2-րդ մասով և 266 հոդվածի 3-րդ մասի 1-ին և 2-րդ կետերով, որպես խափանման միջոց է կիրառվել կալանավորումը, իսկ 2010թ. օգոստոսի 25-ին դատապարտվել է 9 տարի 6 ամիս ժամկետով ազատազրկման և պատիժը կրել ՀՀ ԱՆ «Վարդաշեն» քրեակատարողական հիմնարկում։
Ս.Դեմիրճյանը կալանքը կրելու ընթացքում` 2009թ. աշնանը զանգահարել է Ա.Ավետիսյանին և տեղեկացրել, որ կալանավորված է ու գտնվում է «Վարդաշեն» քրեակատարողական հիմնարկում, միաժամանակ հայտնել, որ վերջինիս ի պահ հանձնված փաթեթի պարունակությունը թմրամիջոց է, ապա խնդրել է այն ապահով վայրում պահել։ Ա.Ավետիսյանը համաձայնել է և Ս.Դեմիրճյանին պատկանող առանձնապես խոշոր չափի` 549.97 գրամը գերազանցող «հաշիշ» տեսակի թմրամիջոցն ապօրինի փոխադրել է Երևան քաղաքի Բ.Մուրադյան փողոցի թիվ 5 շենք և պահել իրեն պատկանող` նույն շենքի 3-րդ մուտքում գտնվող նկուղում։
2012թ. հունվար ամսին Ս.Դեմիրճյանը հեռախոսային խոսակցության ընթացքում տեղեկանալով, որ իր հետ նախկինում նույն քրեակատարողական հիմնարկում պատիժը կրած Լևոն Աշոտի Աթոյանը ցանկանում է գործածման համար «հաշիշ» տեսակի թմրամիջոց ձեռք բերել, խոստացել է վերջինիս այդպիսիք իրացնել։ Ս.Դեմիրճյանն անազատության մեջ գտնվելու պայմաններում անձամբ թմրամիջոցը Լ.Աթոյանին հանձնելու հնարավորությունից զրկված լինելով, հիշյալ խոչընդոտը վերացնելու և օժանդակություն ցուցաբերելու համար նույն օրը զանգահարել է Ա.Ավետիսյանին և հեռախոսազրույց ունենալով խնդրել է նկուղում պահվող թմրամիջոցից առանձնացնել 4.3 գրամը գերազանցող թմրամիջոց, այն տեղափոխել Նուբարաշենի խճուղի և հանձնել այնտեղ սպասող Լևոն Աշոտի Աթոյանին։ Ա.Ավետիսյանը համաձայնել է օժանդակել Ս.Դեմիրճյանին, ապա նույն օրը նկուղում պահվող «հաշիշ» տեսակի թմրամիջոցից առանձնացրել է խոշոր չափի` 4.3 գրամը գերազանցող թմրամիջոցը, այն իր ավտոմեքենայով փոխադրել է Երևան քաղաքի Նուբարաշենի խճուղի և հանձնել Լ.Աթոյանին։
Դրանից հետո 2012թ. փետրվարի 14-ին Ս.Դեմիրճյանը տեղեկանալով Լ.Աթոյանի` «հաշիշ» տեսակի թմրամիջոց ձեռք բերելու մտադրության մասին, խոստացել է իրացնել այդպիսիք, ապա` օժանդակություն ստանալու նպատակով կրկին անգամ զանգահարել է Ա.Ավետիսյանին և խնդրել է նկուղում պահվող` իրեն պատկանող թմրամիջոցից առանձնացնել խոշոր չափի` 67.25 գրամ «հաշիշ» տեսակի թմրամիջոցը, այն փոխադրել Մ.Խորենացի փողոցի թիվ 24 հասցեի մոտակայք և հանձնել այնտեղ սպասող Լևոն Աշոտի Աթոյանին։ Ա.Ավետիսյանը Ս.Դեմիրճյանին պատկանող թմրամիջոցից 0.42 գրամն իր գործածման համար առանձնացրել է և ապօրինի պահել ավտոմեքենայի սրահում, ապա` Ս.Դեմիրճյանի կողմից խոշոր չափի թմրամիջոցի իրացնելուն օժանդակություն ցուցաբերելով, նկուղում պահվող «հաշիշ» տեսակի թմրամիջոցից խոշոր չափի` 67.25 գրամ թմրամիջոցը Լ.Աթոյանին փոխանցելու համար իր ավտոմեքենայով փոխադրել Երևան քաղաքի Մ.Խորենացի փողոց։
2012թ. փետրվարի 14-ին, ժամը 18։00-ի սահմաններում Երևան քաղաքի Մ.Խորենացի փողոցի թիվ 24 հասցեի մոտակայքում, մինչ թմրամիջոցը Լ.Աթոյանին փոխանցելը, Ա.Ավետիսյանը բռնվել է ՀՀ ոստիկանության աշխատակիցների կողմից և բերման ենթարկվել Կենտրոնականի բաժնի Մարաշի բաժանմունք, որտեղ էլ Լ.Աթոյանին փոխանցելու համար նախատեսված խոշոր չափի` 67.25 գրամ և իր գործածման համար նախատեսված` 0.42 գրամ «հաշիշ» տեսակի թմրամիջոցները հայտնաբերվել են, իսկ մնացած` Բ.Մուրադյան փողոցի թիվ 5 շենքի նկուղում պահվող, Ս. Դեմիրճյանին պատկանող 478 գրամ «հաշիշ» տեսակի թմրամիջոցն Ա.Ավետիսյանը 2012թ. մարտի 13-ին կամովին հանձնել է։»։
Ամբաստանյալ Արսեն Լևոնի Ավետիսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով և 268-րդ հոդվածի 1-ին մասով հետևյալ արարքների համար. «որ նա առանց իրացնելու նպատակի` իր գործածման համար ապօրինի ձեռք է բերել և պահել զգալի չափի` 0.42 գրամ քաշով հաշիշ տեսակի թմրամիջոց, բացի այդ Սամվել Ռոլանդի Դեմիրճյանին պատկանող «հաշիշ» տեսակի թմրամիջոցն ապօրինի փոխադրել և պահել է Երևան քաղաքի Բ.Մուրադյան փողոցի թիվ 5 շենքի` իրեն պատկանող նկուղում, որից հետո Ս.Դեմիրճյանին օժանդակել է խոշոր չափի «հաշիշ» տեսակի թմրամիջոցներ ապօրինի իրացնելուն։
Այսպես. Ա.Ավետիսյանը հանդիսանալով անհատ ձեռնարկատեր, իրեն պատկանող Վազ 21010 մակնիշի, S 8006 պետհամարանիշի ավտոմեքենայով կատարել է ուղևորափոխադրումներ, որի ընթացքում էլ ծանոթացել է պատվիրատու Սամվել Ռոլանդի Դեմիրճյանի հետ և 2009թ. նրա համար բազմաթիվ պատվերներ կատարել։
Ա.Ավետիսյանը 2009թ. աշնանը Ս.Դեմիրճյանի համար հերթական պատվերը կատարելիս նրան փոխադրել է «Զվարթնոց» օդանավակայան, որտեղ նրան ճանապարհելուց հետո ավտոմեքենայի առջևի աջ դռան գրպանի մեջ հայտնաբերել է սև պոլիէթիլենային տոպրակի փաթեթ, ինչի մասին իսկույն հայտնել է Ս.Դեմիրճյանին, սակայն վերջինս խնդրել է փաթեթը պահել` մինչ իր ՀՀ վերադառնալը։ Ա.Ավետիսյանն առանց փաթեթի պարունակությունը պարզելու, այն պահել է ավտոմեքենայի վահանակի աջակողմյան հատվածի պահախցում։
2009թ. աշնանը Ս.Դեմիրճյանը զանգահարել է Ա.Ավետիսյանին և տեղեկացրել, որ կալանավորված է ու գտնվում է «Վարդաշեն» քրեակատարողական հիմնարկում, միաժամանակ հայտնել, որ վերջինիս ի պահ հանձնված փաթեթի պարունակությունը թմրամիջոց է, ապա խնդրել է այն ապահով վայրում պահել։ Ա.Ավետիսյանը համաձայնել է և Ս.Դեմիրճյանին պատկանող առանձնապես խոշոր չափի` 549.97 գրամը գերազանցող «հաշիշ» տեսակի թմրամիջոցն ապօրինի փոխադրել է Երևան քաղաքի Բ.Մուրադյան փողոցի թիվ 5 շենք և ապօրինի պահել իրեն պատկանող` նույն շենքի 3-րդ մուտքում գտնվող նկուղում։
2012թ. հունվար ամսին Ս.Դեմիրճյանը զանգահարել է Ա.Ավետիսյանին, ապա` հեռախոսազրույց ունենալով, խնդրել է նկուղում պահվող թմրամիջոցից առանձնացնել 4.3 գրամը գերազանցող հաշիշ տեսակի թմրամիջոց, այն տեղափոխել Նուբարաշենի խճուղի և հանձնել այնտեղ սպասող Լևոն Աշոտի Աթոյանին։ Ա.Ավետիսյանը համաձայնել է վերացնել Ս.Դեմիրճյանի` անազատության մեջ գտնվելու պայմաններում անձամբ թմրամիջոցները ձեռք բերողին հանձնելու ու հանցավոր մտադրությունը վերջնականորեն իրականացնելու արգելքն ու այդ կերպ օժանդակել վերջինիս։ Այդ նպատակով Ա.Ավետիսյանը նույն օրը, ցերեկային ժամերին նկուղում պահվող «հաշիշ» տեսակի թմրամիջոցից առանձնացրել է խոշոր չափի` 4.3 գրամը գերազանցող հաշիշ տեսակի թմրամիջոցը, այն իր ավտոմեքենայով փոխադրել է Երևան քաղաքի Նուբարաշենի խճուղի և հանձնել Լ.Աթոյանին, որով օժանդակել է Ս. Դեմիրճյանի կողմից խոշոր չափի թմրամիջոցի ապօրինի իրացմանը։
Այսինքն, Ա. Ավետիսյանը կատարել է հանցանք, որը նախատեսված է ՀՀ քր. օր.-ի 38-266 հոդվածի 2-րդ մասի 2-րդ կետով։
Դրանից հետո 2012թ. փետրվարի 14-ին Ս.Դեմիրճյանը կրկին զանգահարել է Ա.Ավետիսյանին և խնդրել է նկուղում պահվող` իրեն պատկանող թմրամիջոցից առանձնացնել խոշոր չափի` 67.25 գրամ «հաշիշ» տեսակի թմրամիջոցը, այն փոխադրել Մ.Խորենացի փողոցի թիվ 24 հասցեի մոտակայք և հանձնել այնտեղ սպասող Լևոն Աշոտի Աթոյանին։ Ա.Ավետիսյանը Ս.Դեմիրճյանին պատկանող նկուղում պահվող թմրամիջոցից իր գործածման համար առանձնացրել է զգալի չափի`0.42 գրամ քաշով թմրամիջոց ու ապօրինի պահել ավտոմեքենայի սրահում, ապա` Ս.Դեմիրճյանի կողմից խոշոր չափի թմրամիջոցի իրացնելուն օժանդակություն ցուցաբերելով, նկուղում պահվող «հաշիշ» տեսակի թմրամիջոցից խոշոր չափի` 67.25 գրամ թմրամիջոցը Լ.Աթոյանին փոխանցելու համար իր ավտոմեքենայով փոխադրել է Երևան քաղաքի Մ.Խորենացի փողոց։
2012թ. փետրվարի 14-ին, ժամը 18։00-ի սահմաններում Երևան քաղաքի Մ.Խորենացի փողոցի թիվ 24 հասցեի մոտակայքում, մինչ թմրամիջոցը Լ.Աթոյանին փոխանցելը, Ա.Ավետիսյանը բռնվել է ՀՀ ոստիկանության աշխատակիցների կողմից և բերման ենթարկվել Կենտրոնականի բաժնի Մարաշի բաժանմունք, որտեղ էլ Լ.Աթոյանին փոխանցելու համար նախատեսված խոշոր չափի` 67.25 գրամ և իր գործածման համար նախատեսված զգալի չափի` 0,42 գրամ «հաշիշ» տեսակի թմրամիջոցները հայտնաբերվել են, իսկ մնացած` Բ.Մուրադյան փողոցի թիվ 5 շենքի նկուղում պահվող, 478 գրամ «հաշիշ» տեսակի թմրամիջոցն Ա.Ավետիսյանը 2012թ. մարտի 13-ին կամովին հանձնել է։»։
2012թ. մայիսի 15-ին, ԵԿԴ/0078/01/12 (13107912) քրեական գործն ըստ մեղադրանքի Սամվել Ռոլանդի Դեմիրճյանի` ՀՀ քրեական օրենսգրքի 266-րդ հոդվածի 3-րդ մասի 2-րդ կետով, Արսեն Լևոնի Ավետիսյանի` ՀՀ քրեական օրենսգրքի 268-րդ հոդվածի 1-ին մասով և 38-266-րդ հոդվածի 2-րդ մասի 2-րդ կետով, Լևոն Աշոտի Աթոյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2012թ. հուլիսի 03-ի որոշմամբ, ամբաստանյալ Լևոն Աշոտի Աթոյանի նկատմամբ ընտրված խափանման միջոց չհեռանալու մասին ստորագրությունը փոփոխվել է, նրա նկատմամբ խափանման միջոց է ընտրվել կալանավորումը և հայտարարվել է նրա հետախուզումը` ամբաստանյալի թաքնվելու պատճառով։
Դատարանի 2012թ. հուլիսի 19-ի որոշմամբ, քրեական գործի վարույթն ամբաստանյալ Լևոն Աշոտի Աթոյանի մասով կասեցվել է` մինչև նրան հայտնաբերելը և գործի դատական քննությունը շարունակվել է մյուս ամբաստանյալների նկատմամբ։ Ամբաստանյալ Լևոն Աշոտի Աթոյանի վերաբերյալ կասեցված մասն անջատվել է որպես առանձին վարույթ` ԵԿԴ-0130/01/12 համարի տակ։
Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Սամվել Ռոլանդի Դեմիրճյանը, չպարզված հանգամանքներում, իրացնելու նպատակով ապօրինի ձեռք է բերել և իր մոտ պահել առանձնապես խոշոր չափի` 549,97 գրամը գերազանցող «հաշիշ» տեսակի թմրամիջոց։ Նա պարբերաբար օգտվել է գործով մյուս ամբաստանյալ, անհատ ձեռնարկատեր Արսեն Լևոնի Ավետիսյանի տաքսի ծառայությունից։ Վերջինս իրեն պատկանող, «Վազ 21010» մակնիշի, S 8006 պետհամարանիշի ավտոմեքենայով, 2009թ. ընթացքում ամբաստանյալ Ս. Դեմիրճյանի համար տրանսպորտային ծառայությունների մատուցման բազմաթիվ պատվերներ է կատարել։
Ամբաստանյալ Ա.Ավետիսյանը 2009թ. աշնանն ամբաստանյալ Ս.Դեմիրճյանի համար հերթական պատվերը կատարելիս` նրան փոխադրել է «Զվարթնոց» օդանավակայան, որտեղ նրան ճանապարհելուց հետո ավտոմեքենայի առջևի աջ դռան գրպանի մեջ հայտնաբերել է սև պոլիէթիլենային տոպրակով փաթեթ, ինչի մասին անմիջապես հայտնել է Ս.Դեմիրճյանին։ Վերջինս խնդրել է Ա. Ավետիսյանին փաթեթը պահել` մինչև իր Հայաստան վերադառնալը։ Ա. Ավետիսյանն առանց փաթեթի պարունակությունը պարզելու, այն պահել է ավտոմեքենայի վահանակի աջակողմյան հատվածի պահախցում։
Այնուհետև, ամբաստանյալ Սամվել Դեմիրճյանը, 2009թ. հոկտեմբերի 13-ին Հայաստան վերադառնալիս` թմրամիջոցների մաքսանենգություն կատարելու կասկածանքով «Զվարթնոց» օդանավակայանում ձերբակալվել է։ Այդ դեպքի առթիվ հարուցված քրեական գործով նրան մեղադրանք է առաջադրվել ՀՀ քրեական օրենսգրքի 215-րդ հոդվածի 2-րդ մասով, 266-րդ հոդվածի 3-րդ մասի 1-ին, 2-րդ կետերով և նրա նկատմամբ որպես խափանման միջոց է ընտրվել կալանավորումը։
Ամբաստանյալ Սամվել Դեմիրճյանը ԵՄԴ-0036/01/10 քրեական գործով, Երևանի Մալաթիա-Սեբաստիա վարչական շրջանի ընդհանուր իրավասության առաջին ատյանի դատարանի 2010թ. օգոստոսի 25-ի դատավճռով, ՀՀ քրեական օրենսգրքի 215-րդ հոդվածի 4-րդ մասով և 266-րդ հոդվածի 3-րդ մասի 1-ին, 2-րդ կետերով, ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 9 /ինը/ տարի 6 /վեց/ ամիս ժամկետով, գույքի` մաքսանենգության առարկաների բռնագրավմամբ, պատժի սկիզբը հաշվելով 2009թ. հոկտեմբերի 13-ից։
Ազատազրկման ձևով պատիժը ՀՀ ԱՆ «Վարդաշեն» քրեակատարողական հիմնարկում կրելու ընթացքում, 2009թ. աշնանը, ամբաստանյալ Սամվել Դեմիրճյանը զանգահարել է ամբաստանյալ Ա. Ավետիսյանին և տեղեկացրել, որ կալանավորված է և գտնվում է ՀՀ ԱՆ «Վարդաշեն» քրեակատարողական հիմնարկում, հայտնել է, որ նրան ի պահ հանձնված փաթեթի պարունակությունը թմրամիջոց է, խնդրել է պահել այն ապահով վայրում։ Ամբաստանյալ Ա. Ավետիսյանը համաձայնվել է և Ս. Դեմիրճյանին պատկանող, առանձնապես խոշոր չափի` 549,97 գրամը գերազանցող «հաշիշ» տեսակի թմրամիջոցն ապօրինի փոխադրել է Երևան քաղաքի Բ. Մուրադյան փողոցի թիվ 5 շենք և պահել իրեն պատկանող, նույն շենքի 3-րդ մուտքում գտնվող նկուղում։
Այնուհետև, 2012թ. հունվարին, ամբաստանյալ Ս. Դեմիրճյանը հեռախոսային խոսակցության ընթացքում տեղեկանալով, որ իր հետ նախկինում նույն քրեակատարողական հիմնարկում պատիժը կրած Լևոն Աշոտի Աթոյանը ցանկանում է իր գործածման համար «հաշիշ» տեսակի թմրամիջոց ձեռք բերել` խոստացել է թմրամիջոց իրացնել նրան։ Ամբաստանյալ Ս.Դեմիրճյանը զրկված է եղել անձամբ թմրամիջոցը Լ.Աթոյանին հանձնելու հնարավորությունից` կալանավայրում գտնվելու պատճառով։ Այդ խոչընդոտը վերացնելու և իրեն օժանդակություն ցուցաբերելու համար, նույն օրը նա զանգահարել է ամբաստանյալ Ա. Ավետիսյանին և հեռախոսազրույց ունենալով նրա հետ` խնդրել է նկուղում պահվող թմրամիջոցից առանձնացնել 4,3 գրամը գերազանցող չափով թմրամիջոց, այն տեղափոխել Երևանի Նուբարաշենի խճուղի և հանձնել այնտեղ սպասող Լևոն Աշոտի Աթոյանին։ Ամբաստանյալ Ա. Ավետիսյանը համաձայնվել է օժանդակել ամբաստանյալ Ս. Դեմիրճյանին։ Նույն օրը, նկուղում պահվող «հաշիշ» տեսակի թմրամիջոցից Ա. Ավետիսյանն առանձնացրել է խոշոր չափի` 4,3 գրամը գերազանցող քաշով թմրամիջոց, այն իր ավտոմեքենայով փոխադրել է Երևան քաղաքի Նուբարաշենի խճուղի և հանձնել Լ.Աթոյանին։
Այնուհետև, 2012թ. փետրվարի 14-ին ամբաստանյալ Ս. Դեմիրճյանը տեղեկանալով Լ. Աթոյանի` «հաշիշ» տեսակի թմրամիջոց ձեռք բերելու մտադրության մասին` խոստացել է թմրամիջոց իրացնել նրան։ Այդ հարցում իրեն օժանդակելու նպատակով, կրկին զանգահարել է ամբաստանյալ Ա. Ավետիսյանին և խնդրել է նկուղում պահվող, իրեն պատկանող թմրամիջոցից առանձնացնել խոշոր չափի` 67,25 գրամ «հաշիշ» տեսակի թմրամիջոց, այն փոխադրել Երևանի Մ. Խորենացի փողոցի թիվ 24 հասցեի մոտակայք և հանձնել այնտեղ սպասող Լևոն Աշոտի Աթոյանին։ Ամբաստանյալ Ա. Ավետիսյանը Ս. Դեմիրճյանին պատկանող թմրամիջոցից 0,42 գրամն իր գործածման համար առանձնացրել է և ապօրինի պահել ավտոմեքենայի սրահում, իսկ Ս. Դեմիրճյանի կողմից խոշոր չափի թմրամիջոցի իրացնելուն օժանդակություն ցուցաբերելով, նկուղում պահվող «հաշիշ» տեսակի թմրամիջոցից խոշոր չափի` 67,25 գրամ թմրամիջոցը Լ. Աթոյանին փոխանցելու համար, իր ավտոմեքենայով փոխադրել է Երևան քաղաքի Մ.Խորենացի փողոց, որտեղ էլ նույն օրը, ժամը 18։00-ի սահմաններում, մինչև թմրամիջոցը Լ.Աթոյանին փոխանցելը բռնվել է ՀՀ ոստիկանության աշխատակիցների կողմից և բերման ենթարկվել ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք։ Այնտեղ Լ.Աթոյանին փոխանցելու համար նախատեսված խոշոր չափի` 67,25 գրամ և իր գործածման համար նախատեսված, 0,42 գրամ «հաշիշ» տեսակի թմրամիջոցները հայտնաբերվել են, իսկ մնացած` Երևանի Բ. Մուրադյան փողոցի թիվ 5 շենքի նկուղում պահվող, Ս. Դեմիրճյանին պատկանող, 478 գրամ «հաշիշ» տեսակի թմրամիջոցն ամբաստանյալ Ա. Ավետիսյանը 2012թ. մարտի 13-ին կամովին հանձնել է։
Քրեական գործի նախաքննության ընթացքում կատարվել են տոքսիկոքիմիական փորձաքննություններ ՀՀ ԳԱԱ «Փորձաքննությունների ազգային բյուրո» պետական ոչ առևտրային կազմակերպության կողմից, որոնց արժեքն ամբաստանյալներից յուրաքանչյուրի մասով կազմել է 19.236 /տասնինը հազար երկու հարյուր երեսունվեց/ ՀՀ դրամ գումար։
Ամբաստանյալների անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է հետևյալը.
Ամբաստանյալ Սամվել Դեմիրճյանը վատառողջ` 2-րդ խմբի հաշմանդամ է, տառապում է «ՍԻՀ լարման արենոկարդիա 3-րդ ֆդ, կարդիոսկլերոզ, աորտայի սկլերոզ, զարկերակային հիպերտենզիա 2-րդ շրջան ուղեղի և կորոնար արյան շրջանառության խանգարումով, հաճախակի հիպերտոնիկ կրիզներով, ԱՇԱ 3-րդ ֆդ, խրոնիկական օբստրակտիվ դիֆուզ լորձաթափանցիկ բրոնխիտ, թոքերի էմֆիզեմա, պնևմոսկլերոզ, թոքային սիրտ, թոք-սրտային անբավարարություն, շնչառական անբավարարություն 2-րդ աստիճան, խառը տիպի վենտիլյացիոն անբավարարություն օբստրուկցիայի գերակշռումով, խրոնիկ պերսիարող հեպատիտ, ճարպային հեպաթոզ առանց լյարդի ֆունկցիայի խանգարման, ռեակտիվ պանկրեատիտ» հիվանդություններով, իրեն վերագրվող առանձնապես ծանր հանցանքի կատարման ժամանակ դատվածություն է ունեցել նախկինում կատարված առանձնապես ծանր հանցանքների համար,
ամբաստանյալ Արսեն Ավետիսյանը բնութագրվում է դրական, վատառողջ է` տառապում է «Միզաքարային հիվանդություն, շագանակագեղձի ադենոմա» հիվանդությամբ, խնամքին ունի երկու անչափահաս երեխա, որոնցից մեկը մինչև տասնչորս տարեկան է, նախկինում դատված չի եղել, նախաքննության ընթացքում իրեն լիովին մեղավոր ճանաչելով և տալով ինքնախոստովանական ցուցմունքներ` աջակցել է հանցագործությունը բացահայտելուն և հանցագործության մյուս մասնակիցներին մերկացնելուն, որն արտահայտվել է ամբաստանյալ Ս. Դեմիրճյանի կողմից «հաշիշ» տեսակի թմրամիջոց իրացնելու և դրան առնչվող, իրեն հայտնի այլ հանգամանքների վերաբերյալ մանրամասն ինքնախոստովանական ցուցմունքներ տալով և դրանք Ս. Դեմիրճյանին առերես պնդելով։

Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Արսեն Լևոնի Ավետիսյանի` նախաքննության ընթացքում տրված և դատարանում նրա կողմից հաստատված ցուցմունքներով այն մասին, որ իր կողմից շահագործվող «Վազ 21010» մակնիշի ավտոմեքենայով ուղևորափոխադրումներ կատարելու ընթացքում ծանոթացել է Երևան քաղաքի բնակիչ Սամվել Դեմիրճյանի հետ, որը մշտապես օգտվել է իր ծառայությունից։
2009թ. ընթացքում, Ս.Դեմիրճյանի համար հերթական պատվերը կատարելիս` նրան փոխադրել է «Զվարթնոց» օդանավակայան, որտեղ բեռնախցից իջեցրել և Ս.Դեմիրճյանին է հանձնել նրա ճամպրուկները։ Դրանից հետո նստելով ավտոմեքենան` առջևի աջ դռան գրպանի մեջ հայտնաբերել է սև պոլիէթիլենային տոպրակով փաթեթ և կարծելով, որ այն Ս.Դեմիրճյանն է թողել ավտոմեքենայի մեջ` իսկույն ձայն է տվել նրան և հայտնել թողնված փաթեթի մասին։ Ս.Դեմիրճյանը պատասխանել է, որ փաթեթն ինքն է թողել, ապա խնդրել է այն պահել` մինչև ինքը կվերադառնա Հայաստան և կվերցնի այն։ Առանց փաթեթի պարունակությունը պարզելու` այն պահել է ավտոմեքենայի վահանակի աջակողմյան հատվածի պահախցում։ Դրանից որոշ ժամանակ անց, 2009թ. ընթացքում, Ս.Դեմիրճյանը զանգահարել է իրեն և տեղեկացրել, որ կալանավորված է և գտնվում է ՀՀ ԱՆ «Վարդաշեն» քրեակատարողական հիմնարկում։ Նույն հեռախոսային խոսակցության ընթացքում Ս.Դեմիրճյանը տեղեկացրել է, որ իրեն ի պահ հանձնված փաթեթի պարունակությունը թմրամիջոց է, ապա խնդրել է այն ապահով վայրում պահել և սպասել իր ցուցումներին։ Սկզբում առարկել է, հայտնել է թմրամիջոցից ձերբազատվելու մտադրության մասին, սակայն հետո համաձայնվել և Ս.Դեմիրճյանին պատկանող թմրամիջոցը թաքցրել է Երևան քաղաքի Բ.Մուրադյան փողոցի թիվ 5 շենքում գտնվող, իրենց պատկանող նկուղում։
2012թ. հունվարին Ս. Դեմիրճյանը զանգահարել է իրեն, խնդրել է նկուղում պահվող թմրամիջոցից մի փոքր առանձնացնել, տեղափոխել Երևանի Նուբարաշենի խճուղի և փոխանցել այնտեղ սպասող անձնավորությանը։ Կատարել է Ս.Դեմիրճյանի խնդրանքը և նկուղում պահվող թմրամիջոցից բութ մատի եղունգի չափով առանձնացրել է, որն իր կողմից շահագործվող տաքսի ավտոմեքենայով փոխադրել է Երևան քաղաքի Նուբարաշենի խճուղի և փոխանցել Սամվելի կողմից նշված անձնավորությանը` Լևոն Աթոյանին։
Դրանից հետո, 2012թ. փետրվարի 14-ին Ս.Դեմիրճյանը կրկին զանգահարել է իրեն և խնդրել է նկուղում պահվող թմրամիջոցի երեք կտորներից մեկը բաժանել հավասար մասերի և մեկ մասը փոխադրել Երևան քաղաքի Մ.Խորենացի փողոցում գործող ոսկյա զարդերի տոնավաճառի մոտակայք ու հանձնել այնտեղ սպասող անձնավորությանը։ Կատարել է Ս. Դեմիրճյանի ցուցումը և առանձնացված թմրամիջոցն իր տաքսի ավտոմեքենայով փոխադրել է Երևանի Մ.Խորենացի փողոց, որտեղ էլ բռնվել է ՀՀ ոստիկանության աշխատակիցների կողմից և բերման ենթարկվել ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք։ Այնտեղ թմրամիջոցը հայտնաբերվել է, իսկ Ս. Դեմիրճյանին պատկանող մնացած` Երևանի Բ.Մուրադյան փողոցի թիվ 5 շենքի նկուղում պահվող, 478 գրամ «հաշիշ» տեսակի թմրամիջոցը 2012թ. մարտի 13-ին կամովին հանձնել է։ Պնդում է, որ այս ցուցմունքներն ամբողջությամբ ճիշտ են։ Անկեղծորեն զղջում է կատարածի համար և խնդրում է մեղմ պատժել։
/դատական նիստի արձանագրություն, հատոր 1, գ.թ. 74, 88, 218, 247-250, հատոր 2, գ.թ. 28-29, 97, հատոր 3, գ.թ. 120, 131-132/
Ամբաստանյալ Արսեն Ավետիսյանն իր ցուցմունքները պնդել է նաև ամբաստանյալ Սամվել Դեմիրճյանի հետ առերես հարցաքննության ժամանակ։
/հատոր 2, գ.թ. 93-96/
Ամբաստանյալ Լևոն Աշոտի Աթոյանի նախաքննական ցուցմունքներով այն մասին, որ 2007թ.-ին գողություն կատարելու համար ՀՀ Արարատի մարզի առաջին ատյանի դատարանի կողմից դատապարտվել է հինգ տարի ժամկետով ազատազրկման և պատիժը կրել ՀՀ ԱՆ «Վարդաշեն» քրեակատարողական հիմնարկում, որի ընթացքում մտերիմ փոխհարաբերություններ է հաստատել նույն հիմնարկի դատապարտյալ Սամվել Ռոլանդի Դեմիրճյանի հետ։ Նրա հետ ունեցած զրույցներից տեղեկացել է, որ նա պահվող «հաշիշ» տեսակի թմրամիջոց ունի։
Այնուհետև, կիսաբաց քրեակատարողական հիմնարկում պատիժը կրելու ընթացքում, 2012թ. հունվարին նպատակադրվել է իր գործածման համար թմրամիջոց ձեռք բերել։ Զանգահարել է Սամվելին և հայտնել է թմրամիջոց ձեռք բերելու իր մտադրության մասին։ Սամվելը համաձայնվել է իրեն թմրամիջոց տալ, որից հետո, պայմանավորվածության համաձայն ինքը գնացել է Երևան քաղաքի Նուբարաշեն վարչական շրջան, որտեղ հանդիպել է իր ծանոթ Արսենին և նրանից վերցրել է Սամվելի տված 5 գրամ «հաշիշ» տեսակի թմրամիջոցը, որից 0,7 գրամ թմրամիջոցը հետագայում ծխելու միջոցով գործածել է, իսկ մնացած` 4,3 գրամ «հաշիշ» տեսակի թմրամիջոցը հետագա գործածման համար պահել է իր մոտ։
2012թ. փետրվարի 14-ին բերման է ենթարկվել ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք, որտեղ էլ կատարված անձնական խուզարկության ընթացքում, իր սպորտային վերնազգեստի գրպանից հայտնաբերվել է 4,3 գրամ թմրամիջոցը։ Ոստիկանության աշխատակիցներին հայտնել է, որ թմրամիջոցն Ա.Ավետիսյանի միջոցով ձեռք է բերել Ս.Դեմիրճյանից, ապա համաձայնվել է համագործակցել ոստիկանների հետ և բացահայտել հանցագործներին։ Այդ նպատակով կրկին զանգահարել է Ս.Դեմիրճյանին և նույն թմրամիջոցից 300.000 ՀՀ դրամ գումարի չափով թմրամիջոց պատվիրել։ Վերջինս համաձայնվել է, ապա պայմանավորվել են, որ ինքն Ա.Ավետիսյանին կսպասի Երևան քաղաքի Մ.Խորենացի փողոցի վրա գործող ոսկու շուկայի մոտ։ Հեռախոսազրույցի բովանդակության և ձեռք բերված պայմանավորվածության մասին հայտնել է ոստիկաններին, որոնք էլ նույն օրը գնացել են ոսկու շուկայի մոտակայք և Ա.Ավետիսյանին բերման ենթարկել ՀՀ ոստիկանության Երևան քաղաքի վարչության Մարաշի բաժանմունք, որտեղ էլ վերջինիս անձնական խուզարկությամբ թմրամիջոցը հայտնաբերվել է։
/հատոր 1, գ.թ. 63-65, 116-117, 134, հատոր 3, գ.թ. 168, 230/
Ամբաստանյալ Լ. Աթոյանն իր ցուցմունքները պնդել է նաև ամբաստանյալներ Ս.Դեմիրճյանի և Ա. Ավետիսյանի հետ առերես հարցաքննությունների ժամանակ։
/հատոր 1, գ.թ. 76, հատոր 2, գ.թ. 22-23/
Վկա Լևոն Մանվելի Խաչատրյանի ցուցմունքներով այն մասին, որ 2012թ. փետրվարի 14-ին, ժամը 17։00-ի սահմաններում, ՀՀ ոստիկանության աշխատակիցների կողմից հրավիրվել է ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք և որպես ընթերակա մասնակցել իրեն անծանոթ Լևոն Աշոտի Աթոյանի անձնական խուզարկությանը։ Խուզարկության ընթացքում վերջինիս հագին եղած սպորտային վերնազգեստի ձախ գրպանից հայտնաբերվել է պոլիէթիլենային փաթեթ` սև գույնի սուր հոտով զանգվածի պարունակությամբ։ Հայտնաբերվածի կապակցությամբ խուզարկվողը հայտարարել է, որ այն իր գործածման համար նախատեսված թմրամիջոց է։ Հայտնաբերված զանգվածը կշռվել է, դրա քաշը կազմել է 4,3 գրամ, որը փաթեթավորվել և կնիքվել է։ Դրանից հետո խուզարկության ընթացքի և արդյունքների մասին կազմվել է համապատասխան արձանագրություն, որը ստորագրվել է մասնակիցների կողմից։
Դրանից մեկ ժամ անց կրկին հրավիրվել է ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք և որպես ընթերակա մասնակցել իրեն անծանոթ Արսեն Ավետիսյանի անձնական խուզարկությանը և նրա ավտոմեքենայի զննությանը։ Խուզարկության ընթացքում վերջինիս բաճկոնի գրպանից հայտնաբերվել է պոլիէթիլենային փաթեթ` սուր հոտով սև գույնի զանգվածի պարունակությամբ։ Հայտնաբերվածի կապակցությամբ Ա. Ավետիսյանը հայտարարել է, որ այն թմրամիջոց է, որը ձեռք է բերել իր ծանոթ, «Մուտիտ» մականվամբ Սամվելից։ Հայտնաբերված զանգվածի քաշը կազմել է 67,5 գրամ։ Ա. Ավետիսյանին պատկանող, «Վազ 21010» մակնիշի, Տ8006 պետհամարանիշի ավտոմեքենայի զննությամբ, առջևի ձախ դռան գրպանում եղած ծխախոտի գլանակի, ինչպես նաև ապահովիչների տուփի վրայից հայտնաբերված փաթեթի մեջ նույնպես թմրամիջոցին նմանվող զանգվածներ են եղել, որոնց ընդհանուր քաշը կազմել է 2,8 գրամ։ Հայտնաբերված զանգվածները փաթեթավորվել են և կնիքվել։ Խուզարկության և ավտոմեքենայի զննության ընթացքի և արդյունքների մասին կազմվել են արձանագրություններ, որոնք ստորագրվել են մասնակիցների կողմից։
/դատական նիստի արձանագրություն, հատոր 1, գ.թ. 220-221/
Վկա Վլադիմիր Ալեքսանդրի Մարտիրոսյանի ցուցմունքներով այն մասին, որ 2012թ. փետրվարի 14-ին, ժամը 17։00-ի սահմաններում, ՀՀ ոստիկանության աշխատակիցների կողմից հրավիրվել է ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք և որպես ընթերակա մասնակցել իրեն անծանոթ Լևոն Աշոտի Աթոյանի անձնական խուզարկությանը։ Խուզարկության ընթացքում, վերջինիս հագին եղած սպորտային վերնազգեստի ձախ գրպանից հայտնաբերվել է պոլիէթիլենային փաթեթ` սև գույնի սուր հոտով զանգվածի պարունակությամբ։ Հայտնաբերվածի կապակցությամբ խուզարկվողը հայտարարել է, որ այն իր գործածման համար նախատեսված թմրամիջոց է։ Հայտնաբերված զանգվածը կշռվել է, դրա քաշը կազմել է 4,3 գրամ, որը փաթեթավորվել և կնիքվել է։ Դրանից հետո խուզարկության ընթացքի և արդյունքների մասին կազմվել է համապատասխան արձանագրություն, որը ստորագրվել է մասնակիցների կողմից։
Դրանից մեկ ժամ անց կրկին հրավիրվել է ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունք և որպես ընթերակա մասնակցել իրեն անծանոթ Արսեն Ավետիսյանի անձնական խուզարկությանը և նրա ավտոմեքենայի զննությանը։ Խուզարկության ընթացքում, վերջինիս բաճկոնի գրպանից հայտնաբերվել է պոլիէթիլենային փաթեթ` սուր հոտով սև գույնի զանգվածի պարունակությամբ։ Հայտնաբերվածի կապակցությամբ Ա. Ավետիսյանը հայտարարել է, որ այն թմրամիջոց է, որը ձեռք է բերել իր ծանոթ, «Մուտիտ» մականվամբ Սամվելից։ Հայտնաբերված զանգվածի քաշը կազմել է 67,5 գրամ։ Ա. Ավետիսյանին պատկանող, «Վազ 21010» մակնիշի, Տ8006 պետհամարանիշի ավտոմեքենայի զննությամբ, առջևի ձախ դռան գրպանում եղած ծխախոտի գլանակի, ինչպես նաև ապահովիչների տուփի վրայից հայտնաբերված փաթեթի մեջ նույնպես թմրամիջոցին նմանվող զանգվածներ են եղել, որոնց ընդհանուր քաշը կազմել է 2,8 գրամ։ Հայտնաբերված զանգվածները փաթեթավորվել են և կնիքվել։ Խուզարկության և ավտոմեքենայի զննության ընթացքի և արդյունքների մասին կազմվել են արձանագրություններ, որոնք ստորագրվել են մասնակիցների կողմից։
/դատական նիստի արձանագրություն, հատոր 1, գ.թ. 220-221/
Դատաքիմիական փորձաքննության 15.02.2012թ. թիվ 62Ք եզրակացությամբ, որի համաձայն` «Փորձաքննության ներկայացված 4,3 գրամ քաշով նյութը հանդիսանում է հաշիշ տեսակի թմրամիջոց։
Ծանոթություն. հետազոտությամբ ծախսվեց 0,1 գրամ հաշիշ տեսակի թմրամիջոցից»։
/հատոր 1, գ.թ. 41-44/
Դատաքիմիական փորձաքննության 15.02.2012թ. թիվ 61Ք եզրակացությամբ, որի համաձայն` «Փորձաքննության ներկայացված 67,25 գրամ քաշով նյութը հանդիսանում է հաշիշ տեսակի թմրամիջոց։
Ծանոթություն. հետազոտությամբ ծախսվեց 0,2 գրամ հաշիշ տեսակի թմրամիջոցից»։
/հատոր 1, գ.թ. 45-48/
Դատաքիմիական փորձաքննության 21.02.2012թ. թիվ 63Ք եզրակացությամբ, որի համաձայն`
«1. Փորձաքննության ներկայացված ընդհանուր 0,26 գրամ քաշով նյութը հանդիսանում է` 0.07 գրամ քաշով հաշիշ տեսակի թմրամիջոցի և 0,12 գրամ քաշով ծխախոտի զանգվածի խառնուրդ։
2. Փորձաքննության ներկայացված ընդհանուր 1 գրամ քաշով նյութը հանդիսանում է` 0,35 գրամ քաշով հաշիշ տեսակի թմրամիջոցի և 0,65 գրամ քաշով ծխախոտի զանգվածի խառնուրդ։
Ծանոթություն. հետազոտությամբ ծախսվեց` 0,05-ական գրամ 0,26 գրամ քաշով խառնուրդից և 0,1-ական գրամ 1 գրամ խառնուրդից»։
/հատոր 1, գ.թ. 201-204/
Դատաքիմիական փորձաքննության 06.04.2012թ. թիվ 117Ք եզրակացությամբ, որի համաձայն`
«1. Ա. Ավետիսյանի մատնանշված վայրից հայտնաբերված` ընդհանուր 478 գրամ (199,8 գրամ, 78,5 գրամ և 199,7 գրամ) քաշով մուգ շագանակագույն, փայլատ մակերեսներով նյութերը հանդիսանում են հաշիշ տեսակի թմրամիջոց։
2. Ա. Ավետիսյանի մատնանշված վայրից հայտնաբերված` հաշիշ տեսակի թմրամիջոցները (Հմ. 1; 2 և 3 նմուշներ), Ա. Ավետիսյանի անձնական խուզարկությամբ հայտնաբերված` Հմ. 61Ք եզրակացությամբ հետազոտված` հաշիշ տեսակի թմրամիջոցը (Հմ. 4 նմուշ), ինչպես նաև Լ. Աթոյանի անձնական խուզարկությամբ հայտնաբերված, Հմ. 62Ք եզրակացությամբ հետազոտված` հաշիշ տեսակի թմրամիջոցը (Հմ. 5 նմուշ), ըստ իրենց հանքային քիմիական բաղադրությունների միանման են, ուստի հնարավոր է նախկինում կազմել են մեկ ամբողջություն։
3. Ա. Ավետիսյանին պատկանող Վազ 21010 մակնիշի Տ 8006 պ/հ-ի ավտոմեքենայի սրահի զննությամբ հայտնաբերված` Հմ. 63Ք եզրակացությամբ հետազոտված` հաշիշ տեսակի թմրամիջոցը համեմատական հետազոտության ենթարկել հնարավոր չէ, վերջինիս չնչին քանակության, ինչպես նաև ծխախոտի հետ խառնված լինելու պատճառով։
4. Փորձաքննության ներկայացված «Վիզին» գրվածքով սրվակում առկա թափանցիկ հեղուկում և թվով 5 հատ «Էսոնցիալ ֆորտե» գրվածքով շագանակագույն դեղապարկուճներում թմրամիջոցներ և հոգեմետ նյութեր չհայտնաբերվեցին։ Դրանք հանդիսանում են` դեղամիջոցներ, իրենց գործարանային փաթեթավորումներով և ըստ վրայի գրառումների հանդիսանում են` Գերմանական և Կանադական արտադրության։
5. Ինչպիսին է ֆիզիկական անձանց այդ նյութերի թողնման կարգը դեղատնային կազմակերպություններում, առաջադրված հարցի պարզաբանումը, դուրս է քիմիկ փորձագետի իրավասության շրջանակներից։
Ծանոթություն. հետազոտությամբ ծախսվեց 0,7-ական գրամ հաշիշ տեսակի թմրամիջոցից, մեկ հատ դեղապարկուճ և ВИЗИН գրառմամբ պիտակով տարայից 1մլ ծավալով հեղուկ»։
/հատոր 3, գ.թ. 93-98/
Տոքսիկոքիմիական փորձաքննության 2012թ. փետրվարի 22-ի թիվ 12-0529 եզրակացությամբ, որի համաձայն` «Արսեն Լևոնի Ավետիսյանից վերցված մազի և մեզի փորձանմուշների մեջ հայտնաբերվել են կանաբինոիդների խմբին պատկանող թմրամիջոցի թմրալկալոիդներ»։
/հատոր 1, գ.թ. 230-233/
Տոքսիկոքիմիական փորձաքննության 2012թ. փետրվարի 22-ի թիվ 12-0520 եզրակացությամբ, որի համաձայն` «Լևոն Աշոտի Աթոյանից վերցված մազի և մեզի փորձանմուշների մեջ հայտնաբերվել են կանաբինոիդների խմբին պատկանող թմրամիջոցի թմրալկալոիդներ»։
/հատոր 1, գ.թ. 234-237/
Դատանարկոլոգիական փորձաքննության 2012թ. մարտի 28-ի թիվ 72-12 եզրակացությամբ, որի համաձայն` «Լևոն Աշոտի Աթոյանի մոտ թմրանյութերի գործածումը կրում է էպիզոդիկ բնույթ, ուստի հարկադիր բուժման կարիք չունի»։
/հատոր 3, գ.թ. 100-101/
Դատանարկոլոգիական փորձաքննության 2012թ. մարտի 28-ի թիվ 73-12 եզրակացությամբ, որի համաձայն` «Արսեն Լևոնի Ավետիսյանի մոտ թմրանյութերի գործածումը կրում է էպիզոդիկ բնույթ, ուստի հարկադիր բուժման կարիք չունի»։
/հատոր 3, գ.թ. 102-103/
Անձին ճանաչման ներկայացնելու վերաբերյալ 26.03.2012թ. արձանագրությամբ, որի համաձայն` ամբաստանյալ Ա. Ավետիսյանն իրեն ճանաչման ներկայացված անձանցից ճանաչել է Ս. Դեմիրճյանին և հայտարարել, որ վերջինս հանդիսանում է իր ավտոմեքենայի մեջ թմրամիջոց թողած անձնավորությունը, որի խնդրանքով հետագայում թմրամիջոցը պահել է իր նկուղում, իսկ 2012թ. հունվարին նրա ցուցումով նշված թմրամիջոցից առանձնացրել և փոխանցել է Լ.Աթոյանին։
/հատոր 2, գ.թ. 92/
Անձին ճանաչման ներկայացնելու վերաբերյալ 16.02.2012թ. արձանագրությամբ, որի համաձայն` Լ. Աթոյանն իրեն ճանաչման ներկայացված անձանցից ճանաչել է ամբաստանյալ Ա. Ավետիսյանին և հայտարարել, որ վերջինս հանդիսանում է Սամվելի կողմից խոստացած թմրամիջոցը 2012թ. հունվարին Երևանի Նուբարաշենի խճուղում իրեն փոխանցած անձնավորությունը։
/հատոր 1, գ.թ. 75/
Լուսանկարով ճանաչման ներկայացնելու մասին 21.02.2012թ. արձանագրությամբ, որի համաձայն` Լ.Աթոյանը լուսանկարով ճանաչել է ամբաստանյալ Ս. Դեմիրճյանին և հայտարարել, որ վերջինս հանդիսանում է իրեն «հաշիշ» տեսակի թմրամիջոց տրամադրած անձնավորությունը։
/հատոր 1, գ.թ. 132/
Անձին խուզարկության ենթարկելու վերաբերյալ 14.02.2012թ. արձանագրությամբ, որի համաձայն` Լ. Աթոյանի սև սպորտային համազգեստի ձախ գրպանից հայտնաբերվել է «Մոտորոլա Լ7» մոդելի բջջային հեռախոս, որի մեջ եղել է 094-85-80-88 հեռախոսահամարը, մեկ հատ պոլիէթիլենային տոպրակի մեջ փաթեթավորված սև, սուր հոտով պլաստիլինե զանգված, որն ըստ Լ. Աթոյանի հայտարարության` հանդիսանում է «պլան», որը գտել է և պահել է իր օգտագործման համար։ Այն կշռվել է ոսկերչական կշեռքով և դրա քաշը կազմել է շուրջ 4,3 գրամ։
/հատոր 1, գ.թ. 4/
Անձին խուզարկության ենթարկելու վերաբերյալ 14.02.2012թ. արձանագրությամբ, որի համաձայն` Ա. Ավետիսյանի բաճկոնի աջ կողային գրպանից հայտնաբերվել է «Սամսունգ» մոդելի, 3532330462040915 և 35323404620409/3 գործարանային համարների բջջային հեռախոս, ձախ գրպանից հայտնաբերվել է սև պոլիէթիլենային տոպրակով փաթեթավորված սև, սուր հոտով պլաստիլինին նմանվող զանգված, որը կշռվել է ոսկերչական կշեռքով և դրա քաշը կազմել է 67,5 գրամ։ Ըստ Ա. Ավետիսյանի հայտարարության` այն պատկանում է իրեն և ձեռք է բերել «Մուտիտ Սամվելից»։
/հատոր 1, գ.թ. 22/
Ավտոմեքենայի զննության վերաբերյալ 14.02.2012թ. արձանագրությամբ, որի համաձայն` զննվել է Արսեն Ավետիսյանին պատկանող, «Վազ 21010» մակնիշի, Տ 8006 պետհամարանիշի ավտոմեքենան, որի ձախ դռան գրպանից հայտնաբերվել է «Վիզին» /«ВИЗИН»/ գրառումով դեղի տուփ։ Դրա մեջ առկա է եղել «Վիզին» /«ВИЗИН»/ գրառումով սրվակ, որի մեջ եղել է թափանցիկ հեղուկ, ինչպես նաև թվով հինգ շագանակագույն դեղահաբեր` «Էսենցիալե Ֆորտեն» /«эсенциале фортен»/ գրառումով, «Նոյ» գրառումով մեկ ծխախոտի գլանակ, որի մեջ ըստ Ա. Ավետիսյանի հայտարարության` առկա է «պլան», որը նախատեսված է իր օգտագործման համար։ Ապահովիչների տուփից հայտնաբերվել է հայերեն գրառումներով փաթեթ, որի մեջ առկա է եղել դեղնականաչավուն զանգված, որն ըստ Ա. Ավետիսյանի հայտարարության` հանդիսանում է «պլան» և այն պահել է իր օգտագործման համար։ Այն կշռվել է ոսկերչական կշեռքով, որի քաշը փաթեթի հետ միասին կազմել է 2,8 գրամ։
/հատոր 1, գ.թ. 23/
Տեղանքի զննություն կատարելու մասին 13.03.2012թ. արձանագրությամբ և դրան կից լուսանկարչական հավելվածով, որոնց համաձայն` զննվել է Երևան քաղաքի Բ. Մուրադյան փողոցի թիվ 5 շենքի 3-րդ մուտքին կից նկուղի մուտքի դռնից դեպի ներս գտնվող, առաջին աջակողմյան նկուղը, որի մուտքի դռնից դեպի ձախ պատի տակ դրված երկաթե սեղանի տակ առկա է եղել փայտյա արկղիկ, որի զննությամբ, դրա միջից հայտնաբերվել են երեք հատ, սև պոլիէթիլենի մեջ փաթեթավորված, մուգ շագանակագույն, սուր հոտով զանգվածներ, որոնցից մեկի քաշը կազմել է 199,9 գրամ, երկրորդինը` 199,7 գրամ, իսկ երրորդինը` 78,5 գրամ։ Ըստ զննության մասնակից Լևոն Ավետիսյանի հայտարարության` ինքն այդ զանգվածների մասին նախկինում չի իմացել և իր որդի Արսենն այդ մասին ոչ իրեն, ոչ էլ ընտանիքի անդամներին չի հայտնել։
/հատոր 2. գ.թ. 30-33/
Որպես այլ փաստաթուղթ` ապացույց ճանաչված, ամբաստանյալներ Ս. Դեմիրճյանի, Լ. Աթոյանի և Ա. Ավետիսյանի 098-38-11-48, 077-52-72-00, 099-42-69-36, 099-08-02-08 և 094-85-80-88 հեռախոսահամարների մուտքային և ելքային հեռախոսազանգերի վերծանումներով, որոնց համաձայն` իրենց վերագրվող արարքները կատարելու ժամանակահատվածում ամբաստանյալները գտնվել են ակտիվ հեռախոսակապի մեջ միմյանց հետ։
/հատոր 2, գ.թ. 1-2, 60-76, 214-216/
Իրեղեն ապացույց ճանաչված, 4,3 գրամ, 67,25 գրամ, 0,07 գրամ, 0,35 գրամ և 478 գրամ «հաշիշ» տեսակի թմրամիջոցներով։
/հատոր 1, գ.թ. 205, հատոր 3, գ.թ. 99/
Առաջադրված մեղադրանքում ամբաստանյալ Սամվել Ռոլանդի Դեմիրճյանն իրեն մեղավոր չի ճանաչել և ցուցմունքներ է տվել այն մասին, որ հայտնաբերված 549,97 գրամ «հաշիշ» տեսակի թմրամիջոցի հետ որևէ առնչություն չունի, դա իրեն չի պատկանել և որևէ մեկին թմրամիջոց չի իրացրել։ Այս ամենի նախաձեռնողը ոստիկան Խաչատրյան Արսենն է, որն իր թշնամին է։ Ինքը չէր կարող կես կիլոգրամ թմրանյութ տար մի տաքսու վարորդի, ով իր հարազատը չէ։ Ինքն այդ ժամանակ ունեցել է եռահարկ առանձնատուն և երեք մեքենա, ուստի կարող էր դրանցից մեկում թաքցնել թմրամիջոցը։ Լևոնը Աթոյանն իրեն 300.000 ՀՀ դրամ գումար է պարտք և խաբել ու գումարը չի վերադարձրել։ Երբ պահանջել է գումարը, ասել է, որ կտա իր որդուն, ով ոսկու խանութում թիկնապահ է աշխատում։ Լևոնը դեպքն այնպես է ներկայացրել, իբրև թե իր տված թմրանյութն է վաճառում, գումարն էլ տալիս է իր որդուն։ Եթե նույնիսկ ինքը թմրանյութ իրացնող լիներ, իր որդուն երբեք չէր ներքաշի այդ գործի մեջ։ Մինչև իր ձերբակալվելը և մինչև Պարսկաստան մեկնելը որևէ մեկից «հաշիշ» տեսակի թմրամիջոց ձեռք չի բերել և չի պահել իր մոտ։
Ինքը տեղյակ չի եղել, որ Արսենի մոտ թմրանյութ է եղել։ Մի անգամ Արսենի հետ խոսելիս նա իրեն ասել է, որ Լևոնին ճանաչում է շատ վաղուց։ Արսենը ստում է` ասելով, որ ինքը նրան թմրամիջոց է տվել և պատվիրել է տեղափոխել։ Ինքը լսել է, որ Արսենին վախեցրել են, բայց չի կարող ասել, թե ումից է դա լսել։ Մինչև այդ դեպքը Արսեն Ավետիսյանի հետ եղել է նորմալ հարաբերությունների մեջ։ Քանի որ Արսենն իրեն և Լևոնին ճանաչում էր, այդ պատճառով էլ իրենց անունն է շոշափվել։ Լևոն Աթոյանն իրեն պատմել է, որ նրան ասել են, որ նման բան անի, որպեսզի շարունակի պատիժը կրել բաց ռեժիմով։
/դատական նիստի արձանագրություն, հատոր 1, գ.թ. 188, 196, հատոր 2, գ.թ. 226-227, հատոր 3, գ.թ. 142/
Պաշտպանության կողմի միջնորդությամբ դատարանում որպես վկա հարցաքննված ներքոհիշյալ անձինք դատարանում ցուցմունքներ տվեցին հետևյալի մասին`
Վկա Սամվել Նշանի Անտոնյանը դատարանին հայտնեց, որ ճանաչում է Սամվել Դեմիրճյանին։ Մեկուկես տարի է, ինչ ՀՀ ԱՆ «Վարդաշեն» քրեակատարողական հիմնարկի նույն կացարանում են բնակվում և եթե նա թմրանյութ ձեռք բերեր, պահեր կամ ի պահ տված լիներ որևէ մեկին, ապա ինքը կիմանար այդ մասին, սակայն նման բան չի եղել։ Երբեք չի լսել, որ Սամվել Դեմիրճյանը հեռախոսով որևէ մեկին հայտնի, որ իր մոտ թմրանյութ կա և այն պետք է փոխանցի մեկ ուրիշի։ Լևոն Աթոյանին ճանաչում է, նա իրենց հետ կալանք է կրել։ Նա իրենց կացարանում չի բնակվել, բայց հաճախակի եկել է իրենց մոտ և միասին թեյ, սուրճ են խմել կամ հաց կերել։ Երբեք չի նկատել, որ նա Ս. Դեմիրճյանի հետ առանձնանա և առանձին զրուցի։ Երբեք չի լսել, որ Ս. Դեմիրճյանը Լևոն Աթոյանին հայտնի, որ դրսում թմրանյութ ունի պահած։ Չի լսել նաև, որ Լևոն Աթոյանի անունը հեռախոսային խոսակցության ժամանակ շոշափվի` կապված թմրանյութեր պահելու կամ դրանք մեկ ուրիշին փոխանցելու հետ։ Քանի որ իր մեջքը ցավում է, այդ պատճառով սենյակից դուրս չի գալիս։ Սամվելը նույնպես սենյակից հազվադեպ է դուրս գալիս և այդ ամբողջ ընթացքում ինքը նման բան չի լսել։ Երբեք չի լսել, որ Ս. Դեմիրճյանն Արսեն Ավետիսյանին որևէ հանձնարարություն տա` թմրամիջոց տեղափոխելու կամ պահելու համար։ Տեղյակ է, որ Լևոն Աթոյանը Սամվելին 300.000 ՀՀ դրամ գումար է պարտք, որը չի վերադարձրել, իսկ Սամվելն անընդհատ զանգահարել է Լևոնին և պահանջել գումարը։ Լևոն Աթոյանն անընդհատ ձգձգել է գումարի վերադարձը և այդպես էլ չի վերադարձրել։ Ինքը չի լսել, որ Սամվելը թմրամիջոցների հետ կապված Լևոնի հետ որևէ բան խոսի, ինքը դա բացառում է։ Նույնիսկ իր քնած լինելու դեպքում, Սամվելի ձայնը լսելով` ինքը քնից անպայման կարթնանար, քանի որ Սամվելի ձայնը շատ բարձր է։ Սամվելին ճանաչում է շատ վաղուց և երբեք չի լսել, որ նա թմրամոլ է կամ թմրանյութերի հետ կապ ունի։
/դատական նիստի արձանագրություն/
Վկա Վարդազար Յուրիկի Վարդազարյանը դատարանին հայտնեց, որ Սամվել Դեմիրճյանի հետ ՀՀ ԱՆ «Վարդաշեն» քրեակատարողական հիմնարկի նույն կացարանում են բնակվում։ Կացարանում բնակվում են 10 հոգով։ Իր մահճակալը գտնվում է Սամվելի մահճակալից շուրջ մեկուկես մետր հեռավորության վրա։ Հեռախոսային խոսակցությունները բոլորի համար լսելի են, քանի որ կացարանը փոքր է։ Երբևէ չի լսել, որ Սամվելը որևէ մեկի հետ թմրամիջոցների հետ կապված խոսակցություն ունենա։ Լևոն Աթոյանին ճանաչում է։ Նա իրենց հետ պատիժ է կրել, բնակվել է 2-րդ հարկում, բայց իրենց մոտ հաճախակի է եկել, քանի որ Սամվելի հետ մտերիմ է եղել։ Լևոնը գրեթե ամեն օր եկել է իրենց մոտ, սակայն չի նկատել, որ նա Սամվելի հետ առանձնանա։ Ինքը չի լսել, որ այդ խոսակցությունների ժամանակ նրանք զրուցած լինեն թմրանյութի մասին։ Տեղյակ է, որ Լևոնը Սամվելին գումար էր պարտք, որը Լևոնը չէր ցանկանում վերադարձներ։ Քրեակատարողական հիմնարկում բոլորն էլ առանձնանում են, երբ դուրս են գալիս զբոսանքի։ Չի բացառում, որ քնած լինելու պատճառով լսած չլինի Սամվելի խոսակցությունը` թմանյութերի հետ կապված։ Սամվել Անտոնյանի և Սամվել Դեմիրճյանի հարաբերությունները նորմալ են։ Ինքը հնարավոր է համարում, որ Սամվել Անտոնյանը բացակայած լինի սենյակից և այդ ժամանակ Սամվել Դեմիրճյանը հեռախոսային խոսակցություն ունենա նրա բացակայությամբ։
/դատական նիստի արձանագրություն/





Դատարանի իրավական վերլուծությունները

Վերլուծելով ամբաստանյալ Սամվել Ռոլանդի Դեմիրճյանի ցուցմունքները, համադրելով դրանք քրեական գործի դատական քննությամբ ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Սամվել Ռոլանդի Դեմիրճյանի ցուցմունքները` առանձնապես խոշոր չափերով «հաշիշ» տեսակի թմրամիջոց ապօրինի չիրացնելու մասին, իրականությանը չեն համապատասխանում, քրեական պատասխանատվությունից և պատժից խուսափելու նպատակ են հետապնդում և հերքվում են վերոհիշյալ ապացույցներով։
Վերլուծելով վկաներ Սամվել Նշանի Անտոնյանի և Վարդազար Յուրիկի Վարդազարյանի դատաքննական ցուցմունքները` վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ վկաներ Սամվել Նշանի Անտոնյանի և Վարդազար Յուրիկի Վարդազարյանի դատարանում տված ցուցմունքները` ամբաստանյալ Սամվել Դեմիրճյանի կողմից առանձնապես խոշոր չափերով թմրամիջոցներ չիրացնելու մասով, իրականությանը չեն համապատասխանում, քրեական պատասխանատվությունից և պատժից խուսափելու հարցում ամբաստանյալ Սամվել Ռոլանդի Դեմիրճյանին օգնելու նպատակ են հետապնդում և հերքվում են քրեական գործով ձեռք բերված և դատարանում հետազոտված վերոհիշյալ ապացույցներով։ Միաժամանակ դատարանը գտնում է, որ վկաներ Սամվել Նշանի Անտոնյանի և Վարդազար Յուրիկի Վարդազարյանի կողմից դատարանում սուտ ցուցմունք տալը նշանակություն չի կարող ունենալ գործի լուծման համար, այսինքն առկա են ՀՀ քրեական օրենսգրքի 338-րդ հոդվածի 3-րդ մասով սահմանված հանգամանքները։
Քննարկելով ամբաստանյալներ Լևոն Աշոտի Աթոյանի և Արսեն Լևոնի Ավետիսյանի 2012թ. փետրվարի 14-ի բացատրությունների /հատոր 1, գ.թ. 14-15, 31-33/` որպես ապացույցի թույլատրելիության հարցը` դատարանը գտնում է, որ դրանք որպես ապացույց թույլատրելի չեն հետևյալ պատճառաբանությամբ.
ՀՀ կառավարության 14.06.2007թ. թիվ 818-Ն որոշման համաձայն` ՀՀ կառավարությունը որոշել է` «Համաձայն «Ոստիկանության մասին» Հայաստանի Հանրապետության օրենքի 5-րդ հոդվածի 5-րդ մասի հաստատել`
1. մարդու իրավունքների ու ազատությունների սահմանափակումից բխող` ծանուցման ենթակա իրավունքների ցանկը.
2. մարդու իրավունքների ու ազատությունների սահմանափակումից բխող` ծանուցման ենթակա իրավունքների կարգը։»
Մարդու իրավունքների ու ազատությունների սահմանափակումից բխող` ծանուցման ենթակա իրավունքների ցանկի 2-րդ կետի 2-րդ և 3-րդ ենթակետերի համաձայն` «Մարդու իրավունքերը սահմանափակելիս` մարդն իրավունք ունի ստանալու իրավաբանական օգնություն, բացատրություններ տալու փաստաբանի ներկայությամբ կամ հրաժարվելու բացատրություններ տալուց»։
Մարդու իրավունքների ու ազատությունների սահմանափակումից բխող իրավունքների ծանուցման կարգի 5-րդ կետի համաձայն` «Մարդուն ոստիկանություն բերելուց անմիջապես հետո կազմվում է իրավունքների բանավոր ծանուցման մասին արձանագրություն, որում նշվում են արձանագրությունը կազմող ոստիկանության ծառայողի պաշտոնը, կոչումը, ազգանունը, ծանուցման վայրը, ժամանակը, այն մարդու անունը, ազգանունը, ում ազատությունը սահմանափակվել է, սահմանափակման պատճառը, այն իրավական ակտը, որի հիման վրա ազատությունը սահմանափակվել է, նշում ազատության սահմանափակումից բխող իրավունքների ծանուցման փաստի, իրավունքների իրականացման կարգի պարզաբանման մասին։...»։
ՀՀ քրեական դատավարության օրենսգրքի 105-րդ հոդվածի 1-ին մասի 2-րդ և 5-րդ կետերի համաձայն` «Քրեական գործով վարույթում մեղադրանքի հիմքում չեն կարող դրվել և որպես ապացույց օգտագործվել այն նյութերը, որոնք ձեռք են բերվել` կասկածյալի և մեղադրյալի պաշտպանության իրավունքի, դատավարության լեզվին չտիրապետող անձանց իրավունքների` ՀՀ քրեական դատավարության օրենսգրքով նախատեսված լրացուցիչ երաշխիքների էական խախտմամբ, քննչական կամ այլ դատավարական գործողության կատարման կարգի էական խախտմամբ»։
Վերոհիշյալ բացատրությունները վերցնելիս` Լևոն Աթոյանին և Արսեն Ավետիսյանին ՀՀ կառավարության 14.06.2007թ. թիվ 818-Ն որոշմամբ սահմանված` իրավունքների և ազատությունների սահմանափակումից բխող իրավունքները չեն պարզաբանվել և նրանք չեն տեղեկացվել փաստաբան ունենալու, բացատրություն տալուց հրաժարվելու իրավունք ունենալու մասին, չի պահպանվել այդ գործողության` օրենքով սահմանված կատարման կարգը և այդ խախտումն էական է։ Հետևաբար այդ բացատրությունները մեղադրանքի հիմքում դրվել և որպես ապացույց օգտագործվել չեն կարող։
Վերլուծելով ամբաստանյալներ Սամվել Ռոլանդի Դեմիրճյանին և Արսեն Լևոնի Ավետիսյանին առաջադրված մեղադրանքները, նրանց ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Սամվել Ռոլանդի Դեմիրճյանի կողմից, նրա մեղավորությամբ, իրացնելու նպատակով, առանձնապես խոշոր չափերով թմրամիջոցներ ապօրինի ձեռք բերելը, պահելը և դրանք ապօրինի իրացնելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցագործության հատկանիշներին։
Ամբաստանյալ Արսեն Լևոնի Ավետիսյանի կողմից, նրա մեղավորությամբ, առանց իրացնելու նպատակի զգալի չափերով թմրամիջոցներ ապօրինի ձեռք բերելը և պահելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 268-րդ հոդվածի 1-ին մասով նախատեսված հանցագործության հատկանիշներին։
Ապացուցված է նաև ամբաստանյալ Արսեն Լևոնի Ավետիսյանի կողմից, նրա մեղավորությամբ, նրան ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով առաջադրված մեղադրանքի երկու դրվագներից յուրաքանչյուրով, խոշոր չափերով թմրամիջոցներ ապօրինի իրացնելուն օժանդակելը, նրա այդ արարքները նույնպես ճիշտ են որակված և համապատասխանում են ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ուսումնասիրելով ամբաստանյալների անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Սամվել Ռոլանդի Դեմիրճյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ վատառողջ` 2-րդ խմբի հաշմանդամ է, տառապում է ՍԻՀ լարման արենոկարդիա 3-րդ ֆդ, կարդիոսկլերոզ, աորտայի սկլերոզ, զարկերակային հիպերտենզիա 2-րդ շրջան ուղեղի և կորոնար արյան շրջանառության խանգարումով, հաճախակի հիպերտոնիկ կրիզներով, ԱՇԱ 3-րդ ֆդ, խրոնիկական օբստրակտիվ դիֆուզ լորձաթափանցիկ բրոնխիտ, թոքերի էմֆիզեմա, պնևմոսկլերոզ, թոքային սիրտ, թոք-սրտային անբավարարություն, շնչառական անբավարարություն 2-րդ աստիճան, խառը տիպի վենտիլյացիոն անբավարարություն օբստրուկցիայի գերակշռումով, խրոնիկ պերսիարող հեպատիտ, ճարպային հեպաթոզ առանց լյարդի ֆունկցիայի խանգարման, ռեակտիվ պանկրեատիտ` հիվանդություններով։ Ամբաստանյալի պատասխանատվությունը և պատիժը մեղմացնող հանգամանքներ դատարանը չի արձանագրում, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցագործությունների առանձնապես վտանգավոր ռեցիդիվը։
Ամբաստանյալ Սամվել Ռոլանդի Դեմիրճյանն իր կատարած` Հայաստանի Հանրապետության քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցագործության համար ենթակա է պատժի ազատազրկման ձևով։
Քննարկելով ամբաստանյալի նկատմամբ պատիժ նշանակելու հարցը` դատարանը գտնում է հետևյալը.
ՀՀ քրեական օրենսգրքի 22-րդ հոդվածի համաձայն`
«1. Հանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար։
(…)
3. Հանցագործությունների ռեցիդիվն առանձնապես վտանգավոր է համարվում անձի կողմից՝
(…)
3) առանձնապես ծանր հանցանք կատարելու դեպքում, եթե անձը նախկինում դատապարտվել է ծանր կամ առանձնապես ծանր հանցագործության համար։
(…)»։
ՀՀ քրեական օրենսգրքի 67.1 հոդվածի 2-րդ մասի համաձայն`
«(...) Հանցագործությունների առանձնապես վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երեք քառորդից։»։
Հետևաբար, Հայաստանի Հանրապետության քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցագործության կատարման համար ամբաստանյալ Սամվել Դեմիրճյանը ենթակա է պատժի ազատազրկման ձևով, որը չի կարող նվազ լինել տասնմեկ տարի երեք ամիս ժամկետով ազատազրկումից, քանի որ այդ հոդվածի սանկցիայով, որպես առավելագույն պատիժ նախատեսվում է ազատազրկում տասնհինգ տարի ժամկետով։
Հաշվի առնելով, որ ամբաստանյալ Սամվել Ռոլանդի Դեմիրճյանի կողմից նոր հանցանք է կատարվել ԵՄԴ-0036/01/10 քրեական գործով, Երևանի Մալաթիա-Սեբաստիա վարչական շրջանի ընդհանուր իրավասության առաջին ատյանի դատարանի 2010թ. օգոստոսի 25-ի դատավճիռը կայացնելուց հետո, բայց մինչև պատժի լրիվ կրելը` դատարանը գտնում է, որ ՀՀ քրեական օրենսգրքի 67-րդ հոդվածի 1-ին մասով սահմանված կարգով, նոր դատավճռով նշանակված պատժին մասնակիորեն գումարման է ենթակա նախորդ դատավճռով նշանակված պատժի չկրած մաս հանդիսացող 6 /վեց/ տարի 5 /հինգ/ ամիս 25 /քսանհինգ/ օր ժամկետով ազատազրկումից` 1 /մեկ/ տարի 6 /վեց/ ամիս ժամկետով ազատազրկումը։
Դատարանը գտնում է, որ իր նկատմամբ նշանակված պատիժն ամբաստանյալ Սամվել Դեմիրճյանը պետք է կրի, քանի որ դրան խոչընդոտող հանգամանքներ առկա չեն։
Ամբաստանյալ Արսեն Լևոնի Ավետիսյանի նկատմամբ, նրա կատարած հանցագործություններից յուրաքանչյուրի համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա տալով ինքնախոստովանական ցուցմունքներ` անկեղծորեն զղջացել է կատարածի համար, նախկինում դատված չի եղել, բնութագրվում է դրական, վատառողջ է` տառապում է «Միզաքարային հիվանդություն, շագանակագեղձի ադենոմա» հիվանդությամբ, խնամքին ունի երկու անչափահաս երեխա։ Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում նրա խնամքին մինչև տասնչորս տարեկան մեկ երեխայի առկայությունը, ինչպես նաև հանցագործությունը բացահայտելուն և հանցագործության մյուս մասնակիցներին մերկացնելուն աջակցելը, որն արտահայտվել է ամբաստանյալ Ս. Դեմիրճյանի կողմից «հաշիշ» տեսակի թմրամիջոց իրացնելու և դրան առնչվող, իրեն հայտնի այլ հանգամանքների վերաբերյալ մանրամասն ինքնախոստովանական ցուցմունքներ տալով և դրանք Ս. Դեմիրճյանին առերես պնդելով։ Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Արսեն Լևոնի Ավետիսյանն իր կատարած` Հայաստանի Հանրապետության քրեական օրենսգրքի 268-րդ հոդվածի 1-ին մասով և 38-266-րդ հոդվածի 2-րդ մասի 2-րդ կետով նախատեսված յուրաքանչյուր հանցագործության համար ենթակա է պատժի ազատազրկման ձևով։
Դատարանը գտնում է, որ իր նկատմամբ նշանակված պատիժն ամբաստանյալ Արսեն Ավետիսյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով ամբաստանյալների գույքի վրա դրված կալանքի հարցը` դատարանը գտնում է, որ ամբաստանյալներ Սամվել Ռոլանդի Դեմիրճյանի և Արսեն Լևոնի Ավետիսյանի գույքի վրա նախաքննության մարմնի 21.02.2012թ. և 24.02.2012թ. որոշումներով դրված կալանքը պետք է վերացնել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 27.02.2012թ. և 11.04.2012թ. որոշումներով իրեղեն ապացույցներ ճանաչված, 4,3 գրամ, 67,25 գրամ, 0,07 գրամ, 0,35 գրամ և 478 գրամ քաշով «հաշիշ» տեսակի թմրամիջոցները պետք է վերադարձնել վարույթն իրականացնող մարմնին` քրեական գործից անջատված մասով տնօրինելու համար։
Քննարկելով խափանման միջոցի հարցը` դատարանը գտնում է, որ ամբաստանյալ Արսեն Ավետիսյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Սույն քրեական գործով խափանման միջոց ամբաստանյալ Սամվել Դեմիրճյանի նկատմամբ չի ընտրվել։ Հաշվի առնելով, որ այլ հանցագործություններ կատարած լինելու պատճառով նա շարունակում է ազատազրկման ձևով պատիժ կրել, ունի այդ պատժի չկրած մաս ավելի քան վեց տարի ժամկետով, դատարանը գտնում է, որ ամբաստանյալ Ս. Դեմիրճյանի նկատմամբ խափանման միջոց ընտրելու հիմքեր առկա չեն։
Քննարկելով դատական ծախսերի հարցը` դատարանը գտնում է, որ ամբաստանյալներից հօգուտ ՀՀ պետական բյուջեի, որպես դատական ծախսեր բռնագանձման են ենթակա փորձաքննությունների կատարման արժեք հանդիսացող հետևյալ գումարները. ամբաստանյալ Սամվել Ռոլանդի Դեմիրճյանից` 19.236 /տասնինը հազար երկու հարյուր երեսունվեց/ ՀՀ դրամ, ամբաստանյալ Արսեն Լևոնի Ավետիսյանից` 19.236 /տասնինը հազար երկու հարյուր երեսունվեց/ ՀՀ դրամ։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց


1. Ամբաստանյալ Սամվել Ռոլանդի Դեմիրճյանին մեղավոր ճանաչել Հայաստանի Հանրապետության քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցանքում և դատապարտել ազատազրկման 11 /տասնմեկ/ տարի 6 /վեց/ ամիս ժամկետով` առանց գույքի բռնագրավման։
ՀՀ քրեական օրենսգրքի 67-րդ հոդվածի 1-ին մասի կիրառմամբ, նշանակված պատժին մասնակիորեն գումարել նախորդ` ԵՄԴ-0036/01/10 քրեական գործով, Երևանի Մալաթիա-Սեբաստիա վարչական շրջանի ընդհանուր իրավասության առաջին ատյանի դատարանի 2010թ. օգոստոսի 25-ի դատավճռով նշանակված պատժի չկրած մաս հանդիսացող 6 /վեց/ տարի 5 /հինգ/ ամիս 25 /քսանհինգ/ օր ժամկետով ազատազրկումից` 1 /մեկ/ տարի 6 /վեց/ ամիս ժամկետով ազատազրկումը և ամբաստանյալ Սամվել Ռոլանդի Դեմիրճյանի նկատմամբ պատիժ նշանակել ազատազրկում 13 /տասներեք/ տարի ժամկետով` առանց գույքի բռնագրավման, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. սեպտեմբերի 18-ից։
2. Ամբաստանյալ Արսեն Լևոնի Ավետիսյանին մեղավոր ճանաչել Հայաստանի Հանրապետության քրեական օրենսգրքի 38-266-րդ հոդվածի 2-րդ մասի 2-րդ կետով և 268-րդ հոդվածի 1-ին մասով նախատեսված հանցանքներում և դատապարտել.
ՀՀ քրեական օրենսգրքի 38-268-րդ հոդվածի 2-րդ մասի 2-րդ կետով`
- առաջին դրվագով` ազատազրկման 5 /հինգ/ տարի ժամկետով` առանց գույքի բռնագրավման,
- երկրորդ դրվագով` ազատազրկման 5 /հինգ/ տարի ժամկետով` առանց գույքի բռնագրավման,
ՀՀ քրեական օրենսգրքի 268-րդ հոդվածի 1-ին մասով` ազատազրկման 3 /երեք/ ամիս ժամկետով։
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Արսեն Լևոնի Ավետիսյանի նկատմամբ պատիժ նշանակել ազատազրկում 6 /վեց/ տարի ժամկետով` առանց գույքի բռնագրավման։ Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. փետրվարի 15-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալներ Սամվել Ռոլանդի Դեմիրճյանի և Արսեն Լևոնի Ավետիսյանի գույքի վրա նախաքննության մարմնի 21.02.2012թ. և 24.02.2012թ. որոշումներով դրված կալանքը վերացնել։
Դատավճռի օրինական ուժի մեջ մտնելուց հետո, 27.02.2012թ. և 11.04.2012թ. որոշումներով իրեղեն ապացույցներ ճանաչված, 4,3 գրամ, 67,25 գրամ, 0,07 գրամ, 0,35 գրամ և 478 գրամ քաշով «հաշիշ» տեսակի թմրամիջոցները վերադարձնել վարույթն իրականացնող մարմնին` քրեական գործից անջատված մասով տնօրինելու համար։
Ամբաստանյալ Սամվել Ռոլանդի Դեմիրճյանից հօգուտ ՀՀ պետական բյուջեի բռնագանձել 19.236 /տասնինը հազար երկու հարյուր երեսունվեց/ ՀՀ դրամ գումար` որպես դատական ծախսեր։
Ամբաստանյալ Արսեն Լևոնի Ավետիսյանից հօգուտ ՀՀ պետական բյուջեի բռնագանձել 19.236 /տասնինը հազար երկու հարյուր երեսունվեց/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։



ԴԱՏԱՎՈՐ` Մ. ՄԱՐՏԻՐՈՍՅԱՆ