Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

30 մայիսի 2012թ. ք. Երևան

ԵԿԴ-0069/01/12

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,

մասնակցությամբ`
մեղադրող,
Երևանի Կենտրոն և Նորք-Մարաշ
վարչական շրջանների դատախազության
դատախազ Մ. Գեղամյանի,

պաշտպան Ա. Ավագյանի,

տուժողներ Վ. Ենգոյանի,
Ա. Հարությունյանի,

տուժող և քաղաքացիական հայցվոր Ռ. Գևորգյանի,


դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Կառլեն Արթուրի Սանոյանի`
ծնված 1988թ. հունիսի 01-ին Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, տարրական կրթությամբ, խնամքին ոչ ոք, նախկինում չդատված, բնակվել է Երևանի Մանանդյան փողոցի թիվ 1/2 շենքի թիվ 44 բնակարանում, կալանքի տակ է 09.02.2012թ.-ից, մեղադրվում է ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 1-ին մասով և 179-րդ հոդվածի 2-րդ մասի 3-րդ կետով։


Գործի դատավարական նախապատմությունը
Թիվ 10133811 քրեական գործը ՀՀ ոստիկանության ՔԳՎ Երևան քաղաքի քննչական վարչության Մաշտոցի քննչական բաժնում հարուցվել է 2011թ. հոկտեմբերի 25-ին, ՀՀ քրեական օրենսգրքի 178-րդ հոդվածի 1-ին մասով, Մարիամ Հարությունյանի գույքը խարդախությամբ հափշտակելու դեպքի առթիվ։
Թիվ 13150312 քրեական գործը ՀՀ ոստիկանության ՔԳՎ Երևան քաղաքի վարչության Կենտրոնականի բաժնում հարուցվել է 2012թ. հունվարի 12-ին, ՀՀ քրեական օրենսգրքի 179-րդ հոդվածի 1-ին մասով, ոմն Մարատի կողմից Վ. Ենգոյանի 200.000 ՀՀ դրամ արժողության գույքը յուրացնելու փաստի առթիվ։
Նույն օրը, նույն բաժնում հարուցվել է թիվ 13150412 քրեական գործը, ՀՀ քրեական օրենսգրքի 179-րդ հոդվածի 2-րդ մասով, ոմն Մարատի կողմից Ռ. Գևորգյանի 1.500.000 ՀՀ դրամ արժողության գույքը յուրացնելու փաստի առթիվ։
26.01.2012թ. թիվ 13150412 քրեական գործն ուղարկվել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին, նույն օրը կայացված որոշմամբ ընդունվել է քննիչի վարույթ և միացվել թիվ 13150312 քրեական գործին։
Քննիչի 15.03.2012թ. որոշմամբ թիվ 10133811 քրեական գործն ուղարկվել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին` թիվ 13150312 քրեական գործին միացնելու համար։
2012թ. մարտի 07-ի որոշմամբ թիվ 10133811 քրեական գործն ընդունվել է քննիչի վարույթ, միացվել է թիվ 13150312 քրեական գործին և նախաքննությունը կատարվել է թիվ 13150312 համարի տակ։
Քննիչի 17.04.2012թ. որոշմամբ, թիվ 13150312 քրեական գործով մեղադրյալ Կառլեն Սանոյանի կողմից Մարիամ Հարությունյանի գույքը խարդախությամբ հափշտակելու մասով, ՀՀ քրեական օրենսգրքի 178-րդ հոդվածի 1-ին մասով քրեական հետապնդումը դադարեցվել է` համաներման ակտ ընդունվելու պատճառաբանությամբ։
Քննիչի 17.04.2012թ. մեկ այլ որոշմամբ, թիվ 13150312 քրեական գործով մեղադրյալ Կառլեն Սանոյանի կողմից Կ. Կարապետյանի, Թ. Գրիգորյանի, Է. Պողիկյանի և Դ. Հովսեփյանի զգալի չափի գույքը հաշփտակելու մասով, ՀՀ քրեական օրենսգրքի 178-րդ հոդվածի 1-ին մասով և 179-րդ հոդվածի 1-ին մասով քրեական հետապնդում չի իրականացվել` մեղադրյալի հետ տուժողների հաշտվելու պատճառաբանությամբ։
Քննիչի 17.04.2012թ. մեկ այլ որոշմամբ, Լիլիթ Մարգարյանի, Վարդան Մինասյանի և Կլառա Նալբանդյանի նկատմամբ ՀՀ քրեական օրենսգրքի 216-րդ հոդվածով քրեական հետապնդում չի իրականացվել` հանցակազմի բացակայության պատճառաբանությամբ։
Ամբաստանյալ Կառլեն Արթուրի Սանոյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 1-ին մասով և 179-րդ հոդվածի 2-րդ մասի 3-րդ կետով հետևյալ արարքների համար. «որ նա դեկտեմբեր ամսվա սկզբներին չարաշահելով Անահիտ Էդուարդի Հարությունյանի վստահությունը, վաճառելու և մի քանի օրից գումարը վերադարձնելու, ինչպես նաև վերջինիս կողմից վաճառվող «Վոլկսվագեն Գոլֆ» մակնիշի ավտոմեքենայի տեխնիկական վիճակը պարզելու և հետո միայն առուվաճառքի գործարք կատարելու պատրվակով, Երևան քաղաքի Լվովյան փողոցի 25 շենքի թիվ 70 բնակարանում Ա.Հարությունյանից ստացել և խարդախությամբ հափշտակել է նրան պատկանող 469.000 ՀՀ դրամ ընդհանուր արժողության տարբեր տեսակի հագուստներ և 35.000 ՀՀ դրամ գումարը` Ա.Հարությունյանին պատճառելով խոշոր չափի գույքային վնաս։
Այսինքն` Կառլեն Սանոյանը կատարել է ՀՀ քր. օր.-ի 178 հոդվածի 2-րդ մասի 2-րդ կետով նախատեսված հանցագործություն։
Բացի այդ Կ.Սանոյանը 2011թ. դեկտեմբերի 17-ից մինչև դեկտեմբերի 27-ն ընկած ժամանակահատվածում վարձակալական հիմունքներով բնակվելով Վիգեն Աշոտի Ենգոյանին պատկանող` Երևան քաղաքի Խանջյան փողոցի 43 շենքի թիվ 14 հասցեում գտնվող բնակարանում, յուրացմամբ հափշտակել է իրեն վստահված` Վ.Ենգոյանին պատկանող զգալի չափի` 210.000 ՀՀ դրամ ընդհանուր արժողության «ԼՋ» տեսակի լվացքի մեքենան, «Սամսունգ» տեսակի համակարգիչը և արդուկը։
Այսինքն` Կ.Սանոյանը կատարել է ՀՀ քր. օր.-ի 179 հոդվածի 1-ին մասով նախատեսված հանցագործություն։
Այնուհետև Կառլեն Սանոյանը բանավոր պայմանավորվածության համաձայն վարձակալական հիմունքներով բնակվելով Ռուզաննա Գևորգյանին պատկանող Երևան քաղաքի Լալայանց փողոցի 57 շենքի թիվ 4 բնակարանում յուրացմամբ հափշտակել է իրեն վստահված` Ռ.Գևորգյանին պատկանող խոշոր չափի` 1.500.000 ՀՀ դրամ արժողության գույքը։
Այսինքն` Կ.Սանոյանը կատարել է ՀՀ քր. օր.-ի 179 հոդվածի 2-րդ մասի 3-րդ կետով նախատեսված հանցագործություն։»։
2012թ. մայիսի 03-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Արագացված դատական քննություն

Ամբաստանյալ Կառլեն Արթուրի Սանոյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։
Մեղադրողը միջնորդության դեմ չառարկեց։
Տուժողները նույնպես միջնորդության դեմ չառարկեցին։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Կառլեն Արթուրի Սանոյանը կատարել է ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 1-ին մասով և 179-րդ հոդվածի 2-րդ մասի 3-րդ կետով նախատեսված արարքներ։
Տուժող Ռուզան Գևորգյանի կողմից քաղաքացիական հայց ներկայացվեց ամբաստանյալի դեմ` պահանջելով նրանից հօգուտ իրեն բռնագանձել 1.500.000 /մեկ միլիոն հինգ հարյուր հազար/ ՀՀ դրամ գումար` որպես հանցագործության հետևանքով պատճառված վնասի հատուցում։
Ամբաստանյալ Կառլեն Սանոյանը ներկայացված հայցի դեմ չառարկեց։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվեց, որ ամբաստանյալ Կառլեն Սանոյանը նախկինում դատված չի եղել, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողներին պատճառված վնասն ընդհանրապես չի հատուցել։

Դատարանի իրավական վերլուծությունները

Առաջադրված մեղադրանքն ամբաստանյալ Կառլեն Արթուրի Սանոյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ Կառլեն Արթուրի Սանոյանի կողմից, նրա մեղավորությամբ, խոշոր չափերով խարդախություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Կառլեն Արթուրի Սանոյանի կողմից, նրա մեղավորությամբ, իրեն վստահված ուրիշի գույքի զգալի չափերով հափշտակություն, այսինքն յուրացում կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 179-րդ հոդվածի 1-ին մասով նախատեսված հանցագործության հատկանիշներին։
Ապացուցված է նաև ամբաստանյալ Կառլեն Արթուրի Սանոյանի կողմից, նրա մեղավորությամբ, իրեն վստահված ուրիշի գույքի խոշոր չափերով հափշտակություն, այսինքն խոշոր չափերով յուրացում կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 179-րդ հոդվածի 2-րդ մասի 3-րդ կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Կառլեն Արթուրի Սանոյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նախկինում դատված չի եղել, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողներին պատճառած վնասն ընդհանրապես չի հատուցել։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Հաշվի առնելով գործի հանգամանքները, տուժողներին պատճառված վնասն ընդհանրապես վերականգնված չլինելը, ամբաստանյալի պատասխանատվությունը և պատիժը մեղմացնող հանգամանքների բացակայությունը` դատարանը գտնում է, որ ամբաստանյալ Կառլեն Արթուրի Սանոյանն իր կատարած` Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 1-ին մասով և 179-րդ հոդվածի 2-րդ մասի 3-րդ կետով նախատեսված յուրաքանչյուր հանցագործության համար ենթակա է պատժի այդ հանցագործությունների համար նախատեսված պատիժներից առավել խիստ պատժի` ազատազրկման ձևով, որը նա պետք է կրի, քանի որ պատժի նվազ խիստ տեսակները չեն կարող ապահովել պատժի նպատակները։
Քննարկելով ամբաստանյալ Կառլեն Արթուրի Սանոյանի նկատմամբ ՀՀ քրեական օրենսգրքի 179-րդ հոդվածի 2-րդ մասի 3-րդ կետով նախատեսված լրացուցիչ պատիժ նշանակելու հարցը` դատարանը գտնում է, որ այդ հոդվածով նախատեսված հանցագործության համար նա ենթակա է պատժի ազատազրկման ձևով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, քանի որ հանցագործությունը կատարելիս որևէ պաշտոն չի զբաղեցրել և որևէ որոշակի գործունեությամբ չի զբաղվել։
Քննարկելով քաղաքացիական հայցի և գույքային վնասի հատուցման հարցերը` դատարանը գտնում է, որ տուժող և քաղաքացիական հայցվոր Ռուզան Գևորգյանի քաղաքացիական հայցը ենթակա է բավարարման. ամբաստանյալ Կառլեն Արթուրի Սանոյանից հօգուտ տուժող և քաղաքացիական հայցվոր Ռուզան Գևորգյանի ենթակա է բռնագանձման 1.500.000 /մեկ միլիոն հինգ հարյուր հազար/ ՀՀ դրամ գումար` որպես հանցագործության հետևանքով պատճառված վնասի հատուցում։
Գործով գույքային վնասի հատուցման այլ պահանջներ չեն ներկայացվել։
Քննարկելով ամբաստանյալի գույքի վրա դրված կալանքի հարցը` դատարանը գտնում է, որ ամբաստանյալ Կառլեն Արթուրի Սանոյանի գույքի վրա նախաքննության մարմնի 13.04.2012թ. որոշմամբ դրված կալանքը պետք է թողնել անփոփոխ` մինչև դատավճռի կատարումը։
Քննարկելով տուժող և քաղաքացիական հայցվոր Ռուզան Գևորգյանի միջնորդությունը` որպես հայցի ապահովում, հայցագնի չափով ամբաստանյալ Կառլեն Սանոյանին սեփականության իրավունքով պատկանող շարժական և անշարժ գույքերի, ինչպես նաև դրամական միջոցների վրա արգելանք դնելու խնդրանքի մասին, դատարանը գտնում է, որ այն անհիմն է և ենթակա է մերժման, քանի որ նախաքննության մարմնի 13.04.2012թ. որոշմամբ ամբաստանյալ Կառլեն Արթուրի Սանոյանի գույքի վրա արդեն իսկ կալանք է դրվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 13.04.2012թ. որոշմամբ իրեղեն ապացույց ճանաչված գորգը, էլեկտրական ջեռուցիչը և սառնարանը պետք է թողնել տուժող և քաղաքացիական հայցվոր Ռուզան Գևորգյանի տնօրինմանը։
Քննարկելով խափանման միջոցի հարցը` դատարանը գտնում է, որ ամբաստանյալ Կառլեն Արթուրի Սանոյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 154-րդ, 357-360-րդ, 364-366-րդ, 369-373-րդ, 3751-3754-րդ հոդվածներով, դատարանը`

Վ Ճ Ռ Ե Ց

Ամբաստանյալ Կառլեն Արթուրի Սանոյանին մեղավոր ճանաչել Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 1-ին մասով և 179-րդ հոդվածի 2-րդ մասի 3-րդ կետով նախատեսված հանցանքներում և դատապարտել. ՀՀ քրեական օրենսգրքի 178-րդ հոդվածի 2-րդ մասի 2-րդ կետով` ազատազրկման 2 /երկու/ տարի ժամկետով, 179-րդ հոդվածի 1-ին մասով` ազատազրկման 6 /վեց/ ամիս ժամկետով, 179-րդ հոդվածի 2-րդ մասի 3-րդ կետով` ազատազրկման 2 /երկու/ տարի 6 /վեց/ ամիս ժամկետով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու։
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ՀՀ քրեական օրենսգրքի 179-րդ հոդվածի 2-րդ մասի 3-րդ կետով նշանակված պատժին` 2 /երկու/ տարի 6 /վեց/ ամիս ժամկետով ազատազրկմանը գումարելով 179-րդ հոդվածի 1-ին մասով նշանակված պատժից` ազատազրկում 3 /երեք/ ամիս ժամկետով, 178-րդ հոդվածի 2-րդ մասի 2-րդ կետով նշանակված պատժից` ազատազրկում 1 /մեկ/ տարի 3 /երեք/ ամիս ժամկետով, ամբաստանյալ Կառլեն Արթուրի Սանոյանի նկատմամբ պատիժ նշանակել ազատազրկում 4 /չորս/ տարի ժամկետով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու։ Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2012թ. փետրվարի 09-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Տուժող և քաղաքացիական հայցվոր Ռուզան Ժորժիկի Գևորգյանի քաղաքացիական հայցը բավարարել. ամբաստանյալ Կառլեն Արթուրի Սանոյանից հօգուտ տուժող և քաղաքացիական հայցվոր Ռուզան Ժորժիկի Գևորգյանի բռնագանձել 1.500.000 /մեկ միլիոն հինգ հարյուր հազար/ ՀՀ դրամ գումար` որպես հանցագործության հետևանքով պատճառված վնասի հատուցում։
Ամբաստանյալ Կառլեն Արթուրի Սանոյանի գույքի վրա նախաքննության մարմնի 13.04.2012թ. որոշմամբ դրված կալանքը թողնել անփոփոխ` մինչև դատավճռի կատարումը։
Դատավճռի օրինական ուժի մեջ մտնելուց հետո, 13.04.2012թ. որոշմամբ իրեղեն ապացույց ճանաչված գորգը, էլեկտրական ջեռուցիչը և սառնարանը թողնել տուժող և քաղաքացիական հայցվոր Ռուզան Գևորգյանի տնօրինմանը։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։ Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։

ԴԱՏԱՎՈՐ` Մ. ՄԱՐՏԻՐՈՍՅԱՆ